Аменге тано шукар те ова са попаше е Девлеа

1-2. а) Со ваљани те шај те ова паше амала некасаја? б) Со ка дикха ки акаја статија?

ДАЛИ иси тут паше амал? Сар улен амала? Веројатно накхљан време леа. Дознајнѓан саве искуствија сине ле ко живото, исто аѓаар дознајнѓан со мангела а со на мангела. Халиљан кај иси ле бут шуже особине кола со ту да би мангеа те овен тут. Аѓаар ту замангљан тле амале.

² Те шај те ове некасаја паше амал ваљани време хем трудо. О иста буќа ваљанена те шај некој те овел паше амал е Јеховаја, е Девлеа. Ки акаја статија ка дикха сар шај те ова панда попаше е Девлеа хем сар адава ка користинел аменге. Прво, те дикха соске тано шукар те ова паше амаре најшукар амалеа, е Јеховаја.

3. Соске ваљани хор те размислина сар ка користинел аменге адава со ка ова попаше е Јеховаја? Вакер пример.

³ Сигурно, ка сложине тут кај тано шукар те ова са попаше е Јеховаја. Ама адава со хор ка размислина кобор тано шукар адава ка поттикнинел амен понадари да те ова леа са попаше (Пс. 63:6-8). На пример, џанаја кај амаре шукарипаске тано те ха здраво храна, физичко те ова активна, доволно те одморина амен хем те пија доволно пани. Сепак, бут џене на размислинена бут башо акала буќа хем на грижинена пе пле састипаске. Ама, кобор повише размислинаја башо адава сар акала шукар навике користинена аменге добором поверојатно тано кај ка кера лен понадари да. Слично, амен шај џанаја кај амаре шукарипаске тано те ова попаше е Јеховаја, ама ако хор размислинаја сар ка користинел аменге адава шај те ова поттикниме понадари да те ова попаше леа (Пс. 119:27-30).

4. Со вакерѓа о псалмисти ко Псалм 73:28?

⁴ Читин Псалм 73:28. О писатели таро 73 Псалм сине левити кова со служинела сине сар музичари ко е Јеховаскоро храми. Ов веројатно верно служинела сине е Јеховаске више несаво време. Сепак, џанља кај тано важно те на бистрел кај лескере шукарипаске тано те овел паше узо Девел, а мангља хем е јаверен те сетинкерел ко адава. Соске тано важно пошукар те запознајна е Јехова хем те кера позорало амаро амалипе леа?

АКО СИЕМ ПАШЕ Е ЈЕХОВАЈА АДАВА КА АНЕЛ АМЕНГЕ РАДОСТ

5. а) Соске адава со ка ова попаше е Јеховаја ка анел аменге радост? б) Спрема Изреки 2:6-16, вакер конкретна примерија башо адава сар е Јеховаскири мудрост шај те аракхел тут хем те поможинел туке.

⁵ Кобор попаше оваја е Јеховаја, добором посреќна ка ова (Пс. 65:4). Иси амен бут причине те ова радосна. На пример, користинела аменге адава со применинаја о мудра советија таро лескоро Лафи, и Библија. Ола аракхена амен таро штетна влијанија хем поможинена амен те на кера сериозна грешке. (Читин Изреки 2:6-16.) Адалеске и Библија вакерела: „Среќно тано о мануш со ка аракхел мудрост, хем о мануш со ка овел разборито“ (Изр. 3:13).

6. Со анѓа џи ко адава о псалмисти те нашавел пли радост?

⁶ Џанѓола пе, чак окола сој амала е Јеховаја понекогаш осетинена пе тажно. О писатели таро 73 Псалм, нашавѓа пли радост адалеске со почминѓа негативно те размислинел. Ов почминѓа те нервиринел пе хем те овел љубоморно е лошна манушенге колен со на хала сине гајле башо Девел или башо лескере мерилија соске дикхјола сине леске кај џала ленге са шукар ко живото. Ов погрешно халило кај окола сој насилна хем горда секогаш тане побарвале, посасте хем чак кај нане лен нисаве секирацие (Пс. 73:3-7, 12). Е псалмисте добором бут мучинела ле сине акаја мисла со ко јекх моменти пучела пе сине дали чаче врединела адава со трудинела пе ки служба башо Јехова. Ов сине бут тажно хем вакерѓа: „Чаче, џабе со трудинѓум ман мо вило те ачховел чисто хем со тховѓум ме васта те сикавав кај на сиум криво“ (Пс. 73:13).

7. Со шај те кера кеда сием тажна? (Дикх хем и слика .)

⁷ О псалмисти на мукхља и туга те кочинкерел ле. Ов керѓа нешто. Ов гело ко „баро светилиште е Девлескоро“, коте со о Јехова поможинѓа леске палем исправно те размислинел (Пс. 73:17-19). О Јехова амаро амал, приметинела кеда сием тажна. Ако молинаја ле башо водство хем ако прифатинаја и помош која со дела амен преку пло Лафи хем преку о собрание ка добина сила која со ка поможинел аменге понадари да те служина леске чак кеда сием тажна. Чак кеда иси амен бут проблемија хем на џанаја со те кера, о Јехова ка утешинел амен хем ка смиринел амен (Пс. 94:19).a

АКО СИЕМ ПАШЕ Е ДЕВЛЕА АДАВА КА ДЕЛ АМЕН СМИСЛА КО ЖИВОТО ХЕМ НАДЕЖ

8. Сар адава со ка ова паше е Девлеа тано башо амаро шукарипе ко јавера дуј важна начинија?

⁸ Адава со ка ова попаше е Девлеа тано башо амаро шукарипе хем ко јавера да дуј важна начинија. Прво, дела амен чачутни смисла ко живото. Хем дујто, дела амен сигурно надеж баши иднина (Ерем. 29:11). Те дикха акала дуј буќа подетално.

9. Сар адава со оваја попаше е Јеховаја дела амен смисла ко живото?

⁹ Адава со оваја попаше е Јеховаја дела амен смисла ко живото. Бут џене авдиве, кола со мислинена кај о Девел на постојнела, мислинена кај е живото нане ле смисла хем кај јекх диве нане више те постојнен о мануша. Ама, адалеске со проучинаја и Библија, уверинѓем амен кај о Девел „постојнела хем кај наградинела околен со родена ле ревно“ (Евр. 11:6). Панда авдиве, амен иси амен шукар живото соске кераја адава башо со сием створиме — те служина амаре Дадеске сој ко небо, е Јеховаске (5. Мој. 10:12, 13).

10. Со откринела аменге о Псалм 37:29 баши иднина околенгири со надинена пе ко Јехова?

¹⁰ Буте манушен авдиве нане лен чачутни надеж баши иднина. Ленгири надеж тани само адава со шај те дикхел пе авдиве ко живото — керена бути, женинена пе, овена лен чхаве хем кхедена паре пхурипаске. Ама ко ленгоро живото нане вклучимо о Девел хем адалеске на џанена со ветинѓа баши иднина. Тари јавер страна, е Јеховаскере слуген иси лен надеж која со денѓа лен о Девел (Пс. 25:3-5; 1. Тим. 6:17). Амен иси амен доверба ко Девел, колеа со улем паше, хем иси амен доверба ко ветувања кола со денѓа лен аменге. Машкар о јавера буќа, ки амари надеж исто аѓаар тано вклучимо те служина леске засекогаш ко рај. (Читин Псалм 37:29.)

11. Сар адава со оваја попаше е Девлеа влијајнела упри аменде хем сар влијајнела упри лесте?

¹¹ Адава со оваја попаше е Девлеа тано башо амаро шукарипе ко бут јавера да начинија. На пример, о Јехова ветинѓа кај ка простинел о гревија околенгере сој леа паше ако каинена пе (Иса. 1:18). Хем адалеске на ваљани понадари да те мучинел амен амари совест башо гревија со керѓем лен англедер (Пс. 32:1-5). Исто аѓаар, среќна сием кеда џанаја кај радујнаја е Јехова (Изр. 23:15). Сигурно ка сетине тут ко бут јавера да благословија кола со иси амен адалеске со сием паше амала е Девлеа. Ама сар шај понадари да те ове панда попаше е Девлеа?

САР ПОНАДАРИ ДА ТЕ ОВА ПАНДА ПОПАШЕ Е ДЕВЛЕА

12. Со керѓан те шај те ове попаше е Девлеа?

¹² Ако сиан крстимо, сигурно више керѓан бут буќа те шај те ове паше е Јеховаја. Дознајнѓан бут чачипа башо Јехова хем башо Исус Христос. Каинѓан тут башо тле гревија со керѓан лен англедер хем сикавѓан кај иси тут зорали вера ко Девел хем трудинѓан тут те постапине аѓаар сар ов со мангела. Ама те шај те ова панда попаше е Девлеа, мора понадари да те кера акала буќа (Кол. 2:6).

13. Кола трин буќа шај те поможинен аменге те ова попаше е Јеховаја?

¹³ Со ка поможинел аменге понадари да те ова са попаше е Јеховаја? 1) Ваљани понадари да те читина хем те проучина и Библија. Џикоте кераја адава, амари цел на ваљани те овел само те сикљова о основна буќа башо Девел. Наместо адава, ваљани те трудина амен те дознајна која тани е Девлескири волја баши аменде хем те мукха о библиска начелија те водинен амен ко живото (Еф. 5:15-17). 2) Ваљани те кера позорали амари вера аѓаар со ка размислина башо бут доказија башо е Девлескоро мангипе спрема аменде. 3) Мора понадари да те мрзина о буќа кола со вреџинена е Јехова хем те на дружина амен манушенцар кола со керена асавке буќа (Пс. 1:1; 101:3).

14. Спрема адава сој пишимо ко 1. Коринќања 10:31, кола тане несаве буќа со шај те кера лен секова диве те шај те кера е Јеховаскири волја? (Дикх хем о слике.)

¹⁴ Читин 1. Коринќања 10:31. Бут тано важно те кера адава со џанаја кај ка радујнкерел е Јехова. Ко адава тано вклучимо повише него само те џа ки служба или ко состанокија. Са адава со кераја секова диве ко амаро живото ваљани те радујнкерел е Јехова. На пример, кеда сием чесна ко са хем кеда делинаја е јаверенцар адава со иси амен адалеа радујнаја е Јехова (2. Кор. 8:21; 9:7). Исто аѓаар, ов мангела те сикава кај бут ценинаја о живото сар поклон. Амен оваја попаше околеа со дела о живото аѓаар со пазинаја кобор хаја хем пијаја хем аѓаар со кераја бут јавера буќа кола со поможинена амен те ачхова састе. Секоја бути со кераја ла те шај те кера е Јеховаскири волја, чак ко буќа со дикхјона кај тане тикне, ка керен амен попаше леа (Лука 16:10).

15. Сар очекујнела о Јехова те постапина е јаверенцар?

¹⁵ О Јехова сикавела шукарипе хем околенге сој праведна хем околенге со нане праведна (Мат. 5:45). Ов очекујнела амендар да те ова шукар спрема о јавера. На пример, ко Тит 3:2 пишимо тано акава совет: „Те на керен лошно лафи никастар, те на овен кавгаџие... хем секогаш нека овен кротка са е манушенцар“. Спрема акава, амен на дикхаја е јаверен сар потеле амендар само адалеске со на верујнена ко Јехова (2. Тим. 2:23-25). Оваја попаше е Јеховаја аѓаар со секогаш постапинаја љубезно хем обѕирно сариненцар.

ШАЈ ТЕ ОВА ПОПАШЕ Е ЈЕХОВАЈА ЧАК АКО ГРЕШИНЃЕМ

16. Сар осетинела пе сине о писатели таро 73 Псалм?

¹⁶ Понекогаш шај ка мислине кај на заслужинеа е Јеховаскоро мангипе. Сар со дикхлем аѓаар осетинѓа пе хем о писатели таро 73 Псалм. Ов вакерѓа: „А мле пре харичкаске ка циден пе сине таро право друмо, харичкаске ка лизгав сине“ (Пс. 73:2). Ов коркори признајнѓа е Јеховаске: „Ко мло вило сине ќеркипе... на сиум сине разумно... англо тле јакхја сиум сине сар животно бизи годи“ (Пс. 73:21, 22). Дали мислинѓа кај башо пле слабостија ов на врединела више ништоске хем кај на заслужинела сине е Јеховаскоро мангипе?

17. а) Со најверојатно керѓа о псалмисти чак кеда сине леске најлошно? б) Со шај те сикљова таро лескоро искуство? (Дикх хем о слике.)

¹⁷ Ако о псалмисти осетинела пе сине отфрлимо таро Јехова, сигурно адала чувствија сине моментална. Чак кеда сине леске најлошно, ов халило кај ваљани те овел паше е Девлеа, баш сар со дикхјола пе таро лескере лафија: „Ама ме сиум секогаш туја [Јехова], ту астарѓан ман таро мло десно вас. Ка водине ман тле советеа хем пало адава ка ане ман џи ки слава“ (Пс. 73:23, 24). Кеда осетинаја амен духовно слаба или обесхрабриме, амен да ваљани те рода помош таро Јехова кова сој стабилно хем цврсто сар карпа (Пс. 73:26; 94:18). Чак хем ако керѓем сериозна грешке, шај те ирана амен ко Јехова хем те ова увериме кај ов тано спремно те простинел аменге (Пс. 86:5). Посебно кеда аменге најлошно, ваљани те ачхова попаше амаре Девлеа (Пс. 103:13, 14).

ОВ СА ПОПАШЕ Е ДЕВЛЕА КИ ЦЕЛИ ВЕЧНОСТ

18. Соске на постојнела граница башо адава кобор паше шај те ова е Јеховаја?

¹⁸ На постојнела граница башо адава кобор шај те ова паше е Јеховаја хем кобор шукар шај те запознајна ле. И Библија вакерела кај е Јеховаскере друмија, лескири мудрост хем лескоро џандипе нашти те хаљовен пе (Рим. 11:33).

19. Ко со уверинена амен о Псалмија?

¹⁹ Ко Псалм 79:13 пишинела: „Амен, тло народо хем о стадо тари тли ливада, ка благодарина туке засекогаш, тари генерација ки генерација ка вакера баши тли слава“. Сар со овеа попаше е Девлеа, ту да шај те ове сигурно кај ка овен тут благословија ки цели вечност хем уверимо те вакере: „О Девел тано и карпа мле вилескири хем ов тано са со иси ман ки цели вечност“ (Пс. 73:26).