Јуни

О Јехова благословинѓа е христијанен таро прво веко са џикоте прилагодинена пе сине ко околностија. Ола сине бут пути прогониме, понекогаш чак кеда ни хари на очекујнѓе адава. Те дикха со случинѓа пе е Варнаваске хем е апостол Павлеске џикоте проповединена сине ки Листра хем ко околна тхана. Ко почеток о мануша љубезно доџакерѓе лен хем спремно шунѓе лен. Ама покасно о противникија керѓе о народо те овел против о Павле хем несаве лендар каменујнѓе е Павле хем мукхле ле те мерел (Апо. 14:19). Ама о Варнава хем о Павле продолжинѓе те проповединен ко јекх јавер тхан. Саво сине о резултати? Ола керѓе бут ученикија хем ленгере лафија хем пример охрабринѓа е јавере христијанен (Апо. 14:21, 22). Буте џенен сине лен корист таро адава со о Варнава хем о Павле на откажинѓе пе таро проповедибе иако таро јекх пути сине прогониме. Са џикоте на откажинаја амен тари служба со доверинѓа аменге о Јехова, амен ка ова благословиме (w23.04 16-17, пас. 13-14).

Бут пути е Давидескоро живото сине ки опасност таро лескере душмања, хем ов често родела сине помош таро Јехова ки молитва. О Давид сине сигурно кај о Јехова шунѓа лескере молитве хем одговоринѓа ки ленде. Ту да шај те ове уверимо ко адава. И Библија уверинела амен кај о Јехова шај те дел амен и мудрост хем и сила со ваљани аменге те шај те истрајна. Ов шај те користинел амаре духовно фамилија или понекогаш чак околен со на служинена леске те шај те поможинен аменге. Иако о Јехова шај нане секогаш те одговоринел ко амаре молитве сар амен со очекујнаја, сепак увериме сием кај ов ка одговоринел ки ленде. Ов ка дел амен баш адава со ваљани аменге хем ко време кеда ваљани. Адалеске понадари да молин тут хем нека овел тут доверба кај о Јехова ка шунел тут хем ов уверимо кај ов ка грижинел пе туке акана хем кај ко нево свето ка дел сариненге адава со мангена (Пс. 145:16; w23.05 8, пас. 4; 13, пас. 17-18).

Фино тано те концентририне тут ко благословија со ка овен тут ако исполнинеа несави цел. Башо кола користија шај ту те размислине? Ако тли цел тани те читине и Библија или те кере пошукар тле молитве, размислин сар адава ка поможинел туке те ове попаше амал е Јеховаја (Пс. 145:18, 19). Или ако тли цел тани те развине христијанска особине, размислин сар адава ка поможинел тут те ове ко шукар односија е јаверенцар (Кол. 3:14). Шај те пишине туке таро кола причине мангеа те исполнине тли цел хем пало адава редовно дикх со пишинѓан. Исто аѓаар, дружин тут околенцар со ка охрабринен тут те исполнине тли цел (Изр. 13:20). Те ова искрена, саринен амен понекогаш нане амен бари желба те кера нешто. Дали адава значинела кај нашти те исполнина амари цел? На. Амен шај те исполнина амари цел чак кеда нане амен бари желба. Иако акава значинела кај ка ваљани те овел тут самоконтрола, ко крајо ка ове бут радосно адалеске со ка исполнине тли цел (w23.05 27-28, пас. 5-8).

Адава со џанаја кај иси амен одговорност башо амаре одлуке шај те поттикнинел амен те признајна амаре грешке, те променина амен хем те на повторина лен. Са акала буќа шај те поможинен аменге те ачхова ки трка е животоскири. Ако више анѓан несави погрешно одлука, прифатин и реалност. Ма користин тло време хем тли сила те шај те сикаве кај сиан ко право или палем те кривине тут или некас јавере. Наместо адава, признајн тли грешка хем кер адава со шај те кере спрема тле моментална околностија. Ако осетинеа тут криво башо нешто со керѓан погрешно, понизно роде е Јехова ки молитва, признајн леске тли грешка хем роде лестар те простинел туке (Пс. 25:11; 51:3, 4). Исто аѓаар, извинин тут околенге каске со грешинѓан хем ако тано потребно роде помош таро старешине (Јак. 5:14, 15). Сикљов таро тле грешке хем трудин тут те на повторине лен. Ако кереа адава, шај те ове сигурно кај о Јехова ка сикавел туке милост хем ка поддржинел тут (Пс. 103:8-13; w23.08 28-29, пас. 8-9).

О Јодај бут шукар влијајнѓа упро цари о Јоас. Адалеске џикоте сине терно ов мангља те угодинел е Јеховаске. Ама кеда о Јодај муло, о Јоас почминѓа те шунел е кнезон со чхинавѓе те служинен е Јеховаске (2. Лет. 24:4, 17, 18). Иако о Јехова сине лендар бут дукхавдо, ов понадари да бичхалела сине пророкон те шај те иранен пе леске, ама ола на мангле те шунен. Ола ни на мангле те шунен е Јодајескере чхаве, е Захарија, кова со на сине само е Јеховаскоро пророко хем свештенико него исто аѓаар е Јоасескоро братучети. Уствари, о цари о Јоас мударѓа е Захарија (2. Лет. 22:11; 24:19-22). Пало несаво време е Јоасе на сине ле више исправно дар таро Јехова. О Јехова вакерѓа: „Окола со на поштујнена ман, ме да нане те поштујнав лен“ (1. Сам. 2:30). Покасно јекх тикни сириско војска побединѓа е Јоасескере „баре војска“ хем ранинѓа ле (2. Лет. 24:24, 25). Е Јоасескере слуге мударѓе ле адалеске со мударѓа е Захарија (w23.06 18-19, пас. 16-17).

О апостол Павле несаво време сине ко Ефес, коте со проповединѓа хем сикавѓа е јаверен башо шукар хабери (Апо. 19:1, 8-10; 20:20, 21). Ов бут мангела сине е пхрален хем е пхењен хем мангља те поможинел лен те ачхон верна е Јеховаске. О Ефешања коленге со о Павле јекх пути пишинѓа, сине дело тари ховавни религија хем верујнена сине ко суеверие. О мануша ко Ефес живинена сине неморално хем понашинена пе сине безобразно. Ко театарска претставе, па чак ко верска прославе сине најнормално те користинен пе непристојна лафија (Еф. 5:3). Бут џене таро Ефешања „нашавѓе секова чувство башо морал“, лафија со дословно значинена „чхинавѓе те осетинен дукх“ (Еф. 4:17-19). Англедер те дознајнен е Јеховаскере мерилија башо исправно хем погрешно, ленгири совест на мучинела лен сине кеда керена нешто погрешно. Адалеске о Павле шај сине те вакерел кај ленгере „гоѓа тане ки темница хем тане дурјарде таро живото со дела о Девел“. Несаве таро Ефешања на ачхиле ки темница (w24.03 20, пас. 2, 4; 21, пас. 5-6).

Е Гедеонескири задача сар судија сине напорно. Кеда о Мадијамција нашле раќате тари борба, о Гедеон гело пали ленде хем мора сине те накхел тари језраелско долина џи ки река Јордан (Суд. 7:22). Дали о Гедеон ресља џи ко Јордан хем откажинѓа пе? На. Иако сине уморна, ов хем о 300 мурша накхле и река хем продолжинѓе те џан пали ленде. Ко крајо ресле е Мадијамцон хем побединѓе лен (Суд. 8:4-12). Е Гедеоне сине ле доверба кај о Јехова ка дел ле сила, хем о Јехова керѓа адава (Суд. 6:14, 34). Јекх пути, о Гедеон хем лескере мануша прастандиле пало дуј Мадијамска царија џикоте ола веројатно прастана сине камиленцар (Суд. 8:12, 21). Ама о Девел поможинѓа е Израелцонге те астарен лен хем те побединен ки адаја борба. Е старешинен да шај те овел лен доверба ко Јехова кова со никогаш на уморинела пе. Ов ка дел лен сила кеда ка ваљанел ленге (Иса. 40:28, 29; w23.06 6, пас. 14, 16).

Амен шај те овел амен одлучно вило бизи разлика саве предизвикија иси амен. Адалеске, нека овел тут доверба ко Јехова. Размислин сар користинѓа е Варакоске адава со сине ле доверба ко водство е Јеховаскоро. Иако ко цело Израел никас на сине копје или штити, о Јехова вакерѓа е Варакоске те џал те боринел пе против о Сисара хем лескири војска кола со сине ла бут оружје (Суд. 5:8). И пророчица и Девора вакерѓа е Варакоске те хулел тари планина хем те џал те боринел пе е Сисараја хем лескере 900 воена кочиенцар. Е Израелцонге ка овел сине бут пхаро те боринен пе ко рамно терен е Ханаанценцар адалеске со сине бут побрза лендар. Иако о Варак џанља адава, сепак ов сине послушно. Џикоте о војникија хулена сине тари планина Тавор, о Јехова керѓа те дел баро бршим. О воена кочие е Сисараскере заглавинѓе ки чик хем аѓаар о Јехова поможинѓа е Варакоске те побединел (Суд. 4:1-7, 10, 13-16). Слично, аменге да о Јехова ка поможинел те победина ако иси амен доверба ки лесте хем ко упатствија со дела амен преку пли организација (w23.07 19, пас. 17-18).

Ако мангаја те добина вечно живото, мора те ова стрплива. Исто сар о верна слуге таро пурано време, амен да ваљани стрпливо те аџикера о Јехова те исполнинел пле ветувања (Евр. 6:11, 12). И Библија спорединела амен јекхе земјоделцоја (Јак. 5:7, 8). Јекх земјоделцо керела бут бути те шај те фрдел семе ки пли нива хем те чхивел лаке пани. Ама, ов на џанела точно кеда о семе ка мукхел плоди. Адалеске, јекх земјоделцо стрпливо аџикерела хем иси ле доверба кај ка кхедел о плоди тари нива. Слично, амен сием зафатиме духовно активностенцар иако на џанаја ко кова диве ка авел амаро Господари (Мат. 24:42). Амен стрпливо аџикераја соске сием увериме кај о Јехова ка исполнинел адава со ветинѓа ко време кова со одрединѓа. Ако почминаја те ова нестрплива шај те уморинел амен адава со аџикераја хем аѓаар хари похари те цида амен таро Јехова. Исто аѓаар, шај те почмина те концентририна амен ко буќа кола со ка радујнен амен само кратко време. Ама ако сием стрплива ка шај те истрајна џи ко крајо хем те ова спасиме (Мих. 7:7; w23.08 22, пас. 7).

Ако спорединаја о пророштво таро Даниел 2:41-43 јавере пророштвонцар таро лила Даниел хем Откровение, шај те хаљова кај о пре претставинена е Англо-Американско светско сила која сој тани и најмоќно сила ко амаро време. Баши акаја сила о Даниел вакерела: „О царство ко исто време ка овел хем зорало хем слабо“. Соске акава царство ка овел асавко? Адалеске со о обична мануша сој претставиме глинаја керена пхаро акале светско силаке те овел силно сар састрн. Таро објаснување со денѓа ле о Даниел башо кипи откринаја важна чачипа. Прво, и Англо-Американско светско сила ко некобор начинија сикавѓа пли моќ. На пример, и Америка хем и Британија сине машкар о пхувја кола со побединѓе ки Прво хем ки Дујто светско војна. Ама акаја светско сила слабонѓа хем понадари да ка слабонел соске иси конфликтија машкар лакере граѓанија. Дујто, и Англо-Америка ка овел и последно светско сила која со ка владинел англедер е Девлескоро Царство те анел крајо башо са о манушикане царствија (w23.08 10-11, пас. 12-13).

Понекогаш, о Давид осетинела пе сине вознемиримо таро са о проблемија хем неволје со сине ле (Пс. 18:4, 5). Сепак, о мангипе хем и грижа таро Јехова денѓа ле неви сила. О Јехова ингарѓа пле уморно амале „ко тхан коте со иси бут чар“ хем „ко тхана коте со иси бут пани“. Адава поможинѓа е Давидеске те добинел неви сила хем понадари да те служинел е Јеховаске (Пс. 18:28-32; 23:2). Слично, е Јеховаскоро верно мангипе шај аменге да те поможинел те икљова ко крајо е неволјенцар со иси амен (Плач 3:22; Кол. 1:11). Е Давидескоро живото бут пути сине ки опасност хем ле сине ле бут моќна душмања. Сепак, адалеске со џанља кај о Јехова мангела ле, ов осетинѓа пе сигурно хем заштитимо. О Давид шај сине ки секоја ситуација те осетинел кај о Јехова сине леа хем кај охрабринела ле. Адалеске ки гили вакерѓа: „Таро са со дарава [о Јехова] ослободинѓа ман“ (Пс. 34:4). Иако понекогаш дарала сине, о Давид шај сине те побединел адаја дар соске џанела сине кај е Јеховаскоро мангипе сине бут посилно тари лескири дар (w24.01 30, пас. 15-17).

Сикљов таро лошна одлуке со анѓа о Јоас. Откеда о првосвештенико о Јодај муло, о Јоас биринѓа лошно друштво (2. Лет. 24:17, 18). Ов одлучинѓа те шунел е кнезон тари Јуда кола со на мангена сине е Јехова. Сигурно согласинеа тут кај о Јоас ваљани сине те цидел пе таро адава лошно друштво. Наместо адава, ов шунѓа ленгере лошна советија. Уствари, кеда лескоро братучети о Захарија мангља те советинел ле, о Јоас нарединѓа те мударен ле (2. Лет. 24:20, 21; Мат. 23:35). Кобор грубо хем глупаво тари лескири страна! Ко почеток о Јоас анела сине шукар одлуке, ама жално тано со покасно уло отпаднико хем убијцо. Ко крајо, лескере слуге мударѓе ле (2. Лет. 24:22-25). Кобор појавер ка овел сине лескоро живото ако понадари да шунела сине е Јехова хем околен со мангена сине е Јехова (w23.09 9, пас. 6).

О Исус џанља кај о апостол Петар шај те ачховел верно. Адалеске, о Исус љубезно вакерѓа леске: „Ма дара“. И доверба која со о Исус сикавѓа е Петареске целосно менинѓа лескоро живото. Покасно о Петар хем лескоро пхрал о Андреј чхинавѓе е буќаја те астарен мачхе хем уле е Месијаскере следбеникија, тегани о Јехова ко бут начинија благословинѓа ле (Мар. 1:16-18). Е Петаре сине ле бут шуже искуствија сар ученико е Христосескоро. Ов дикхља сар о Исус сасљарѓа е насвален, палдинѓа демонен хем чак сар воскреснинѓа е мулен (Мат. 8:14-17; Мар. 5:37, 41, 42). Исто аѓаар, ле сине ле прилика те овел присутно кеда о Исус ки јекх визија сине сикавдо сар Цари ко е Девлескоро Царство. О Петар никогаш на бистерѓа акава настан (Мар. 9:1-8; 2. Пет. 1:16-18). Чаче, ов никогаш нане сине те дикхел акала буќа те на овел сине е Исусескоро следбенико. Сигурно бут радујнѓа пе со на мукхља о негативна чувствија баши песте те чхинавен ле те доживинел акала благословија! (w23.09 21, пас. 4-5).

Ко пло прво писмо, о апостол Петар користинела о израз „баро мангипе“. Асавко мангипе на учхарела само некобор гревија, него „бут гревија“ (1. Пет. 4:8). Кеда вакерѓа акала лафија, о Петар шај сетинѓа пе ки поука башо простибе која со о Исус сикавѓа ле некобор берша англедер. Ко адава време о Петар веројатно мислинѓа песке кај тано дарежливо соске вакерѓа кај ка простинел пле пхралеске „џи ко ефта пути“. Ама о Исус сикавѓа ле — хем амен — те простина џи ко 77 пути, јавере лафенцар секогаш (Мат. 18:21). Ако туке пхаро те применине акава совет, ма обесхрабрин тут! Сарине амен сием несовршена, адалеске понекогаш аменге пхаро те простина. Ама важно тано те кере са со шај те простине тле пхралеске хем те смирине тут леа (w23.09 29, пас. 12).

Ко воги е мачхескоро, о Јона сине уверимо кај о Јехова ка шунел лескири молитва хем кај ов ка поможинел ле. О Јехова спасинѓа е Јона хем покасно ов сине спремно те керел и задача која со о Јехова денѓа ле (Јона 2:10 — 3:4). Кеда иси ту несави неволја, дали туке добором пхаро со нашти аракхеа лафија те вакере е Јеховаске сар осетинеа тут? Или дали осетинеа тут добором уморно таро проблемија со нашти те проучине? Ма бистре, о Јехова најшукар хаљовела тли ситуација. Адалеске, чак кеда на вакереа бут буќа ки молитва, ов сигурно кај о Јехова ка дел тут баш адава со ваљани туке (Еф. 3:20). Ако туке пхаро те читине хем те проучине адалеске со сиан насвало, уморно или сиан бут вознемиримо, шај те шуне о аудиоснимке тари Библија или таро амаре публикацие. Шај исто аѓаар те шуне несаве таро амаре гиља, или те дикхе несаве видеоклипија тари амари интернет-страница jw.org. О Јехова мангела те керел тут зорало, хем ка керел адава ако ту молинеа тут леске хем ако родеа о одговорија таро тле молитве ки Библија хем ко са о јавера буќа со дела тут (w23.10 13, пас. 6; 14, пас. 9).

О свето шатори хем о храмија кола со покасно сине градиме ко Ерусалим сине бут слична андрал. Андре сине само дуј просторие — „и Свето просторија“ хем „и Најсвето просторија“ — кола со сине одвојме јекхе завесаја (Евр. 9:2-5; 2. Мој. 26:31-33). Ки Свето просторија сине златно светилнико, жртвенико коте со тхарела пе сине темјан хем астали коте со сине маре. Само околенге со сине „помазиме свештеникија“ сине дозволимо те кхувен ки Свето просторија хем те керен пумари свето служба (4. Мој. 3:3, 7, 10). Ки Најсвето просторија сине о златно ковчег е сојузескоро колеа со сине претставими е Јеховаскири присутност (2. Мој. 25:21, 22). Само о првосвештенико шај сине те кхувел пали завеса ки Најсвето просторија јекх пути ко берш, ко Диве простибаске о гревија (3. Мој. 16:2, 17). Ов кхувела сине е животненгере ратеа те шај те овен чистиме лескере гревија хем о гревија е цело народоскере. Сар со накхела сине о време, о Јехова откринѓа со чаче претставинела сине секова дело таро свето шатори (Евр. 9:6-7; w23.10 27, пас. 12).

Бут пути ко е Девлескоро Лафи аракхаја и заповед „манген тумен јекх јекхеа“ (Јован 15:12; Рим. 13:8; 1. Сол. 4:9; 1. Пет. 1:22; 1. Јов. 4:11). Ама о мангипе тани особина сој андре ко вило, а со иси амен ко вило нашти нијекх мануш те џанел. Тегани, сар шај о јавера те џанен кај мангаја лен? Таро амаре лафија хем постапке. Иси бут начинија сар шај те сикава кај мангаја амаре пхрален хем пхењен. Те дикха некобор примерија: „Вакерен о чачипе јекх јекхеске!“ (Зах. 8:16). „Овен ко мир јекх јекхеа“ (Мар. 9:50). „Овен прва ко адава те сикавен кај поштујнена јекх јекхе“ (Рим. 12:10). „Прифатинен тумен јекх јекхеа“ (Рим. 15:7). „Понадари да „простинен туменге“ (Кол. 3:13). „Пхиравен о пхарипа јекх јекхескоро“ (Гал. 6:2). „Понадари да утешинен јекх јекхе“ (1. Сол. 4:18). „Изградинен јекх јекхе“ (1. Сол. 5:11). „Молинен тумен јекх јекхеске“ (Јак. 5:16; w23.11 9, пас. 7-8).

Секова диве анаја одлуке коленге со ваљани те овел амен бари вера. На пример, анаја одлуке башо друштво, забава, образование, брако, чхаве хем бути. Ко асавке ситуацие шукар тано те пуча амен: „Дали мле одлуке сикавена кај сиум сигурно кај акава свето тано привремено хем кај панда хари ка авел е Девлескоро нево свето, или мукхава ко мле одлуке те влијајнен мануша кола со верујнена кај акале светоја завршинела са?“ (Мат. 6:19, 20; Лука 12:16-21). Ка ана шукар одлуке ако бајрараја амари вера ко адава кај о нево свето ка авел бут сигате. Исто аѓаар иси амен неволје баши коленде со ваљани аменге силно вера. Шај иси амен прогонство или ваљани те икљова ко крајо сериозно насвалипаја или јавере буќенцар кола со шај те обесхрабринен амен. Ко почеток шај те мислина аменге кај шај те истрајна ки адаја неволја. Ама обично о неволје трајнена повише време, адалеске ваљани аменге силно вера те шај те истрајна хем понадари да те служина радосно е Јеховаске (1. Пет. 1:6, 7; w23.04 27, пас. 4-5).

О Јехова очекујнела амендар те постапина спрема амаре молитве. На пример, јекх пхрал шај те молинел е Јехова те поможинел леске те добинел слободна диве тари бути те шај те џал ко регионално конгрес. Сар шај о Јехова те одговоринел ки лескири молитва? Ов шај те дел ле храброст те шај те керел лафи пле шефеа. Сепак о пхрал ка ваљани те џал те керел лафи башо слободна диве. Шај ка ваљани те керел леа лафи повише пути. Шај ка ваљани те родел те менинел пе несаве колегаја те џал јавер смена ки бути или ка лел слободна диве бизо те овел платимо. О Јехова очекујнела повише пути те молина амен леске башо буќа со секиринена амен. Сар со шај те дикха таро е Исусескере лафија, несаве буќа башо кола со молинаја амен нане те добина лен одма (Лука 11:9). Адалеске ма откажин тут! Молин тут таро вило хем повише пути (Лука 18:1-7). Кеда кераја адава, тегани сикаваја е Јеховаске кај адава нане само моментално желба. Исто аѓаар сикаваја вера кај ов шај те поможинел аменге (w23.11 22, пас. 10-11).

О Јехова ветинѓа пле амалеске е Авраамеске кај преку лескоро потомство ка овен благословиме са о народија ки пхув (1. Мој. 15:5; 22:18). Адалеске со е Аврааме сине ле бари вера ко Девел, ов сине уверимо кај е Девлескоро ветување чаче ка исполнинел пе. Сепак, кеда е Аврааме сине ле 100 берш, а лескере ромња 90, акале верна слуген панда на сине лен чхаво (1. Мој. 21:1-7). Ама, ки Библија пишинела: „[Е Аврааме] сине ле надеж кај ка овел дад буте народонге хем адалеске сине ле вера ко адава со вакерѓа леске о Девел“ (Рим. 4:18). Џанаја кај и надеж со сине е Аврааме исполнинѓа пе. Бијандило леске о Исак — о чхаво коле со добором време аџикерѓа. Соске о Авраам сине уверимо кај о Јехова ка исполнинел пло ветување? Адалеске со о Авраам сине паше амал е Јеховаја, ов сине „целосно уверимо кај о Девел шај те керел адава со ветинела“ (Рим. 4:21). Адалеске со сине ле вера, о Авраам сине одобримо таро Девел хем о Јехова дикхља ки лесте сар праведно мануш (Јак. 2:23; w23.12 8, пас. 1-2).

Јекх терно пхрал кова сој доверливо, шукар грижинела пе башо са пле одговорностија. Размислин башо совршено пример е Исусескоро. Ов секогаш сине внимателно хем одговорно кеда керела сине о задаче со добинѓа лен таро Јехова. Ов керела сине секоја задача со денѓа ле о Јехова, чак кеда адава на сине локхо. Ов мангела сине е манушен — посебно пле ученикон — хем спремно денѓа пло живото ленге (Јован 13:1). Ако мангеа те џа пало е Исусескоро пример, де тутар са те кере секоја задача со добинеа ла. А ако на сиан сигурно сар те кере ла, ов понизно хем роде помош таро зрела пхраља. Ма фрде и бути тле шерестар само те шај те овел завршими (Рим. 12:11). Наместо адава, кер секоја задача „сар е Јеховаске, а на е манушенге“ (Кол. 3:23). Џанѓола пе ту на сиан совршено, адалеске ов скромно хем признајн секоја грешка со ка кере ла (Изр. 11:2; w23.12 26, пас. 8).

Секова јекх амендар сине бут радосно кеда крстинѓа пе хем уло дело тари е Јеховаскири фамилија. Окола со иси лен чест те овен е Јеховаскере амала, сложинена пе адалеа со вакерѓа о псалмисти о Давид: „Среќно тано окова коле со ту, [Јехова] ка бирине хем каске со дозволинеа те авел туте паше те шај те живинел ко тле дворија“ (Пс. 65:4). Каске о Јехова дозволинела те живинел ко лескере дворија, јавере лафенцар, те овел лескоро амал? Ов биринела те овел паше околенцар со сикавена кај мангена те овен леа паше (Јак. 4:8). Кеда деа лафи е Јеховаске кај ка служине леске цело живото хем крстинеа тут, шај те ове сигурно кај пало тло крстибе ов ка благословинел тут џикоте на овела доста (Мал. 3:10; Ерем. 17:8). О крстибе тано само почеток. Ту ка манге те де тутар са те шај те живине спрема тло завет чак кеда ка овен тут искушенија или кеда ка овел испитими тли вера (Проп. 5:4, 5). Сар ученико е Исусескоро, ту ка трудине тут кобор со шај пошукар те џа пало лескоро пример хем те икере тут ко лескере заповедија (Мат. 28:19, 20; 1. Пет. 2:21; w24.03 8, пас. 1-3).

Со ако ту хем тло брачно партнери на уживинена кеда накхавена време заедно? Тегани со шај те керен? Размислин башо јекх пример јагаја. Кеда тхараја јаг ој нане одма силно. Ваљани хари похари те чхиве тикне кашта, а кеда и јаг овела посилно шај те чхиве побаре кашта. Слично, ко почеток шај те почминен аѓаар со секова диве ка накхавен кратко време заедно. Керен нешто со о солдуј џене мангена (Јак. 3:18). Ако почминена тикне буќенцар, тумаро мангипе шај палем те овел силно. О поштовање тано бут важно ко јекх брако. Адава тано сар воздух со поможинела е јагаке те тхабљол. Бизо воздух и јаг сигате ачхола. Слично, бизо поштовање о мангипе машкар о ром хем и ромни шај сигате те шудрол. Тари јавер страна, ако о ром хем и ромни трудинена пе те сикавен поштовање јекх јекхеске тегани ленгоро мангипе ка овел посилно. Сепак на ваљани те бистре кај нане важно дали ту мислинеа кај сикавеа поштовање, него важно тано дали тло брачно партнери осетинела пе поштујмо (w23.05 22 пас. 9; 24, пас. 14-15).

Ки Библија читинаја башо верна слуге е Девлескере кола со вакерѓе кај накхена таро пхаре ситуацие хем кај дарандиле таро пумаре душмања или јавера притисокија (Пс. 18:4; 55:1, 5). Слично, амен да шај иси амен противибе ки школа, ки бути, тари амари фамилија или таро властија. Шај чак дараја кај ка мера адалеске со сием бут насвале. Ко асавке ситуацие шај осетинаја амен слабо сар јекх тикно чхаво. Сар поможинела амен о Јехова ко асавке моментија? Ов утешинела амен хем смиринела амен. Адалеске редовно одвојн туке време те шај те ове е Јеховаја аѓаар со ка молине тут хем ка читине лескоро Лафи (Пс. 77:1, 12-14). Ако иси тут асавки навика, тегани најверојатно о прво нешто со ка кере кеда ка овел тут стрес тано те роде помош таро тло небесно Дад. Вакер е Јеховаске состар дараја хем башо со секиринеа тут. Дозволин леске преку и Библија те керел туја лафи хем те утешинел тут (Пс. 119:28; w24.01 24-25, пас. 14-16).

Бут тано важно те овел тут бари желба те шај те исполнине тле целија. Ако бут мангеа те кере нешто тегани ка кере са со ваљани те шај те исполнине адава. А кобор побари желба иси амен добором побари тани и веројатност кај ка исполнина амаре целија. Адалеске, со шај те кере те шај те бајраре тли желба? Молин тут те овел тут побари желба. О Јехова преку пло духо шај те дел тут побари желба те шај те исполнине тли цел. Понекогаш чхиваја аменге цел адалеске со џанаја кај ваљани те кера адава, хем адава тано шукар. Ама шај нане амен несави бари желба те исполнина ла. Размислин башо адава со керѓа о Јехова туке (Пс. 143:5). О апостол Павле бут размислинѓа башо е Јеховаскоро шукарипе со на заслужинела пе хем адава бајрарѓа лескири желба те дел пе повише е Јеховаске (1. Кор. 15:9, 10; 1. Тим. 1:12-14). Слично, кобор повише размислинеа башо адава со о Јехова керѓа туке, добором повише ка манге те исполнине тли цел (Пс. 116:12; w23.05 27, пас. 3-5).

Кеда фалинаја амаре небесно Дадескоро анав кераја ле радосно (Пс. 119:108). Дали акава значинела кај о Семоќно Девел тано сар о несовршена мануша, кола со мангена о јавера те фалинен лен адалеске со нане сигурна ки песте? На. Кеда фалинаја амаре небесно Даде поможинаја те докажинел пе кај нане точно панда јекх ховајбе со вакерѓа ле о Сатана баши секова јекх амендар. Ов вакерѓа кај нијекх мануш нане верно те бранинел е Девлескоро анав. Спрема лесте нијекх мануш нане те ачховел верно кеда ка овел чхивдо ко испит. Ов вакерела кај сарине амен ка чхинава те служина е Девлеске ако мислинаја кај аѓаар ка овел аменге пошукар (Јов 1:9-11; 2:4). Ама о Јов ачхило верно е Јеховаске хем докажинѓа кај о Сатана ховавела. Дали ту да ка ачхове верно е Девлеске? Секој амендар шај те биринел те бранинел амаре Дадескоро анав хем те керел ле радосно аѓаар со ка служинел леске верно (Изр. 27:11). Адаја тани чаче бари чест аменге (w24.02 8-9, пас. 3-5).

Пало е Мојсеескоро хем е Исус Навинескоро време, о Јехова чхивѓа судие те шај те водинен лескере народо. Пало адава, кеда владинѓе царија, о Јехова чхивѓа пророкија те водинен лескере народо. О верна царија шунена сине о советија е пророконгере. На пример, о цари о Давид понизно прифатинѓа о укор таро пророко о Натан (2. Сам. 12:7, 13; 1. Лет. 17:3, 4). Е царе е Јосафате сине ле доверба ко водство е пророкоскоро о Јазиел хем охрабринѓа е Јудејцон е лафенцар: „Верујнен ко [е Девлескере] пророкија“ (2. Лет. 20:14, 15). Кеда сине ки пхари ситуација о цари о Езекија родинѓа помош таро пророко о Исаија (Иса. 37:1-6). Секогаш кеда о царија џана сине пало водство е Јеховаскоро, ов благословинела лен сине а о народо сине заштитимо (2. Лет. 20:29, 30; 32:22). Сариненге сине јасно кај о Јехова користинела е пророкон те шај те водинел пле народо (w24.02 21, пас. 8).

О Сатана мангела те накхава време манушенцар кола со ка керен аменге пхаро те икера амен ко е Јеховаскере мерилија. На ваљани те бистра кај амаре амала нане само окола касаја со дружинаја амен лично. Машкар ленде тане хем окола касаја со комунициринаја преку социјална мреже. Амен мора те борина амен те шај те на размислина сар о мануша таро акава свето, кај о неморално понашибе тано прифатливо. Амен џанаја кај адава тано погрешно (Еф. 4:19, 20). Шукар тано те пуча амен: „Дали трудинава ман те на накхавав време бизи потреба ме колегенцар, соучениконцар или јаверенцар кола со на поштујнена е Јеховаскере праведна мерилија?“ „Дали храбро икерава ман ко е Јеховаскере мерилија чак ако о јавера мислинена кај сиум круто ко адава?“ Спрема о лафија таро 2. Тимотеј 2:20-22, шај чак ка ваљани те пазина касаја ка ова паше амала ко собрание. Амен на мангаја те бистра кај несаве шај нане те поможинен амен те ачхова верна е Јеховаске (w24.03 22-23, пас. 11-12).

Дали некогаш пробинѓан те замислине сар изглединела о Јехова? Иако амен нашти те дикха ле, сепак и Библија опишинела ле ко различна начинија. Башо Јехова вакерела кај тано „кхам хем штити“ хем „јаг со глтинела“ (Пс. 84:11; Евр. 12:29). О Езекиел ки јекх визија опишинѓа е Јеховаскири присутност сар сафири, парно злато со светинела хем виножито со бут светинела (Езек. 1:26-28). Адалеске со нашти те дикха е Јехова шај те овел аменге пхаро те верујна кај ов мангела амен. Несаве мислинена кај о Јехова никогаш нашти те мангел лен адалеске со доживинѓе лошна буќа ко живото. О Јехова хаљола адала чувствија хем сар ола влијајнена упри аменде. Те шај те поможинел аменге, ов преку пло Лафи сикавела аменге сави личност тано. Е Јехова најшукар шај те опишина ле јекхе лафеа — е лафеа мангипе. Баш адава вакерела и Библија, о Јехова тано мангипе (1. Јов. 4:8). Са со керела, керела таро мангипе. Е Девлескоро мангипе тано добором баро хем силно со сикавела ле чак околенге со на мангена ле (Мат. 5:44, 45; w24.01 26, пас. 1-3).

О Јехова биринѓа е Мојсее те икалел е Израелцон таро Египет хем сар јасно доказ мукхља ленге стубо таро облако дивескоро, а раќате стубо тари јаг (2. Мој. 13:21). О Мојсеј џала сине пало адава стубо хем аѓаар ов хем о Израелција ресле џи ко Црвено море. Кеда аракхлиле машкар о море хем и египетско војска со џала сине пали ленде, е Израелцон астарѓа лен паника. Ама адава на сине грешка. О Јехова намерно преку о Мојсеј анѓа пле народо адатхе (2. Мој. 14:2). Пало адава о Јехова спасинѓа пле народо ко јекх посебно начин (2. Мој. 14:26-28). Ко адала 40 берш џикоте сине ки пустина, е Мојсее сине ле доверба кај о Јехова користинела о стубо таро облако те шај те водинел пле народо (2. Мој. 33:7, 9, 10). О Јехова керела сине лафи е Мојсееа таро стубо, а пало адава о Мојсеј вакерела сине е народоске о упатствија со добинела лен сине таро Јехова. Е Израелцон сине лен јасно доказ кај о Јехова водинела лен преку о Мојсеј (w24.02 21, пас. 4-5).