Пазин тут таро искушение

1-2. а) Саво предупредување денѓа о Исус пле учениконге? б) Соске о ученикија мукхле е Исусе? (Дикх хем о слике.)

„ЧАЧЕ, о вило тано спремно, ама о тело тано слабо“a (Мат. 26:41б). Акале лафенцар, о Исус сикавѓа кај хаљола адава со сием несовршена хем кај ка кера грешке. Ама, ко лескере лафија иси хем предупредување — те пазина те на овел амен претерано самодоверба. Само некобор саатија англедер о Исус те вакерел акала лафија, лескере ученикија сине бут увериме кеда вакерѓе леске кај никогаш нане те мукхен ле (Мат. 26:35). Лен сине лен шукар мотивија. Ама, ола на халиле кај ленгири одлучност шај сигате те слабонел кеда ка аракхљовен ко притисок. Адалеске о Исус предупрединѓа лен: „Ачховен џангавде хем ма чхинавен те молинен тумен, те шај те на перен ко искушение“ (Мат. 26:41а).

² Жално тано адава со о ученикија на керѓе адава со о Исус вакерѓа ленге те керен. Кеда астарѓе е Исусе, дали ола ачхиле леа или дарандиле хем нашле? Адалеске со на пазинѓе, о ученикија керѓе баш адава со вакерѓе кај никогаш нане те керен — мукхле е Исусе (Мат. 26:56).

3. а) Те шај те ачхова верна е Јеховаске, соске мора те пазина те на ова претерано самоуверена? б) Со ка дикха ки акаја статија?

³ На смејнаја те ова претерано самоуверена. Точно тано кај амен сием одлучна те на кера нешто со ка цидел амен таро Јехова. Ама, амен сием несовршена хем локхе шај те пера ко искушение те кера нешто погрешно (Рим. 5:12; 7:21-23). Изненадено, шај те аракхљова ко ситуацие коте со несави погрешно постапка шај те овел аменге бут привлечно. Те шај те ачхова верна е Јеховаске хем лескере Чхавеске, мора те шуна е Исусескоро совет те пазина те на пера ко искушение те кера грево. Акаја статија шај те поможинел амен ко адава. Прво, ка дикха ко кола ситуацие посебно мора те пазина. Пало адава, ка дикха сар те аракха амен таро искушение. Ко крајо, ка дикха сар те ачхова џангавде.

СИТУАЦИЕ КОЛЕНДЕ СО ПОСЕБНО ВАЉАНИ ТЕ ПАЗИНА

4-5. Соске ваљани те пазина амен чак таро потикне гревија?

⁴ Несаве гревија нане добором баре, ама шај те руминен амаро амалипе е Јеховаја. Исто аѓаар, ола шај те чхивен амен те кера побаре гревија.

⁵ Сарине амен ка аракхљова ко искушение те кера нешто погрешно. Ама, секоле јекхе амендар иси ле различна слабостија, адалеске несаве буќа шај посебно те чхивен амен ко искушение те кера нешто сој погрешно. На пример, некој шај боринела пе те на перел ко искушение те керел баро грево, сар сој о сексуално неморал. Јавер, шај боринела пе те на керел нешто сој мелало, сар сој о мастурбирибе или те дикхел пе порнографија. А некој јавер, шај боринела пе те на овел ле дар таро мануш, те на овел гордо, те на нервиринел пе сигате или нештолеа јавереа. Баш адалеске о Јаков вакерѓа: „Секова јекх тано искушимо аѓаар со цидела ле хем ховавела ле лескири желба“ (Јак. 1:14).

6. Баши која бути мора те ова искрена?

⁶ Дали џанеа кола буќа туке тане најбаро искушение? Опасно тано те ховава амен кај нане амен слабостија или те мислина аменге кај нашти те пера ко искушение адалеске со сием бут силна (1. Јов. 1:8). Ма бистре кај о Павле вакерѓа кај чак окола сој духовна зрела шај те перен ко искушение ако на пазинена (Гал. 6:1). Мора те ова искрена аменцар хем те признајна кола буќа тане аменге слабост (2. Кор. 13:5).

7. Ко со ваљани посебно те пазина? Вакер пример.

⁷ Со ваљани те кера откеда ка открина кола буќа тане аменге најбаро искушение? Те трудина амен те ова панда посилна те борина амен против адава искушение. Те вакера јекх пример башо акава. Ко библиско време о најслабо дело таро е дизјакере ѕидија сине о порте. Адалеске, ко порте сине повише стражарија те шај те аракхен и диз. Слично, амен ваљани посебно те пазина ко буќа коленде со сием посебно слаба (1. Кор. 9:27).

САР ТЕ ПАЗИНА АМЕН ТАРО ИСКУШЕНИЕ ХЕМ ТАРО ГРЕВО

8-9. Сар шај сине о терно чхаво сој спомнимо ко Изреки 7-то поглавје те избегинел те керел грево? (Изреки 7:8, 9, 13, 14, 21).

⁸ Сар шај те пазина амен таро искушение хем таро грево? Те дикха со шај те сикљова таро терно чхаво колеске со керела пе лафи ко Изреки 7-то поглавје. Ов керѓа сексуално неморал јекхе блудницаја. О 22-то стихо вакерела аменге кај акава терно чхаво „одма“ гело пали лате хем адалеске шај те изглединел кај адава уло таро јекх пути. Ама, сар со дикхаја таро англуне стихија, ов англедер анѓа несаве одлуке со на сине мудра кола со анѓе ле џи ко адава хари по хари те керел грево.

⁹ Со анѓа џи ко адава те керел грево? Сар прво, ов раќате накхља „тари лакири улица“. Пало адава, почминѓа те џал накај лакоро кхер. (Читин Изреки 7:8, 9.) А кеда дикхља е џувља, на гело песке. Наместо адава, ов мукхља те чуминел ле хем шунѓа сар вакерела леске кај денѓа жртва башо заедништво, шај адалеа пробинѓа те сикавел леске кај ој нане лошно мануш. (Читин Изреки 7:13, 14, 21.) Ако о терно чхаво дикхела сине о опасностија со ингарена ко грево, нане те перел сине ко искушение те керел грево.

10. Сар шај некој авдиве да те керел и исто грешка сар о терно чхаво?

¹⁰ Акава извештај сикавела со шај те случинел пе секоле јекхеске со служинела е Јеховаске. Ов шај те керел баро грево, а пало адава те мислинел песке кај адава уло „таро јекх пути“. Или шај те вакерел: „Едноставно ни на џанава сар случинѓа пе адава“. Ама, ако чаче размислинела башо адава со случинѓа пе, ов веројатно ка хаљовел кај анѓа несаве одлуке со на сине мудра кола со чхивѓе ле те керел грево. Ов шај дружинела пе сине некасаја со на мангела е Јехова, или и забава со биринѓа, ко интернет-странице со кхувѓа или о тхана кај со гело на сине шукар башо јекх христијани. Ов исто аѓаар шај чхинавѓа те молинел пе, те читинел и Библија, те џал ко состанокија или те проповединел. Исто сар со о терно чхаво сој спомнимо ко Изреки, ов да на керѓа грево таро јекх пути.

11. Таро со ваљани те пазина амен те шај те на кера грево?

¹¹ Со сикљоваја таро акава? На само со ваљани те пазина ма те кера грево, исто аѓаар ваљани те пазина амен таро чекорија со ингарена ко грево. Баш акава вакерѓа о Соломон одма откеда опишинѓа со случинѓа пе е терне чхавеске. Поврзимо е блудницаја ов денѓа акава совет: „Ма џа пало лакере друмија“ (Изр. 7:25). Ов чак вакерѓа: „Циде тут латар подур хем ма ава паше узо лакере кхерескоро удар“ (Изр. 5:3, 8). Те шај те пазина амен те на кера грево мора те пазина амен таро ситуацие кола со ингарена џи ко грево.b Акава значинела кај чак ако несаве буќа нане аменге погрешна сар христијања, на ваљани те кера лен ако џанаја кај ка чхивен амен ко искушение те кера нешто погрешно (Мат. 5:29, 30).

12. Со сине одлучно те керел о Јов, хем сар адава поможинѓа ле те на перел ко искушение? (Јов 31:1).

¹² Те шај те избегина ситуацие со анена џи ко грево, мора те ачхова одлучна ко адава. Баш адава керѓа о Јов. Ов керѓа завет пле јакхенцар те шај те на дикхел ки јавер џувли ко погрешно начин. (Читин Јов 31:1.) Адава со сине одлучно те икерел пе ки пли одлука, поможинѓа ле те на аракхљовел ки опасност те керел прељуба. Амен да шај те ова одлучна те цида амен таро са со шај те чхивел амен ко искушение.

13. Соске мора те пазина башо со размислинаја? (Дикх хем о слике.)

¹³ Исто аѓаар, мора те пазина башо со размислинаја (2. Мој. 20:17). Несаве мислинена кај нане погрешно те фантазиринен песке башо погрешна желбе са џикоте на керена адава чаче. Ама асавко размислибе тано погрешно. Некој со нонстоп размислинела баши несави погрешно желба ов адалеа само бајрарела ла. Уствари, ов коркори песке керела искушение колеа со мора те боринел пе. Нормално, понекогаш ка појавинен пе аменге погрешна желбе. Кеда адава ка случинел пе, бут тано важно одма те цида амендар адала мисле хем те трудина амен те размислина башо исправна буќа. Адава ка поможинел аменге те на дозволина и погрешно мисла те бајрол ки силно желба хем аѓаар ка заштитина амен те на кера сериозно грево (Фил. 4:8; Кол. 3:2; Јак. 1:13-15).

14. Со јавер шај те поможинел аменге те аракха амен таро искушение?

¹⁴ Со јавер шај те кера те шај те аракха амен таро искушение? Ваљани те ова целосно увериме кај секогаш кеда шунаја е Јеховаскере законија адава тано амаре шукарипаске. Понекогаш шај те овел аменге пхаро те размислина хем те манга о буќа сој тане спрема е Јеховаскири волја, ама кеда бут трудинаја амен те кера адава ка ова чаче среќна.

15. Сар адава со ка развина исправна желбе ка поможинел аменге те борина амен против о искушение?

¹⁵ Ваљани те развина исправна желбе. Ако сикљоваја те мрзина о лошно а те манга о шукар, ка ова панда поодлучна те кера адава сој исправно хем те избегина о ситуацие со анена џи ко грево (Амос 5:15). О исправна желбе исто аѓаар ка керен амен панда поодлучна те борина амен против несаво искушение ако аракхљоваја ки ситуација која со на очекујнѓем ла или нашти спречинѓем ла.

16. Сар о духовна активностија поможинена аменге те аракха амен таро искушение? (Дикх хем о слике.)

¹⁶ Сар шај те развина исправна желбе? Ваљани те ова со шај повише зафатиме духовна активностенцар. Кеда сием ко состанокија или ки служба бајрараја амари желба те радујна е Јехова хем нане локхесте те пера ко искушение те кера нешто погрешно (Мат. 28:19, 20; Евр. 10:24, 25). Кеда читинаја хем проучинаја е Девлескоро Лафи хем размислинаја башо адава, тегани повише ка манга адава сој шукар а повише ка мрзина адава сој лошно (Ис. Нав. 1:8; Пс. 1:2, 3; 119:97, 101). Ма бистре кај о Исус вакерѓа пле учениконге: „Ма чхинавен те молинен тумен, те шај те на перен ко искушение“ (Мат. 26:41). Кеда одвојнаја аменге време те молина амен амаре небесно Дадеске, даја ле прилика те поможинел аменге хем сием панда поодлучна те кера адава со радујнела ле (Јак. 4:8).

ТЕ АЧХОВА ЏАНГАВДЕ

17. Која слабост цело време керела сине проблеми е Петареске?

¹⁷ Таро несаве амаре слабостија веројатно ка шај скроз те ослободина амен. Ама, несаве јавере слабостенцар шај ка ваљани те борина амен повише време. Размислин башо е апостол Петарескоро пример. Адалеске со сине ле дар таро мануш ов трин пути откажинѓа пе таро Исус (Мат. 26:69-75). Покасно, изглединела сине кај о Петар побединѓа адаја слабост соске храбро проповединѓа башо Исус англо Судско совет (Апо. 5:27-29). Ама, некобор берша покасно, ов чхинавѓа несаво време те хал е христијаненцар со на сине Евреија соске дарала сине со ка мислинен о христијања со сине Евреија (Гал. 2:11, 12). Лескири слабост палем иранѓа пе. Шај ов никогаш на успејнѓа целосно те ослободинел пе латар.

18. Со шај те случинел пе несаве слабостенцар?

¹⁸ Исто сар о Петар, амен да шај ка ваљани те борина амен против несави слабост баши која со мислинѓем кај побединѓем ла. На пример, јекх пхрал признајнела: „Деш берш на дикхљум порнографија хем сиум сине уверимо кај адава више на сине манге проблеми. Ама, мли слабост сине сар опасно животно кова со гаравела пе сине хем аџикерела сине о право моменти те шај те нападинел“. Шукар тано адава со амаро пхрал на откажинѓа пе. Ов халило кај секова диве шај ка ваљани те боринел пе против акаја слабост — шај џи ко крајо таро пло живото ко акава свето. Лескири ромни хем о старешине таро собрание, поможинѓе леске те пазинел панда повише те шај те боринел пе против и желба те дикхел порнографија.

19. Со шај те кера ако понадари да иси амен несави слабост која со на побединѓем ла?

¹⁹ Сар шај те борина амен против и слабост која со панда на успејнѓем те победина ла те шај те на чхивел амен те кера нешто погрешно? Аѓаар со ка шуна е Исусескоро совет те ачхова џангавде, јавере лафенцар те пазина амен таро искушение. Чак кеда осетинеа тут да силно, понадари да избегин ситуацие кола со шај те чхивен тут ко искушение (1. Кор. 10:12). Понадари да кер адава со поможинѓа тут џи акана те борине тут против адаја слабост. Ки Библија пишинела: „Среќно тано о мануш кова со секогаш пазинела со керела“ (Изр. 28:14; 2. Пет. 3:14).

САВЕ БЛАГОСЛОВИЈА КА ОВЕН АМЕН АКО ПАЗИНАЈА АМЕН ТАРО ИСКУШЕНИЈА?

20-21. а) Саве благословија ка овен амен ако пазинаја амен таро искушенија? б) Ако амен кераја амаро дело, со ка керел о Јехова аменге? (2. Коринќања 4:7).

²⁰ Шај те ова сигурна кај врединела адава со трудинаја амен те на пера ко искушение. Бизи разлика саве „задоволствија со накхена“ нудинела о грево, адава со ка живина спрема е Јеховаскере мерилија ка керел амен бут посреќна (Евр. 11:25; Пс. 19:8). Адава тано аѓаар соске амен сием керде те живина спрема лескере мерилија (1. Мој. 1:27). Ако кераја аѓаар, ка овел амен чисто совест хем јекх диве ка овел амен прилика те живина вечно (1. Тим. 6:12; 2. Тим. 1:3; Јуда 20, 21).

²¹ Чаче „о тело тано слабо“. Ама, адава на значинела кај нане амен нисави помош. О Јехова тано спремно те дел амен и сила со ваљанела аменге. (Читин 2. Коринќања 4:7.) Приметин кај о Девел дела амен и сила која со накхавела и нормално. Ама, амари одговорност тани те користина амари сила, или јавере лафенцар те да амендар са секова диве те борина амен против о искушение. Ако кераја акава шај те ова сигурна кај о Јехова ка одговоринел ко амаре молитве хем ка дел амен повише сила кеда адава ка ваљанел аменге (1. Кор. 10:13). Шај те ова сигурна кај адалеске со о Јехова поможинела амен шај те пазина амен таро искушенија.