Со шај те сикљова таро израелска царија?

1-2. Со вакерела аменге и Библија башо несаве израелска царија?

КИ БИБЛИЈА пишинела башо повише таро 40 мурша кола со сине израелска царија.a Ки лате отворено вакерела пе башо несаве буќа кола со ола керѓе лен. На пример, чак несаве шукар царија керѓе несаве лошна буќа. Те размислина башо пример е Давидескоро кова со сине шукар цари. О Јехова баши лесте вакерѓа: „Мло слуга о Давид... џала сине пали манде цело пле вилеа, кериндор само адава сој исправно ко мле јакхја“ (1. Цар. 14:8). Сепак, о Давид керѓа сексуално неморал жениме ромњаја хем керѓа плани те овел мудардо лакоро ром (2. Сам. 11:4, 14, 15).

² Тари јавер страна, бут таро царија со на сине верна е Јеховаске керѓе несаве шукар буќа. На пример, о Ровоам англо е Јеховаскере јакхја керела сине лошнипе (2. Лет. 12:14). Сепак, ов шунѓа е Јеховаскири заповед аѓаар со дозволинѓа деш племија таро лескоро царство те одвојнен пе. Исто аѓаар, керѓа бут дизја те овен позорале ко лескоро царство хем заштитинѓа е Девлескере народо таро душмања (1. Цар. 12:21-24; 2. Лет. 11:5-12).

3. Кова важно пучибе шај пучаја амен хем со ка дикха ки акаја статија?

³ Кеда размислинаја башо са акава, шај пучаја амен акава важно пучибе: „Ако о израелска царија керѓе хем шукар хем лошна буќа, спрема кола буќа о Јехова одлучинѓа дали јекх цари тано верно англо лескере јакхја?“ О одговор таро акава пучибе ка поможинел аменге те хаљова со очекујнела о Јехова амендар. Ка кера лафи башо трин буќа кола со о Јехова леља ко предвид кеда проценинела сине дали о израелска царија сине шукар или лошна — дали мангена ле сине цело вилеа, дали искрено каинена пе сине, хем дали служинена леске сине ко исправно начин.

МАНГЛЕ Е ЈЕХОВА ЦЕЛО ВИЛЕА

4. Која сине јекх разлика машкар о верна царија хем окола со на сине верна?

⁴ О царија коленде со о Јехова дикхела сине шукар, служинена леске сине цело вилеа.b О шукар цари о Јосафат „цело вилеа“ родела сине е Јехова (2. Лет. 22:9). Башо Јосија ки Библија пишинела: „Англедер лесте на сине асавко цари кова со иранѓа пе ко Јехова цело пле вилеа“ (2. Цар. 23:25). А со те вакерел пе башо Соломон кова со кеда пхурило почминѓа те керел лошна буќа? Ки Библија баши лесте пишинела: „На сине више верно е Јеховаске цело вилеа“ (1. Цар. 11:4). А башо Авијам, јекх јавер цари со на сине верно, ки Библија пишинела: „Лескоро вило на сине целосно е Јеховаја“ (1. Цар. 15:3).

5. Објаснин со значинела те служинел пе е Јеховаске цело вилеа.

⁵ Тегани, со значинела те служинел пе е Јеховаске цело вилеа? Окова со служинела е Јеховаске цело вилеа, на керела адава адалеске со мора него адалеске со бут мангела ле хем хор поштујнела ле. Хем ов продолжинела те керел акава ко цело пло живото.

6. Сар шај понадари да те служина е Јеховаске цело вилеа? (Изреки 4:23; Матеј 5:29, 30).

⁶ Сар шај те џа пало пример е верна царенгоро кола со мангле е Јехова цело вилеа? Аѓаар со ка избегина са со шај те слабонкерел амаро мангипе спрема о Јехова. На пример, мора те пазина сави забава биринаја. Исто аѓаар, мора те пазина касаја дружинаја амен хем те аракха амен таро материјализам. Ако приметинаја кај несави бути керела амаро мангипе спрема о Јехова те слабонел, тегани одма ваљани те кера нешто. (Читин Изреки 4:23; Матеј 5:29, 30.)

7. Соске ваљани те аракха амен таро штетна влијанија?

⁷ На смејнаја те дозволина амаро вило те овел поделимо. Ако на пазинаја, шај те почмина те мислина кај адалеске со сием бут зафатиме духовна активностенцар, на ваљани те аракха амен таро штетна влијанија. Те вакера јекх пример. Замислин туке кај сиан авријал хем тано бут шудро хем иси бари бавлал. Кеда ресеа кхере, тхареа нешто те шај те таќове. Ама со ка овел ако мукхеа о удара пхравдо? Бут сигате о шудро ка кхувел андре. Со сикљоваја таро акава пример? Амен ваљани те кера бут повише него само те ла тари духовно храна која со поможинела аменге те ова попаше е Јеховаја. Мора, аѓаар те вакера, те пханда о удар амаре вилескоро те шај ма те кхувел о шудро „воздух“ акале светоскоро, јавере лафенцар те на дозволина о штетна влијанија те слабонкерен амаро мангипе спрема о Јехова хем те керен амаро вило те овел поделимо (Еф. 2:2).

ОЛА КАИНЃЕ ПЕ БАШО ПУМАРЕ ГРЕВИЈА

8-9. Сар реагиринѓе о царија, о Давид хем о Езекија, кеда сине укориме? (Дикх и слика тари страна.)

⁸ Сар со дикхлем поупре, о цари о Давид керѓа сериозно грево. Ама кеда о пророко о Натан вакерѓа леске сар осетинела пе о Јехова башо лескоро грево, о Давид понизно каинѓа пе (2. Сам. 12:13). Ов на глуминѓа кај леске жал башо адава со керѓа само те шај те ховавел е Натане или те избегинел и казна. Таро лафија е Давидескере сој пишиме ко 51-то Псалм дикхјола кај ов чаче каинѓа пе (Пс. 51:3, 4, 17, натпис).

⁹ О цари о Езекија исто аѓаар грешинѓа е Јеховаске. Ки Библија пишинела: „Лескоро вило уло гордо. Адалеске, о Девел хољанѓа леске ама исто аѓаар хем е Јудаке хем е Ерусалимеске“ (2. Лет. 32:25). Соске о Езекија уло гордо? Шај адалеске со сине барвало, шај баши победа упро о Асирција или адалеске со сине чудоја сасљардо таро јекх насвалипе колестар со мерела пе. Шај баш и гордост чхивѓа ле те сикавел пло барвалипе е Вавилонцонге, а башо адава о пророко о Исаија укоринѓа ле (2. Цар. 20:12-18). Ама, исто сар о Давид, о Езекија да понизно каинѓа пе (2. Лет. 32:26). Ко крајо, сар дикхља о Јехова ко Езекија? Ов дикхља ки лесте сар верно цари. Ки Библија баши лесте пишинела: „Керела сине адава сој исправно англо е Јеховаскере јакхја“ (2. Цар. 18:3).

10. Сар реагиринѓа о цари о Амазија ко совет со добинѓа ле?

¹⁰ Различно таро Давид хем таро Езекија, о Амазија — кова со сине цари ки Јуда — керела сине адава сој исправно англо е Јеховаскере јакхја, ама на служинѓа леске цело вилеа (2. Лет. 25:2). Коте грешинѓа? Откеда о Јехова поможинѓа ле те побединел е Едомцон, о Амазија почминѓа те клањинел пе ленгере девленге.c Кеда е Јеховаскоро пророко керѓа леа лафи башо адава, о цари на мангља те шунел ле хем бркинѓа ле (2. Лет. 25:14-16).

11. Спрема 2. Коринќања 7:9, 11, со мора те кера те шај о Јехова те простинел аменге? (Дикх хем о слике.)

¹¹ Со сикљоваја таро акала примерија? Ваљани те каина амен башо амаре гревија хем те кера са со шај те на кера лен палем. Со ако дена амен совет о старешине чак башо нешто со на дикхјола добором сериозно? На ваљани те мислина кај о Јехова на мангела амен или палем кај е старешинен иси лен нешто против аменде. Чак е шукар израелско царенге ваљанѓа совет хем укор (Евр. 12:6). Кеда ка добина совет ваљани 1) понизно те прифатина ле, 2) те кера о потребна промене хем 3) понадари да те служина е Јеховаске цело вилеа. Ако каинаја амен башо амаре гревија о Јехова ка простинел аменге. (Читин 2. Коринќања 7:9, 11.)

ОЛА СЛУЖИНЃЕ Е ЈЕХОВАСКЕ КО ИСПРАВНО НАЧИН

12. Ко со посебно разликујнена пе сине о верна царија таро окола со на сине верна?

¹² О царија коленде со о Јехова дикхела сине сар верна служинена сине леске ко исправно начин, а поттикнинена сине е Јеховаскере народо да те керел о исто. Џанѓола пе, сар со дикхлем, ола керѓе грешке. Ама, ола служинѓе само е Јеховаске цело вилеа хем бут трудинѓе пе те чистинен и пхув таро идолопоклонство.d

13. Соске о цари о Ахав на сине верно англо е Јеховаскере јакхја?

¹³ Со шај те вакера башо царија кола со англо е Јеховаскере јакхја на сине верна? Ола на керѓе само лошна буќа. На пример, чак о лошно цари о Ахав џи негде сикавѓа понизност хем каинѓа пе кеда шунѓа кај о Навутеј сине мудардо лескоро себепи (1. Цар. 21:27-29). Ов исто аѓаар, градинѓа дизја хем анѓа победе башо Израел (1. Цар. 20:21, 29; 22:39). Ама, адалеске со влијајнела сине леске и ромни, о Ахав сине пенџардо пало адава со ширинела сине идолопоклонство хем ов никогаш на каинѓа пе башо адава (1. Цар. 21:25, 26).

14. а) Соске о Јехова ко Ровоам на дикхља сар верно цари? б) Која исто бути керена сине повише царија кола со на сине верна?

¹⁴ Те дикха о пример е Ровоамескоро — јекх јавер цари кова со на сине верно е Јеховаске. Сар со дикхлем англедер ов керѓа бут шукар буќа џикоте владинѓа. Ама кеда лескоро царство уло постабилно, ов чхинавѓа те икерел е Јеховаскоро закони хем почминѓа те обожавинел ховавне девлен (2. Лет. 12:1). Оттегани, ов понекогаш служинела сине е Јеховаске а понекогаш обожавинела сине е ховавне девлен (1. Цар. 14:21-24). О Ровоам хем о Ахав на сине о единствена царија кола со чхинавѓе те служинен е Јеховаске ко исправно начин. Уствари, повише таро царија со на сине верна обожавинена сине ховавне девлен хем поттикнинена сине е јаверен да те керен о исто. Таро акава јасно дикхаја кај кеда о Јехова одлучинела сине дали јекх цари тано шукар или лошно, јекх таро најважна буќа со леља ко предвид сине адава дали ов служинѓа леске ко исправно начин.

15. Соске е Јеховаске тано важно лескоро народо те обожавинел ле ко исправно начин?

¹⁵ Соске е Јеховаске сине бут важно о царија те служинен леске ко исправно начин? Јекх причина сине адаја со сине лен одговорност те поможинен е народоске те служинел е Јеховаске ко исправно начин. Исто аѓаар, кеда о мануша обожавинена ховавне девлен адава чхивела лен те керен јавера да сериозна гревија хем те постапинен лошно е јаверенцар (Оси. 4:1, 2). Освен адава, о израелска царија хем о израелско народо сине ко завет е Јеховаја. Адалеске, кеда ола на сине верна е Јеховаске хем обожавинена сине ховавне девлен, и Библија спорединела адава прељубаја (Ерем. 3:8, 9). Кеда некој ка керел прељуба грешинела пле брачно партнереске хем пхагела лескоро вило. Слично, кеда некој со денѓа завет е Јеховаске почминела те служинел ховавне девленге ов грешинела леске хем бут дукхавела леe (5. Мој. 4:23, 24).

16. Ко со посебно разликујнела пе англо е Јеховаскере јакхја јекх шукар мануш таро лошно?

¹⁶ Со шај те сикљова? Џанѓола пе, мора те ова одлучна те избегина са сој поврзимо е ховавне религијаја. Ама, исто аѓаар мора секогаш те обожавина е Јехова ко начин сар ов со мангела хем те ачхова зафатиме ки служба баши лесте. О пророко о Малахија јасно вакерѓа сави разлика иси англо е Јеховаскере јакхја машкар јекх шукар хем лошно мануш. Ов пишинѓа: „Палем ка дикхен и разлика машкар о праведно хем о лошно мануш, машкар адава со служинела е Девлеске хем адава со на служинела леске“ (Мал. 3:18). Адалеске, на смејнаја те мукха ништо — па чак ни амари несовршеност хем о грешке — добором те обесхрабринен амен со ка чхинава те служина е Девлеске. Кеда некој чхинавела те служинел е Јеховаске керела сериозно грево.

17. Соске ваљани те пазина касаја ка женина амен?

¹⁷ Ако сиан коркори хем размислинеа те женине тут, шај те поможинен туке е Малахијаскере лафија џикоте биринеа брачно партнери. Размислин башо акава: Некас шај те овен ле несаве шуже особине, ама ако на служинела е чачутне Девлеске, дали ко моменти ов тано праведно англо е Јеховаскере јакхја? (2. Кор. 6:14). Ако женинеа тут асавкеа, дали адава ка поможинел туке те ачхове верно е Јеховаске? Размислин: Е Соломонескере ромњен шај сине лен несаве шукар особине. Ама, ола на служинена сине е Јеховаске хем хари по хари чхивѓе ле те почминел те обожавинел ховавне девлен (1. Цар. 11:1, 4).

18. Башо со ваљани о родителија те сикавен пумаре чхавен?

¹⁸ Тумен о родителија, шај те користинен о примерија е царенгере сој ки Библија те шај те поможинен тумаре чхавенге те овел лен желба те служинен е Јеховаске. Поможинен ленге те хаљовен кај о Јехова дикхела сине шукар ко окола царија кола со служинѓе леске хем со поттикнинѓе е народо да керел о исто. Сикавен тумаре чхавен лафенцар хем тумаре примереа кај о духовна буќа — сар сој о проучибе и Библија, о џајбе ко состанокија хем ки служба — ваљани те овен ленге ко прво тхан ко живото (Мат. 6:33). Ако на керена адава, тумаре чхаве шај те почминен те служинен е Јеховаске само адалеске со тумен сиен е Јеховаскере сведокија. А адава шај те керел о чачутно обожавибе те на овел ленге ко прво тхан, па чак шај ка чхинавен те служинен е Јеховаске.

19. Сави надеж иси околенге со чхинавѓе те служинен е Јеховаске? (Дикх хем и рамка „Ту шај те иране тут ко Јехова!“)

¹⁹ Ако некој чхинавела те служинел е Јеховаске, дали леске нане више надеж? На, адалеске со ов шај те каинел пе хем палем те почминел те служинел е Јеховаске. Те шај те керел адава, ов шај ка ваљани те цидел пли гордост хем те прифатинел помош таро старешине (Јак. 5:14). Врединела те трудинел пе соске аѓаар ка шај палем те овел амал е Јеховаја!

20. Ако џаја пало пример е верна царенгоро, сар ка дикхел о Јехова ки аменде?

²⁰ Со сиклилем таро израелска царија? Шај те ова сар о верна царија ако понадари да служинаја е Јеховаске цело вилеа. Те сикљова таро амаре грешке, те каина амен хем те кера о потребна промене. Исто аѓаар, те на бистра кобор тано важно понадари да те служина е јекхе чачутне Девлеске. Ако ачховеа верно е Јеховаске, ов ка дикхел ки туте сар некој со керела адава сој исправно англо лескере јакхја.