Септември

О Девел денѓа е Исусеске моќ те решинел са е манушенгере проблемија. Преку о чудија о Исус сикавѓа кај шај те решинел проблемија кола со амен никогаш нашти те решина лен. На пример, ле иси ле моќ те цидел корендан е манушенгере проблемија, аѓаар со ка ослободинел амен таро грево хем лескере последице сар сој о насвалипе хем о мерибе (Мат. 9:1-6; Рим. 5:12, 18, 19). Лескере чудија сикавѓе кај ов шај те сасљарел секова насвалипе хем чак те ваздел е мулен (Мат. 4:23; Јован 11:43, 44). Исто аѓаар, ле иси ле моќ те контролиринел баро невреме хем те ослободинел е манушен таро демонија (Мар. 4:37-39; Лука 8:2). Кобор осетинаја амен сигурна адалеске со џанаја кај о Јехова денѓа асавки моќ пле Чхавеске. Шај те ова целосно увериме кај о идна берекетија таро е Девлескоро Царство ка исполнинен пе. О чудија со керѓа лен о Исус сикавена со ка керел ки цели пхув сар цари ко е Девлескоро Царство (w23.04 3-4, пас. 5-7).

Ако сиан ко јекх баро собрание хем бут пути о пхрал со водинела на дикхел кај ту да ваздеа тло вас, ту шај нане те манге више те коментирине. Ама ма чхинав те пробине те коментирине. Спремин повише коментарија башо секова состанок. Тегани ако на дена тут ко почеток те коментирине, сепак ка овен тут панда прилике те коментирине џикоте трајнела о состанок. Кеда спреминеа тут башо проучибе и Стражарско кула размислин башо адава сар секова пасус тано поврзимо е главно темаја. Ако кереа адава, тегани шај те де шукар спремиме коментарија. Исто аѓаар, шај те спремине тут те коментирине ко пасусија со керена лафи башо похор библиска чачипа кола сој попхаре објаснибаске. Соске? Адалеске со шај нане те овен бут џене кола со ка коментиринен ко адала пасусија. Со ако пало некобор состанокија на сине тут прилика те коментирине? Англедер о состанок шај те вакере е пхралеске со водинела, ко кова пучибе мангеа те коментирине (w23.04 21-22, пас. 9-10).

О Јосиф спремно применинѓа е Јеховаскере упатствија хем адава керѓа те овел пошукар ром. О Девел најхари ко трин прилике денѓа ле упатствија поврзиме лескере фамилијаја. Секова пути спремно шунѓа адала упатствија чак кеда сине леске бут пхаро (Мат. 1:20; 2:13-15, 19-21). О Јосиф заштитинѓа е Марија хем грижинѓа пе лаке адалеске со шунѓа е Девлескере упатствија. Сигурно е Јосифескере постапке керѓе и Марија панда повише те мангел ле хем те поштујнел ле. Тумен о рома шај те џан пало пример е Јосифескоро аѓаар со ка роден библиско водство кеда грижинена тумен тумаре фамилијаке. Кеда керена адава, чак кеда нане локхо, сикавена мангипе тумаре ромњенге хем керена позорало тумаро брако. Јекх пхен таро Вануати, која сој женими повише таро 20 берш, вакерела: „Кеда мло ром родела водство таро Јехова хем применинела ле, повише поштујнава ле. Осетинава ман сигурно хем иси ман доверба ко лескере одлуке“ (w23.05 21, пас. 5).

О Евреија со иранѓе пе таро Вавилон ваљани сине те овен „свето народо“ пле Девлеске (5. Мој. 7:6). Ама адава на значинела сине кај ола на ваљани те керен промене те шај те керен е Јеховаскири волја. Бут Евреија бијандиле ко Вавилон хем леле несаве ставија хем размислувања таро Вавилонција. Пало 69 берша откеда о Евреија иранѓе пе ко Израел, о Неемија сине изненадимо кеда дознајнѓа кај о чхаве со бијандиле ко Израел на сиклиле и хебрејско чхиб (5. Мој. 6:6, 7; Неем. 13:23, 24). Акала чхаве нашти сине те манген хем те обожавинен е Јехова ако на хаљовена сине и хебрејско чхиб, ки која со побаро дело таро е Девлескоро Лафи сине пишимо (Езра 10:3, 44). Значи адала Евреија мора сине те керен баре промене. Ама сине ленге бут полокхо те керен адала промене соске живинена сине ко Израел, коте со о чисто обожавибе похари иранела пе сине (Неем. 8:8, 9; w23.05 15, пас. 6-7).

Понекогаш шај иси амен хем бари желба хем самоконтрола, ама палем шај те овел аменге пхаро те исполнина амари цел. На пример, „о буќа со нашти те предвидинен пе“ шај те лен амаро време хем аѓаар те на овел амен бут време те кера бути ки амари цел (Проп. 9:11). А шај те овен амен проблемија со ка разочаринен амен хем ка лен амари сила (Изр. 24:10). Исто аѓаар, адалеске со сием несовршена шај те кера нешто со ка керел аменге панда попхаро те исполнина амари цел (Рим. 7:23). Или шај сием бут уморна (Мат. 26:43). Со ка поможинел аменге ако пераја или едноставно на џала аменге? Ма бистре кај ако переа адава на значинела кај на успејнѓан. И Библија вакерела кај шај често те овен амен проблемија или пхарипа. Ама исто аѓаар вакерела кај амен шај палем те ушта. Оја, ако понадари да кереа бути ки тли цел, чак ко пхаре диве, ту сикавеа е Јеховаске кај мангеа те кере лескири волја. Ов сигурно кај о Јехова тано бут радосно кеда дикхела сар ту понадари да трудинеа тут те исполнине тли цел (w23.05 30, пас. 14-15).

И пионерско служба поможинела јекхе тернеске шукар те соработинел различна манушенцар. Исто аѓаар, адава поможинела леске мудро те користинел пле паре со заработинела лен хем те на трошинел повише таро адава со иси ле (Фил. 4:11-13). Шукар темели баши полновремено служба тани и помошно пионерско служба. Адава поможинела те спремине тут те служине сар општо пионери. И пионерско служба шај те пхравел туке о удар башо јавера да врсте полновремено служба, сар сој те служине ки изградба или ко Бетел. Са о пхраља ваљани те трудинен пе те исполнинен о условија те служинен e пхраленге хем е пхењенге сар старешине. И Библија вакерела кај окова со иси ле асавки цел „мангела бут шукар бути те керел“ (1. Тим. 3:1). Прво, јекх пхрал мора те исполнинел о условија те служинел сар слуга-помошнико. О слуга-помошникија поможинена е старешиненге ко бут практична начинија. А ола заедно е старешиненцар понизно служинена е пхраленге хем е пхењенге хем ревносно проповединена о шукар хабери (w23.12 28, пас. 14-16).

Е царе е Јосија сине ле 16 берш кеда почминѓа те родел е Јехова. Ов мангља те дознајнел нешто повише башо Јехова хем те керел лескири волја. Ама акале терне царескоро живото на сине локхо. Ко адава време бут мануша обожавинена сине ховавне девлен, адалеске о Јосија мора сине те овел храбро те шај те чхинавел лен те керен адава. Хем баш адава керѓа! Англедер те пхерел 20 берш, о Јосија почминѓа те чистинел е Израелско нација таро ховавно обожавибе (2. Лет. 34:1, 2). Чак ако сиан бут терно шај те џа пало пример е Јосијаскоро аѓаар со ка сикљове нешто повише башо Јехова хем башо лескере бут шуже особине. Ако кереа адава ка поттикнинел тут те де лафи е Јеховаске кај ка служине леске. Сар ка влијајнел адава упро тло живото? О Лука со крстинѓа пе ко 14 берш вакерела: „Таро акава моменти ка чхивав е Јехова ко прво тхан ко мло живото хем ка трудинав ман те радујнкерав ле“ (Мар. 12:30). Туте да ка овел тут баро благослов ако мангеа те кере о исто (w23.09 11, пас. 12-13).

Кеда о апостол Павле пишинѓа акава писмо, о собрание ко Солун сине нево соске постојнела сине похари таро јекх берш. О именујме пхраља веројатно на сине искусна хем шај грешинена сине. Сепак, ола заслужинена сине о јавера те поштујнен лен. Авдиве, сар со авела попаше и бари неволја шај ка зависина таро водство е старешиненгоро панда повише таро акана. Шај нане те ова ко контакт е пхраленцар таро главно седиште или е подружницаја. Адалеске важно тано панда авдиве те сикљова те манга хем те поштујна амаре старешинен. Бизи разлика со ка овел, те ова трезвена хем ма те концентририна амен ко ленгере маане него ко адава кај о Јехова преку о Христос водинела акале верна манушен. Исто сар о шлеми со заштитинела е војникоскоро шеро, аѓаар амари надеж башо спасение заштитинела амаре мисле. Амен хаљоваја кај адава со нудинела аменге о свето на врединела ништо (Фил. 3:8). Амари надеж поможинела аменге те ачхова смириме хем стабилна (w23.06 11-12, пас. 11-12).

Окола со шунена и покана е глупаво џувљакири мора те одлучинен дали ка прифатинен ла или ка одбинен ла. Иси бут шукар причине соске ваљани те цида амен таро неморална постапке. И „глупаво џувли“ вакерела: „О чордикане пања тане гудле“ (Изр. 9:17). Сој тане о „чордикане пања“? И Библија спорединела о сексуална односија машкар о ром хем и ромни е свежо пањеа (Изр. 5:15-18). Јекх мурш хем џувли кола сој законски ко брако шај те уживинен ко сексуална односија машкар пуменде. Ама поразлично тано е „чордикане пањенцар“. Ола шај те претставинен о сексуално неморал сој тано забранимо. Акава бут пути случинела пе гаравиндор, исто сар јекх чор кова со бут пути чорела гаравиндор. О „чордикане пања“ шај посебно те овен гудле околенге со керѓе неморал хем мислинена кај никој на дикхља лен. Ама ола коркори пес ховавена соске о Јехова дикхела са. На постојнела ништо сој тано поќерко таро адава те нашава е Јеховаскоро одобрување. Акава сикавела аменге кај ко „чордикане пања“ нане нисаво „гудлипе“ (1. Кор. 6:9, 10; w23.06 22, пас. 7-9).

Со ваљани те кере ако приметинеа кај тле молитве уле механичка, или кај на уживинеа више ки служба сар со уживинеа сине англедер? Ма мислин кај нане тут е Јеховаскоро духо. Адалеске со сием несовршена амаре чувствија понекогаш шај те менинен пе. Ако тли ревност почминела те слабонел, размислин башо пример е апостол Павлескоро. Иако трудинела пе сине те џал пало е Исусескоро пример, ов џанља кај понекогаш нане те овел ле бари желба те керел адава со ваљани. О Павле сине одлучно те керел пли служба бизи разлика сар осетинела пе сине ко моменти. Слично, ма мукх тле несовршена чувствија те влијајнен упро тле одлуке. Ов одлучно те кере адава сој тано исправно, чак ако на керела пе туке адава. Ако кереа понадари да адава сој исправно, сар со ка накхел о време тле чувствија шај ка менинен пе (1. Кор. 9:16; w24.03 11-12 пас. 12-13).

Амен шај те сикава мангипе амаре пхраленге хем пхењенге аѓаар со ка прифатина лен ко амаро друштво (2. Кор. 6:11-13). Бут џене амендар тане ко собранија коте со иси пхраља хем пхења таро различна културе хем пхраља колен со иси лен различна карактерија. Ако концентриринаја амен ко ленгере шукар особине, адава ка поможинел амен панда повише те манга лен. Кеда трудинаја амен те дикха ко јавера сар о Јехова со дикхела ки ленде тегани сикаваја кај мангаја лен. Ки бари неволја ка овел бут важно те манга амаре пхрален хем пхењен. Кеда ка почминел адаја неволја, сар о Јехова ка заштитинел амен? Те дикха со о Јехова вакерѓа пле народоске те керел кеда о пурано Вавилон сине нападимо. Ов вакерѓа: „Ајде, тумен со сием мло народо, кхувен ко тумаре собе коте со ка овен ко сигурно хем пханден о удара пали туменде, гаравен тумен хари џикоте накхела и холи“ (Иса. 26:20). Шај амен да ка ваљани те ова послушна ко акала лафија е Јеховаскере кеда ка авел и бари неволја (w23.07 6-7, пас. 14-16).

Ваљани те ова пенџарде машкар о јавера сар разумна. Адалеске пуч тут: „Дали о јавера мислинена кај сиум разумно, толерантно хем спремно те попуштинав? Или мислинена кај сиум строго, круто или тврдоглаво? Или сиум спремно те шунав е јаверенгоро мислење хем попуштинава ако и ситуација дозволинела адава?“ Кобор поразумна ка ова, добором послична ка ова сар о Јехова хем о Исус. Те ова разумна значинела те ова флексибилна кеда ка менинен пе амаре околностија. Асавке промене шај те керен аменге проблемија кола со на очекујнѓем лен. На пример, шај таро јекх пути те астара несаво пхаро насвалипе. Ако ко тхан коте со живинаја таро јекх пути менинела пе и економско или политичко ситуација адава да шај те менинел амаро живото (Проп. 9:11). Шај чак те овел аменге пхаро ако и организација замолинела амен те кера несави јавер задача или те служина ко јавер тхан. Шај успешно те прилагодина амен ко неве околностија ако слединаја акала штар чекорија: 1) Прифатин и реалност, 2) дикх англе, 3) концентририн тут ко позитивна буќа хем 4) кер шукарипе е јаверенге (w23.07 22, пас. 7-8).

О пророко о Даниел сине терно кеда о Вавилонција леле ле сар робо хем ингарѓе ле дур таро Ерусалим. Ама иако о Даниел сине терно ов мукхља баро впечаток е вавилонско службениконге. Ола „дикхле адава со дикхела пе јакхенцар“ — приметинѓе кај о Даниел тано шужо хем кај авела тари јекх важно фамилија (1. Сам. 16:7). Адалеске ола обучинѓе ле те шај ов покасно те служинел ки палата (Дан. 1:3, 4, 6). О Јехова мангља е Даниеле башо адава саво мануш сине. Уствари, кеда о Јехова вакерѓа кај о Даниел тано сар о Ное хем о Јов, ле веројатно сине ле околу 20 берш. Значи, иако о Даниел сине бут терно о Јехова ки лесте дикхела сине исто добором праведно сар ко Ное хем ко Јов кола со бершенцар верно служинѓе леске (1. Мој. 5:32; 6:9, 10; Јов 42:16, 17; Езек. 14:14). О Јехова понадари да мангела сине е Даниеле ко цело лескоро живото (Дан. 10:11, 19; w23.08 2, пас. 1-2).

Ако мангеа те кине јекх кхер, ту ка џа те проверине секова дело таро кхер. Нешто слично шај те кера кеда читинаја хем проучинаја и Библија. Ако читинеа ла сигате, тегани шај те сикљове само о основна буќа — „о основна света објаве е Девлескере“ (Евр. 5:12). Наместо адава, исто сар со би кереа сине е кхереа „кхув андре“ те шај те дикхе са о деталија. Јекх бут шукар начин сар шај те проучине и Библија тано аѓаар со ка дикхе сар о различна делија таро хабери тане поврзиме јекх јекхеа. Трудин тут те хаљове на само ко со верујнеа него хем соске верујнеа ко адава. Те шај те хаљова е Девлескоро Лафи, амен ваљани те проучина о хор библиска чачипа. О апостол Павле поттикнинѓа е пхрален хем е пхењен редовно хем темелно те проучинен е Девлескоро Лафи те шај „целосно те хаљовен кобор тано бувло, дугачко, учо хем хор“ о чачипе. Адава ка поможинел ленге сине ленгири вера те овел ла хор коренија хем те овел зорали (Еф. 3:14-19). Амен да ваљани те кера о исто (w23.10 18, пас. 1-3).

Ки Библија иси бут примерија таро мануша со сине стрплива. Шај ко тло лично проучибе те истражине баши ленде. На пример, иако о Давид сине бут терно кеда сине помазимо сар идно цари упро Израел, ов мора сине те аџикерел панда бут берша англедер те овел цари. О Симеон хем и Ана верно служинѓе е Јеховаске џикоте аџикерѓе те авел о Месија (Лука 2:25, 36-38). Џикоте проучинеа акала извештаија, пробин те аракхе о одговорија ко акала пучиба: „Со шај поможинѓа акале верно слугаске те сикавел стрпливост? Сар користинѓа леске адава со сине стрпливо? Сар шај те џав пало лескоро пример?“ Исто аѓаар, шај те овел тут корист ако проучинеа башо окола со на сикавѓе стрпливост (1. Сам. 13:8-14). Шај те пуче тут: „Со анѓа лен џи ко адава те на овен стрплива? Кола сине о последице таро адава?“ (w23.08 25, пас. 15).

О апостол Петар сине верно, ов на мукхља ништо те чхинавел ле те слединел е Исусе. Ов сикавѓа пли верност ки јекх прилика кеда о Исус вакерѓа нешто со лескере ученикија на халиле (Јован 6:68). Бут џене чхинавѓе те слединен е Исусе бизо те аџикерен несаво објаснување. Ама, о Петар на керѓа адава. Ов халило кај само ко Исус „тане о лафија башо вечно живото“. О Исус џанља кај о Петар хем о јавера апостолија ка мукхен ле. Сепак, о Исус сикавѓа доверба ко Петар кај ов ка овел духовно зорало хем ка ачхол верно (Лука 22:31, 32). О Исус халило кај „о вило тано спремно... ама о тело тано слабо“ (Мар. 14:38). Адалеске, чак кеда о Петар вакерѓа кај на пенџарела ле, о Исус на откажинѓа пе таро пло апостоли. Откеда воскреснинѓа о Исус, појавинѓа пе е Петареске — веројатно кеда сине коркори (Мар. 16:7; Лука 24:34; 1. Кор. 15:5). Акава сигурно бут охрабринѓа е Петаре кова со сине разочаримо! (w23.09 22-23, пас. 9-10).

О Девел простинела или учхарела о гревија околенгере со иси лен вера ки лесте. Ов целосно простинела лен хем никогаш више на спомнинела лен (Пс. 32:1, 2). Ко асавке мануша дикхела сар некој со нане лен грешке хем тане праведна адалеске со иси лен вера. Иако о Авраам, о Давид хем јавера верна слуге сине праведна англо Девел, сепак ола понадари да сине несовршена хем грешна. Ама адалеске со сине лен вера, о Девел дикхела сине ки ленде сар бизи грешка, посебно кеда спорединела лен сине околенцар со на сине лен вера ки лесте (Еф. 2:12). Сар о апостол Павле со пишинѓа ко пло писмо, мора те овел амен вера те шај те ова паше е Девлеа. Адава сине случај е Авраамеа хем е Давидеа, а шај те овел случај аменцар да (w23.12 3, пас. 6-7).

Авдиве са е христијанен иси лен предност те ден жртве е Јеховаске аѓаар со користинена пумаро време, сила хем материјална средствија те шај те служинен леске. Шај те сикава е Јеховаске кобор сием леске благодарна баши предност со денѓа амен те служина леске аѓаар со ка да леске амаре најшукар жртве. О апостол Павле пишинѓа кола буќа мора секогаш те кера лен те шај те обожавина е Јехова (Евр. 10:22-25). Ки ленде тано вклучимо те молина амен е Јеховаске, те проповедина, те џа ко амаре состанокија хем те охрабрина амен јекх јекхеа „со повише кобор со дикхаја кај авела попаше е Јеховаскоро диве“. Ко крајо таро лил Откровение е Јеховаскоро ангели вакерела: „Обожавин е Девле!“ (Отк. 19:10; 22:9, фус.). Акава вакерѓа ле дуј пути те шај те сикавел кобор тано адава важно. Никогаш ма те бистра акала хор духовна чачипа башо е Јеховаскоро баро духовно храми хем и бари предност со иси амен те служина амаре најбаре Девлеске (w23.10 29, пас. 17-18).

Саринен амен иси амен желба „те манга амен јекх јекхеа“. Ама бут тано важно те на бистра е Исусескоро предупредување кај „буте џененгоро мангипе ка шудрол“ (Мат. 24:12). О Исус на мангља те вакерел кај бут таро лескере ученикија ка чхинавен те сикавен мангипе јекх јекхеске. Ама ваљани те пазина хем те на дозволина те влијајнел упри аменде акава свето колесте со иси са похари мангипе. Акале мислаја ки годи, те кера лафи башо акава важно пучибе: Со ка поможинел аменге те џана дали амаро мангипе спрема о пхраља хем о пхења тано силно? Јекх начин сар шај те дикха кобор тано силно амаро мангипе тано аѓаар со ка испитина сар реагиринаја ко несаве ситуацие (2. Кор. 8:8). О апостол Петар спомнинѓа јекх асавки ситуација: „Најангле, нека овел тумен баро мангипе јекх јекхеске, соске о мангипе учхарела бут гревија“ (1. Пет. 4:8). Значи, о слабостија хем и несовршеност е јаверенгири шај те чхивен ко испит амаро мангипе (w23.11 10-11, пас. 12-13).

Нашти те ова послушна ки е Исусескири заповед башо мангипе ако сикаваја мангипе само несавенге ко собрание, а јаверенге на. Џанѓола пе, шај несавенцар ка ова попаше него јаверенцар исто сар со сине о Исус (Јован 13:23; 20:2). Ама о апостол Петар сетинкерела амен кај ваљани те манга са е пхрален соске ола тане дело тари амари фамилија (1. Пет. 2:17). О Петар поттикнинела амен „те манга амен силно таро вило“ (1. Пет. 1:22). Ко акава контекст те манге силно значинела те манге некас чак кеда тано пхаро те сикавел пе леске мангипе. На пример, со ако јекх пхрал ко несаво начин вреџинела тут или поврединела тут? Шај природно авела аменге те ирана леске наместо те сикава леске мангипе. Сепак, о Петар сиклило таро Исус кај о Девел на мангела те иранел лошнипаја (Јован 18:10, 11). Ов пишинѓа: „Ма иранен лошнипаја башо лошнипе, ни вреџибаја башо вреџибе, наместо адава, иранен шукарипаја“ (1. Пет. 3:9). Ако иси тут силно мангипе спрема о јавера адава ка поттикнинел тут те ове љубезно хем обѕирно (w23.09 28-29, пас. 9-11).

Чаче тано чудно кобор сигате бајровена о чхаве хем овена возрасна. Сар ка пхене о чхаве таро јекх пути бајровена. Ама, те шај некој те овел зрело христијани, мора те трудинел пе. Адава на овела таро јекх пути (1. Кор. 13:11; Евр. 6:1). Те шај те исполнина адаја цел, ваљани те ова паше амала е Јеховаја. Исто аѓаар ваљани аменге е Девлескири сила те шај те развина особине кола со свиџинена пе леске, те овен амен корисна вештине хем те спремина амен башо одговорностија со шај ка овен амен ки иднина (Изр. 1:5). Кеда о Јехова керѓа е манушен ки пхув, ов керѓа мурш хем џувли (1. Мој. 1:27). Јасно тано кај о мурша хем о џувља физички разликујнена пе, ама иси јавера да разлике машкар ленде. На пример, о Јехова денѓа е муршеске хем е џувљаке конкретна улоге хем адалеске ваљани ленге особине хем вештине кола со ка поможинен ленге те исполнинен адала улоге (1. Мој. 2:18; w23.12 18, пас. 1-2).

Дали о Исус мангља о јавера да те користинен лескере Дадескоро анав? Сигурно кај оја. Несаве религиозна водачија шај мислинена сине кај е Девлескоро анав тано бут свето те шај те андинен ле. Ама, о Исус никогаш на дозволинѓа асавке традицие со нане библиска те чхинавен ле те фалинел пле Дадескоро анав. Размислин башо време кеда о Исус сине ко герасинско региони хем сасљарѓа јекхе мануше коле со сине ле демонија. О мануша дарандиле хем молинѓе е Исусе те џал песке адатхар хем адалеске ов на ачхило ко адава тхан (Мар. 5:16, 17). Ама о Исус мангља адари да те вакерел пе е Јеховаскоро анав. Адалеске, е манушеске со сасљарѓа ле вакерѓа те вакерел е јавере манушенге башо адава со о Јехова керѓа баши лесте, а на башо адава со о Исус керѓа леске (Мар. 5:19). О Исус мангела амен да авдиве те кера о исто, те вакера лескере Дадескоро анав ко цело свето! (Мат. 24:14; 28:20). Кеда кераја адава, амен радујнаја амаре Царе е Исусе (w24.02 10, пас. 10).

Бут баро благослов тано со сием дело тари е Јеховаскири организација ко акала пхаре последна диве. О живото ко акава свето овела са попхаро хем попхаро, ама о Јехова денѓа амен пхраља хем пхења кола со шај те поможинен амен (Пс. 133:1). Исто аѓаар, ов поможинела амен те овел амен среќно фамилија (Еф. 5:33 — 6:1). Ама исто аѓаар, дела амен мудрост која со шај те поможинел аменге те икљова ко крајо амаре проблеменцар хем те осетина чачутно андруно мир. Сепак, амен мора бут те трудина амен те шај те ачхова верна е Јеховаске џикоте служинаја леске. Соске? Адалеске со о јавера бут пути шај те поврединен амен пумаре лафенцар или постапкенцар. Исто аѓаар, шај те обесхрабрина амен таро амаре лична грешке, посебно ако кераја повише пути јекх исто грешка. Амен понадари да ваљани те служина е Јеховаске чак кеда 1) поврединена амен амаре пхраља хем пхења, 2) разочаринела амен амаро брачно партнери хем 3) разочаринаја амен коркори амендар (w24.03 14, пас. 1-2).

Некогаш, ка шуна искуствија таро пхраља хем пхења кола со одлучинѓе те керен повише ки служба башо Јехова. Шај сине ки Школа башо полновремена објавителија или селинѓе пе ко тхана коте со иси побари потреба. Ако тле околностија дозволинена туке, адаја тани бут шужи цел со шај ту да те чхиве ла туке. Е Јеховаскере слуге бут мангена те керен повише баши лесте (Апо. 16:9). Ама, со ако ко моменти нашти те кере адава? Ма мислин кај похари врединеа околендар со шај те керен адава. Сар христијања, аменге тано најважно џи ко крајо те истрајна (Мат. 10:22). Ма бистре кај о Јехова бут радујнела пе кеда служинеа леске спрема тле способностија хем околностија. Адава тано јекх важно начин сар шај понадари да те џа пало Исус откеда ка крстине тут (Пс. 26:1; w24.03 10, пас. 11).

Амаро небесно Дад ветинѓа кај ка простинел аменге ако каинаја амен (Пс. 86:5). Значи, ако аменге чаче жал башо гревија со керѓем лен, шај те овел амен доверба кај о Јехова ка ачхол ко пло лафи хем ка простинел аменге. Ма бистре кај о Јехова нане круто, ов тано разумно хем на очекујнела повише таро адава со шај те кера. Ов ценинела са адава со кераја баши лесте са џикоте даја леске амаро најшукар. Исто аѓаар, размислин башо несаве личностија тари Библија кола со служинѓе е Јеховаске цело вилеа. На пример, размислин башо апостол Павле. Ов ревно служинела сине бершенцар, аѓаар со патујнела сине бут километре хем керела сине бут собранија. Ама дали о Јехова на сине више лестар задоволно кеда лескере околностија менинѓе пе хем нашти сине повише те проповединел сар англедер? На. Ов понадари да керела сине адава со шај хем о Јехова благословинѓа ле (Апо. 28:30, 31). Слично тано аменцар да, кобор шај те да е Јеховаске зависинела таро амаре околностија, а адава шај те менинел пе. Ама леске тано најважно таро саво мотиви кераја адава (w24.03 27, пас. 7, 9).

Адалеа со молинѓа пе е Јеховаске, о Исус денѓа шукар пример пле следбениконге. Џикоте трајнела сине лескири служба, о Исус бут пути молинела пе сине. Ов ваљани сине те одвојнел песке време баши молитва соске сине бут зафатимо хем ретко сине коркори (Мар. 6:31, 45, 46). Адалеске уштела сине рано сабајле те шај те овел ле време коркори те молинел пе е Јеховаске. Најхари ки јекх прилика, ов молинѓа пе цело рат англедер те анел важно одлука (Лука 6:12, 13). Хем и рат англедер те мерел, о Исус бут пути молинѓа пе те шај те завршинел о најпхаро дело тари пли задача ки пхув (Мат. 26:39, 42, 44). Е Исусескоро пример сикавела аменге кај бизи разлика кобор сием зафатиме, амен ваљани те одвојна аменге време баши молитва. Исто сар о Исус, амен да шај ка ваљани те ушта рано сабајле или те ачхова хари покасно раќате те шај те молина амен. Ако кераја аѓаар, ка сикава е Јеховаске кај ценинаја акава скапоцено поклон (w23.05 3, пас. 4-5).

Приметин о лафи „пхерѓа“ ко авдисутно стихо. Јекх библиско речнико спорединела е Јеховаскоро мангипе јекхе рекаја колате со цело време тхавдела пани хем пхерѓола. Акаја споредба јасно сикавела кобор бут мангела о Јехова е помазаникон. О помазаникија џанена кај о Девел мангела лен (Јуда 1). О апостол Јован опишинѓа пле чувствија акале лафенцар: „Дикхен саво мангипе денѓа амен о Дад, те ова викиме е Девлескере чхаве“ (1. Јов. 3:1). Дали о Јехова мангела само е помазаникон? На, о Јехова сикавѓа кај мангела саринен амен. Кова тано о најбаро доказ башо е Јеховаскоро мангипе? И откупнина — о најбаро мангипе со шај сине некој џи акана те сикавел (Јован 3:16; Рим. 5:8; w24.01 28, пас. 9-10).

Акава стихо откринела со поможинѓа е Давидеске те побединел пли дар. Иако лескоро живото сине ки опасност, ов размислинела сине башо адава со о Јехова панда хари ка керел леске. О Давид џанља кај о Јехова ка спасинел ле ко право време. Уствари, о Јехова вакерѓа кај о Давид ка овел о следно цари ко Израел (1. Сам. 16:1, 13). Ко секова ветување таро Јехова, о Давид дикхела сине сар ка пхене више исполнинѓа пе. Со ветинѓа о Јехова туке те керел? Џанѓола пе, амен на очекујнаја о Јехова те цидел са амаре проблемија. Сепак, бизи разлика саве проблемеа соочинаја амен ко акава свето, о Јехова ка цидел са адава ко нево свето (Иса. 25:7-9). Амаро Створители тано добором силно со шај те воскреснинел е мулен, те сасљарел амен хем те цидел са амаре душманен (1. Јов. 4:4; w24.01 6, пас. 12-13).

Размислин соске денѓан завет е Јеховаске хем крстинѓан тут. Ту керѓан акава соске мангљан те ове тари е Јеховаскири страна. Сетин тут со поможинѓа туке те ове уверимо кај аракхљан о чачипе. Запознајнѓан е Јехова хем почминѓан те поштујне ле хем те манге ле сар тло небесно Дад. Барили тли вера хем адалеске каинѓан тут. Тло вило поттикнинѓа тут те чхинаве е погрешна постапкенцар хем те почмине те живине аѓаар сар со мангела о Девел. Локхило туке кеда халиљан кај о Јехова простинѓа туке (Пс. 32:2). Почминѓан те џа ко состанокија хем те вакере е јаверенге башо бут шуже буќа со сиклиљан. Акана сар крстимо Јеховаскоро сведоко ту пхиреа ко друмо со ингарела ко живото хем сиан одлучно те пхире ки лесте ки цели вечност (Мат. 7:13, 14). Адалеске, ачхов цврсто хем стабилно џикоте служинеа е Јеховаске хем секогаш ов послушно ко лескере заповедија (w23.07 17, пас. 14; 19, пас. 19).

Адава со ка размислине башо завет со денѓан е Јеховаске ки молитва, ка дел тут сила те отфрлине секова искушение. На пример, дали ка почмине те флертујне некасаја сој ко брако? Џанѓола пе кај на. Ту више ветинѓан е Јеховаске кај никогаш нане те кере асавко нешто. Ако на дозволинеа ки туте те развинен пе погрешна чувствија, покасно нане те ваљани те борине тут те циде лен тутар. Адалеа ка циде тут таро друмо е румиме манушенгоро (Изр. 4:14, 15). Шај бут те поможинел туке адава со ка размислине башо е Исусескоро пример, ов сине одлучно те радујнкерел пле Даде. Исто сар о Исус, сигате хем одлучно отфрлин са со на свиџинела пе е Девлеске колеске со денѓан лафи кај ка служине (Мат. 4:10; Јован 8:29). Џанѓола пе кај о неволје хем о искушенија дена тут прилика те сикаве кај сиан одлучно понадари да те џа пало Исус. Џикоте кереа адава, шај те ове сигурно кај о Јехова ка поможинел туке (w24.03 9-10, пас. 8-10).