Ов ревно ки служба исто сар о Исус

1. Која тани јекх бути ки која со е Јеховаскере слуге разликујнена пе таро окола со вакерена кај тане христијања?

ЈЕКХ бути ки која со е Јеховаскере слуге разликујнена пе таро окола со вакерена кај тане христијања тани ленгири ревностa ки служба (Тит 2:14). Ама, понекогаш шај на мангеа добором бут те џа ки служба. Шај осетинеа тут сар јекх вредно старешина кова со признајнѓа: „Некогаш едноставно на мангава те проповединав“.

2. Соске понекогаш аменге пхаро те ачхова ревна ки служба?

² Шај повише мангаја те учествујна ко јавера врсте свето служба, него ко проповедибе. Соске? Кеда учествујнаја ки градба хем ко одржибе о теократска објектија, поможинаја кеда иси природна катастрофе или охрабринаја амаре пхрален, шај сигате те дикха о резултатија хем осетинаја амен кај успејнѓем нешто. Кеда соработинаја амаре пхраленцар, осетинаја о мир хем о мангипе со иси машкар аменде хем џанаја кај ола ценинена адава со кераја баши ленде. Тари јавер страна, шај бершенцар проповединаја ко исто подрачје хем на дикхаја несаве баре резултатија. Шај чак аракхаја манушен кола со бут лошно реагиринена ко хабери со ингараја ле. Исто аѓаар, џанаја кај сар со авела о крајо попаше, шај те очекујна панда побаро противибе (Мат. 10:22). Со шај те поможинел аменге те на нашава, па чак те бајрара амари ревност баши служба?

3. Со сикљоваја баши ревност тари е Исусескири споредба сој пишими ко Лука 13:6-9?

³ Таро е Исусескоро пример шај те сикљова со ка поможинел аменге те ова ревна ки служба. Џикоте керела сине пли служба, лескири ревност никогаш на тикнили. Уствари, сар со накхела сине о време, ов овела сине поактивно. (Читин Лука 13:6-9.) Исто сар о мануш коле со сине ле нива дракхенцар хем кова со трин берш грижинѓа пе е смокваке а на денѓа нисаво плоди, о Исус околу трин берш проповединѓа е Евреенге колендар со повише џене на уле лескере ученикија. Ама, исто сар адава мануш со на откажинѓа пе тари смоква, аѓаар о Исус да на откажинѓа пе таро мануша хем на чхинавѓа те проповединел. Наместо адава, панда повише трудинѓа пе те шај те ресел џи ко ленгоро вило.

4. Кола штар буќа таро е Исусескоро пример ка дикха?

⁴ Ки акаја статија ка дикха сар о Исус сикавѓа ревност, посебно ко последна шов масек тари лескири служба. Ако сикљоваја таро адава башо со ов сикавѓа хем таро адава со керѓа, амен да ка шај те ачхова ревна. Те дикха акала штар буќа кола со шај те сикљова лен лестар: 1) е Исусеске сине најважно те керел е Јеховаскири волја, 2) сине ле ки годи о библиска пророштвија, 3) сине ле доверба кај о Јехова ка поможинел ле хем 4) ачхило позитивно хем надинела пе сине кај сепак несаве ка шунен.

НАЈВАЖНО СИНЕ ЛЕСКЕ Е ЈЕХОВАСКИРИ ВОЛЈА

5. Сар о Исус сикавѓа кај леске најважно те керел пе е Девлескири волја?

⁵ О Исус ревно проповединела сине „о шукар хабери башо е Девлескоро Царство“ адалеске со џанела сине кај о Девел мангела те керел адава (Лука 4:43). Е Исусеске о проповедибе о шукар хабери сине и најважно бути ко живото. Чак хем ко крајо тари лескири служба, ов „накхела сине таро дизја хем таро гава хем сикавела сине е манушен“ (Лука 13:22). Исто аѓаар, обучинела сине јаверен да те проповединен о шукар хабери (Лука 10:1).

6. Сар о проповедибе тано поврзимо јавере задаченцар кола со шај иси амен? (Дикх хем и слика.)

⁶ Авдиве да о проповедибе о шукар хабери тани и најважно задача која со о Јехова хем о Исус мангена те кера ла (Мат. 24:14; 28:19, 20). Секоја задача со иси амен ки е Јеховаскири организација тани директно поврзими е проповедибаја. На пример, адалеа со учествујнаја ко градибе теократска објектија или служинаја ко Бетел, поможинаја те овен учхарде о потребе ко подрачје. Кеда иси природна катастрофе амен даја амендар са те шај амаре пхрален хем пхењен те овен лен о буќа со ваљани ленге те шај те продолжинен пумаре духовна активностенцар, машкар коленде сој о состанокија хем о проповедибе. Ако хаљоваја кобор тано важно о проповедибе хем ако на бистраја кај адаја тани и најважно бути која со о Јехова мангела те кера ла, ка ова поттикниме редовно те учествујна ки служба. О Јанош, јекх старешина ки Унгарија вакерела: „Сетинкерава ман кај нијекх теократско задача нашти те заменинел о проповедибе, адаја тани амари главно задача“.

7. Соске о Јехова мангела понадари да те проповедина? (1. Тимотеј 2:3, 4).

⁷ Шај те ова поревна ки служба ако дикхаја ко мануша аѓаар сар со дикхела о Јехова. Ов мангела со шај повише мануша те шунен о шукар хабери хем те прифатинен ле. (Читин 1. Тимотеј 2:3, 4.) Адалеске, о Јехова обучинела амен те шај пошукар те вакера е јаверенге акава хабери со спасинела животија. На пример, ки брошура Манг е манушен — кер ученикија иси практична предлогија башо адава сар те почмина те кера лафи е манушенцар те шај те поможина ленге те овен е Исусескере ученикија. Чак хем те на прифатинен о хабери акана, шај ка овел лен прилика те керен адава англедер те завршинел и бари неволја. Адава со ка вакера ленге панда акана шај ка поттикнинел лен те почминен те служинен е Јеховаске ки иднина. Ама, адава шај те случинел пе ако само понадари да проповединаја.

СИНЕ ЛЕ КИ ГОДИ О БИБЛИСКА ПРОРОШТВИЈА

8. Сар адава со о Исус џанља о библиска пророштвија влијајнѓа упро адава сар користинѓа пло време?

⁸ О Исус халило сар ка исполнинен пе несаве библиска пророштвија. Ов џанља кај лескири служба ка трајнел само трин текваш берш (Дан. 9:26, 27). Исто аѓаар, џанља со сине пророкујмо башо адава кеда хем сар ка мерел (Лука 18:31-34). Адалеске со џанља са акава, о Исус користинѓа пло време најшукар со шај, аѓаар со ревно проповединѓа те шај те завршинел и бути која со сине леске денди.

9. Соске адава со хаљоваја о библиска пророштвија поттикнинела амен ревно те проповедина?

⁹ Адава со хаљоваја о библиска пророштвија шај те поттикнинен амен ревно те проповедина. Џанаја кај акале светоске ачхола панда хари време. Дикхаја кај адава со случинела пе авдиве хем о ставија е манушенгере сикавена кај исполнинела пе адава со пророкујнѓа и Библија башо последна диве. Приметинаја сар о конфликт машкар и англо-американско светско сила хем и Русија пле сојузниконцар исполнинела о пророштво башо цари таро југ хем о цари таро север „ко време е крајоскоро“ (Дан. 11:40). Исто аѓаар, хаљоваја кај и англо-американско светско сила тани претставими е пренцар таро кипи кова сој опишимо ко Даниел 2:43-45. Увериме сием кај, сар со сикавела о пророштво, панда хари — панда бут хари — е Девлескоро Царство ка уништинел е манушикане владен. Са акала пророштвија сикавена кај живинаја бут паше ко крајо хем адалеске мора те користина амаро време најшукар со шај те проповедина о шукар хабери.

10. Ко кола јавера начинија о библиска пророштвија шај те бајрарен амари ревност?

¹⁰ Ко библиска пророштвија исто аѓаар иси хабери кова со цело душаја мангаја те вакера ле е јаверенге. И Кери, јекх пхен која со служинела ки Доминиканско Република, вакерела: „Е Јеховаскере бут шуже ветувања кај ка овел пошукар иднина поттикнинела ман те вакерав е јаверенге о чачипе“. Ој исто аѓаар вакерела: „Кеда дикхава саве проблемија иси е манушен авдиве, хаљовава кај ола да ваљани те џанен акала ветувања“. О библиска пророштвија поттикнинена амен понадари да те проповедина адалеске со џанаја кај о Јехова терѓола пали акаја активност. И Лејла, која со живинела ки Унгарија, вакерела: „О Исаија 11:6-9 поттикнинела ман те вакерав о шукар хабери чак адаленге коленге со мислинава кај нане те прифатинен. Џанава кај секова јекх шај те менинел пе адалеске со о Јехова поможинела“. А о Кристофер, јекх пхрал тари Замбија, вакерела: „Сар сој пророкујмо ко Марко 13:10, о шукар хабери ширинела пе ко цело свето хем манге тани бари чест со шај те поможинав те исполнинел пе акава пророштво“. Кола библиска пророштвија поттикнинена тут понадари да те проповедине?

СИНЕ ЛЕ ДОВЕРБА КАЈ О ЈЕХОВА КА ПОМОЖИНЕЛ ЛЕСКЕ

11. Соске ваљанѓа е Исусе те овел ле доверба ко Јехова кај ка поможинел леске те шај понадари да ревно те проповединел? (Лука 12:49, 53).

¹¹ Те шај понадари да ревно те проповединел, е Исусе сине ле доверба кај о Јехова ка поможинел ле. Иако сине тактично, о Исус џанља кај о шукар хабери башо Царство ка анел баре расправие хем кај ка анел џи ко баро противибе. (Читин Лука 12:49, 53.) Адалеске со о Исус проповединела сине, о верска водачија повише пути пробинѓе те мударен ле (Јован 8:59; 10:31, 39). Ама, ов на чхинавѓа те проповединел соске џанља кај о Јехова тано леа. О Исус вакерѓа: „Ме на сиум коркори, о Дад кова со бичхалѓа ман тано манцар... На мукхља ман коркори, соске ме секогаш керава адава сој спрема лескири волја“ (Јован 8:16, 29).

12. Сар о Исус спреминѓа пле ученикон понадари да те проповединен, чак кеда ка овел лен противибе?

¹² О Исус сетинкерѓа пле ученикон кај шај те овел лен доверба кај о Јехова ка поможинел лен. Ов секогаш уверинела лен сине кај о Јехова ка поможинел лен, чак кеда ка овел лен прогонство (Мат. 10:18-20; Лука 12:11, 12). Адалеске со џанља кај ка противинен пе ленге, ов поттикнинѓа лен те пазинен (Мат. 10:16; Лука 10:3). Сикавѓа лен кај, ако о мануша на мангена те шунен, ма те чхивен лен силаја ко адава (Лука 10:10, 11). Хем вакерѓа ленге ако овена прогониме те нашен ко јавер тхан (Мат. 10:23). Иако сине ревно хем сине ле доверба ко Јехова, о Исус на чхивѓа пе ки опасност бизи потреба (Јован 11:53, 54).

13. Соске шај те ове сигурно кај о Јехова ка поможинел туке?

¹³ Аменге да ваљани е Јеховаскири помош те шај понадари да ревно те проповедина, чак кеда ка противинен пе аменге (Отк. 12:17). Соске шај те ове сигурно кај о Јехова ка поддржинел тут? Размислин баши е Исусескири молитва која сој пишими ко Јован 17 поглавје. О Исус родинѓа таро Јехова те аракхел е апостолен, а о Јехова одговоринѓа ки акаја молитва. Ко лил Апостолија керела пе лафи башо адава сар о Јехова поможинѓа е апостоленге ревно те проповединен иако сине лен прогонство. Исто аѓаар, о Исус молинѓа е Јехова те аракхел хем околен кола со ка сикавен сине вера ко хабери кова со о апостолија проповединена ле сине. Ту да сиан јекх лендар. О Јехова на чхинавѓа те одговоринел ки е Исусескири молитва. Ов ка поможинел туке да исто сар со поможинѓа е апостоленге (Јован 17:11, 15, 20).

14. Котар џанаја кај шај те ачхова ревна ки служба? (Дикх хем и слика.)

¹⁴ Сар со авела о крајо попаше, шај те овел са попхаро те проповедина о шукар хабери. Ама, о Исус уверинела амен кај ка добина и помош со ваљани аменге те шај понадари да ревно те кера акаја задача (Лука 21:12-15). Исто сар о Исус хем лескере ученикија амен мукхаја о мануша коркори те одлучинен дали ка шунен амен хем на распрајнаја амен ленцар. Чак кеда амаре активностија тане ограничиме, о пхраља хем о пхења понадари да вакерена о шукар хабери соске иси лен доверба ко Јехова, а на ки пли сила. Исто сар со дела сине сила пле слугенге ко прво веко, о Јехова дела сила аменге да авдиве те шај „целосно те проповединел пе о шукар хабери“ са џикоте ов на вакерела кај адава тано завршимо (2. Тим. 4:17). Шај те ове сигурно, кај ако иси тут доверба ко Јехова, ка шај понадари да ревно те проповедине.

АЧХИЛО ПОЗИТИВНО

15. Со сикавела кај о Исус дикхела сине позитивно ки служба?

¹⁵ О Исус на нашавѓа пло позитивно стави баши проповедничко активност, сине уверимо кај ка овен мануша со ка шунен о шукар хабери. Адава поможинѓа леске понадари да радосно хем спремно те проповединел. На пример, ко крајо таро 30 берш тари а.е., о Исус дикхља кај бут џене тане спремна те шунен о шукар хабери хем спорединѓа лен ниваја која сој зрело баши жетва (Јован 4:35). Отприлика, јекх берш покасно ов вакерѓа пле учениконге: „И жетва ки нива тани бари“ (Мат. 9:37, 38). Хем покасно, ов палем вакерѓа: „И жетва ки нива тани бари... Молинен е Господаре е нивакоро те бичхалел работникија те кхедел пе и жетва“ (Лука 10:2). О Исус сине уверимо кај ка овен мануша кола со ка манген те шунен о шукар хабери хем радујнела пе сине кеда дикхела сине адава (Лука 10:21).

16. Саво позитивно стави баши служба шај те дикха ко споредбе со вакерѓа лен о Исус? (Лука 13:18-21; дикх хем и слика).

¹⁶ О Исус поможинѓа пле учениконге те ачховен ревна аѓаар со сикавѓа лен кај о хабери со проповединена анела баре резултатија. На пример, те дикха дуј споредбе кола со вакерѓа лен. (Читин Лука 13:18-21.) Ки јекх лендар, о Исус спорединѓа о хабери башо Царство јекхе тикне зрноја таро синап кова со уло јекх баро каш. Адава значинела сине кај бут мануша ка прифатинен о шукар хабери хем кај ништо нашти сине те чхинавел те случинел пе адава. Ки дујто споредба, ов спорединѓа о хабери башо Царство квасацоја. Адалеа сикавѓа кај о хабери башо Царство ка ширинел пе сегде хем кај ка керел промене ко мануша кола со нане одма те дикхјон. Аѓаар, о Исус поможинѓа е учениконге те дикхен кај о хабери со проповединена ле ка поможинел буте џененге.

17. Кола причине иси амен те шај те на нашава амаро позитивно стави баши служба?

¹⁷ Кеда размислинаја башо адава сар и проповедничко активност поможинела буте манушенге ко цело свето, поттикниме сием понадари да ревно те проповедина. Секова берш, милиоња мануша со интересинена пе присуствујнена ки Спомен-свеченост хем почминена те проучинен и Библија. Бут џене крстинена пе хем почминена заедно аменцар те проповединен. Амен на џанаја панда кобор мануша ка прифатинен о шукар хабери, ама џанаја кај о Јехова кхедела јекх баро мноштво кова со ка преживинел и бари неволја со ка авел панда хари (Отк. 7:9, 14). О Јехова тано о Господари е жетвакоро хем ов тано сигурно кај панда бут мануша ка прифатинен о шукар хабери. Адалеске, иси амен шукар причина понадари да те проповедина.

18. Со мангаја о јавера те приметинен ки аменде?

¹⁸ О чачутне ученикија е Исусескере секогаш ревно проповединена сине о шукар хабери. Кеда о мануша дикхле кобор о апостолија сине храбра хем воодушевиме џикоте проповединена сине, ола халиле кај ола сине е Исусеа (Апо. 4:13). Амен да мангаја те ова храбра хем воодушевиме џикоте проповединаја о шукар хабери хем аѓаар о мануша ка шај те приметинен кај амен да џаја пало пример е Исусескоро.