И војна тани страшно
И војна тани јекх таро најстрашна буќа со шај некој те доживинел. Бут војникија хем обична мануша со доживинѓе војна, пле јакхенцар дикхле кобор страшно тани и војна.
ВОЈНИКИЈА
„Котар хем те иране тут дикхеа мударде манушен или ранимен. Ко нијекх моменти на осетинеа тут сигурно“ (Гери, Британија).
„Сиум сине погодимо таро куршумија ко думо хем ко муј хем дикхљум сар бут џене тане мударде, машкар коленде со сине чхаве хем попхуре. И војна керела тут те ове бизо чувствија“ (Вилмар, Колумбија).
„Кеда некој тано пукајмо англо тле јакхја, нашти те икале адаја слика тари тли годи. Цело време вртинела пе туке о пиштиба хем о офкиба. Никогаш нашти те бистре адава со дикхљан“ (Зафира, Америка).
ОБИЧНА МАНУША
„Мислинава сине кај никогаш палем нане те овав среќно. Дарава сине башо мло живото, ама панда повише дарава сине мле фамилијаке хем мле амаленге“ (Александра, Украина).
„Страшно тано те аџикере редо хајбаске таро 2 сабајле џи ко 11 раќате, ки дар кај шај те погодинел тут несаво куршуми“ (Далер, Таџикистан).
„Мле родителија сине мударде ки војна. Ачхиљум коркори хем на сине кој те утешинел ман хем те грижинел пе манге“ (Мери, Руанда).
Иако сине лен страшна последице, о мануша сој цитириме поупре аракхле мир. А исто аѓаар тане увериме кај панда хари ка авел крајо башо са о војне хем о насилна конфликтија. Ко акава број тари Стражарско кула сој темелими ки Библија, ка овел објаснимо сар ка овел адава.