Ноември

Ако сиан родители, поможин тле чхавенге те спреминен коментарија со одговоринена ленгере бершенге. Понекогаш ко состанокија проучинена пе сериозна теме, сар сој брачна проблемија или морална мерилија. Адалеске веројатно ка овен само јекх или дуј пасусија коте со јекх чхаво шај те коментиринел. Исто аѓаар, поможин тле чхавенге те хаљовен соске нане те ден лен те коментиринен секова пути кеда ка вазден пумаро вас. Ако објаснинеа ленге акава, нане те овен разочариме кеда е јаверенге ка ден те коментиринен наместо ленге (1. Тим. 6:18). Сарине амен шај те спремина охрабрувачка коментарија кола со ка славинен е Јехова хем ка охрабринен амаре пхрален (Изр. 25:11). Ако иси амен прилика те вакера амаро кратко искуство, на ваљани те вакера бут баши аменде (Изр. 27:2; 2. Кор. 10:18). Наместо адава, ваљани те трудина амен те вакера повише башо Јехова, башо лескоро Лафи хем башо лескоро народо (Отк. 4:11; w23.04 24-25, пас. 17-18).

О мангипе тано важно те шај те ачхова џангавде хем трезвена (Мат. 22:37-39). О мангипе спрема о Девел поможинела амен те истрајна ко проповедибе иако шај ка овен амен проблемија (2. Тим. 1:7, 8). Исто аѓаар, адалеске со мангаја е манушен со на служинена е Јеховаске амен понадари да проповединаја, чак сведочинаја преку телефони хем писмија. Амен понадари да надинаја амен кај јекх диве о мануша ка менинен пе хем ка почминен те керен адава сој исправно (Езек. 18:27, 28). Амен исто аѓаар мангаја амаре пхрален хем пхењен. Сикаваја асавко мангипе аѓаар со охрабринаја амен машкар аменде хем изградинаја јекх јекхе (1. Сол. 5:11). Исто сар со о војникија заштитинена пе кеда тане јекх узо јекх ки борба, аѓаар амен охрабринаја амен јекх јекхеа. Амен нане никогаш намерно те повредина амаре пхрален хем пхењен или те ирана башо лошнипе лошнипаја (1. Сол. 5:13, 15). Амаро мангипе исто аѓаар сикаваја ле аѓаар со поштујнаја е пхрален кола со предводинена ко собрание (1. Сол. 5:12; w23.06 10, пас. 6; 11, пас. 10-11).

Јекх начин сар шај те бајрара амари вера тано ако хор размислинаја баши откупнина. И откупнина тани гаранција кај е Девлескере ветувања ка исполнинен пе. Кеда шукар размислинаја башо адава соске сине денди и откупнина хем која бари жртва керѓа о Јехова, тегани бајрараја амари вера кај сигурно ка исполнинел пе е Девлескоро ветување башо вечно живото ко пошукар свето. Соске шај те вакера акава? Те размислина хари башо адава со мора сине те керен о Јехова хем о Исус баши откупнина. О Јехова таро небо бичхалѓа пле мангле првобијаме Чхаве колеа со сине најпаше, те бијанѓовел ки пхув сар совршено мануш. Ки пхув о Исус доживинѓа разна пхарипа. Пало адава сине мучимо хем муло баре дукхенцар. Акаја сине бут бари цена со платинѓа ла о Јехова. Амаро мангло Девел никогаш на би дозволинела сине лескоро Чхаво те овел мучимо хем те мерел те шај само јекх кратко време те уживина ко живото (Јован 3:16; 1. Пет. 1:18, 19). Адалеске со о Јехова платинѓа бари цена, ов ка керел са те шај те овел амен прилика вечно те живина ко нево свето (w23.04 27, пас. 8-9).

Дали е Јехова иси ле желба те воскреснинел е мулен? Сигурно кај иси ле. Ов водинѓа некоборе библиска писателен те пишинен лескоро ветување башо воскресение со ка овел ки иднина (Иса. 26:19; Отк. 20:11-13). Кеда о Јехова дела лафи башо нешто, ов секогаш икерела пе ко адава (Ис. Нав. 23:14). Уствари, о Јехова едвај аџикерела те воскреснинел е мулен. Размислин башо адава со вакерѓа о Јов. Ов сине сигурно кај чак ако мерела, е Јехова ка овел ле бари желба те дикхел ле палем џивдо (Јов 14:14, 15). Е Јехова иси ле и исто желба са пле слугенге со муле. Ов едвај аџикерела те иранел лен ко живото хем сарине те овен састе хем радосна. А со ка овел е милијарде манушенцар кола со муле бизо те овел лен прилика те дознајнен о чачипе башо Јехова? Амаро мангло Девел мангела лен да те воскреснинел (Апо. 24:15). Ов мангела те дел лен прилика те овен лескере амала хем те живинен засекогаш ки пхув (Јован 3:16; w23.04 9, пас. 5-6).

Сар шај те бајраре тли надеж? На пример, ако иси тут надеж те живине вечно ки пхув, читин сар и Библија опишинела о рај хем размислин башо адава (Иса. 25:8; 32:16-18). Размислин саво ка овел о живото ко нево свето. Замислин туке кај сиан адатхе. Ако иси амен ки годи и надеж башо нево свето, амаре проблемија ка овен „моментална хем локхе“ (2. Кор. 4:17). И надеж со денѓа тут о Јехова ка керел тут силно. Ов више обезбединѓа адава со ваљани туке те шај те добине сила. Адалеске, кеда ваљани туке помош те шај те исполнине несави задача, те истрајне ки несави неволја или те ачхове радосно, молин тут таро вило е Јеховаске хем роде лестар водство аѓаар со ка проучине. Исто аѓаар прифатин о охрабрување таро тле пхраља хем одвојн туке време редовно те размислине баши надеж. Тегани ка добине „сила тари е [Девлескири] славно моќ“ те шај стрпливо хем радосно те истрајне ко са (Кол. 1:11; w23.10 17, пас. 19-20).

Иси амен бут причине соске шај те благодарина амен е Јеховаске ки молитва. Шај те благодарина амен леске баши секоја шукар бути со иси амен, уствари секова шукар поклон авела лестар (Јак. 1:17). На пример, шај те сикава амаро ценење е Јеховаске баши амари шужи пхув хем башо чудесна буќа со керѓа лен. Исто аѓаар, шај те вакера леске кобор сием благодарна башо амаро живото, амари фамилија, амаре амала хем и надеж со иси амен. Хем шај те благодарина е Јеховаске башо адава со шај те ова леа амала. Шај ка ваљани бут те трудина амен те размислина таро кола причине амен лично ваљани те ова благодарна е Јеховаске. Живинаја ко свето коте со о мануша ни хари нане благодарна. Бут пути о мануша концентриринена пе ко адава со мангена те овел лен, наместо ко адава со више иси лен. Ако мукхаја асавко стави те влијајнел упри аменде тегани ка молина амен е Јеховаске само кеда ка ваљани те рода лестар нешто. Те шај те на случинел пе адава ваљани те продолжина те бајрара хем те сикава амаро ценење башо са со керела аменге о Јехова (Лука 6:45; w23.05 4, пас. 8-9).

Адалеске со бут мангела амен, о Јехова на мангела те дикхел сар мучинаја амен (Иса. 63:9). Сепак ов нане те цидел са амаре проблемија кола со шај те спорединен пе рекаја или јагаја (Иса. 43:2). Ама ов ветинела кај ка поможинел амен те „накха преку“ ленде. Исто аѓаар нане те дозволинел о проблемија со иси амен те керен аменге трајно штета. О Јехова преку пли сила ка поможинел аменге те истрајна (Лука 11:13; Фил. 4:13). Аѓаар, ка ова увериме кај ов секогаш ка дел амен баш адава со ваљани аменге те шај те истрајна хем те ачхова леске верна. О Јехова очекујнела амендар те овел амен доверба ки лесте (Евр. 11:6). Понекогаш амаре проблемија шај те овен аменге добором пхаре со нашти те издржина лен. Шај чак те почмина те сумнина амен дали о Јехова чаче ка поможинел амен. Ама и Библија уверинела амен кај е Девлескере силаја ка шај „ѕидија те укља“ (Пс. 18:29). Адалеске, наместо те мукха о сумње те бајрон ки аменде, ваљани те молина амен вераја е Јеховаске хем те овел амен доверба кај ов ка одговоринел аменге (Јак. 1:6, 7; w23.11 22, пас. 8-9).

Кобор шуже лафенцар тано опишимо о чачутно мангипе ко брако. Акала лафија тане бут охрабрувачка соске сикавена кај тумен шај те овел тумен мангипе со на чхинавѓовела. Дали ко јекх брако ка овел мангипе со ка трајнел цело живото бут зависинела таро ром хем тари ромни. Те вакера јекх пример. Јекх јаг шај те тхабљол са џикоте некој чхивела кашта ки лате. Ако никој на керела адава, и јаг ка ачхол. Слично, о мангипе машкар о ром хем и ромни шај те овел силно само ако керена нешто башо пумаро брако. Понекогаш шај те случинел пе о мангипе те шудрол, посебно кеда иси лен финансиска проблемија, проблемија састипаја или кеда бајрарена чхавен. Значи, те шај те на ачхол и „јаг со дела ла о Јах“, хем о ром хем и ромни ваљани те керен бути ко пло амалипе е Јеховаја (w23.05 20-21, пас. 1-3).

Со ваљани те кера те шај те ова храбра? Амаре родителија шај те поттикнинен амен те ова храбра, ама ола нашти те пренесинен аменге акаја особина сар ка пхене тани несаво фамилијарно наследство. Кеда трудинаја амен те развина храброст, адава тано сар ка пхене сикљоваја неви вештина. Јекх начин сар шај те ове шукар ки несави вештина тано аѓаар со внимателно ка дикхе со керела о мајстори хем пало адава ту да ка пробине те кере о исто. Слично, амен сикљоваја те ова храбра аѓаар со внимателно дикхаја сар о јавера сикавена акаја особина хем пало адава трудинаја амен те кера о исто. Исто сар о Даниел, амен да ваљани шукар те пенџара е Девлескоро Лафи. Амен ваљани те ова паше е Јеховаја аѓаар со ка молина амен леске често хем ка вакера леске сар осетинаја амен. Исто аѓаар, ваљани те овел амен доверба ки лесте аѓаар со ка ова увериме кај ов секогаш ка овел узи аменде. Тегани кеда амари вера ка овел испитими, ка ова храбра. О јавера бут пути поштујнена околен со сикавена храброст. Исто аѓаар, ола шај те поможинен околенге сој искрена те запознајнен е Јехова. Значи, иси амен шукар причине соске ваљани те развина храброст (w23.08 2, пас. 2; 4, пас. 8-9).

О грчко лафи сој преведимо сар „испитинен“, користинела пе сине те шај те опишинел пе о начин сар о мануша проверинена сине дали несаве металија, сар сој злато хем сребро, тане хас. Амен да ваљани те испитина или те проверина адава со шунаја или со читинаја те шај те дикха дали тано точно. Акава тано бут поважно амен те кера соске и бари неволја тани паше. Наместо те верујна ко са со вакерена о јавера, амен користинаја амари годи те шај те споредина адава со читинаја или адава со шунаја адалеа со вакерела и Библија хем е Јеховаскири организација. Ако кераја аѓаар нане те ова ховавде тари нисави демонско пропаганда (Изр. 14:15; 1. Тим. 4:1). Сар група, е Девлескоро народо ка преживинел и бари неволја. Ама сар поединција на џанаја со ка овел аменцар тајса (Јак. 4:14). Сепак, бизи разлика дали ка преживина и бари неволја или ка мера англедер те авел, ако ачхилем верна ка добина вечно живото. Адалеске те концентририна амен ки амари бут шужи надеж хем те ачхова спремна башо е Јеховаскоро диве! (w23.06 13, пас. 15-16).

Амен на џанаја сар несаве библиска пророштвија ка исполнинен пе (Дан. 12:8, 9). Ама, само адалеске со на џанаја целосно сар несаво пророштво ка исполнинел пе на значинела кај нане те исполнинел пе. Шај те ова сигурна кај о Јехова ко право време ка откринел аменге адава со мора те џана сар со керѓа адава ко пурано време. Панда хари ка објавинел пе „мир хем сигурност“ (1. Сол. 5:3). Одма пало адава о политичка силе ка нападинен е ховавне религија хем ка уништинен ла (Отк. 17:16, 17). Тегани ка нападинен е Девлескере народо (Езек. 38:18, 19). Акала настанија директно ка ингарен џи ки војна Армагедон (Отк. 16:14, 16). Шај те ова сигурна кај акала настанија ка случинен пе панда хари. Џи тегани, понадари да те сикава ценење амаре небесно Дадеске аѓаар со внимателно ка дикха сар исполнинена пе о библиска пророштвија хем ка поможина е јаверенге те керен о исто (w23.08 13, пас. 19-20).

Кеда о апостол Павле керѓа лафи баши вера, надеж хем мангипе, ов вакерѓа кај и најбари особина таро акала трин тано о мангипе (1. Кор. 13:13). Соске вакерѓа адава о Павле? Ки иднина нане више те ваљанел аменге вера ко е Девлескере ветувања башо нево свето, а ни надеж кај адала ветувања ка исполнинен пе адалеске со више ка овен исполниме. Ама секогаш ка ваљани те овел амен мангипе спрема о Јехова хем о мануша. Уствари, амаро мангипе спрема ленде ка бајрол са повише ки цели вечност. Исто, адалеа со сикаваја мангипе амаре пхраленге, амен докажинаја кај сием чачутне христијања. О Исус вакерѓа пле апостоленге: „Аѓаар сарине ка џанен кај сиен мле ученикија, ако иси тумен мангипе машкар туменде“ (Јован 13:35). О мангипе исто аѓаар поможинела амен те ова ко јекхипе. О Павле вакерѓа кај о мангипе „совршено поврзинела“ (Кол. 3:14). О апостол Јован пишинѓа пле пхраленге: „Окова со мангела е Девле, ваљани те мангел хем пле пхрале“ (1. Јов. 4:21). Уствари, кеда сикаваја мангипе јекх јекхеске, амен сикаваја кај мангаја е Девле (w23.11 8, пас. 1, 3).

И Библија спорединела амаро христијанско живото јекхе тркаја. Окола со успешно прастана ки акаја трка ка добинен вечно живото (2. Тим. 4:7, 8). Ваљани те да амендар са те шај понадари да те праста, посебно адалеске со џанаја кај о крајо акале тркакоро тано паше сар никогаш англедер. О апостол Павле вакерѓа аменге со шај те поможинел аменге те шај те победина. Ов поттикнинѓа амен „те фрда амендар секова товар... хем те праста истрајно ки трка која сој англи аменде“. Дали о Павле адалеа мислинѓа кај јекх христијани на ваљани те пхиравел нисаво товар? На. Наместо адава, ов мангља те вакерел аменге кај ваљани те цида секова непотребно товар. Асавко товар шај те уморинел амен хем те керел аменге пхаро те праста. Те шај те истрајна, мора сигате те открина асавко непотребно товар хем те фрда ле амендар. Ама тари јавер страна, на мангаја те ослободина амен таро товар со мора те пхирава ле, соске аѓаар нане те икера амен ко правилија хем ка нашти те ачхова ки трка (2. Тим. 2:5; w23.08 26, пас. 1-2).

И разумност поможинела амен те поштујна е јаверенгоро стави. На пример, несаве пхења мангена те шминкинен пе, а јавера на. Несаве христијања мангена умерено те пиен алкохол, а јавера одлучинена ич те на пиен. Или, са о христијања мангена те овен састе, ама на биринена сарине ко исто начин те лечинен пе. Ако секогаш мислинаја кај амен сием ко право хем ако пробинаја те убедина амаре пхрален те керен о буќа сар амен со кераја лен, о јавера шај те сопкинен пе хем адава те анел поделбе (1. Кор. 8:9; 10:23, 24). О Јехова на чхивѓа строга правилија башо адава сар те урава амен, него денѓа амен начелија кола со ваљани те следина лен. Амаре урајбаја ваљани те фалина е Девле хем аѓаар те сикава кај сием разумна, скромна хем разборита (1. Тим. 2:9, 10). Адалеске, на мангаја амаре урајбаја те привлечина непотребно внимание. Исто аѓаар, о библиска начелија шај те поможинен е старешиненге те на чхивен пумаре лична правилија башо адава со те урава хем сар те изгледина (w23.07 23-24, пас. 13-14).

О Јехова сикавела аменге сар шај те овел амен шужи иднина. Околенге со прифатинена и покана е „глупаво џувљакири“, најважно ленге те уживинен ко „гудлипе“ таро гаравдо задоволство. Ленгере постапке ингарена лен „хор ко гробо“ (Изр. 9:13, 17, 18). Окола со прифатинена и покана тари „чачутни мудрост“ ка овел лен појавер иднина (Изр. 9:1). Амен сикљоваја те манга адава со о Јехова мангела хем те мрзина ов со мрзинела (Пс. 97:10). Хем радосна сием со шај те канина е јаверен да те сикљовен тари „чачутни мудрост“. Амен сием сар о слугинке кола со викинена таро најучо тхан тари диз: „Кој тано неискусно нека авел акари“. Амен хем окола со прифатинена акаја покана нане те овел амен корист само акана, него исто аѓаар ка овел амен прилика те живина вечно џикоте „пхираја ко друмо е хаљојбаскоро“ (Изр. 9:3, 4, 6; w23.06 24-25, пас. 17-18).

Сар осетинеа тут кеда тло колега или тло соученико пучела тут нешто башо тле верувања? Дали иси тут трема? Повише џенен амендар иси лен. Ама асавко пучибе шај те откринел башо со некој размислинела или ко со верујнела хем те дел амен прилика те вакера леске о шукар хабери. Ама понекогаш, шај некој те пучел амен пучиба адалеске со на согласинела пе аменцар или мангела те распрајнел пе. Адава на ваљани те изненадинел амен соске несаве мануша шунѓе погрешна информацие башо амаре верувања (Апо. 28:22). Освен адава живинаја ко „последна диве“, ко време коте со бут џене „нане те овен спремна башо било саво договор“ па чак тане „сурова“ (2. Тим. 3:1, 3). Шај пучеа тут: „Сар шај те ачховав љубезно хем тактично кеда дикхава кај некој мангела те распрајнел пе манцар башо адава ко со верујнава? Јекх бути со шај те поможинел туке, тани и кроткост. О кротко мануш на хољанела сигате хем ачхола смиримо кеда некој провоциринела ле или кеда нане сигурно сар те одговоринел ки несави ситуација (w23.09 14, пас. 1-2).

Понекогаш тари амари организација добинаја советија кола со заштитинена амен. На пример, добинаја советија башо материјализам хем башо јавера буќа кола со шај те чхивен амен те пхага е Јеховаскере законија. Ако џаја пало водство е Јеховаскоро ко акала да буќа, адава ка овел башо амаро шукарипе (Иса. 48:17, 18; 1. Тим. 6:9, 10). Шај те ова сигурна кај о Јехова понадари да ка користинел манушен те шај те водинел амен ки бари неволја хем џикоте трајнена о милја берша коте со ка владинел о Исус. Дали понадари да ка џа пало адава водство? Адава бут ка зависинел таро адава сар авдиве реагиринаја ко водство со дела амен о Јехова. Адалеске секогаш те џа пало е Јеховаскоро водство, коте сој вклучимо о водство таро мануша колен со о Јехова чхивѓа лен те грижинен пе аменге (Иса. 32:1, 2; Евр. 13:17). Џикоте кераја адава, те овел амен целосно доверба ко амаро водачи о Јехова, кова со поможинела амен те избегина са адава со шај те руминел амаро амалипе леа хем кова со ингарела амен ки амари цел — о вечно живото ко нево свето (w24.02 25, пас. 17-18).

О апостол Павле уживинела сине ки служба башо Јехова, сепак на сине леске локхо. О Павле бут пути мора сине те патујнел ко дур тхана, а о патујбе ко адава време на сине локхо. Џикоте патујнела сине, о Павле понекогаш сине „ки опасност таро реке“ хем „ки опасност таро чора“. Исто аѓаар понекогаш о противникија марѓе ле (2. Кор. 11:23-27). А о пхраља на ценинеа сине секогаш о жртве со керела лен сине те шај те поможинел ленге (2. Кор. 10:10; Фил. 4:15). Со поможинѓа е Павлеске те продолжинел те служинел е Јеховаске? Ов бут сиклило башо Јехова таро списија хем таро пле лична искуствија. Адава уверинѓа ле кај о Јехова мангела ле (Рим. 8:38, 39; Еф. 2:4, 5). Хем ов да замангља бут е Јехова. О Павле сикавѓа пло мангипе спрема о Јехова „аѓаар со служинѓа адаленге сој света“ хем продолжинѓа те служинел ленге (Евр. 6:10; w23.07 9, пас. 5-6).

Бут џене признајнена кај тано шукар со иси световна владе хем кај ваљани те шуна барем несаве законија со дена адала владе. Ама, адала иста мануша на мангена те шунен о законија со на свиџинена пе ленге или кола со мислинена кај нане праведна. И Библија вакерела кај о манушикане владе анена муке, кај о Сатана владинела ленцар хем кај панда хари ка овен уништиме (Пс. 110:5, 6; Проп. 8:9; Лука 4:5, 6). Исто аѓаар, вакерела аменге кај „окова со противинела пе баши несави власт противинела пе башо адава со о Девел дозволинѓа“. Аканаске, о Јехова дозволинела те постојнен о манушикане владе те шај те овел редо хем очекујнела амендар те шуна лен. Адалеске мора те шуна и библиско заповед: „Секаске ден адава со припадинела ленге“, коте сој вклучиме о данокија, о поштовање хем и послушност (Рим. 13:1-7). Шај те мислина аменге кај несаво закони нане практично, нане фер хем кај ка коштинел амен бут ако сием послушна. Ама, амен шунаја е властен соске о Јехова родела те шуна лен са џикоте на родена те кера нешто против лескере заповедија (Апо. 5:29; w23.10 8, пас. 9-10).

Кеда бијандило о Самсон, о Филистејција бут мучинена сине е Израелцон (Суд. 13:1). Адалеске со о Филистејција владинена сине ко јекх бут лошно начин, е израелцонге на сине ни хари локхо. О Јехова биринѓа е Самсоне „те предводинел ко спасибе е Израелцон таро васта е филистејцонгере“ (Суд. 13:5). Акаја сине бут пхари задача! Те шај успешно те завршинел акаја задача, е Самсоне ваљани сине те овел ле доверба ко Јехова. Ки јекх прилика и филистејско војска али те астарел е Самсоне ко Лехи, веројатно јекх тхан кова со сине ки Јуда. Адалеске со о мануша тари Јуда дарандиле, ола одлучинѓе те предајнен е Самсоне е душманенге. Ола пханле е Самсонескере васта дује неве шеленцар хем аѓаар лескоро народо предајнѓа ле е Филистејцонге (Суд. 15:9-13). Ама „е Јеховаскоро духо ало упро Самсон“ хем ов ослободинѓа пе аѓаар со чхинѓа о шеле. Тегани ов „аракхља свежо херескири вилица“, леља ла хем лаја мударѓа 1.000 Филистејцон (Суд. 15:14-16; w23.09 2, пас. 3-4).

Благодарна сием е Јеховаске со хари похари ки Библија откринѓа пли вечно намера. О Јехова шај те биринел различна начинија те шај те исполнинел пли намера хем ов секогаш успејнела ко адава соске „керѓа са те шај те служинел баши лескири намера“ (Изр. 16:4). Освен адава, са со керела о Јехова трајнела засекогаш. Која тани е Јеховаскири намера хем кола промене керѓа те шај те исполнинел ла? О Девел вакерѓа е прво манушенге која тани лескири намера ленцар. Ола ваљанѓе те „пхерен и пхув манушенцар хем те владинен упро... са о суштествија ки пхув“ (1. Мој. 1:28). Кеда о Адам хем и Ева бунинѓе пе хем о мануша уле грешна, адава ни најхари на менинѓа е Јеховаскири намера. Ов само променинѓа о начин сар ка исполнинел пли намера. Ов одма одлучинѓа те керел Царство ко небо кова со ка исполнинел лескири намера со сине ле ко почеток е манушенцар хем е пхувјаја (Мат. 25:34; w23.10 19-20, пас. 6-7).

О Јехова шај те поможинел амен те на откажина амен. Шај нане секогаш те овел аменге локхо, посебно ако повише време боринаја амен те накхава несави слабост. Понекогаш, амаре слабостија шај те дикхјон аменге попхаре таро адала со сине е апостол Петаре. Ама о Јехова шај те дел амен сила те на откажина амен (Пс. 94:18, 19). На пример, јекх пхрал живинела сине сар хомосексуалцо повише берша англедер те дознајнел о чачипе. Ов целосно керѓа промене ко пло живото хем почминѓа те живинел спрема о библиска мерилија. Сепак, понекогаш боринела пе сине погрешна желбенцар. Со поможинѓа леске те на откажинел пе? Ов вакерела: „О Јехова дела ман сила. Лескере духоја сиклиљум кај шај те живинав спрема о библиска мерилија. О Јехова дозволинела манге те служинав ки лескири организација, хем иако сиум несовршено ов понадари да дела ман сила“ (w23.09 23, пас. 12).

Терне пхраљален, нане таро јекх пути те овен зрела христијања. Ваљани те биринен шукар примерија пали коленде со ка џан, те развинен способност те проценинен, те овен доверлива, те сикљовен корисна вештине хем те спреминен тумен башо одговорностија со ка овен тумен ки иднина. Кеда размислинена башо адава ко со са ваљани те керен бути шај мислинена кај адава туменге бут пхаро. Ама тумен шај те успејнен. Ма бистрен кај о Јехова бут мангела те поможинел тумен (Иса. 41:10, 13). Џанѓола пе, исто аѓаар о пхраља хем о пхења да таро собрание ка поможинен туменге. Кеда ка исполнинен тумари цел те овен зрела христијања, ка овел тумен шужо хем среќно живото. Терне пхраљален, бут мангаја тумен! Џи тегани, џикоте керена бути те овен зрела христијања о Јехова нека благословинел тумен (w23.12 29, пас. 19-20).

Замислин кај сиан ки јекх забава е пхраленцар хем е пхењенцар, накхена туменге шукар хем кереа јекх групно слика. Уствари, кереа панда дуј слике ако случајно и прво на икљола шукар. Акана иси тут трин слике. Ама приметинеа кај ки јекх лендар јекх пхрал на иклило шукар. Адалеске ка бришине ла соске иси тут панда дуј јавера коте со сарине асана. Обично памтинаја о шукар буќа со накхавѓем лен е пхраленцар хем е пхењенцар. Ама шај ко јекх таро адала прилике, несаво пхрал или пхен керѓа или вакерѓа нешто со на сине љубезно. Дали ваљани те памтина асавке ситуацие? Ваљани те трудина амен те бришина адава тари амари годи исто сар со би бришинаја јекх таро адала слике (Еф. 4:32). Шај те кера адава адалеске со сетинаја амен ко бут јавера шукар моментија со накхавѓем лен заедно. Мангаја те памтина хем те ценина само асавке шукар моментија (w23.11 12-13, пас. 16-17).

О грчка лафија кола со о Павле користинела акате сикавена кај јекх христијанка ваљани секогаш те уравел пе пристојно хем те овел обѕирно спрема е јаверенгере чувствија хем мислење. Амен бут ценинаја амаре мангле пхењен кола со уравена пе скромно! И разборитост тани панда јекх особина која со ваљани те сикавен са о зрела христијанке. Сој тани и разборитост? Ој тани способност шукар те проценине о буќа, те разликујне о исправно таро погрешно хем пало адава те ане мудро одлука. Размислин баши Авигеја. Лакоро ром анѓа погрешно одлука која со лошно ка влијајнел сине упро секова јекх таро лескоро кхер. И Авигеја одма керѓа нешто. Адалеске со сине разборито, ој спасинѓа животија (1. Сам. 25:14-23, 32-35). И разборитост исто аѓаар поможинела амен те џана кеда те кера лафи, а кеда те чутина. А поможинела амен те ова урамнотежена кеда сикаваја лично интерес е јаверенге те шај те на ана лен ки незгодно ситуација (1. Сол. 4:11; w23.12 20, пас. 8-9).

О апостол Павле пишинѓа акала лафија е собраниеске ко Рим. О пхраља хем о пхења адари запознајнѓе е Јехова хем е Исусе, сикавѓе вера хем уле христијања. Адалеске со сине лен вера, о Девел дикхља ки ленде сар праведна хем помазинѓа лен пле духоја (Рим. 5:1). Аѓаар, ола добинѓе бут шужи надеж колаке со шај сине те овен сигурна кај ка исполнинел пе. О Павле покасно пишинѓа е помазиме христијаненге таро Ефес баши надеж која со о Девел денѓа лен. Ки адаја надеж сине вклучимо те добинен „о наследство башо света“ (Еф. 1:18). Исто аѓаар, о Павле вакерѓа е Колошаненге коте ка исполнинел пе ленгири надеж. Ов викинѓа ла „надеж која сој гаравди туменге ко небо“ (Кол. 1:4, 5). Значи, е помазиме христијанен иси лен надеж те воскреснинен башо вечно живото ко небо, коте со ка владинен заедно е Христосеа (1. Сол. 4:13-17; Отк. 20:6; w23.12 9, пас. 4-5).

О лафи сој преведимо сар „ка аракхел“ ки грчко чхиб користинела пе сине сар воено израз хем леа опишинела пе сине јекх група војникија кола со заштитинена јекх диз хем икерена ла сине безбедно таро нападија. О мануша тари адаја диз шај сине мирно те совен соске џанена сине кај о војникија терѓона англо порте. Слично, кеда о мир таро Девел аракхела амаре виле хем амаре мисле, тегани сием смириме соске џанаја кај сием заштитиме (Пс. 4:8). Исто сар ко случај е Анакоро, чак ако амари ситуација на менинела пе одма, сепак амен шај џи негде те осетина амен смириме (1. Сам. 1:16-18). А кеда сием смириме, бут пути тано аменге полокхо те размислина јасно хем те ана мудра одлуке. Со шај амен те кера? Кеда на сиан смиримо викин е „чуваре“ ки несави смисла. Сар? Аѓаар со ка молине тут са џикоте на осетинеа о мир таро Девел (Лука 11:9; 1. Сол. 5:17). Ако накхеа таро пхаро периоди, ма чхинав те молине тут хем ка осетине сар е Јеховаскоро мир аракхела тло вило хем тле мисле (Рим. 12:12; w24.01 21, пас. 5-6).

Те шај те фалинел пле Дадескоро анав, о Исус трпинѓа те овел мучимо ко различна начинија, те овел вреџимо хем те вакерен ховајба против лесте. Ов на сине состар те лаџал соске џанља кај ко са сине послушно пле Дадеске (Евр. 12:2). Ов исто аѓаар, џанља кај адала нападија со сине ле ко адава пхаро време, директно авена сине таро Сатана (Лука 22:2-4; 23:33, 34). О Сатана сигурно надинела пе сине кај ка успејнел те чхивел е Исусе те на овел верно е Јеховаске, ама ов ни хари на успејнѓа ко адава. О Исус денѓа најбаро доказ кај о Сатана тано лошно хем ховавела хем кај е Јехова иси ле слуге кола со ачховена леске верна чак ко најпхаре испитија! Дали мангеа те радујне тле царе е Исусе? Продолжин те фалине е Јеховаскоро анав, аѓаар со ка поможине е јаверенге те дознајнен кобор шуже особине иси амаре Девле. Аѓаар ка џа пало пример е Исусескоро (1. Пет. 2:21). Исто сар о Исус, ка радујнкере е Јехова хем ка докажине кај лескоро душмани о Сатана бизи лаџ ховавела! (w24.02 11-12, пас. 11-13).

Ко последна панџ берш, повише таро јекх милиони мануша крстинѓе пе хем уле е Јеховаскере сведокија. Кеда деа лафи е Јеховаске кај ка служине леске, ту биринеа те ове ученико е Исус Христосескоро хем одлучинеа е Девлескири волја те овел туке најважно ко живото. Со ка родел пе тутар ако деа акава завет? О Исус вакерѓа: „Ако некој мангела те џал пали манде, нека откажинел пе пестар“ (Мат. 16:24). И грчко фраза сој преведими сар „нека откажинел пе пестар“, шај исто аѓаар те превединел пе сар „мора коркори песке те вакерел на“. Кеда деа лафи е Јеховаске, ка ваљани те вакере на башо са адава со на свиџинела пе леске (2. Кор. 5:14, 15). Ко адава тано вклучимо те вакере на хем башо „постапке е грешно телоскере“, сар сој о сексуално неморал (Гал. 5:19-21; 1. Кор. 6:18). Дали адава со ка шуне акала заповедија ка керен тло живото пхаро? Ако мангеа е Јехова хем ако сиан уверимо кај лескере законија тане башо тло шукарипе, нане те овел туке пхаро (Пс. 119:97; Иса. 48:17, 18; w24.03 2, пас. 1; 3, пас. 4).

О Јехова дела пло свети дух околенге кастар сој задоволно (Мат. 12:18). Шај те пуча амен: „Дали сикавава несаве особине со авена таро свети дух ко мло живото?“ Дали приметинѓан кај акана сиан пострпливо него англедер те пенџаре е Јехова? Уствари, кобор повише сикљовеа те сикаве о особине таро свети дух, добором поуверимо ка ове кај о Јехова тано задоволно тутар. О Јехова поможинела околенге кастар сој задоволно те овел лен корист тари откупнина (1. Тим. 2:5, 6). Ама, со ако амаро вило панда нане уверимо кај о Јехова тано задоволно амендар, иако иси амен вера ки откупнина хем крстинѓем амен? Ма бистре, нашти секогаш те овел амен доверба ко амаре чувствија, ама шај те овел амен доверба ко Јехова. Окола со иси лен вера ки откупнина тане праведна англо лескере јакхја хем ов ветинела кај ка благословинел лен (Пс. 5:12; Рим. 3:26; w24.03 30, пас. 15; 31, пас. 17).