Мај

О баро бокхалипе со сине ки цело пхув погодинѓа исто аѓаар е христијанен таро прво веко да. О поглаварија сигурно секиринѓе пе сар ка грижинен пе баши пумари фамилија. А сар осетинѓе пе о терне кола со планиринѓе повише те џан ки служба? Дали мислинѓе песке кај мора те откажинен пе тари пумари цел? Ола прилагодинѓе пе спрема пле околностија. Понадари да проповединена сине кобор со шај хем делинена сине са со сине лен е јавере пхраленцар хем пхењенцар тари Јудеја (Апо. 11:29, 30). Окола со добинѓе материјално помош осетинѓе е Јеховаскири поддршка (Мат. 6:31-33). Сигурно осетинѓе пе паше околенцар со поможинѓе ленге. Ама окола да со денѓе паре или поможинѓе ко јекх јавер начин осетинѓе и радост со авела таро дејбе (Апо. 20:35; w23.04 16, пас. 12-13).

Понекогаш о Јехова користинела е манушен со на служинена леске те шај те одговоринел ко молитве пле слугенгере. На пример, ов керѓа о цари о Артаксеркс те мукхел е Неемија те иранел пе ко Ерусалим те шај те поможинел палем те градинел пе и диз (Неем. 2:3-6). Авдиве да о Јехова шај те поттикнинел чак околен со на служинена леске те поможинен амен. Најчесто о Јехова на одговоринела ко амаре молитве ко јекх посебно начин. Ама о одговорија со добинаја лен тане баш адала со ваљани аменге те шај те ачхова верна амаре небесно Дадеске. Адалеске шукар приметин сар о Јехова одговоринела ко тле молитве. Понекогаш одвојн туке време те размислине башо адава сар о Јехова одговоринела ко тле молитве (Пс. 66:19, 20). Мора те сикава вера на само аѓаар со ка молина амен, него хем аѓаар со ка прифатина е Јеховаскоро одговор бизи разлика сар ка добина ле (Евр. 11:6; w23.05 11, пас. 13; 12, пас. 15-16).

Кеда денѓем завет е Јеховаске, денѓем леске лафи кај ка служина леске хем кај ка кера лескири волја. Амен мора те живина спрема акава завет. Адава товар нане добором пхаро со нашти те пхирава ле. Соске шај те вакера адава? Адалеске со о Јехова створинѓа амен те кера лескири волја (Отк. 4:11). О Јехова створинѓа амен духовна потребенцар хем спрема пло лико. Адалеске шај те ова паше леа, хем те ова радосна џикоте кераја лескири волја. Исто аѓаар, кеда кераја е Девлескири волја хем оваја са повише сар лескоро Чхаво, тегани ка овел амен неви сила (Мат. 11:28-30). Адалеске понадари да бајрар тло мангипе спрема о Јехова. Шај те кере адава аѓаар со ка размислине башо са о шукар буќа со керѓа лен туке хем башо благословија со ка добине лен ки иднина. Кобор повише ка бајрол тло мангипе спрема о Девел, добором полокхо ка овел туке те шуне ле (1. Јов. 5:3). О Исус успешно керѓа е Девлескири волја адалеске со молинѓа е Јехова баши помош хем мислинѓа ки пли награда (Евр. 5:7; 12:2). Исто сар о Исус, молин е Јехова баши сила хем понадари да нека овел тут ки годи и надеж башо вечно живото (w23.08 27-28, пас. 4-5).

Сарине амен ценинаја е манушен сој тане стрплива. На пример, поштујнаја околен со шај те аџикерен нешто бизо те нервиринен пе. Ценинаја кеда о јавера тане стрплива аменцар кеда грешинаја. Исто аѓаар благодарна сием околеске со проучинѓа аменцар и Библија адалеске со сине стрпливо аменцар џикоте мучинѓем амен те сикљова, те прифатина или те применина о библиска сикљојба. А сој најважно, благодарна сием е Јеховаске адалеске сој тано стрпливо аменцар. Иако ценинаја е јаверенгири стрпливост, аменге лично шај те овел пхаро те ова стрплива. На пример, шај те овел аменге пхаро те ачхова смириме кеда иси гужва ко сообраќај, посебно ако каснинаја. Или шај сигате те хољана ако некој нервиринела амен. А понекогаш шај те овел аменге пхаро те аџикера о нево свето со ветинѓа ле о Јехова. Ко са акала ситуацие ваљани аменге повише стрпливост (w23.08 20, пас. 1-2).

О Јехова вакерѓа е Гедеонеске те бичхалел скоро са пле војникон кхере. Ов шај сине те мислинел песке: „Дали акаја промена чаче сине потребно? Сар ка успејна?“ Бизи разлика со мислинѓа о Гедеон ов сине послушно. О старешине авдиве џана пало е Гедеонескоро пример адалеа со прилагодинена пе кеда иси промене ко упатствија (Евр. 13:17). О Гедеон ачхило послушно е Јеховаске иако дарала сине хем лескири задача сине опасно (Суд. 9:17). Откеда о Јехова некобор пути сикавѓа леске кај ка овел леа, о Гедеон сине целосно уверимо кај о Девел ка поможинел леске те заштитинел лескере народо. О старешине со живинена ко тхана коте со амаре активностија тане забраниме џана пало е Гедеонескоро пример. Ола храбро предводинена ко состанокија хем ки служба иако тане свесна кај шај те овен пханле, те овел лен проблемија е полицијаја, те нашавен пумари бути или те овен марде. Ки бари неволја е старешиненге ка ваљанел храброст те шунен о упатствија со ка добинен лен бизи разлика кобор ка овел опасно адава (w23.06 5-6, пас. 12-13).

О Јехова мукхља те овел пишимо о извештај е првосвештеникоскоро е Јодајескоро ки Библија те шај те сикљова лестар (Рим. 15:4). Кеда о Јодај муло, сине леске сикавди посебно чест адалеа со сине парумо „ки диз е Давидескири узо царија, соске керѓа шукарипе ко Израел, шукар служинѓа е чачутне Девлеске хем лескере кхереске“ (2. Лет. 24:15, 16). О извештај башо Јодај шај те поможинел сариненге аменге понадари да те овел амен дар таро Девел. О старешине шај те џан пало пример е Јодајескоро аѓаар со секогаш ка роден начинија сар те заштитинен о собрание (Апо. 20:28). О попхуре шај те сикљовен таро Јодај кај ако дарана таро Јехова хем ачховена леске верна тегани ов шај те користинел лен те шај те исполнинел пли намера. О терне шај те приметинен сар о Јехова понашинѓа пе е Јодајеа хем те џан пало лескоро пример аѓаар со ка поштујнен е попхуре пхрален хем пхењен посебно околен со служинена више бут берша е Јеховаске (Изр. 16:31). Адалеске понадари да те поддржина околен со предводинена аѓаар со ка ова ленге послушна (Евр. 13:17; w23.06 17-18, пас. 14-15).

Ко состанокија, ов обѕирно кеда одлучинеа кобор пути ка манге те коментирине. Ако бут пути ваздаја амаро вас, шај те кера притисок е пхралеске со водинела те дел амен повише пути те коментирина иако е јаверен панда на сине лен прилика те коментиринен. Адава шај те обесхрабринел е јаверен хем те на манген више те вазден пумаро вас (Проп. 3:7). Кеда ко состанок бут објавителија ваздена пумаро вас, шај нане те овел амен прилика те коментирина кобор амен со мангаја. Понекогаш, о пхрал со водинела нашти те дел амен те коментирина секова пути кеда ка вазда амаро вас. Адава шај те разочаринел амен ама кеда ка случинел пе асавко нешто ма ле адава упри туте (Проп. 7:9). Ако нашти те коментирине кобор со ту мангеа, тегани соске на шунеа внимателно сар о јавера коментиринена хем пало состанок те пофалине лен? Ако пофалинеа е пхрален, адава тано исто добором охрабрувачко сар те пхене коментиринѓан (w23.04 23-24, пас. 14-16).

Проучин е Девлескоро Лафи хем хор размислин башо адава. Јекх каш со иси ле хор корења тано цврсто хем нашти локхесте те перел. Слично, ако иси амен силно вера која со темелинела пе ко е Девлескоро Лафи тегани амен да ка шај те ачхова цврста. Сар бајрола о каш ов мукхела са похор корења. Кеда проучинаја и Библија хем хор размислинаја баши лате, тегани бајрараја амари вера хем са повише сием увериме кај адава со вакерела о Девел тано најшукар (Кол. 2:6, 7). Размислин башо адава сар о Јехова водинѓа, советинѓа хем заштитинѓа пле слуген таро пурано време. На пример, ки јекх визија о Езекиел внимателно дикхела сине џикоте јекх ангели прецизно меринела сине о храми. Акаја визија охрабринѓа е Езекиеле хем дела амен практична поуке башо адава сар те икера амен ко е Јеховаскере мерилија те шај те обожавина ле ко чисто начин (Езек. 40:1-4; 43:10-12). Амен исто ка овел амен корист ако одвојнаја аменге време те проучина хем те размислина башо хор буќа таро е Девлескоро Лафи. Амен шај те овел амен одлучно вило хем целосно те овел амен доверба ко Јехова (Пс. 112:7; w23.07 18, пас. 15-16).

И Библија тани пхерди шукар примеренцар колендар со о терне пхраља шај те сикљовен. Акала мурша таро пурано време мангле е Девле хем керена сине различна задаче џикоте грижинена пе сине лескере народоске. Исто аѓаар, шај те аракхе шукар примерија ки тли фамилија хем ко собрание (Евр. 13:7). А исто шај бут те сикљове таро совршено пример е Исус Христосескоро (1. Пет. 2:21). Џикоте проучинеа акала примерија, размислин башо ленгере шуже особине (Евр. 12:1, 2). Пало адава одлучин ко кола начинија шај те џа пало ленгоро пример. Јекх мануш коле со иси ле способност те проценинел о буќа, шукар размислинела англедер те керел нешто. Адалеске, де тутар са те развине хем те на нашаве акаја способност. Почмин аѓаар со ка сикљове о библиска начелија хем пало адава размислин соске ола тане тле шукарипаске. Пало адава, користин акала начелија те шај те ане одлуке кола со ка радујнкерен е Јехова (Пс. 119:9). Адава бут ка поможинел туке те ове зрело христијани (Изр. 2:11, 12; Евр. 5:14; w23.12 24-25, пас. 4-5).

О родителија шај те сикавен пумаре чхавен башо адава сар те одговоринен ко љубезно начин кеда бранинена пумаре верувања (Јак. 3:13). На пример, несаве родителија ки Фамилијарно рат вежбинена сар шај о чхаве те керен адава. Ола заедно разглединена теме баши коленде со шај те пучен лен ки школа. Керена лафи хем вежбинена сар те одговоринен ко несаво пучибе хем сикавена пумаре чхавен сар шај те керен лафи ко јекх смирено хем љубезно начин. Асавке вежбе шај те поможинен е терненге те уверинен коркори пес хем те објаснинен е јаверенге кола шукар причине иси лен башо адава ко со верујнена. Ки рубрика „О терне пучена“ со аракхљовела ки jw.org иси хем работна листија башо тинејџерија. Ола тане керде те шај те поможинен е терненге те керен позорали пумари вера хем те спреминен одговорија пле лафенцар. Адава со сар фамилија ка проучина акаја рубрика, ка поможинел аменге те бранина амари вера ко јекх смиримо хем љубезно начин (w23.09 17, пас. 10; 18, пас. 15-16).

Дали некогаш чхивѓан туке духовно цел ама сине туке пхаро те исполнине ла? Ако оја, на случинѓа пе само туке адава. На пример, о Филип чхивѓа песке цел те молинел пе поредовно хем пошукар ама сине леске пхаро те одвојнел време башо адава. И Ерика чхивѓа песке цел те ресел ко време ко состанокија баши служба, сепак скоро секова состанок понадари да каснинела сине. Ако иси тут несави цел која со панда на исполнинѓан ла, молинаја тут ма обесхрабрин тут. Те шај те исполнинен пе чак тикне целија обично ваљани време хем бут трудо. Адава со понадари да кереа бути ки тли цел сикавела кај туке бут важно тло амалипе е Јеховаја хем кај мангеа те де леске тло најшукар. О Јехова бут ценинела тло трудо. Џанѓола пе, ов на очекујнела тутар нешто со нашти те кере (Пс. 103:14; Мих. 6:8). Адалеске, кеда чхивеа туке несави цел размислин дали тле околностија ка дозволинен туке те исполнине ла (w23.05 26, пас. 1-2).

О храбра мануша шај те даран, ама ола на дозволинена адаја дар те чхинавел лен те керен адава сој исправно. Иако о Даниел сине терно ов сине бут храбро. Ов проучинела сине адава со пишинѓе о пророкија, машкар коленде сој хем о пророштво таро Еремија. Таро адава со проучинѓа, о Даниел покасно халило кај панда хари о Евреија со сине бершенцар ко Вавилон ка овен ослободиме таро ропство (Дан. 9:2). Адава со дикхља сар исполнинена пе о пророштвија, сигурно бајрарѓа е Даниелескири доверба ко Јехова. А околен со иси лен бари доверба ко Девел шај те сикавен бари храброст. (Споредин Римјања 8:32, 37-39.) А сој најважно, о Даниел бут пути молинела пе сине пле небесно Дадеске (Дан. 6:10). Ов признајнела сине леске пле гревија хем вакерела леске сине сар осетинела пе. А исто аѓаар, родела лестар сине помош (Дан. 9:4, 5, 19). О Даниел да сине мануш сар аменде, ов да на бијандило храбро него развинѓа акаја особина соске проучинѓа, молинѓа пе хем сине ле доверба ко Јехова (w23.08 3, пас. 4; 4, пас. 7).

Кеда сием послушна е властенге, адава тано башо амаро шукарипе хем е јаверенгоро. Соске вакераја аѓаар? Сар прво нане те ова казниме ако шунаја о закони (Рим. 13:1, 4). Кеда сием послушна е властенге, поможинаја е јаверенге шукар те дикхен ко е Јеховаскере сведокија. На пример, англедер бут берша ки Нигерија џикоте икерела пе сине состанок, ки дворана кхувѓе војникија те роден бунтовникија кола со на мангена сине те платинен данок. Ама о офицери вакерѓа е војниконге те џан песке адатхар, соске е Јеховаскере сведокија секогаш платинена данок. Секогаш кеда сиан послушно е законеске поможинеа те икерел пе чисто о анав е Јеховаскере сведоконгоро хем јекх диве адава шај те заштитинел те пхрален хем те пхењен (w23.10 9, пас. 13).

Несаве слуге е Јеховаскере бут берша више аџикерена те авел о крајо акале светоскоро. Сар мануша шај те мислина аменге кај адалеске со о крајо акале светоскоро панда на ало о Јехова каснинела. Ама ов џанела сар осетинена пе лескере слуге, адалеске ов уверинѓа е пророко е Авакуме: „И визија ка исполнинел пе ко пло време хем сиѓарела спрема о крајо хем нане те ховавел. Чак хем те дикхјол сар те пхене каснинела, аџикер ла соске сигурно ка исполнинел пе хем нане те каснинел“ (Авак. 2:3). Дали о Девел вакерѓа акала лафија те шај те поможинел само е Авакумеске, или акала лафија важинена аменге да авдиве? О Јехова водинѓа е апостол Павле те применинел адала лафија упро христијања кола со едвај аџикерена о нево свето (Евр. 10:37). Значи шај те ова сигурна кај чак ако мислинаја кај е Девлескоро ветување каснинела ов сигурно ка исполнинел пе, нане те каснинел! (w23.04 30, пас. 16).

О Израелција отфрлинѓе о јасно доказ кај о Јехова користинела е Мојсее сар пло претставнико (4. Мој. 14:10, 11). Ола цело време одбинена сине те прифатинен и улога е Мојсеескири. Адалеске, о Јехова на мукхља е Израелцон те кхувен ки Ветими пхув (4. Мој. 14:30). Сепак, несаве Израелција џана сине пало водство е Јеховаскоро. На пример, о Јехова вакерѓа: „О Халев... шунѓа ман ко са“ (4. Мој. 14:24). О Девел благословинѓа е Халеве, па чак мукхља ле те биринел кај ка живинел ки Ветими пхув (Ис. Нав. 14:12-14). Окола да Израелција коленге со сине дозволимо те кхувен ки Ветими пхув, денѓе шукар пример адалеа со геле пало е Јеховаскоро водство. Кеда о Исус Навин сине биримо сар водачи е Израелцонгоро ко е Мојсеескоро тхан, ола хор поштујнѓе ле џи ко крајо таро пумаро живото (Ис. Нав. 4:14). Адалеске о Јехова благословинѓа лен хем денѓа лен и пхув со ветинѓа ленге (Ис. Нав. 21:43, 44; w24.02 21, пас. 6-7).

Кеда о доктори проверинела амаро пулси, ов шај те дознајнел кобор силно кхувела амаро срце. Слично, амен шај те дознајна кобор силно тано амаро мангипе спрема о Девел аѓаар со ка проверина кобор силно тано амаро мангипе спрема амаре пхраља. Ако приметинаја кај амаро мангипе спрема о пхраља слабонѓа, адава шај те овел знако кај амаро мангипе спрема о Девел исто аѓаар слабонѓа. Ама кеда секогаш сикаваја мангипе амаре пхраленге адава тано знако кај амаро мангипе спрема о Девел тано силно. Ако амаро мангипе спрема о пхраља хем о пхења почминела те слабонел, адава тано сериозно проблеми. Соске? Адалеске со адава сикавела кај амари духовност тани ки опасност. О апостол Јован јасно вакерѓа: „Кој на мангела пе пхрале, касте со дикхела, нашти те мангел е Девле, касте со на дикхела“ (1. Јов. 4:20). Која тани и поука аменге? О Јехова ка овел задоволно амендар само ако мангаја амен јекх јекхеа (1. Јов. 4:7-9, 11; w23.11 8, пас. 3; 9, пас. 5-6).

Кеда о Јоас сине терно, ов анѓа мудро одлука. Адалеске со на сине ле дад, ов шунѓа о водство е Јодајескоро кова со сине првосвештенико хем верно слуга е Јеховаскоро. О Јодај аракхља ле сар пло чхаво. Адалеске о Јоас одлучинѓа те служинел е Јеховаске хем те поможинел е народоске те керел о исто. Ов чак организиринѓа те поправинел пе е Јеховаскоро храми (2. Лет. 24:1, 2, 4, 13, 14). Ако тле родителија, или некој јавер, воспитинена тут те манге е Јехова хем те живине спрема лескере мерилија, тегани добинѓан јекх бут скапоцено поклон (Изр. 2:1, 10-12). Тле родителија шај ко различна начинија те сикавен тут башо Јехова. Ола ка радујнен пе ако шунеа о библиска советија со дена тут. А сој најважно, адалеа ка радујнкере е Девле хем тло амалипе леа ка овел позорало (Изр. 22:6; 23:15, 24). Акала тане шукар причине те џа пало пример со денѓа амен о Јоас кеда сине терно (w23.09 8-9, пас. 3-5).

О Јехова ветинела аменге кај ка шунел амаре молитве. Амаро Девел мангела амен соске верно служинаја леске хем ов секогаш ка шунел амаре молитве (Пс. 10:17; 37:28). Ама акава на значинела кај ов ка дел амен са со родаја лестар. Башо несаве буќа со родаја лестар шај ка ваљани те аџикера џи ко нево свето. Кеда шунела амаре молитве, о Јехова лела ко предвид пли намера (Иса. 55:8, 9). Јекх дело тари лескири намера тани и пхув те овел пхерди манушенцар кола со радосно ка служинен леске сар Владетели. Ама о Сатана вакерела кај е манушенге ка овел пошукар ако ола коркори владинена (1. Мој. 3:1-5). Те шај те докажинел кај адава со вакерела о Сатана тано ховајбе, о Јехова дозволинѓа е манушенге те владинен. Ама амен шај јасно те дикха кај о манушикано владибе анѓа бут таро проблемија со иси амен авдиве (Проп. 8:9). Свесна сием кај о Јехова нане одма те цидел са акала проблемија (w23.11 21, пас. 4-5).

О Јехова ветинѓа кај преку о Авраам „бут народија“ ка овен благословиме. Ама накхле бут берша, е Аврааме сине ле 100 берш, е Сара 90 берш, а о чхаво со сине ленге ветимо панда на добинѓе ле. Ола шај сине те мислинен кај нашти те овел лен чхаве адалеске сој тане бут пхуре. Акава сине баро испит е Авраамеске. Сепак, баши леске читинаја: „Сине ле надеж кај ка овел дад буте народонге хем адалеске сине ле вера“ (Рим. 4:18, 19). Ко крајо, лескири надеж исполнинѓа пе. Бијандило леске о Исак — о чхаво коле со бут време аџикерѓа (Рим. 4:20-22). Шај те овел амен е Девлескоро одобрување хем те ова лескере праведна амала, исто сар со сине о Авраам. Адава истакнинѓа о Павле кеда пишинѓа: „О лафија ’ов дикхела ле сине сар праведно‘, на сине пишиме само баши лесте [о Авраам], него сине пишиме хем аменге да. Адалеске со верујнаја ко Девел, кова со воскреснинѓа таро муле е Исусе, амаре Господаре“ (Рим. 4:23, 24). Исто сар о Авраам, ваљани те овел амен вера ко Јехова, те постапина шукар хем те овел амен надеж (w23.12 7, пас. 16-17).

Кеда иси тут несаво проблеми колестар со дараја, ма бистре кај о Јехова на само сој свесно башо адава проблеми, него ов исто аѓаар џанела сар осетинеа тут. На пример, о Јехова на само со дикхља кај о Израелција сине мучиме ко Египет, него ов исто аѓаар дикхља „ленгере дукха“ (2. Мој. 3:7). Понекогаш несаво проблеми добором бут даравела амен со нашти те дикха сар о Јехова поможинела амен. Тегани, со шај те кере? Молин ле те поможинел туке те дикхе сар поддржинела тут (2. Цар. 6:15-17). Пало адава размислин: Дали ко состанок зајакнинѓа тут несаво говор или коментари? Дали несави публикација, видеоклипи или несави таро амаре гиља охрабринѓа тут? Дали некој вакерѓа туке несави мисла или читинѓа туке стихо колеа со утешинѓа тут? Локхе шај те мислина аменге кај о мангипе е пхраленгоро хем и духовно храна тано нешто нормално со ваљани те добина. Ама ма те бистра ола тане баре поклонија таро Јехова (Иса. 65:13; Мар. 10:29, 30). Ола тане доказ кај ов грижинела пе аменге (Иса. 49:14-16). Исто аѓаар, ола тане доказ кај о Јехова заслужинела тли доверба (w24.01 4-5, пас. 9-10).

Кратко англедер те иранел пе ко небо, о Исус потсетинѓа пле ученикон баши задача со денѓа лен, те сведочинен башо лескоро анав „ко цело Ерусалим, ки цело Јудеја хем Самарија хем ко најдур тхана ки пхув“ (Апо. 1:8; Лука 24:46-48). Кратко пало адава о еврејска верска водачија астарѓе е Петаре хем е Јоване хем ингарѓе лен ко судско совет. Ола вакерѓе акале верна муршенге те чхинавен те проповединен хем чак заканинѓе пе ленге (Апо. 4:18, 21). О Петар хем о Јован вакерѓе: „Судинен коркори дали тано исправно англо Девел те шуна тумен, а на е Девле! А амен нашти те на кера лафи башо адава со дикхлем хем шунѓем“ (Апо. 4:19, 20). Кеда о Петар хем о Јован сине ослободиме, о ученикија молинѓе пе е Јеховаске башо адава понадари да те керен лескири волја. О Јехова одговоринѓа ки акаја искрено молитва (Апо. 4:31; w23.05 5, пас. 11-12).

О Јехова хем лескоро Чхаво накхавѓе време заедно повише него било кој јавер. Џикоте сине заедно бут милијарде берша, ола уле бут паше хем ленгоро мангипе јекх јекхеске бут барило. Сар со шај те читина ко авдисутно стихо, о Јехова јасно сикавѓа пло мангипе е Исусеске. О Јехова шај сине само те вакерел: „Акава тано окова со керела ман радосно“. Наместо адава, ов мангља те џана кобор бут мангела е Исусе, адалеске ов вакерѓа леске „мло мангло Чхаво“. О Јехова дичинела пе сине е Исусеа, посебно адалеске со сине спремно те дел пло живото (Еф. 1:7). А о Исус ни хари на сумнинѓа пе кај лескоро Дад мангела ле. Е Јеховаскоро мангипе сине добором реално е Исусеске со шај сине те осетинел ле хор ки песте. Ко повише прилике ов сикавѓа кај тано уверимо кај лескоро Дад мангела ле (Јован 3:35; 10:17; 17:24; w24.01 28, пас. 8).

Замислин кај некој со мангеа ле вакерела лошна буќа тутар. Ту џанеа кај адава нане чаче ама сепак несаве верујнѓе ле. Сој панда пострашно ола почминена те ширинен адава ховајбе хем панда бут јавера верујнѓе. Сар ка осетине тут? Адава ховајбе шај ка поврединел тут. Акаја измислими ситуација шај те поможинел амен те хаљова сар о Јехова осетинѓа пе кеда лескоро анав сине каљардо. Јекх таро лескере ангелија вакерѓа ховајба баши лесте е прво џувљаке е Еваке, хем ој верујнѓа ко адава ховајбе. Адава ховајбе керѓа о Адам хем и Ева те бунинен пе против о Јехова хем анѓа грево хем мерибе са е манушенге (1. Мој. 3:1-6; Рим. 5:12). Са о проблемија со дикхаја лен ко свето сар на пример, о мерибе, о војне, о муке, постојнена соске о Сатана ширинѓа ховајба. Дали е Јехова дукхала ле башо са адала ховајба хем о последице со авена лендар? Сигурно. Сепак, о Јехова на икерела холи. Наместо адава, ов понадари да тано „радосно Девел“ (1. Тим. 1:11; w24.02 8, пас. 1-2).

Сар шај те џа пало пример е Јосифескоро хем те ачхове верно е Девлеске кеда сиан искушимо? Шај панда акана те одлучине сар ка постапине кеда ка аракхљове ко искушение. Сикљов одма те циде тут таро буќа кола со о Јехова мрзинела лен, па чак ни ма размислин баши ленде (Пс. 97:10; 119:165). Адава ка поможинел туке те на кере грево кеда ка аракхљове ко искушение. Шај џанеа кај аракхљан о чачипе хем кај мангеа те служине е Јеховаске са тле вилеа, ама шај панда мислинеа кај на сиан спремно те де завет е Јеховаске хем те крстине тут. Шај те џа пало пример е царескоро е Давидескоро хем те молине е Јехова: „Дикх саво мануш сиум, о Девла, дикх со иси ман ко вило. Испитин ман хем дикх мле мисле кола со вознемиринена ман. Хем дикх, иси ли нешто ки манде со чхивела ман те џав ко лошно друмо хем ингар ман ко вечно друмо“ (Пс. 139:23, 24). Кеда молинеа тут аѓаар, ту сикавеа кај родеа помош таро Јехова хем кај кереа бути ки тли цел те де завет хем те крстине тут. А о Јехова благословинела „околен со родена ле ревно“ (Евр. 11:6; w24.03 6-7, пас.13-15).

О првосвештенико претставинела сине е народо англо Девел. О прво првосвештенико ко Израел, о Арон, сине чхивдо таро Јехова кеда о свето шатори сине посветимо. Ама сар со објаснинѓа о апостол Павле „адалеске со о мерибе чхинавела сине е свештеникон трајно те ачховен ки адаја служба ко ленгоро тхан мора сине те авел некој јавер сар свештенико“ (Евр. 7:23-26). Хем адалеске со сине несовршена, о првосвештеникија мора сине те ден жртве башо пле гревија. Акаја тани јекх важно разлика машкар о израелска првосвештеникија хем о баро првосвештенико, о Исус Христос. Сар амаро првосвештенико, о Исус Христос „тано слуга... кова со служинела е манушенге ко чачутно шатори со ваздинѓа ле о Јехова, а на мануш“ (Евр. 8:1, 2). О Павле исто аѓаар објаснинѓа кај „адалеске со [о Исус] живинела засекогаш, никој нане те лел лескири свештеничко служба“. О Павле понадари вакерѓа кај о Исус тано „чисто, одвојмо таро грешникија“ хем „на ваљани те дел секова диве жртве“ башо пле гревија, сар со керена сине о првосвештеникија ко Израел (w23.10 26, пас. 8-9).

О „пурано небо“ тане о политичка владе упри коленде со влијајнела о Сатана хем лескере демонија (Мат. 4:8, 9; 1. Јов. 5:19). Кеда ки Библија користинела пе о лафи „пхув“ шај те мислинел пе ко мануша (1. Мој. 11:1; Пс. 96:1). Спрема акава, и „пурани пхув“ тане о лошна мануша авдиве. О Јехова нане само те керел несаве промене ко акава „небо“ хем „пхув“, него скроз ка цидел лен. Ов ка заменинел лен е неве небоја хем е неве пхувјаја, адава значинела кај ка овел неви влада која со ка владинел упро праведна мануша. О Јехова ка керел и пхув хем е манушен сар неве хем ка анел лен џи ко совршенство. Исто сар со пророкујнѓа о Исаија, о Јехова ка керел и пхув јекх бут шужо тхан слично сар и еденско градина. Исто аѓаар секова јекх амендар ка овел обновимо, јавере лафенцар целосно сасљардо. О сакатија, о короле хем о кашуке ка овен састе хем чак о муле ка овен ираме ко живото (Иса. 25:8; 35:1-7; w23.11 4, пас. 9-10).

И „бари неволја“ ка почминел таро јекх пути (Мат. 24:21). Ама акаја неволја ка овел поразлично таро бут јавера катастрофе адалеске со бут џене ка овен спремна. Котар џанаја адава? Отприлика 2.000 берша англедер, о Исус предупрединѓа пле следбеникон те спреминен пе башо адава диве. Ако сием спремна ка овел аменге полокхо те издржина ко адава пхаро време хем те поможина е јаверенге исто аѓаар те издржинен (Лука 21:36). И истрајност ка поможинел аменге те ова послушна е Јеховаске хем те овел амен доверба ки лесте кај ка заштитинел амен. Со ка кера ако амаре пхраља нашавена нешто таро пумаре материјална буќа или палем ачховена бизо ништо? (Авак. 3:17, 18). О сочувство ка поттикнинел амен те поможина ленге. Со ка кера ако ваљани те живина заедно е пхраленцар несаво време адалеске со и коалиција таро са о народија нападинела амен? (Езек. 38:10-12). О силно мангипе ка поможинел аменге те накха таро адава пхаро време (w23.07 2, пас. 2-3).

О брачна парија шај бут те сикљовен таро Акила хем тари Прискила, јекх брачно пари кола со сине бут цениме таро христијања ко прво веко (Рим. 16:3, 4). Ола заедно керѓе бути, проповединѓе хем поможинѓе е јаверенге (Апо. 18:2, 3, 24-26). Уствари, секова пути кеда и Библија вакерела нешто башо Акила хем и Прискила ола тане спомниме заедно. Сар шај о брачна парија те овен сар ленде? Размислин кола буќа кереа лен ту хем кола буќа керела тло брачно партнери. Шај ли несаве таро адала буќа те керен лен заедно наместо коркори? На пример, о Акила хем и Прискила заедно џана сине ки служба. Дали тумен да редовно џана заедно ки служба? Ола исто аѓаар заедно керена сине бути. Шај ту хем тло брачно партнери на керена заедно бути ама дали шај о кхерутне буќа те завршинен лен заедно? (Проп. 4:9). Кеда заедно керена несави бути ка осетинен тумен сар јекх тими хем ка овел тумен прилика те керен туменге лафи (w23.05 22-23, пас. 10-12).

Секова јекх амендар понекогаш дарала. На пример, кеда о цари о Саул мангља те мударел е Давиде, о Давид одлучинѓа те нашел ки јекх филистејско диз, ко Гат. О Ахис, о цари тари акаја диз, сигате дознајнѓа кај о Давид сине адава моќно војнико колеске со сине пишими гили колате со фалинена ле сине кај мударѓа „бут милја“ Филистејцон. Адалеске о Давид „бут дарандило“ (1. Сам. 21:10-12). Дарандило со ка керел леске о Ахис. Со поможинѓа е Давидеске те побединел пли дар? Ко 56-то Псалм, о Давид пишинѓа сар осетинела пе сине џикоте сине ко Гат. Ко адава псалм ов јасно објаснинѓа соске дарала сине, ама исто аѓаар објаснинѓа со поможинѓа леске те на дарал више. Кеда дарала сине, сине ле доверба ко Јехова (Пс. 56:1-3, 11). Адава со сикавѓа доверба на сине џабе. Адалеске со поможинѓа леске о Јехова, о Давид анѓа јекх необично одлука — керѓа пе делино! Хем адава плани успејнѓа леске. О Ахис на дикхела сине више ко Давид сар јекх опасно мануш, него сар делино колестар со мангела сине те ослободинел пе. Хем аѓаар о Давид шај сине те нашел (1. Сам. 21:13 — 22:1; w24.01 2, пас. 1-3).

Кој тане адала сој спомниме ко авдисутно стихо? О помазаникија. Значи кеда о последно да помазанико ка овел лендо ко небо, ко крајо тари бари неволја, јекх таро ленгере прва задаче ка овел те боринен пе. Откеда ка воскреснинен те живинен ко небо, ола ка боринен пе заедно е Христосеа хем лескере света ангеленцар ки последно војна против е Девлескере душмања. Размислин со значинела адава. Џикоте тане ки пхув, несаве помазаникија тане бут пхуре хем нане лен више силе. Ама откеда ка воскреснинен те живинен ко небо, ола ка овен моќна хем бесмртна духовна личностија хем ка овел лен задача те боринен пе заедно пумаре Цареа хем Водачеа, е Исус Христосеа. Откеда ка завршинел и војна Армагедон, ола ка соработинен е Исусеа те шај те поможинен е манушенге те овен совршена. Сигурно, тегани таро небо ола ка шај те поможинен пумаре мангле пхраленге хем пхењенге ки пхув бут повише, него џикоте сине ки пхув сар несовршена мануша (w24.02 6-7, пас. 15-16).

Иако несаве тане спремна те ден завет е Јеховаске хем те крстинен пе, сепак мислинена пе дали те керен адава. Ола пучена пе: „Со ако пало мло крстибе керава сериозно грево хем исклучинена ман?“ Ако ту да дараја таро адава, ов уверимо кај о Јехова ка дел тут са со ваљани те шај те служине леске хем те живине аѓаар сар ов со мангела (Кол. 1:10). Ов исто аѓаар ка дел тут сила те шај те кере адава сој исправно. Адалеа со поможинѓа буте џененге, о Јехова више сикавѓа кај шај те керел адава (1. Кор. 10:13). Адалеске бут хари џене тане исклучиме таро собрание. О Јехова чаче поможинела пле слугенге те ачховен леске верна. Секова несовршено мануш тано ко искушение те керел нешто погрешно (Јак. 1:14). Сепак, ту ваљани те одлучине сар ка постапине кеда сиан ко искушение. Џанѓола пе, ко крајо тут иси тут контрола упро адава сар ка живине. Несаве мануша вакерена кај нане амен контрола упро амаре чувствија хем постапке. Ама адава нане точно. Ту шај те сикљове те контролирине тле погрешна желбе (w24.03 5-6, пас. 11-12).