Октомври

Дали понекогаш туке пхаро те ове послушно? Е цареске е Давидеске сине, адалеске молинѓа е Девле: „Бајрар ки манде желба те керав тли волја“ (Пс. 51:12). О Давид мангела сине е Јехова. Сепак, понекогаш сине леске пхаро те овел послушно, адава тано случај аменцар да. Соске? Јекх причина тани адаја со наслединѓем и погрешно желба те ова непослушна. Дујто бути, о Сатана цело време пробинела те чхивел амен те бунина амен против о Девел, исто сар со керѓа ов (2. Кор. 11:3). Хем трито, живинаја ко свето коте со иси бунтовно стави, о „духо кова со акана влијајнела ко непослушна чхаве“ (Еф. 2:2). Адалеске мора бут те трудина амен на само те борина амен против амаре грешна желбе, него хем против о притисок таро Сатана хем таро акава свето со керена ле упри аменде те шај те ова непослушна. Амен мора те трудина амен те ова послушна е Јеховаске хем околенге каске со ов денѓа авторитети (w23.10 6, пас. 1).

Со шај те сикљова таро чудо е Исусескоро кеда керѓа о пани те овел мол? Сикљоваја јекх поука баши понизност. О Исус на фрдинѓа чалми акале чудоја. Уствари, ов никогаш на фалинѓа пе е буќенцар со керѓа лен. Наместо адава, ов понизно секова пути дела сине цело фалба пле Дадеске (Јован 5:19, 30; 8:28). Ако џаја пало пример е Исусескоро аѓаар со иси амен понизно стави, нане те фрда чалми е буќенцар со кераја лен. На ваљани те фалина коркори амен него е Девле каске со служинаја (Ерем. 9:23, 24). Ваљани те да ле и чест која со заслужинела ла, соске бизи е Јеховаскири помош нијекх бути нашти те кера ла шукар (1. Кор. 1:26-31). Ако сием понизна, тегани нане те очекујна о јавера те фалинен амен башо шукар буќа со кераја е јаверенге. Доволно аменге адава со џанаја кај о Јехова дикхела хем ценинела адава со кераја. (Споредин Матеј 6:2-4; Евр. 13:16.) Оја, амен радујнаја е Јехова кеда сием понизна сар о Исус (1. Пет. 5:6; w23.04 4-5, пас. 9; 5, пас. 11-12).

Водимо тари е Девлескири сила, о апостол Павле охрабринѓа е христијанен те дикхен е јаверенге те овел шукар. Сар шај ко состанокија те применина акава совет? Аѓаар со ка овел амен ки годи кај о јавера да мангена те коментиринен. Размислин башо акава. Кеда сиан тле амаленцар, дали нашти те авен тутар ко лафи адалеске со само ту вакереа нешто? Сигурно кај на. Ту мангеа ола да те керен лафи. Слично, ко состанокија мангаја те мукха кобор со шај повише џене те коментиринен. Уствари, јекх таро најшукар начинија сар шај те охрабрина амаре пхрален хем пхењен тано аѓаар со ка да лен прилика те сикавен пумари вера (1. Кор. 10:24). Адалеске, понадари да те да кратка коментарија те шај те овел време повише џене те коментиринен. Чак ако деа кратко коментари ма вакер бут мисле. Ако вакереа са таро пасус, тегани нане те мукхе о јавера те вакерен нешто (w23.04 22-23, пас. 11-13).

На смејнаја те бистра кобор тано важно понадари да те поможина е јаверен, посебно преку амари служба. Џикоте сием ки служба ваљани те ова флексибилна. Амен проповединаја манушенге со иси лен различна верувања, ставија хем култура. О апостол Павле сине прилагодливо ки пли служба хем амен шај бут те сикљова таро лескоро пример. О Исус бичхалѓа е Павле те овел апостоли ко „јавера народија“ (Рим. 11:13). Адалеске о Павле проповединѓа е евреенге, е грконге, школујме манушенге, обична манушенге, службениконге хем царенге. Те шај те ресел ко вило са акале различна манушенге, о Павле вакерѓа баши песте: „Сариненге сиум сине са“ (1. Кор. 9:19-22). Ов прилагодинѓа пло начин сар проповединела сине аѓаар со размислинела сине баши е манушенгири култура, котар авена хем ко со верујнена. Амен да шај те ова успешна ки служба ако сием флексибилна хем ако прилагодинаја амаро начин сар проповединаја спрема е манушенгере потребе (w23.07 23, пас. 11-12).

Ако некој тано кротко на значинела кај тано слабо. Ваљани те ова силна те шај те ачхова смириме кеда аракхљоваја ки јекх пхари ситуација. О свети дух поможинела аменге те на хољана сигате (Гал. 5:22, 23). Јекх облик таро грчко лафи кова сој преведимо сар „те на хољанел пе сигате“ понекогаш користинела пе сине те шај те опишинел пе јекхе диво грасте кова со сине дресиримо те овел питомо. Замислин туке сар јекх диво грас овела питомо хем кротко. Иако тано кротко, сепак тано силно. Сар амен шај те ова кротка, а ко исто време силна? Нашти коркори те кера адава. Ваљани те молина е Девле преку пли сила те поможинел аменге те развина акаја бут шужи особина. Бут искуствија сикавѓе кај шај те овел адава. На пример, бут пхраља ачхиле смириме кеда несаве мануша пробинѓе те провоциринен лен. Адалеа бут џене иси лен шукар мислење башо Сведокија (2. Тим. 2:24, 25; w23.09 15, пас. 3).

Ки јекх визија, о апостол Јован дикхља 24 старешине ко небо со обожавинена е Јехова. Ола фалинѓе е Девле хем вакерѓе кај ов заслужинела и слава, и чест хем и моќ (Отк. 4:10, 11). Исто аѓаар, е верна ангелен да иси лен бут причине те фалинен е Јехова. Ола тане леа ко небо хем пенџарена ле бут шукар. Таро буќа со керела лен о Јехова, ола шај те дикхен саве особине иси ле. Е Јеховаскере постапке поттикнинела лен те фалинен ле (Јов 38:4-7). Амен да ваљани те фалина е Јехова ко амаре молитве. Шај те кера адава аѓаар со ка вакера леске со мангаја хем со ценинаја ки лесте. Џикоте читинаја хем проучинаја и Библија, ваљани те трудина амен те аракха е Јеховаскере особине кола со посебно привлечинена амен ки лесте (Јов 37:23; Рим. 11:33). Тегани, вакер адава е Јеховаске ки молитва. Исто аѓаар, шај те фалина е Јехова башо адава со поможинела аменге хем са амаре пхраленге хем пхењенге (1. Сам. 2:1, 2; w23.05 3-4, пас. 6-7).

Таро 1919 берш, о Баро Вавилон на сине ле више влијание упро е Девлескоро народо. Ко адава берш сине чхивдо о „верно хем мудро робо“ те шај те поможинел е искрена манушенге те почминен те џан ко „Свето Друмо“ кова само со пхравдило (Мат. 24:45-47; Иса. 35:8). Адалеске со више англедер сине керде подготовке, бут мануша шај сине те џан ко адава друмо хем те дознајнен повише башо Јехова хем лескири намера (Изр. 4:18). Ола исто аѓаар шај сине те почминен те живинен спрема е Јеховаскере мерилија. О Јехова на очекујнѓа таро пло народо те керен промене таро јекх пути. Наместо адава, сар со накхела сине о време ов хари похари прочистинела сине пле народо. Секова друмо ваљани редовно те одржинел пе. Слично, таро 1919 берш на чхинавѓа пе те керел пе бути ко „Свето Друмо“ те шај са повише мануша те икљон таро Баро Вавилон (w23.05 17, пас. 15; 19, пас. 16).

Секова члени таро Водечко тело лично обучинела е помошникон таро различна одборија сој ко Водечко тело. Ко моменти акала помошникија верно грижинена пе башо бут одговорностија ки организација. Ола тане шукар спремиме те шај те продолжинен те грижинен пе е Христосескере бакхренге. Ко крајо тари бари неволја кеда о последно да помазанико ка овел лендо ко небо, о Исус понадари да ка водинел е Јеховаскере народо ки пхув хем ов ка продолжинел верно те служинел е Јеховаске. Џанаја кај ко адава време ка ова нападиме таро Гог таро Магог, јекх коалиција таро са о народија која со мрзинела амен (Езек. 38:18-20). Ама адава напад кратко ка трајнел хем нане те овел успешно. Нане те чхинавел е Девлескере народо те служинел е Јеховаске. О Девел сигурно ка спасинел пле народо! Ки јекх визија о апостол Јован дикхља јекх „баро мноштво“ таро е Христосескере јавера бакхре. Леске сине вакердо кај адава „баро мноштво“ авела „тари бари неволја“ (Отк. 7:9, 14). Значи, сигурна сием кај о Јехова ка спасинел пле верна слуген! (w24.02 5-6, пас. 13-14).

Со шај те кера те шај те добина о свети дух? Шај те молина амен башо адава, те проучина е Девлескоро Лафи хем те ова вклучиме ко активностија тари организација која сој водими таро лескоро духо. Адава ка поможинел аменге те развина о „особине со авена таро свети дух“ (Гал. 5:22, 23). О Девел дела пло свети дух само околенге со иси лен чиста мисле хем постапке. Ов нане те дел амен пло свети дух ако на цидаја амендар о румиме мисле хем постапинаја спрема ленде (1. Сол. 4:7, 8). Те шај понадари да те добина о свети дух мора те шуна о библиско совет: „Ма потценинен о пророштвија“ (1. Сол. 5:20). Ко акава стихо е лафеа „пророштвија“ мислинела пе ко пораке со дела амен о Јехова преку пло духо. Ки ленде тане вклучиме о пораке башо е Јеховаскоро диве хем башо време колесте со амен живинаја. Амен на мислинаја кај о Армагедон нане те авел ко амаро време. Наместо адава икераја ле ки годи аѓаар со сием зафатиме буќенцар коленцар со угодинаја е Девлеске (2. Пет. 3:11, 12; w23.06 12, пас. 13-14).

Со ваљани сар христијања те кера ако икљола аменге порнографско слика ко амаре електронска уредија? Ваљани одма те цида амаре јакхја латар! Ка овел аменге полокхо те кера адава ако на бистраја кај на постојнела ништо поскапоцено таро амаро амалипе е Јеховаја. Ама, чак о слике коленге со мислинела пе кај нане порнографска шај сексуално те возбудинен амен. Соске ваљани асавке да слике те избегина те дикха? Адалеске со на мангаја те кера ни о најтикно чекори со ка чхивел амен те кера прељуба ко амаро вило (Мат. 5:28, 29). О Дејвид, јекх старешина таро Тајланд, вакерела: „Пучава ман, чак ако о слике нане порнографска, дали о Јехова ка радујнел пе ако продолжинава те дикхав лен? Кеда размислинава аѓаар адава поможинела ман те постапинав мудро“. И исправно дар поможинела аменге те постапина мудро хем те на кера нешто колеа со ка повредина е Јехова. И дар таро Девел тани „почеток“ или темели баши мудрост (w23.06 23, пас. 12-13).

Акала „собе“ шај те претставинен амаре собранија. Џикоте трајнела и бари неволја о Јехова ветинела аменге кај ка заштитинел амен ако понадари да ачховаја ко јекхипе амаре пхраленцар хем пхењенцар. Адалеске, панда акана ваљани те да са амендар те манга амаре пхрален хем пхењен, а на само те трудина амен те ова ленцар шукар. Амаро живото шај те зависинел таро адава! „О баро диве е Јеховаскоро“ ка овел бут пхаро периоди са е манушенге (Соф. 1:14, 15). Адава значинела кај е Јеховаскере народоске да нане те овел локхо. Ама ако спреминаја амен панда акана ка шај те ачхова смириме хем те поможина е јаверенге. Аѓаар ка истрајна ко са о проблемија со ка овен амен. Хем кеда амаре пхрален ка овел лен несаво пхарипе, ка да амендар са те поможина лен аѓаар со ка сикава ленге сочувство хем ка да лен адава со ваљани ленге. Ако панда акана сикљоваја те манга амаре пхрален хем пхењен, нане те овел аменге пхаро те сикава ленге мангипе ки иднина. Тегани о Јехова ка дел амен вечно живото хем никогаш више нане те сетина амен ко са о катастрофе хем неволје со сине амен ко акава свето (Иса. 65:17; w23.07 7, пас. 16-17).

Е Девлескоро Лафи бут пути опишинела е верна манушен сар силна. Ама чак о најсилна машкар ленде на осетинѓе пе секогаш силна. На пример, ки јекх прилика о цари о Давид вакерѓа кај о Јехова денѓа ле храброст хем сила (Пс. 138:3). Ама ко јавера прилике дарандило (Пс. 55:5). Иако е Самсоне сине ле посебно бари сила која со авела сине таро е Девлескоро духо, сепак ов сине свесно кај адаја сила авела таро Девел хем кај бизи лате ов ка овел „сар са о јавера мануша“ (Суд. 14:5, 6; 16:17). Таро акава јасно дикхела пе кај акала верна мануша сине зорале само адалеске со о Јехова денѓа лен сила. О апостол Павле исто аѓаар признајнѓа кај ваљани леске сила таро Јехова (2. Кор. 12:9, 10). Ле сине ле проблемија састипаја (Гал. 4:13, 14). Понекогаш сине леске пхаро те керел адава сој исправно (Рим. 7:18, 19). А понекогаш сине бут секиримо хем дарала сине со ка случинел пе леа (2. Кор. 1:8, 9). Сепак кеда о Павле сине слабо, ов сине силно. Сар? О Јехова денѓа ле и сила со ваљани леске те шај те истрајнел ко неволје (w23.10 12, пас. 1-2).

Ако понекогаш мислинаја кај на врединаја, шукар тано те сетина амен кај коркори о Јехова привлечинѓа амен ки песте (Јован 6:44). Ов дикхела о шукар буќа ки аменде кола со шај амен коркори на дикхаја лен хем ов џанела со чаче иси амен ко вило (2. Лет. 6:30). Адалеске, шај те верујна ле кеда ов вакерела аменге кај сием скапоцена (1. Јов. 3:19, 20). Англедер те дознајнен о чачипе, несаве амендар керѓе буќа баши коленде со шај панда осетинена пе крива (1. Пет. 4:3). Јавера кола со верно служинена е Јеховаске шај панда боринена пе погрешна желбенцар. Сар тано туја, дали тло вило осудинела тут башо нешто? Ако оја, шај те утешинел тут адава со ка џане кај јавера да верна слуге е Јеховаскере боринена пе сине слична чувствонцар. На пример, о апостол Павле сине бут разочаримо кеда размислинела сине башо пле слабостија (Рим. 7:24). Џанѓола пе, о Павле каинѓа пе башо пле гревија хем крстинѓа пе. Сепак, баши песте вакерѓа кај тано „најтикно таро апостолија“ хем кај тано најбаро грешнико (1. Кор. 15:9; 1. Тим. 1:15; w24.03 27, пас. 5-6).

Јекх поука со шај те сикљова тари лошно одлука со анѓа ла о цари о Јоас тано адава кај ваљани те бирина амала кола со шукар ка влијајнен упри аменде — амала кола со мангена е Јехова хем кола со мангена те радујнкерен ле. На ваљани те дружина амен само околенцар сој ки амари возраст. Ма бистре, о Јоас сине бут потерно таро пло амал о Јодај. Кеда биринеа амала, пуч тут: „Дали поможинена ман те бајрарав мли вера ко Јехова? Дали поттикнинена ман те живинав спрема е Девлескере мерилија? Дали керена лафи башо Јехова хем башо адава со сикљовена тари Библија? Дали поштујнена е Девлескере мерилија? Дали вакерена манге само адава со мангава те шунав, или иси лен храброст те испрајнен ман кеда ваљани?“ (Изр. 27:5, 6, 17). Искрено, на ваљани туке амала со на мангена е Јехова. Ама ако тле амала мангена е Јехова, ма циде тут лендар ола секогаш ка поможинен туке (Изр. 13:20; w23.09 9-10, пас. 6-7).

И буква алфа тани и прво буква тари грчко азбука, а омега и последно. Адалеа со користинела о букве алфа хем омега, о Јехова поможинела амен те хаљова кај кеда почминела нешто, ов сигурно ка завршинел адава. Откеда о Јехова створинѓа е Адаме хем е Ева, ов вакерѓа ленге: ’Те овел тумен пхердо чхаве хем те овен бут џене, пхерен и пхув хем владинен упри лате‘“ (1. Мој. 1:28). Кеда о прво пути вакерѓа пли намера, о Јехова сар те пхене вакерѓа „алфа“. Ка авел време кеда е Адамескере хем е Евакере послушна хем совршена потомција ка пхерен и пхув хем ка керен ла рај. Тегани о Јехова сар те пхене ка вакерел „омега“. Откеда завршинѓа створибаја о небо хем и пхув хем са сој ки ленде, о Јехова вакерѓа нешто сој сар гаранција. Ов посветинѓа о ефтато диве те шај те исполнинел пли намера е манушенцар хем е пхувјаја. Лескири намера целосно ка исполнинел пе џи ко крајо таро адава диве (1. Мој. 2:1-3; w23.11 5-6, пас. 13-14).

О дословно патујбе таро Вавилон џи ко Израел сине пхаро хем шај сине те трајнел околу штар масек. Ама о Јехова ветинѓа ленге кај ка цидел секоја пречка со шај сине те чхинавел лен ко адава друмо. О верна Евреија џанле кај о благословија таро адава со ка иранен пе ко Израел сине бут побаре тари било која жртва со ваљани сине те керен ла. И најбари награда сине ленге адаја со шај сине те обожавинен е Јехова ко чисто начин. Ко Вавилон на сине нијекх храми башо Јехова. Адари на сине жртвенико коте со о Израелција шај сине те ден пумаре жртве спрема е Мојсеескоро закони хем на сине организириме свештеникија кола со шај сине те ден адала жртве. Исто аѓаар, ки адаја диз о мануша обожавинена сине ховавне девлен хем на поштујнена сине ни хари е Јехова или лескере мерилија. Адалеске о Евреија кола со мангена сине е Јехова едвај аџикерена сине те иранен пе ки пумари пхув коте со шај палем те обожавинен ле ко чисто начин (w23.05 15, пас. 3-4).

Ваљани аменге помош тари е Девлескири сила те шај понадари да те понашина амен сар „чхаве е светлинакере“. Соске? Адалеске со ни хари нане локхо те ачхова чиста ко акава неморално свето (1. Сол. 4:3-5, 7, 8). Е Девлескири сила шај те поможинел амен те борина амен те шај те на размислина сар о мануша таро акава свето, коте сој тане вклучиме ленгере филозофие хем ставија кола со нане спрема е Девлескоро начин сар размислинела. Исто аѓаар, е Девлескири сила шај те поможинел амен те сикава секова шукарипе хем праведност (Еф. 5:9). Јекх начин сар шај те добина е Девлескири сила тано аѓаар со ка молина амен баши лате. О Исус вакерѓа кај о Јехова „ка дел пли сила околенге со родена лестар“ (Лука 11:13). Исто аѓаар, е Девлескири сила добинаја ла кеда заедно амаре пхраленцар хем пхењенцар фалинаја е Јехова ко амаре состанокија (Еф. 5:19, 20). Адава со е Девлескири сила влијајнела шукар упри аменде ка поможинел амен те живина аѓаар сар со мангела о Девел (w24.03 23-24, пас. 13-15).

Дали ваљани туке повише стрпливост? Ако оја, молин тут башо адава. И стрпливост тани особина со авела таро свети дух (Гал. 5:22, 23). Адалеске, шај те молина амен е Јеховаске башо свети дух те шај те поможинел амен те развина акаја особина. Ако аракхљоваја ки несави ситуација коте со ка овел аменге пхаро те сикава стрпливост, тегани шај те молина амен башо лескоро духо те шај те ова стрплива (Лука 11:13). Исто аѓаар, шај те рода помош таро Јехова те дикха ко буќа сар со дикхела ов. Освен со ка молина амен, ваљани те да амендар са те шај те ова стрплива секова диве. Значи, ако понадари да молинаја амен баши стрпливост хем трудинаја амен те сикава акаја особина, о Јехова ка поможинел аменге те ова стрплива иако англедер шај на сием сине асавке. Исто аѓаар, размислин башо библиска примерија. Ки Библија иси бут примерија таро мануша кола со сине стрплива. Ако размислинаја баши ленде, ка шај те сикљова ко кола начинија шај те ова стрплива (w23.08 22, пас. 10-11).

О Исус уверинѓа е апостол Петаре кај о Јехова ка грижинел пе леске. Откеда воскреснинѓа о Исус панда јекх пути поможинѓа е Петаре хем е јавере апостолен чудоја те астарен мачхе (Јован 21:4-6). Акава чудо уверинѓа е Петаре кај о Јехова бут локхесте шај те поможинел е Петаре те грижинел пе башо лескере материјална потребе. Шај ки адаја прилика о Петар сетинѓа пе ко е Исусескере лафија кеда мангља те вакерел кај о Јехова ка грижинел пе околенге со „најангле родена о Царство“ (Мат. 6:33). Са акава поможинѓа е Петареске те чхивел и служба ко прво тхан, а на те астарен пе мачхе. Ов храбро проповединѓа ки Педесетница 33-то берш а.е. хем поможинѓа повише милја манушенге те прифатинен о шукар хабери (Апо. 2:14, 37-41). Пало адава поможинѓа е Самарјаненге хем околенге со на сине Евреија те прифатинен е Исусе (Апо. 8:14-17; 10:44-48). О Јехова сигурно користинѓа е Петаре те поможинел манушенге таро различна нацие те авен ко собрание (w23.09 20, пас. 1; 23, пас. 11).

Околу дуј берш откеда о Вавилонција уништинѓе о Ерусалим. О вавилонско цари о Навуходоносор дикхља јекх страшно суно башо јекх баро кипи. Ов заканинѓа пе кај ка мударел са е мудра манушен, машкар коленде со сине хем о Даниел, ако на вакерена леске саво суно дикхља хем со значинела адава (Дан. 2:3-5). О Даниел мора сине те керел нешто одма иначе ка овен сине мударде бут мануша. Ов гело ко цари хем молинѓа ле те дел ле време те шај те вакерел леске со значинела о суно (Дан. 2:16). А башо адава ваљанѓа леске храброст хем вера. Соске? Ки Библија нигде на пишинела кај о Даниел англедер објаснинѓа со значинела несаво суно. Ов замолинѓа пле амален „те молинен баши милост е Девле сој ко небо баши адаја тајна“ (Дан. 2:18). О Јехова одговоринѓа ко ленгере молитве. Адалеске со о Јехова поможинѓа е Даниелеске, ов шај сине те објаснинел е царескоро суно хем аѓаар о Даниел хем лескере амала ачхиле џивде (w23.08 3, пас. 4).

Размислин соске тано корисно те ове стрпливо. Кеда сием стрплива, тегани сием порадосна хем посмириме. Значи и стрпливост шај те поможинел аменге те ова емоционално хем физичко састе. Кеда сием стрплива е јаверенцар тегани накхаја пошукар ленцар. Аѓаар ко амаро собрание ка овел јекхипе. Ако некој нервиринела амен, адава со нане те хољана сигате ка поможинел аменге те на кера панда полошно и ситуација (Пс. 37:8; Изр. 14:29). Ама најважно таро са, кеда сием стрплива амен џаја пало пример амаре небесно Дадескоро хем оваја леа попаше. Чаче, и стрпливост тани бут шужи особина која со користинела сариненге. Иако нане локхо секогаш те ова стрплива, адалеске со о Јехова поможинела аменге шај понадари да те развина акаја особина. Хем џикоте стрпливо аџикераја о нево свето, шај те ова увериме кај „е Јеховаскере јакхја тане упро окола со дарана лестар, упро околенде со аџикерена лескоро верно мангипе“ (Пс. 33:18). Адалеске понадари да те сикава стрпливост (w23.08 22, пас. 7; 25, пас. 16-17).

О Јаков објаснинѓа кај јекх мануш шај те вакерел кај иси ле вера, ама лескере постапке на сикавена адава (Јак. 2:1-5, 9). О Јаков исто аѓаар керѓа лафи башо јекх мануш кова со дикхља кај лескоро пхрал или пхен нане лен со те уравен или со те хан а на керела ништо те шај те поможинел лен. Чак ако адава мануш вакерела кај иси ле вера, лескере постапке на сикавена адава. Адалеске, лескири вера на врединела (Јак. 2:14-16). О Јаков вакерѓа кај и Раав тани шукар пример која со пле постапкенцар сикавѓа кај иси ла вера (Јак. 2:25, 26). Ој шунѓа башо Јехова хем халили кај ов поможинела е Израелцон (Ис. Нав. 2:9-11). Лакере постапке сикавѓе кај иси ла вера аѓаар со заштитинѓа дује израелско шпионен кеда ленгоро живото сине ки опасност. Адалеске, баши акаја несовршено џувли која со на сине Израелка вакерела пе кај сине праведно исто сар о Авраам. Таро лакоро пример сикљоваја кобор тано важно амаре постапкенцар те сикава кај иси амен вера (w23.12 5-6, пас. 12-13).

Сар христијања на мангаја те хаљова само о основна библиска сикљојба. Мангаја те сикљова „чак е Девлескере хор буќа“ хем адава шај те кера ле соске поможинела амен е Девлескири сила (1. Кор. 2:9, 10). Ко тло лично проучибе шај те проучине подетално несави тема те шај те ове паше е Јеховаја. На пример, шај те истражине сар о Јехова сикавѓа пло мангипе пле слугенге таро пурано време хем сар адава уверинела тут кај туте да мангела тут. Исто аѓаар шај те проучине башо адава сар о Јехова организиринѓа е Израелцон те обожавинен ле хем те споредине адалеа сар о Јехова авдиве мангела те обожавина ле. Или шај те проучине ко деталија секова пророштво со исполнинѓа ле о Исус џикоте сине теле ки пхув. Шај те уживине џикоте читинеа асавке теме ако користинеа о Прирачнико истражибаске е Јеховаскере сведоконгоро. Ако проучинеа хор и Библија адава шај те зојракерел тли вера хем те поможинел тут „шукар те пенџаре е Девле“ (Изр. 2:4, 5; w23.10 18-19, пас. 3-5).

О апостол Павле пишинела: „Нека овел тумен баро мангипе“. О дујто дело таро стихо објаснинела ко со поттикнинела амен о баро мангипе. Поттикнинела амен те учхара о гревија амаре пхраленгере хем пхењенгере. Акава шај те споредина ле јекхе примереа: Замислин туке астали коле со иси ле бут флеке хем тано грбимо. Шај те ла јекх чаршафи хем те пхрава ле упро астали те шај те учхара на само јекх или дуј флеке, или грбиме тхана, него повише. Слично, ако иси амен баро мангипе спрема амаре пхраља хем пхења ка шај те учхара, јавере лафенцар те простина, на само јекх или дуј слабостија него „бут гревија“. Амаро мангипе ваљани те овел добором силно со ка простина е јаверенгере грешке — чак кеда адава нане локхо (Кол. 3:13). Кеда простинаја е јаверенге, амен сикаваја кај амаро мангипе тано силно хем кај мангаја те радујнкера е Јехова (w23.11 10-12, пас. 13-15).

Кеда е царе е Јосија сине ле 26 берш, ов почминѓа те обновинел о храми. Џикоте керена сине бути ко храми, аракхле „о лил е Јеховаскере законескоро, со сине дендо преку о Мојсеј“. Кеда о цари шунѓа со сине пишимо, ов одма керѓа промене те шај те овел послушно ко адава со сине пишимо (2. Лет. 34:14, 19-21). Шај трудинеа тут редовно те читине и Библија. Дали уживинеа ко адава? Дали пишинеа туке стихија кола со шај те поможинен туке лично? Кеда е Јосија сине ле 39 берш, ов керѓа грешка колаја со нашавѓа пло живото. Наместо те пучел е Јехова башо водство, ле сине ле доверба коркори песте (2. Лет. 35:20-25). Таро акава шај те сикљова нешто. Бизи разлика кобор берш иси амен или кобор време више проучинаја и Библија, мора понадари да те рода е Јехова. Ко адава тано вклучимо редовно те молина амен башо водство, те проучина лескоро Лафи хем те применина о советија со добинаја лен таро зрела христијања. Аѓаар, веројатно нане те кера баре грешке хем ка ова панда порадосна (Јак. 1:25; w23.09 12, пас. 15-16).

Ки Библија тане спомниме бут џувља кола со мангле е Јехова хем служинѓе леске. Ола тане шукар пример сариненге аменге. Ола сине „урамнотежена“ хем „верна ко са“ (1. Тим. 3:11). Освен адава, о пхења шај те аракхен зрела христијанке ко пумаро собрание коленгоро со пример врединела те слединен. Терне пхењален, размислинен коле зрела пхењенгоро пример шај те слединен. Приметинен кола шуже особине иси лен. Пало адава размислинен сар шај тумен да те сикавен о иста особине. И понизност тани важно особина со ваљани те овел е зрело христијанен. Ако јекх џувли тани понизно, ка овел ла шукар амалипе е Јеховаја хем е јаверенцар. На пример, јекх ромни со мангела е Јехова понизно биринела те прифатинел о начело башо поглаварство кова со денѓа ле лакоро небесно Дад (1. Кор. 11:3). Акава начело шај ко различна начинија те применинел пе хем ко собрание хем ки фамилија (w23.12 18-19, пас. 3-5).

О Јехова очекујнела е роместар те мангел пле ромња хем те грижинел пе башо лакере физичка, емоционална хем духовна потребе. Ваљани те развине и способност те проценине, те овел тут поштовање спрема о џувља хем те ове доверливо. Откеда ка женине тут, шај ка ове дад. Со шај те сикљове таро Јехова башо адава сар те ове шукар дад? (Еф. 6:4). О Јехова вакерѓа пле чхавеске кај мангела ле хем кај керела ле радосно, ов на гаравѓа лестар адава (Мат. 3:17). Ако овеа дад, редовно уверин тле чхавен кај мангеа лен. Спремно пофалин лен башо шукар буќа со керена. О дада кола со џана пало е Јеховаскоро пример поможинена пумаре чхавенге те овен зрела христијања. Шај панда акана те спремине тут баши акаја улога аѓаар со мангипаја ка грижине тут е јаверенге тари тли фамилија хем таро тло собрание хем аѓаар со ка сикаве кај мангеа лен хем ценинеа лен (Јован 15:9; w23.12 28-29, пас. 17-18).

Иако верно служинаја е Јеховаске, амен да доживинаја пхарипа хем насваљоваја, исто сар са о јавера мануша. Освен адава, шај ка ваљани те доживина противибе или прогонство околендар со мрзинена е Девлескере народо. Иако о Јехова на заштитинела амен таро акала пхарипа, ов ветинела кај ка поможинел аменге (Иса. 41:10). Кеда ов поможинела амен, шај те ачхова радосна, те ана шукар одлуке хем те ачхова леске верна чак кеда накхаја таро најпхаре ситуацие. О Јехова ветинела аменге кај ка дел амен пло мир (Фил. 4:6, 7). Кеда иси амен мир таро Девел, тегани амаре мисле хем амаро вило тане рахати хем осетинаја амен смириме адалеске со сием паше амала леа. Акава мир тано „упредер секоја мисла“. Акава чувство тано бут пошукар него адава со шај амен те мислина аменге. Дали случинѓа пе туке некогаш таро јекх пути те осетине тут смиримо откеда таро вило молинѓан тут е Јеховаске? Асавко чувство уствари тано о мир таро Девел (w24.01 20, пас. 2; 21, пас. 4).

Окола со мангена е Девле поттикниме тане те фалинен лескоро анав цело вилеа. О цари о Давид џанља кај кеда фалинаја е Јеховаскоро анав, адалеа фалинаја е Девле. Кеда шунаја о анав Јехова, одма со авела аменге ки годи тано адава сави личност тано ов, лескере шукар особине хем са адава со ов створинѓа. О Давид мангља те фалинел о анав пле небесно Дадескоро, адалеске со ки лесте дикхела сине сар нешто сој свето. Ов мангља те керел адава цело пле вилеа. Слично, о левитија да фалинена сине е Јехова аѓаар со предводинена сине ко гиљајбе. Ола понизно признајнѓе кај е Јеховаскоро свето анав заслужинела бут побари фалба тари адаја со ола дена ла пумаре лафенцар (Неем. 9:5). Сигурно кај асавки понизно фалба таро вило бут радујнкерѓа е Јехова (w24.02 9, пас. 6).

О Јехова нане те дикхел ки туте сар неуспешно ако на исполнинѓан тли цел која со нане реално спрема тле околностија (2. Кор. 8:12). Сикљов таро пхаре ситуацие. Ма бистре со успејнѓан те кере џи акана. И Библија вакерела: „О Девел нане неправедно, па те бистрел адава со керѓен“ (Евр. 6:10). Адалеске на ваљани ни ту да те бистре адава со керѓан. Размислин башо целија со више исполнинѓан лен, сар на пример те ове паше амал е Јеховаја, те кере е јаверенцар лафи баши лесте или те крстине тут. Исто сар со напредујнѓан хем исполнинѓан тле целија со сине тут англедер, аѓаар ту шај понадари да те напредујне хем те успејне те исполнине тле целија со иси тут акана. Кеда о Јехова поможинела тут, ту шај те ресе ки тли цел. Џикоте трудинеа тут те исполнине тли цел, ма бистре те уживине хем те дикхе сар о Јехова поможинела тут хем благословинела тут џикоте кереа адава (2. Кор. 4:7). Ако на откажинеа тут, ка добине панда побаре благословија (Гал. 6:9; w23.05 31, пас. 16-18).

О Јехова родела начинија те шај те сикавел пле слугенге кај мангела лен хем кај тано задоволно лендар. Ки Библија тане пишиме дуј ситуацие кеда о Јехова вакерѓа е Исусеске кај мангела ле хем кај керела ле радосно (Мат. 3:17; 17:5). Дали мангеа те шуне е Јехова сар вакерела туке кај тано задоволно тутар? Амен нашти дословно те шуна е Јеховаскоро гласо, ама ов керела аменцар лафи преку и Библија. Амен шај те „шуна“ сар о Јехова вакерела аменге кај тано задоволно амендар кеда читинаја о лафија е Исусескере сој пишиме ко евангелија. О Исус совршено сикавела сине о особине пле Дадескере. Адалеске кеда читинаја сар о Исус вакерела пле учениконге кај мангела лен хем ценинела лен, шај те замислина аменге сар о Јехова вакерела адала лафија аменге (Јован 15:9, 15). Ако иси амен неволје адава на значинела кај о Девел нане више задоволно амендар. Наместо адава, ола дена амен прилика те сикава кобор бут мангаја е Девле хем кобор бари доверба иси амен ки лесте (Јак. 1:12; w24.03 28, пас. 10-11).