Дали сиклиљан те ове задоволно ко са?

1. Со значинела, а со на значинела те ова задоволна ко са?

ДАЛИ сиан задоволно адалеа со иси тут? Некој сој задоволно тано радосно хем иси ле андруно мир адалеске со концентриринела пе ко благословија со иси ле акана. Ов на кхедела холи адалеске со нане ле адава со мангела. Ама, те ова задоволна на значинела кај на ваљани више те менина амен. На пример, нане погрешно те манга те кера повише ки служба башо Јехова (Рим. 12:1; 1. Тим. 3:1). Ама ако сием задоволна, чак хем те на добина несави задача со мангаја ла, тегани кеда амен мангаја, нане те нашава амари радост.

2. Соске тано опасно мануш те на овел задоволно адалеа со иси ле?

² Опасно тано ако мануш нане задоволно адалеа со иси ле. На пример, некој шај те почминел те керел повише бути те шај те кинел материјална буќа кола со уствари ни на ваљанена леске. Жално тано со несаве христијања чак чорѓе паре хем јавера буќа кола со мангле лен. Шај оправдинена пе сине е лафенцар: „Ме заслужинава акава“. „Па џи кеда ка аџикерав?“ Или: „Ка иранав о паре“. Ама, о чорибе тано чорибе хем анела лаџ хем дукх е Јеховаске (Изр. 30:9). Јавера палем, добором бут разочаринѓе пе со на добинѓе несави задача ки организација со чхинавѓе скроз те служинен е Јеховаске (Гал. 6:9). Сар шај јекх слуга е Јеховаскоро чак те мислинел те керел асавко нешто? О проблеми шај тано ко адава со више нане задоволно адалеа со иси ле.

3. Ко со уверинена амен о лафија таро Филипјања 4:11, 12?

³ Шај те сикљова те ова задоволна адалеа со иси амен. О апостол Павле пишинѓа кај сиклило те овел „задоволно ки било која ситуација“. (Читин Филипјања 4:11, 12.) Акала лафија пишинѓа лен џикоте сине ко затвор. Ама, адава на керѓа те нашавел пли радост. Сиклило сар те овел задоволно ко са. Ако аменге пхаро те ова задоволна, о лафија хем о искуство е Павлескоро шај те поможинен амен те ова задоволна ко било саве околностија. Ама, адава нане баш локхо. Адалеске, мора те сикљова те ова задоволна. Сар? Акана ка дикха несаве особине кола со ка поможинен амен те ова задоволна ко са.

ТЕ ОВА БЛАГОДАРНА

4. Сар адава со сием благодарна поможинела амен те ова задоволна адалеа со иси амен? (1. Солунјања 5:18).

⁴ Ако сием благодарна, ка ова задоволна адалеа со иси амен. (Читин 1. Солунјања 5:18.) На пример, ако сием чаче благодарна башо основна буќа со иси амен ко живото, нане цело време те размислина башо буќа со мангаја лен, а нане амен. А ако ценинаја о задаче со иси амен ки служба башо Јехова, ка трудина амен те кера лен најшукар со шај наместо цело време те размислина ко неве задаче со мангаја лен. Дикхаја кобор тано важно те ова благодарна, адалеске да ки Библија сием поттикниме те благодарина амен е Јеховаске ко амаре молитве. Ако сием благодарна, ка овел амен „о мир таро Девел, кова сој упредер таро адава со шај о мануш те хаљол“ (Фил. 4:6, 7).

5. Башо кола буќа ваљани сине те овен благодарна о Израелција? (Дикх хем и слика.)

⁵ Те дикха со случинѓа пе е Израелцонцар. Повише пути жалинѓе пе е Јеховаске адалеске со фалинела ленге сине о хајбе со сине лен ко Египет (4. Мој. 11:4-6). Точно, о живото ки пустина на сине ленге локхо. Ама, со шај сине те поможинел лен те овен задоволна адалеа со иси лен? Ваљани сине те овен благодарна хем те размислинен башо са адава со о Јехова више керѓа ленге. Ко Египет, коте со сине бут мучиме сар робија, о Јехова мукхља деш неволје упро Египќања. Откеда о Израелција сине ослободиме, таро Египќања добинѓе сребро, злато хем шеја (2. Мој. 12:35, 36). Кеда о Египќања геле пали ленде са џи ко Црвено Море, о Јехова чудоја одвојнѓа о море. А џикоте патујнена сине ки пустина, секова диве дела лен сине мана. Тегани, со сине о проблеми? О Израелција на сине задоволна адалеа, на адалеске со на сине лен со те хан, него адалеске со на сине благодарна башо адава со иси лен.

6. Со ка поможинел амен те ова благодарна?

⁶ Тегани, со ка поможинел тут те ове благодарно? Прво, секова диве одвојн туке време те размислине башо шуже буќа со иси тут. Шукар ка овел чак те пишине туке дуј или трин буќа коленге со сиан благодарно (Плач 3:22, 23). Дујто, сикав благодарност. Вакер е јаверенге кај сиан благодарно башо адава со керена туке. Ама најважно таро са, редовно благодарин тут е Јеховаске (Пс. 75:1). Трито, бирин те ове паше амал манушенцар сој тане благодарна. И благодарност тани заразно исто сар сој и неблагодарност (5. Мој. 1:26-28; 2. Тим. 3:1, 2, 5). Кеда сием концентририме ко адава те сикава благодарност, нане те размислина само ко адава со нане амен.

7. Со поможинѓа е пхењаке Ачи те овел благодарно, хем саво сине о резултати?

⁷ Те дикха со случинѓа пе е пхењаке Ачи, која со живинела ки Индонезија. Ој вакерела: „Џикоте трајнела сине и пандемија КОВИД-19, почминѓум те спорединав мле околностија е пхраленгере хем е пхењенгере околностенцар. Адава керѓа само те на осетинав ман задоволно“ (Гал. 6:4). Со поможинѓа лаке те менинел пло размислибе? Понадари ој вакерела: „Почминѓум те размислинав башо благословија со добинава лен сине секова диве хем башо бут шуже буќа со сине ман адалеске со сиум дело тари е Девлескири организација. Пало адава, ки молитва благодаринава ман сине е Јеховаске. Адава поможинѓа ман те овав чаче задоволно“. Ако иси тут бут негативна мисле, шај ли ту да те кере нешто слично?

ТЕ ОВА УРАМНОТЕЖЕНА ХЕМ ПОНИЗНА

8. Со случинѓа пе е Варухеске?

⁸ О Варух, о писари е пророкоскоро е Еремијаскоро, јекх време бистерѓа која тани е Јеховаскири волја. Ле сине ле пхари задача — те поможинел е Еремијаске те вакерел пхари порака јекхе народоске кова со на сине благодарно. Ама, наместо те концентриринел пе ко адава со о Јехова аџикерела лестар, ов почминѓа превише те концентриринел пе коркори ки песте хем ко адава со ов мангела те керел. Преку о Еремија, о Јехова вакерѓа е Варухеске: „Ту родеа туке баре буќа. Чхинав те роде асавке буќа!“ (Ерем. 45:3-5). Јавере лафенцар: „Ов задоволно адалеа со иси тут акана“. О Варух шунѓа е Јехова хем на руминѓа пло амалипе леа.

9. Спрема 1. Коринќања 4:6, 7, башо со ваљани те ова свесна? (Дикх хем о слике.)

⁹ Понекогаш, несаво христијани шај те мислинел кај заслужинела те добинел несави задача ки организација. Шај тано бут талентиримо, буќарно или иси ле баро искуство, или палем иси ле о сотрин буќа. Ама, и задача со ов мангела ла шај добинѓа ла несаво јавер пхрал. Со ка поможинел леске исправно те дикхел ко буќа? Адава со ка размислинел башо лафија е апостол Павлескере сој пишиме ко 1. Коринќања 4:6, 7. (Читин.) Секоја задача со добинаја ла хем секова таленти со иси амен, тане таро Јехова. Адала буќа иси амен на адалеске со амен сием нешто посебно, него адалеске сој аменге сикавдо е Јеховаскоро мангипе со на заслужинаја ле (Рим. 12:3, 6; Еф. 2:8, 9).

10. Со ка поможинел амен те ова понизна?

¹⁰ Со ка поможинел амен те ова понизна? Адава со ка размислина башо пример е Исусескоро со денѓа амен. Те дикха со случинѓа пе и рат кеда о Исус тховѓа о пре пле апостоленгере. О апостол Јован пишинѓа: „О Исус џанља [1] кај о Дад денѓа са о буќа леске ко васта хем [2] кај ов ало таро Девел хем [3] ка иранел пе ко Девел... почминѓа те тховел о пре е учениконгере“ (Јован 13:3-5). О Исус шај сине те мислинел песке кај ов заслужинела лескере пре те тховен. Ама, џикоте сине ки пхув, никогаш на мислинѓа кај ов заслужинела пошужо хем поудобно живото (Лука 9:58). О Исус сине понизно хем сине задоволно пле околностенцар. Ов денѓа амен совршено пример (Јован 13:15).

11. Сар и понизност поможинѓа е Денисеске те осетинел пе задоволно?

¹¹ О Денис тари Холандија трудинела пе те сикавел понизност сар е Исусескири. Ама нане леске секогаш локхо. Ов вакерела: „Понекогаш приметинава кај почминава те овав гордо хем те на овав задоволно, на пример, кеда дикхава кај некој јавер добинѓа и задача која со ме мангава ла. Кеда ка случинел пе асавко нешто, проучинава башо понизност. Ки апликација JW Li­brary^® иси ман бележимо несаве стихија баши понизност те шај сигате те аракхав лен хем те читинав лен. А ко телефони перавѓум несаве говорија баши понизност хем бут пути шунава лен.a Халиљум кај са со кераја ваљани те фалинел е Јехова, а на амен. Амен иси амен само јекх тикно дело ко са адава со кераја“. Ако почминеа те на осетине тут задоволно баши тли ситуација, кер бути ки понизност. Аѓаар ка зојракере тло амалипе е Јеховаја хем ка ове задоволно (Јак. 4:6, 8).

ТЕ РАЗМИСЛИНА БАШИ АМАРИ НАДЕЖ

12. Која надеж поможинела амен те ова задоволна ко живото? (Исаија 65:21-25).

¹² Осетинаја амен порадосна хем позадоволна кеда размислинаја кобор шужи надеж иси амен. Таро лафија со пишинѓа лен о пророко о Исаија дикхјола кај о Јехова хаљола ко саве пхаре условија живинаја хем ветинела аменге пошукар иднина. (Читин Исаија 65:21-25.) Ветинела аменге кај ка овел амен амаро кхер коте со ка ова безбедна. Ка овел амен бути колате со ка уживина хем ка овел амен здраво хем вкусно хајбе. Никогаш нане више те дара аменге или амаре чхавенге (Иса. 32:17, 18; Езек. 34:25). Оја, акала ветувања сигурно ка исполнинен пе! Аџикерела амен бут шужи иднина.

13. Кеда посебно тано важно те ачхова концентририме ки амари надеж?

¹³ Никогаш џи акана на сине добором важно те ачхова концентририме ки амари надеж. Соске? Адалеске со живинаја „ко последна диве“ хем сарине боринаја амен различна проблеменцар (2. Тим. 3:1). О Јехова секова диве поможинела амен те истрајна аѓаар со дела амен водство, сила хем поддршка (Пс. 145:14). Амари надеж посебно поможинела амен кеда накхаја таро несаво пхаро проблеми кова со лично амен иси амен. Шај сар фамилија мучинаја амен финансиски те икљова ко крајо. Дали акава значинела кај секогаш ка овел тут проблеми ко финансиско поглед? Нормално кај на! О Јехова ветинѓа кај ка дел тут са со ваљани туке — чак бут повише таро адава — ко рај (Пс. 9:18; 72:12-14). Шај иси тут баре дукха секова диве, сиан ки депресија или иси тут несаво јавер пхаро насвалипе. Дали адава значинела кај туке нане помош или кај цело живото ка мучине тут? На. Ко е Девлескоро нево свето нане те овел ни насвалипе, а ни мерибе (Отк. 21:3, 4). Адаја надеж поможинела амен панда акана те осетина амен задоволна хем те на овел ки аменде ни хари холи. Шај те ова задоволна ки било сави ситуација, чак кеда доживинаја неправда или нашаваја некас, кеда сием насвале или кеда иси амен несави јавер пхари ситуација ко живото. Соске? Адалеске со бизи разлика кобор пхаро аменге акана, џанаја кај амари неволја тани моментално хем кај панда хари о нево свето засекогаш ка локхјарел аменге амаро живото (2. Кор. 4:17, 18).

14. Сар шај те зојракера амари надеж?

¹⁴ Дикхаја кобор тани важно и надеж те шај те ова задоволна. Тегани, сар шај те кера позорали адаја надеж? Исто сар со некој мора те пхиравел новчајра те шај појасно те дикхел дур, амен да шај ка ваљани те бајрара амари надеж те шај појасно те дикха о рај кова со аџикерела амен ки иднина. Кеда секиринаја амен башо адава кај нане амен доволно паре, шукар тано те замислина аменге саво ка овел о живото кеда о паре, о борчија хем чоролипе нане више те овен. Ако разочаринаја амен адалеске со панда на добинѓем несави задача со мангаја ла, шукар тано те размислина кај адава нане те овел добором важно кеда ка овел амен прилика сар совршена мануша ки цели вечност те служина е Јеховаске (1. Тим. 6:19). Авдиве иси амен добором бут секирацие со шај аменге пхаро те размислина баши иднина. Ама ма те откажина амен. Нека овел амен навика те размислина баши иднина со о Јехова ветинѓа ла аменге.

15. Со сикљоваја таро адава со вакерѓа и Криста?

¹⁵ Те дикха со вакерела и Криста сар поможинѓа лаке и надеж, е Денисескири ромни коле со спомнинѓем ле англедер. Ој вакерела: „Иси ман насвалипе кова со слабонкерела бут мле мускулија, адалеске нашти пхирава хем мора те овав ки инвалидско количка хем побаро дело таро диве ваљани те пашљовав. Иси ман секова диве дукха. Англедер несаво време о доктори вакерѓа манге кај мли ситуација на џала баш ко шукар. Ама ме одма мислинѓум манге: ’Ов на дикхела ки иднина сар манде‘. Ме сиум концентририми ки мли надеж, а адава керела те осетинав андруно мир. Шај ко акава свето чаче бут мучинава ман, ама ко нево свето ка радујнав ман башо чачутно живото!“.

„НИШТО НА ФАЛИНЕЛА ОКОЛЕНГЕ СО ДАРАНА ЛЕСТАР”

16. Соске о цари о Давид шај сине те вакерел кај ништо нане те фалинел околенге со дарана таро Јехова?

¹⁶ Чак о слуге е Јеховаскере кола сој задоволна бизи разлика саве околностија иси лен, иси ле проблемија. Те дикха о пример е царескоро е Давидескоро. Тари Библија дознајнаја кај муле лестар трин чхаве. Несаве кривинѓе ле башо лошна буќа кола со на керѓа лен, сине издајмо таро пле амала хем о цари бершенцар пробинела сине те мударел ле. Сепак, џикоте накхела сине тари јекх пхари ситуација, о Давид башо Јехова вакерѓа: „Ништо на фалинела околенге со дарана лестар“ (Пс. 34:9, 10). Соске шај сине те вакерел асавко нешто? Адалеске со џанља кај иако тано слуга е Јеховаскоро, ка овен ле проблемија ко живото, ама хем кај о Јехова ка дел ле са со ваљани леске (Пс. 145:16). Исто сар о Давид, амен да шај те ова сигурна кај о Јехова ка поможинел амен ко са амаре неволје. Ка поможинел амен те ова задоволна ки било сави ситуација.

17. Соске сиан одлучно те сикљове те ове задоволно ко са?

¹⁷ О Јехова мангела те ове задоволно хем те радујне тут ко живото (Пс. 131:1, 2). Адалеске трудин тут те сикљове те ове задоволно ки било сави ситуација. Ако деа тутар са те ове благодарно, те ове урамнотежено хем понизно хем те кере позорали тли надеж, ту да ка шај те вакере: „Сиклиљум те овав задоволно ки било која ситуација“ (Фил. 4:11).