Декември

Дали е Јехова иси ле и моќ те воскреснинел е мулен? Сигурно кај оја, соске ов тано „о Семоќно“ (Отк. 1:8). Адава значинела кај ов тано добором моќно со шај те уништинел секоле душмане, чак о мерибе (1. Кор. 15:26). Јавер причина соске џанаја кај о Девел тано способно те воскреснинел е мулен тано адава со лескоро памтибе нане ле граница. Ов викинела секоле ѕвезда ко анав (Иса. 40:26). Исто аѓаар на бистрела околен со муле (Јов 14:13; Лука 20:38). Ов шај бут локхе те памтинел секова детали таро окола со ка воскреснинел лен, чак ленгоро изглед, личност, искуство ко живото хем ленгоро сеќавање. Значи, шај те верујна ко е Јеховаскоро ветување башо воскресение со ка овел ки иднина адалеске со џанаја кај ле иси ле хем и желба хем и моќ те керел адава. Те дикха јекх јавер причина соске шај те овел амен доверба ко е Девлескоро ветување башо воскресение: О Јехова више воскреснинѓа манушен. Ко пурано време ов денѓа моќ некоборе манушенге, коте сој вклучимо о Исус, те воскреснинен е мулен (w23.04 9-10, пас. 7-9).

Ако кераја лафи ко тактично хем љубезно начин тегани о мануша шај те овен поспремна те шунен хем те продолжинен о разговор. Џанѓола пе, ако некој мангела те распрајнел пе аменцар, или те вреџинел амен, на сием должна те продолжина о разговор (Изр. 26:4). Ама асавке мануша тане ретка. Повише џене веројатно ка манген те шунен амен. Јасно тано кај ка овел амен бари корист ако сикљоваја те ова кротка. Молин тут е Јеховаске баши сила те шај те ачхове смиримо кеда ваљани те одговорине некаске баши несави спорно тема или кеда неправедно критикујнена тут. Ма бистре кај ако ачховеа смиримо адава шај те поможинел те на авел џи ко расправие кеда иси различна ставија. Исто аѓаар, ако одговоринеа ко смирено хем љубезно начин, адава шај те поттикнинел несавен те променинен пумаро стави баши аменде хем баши Библија. Секогаш те ова спремна те бранина амаре верувања, хем адава те кера ле шукарипаја хем те сикава хор поштовање (1. Пет. 3:15). Адалеске, и кроткост нека овел тли силно страна! (w23.09 19, пас. 18-19).

Те дикха штар начинија коте со шај те сикава стрпливост. Прво, о стрпливо мануш на хољанела сигате. Ов трудинела пе те ачховел смиримо кеда некој провоциринела ле хем на иранела ко исто начин. Исто аѓаар на понашинела пе е јаверенцар грубо кеда тано ко стрес (2. Мој. 34:6). Дујто, о стрпливо мануш ачхола смиримо џикоте аџикерела. Ако нешто трајнела повише таро адава со очекујнѓа, некој сој стрпливо ка ачхол смиримо хем нане те нервиринел пе (Мат. 18:26, 27). Трито, о стрпливо мануш на сиѓарела. Кеда о стрпливо мануш добинела несави важно задача на почминела ла одма бизо те размислинел, а ни на дикхела со посиг те завршинел ла. Наместо адава, прво ов бешела хем размислинела те шај те планиринел сар ка керел ла. Тегани ов одвојнела песке добором време кобор со ваљани те шај те завршинел и задача. Штарто, о стрпливо мануш трудинела пе те трпинел неволје бизо те жалинел пе. Ов ка дел пестар са те шај понадари да те истрајнел, а ко исто време те ачхол позитивно (Кол. 1:11). Сар христијања амен ваљани те сикава стрпливост ко са акала начинија (w23.08 20-21, пас. 3-6).

Јекх бут важно причина соске ваљани те заштитина амаро симболично вило тани адалеске со о Јехова испитинела ле. Адава значинела кај о Јехова дикхела ки аменде адава со нашти те дикхен о јавера, ов џанела саве чаче сием андрал. Ов ка мангел амен ако пхераја амари годи лескере мудра советенцар кола со дена живото (Јован 4:14). Аѓаар нане те мукха ни хари тхан ки амари годи башо ховајба со ширинела лен о Сатана хем акава свето, хем упри аменде нане те влијајнен о ставија е лошна манушенгере (1. Јов. 5:18, 19). Кеда оваја попаше е Јеховаја, амаро мангипе хем поштовање спрема лесте бајрола. Нане ни те авел аменге ки годи те грешина адалеске со на мангаја те повредина амаре Даде. Јекх пхен тари Хрватска која со викинела пе Марта хем кола со сине ла искушение те керел неморал пишинела: „Сине манге пхаро исправно те размислинав хем те боринав ман против и желба те керав нешто погрешно, ама и дар таро Јехова заштитинѓа ман“. Сар и дар таро Јехова поможинѓа лаке те на керел нешто погрешно? И Марта вакерѓа кај поможинѓа лаке адава со бут размислинѓа башо последице со ка овен ла ако керела неморал. Амен да шај те кера о исто (w23.06 20-21, пас. 3-4).

О Исус џанља кај е Јеховаскири намера тани те славинел пло анав, јавере лафенцар те чистинел ле таро са о ховајба со сине вакерде баши лесте. Адалеске, амаро Господари сикавѓа пле следбеникон те молинен пе: „Амаро Дад со сиан ко небо, те фалинел пе тло свето анав“ (Мат. 6:9). О Исус халило кај акава тано о најважно пучибе кова со влијајнела упро са о мануша хем упро са о ангелија. Никој, ни ко небо ни теле ки пхув, на фалинѓа е Јеховаскоро анав сар со керѓа адава о Исус. Сепак, кеда астарѓе е Исусе, башо со обвининѓе ле лескере душмања? Кај ни хари на поштујнела е Девле! Е Исусеске сигурно о најстрашно хем о најбаро грево сине те каљарел пе о свето анав лескере Дадескоро. Ов сине бут секиримо те на овел обвинимо хем осудимо баши асавки лошно постапка. Шај адаја сине и главно причина соске е Исусе сине ле баро пхарипе ки душа некобор саатија англедер те астарен ле (Лука 22:41-44; w24.02 11, пас. 11).

Ки трка башо живото, амаро мангипе башо Јехова хем о Исус ваљани те овел побаро таро мангипе со иси амен амаре фамилијаке (Мат. 10:37). Ама адава на значинела кај на ваљани те исполнина амаре фамилијарна обврске мислиндор кај ола ка чхинавен амен те угодина е Девлеске хем е Исусеске. Напротив, те шај те угодина е Девлеске хем е Исусеске мора те грижина амен башо амаре фамилијарна одговорностија (1. Тим. 5:4, 8). Ако кераја адава, ка ова порадосна. Уствари, о Јехова — окова со керѓа и фамилија — џанела кај о фамилие ка овен радосна ако о ром хем и ромни мангена пе хем поштујнена пе јекх јекхеа, ако о родителија мангена хем воспитинена пумаре чхавен хем ако о чхаве тане послушна пумаре родителенге (Еф. 5:33; 6:1, 4). Бизи разлика сави улога иси тут ки фамилија, нека овел тут доверба ки мудрост со аракхљовела ки Библија наместо те постапине спрема тле чувствија, спрема адава сој вообичаено ки тли култура или спрема адава со вакерена несаве мануша коленде со о јавера дикхена сар експертија ки адаја тема. Користин шукар амаре библиска публикацие. Ки ленде иси практична предлогија баши адава сар шај те применине о библиска начелија (w23.08 28, пас. 6-7).

Јекх христијанка ваљани те сикљовел корисна вештине. Ако јекх чхај сикљола несаве вештине таро тикнипе, адава ка користинел лаке ко цело лакоро живото. На пример, сикљов шукар те читине хем те пишине. Ко несаве културе мислинела пе кај нане важно о џувља те џанен те пишинен хем те читинен. Ама адала вештине тане важна секоле христијанеске (1. Тим. 4:13). Адалеске, ма дозволин нешто те чхинавел тут те сикљове шукар те читине хем те пишине. Сави корист ка овел тут таро адава? Асавке вештине ка поможинен туке те аракхе бути хем те ачхове ки лате. Исто аѓаар ка овел туке полокхо те проучине и Библија хем те сикаве е јаверен баши лате. А сој најважно, џикоте читинеа е Девлескоро Лафи хем размислинеа баши лесте ка ове са попаше е Јеховаја (1. Тим. 4:15; w23.12 20, пас. 10-11).

Роде помош таро Јехова те шај те на пере ко искушение. Адалеске со сием несовршена амен мора постојано те борина амен те шај те на кера нешто сој погрешно. О Сатана керела са те шај адаја борба те овел кобор со шај попхари. Јекх начин сар пробинела те пхерел амари годи тано аѓаар со користинела и неморално забава. Асавки забава шај те пхерел амари годи румиме мисленцар — мисле кола со шај те мељарен амари андруни личност хем шај те ингарен амен џи ко сериозно грево (Мар. 7:21-23; Јак. 1:14, 15). Ваљани аменге е Јеховаскири помош те шај те борина амен против о искушение те кера адава сој погрешно. О Исус ки пли најпенџарди молитва спомнинѓа акала лафија: „Ма мукх те пера ко искушение, него спасин амен таро Бенг“ (Мат. 6:13). О Јехова мангела те поможинел аменге, ама амен мора те рода лестар адава. Исто аѓаар мора те постапина спрема амаре молитве (w23.05 6-7, пас. 15-17).

Ако јекхе брачно пареске тано важно о амалипе е Јеховаја, тегани ка овен поспремна те применинен лескоро совет. А адава ка поможинел ленге те избегинен хем те накхавен о проблемија кола со шај те шудрарен ленгоро мангипе. О духовна мануша исто аѓаар трудинена пе те овен сар о Јехова аѓаар со развинена хем сикавена особине сар сој љубезност, стрпливост хем те простинен (Еф. 4:32 — 5:1). Кеда о брачна парија сикавена акала особине тегани ленгоро мангипе полокхе ка бајрол. Јекх пхен, која со викинела пе Лена хем тани женими повише таро 25 берш, вакерела: „Локхо тано те манге хем те поштујне јекхе духовно мануше“. Те дикха јекх библиско пример. Кеда о Јехова ваљанѓа те биринел родителија е Месијаске, ов таро са о потомција е Давидескере биринѓа е Јосифе хем е Марија. Соске? О солдуј сине паше амала е Јеховаја хем ов џанља кај ка чхивен ле ко прво тхан ко ленгоро брако (w23.05 20-21, пас. 3-4).

Амаро Водачи о Исус тано совршено, ама окола со користинела лен акате теле ки пхув те шај те водинен тане несовршена. Шај нане аменге локхо те шуна лен, посебно кеда родена нешто амендар со на мангаја те кера. О апостол Петар ки јекх прилика добинѓа упатство кова со ко почеток на мангља те прифатинел ле. Кеда јекх ангели вакерѓа леске те хал животне кола со сине нечиста спрема е Мојсеескоро закони, о Петар одбинѓа те керел адава — хем адава на јекх пути, него трин пути! (Апо. 10:9-16). Соске одбинѓа? О неве упатствија на сине леске логична. Тари јавер страна, о апостол Павле сине послушно кеда о старешине таро Ерусалим вакерѓе леске те лел пеа штаре џенен хем те џал ко храми те чистинел пе спрема о обред те шај те сикавел кај икерела пе ко Закони. О Павле џанља кај о христијања на ваљани сине више те икерен пе ко Закони. Освен адава, ов на керѓа нешто со сине погрешно. Сепак о Павле о „тајсутно диве леља пеа е манушен хем чистинѓа пе спрема о обред заедно ленцар“ (Апо. 21:23, 24, 26). Е Павлескири послушност поможинѓа те икерел пе о јекхипе машкар о пхраља (Рим. 14:19, 21; w23.10 10, пас. 15-16).

Веројатно нане те авел туке ни ки годи кај и дар тани јекх важно особина башо шукар амалипе. Ама окола со мангена те овен паше амала е Јеховаја мора те даран лестар. Бизи разлика кобор време више служинаја е Јеховаске, сарине амен ваљани понадари да те овел амен исправно дар лестар. Ама со значинела те дара таро Девел? Јекх мануш со иси ле исправно дар таро Девел, мангела ле хем на мангела те керел нешто колеа со шај те руминел пло амалипе леа. Е Исусе сине ле баш асавки дар (Евр. 5:7). Ле на сине ле неисправно дар таро Јехова (Иса. 11:2, 3). Наместо адава, ов бут мангела ле сине хем мангља те овел леске послушно (Јован 14:21, 31). Исто сар о Исус, амен да ваљани те овел амен хор поштовање спрема о Јехова соске ов тано мангипе, иси ле мудрост, правда хем моќ. Амен исто аѓаар џанаја кај о Јехова мангела амен хем кај леске тано важно сар реагиринаја ко лескоро водство. Или ка дукхава ле или ка радујнкера лескоро вило (Пс. 78:41; Изр. 27:11; w23.06 14, пас. 1-2; 15, пас. 5).

Кеда о цари о Озија уло моќно, ов бистерѓа кај лескири сила хем лескоро успех авена таро Јехова. Со сикљоваја? Никогаш ма те бистра кај о благословија хем о одговорностија со иси амен авена таро Јехова. Наместо те фалина амен е буќенцар со керѓем лен, ваљани цело фалба те да е Јеховаске (1. Кор. 4:7). Ваљани те ова понизна хем те признајна кај сием несовршена хем кај ваљани аменге совет. Јекх пхрал коле со иси ле околу 60 берш пишинела: „Сиклиљум те на вреџинав ман или те обесхрабринав ман кеда некој приметинела мле грешке. Кеда добинава совет баши несави глупост со керѓум, трудинава ман те применинав адава хем понадари да те дав мло најшукар е Јеховаске“. Уствари, кеда иси амен дар таро Јехова хем ачховаја понизна, амаро живото ка овел пошукар (Изр. 22:4; w23.09 10, пас. 10-11).

О христијања ко е Павлескоро време ваљани сине те сикавен истрајност. Освен о проблемија со сине лен сар са е јавере манушен, ола мора сине те трпинен хем бут јавера да неволје. Бут џене лендар сине прогониме на само таро еврејска религиозна водачија хем таро римска властија, него исто аѓаар хем таро пумаре фамилие (Мат. 10:21). А понекогаш, ко собрание да ваљани сине те боринен пе против о отпадникија те шај те на влијајнен лошно ко собрание хем аѓаар те одвојнен лен (Апо. 20:29, 30). Сепак, адала христијања истрајнѓе (Отк. 2:3). Сар успејнѓе ко адава? Ола бут размислинена сине башо библиска примерија со сикавѓе истрајност, сар на пример башо Јов (Јак. 5:10, 11). Исто аѓаар, молинена пе сине баши сила (Апо. 4:29-31). Хем никогаш на бистерѓе кај о Јехова ка наградинел ленгири истрајност (Апо. 5:41). Амен да шај те истрајна ако редовно читинаја примерија баши истрајност тари Библија хем таро амаре публикацие хем ако хор размислинаја баши ленде (w23.07 3, пас. 5-6).

О Јехова хем о Исус нане те откажинен пе амендар. Адава дикхаја ле таро е апостол Петарескоро пример. Откеда вакерѓа кај на пенџарела е Исусе, ов ваљанѓа те анел јекх бут важно одлука — дали ка откажинел пе или понадари да ка овел е Христосескоро ученико? О Исус таро вило молинѓа пе е Јеховаске те шај и вера е Петарескири те на слабонел. О Исус вакерѓа е Петареске баши акаја молитва хем сине ле доверба ко Петар кај ка охрабринел пле пхрален (Лука 22:31, 32). Кобор сине охрабримо о Петар кеда сетинела пе сине ко е Исусескере лафија! Кеда ваљани те ана важно одлука о Јехова шај те користинел грижлива пастирен те охрабринен амен те шај те ачхова верна (Еф. 4:8, 11). Ако чхиваја и служба ко прво тхан ко амаро живото, о Јехова ка грижинел пе башо амаре материјална потребе исто сар со грижинѓа пе е Петареске хем е јавере апостоленге (w23.09 24-25, пас. 14-15).

О Јехова приметинела чак о најтикне буќа со кераја е јаверенге. Ов дикхела ко адава сар скапоцено жртва хем сар дуго со ка иранел ле аменге. Ако некогаш служинѓан сар слуга-помошнико или сар старешина, о Јехова на бистрела и бути со керѓан ла хем о мангипе со поттикнинѓа тут те кере адава (1. Кор. 15:58). Ов исто аѓаар дикхела кај понадари да сикавеа мангипе. О Јехова мангела сарине амен те бајрара амаро мангипе спрема лесте хем о јавера. Сар со дикхлем шај те бајрара амаро мангипе спрема о Јехова аѓаар со ка читина лескоро Лафи, хор ка размислина башо адава хем редовно ка кера леа лафи ки молитва. А амаро мангипе спрема амаре пхраља хем пхења шај те бајрара аѓаар со практично ка поможина ленге. Сар со бајрола амаро мангипе, ка ова са попаше е Јеховаја хем амаре духовно фамилијаја. Хем амен засекогаш ка уживина ко акава амалипе! (w23.07 10, пас. 11; 11, пас. 13; 13, пас. 18).

Секова христијани мора коркори те одлучинел сар те грижинел пе башо пло састипе. Ки Библија иси само некобор конкретна законија башо састипе коленде со јекх христијани мора те икерел пе кеда ка ваљани те биринел ко саво начин ка лечинел пе. На пример, мора те шуна и заповед те на примина рат хем те цида амен таро спиритизам (Апо. 15:20; Гал. 5:19, 20). О јавера начинија лечибаске тане мукхле ки совест. Бизи разлика кобор сием увериме кај несаво начин лечибаске тано корисно или штетно, амен ваљани те поштујна о право амаре пхраленгоро коркори те одлучинен башо пумаро састипе. Адалеске на ваљани те бистра акала штар буќа: 1) Само е Девлескоро Царство шај целосно хем трајно те сасљарел е манушен (Иса. 33:24). 2) Секова христијани мора те овел „целосно уверимо“ башо адава сој најшукар башо лескоро састипе (Рим. 14:5). 3) Амен на мангаја те судина е јаверен или те кера нешто колеа со шај те сопкинен пе (Рим. 14:13). 4) О христијања сикавена мангипе хем хаљовена кај о јекхипе ко собрание тано бут поважно таро ленгоро лично мислење (Рим. 14:15, 19, 20; w23.07 25, пас. 15).

Дали ценинеа тло амалипе е Јеховаја? Сигурно кај оја. Панда таро библиско време бут мануша осетинѓе о исто мангипе е Јеховаске сар со осетинеа авдиве ту (Пс. 104:33, 34). Бут џене керѓе жртве те шај те служинен леске. Баш адава керѓе о назарејција таро пурано Израел или јавере лафенцар окола со денѓе лафи кај ка керен несави посебно служба. Акава лафи баш одговоринела адалеске со о назарејција сине ревносна Израелција кола со керена сине несаве жртве те шај те служинен е Јеховаске ко посебно начин. Е Мојсеескоро закони дозволинела сине јекх мурш или џувли те дел посебно завет е Јеховаске кај несаво време ка живинел сар назарејцо (4. Мој. 6:1, 2). Кеда јекх Израелцо ка дел сине асавко завет, ваљани сине те слединел упатствија кола со на важинена сине башо јавера Израелција. Тегани, соске јекх Израелцо би дела сине завет кај ка живинел сар назарејцо? Најверојатно, адалеске со бут мангела сине е Јехова хем сине благодарно башо бут благословија со ов денѓа ле (5. Мој. 6:5; 16:17; w24.02 14, пас.1-2).

О хебрејско лафи сој преведимо ки Библија сар „верност“ или „верно мангипе“ бут пути користинела пе те шај те опишинел пе кобор баро мангипе иси е Девле спрема пле слуге. О исто лафи користинела пе те шај те сикавел пе саво мангипе иси машкар е Девлескере слуге (2. Сам. 9:6, 7). Сар со накхела о време амари верност шај те овел панда посилно. Те дикха сар е Даниелескири верност ули панда посилно. Е Даниелескири верност спрема о Јехова сине испитими ко бут ситуацие ко лескоро живото. Ама јекх таро најбаре испитија со сине ле ко живото случинѓа пе кеда сине ле повише таро 90 берш. Е царескере службеникија на мангена сине е Даниеле хем на поштујнена сине лескере Девле. Адалеске керѓе плани те мударен е Даниеле. Ола убединѓе е царе те потпишинел јекх закони колеа со ка дикхел пе дали о Даниел ка ачхол верно е цареске или пле Девлеске. Са со ваљани сине о Даниел те керел тано те на молинел пе е Јеховаске 30 диве те шај те докажинел кај тано верно е цареске. О Даниел одлучинѓа те ачхол верно е Јеховаске (Дан. 6:12-15, 20-22; w23.08 5, пас. 10-12).

О Јехова мангела понадари да те сикава мангипа амаре пхраленге хем пхењенге. Ако некој на понашинѓа пе аменцар шукар ки несави ситуација, шај те овел амен доверба кај ов на мангља те поврединел амен хем кај трудинела пе те икерел пе ко библиска начелија, ама шај ки адаја ситуација постапинѓа бизо те размислинел (Изр. 12:18). О Девел мангела пле верна слуген иако иси лен слабостија. Ов на цидела пе амендар кеда грешинаја, него понадари да тано амаро амал хем на ачхола аменге хољамо (Пс. 103:9). Чаче тано бут важно те џа пало пример амаре небесно Дадескоро кова со простинела аменге (Еф. 4:32 — 5:1). Исто аѓаар, на ваљани те бистра кај сар авела са попаше о крајо акале светоскоро, ваљани те ова попаше амаре пхраленцар хем пхењенцар. Шај те очекујна кај о прогонство ка овел са побаро. Шај чак те пханден амен баши амари вера. Ако адава случинела пе, амаре пхраља хем пхења ка ваљанен аменге бут повише него англедер (Изр. 17:17; w24.03 15-16, пас. 6-7).

Ки Библија иси извештаија башо терне кола со сине паше е Јеховаја, керѓе лескири волја хем сине лен шужо живото. О Давид сине јекх лендар. Сар терно, ов биринѓа те овел тари е Девлескири страна, а покасно уло верно цари (1. Цар. 3:6; 9:4, 5; 14:8). Ако проучинеа о извештај башо Давид, лескоро пример шај те поттикнинел тут верно те служине е Јеховаске. Или шај те сикљове нешто повише башо Марко или башо Тимотеј. Ола панда сар терне почминѓе те служинен е Јеховаске хем ачхиле леске верна цело пло живото. Ленгири одлука те служинен е Јеховаске радујнкерѓа е Јехова. Саво живото ка овел тут ки иднина, бут зависинела таро адава сар живинеа панда акана. Ако иси тут доверба ко Јехова наместо ки туте, тегани ов ка поможинел туке те ане мудра одлуке. Тут шај те овел тут бут шукар живото. Ма бистре, о Јехова ценинела адава ту со кереа леске. Нане пошукар начин сар те користине тло живото таро адава те служине амаре небесно Дадеске! (w23.09 13, пас. 18-19).

О апостол Павле џанља кај о пхраља хем о пхења сине несовршена. На пример, кеда ало ко собрание ко Ерусалим несаве на верујнѓе кај ов тано ученико (Апо. 9:26). Покасно, несаве керена сине лафи пало лескоро думо те шај те каљарен лескоро анав (2. Кор. 10:10). Исто аѓаар, о Павле дикхља сар јекх старешина анѓа погрешно одлука која со шај керѓа о јавера те сопкинен пе (Гал. 2:11, 12). Исто, јекх таро лескере паше соработникија о Марко, бут разочаринѓа ле (Апо. 15:37, 38). Акала ситуацие шај сине те керен о Павле те чхинавел те дружинел пе хем те соработинел адаленцар со поврединѓе ле. Сепак, ов позитивно дикхела сине ко пле пхраља хем пхења хем понадари да верно служинела сине е Јеховаске. Со поможинѓа е Павлеске те на откажинел пе? О Павле бут мангела сине е пхрален хем е пхењен. Адава мангипе поможинѓа леске те на концентриринел пе ко ленгере слабостија, него ко ленгере шукар особине. Исто аѓаар, о мангипе поттикнинѓа е Павле те керел адава сој пишимо ко авдисутно стихо (w24.03 15, пас. 4-5).

Ки Библија иси бут извештаија кола со истакнинена кобор тано важно те ачхова смириме. Те дикха е Исакоскоро пример. Кеда живинела сине ко филистејско подрачје Герар, лескере комшие сине леске љубоморна хем адалеске пхерѓе о бунарија кола со лескере дадескере слуге ранле лен. Наместо те боринел пе башо пле правија, о Исак селинѓа пе заедно пле фамилијаја ко јавер тхан хем ранља неве бунарија (1. Мој. 26:12-18). Ама о Филистејција вакерѓе кај о пани таро адала да бунарија тано ленгоро. Сепак, о Исак понадари да ачхило смиримо (1. Мој. 26:19-25). Со поможинѓа леске те ачховел смиримо, чак кеда јасно дикхела пе сине кај о јавера намерно провоциринена ле? Ов сигурно дикхља о пример пле родителенгоро хем бут сиклило таро адава сар о Авраам постапинела сине ко смиримо начин хем сар и Сара сикавѓа „мирно хем кротко духо“ (1. Пет. 3:4-6; 1. Мој. 21:22-34; w23.09 15, пас. 4).

О Јехова мангипаја бичхалѓа пле првобијаме Чхаве теле ки пхув те сикавел е манушен башо Царство хем те откупинел амен таро грево хем о мерибе. Пало адава о Јехова воскреснинѓа е Исусе ко небо те шај те владинел сар Цари ко е Девлескоро Царство. И главно тема е Библијакири тани кај е Јеховаскоро анав ка овел посветимо џикоте исполнинела пли намера е пхувјаја преку пло Царство коте со владинела о Христос. Е Јеховаскири намера нашти те менинел пе. Ов дела амен лафи кај ка овел са аѓаар сар со вакерѓа (Иса. 46:10; Евр. 6:17, 18). Хари похари и пхув ка овел рај коте о совршена хем о праведна мануша со авена таро Адам хем тари Ева ка уживинен ко вечно живото (Пс. 22:26). Ама адава нане са, о Јехова ка керел бут повише. Лескири намера тани те анел ко јекхипе са пле слуген ко небо хем ки пхув. Тегани сарине сој џивде верно ка овен подложна пле Владетелеске е Јеховаске (Еф. 1:8-11). На сиан ли воодушевимо таро начин сар о Јехова исполнинела пли намера? (w23.10 20, пас. 7-8).

Кеда о Евреија мукхле о Вавилон хем але ко Ерусалим, соочинѓе пе економска хем политичка проблеменцар хем сине лен противибе. Адалеске несавенге сине пхаро о градибе е храмескоро те чхивен ко прво тхан ко пло живото. Тари адаја причина о Јехова бичхалѓа дује пророкон, е Агее хем е Захарија, те поможинен е народоске те иранен пли ревност хем успејнѓе те охрабринен е народо (Агеј 1:1; Зах. 1:1). Сепак, отприлика 50 берш покасно е Евреенге ко Ерусалим ваљанѓа палем охрабрување. Пало адава о Езра, о вешто препишувачи е законескоро, ало таро Вавилон ко Ерусалим те охрабринел е Девлескере народо те чхивен о чачутно обожавибе ко прво тхан ко пумаро живото (Езра 7:1, 6). О пророштвија таро Агеј хем o Захарија поможинѓе е Девлескере народоске таро пурано време понадари да те овел лен доверба ко Јехова иако сине лен противибе. Ола шај те поможинен аменге да те ова увериме кај о Јехова ка поможинел амен бизи разлика саве пхарипа ка овен амен ко живото (Изр. 22:19; w23.11 14-15, пас. 2-3).

Сар сикаваја кај мангаја амаре пхрален? Јекх начин сар шај те кера адава тано аѓаар со ка утешина лен. Шај те кера адава ако сикаваја сочувство (1. Сол. 4:18). Сар шај понадари да те бајрара амаро мангипе спрема о јавера? Ваљани те простина ленге чак кеда адава нане локхо. Соске авдиве тано посебно важно те сикава мангипе јекх јекхеске? О Петар вакерѓа јекх причина: „Паше тано о крајо башо са, адалеске нека овел тумен баро мангипе јекх јекхеске“ (1. Пет. 4:7, 8). Сар со авела са попаше о крајо акале лошно светоскоро, со шај те очекујна? Кеда керѓа лафи башо пле следбеникија, о Исус вакерѓа: „Са о народија ка мрзинен тумен башо мло анав“ (Мат. 24:9). Те шај те ачхова верна е Јеховаске, иако о јавера мрзинена амен, ваљани те ова ко јекхипе. Ако кераја адава, о Сатана нане те успејнел те одвојнел амен, него ка ачхова ко јекхипе преку о мангипе (Фил. 2:1, 2; w23.11 13, пас. 18-19).

О чачипа таро е Девлескоро лафи иси лен бари моќ. Кеда сикаваја е манушен башо Јехова хем башо адава саво чаче тано ов, шај те дикха нешто бут шукар. Тегани, ленгере јакхја кола со сине пханле таро е Сатанаскере ховајба, почминена хари по хари те пхравѓон хем те дикхен амаре Дадескере бут шуже особине. Ола тане воодушевиме тари лескири моќ со нане ла границе (Иса. 40:26). Исто аѓаар, сикљовена те овел лен доверба ки лесте адалеске со ов тано совршено праведно (5. Мој. 32:4). Сикљовена тари лескири бари мудрост (Иса. 55:9; Рим. 11:33). Хем бут утешинела лен адава кеда дознајнена кај „о Девел тано мангипе“ (1. Јов. 4:8). Сар овена попаше е Јеховаја, ленгири надеж кај ка живинен засекогаш сар лескере чхаве овела посигурно. Чаче тани бари чест со шај те поможина е манушенге те овен паше пле Дадеа! Кеда кераја адава, о Јехова дикхела ки аменде сар пле соработникија (1. Кор. 3:5; w24.02 12, пас. 15).

Ако проучинеа и Библија некасаја таро е Јеховаскере сведокија или ако тле родителија сикавена тут башо чачипе панда таро тикнипе, дали размислинеа те крстине тут? Адаја тани јекх бут шукар цел. Ама англедер те крстине тут, ваљани те де завет е Јеховаске. Сар шај те де завет е Јеховаске кај ка служине леске цело живото? Аѓаар со ки молитва ка ветине леске кај ка служине само леске хем кај најважно ко живото ка овел туке те кере лескири волја. Уствари, ту ветинеа е Јеховаске кај понадари да ка манге ле „са тле вилеа, хем са тле душаја, хем са тле гоѓаја, хем са тле силаја“ (Мар. 12:30). Тло завет деа ле кеда сиан коркори, адава тано нешто машкар туте хем о Јехова. Тари јавер страна, о крстибе тано јавно хем аѓаар о јавера шај те дикхен кај ту денѓан завет е Јеховаске. Тло завет тано сериозно ветување кова со деа ле е Јеховаске. Адалеске тли цел ваљани те овел те икере тут ко адава ветување, а о Јехова да очекујнела тутар адава (Проп. 5:4; w24.03 2 пас. 2; 4, пас. 5).

Ко секова брако иси пхарипа. Баш адава вакерела и Библија, кај адала сој ко брако ка „овен лен телесна неволје“ (1. Кор. 7:28). Соске? Адалеске со о ром хем и ромни тане несовршена колен со иси различна особине хем коленге со свиџинена пе различна буќа. Шај иси лен различно култура или потекло. Сар со накхела о време, шај ка почминен те сикавен особине кола со англедер те лен пе на приметинѓе лен. Секоја јекх таро акала буќа шај те анел проблемија. Наместо те признајнен кај о солдуј анѓе џи ко проблеми хем те трудинен пе те решинен ле, ола шај кривинена пе јекх јекхеа. Шај чак те мислинен кај ка решинен пумаре проблемија ако на живинена заедно или палем развединена пе. Ама дали адава чаче ка решинел ленгере проблемија? На. О Јехова мангела о ром хем и ромни те ачхон заедно ко брако чак ако пхаро јекхеа лендар те живинел пе (w24.03 16, пас. 8; 17, пас. 11).

Откеда крстинѓан тут, тли надеж кај ка живине вечно ко рај ки пхув понадари да барили џикоте продолжинѓан са повише те сикљове башо Јехова хем те ове позрело ко духовно поглед (Евр. 5:13 — 6:1). Веројатно доживинѓан адава сој спомнимо ко Римјања 5:2-4. Доживинѓан разна неволје ама истрајнѓан хем осетинѓан кај о Јехова тано задоволно тутар. Адалеске со џанеа кај о Девел мангела тут хем тано задоволно тутар, акана иси тут панда побари причина те очекујне о буќа со ветинѓа лен. Тли надеж ули панда позорали него со сине ко почеток. Ој туке акана пореално хем панда повише ценинеа ла. Са повише влијајнела упри туте хем адава ко секова дело таро тло живото — сар понашинеа тут те фамилијаја, саве одлуке анеа хем чак упро адава сар користинеа тло време. О апостол Павле спомнинела јекх важно мисла баши надеж со иси тут откеда о Девел одобринела тут. О Јехова уверинела тут кај тли надеж ка исполнинел пе (Рим. 5:13; w23.12 12-13, пас. 16-19).

Кеда накхаја тари несави пхари ситуација амаре чувствија, мисле или постапке шај нане те овен о иста. Исто сар јекх броди со шај те овел фрдимо таро бранија тари јекх страна ки јавер страна, аѓаар аменде да о силна чувствија шај те фрден амен тари јекх страна ки јавер. Сар поможинела аменге о Јехова кеда ка почминен те поплавинен амен асавке емоцие? Ов уверинела амен кај ка поможинел аменге те ачхова стабилна. Кеда јекх броди аракхљола ки несави бура, адава шај те овел опасно соске шај те превртинел пе. Те шај те на случинел пе адава, ко бут бродија чхивена пе стабилизаторија таро солдуј стране е бродескере тело пани. Асавке стабилизаторија шај те поможинен е бродеске те на мрдинел бут хем аѓаар о мануша сој ки лесте те осетинен пе безбедна хем те уживинен џикоте патујнена. Ама бут таро адала стабилизаторија најшукар функциониринена само тегани кеда о броди движинела пе англе. Слично, о Јехова ка поможинел аменге те ачхова стабилна ако понадари да верно служинаја леске чак кеда накхаја таро пхаре ситуацие (w24.01 22, пас. 7-8).

Кеда дараја, пуч тут: „Со о Јехова више керѓа?“ Размислин башо буќа со створинѓа. На пример, кеда внимателно дикхаја сар о Јехова грижинела пе башо чирикља хем башо лулуѓа — кола со нане створиме спрема лескоро лико хем нане лен способност те обожавинен ле — тегани кобор повише ка грижинел пе аменге. Адава со ка размислина башо акала буќа, ка бајрарел панда повише амари доверба ки лесте (Мат. 6:25-32). Исто аѓаар, размислин со керѓа о Јехова башо пле слуге. Шај те проучине баши несави личност тари Библија која со сикавѓа бари вера, или шај те читине несаво искуство таро амаро време. Освен адава размислин сар о Јехова више грижинѓа пе туке. Сар поможинѓа туке те запознајне ле? (Јован 6:44). Сар одговоринѓа ко тле молитве? (1. Јов. 5:14). Сави корист иси тут секова диве тари жртва лескере мангле Чхавескири? (Еф. 1:7; Евр. 4:14-16; w24.01 4, пас. 6; 7, пас. 17).