Аџикер и диз со ка ачхол

1. Со пророкујнѓа о Исус кај ка случинел пе е Ерусалимеа?

АНГЛЕДЕР те мерел, о Исус денѓа јекх пророштво пле следбениконге. Адава пророштво прво пути исполнинѓа пе кеда о Ерусалим хем о храми сине уништиме. Ов предупрединѓа кај о Ерусалим јекх диве ка овел „опколимо таро војникија“ (Лука 21:20). О Исус вакерѓа пле следбениконге само со ка дикхен адале војникон — башо кола со покасно иклило кај тани и римско војска — одма те нашен тари Јудеја (Лука 21:21, 22).

2. Саво совет денѓа о апостол Павле е еврејска христијаненге кола со живинена сине ки Јудеја хем ко Ерусалим?

² Само некобор берша англедер и римско војска те опколинел о Ерусалим, о апостол Павле пишинѓа писмо колесте со сине важно порака, а кова со авдиве тано пенџардо сар о писмо џи ко Евреија. Ко адава писмо о Павле денѓа совет е христијаненге ки Јудеја хем ко Ерусалим кова со ка поможинел лен сине те спреминен пе башо адава со ваљани те случинел пе. А со точно ваљани сине те случинел пе? О Ерусалим ка овел сине уништимо. Ако адала христијања мангена сине те преживинен ваљани сине те овен спремна те мукхен пумаре кхера хем пумари бути. Адалеске, башо Ерусалим о Павле пишинѓа: „Акате амен нане амен и диз со ка ачхол засекогаш“. Пало адава пишинѓа: „Него едвај аџикераја и диз со ваљани те авел“ (Евр. 13:14).

3. Сој тани „и диз со иси ла чачутне темелија“ хем соске ваљани те аџикера ла?

³ Е христијаненге, кола со одлучинѓе те нашен таро Ерусалим хем тари Јудеја, бут мануша вакерена сине кај тане глупава хем асана ленге сине, ама адаја одлука спасинѓа ленгоро живото. Авдиве аменге да асана адалеске со на сикаваја доверба ко манушикано водство сар решение башо амаре проблемија, а ни на родаја те овел амен сигурно хем удобно живото ко акава свето. Тегани, соске анаја асавки одлука? Џанаја кај акава свето тано привремено. Амен аџикераја „и диз со иси ла чачутне темелија“, јавере лафенцар адава со ка авел, е Девлескоро Царствоa (Евр. 11:10; Мат. 6:33). Ко секова поднаслов тари акаја статија ка дикха: 1) сар о совет е Павлескоро поможинѓа е христијаненге таро прво веко понадари да те аџикерен „и диз со ваљани те авел“, 2) сар о Павле спреминѓа лен башо адава со ваљани сине те случинел пе хем 3) сар лескоро совет поможинела аменге да авдиве.

НЕКА ОВЕЛ ТУТ ДОВЕРБА КО ОКОВА СО НИКОГАШ НАНЕ ТЕ МУКХЕЛ ТУТ

4. Соске о Ерусалим сине важно е христијаненге?

⁴ О Ерусалим сине важно е христијаненге. Ко 33 берш тари а.е., адатхе сине кердо о христијанско собрание хем о водечко тело сине ки адаја диз. Освен адава, ки адаја диз буте христијанен сине лен пло кхер хем кхединѓе песке материјална буќа. Сепак, о Исус предупрединѓа пле следбеникон кај ваљани те нашен таро Ерусалим, па чак хем тари Јудеја (Мат. 24:16).

5. Сар о Павле спреминѓа е христијанен башо адава со ваљани сине те случинел пе е Ерусалимеа?

⁵ Те шај те спреминел е христијанен башо адава со ка овел, о Павле поможинѓа ленге те концентриринен пе ко адава сар о Јехова дикхела ки диз Ерусалим. Ов сетинкерѓа лен кај англо е Јеховаскере јакхја о храми, о свештенство хем о жртве кола со дена лен сине ко Ерусалим повише на сине света (Евр. 8:13). Побаро дело таро мануша со живинена сине адатхе отфрлинѓе е Месија. О храми ко Ерусалим више на сине о главно тхан башо чисто обожавибе е Јехова хем ка овел сине уништимо (Лука 13:34, 35).

6. Соске е Павлескере лафија таро Евреија 13:5, 6 сине вакерде е христијаненге баш ко време?

⁶ Кеда о Павле пишинѓа е Евреенге о Ерусалим сине диз со напредујнела сине. Јекх римско писатели таро адава време вакерѓа кај о Ерусалим тани и „најпенџарди диз ко Исток“. О Евреија таро бут пхувја секова берш џана сине адари те шај те славинен о празникија, а адава керела сине и диз те напредујнел ко економско поглед. Сигурно несаве христијања ко асавке условија заработинена сине бут паре. Шај адалеске да о Павле вакерѓа: „Ко тумаро живото те на овел тумен мангипе спрема о паре, него овен задоволна адалеа со иси тумен“. Пало адава, цитиринѓа таро Списија нешто колеа со о Јехова уверинела пле слуген: „Никогаш нане те мукхав тут хем никогаш нане те иранав туке мо думо“. (Читин Евреија 13:5, 6; 5. Мој. 31:6; Пс. 118:6.) О христијања со живинена сине ко Ерусалим хем ки Јудеја ваљани сине те шунен акала лафија. Соске? Адалеске со кратко откеда ка добинен сине акава писмо, ола ка ваљани сине те мукхен пумаро кхер, пумари бути хем побаро дело таро адава со сине лен ко материјално поглед. Пало адава, ка ваљани сине те почминен нево живото ко јавер тхан, а адава нане сине те овел локхо.

7. Соске ваљани те бајрара амари доверба ко Јехова панда акана?

⁷ Поука: Со аџикерела амен? О уништибе акале светоскоро ки бари неволја (Мат. 24:21). Сар о христијања таро прво веко амен да мора те ова џангавде хем спремна (Лука 21:34-36). Џикоте трајнела и бари неволја шај ка ваљани те мукха нешто или са со иси амен хем те овел амен доверба кај о Јехова никогаш нане те мукхел пле народо. Панда акана, англедер те почминел и бари неволја, иси амен прилике те сикава ко со иси амен доверба. Пуч тут: „Дали адава со керава хем саве целија иси ман сикавела кај иси ман доверба, на ко барвалипе него ко Девел кова со ветинела кај ка грижинел пе манге?“ (1. Тим. 6:17). Нормално, иако шај те сикљова таро адава со случинѓа пе ко прво веко, ама и бари неволја ка овел нешто со никогаш на случинѓа пе. Тегани сар ка џана со точно те кера кеда ка почминел адаја неволја?

ОВ ПОСЛУШНО ОКОЛЕНГЕ СО ПРЕДВОДИНЕНА

8. Саве упатствија денѓа о Исус пле учениконге?

⁸ Некобор берш откеда о Евреија добинѓе о писмо таро Павле, о христијања дикхле кај и римско војска опколинѓа и диз Ерусалим. Адава сине знако кај ваљани те нашен соске о Ерусалим ка овел уништимо (Мат. 24:3; Лука 21:20, 24). Ама кај ваљани сине те нашен? О Исус само вакерѓа: „Окола со ка овен ки Јудеја нека нашен ко планине!“ (Лука 21:21). Ки адаја област сине бут планине. Тегани, сар џанле ко саве планине те џан?

9. Соске шај о христијања пучена пе сине ко кола планине те нашен? (Дикх хем и карта.)

⁹ Размислин ко кола планине о христијања шај сине те нашен: ко планине ки Самарија, ко планине ки Галилеја, ки планина Хермон, ко планине ко Ливан хем ко планине тари јавер страна тари река Јордан. (Дикх и карта.) Несаве дизја ко адала планинска тхана шај дикхјона сине кај тане бут безбедна живибаске. На пример, и диз Гамла аракхљола сине ки јекх стрмно планина хем сине пхаро те ресел пе џи лате. Несаве Евреија мислинена сине кај акаја диз тани најбезбедно. Ама о Римјања нападинѓе хем уништинѓе адаја диз хем бут мануша со живинена сине адатхе сине мударде.b

10-11. а) Сар о Јехова веројатно водинѓа е христијанен? (Евреија 13:7, 17). б) Сар користинѓа е христијаненге адава со сине послушна околенге со предводинена сине? (Дикх хем и слика.)

¹⁰ Веројатно о Јехова водинѓа е христијанен преку окола со предводинена сине ко собрание. О историчари Евзебиј покасно пишинѓа: „Е христијаненге таро собрание ко Ерусалим о Девел преку несаве мурша откринѓа кај ваљани те нашен таро Ерусалим англедер и војна хем те џан те живинен ки јекх диз ки Переја, која со викинела пе Пела“. И диз Пела сине шукар тхан коте со шај сине о христијања те џан. На сине дур таро Ерусалим хем локхе шај сине те ресел пе џи лате. Повише мануша ки Пела на сине Евреија хем адалеске ки адаја диз на влијајнела сине о проблеми со сине машкар о Римјања хем о Евреија. (Дикх и карта.)

¹¹ О христијања кола со нашле ко планине, применинѓе о совет е Павлескоро те овен послушна околенге со предводинена ко собрание. (Читин Евреија 13:7, 17.) Адалеске со сине послушна, спасинѓе пумаро живото. Ола аџикерѓе „и диз со иси ла чачутне темелија“, е Девлескоро Царство, хем адалеске о Јехова на мукхља лен (Евр. 11:10).

12-13. Сар о Јехова водинѓа пле народо ко пхаре времија?

¹² Поука: О Јехова користинела околен со предводинена те шај те водинел пле народо ко конкретно начин. Ки Библија иси бут примерија кола со сикавена кај о Јехова чхивѓа пастирија те шај те водинел пле народо ко пхаре времија (5. Мој. 31:23; Пс. 77:20). Амен да авдиве јасно дикхаја кај о Јехова понадари да користинела околен со предводинена.

¹³ На пример, кеда почминѓа и пандемија КОВИД-19, окола со предводинена денѓе водство е собраниенге. О старешине добинѓе упатствија сар те грижинен пе башо духовна потребе е пхраленгере хем е пхењенгере. Кратко откеда почминѓа и пандемија, икерѓем историско конгрес ко повише таро 500 чхибја преку интернет, телевизија хем радио. На чхинавѓем те добина духовно храна. Адава поможинѓа те ачхова ко јекхипе. Шај те ова увериме кај бизи разлика саве неволје ка овен амен ки иднина, о Јехова понадари да ка поможинел околен со предводинена те анен мудра одлуке. Освен и доверба ко Јехова хем и послушност ко лескере заповедија, кола јавера особине ка поможинен амен те спремина амен баши бари неволја хем те постапина мудро џикоте трајнела адава бут пхаро периоди?

СИКАВ ПХРАЛИКАНО МАНГИПЕ ХЕМ ГОСТОПРИМСТВО

14. Спрема Евреија 13:1-3, кола особине ваљани сине те сикавен о христијања англедер те овел уништимо о Ерусалим?

¹⁴ Кеда ка почминел и бари неволја ка ваљани те сикава мангипе јекх јекхеске сар никогаш англедер. Ко адава време, ка ваљани те џа пало е христијаненгоро пример кола со живинѓе ко Ерусалим хем ки Јудеја. Ола секогаш сикавена сине мангипе јекх јекхеске (Евр. 10:32-34). Ама ко последна некобор берша, англедер о Ерусалим те овел уништимо, о христијања ваљани сине панда повише те сикавен пхраликано мангипе хем гостопримство.c (Читин Евреија 13:1-3.) О исто ка важинел аменге да џикоте ка трајнел и бари неволја.

15. Соске о христијања ваљанѓе те сикавен пхраликано мангипе хем гостопримство откеда нашле?

¹⁵ Кеда и римско војска опколинѓа о Ерусалим хем пало адава таро јекх пути цидинѓа пе, о христијања нашле хем леле пеа хари буќа (Мат. 24:17, 18). Ваљани сине те поможинен јекх јекхеске џикоте џана сине ко планине хем џикоте навикнинена пе сине ко нево тхан. Повише пхраленге хем пхењенге ваљанѓа хајбе, шеја хем тхан живибаске, а адава денѓа прилика е христијаненге те сикавен искрено пхраликано мангипе хем гостопримство аѓаар со ка поддржинен пе јекх јекхеа хем ка делинен адава со сине лен (Тит 3:14).

16. Сар шај те сикава мангипе спрема о пхраља хем пхења коленге со ваљани амари помош? (Дикх хем и слика.)

¹⁶ Поука: О мангипе поттикнинела амен те поможина амаре пхраленге хем пхењенге кеда адава ваљани. Бут пхраља хем пхења сине спремна те грижинен пе башо духовна хем материјална потребе пле пхраленгере кола со нашле башо војне или природна катастрофе. Јекх пхен тари Украина која со мукхља пло кхер баши војна, вакерѓа: „Осетинѓем е Јеховаскоро вас сар водинела амен хем поможинела аменге преку амаре пхраља. Ола бут шукар доџакерѓе амен хем поможинѓе амен ки Украина, ки Унгарија, а акана хем акате ки Германија“. Окола со сикавена гостопримство спрема о пхраља хем о пхења хем грижинена пе башо ленгере потребе тане алатке ко е Јеховаскере васта (Изр. 19:17; 2. Кор. 1:3, 4).

17. Соске тано важно панда акана те сикљова те сикава пхраликано мангипе хем гостопримство?

¹⁷ Сигурно ки иднина ка ваљани бут повише те поможина јекх јекхеске него со кераја акана (Авак. 3:16-18). О Јехова панда акана обучинела амен те сикљова те сикава пхраликано мангипе хем гостопримство, особине кола со бут ка ваљанен аменге ко адава време.

СО АЏИКЕРЕЛА АМЕН

18. Сар шај те џа пало е христијаненгоро пример таро прво веко?

¹⁸ Сар со сикавела и историја, о христијања кола со нашле ко планине успејнѓе те спасинен пе кеда о Ерусалим сине уништимо. Ола мукхле и диз, ама о Јехова никогаш на мукхља лен. Со шај те сикљова таро ленгоро пример? На џанаја точно со са ка случинел пе ки иднина. Ама, о Исус предупрединѓа амен те ова спремна (Лука 12:40). Исто аѓаар, о Павле денѓа совет ко писмо со пишинѓа ле џи ко Евреија. Адава совет важинела хем башо амаро време сар со важинела сине ко прво веко. Исто аѓаар, о Јехова уверинела аменде да кај никогаш нане те мукхел амен хем никогаш нане те иранел аменге пло думо (Евр. 13:5, 6). Адалеске, понадари да едвај те аџикера и диз со ка ачхол — е Девлескоро Царство — хем те уживина ко благословија кола со ка анел лен ов (Мат. 25:34).