Sikhľuv le aňjelendar

1, 2) (a) Andre soste sam aver sar o aňjela? (b) Andre soste sam ajse ista sar o aňjela?

JEHOVASKERO ľudos hin jekh bari fameľija, savi pes rado dikhel a savi ašarel le Jehovas. Andre kadi fameľija hine o phrala the o pheňa pal calo svetos, aľe tiš milijoni aňjela. (Daňj. 7:9, 10) Te rozmišľinas pal o aňjela, šaj amenge avel andro šero, hoj hine aver sar amen. Dživenas sigeder sar sas kerde o manuša. (Job 38:4, 7) Hine zoraleder sar amen. Tiš hine svata andre savoreste a amen sam ňedokonala. (Luk. 9:26)

² Aľe andre varesoste sam ajse ista. O aňjela the amen džanas te el ajse sar o Jehovas. On the amen peske šaj kidas avri, so keraha andro dživipen. Dojekhe aňjelos hin peskero menos a dojekhes lendar hin aver natura. A tiš o Jehovas sakoneske diňa aver buťi. Kavka isto oda hin the maškar o manuša. O manuša the o aňjela sas kerde avka, hoj lenge kampel te ašarel le Devles, bo ča akor avena bachtale. (1. Peter 1:12)

3) So šaj sikhľuvas le vernone aňjelendar?

³ Vaš oda, hoj sam andro but veci ajse ista sar o aňjela, lengero šukar priklados amen šaj podhazdel a šaj lendar vareso lačho sikhľuvas: Sar te ačhel pokorna, sar te kamel le manušen, sar te ľikerel avri andro pharipena a so te kerel, kaj o zboros te ačhel žužo. O verna aňjela hine predal amende baro priklados.

O AŇJELA PRESIKAVEN E POKORA

4) (a) Sar o aňjela presikaven e pokora? (b) Soske hine o aňjela pokorna? (Žalm 89:7)

⁴ O verna aňjela hine pokorna. Džanen igen but. Hine goďaver the zorale. Aľe the avka keren sar phenel o Jehovas. (Žalm 103:20) Te keren varesavi buťi, savi lenge diňa o Jehovas, ňigda pes na ašaren so keren aňi na presikaven peskeri bari zor, kaj pes te hazden upre. Hine rade, te šaj vareso keren predal o Jehovas, the te ňiko na džanela, hoj on oda kerde.a (1. Mojž. 32:24, 29; 2. Kraľ. 19:35) A ňigda na kamen, kaj len vareko te ašarel avka sar le Devles. O aňjela hine pokorna, bo igen kamen le Jehovas. A andro jilo presikaven, hoj hino nekbareder. (Pregen Žalm 89:7.)b

5) Sar o aňjelos sikaďa e pokora akor, sar diňa e rada le apoštoloske Janoske? (Dikh the obrazkos.)

⁵ Dikhaha jekh pribehos, savo amenge sikavel, hoj o aňjela hine čačes pokorna. Khatar o berš 96 jekh aňjelos, saveskero menos na džanas, sikaďa le apoštoloske Janoske vareso igen baro. (Zjav. 1:1) Sar kada o Jan dikhľa, kamľa les te ašarel sar le Devles. Aľe kada verno aňjelos les sig zaačhaďa a phenďa leske: „So keres! Kada ma ker! Som ča kajso otrokos sar tu the tire phrala... Služin le Devleske!“ (Zjav. 19:10) Dikhas kodi pokora? O aňjelos na kamľa, kaj les vareko te ašarel, kaj vareko pre leste te phenel, hoj hino baro, aľe minďar phenďa le Janoske, kaj te ašarel ča le Jehovas. Tiš o aňjelos na dikhelas pro Jan upral. Na phenďa peske: „Me imar služinav le Devleske buter, me som buter sar o Jan.“ Aľe phenďa šukar lavenca, hoj the ov hino otrokos avka sar o Jan. The te kampľa, kaj le Janoske te del e rada, na sas pre leste zoralo, aľe vakerelas leha le jileskere lavenca. Achaľiľa, soske o Jan banďiľa anglal leste, hoj sas hotovo olestar, so dikhľa a na džanel so te kerel.

6) Sar šaj presikavas e pokora avka isto sar o aňjela?

⁶ The amen kamas te el ajse pokorna sar o aňjela. Na kamas te el ajse, hoj avrenge sikavas, save sam goďaver, so savoro džanas te kerel. Šaj amen el bareder ulohi andro zboros sar avren abo šaj služinas buter berš le Jehovaske, aľe the avka peske na kamas te mišľinel, hoj sam feder sar aver. (1. Kor. 4:7) Čačipen hin, hoj so buter keras predal o Jehovas, ta pokorneder kamas te el. (Luk. 9:48) Avka isto sar o aňjela, kamas avrenge te služinel a na te hazdel pes upre.

7) Sar šaj presikavas e pokora, te varekaske kampel te dophenel abo te del e rada?

⁷ Tiš kamas te presikavel e pokora akor, te kampel varekaske te dophenel abo te del e rada. Šaj oda el vareko andal o zboros abo amare čhavendar. Varekana kampel te phenel varekaske andro jakha. Aľe kamas te el sar oda aňjelos, savo jileskere lavenca dophenďa le Janoske. The te phenas andro jakha, na kamas avren te thovel tele. Kada pes del ča akor, te andre amare jakha na sam feder sar aver. A te kada avka hin, džanas avreske te presikavel e paťiv the o kamiben, te das e rada andal e Biblija. (Kol. 4:6)

O AŇJELA KAMEN LE MANUŠEN

8) (a) Sar o aňjela sikaven, hoj kamen le manušen? (Lukaš 15:10) (b) Sar amenge o aňjela pomožinen andre zvestovaťeľsko služba? (Dikh the pre angluňi sera.)

⁸ O aňjela pes na odcirden le manušendar. Nane dur, aľe igen amen rado dikhen. Radisaľon, te vareko bajinel a visarel pes pale. Abo te varesavo phral abo pheň, so preačhiľa te phirel, pale chudňa te phirel andro zboros. Tiš radisaľon, te vareko nevo sprindžarel le Jehovas a prekerel peskero dživipen, kaj leske te služinel. (Pregen Lukaš 15:10.) Le aňjelen hin buťi andre zvestovaťeľsko služba. (Zjav. 14:6) Na vakeren andre služba, aľe šaj ľidžan varesave zvestovaťeľis ke varekaste, ko kamel te sprindžarel o čačipen pal o Jehovas. Našťi presňe phenas, kana varekas ľigende ke varekaste. Bo džanas, hoj o Jehovas prekal peskero svato duchos džanel le manušenge te pomožinel abo džanel kavka varekas ke varekaste te bičhavel. (Sk. 16:6, 7) Aľe the avka o aňjela amenge pomožinen andre služba. Vaš oda, te vakeras avrenge pal e lačhi sprava, šaj peske avas ista, hoj o aňjela hine amenca, kaj amenge te pomožinen. (Dikh the o ramčekos „Lengere modľitbi sas šunde avri“.)c

9) Soha šaj sikavas, hoj kamas le manušen avka sar o aňjela?

⁹ The amen kamas te presikavel o kamiben le manušenge avka sar o aňjela. O aňjela radisaľon, te hino vareko pale prijato andro zboros. A amen kamas avka isto te radisaľol. Kamas kole manušeske te sikavel, hoj sam rade, hoj hino pale andro zboros a hoj amenge hin andro jilo. (Luk. 15:4–7; 2. Kor. 2:6–8) O aňjela hine buťakere andre služba a amen kamas te el ajse ista. (Kaz. 11:6) A avka sar o aňjela amenge pomožinen andre služba, the amen kamas te pomožinel amare phralenge the pheňenge andre služba. Šaj vičinas andre služba varekas, ko mek na džanel avka te zvestinel. Abo šaj pomožinas phuredere phralenge the pheňenge, abo nasvalenge, kaj the on te en andre služba.

10) So sikhľos olestar, so zadžiďiľa e Sara?

¹⁰ Aľe so te pes amenge akana na del te služinel buter le Jehovaske sar kamas? The avka peske šaj avas ista, hoj o aňjela amenge džanen te pomožinel te zvestinel. Dikhaha, so zadžiďiľa e pheň e Sara.d Oj hiňi prjekopňička andal e Indija. Sar služinelas imar 20 berš andre prjekopňicko, nasvaľiľa a avka ačhiľa pro haďos, bo na delas pes lake te phirel aňi te bešel. Achaľuvas, hoj kalestar sas la o depresiji, aľe o phrala the pheňa lake jilestar pomožinenas. Tiš peske genelas sako ďives e Biblija a kavka pale chudňa te radisaľol le dživipnastar. Vaš oda, hoj pes lake imar na delas te zvestinel sar sigeder, mušinďa vareso te vimišľinel. Našťi bešelas a na delas pes lake te pisinel aňi o ľila. Džanelas ča te vičinel. Vičinelas olenge, so varekana lenca delas e duma. A on lake phende, hoj the aver kamen pal o čačipen te vakerel. Ke soste oda ľidžalas? Tel o paru čhona sas la Sara 70 študiji. Buter sar džanelas te ľidžal. Vaš oda varesaven diňa aver phralenge the pheňenge andal o zboros. But olendar, so len sikhľarel, phiren pro zhromažďeňa. No so phenen, save bachtale mušinen te el o aňjela, save keren e buťi jekhetane olenca, so hine sar e Sara, save andre služba den calo jilo?

O AŇJELA DŽANEN TE ĽIKEREL AVRI

11) Sostar dičhol, hoj o verna aňjela džanen te ľikerel avri?

¹¹ O verna aňjela amenge šukares sikaven, hoj džanen te ľikerel avri. Imar ezera berša zadživen nalačhipen the ňespravodlivosť. Pre peskere jakha dikhle sar o Satan peskere aňjelenca preačhile te služinel le Jehovaske a mek džanas proťi leste. (1. Mojž. 3:1; 6:1, 2; Juda 6) Tiš andal e Biblija dikhas, hoj pre jekh zoralo aňjelos džalas jekh demonos. A ov pes leha mušinďa te marel buter ďivesa. (Daňj. 10:13) Tiš akorestar sar sas o Adam la Evaha, o aňjela dikhle, hoj ča frima manuša chudne te služinel le Jehovaske. A the te kada savoro nalačhipen zadžiďile a dikhle, ňič lenca oda na kerďa. Aľe dureder vernones služinen le Devleske radišagoha the calone jilestar. Bo džanen, hoj andre peskero časos o Del odčhivela savoro nalačhipen. A vaš oda ľikeren avri.

12) So amenge pomožinel te ľikerel avri?

¹² The amen šaj ľikeras avri avka sar o aňjela. O aňjela zadživenas trapišagos, pharipena, tiš džanas pre lende. Aľe džanenas oda te ľikerel avri. A avka isto the amen oda džanas te ľikerel avri. Sar on, the amen paťas, hoj o Jehovas andre peskero časos odčhivela savoro nalačhipen. Avka sar o verna aňjela, aňi amen „na preačhas te kerel o lačhipen“. (Gal. 6:9) Tiš o Del amenge sľubinďa, hoj amenge pomožinela te ľikerel avri. (1. Kor. 10:13) A vaš oda les šaj mangas, kaj amenge te del peskero duchos, savo amenge pomožinel, kaj te džanas te užarel a kaj amen te el o radišagos. (Gal. 5:22; Kol. 1:11) A te pre tute vareko džal, zmukh tut pro Jehovas a ma dara. O Jehovas tut furt podhazdela a dela tuke e zor. (Hebr. 13:6)

POMOŽINEN, KAJ O ZBOROS TE AČHEL ŽUŽO

13) Savi špecijalno buťi diňa o Jehovas le aňjelenge? (Matuš 13:47–49)

¹³ O čačipen, savo vakeras pricirdel le manušen. Varesave kale manušendar keren sa predal ada, kaj pes te den te bolel. Aľe varesave preačhen. A kadi špecijalno uloha andre kala posledna ďivesa diňa o Jehovas le aňjelenge, hoj „thovena pre sera le nalačhen le lačhendar“. (Pregen Matuš 13:47–49.) Kada amenge sikavel, hoj lengeri buťi hin te pomožinel, kaj andro zboros pes te na dochudel vareko nalačho. Na sikavel ada, hoj ola, so preačhile, imar pes našťi visaren pale. Aňi oda na sikavel, hoj andro zboros na ena ňisave problemi. Aľe the avka šaj peske avas ista, hoj o aňjela keren, so pes lenge ča del, kaj o zboros te ačhel žužo.

14, 15) So šaj keras, kaj o zboros te ačhel žužo? (Dikh the obrazki.)

¹⁴ O aňjela pomožinen, kaj o zboros te ačhel žužo. So šaj keras amen? Kampel, kaj peske te das pozoris pre savoro, so amen odcirdel le Jehovastar. A oda šaj keras avka, hoj avaha ča ajse manušenca, so kamen le Jehovas calone jilestar. A te kavka keras, o zboros šaj ačhel žužo. (Žalm 101:3) Aľe tiš šaj pomožinas amare phralenge the pheňenge, kaj te ačhen le Jehovaske verna. Te džanas, hoj varesavo phral abo varesavi pheň kerďa baro binos, džaha pal lende a podhazdaha len, kaj te džan pal o phuredera. A te na džana, ta paľis džaha pal o phuredera amen. Keras oda vaš kada, bo len rado dikhas. Kamas, kaj o phuredera so neksigeder te pomožinen le phraleske abo la pheňake. (Jak. 5:14, 15)

¹⁵ Hin oda smutno, aľe varesave na kamen te preačhel te kerel baro binos a avka mušinen te el thode pre sera le zborostar. Akor kamas te doľikerel o lava „na aven ajsenca“.e (1. Kor. 5:9–13) Te avka keras, pomožinas, kaj o zboros te ačhel žužo. Tiš sikavas o jilo olenge, so sas thode pre sera, bo avka šaj chuden e goďi. A avena pre kada, hoj lenge kampel, kaj pes te visaren pale. Te kada kerena, radisaľuvaha amen, o Jehovas the o aňjela. (Luk. 15:7)

16) Andre soste peske kamas te lel o priklados le aňjelendar?

¹⁶ Hin igen baro, hoj o Jehovas amenge domukhel te sikhľol pal o aňjela a kaj lenca te keras jekhetane e buťi. Avka sar on the amen kamas te presikavel e pokora. Kamas rado te dikhel le manušen. Kamas te ľikerel avri andro pharipena. A kamas te pomožinel, kaj o zboros te ačhel žužo. Te sikhľuvaha le vernone aňjelendar, the amen šaj ačhas andre le Jehovaskeri fameľija pro furt.