„Биринен... каске ка служинен“

1. Со мора те кера те шај те ова чаче среќна, хем соске? (Исаија 48:17, 18).

АМАРО ДАД сој ко небо бут мангела амен хем мангела те уживина ко живото акана хем ки иднина (Проп. 3:12, 13). Кеда ов керѓа е манушен денѓа лен посебна талентија, ама на денѓа лен способност те владинен упро јавера мануша, а ни палем коркори те одлучинен сој тано исправно, а сој погрешно (Проп. 8:9; Ерем. 10:23). Ов џанела кај мора те служина леске хем те живина спрема лескере мерилија ако мангаја те ова чаче среќна. (Читин Исаија 48:17, 18.)

2. Со мангела о Сатана те верујна хем со керѓа о Јехова те шај те докажинел кај о Сатана ховавела?

² О Сатана мангела те верујна кај шај те ова среќна бизо Јехова, јавере лафенцар кај о мануша шај успешно те владинен упро јавера мануша (1. Мој. 3:4, 5). Те шај те докажинел кај о Сатана ховавела о Јехова дозволинела е манушенге несаво време те владинен упро јавера мануша. Ама јасно тано кај о манушикано владибе на функциониринела шукар. Тари јавер страна, ки Библија тане спомниме бут мурша хем џувља колен со сине лен среќно живото џикоте служинѓе е Јеховаске. О најшукар пример башо адава тано о Исус Христос. Ки акаја статија најангле ка дикха таро кола причине ов биринѓа те служинел е Јеховаске. Пало адава, ка дикха соске амаро небесно Дад заслужинела те обожавина ле хем ко крајо ка дикха некобор причине соске биринаја те служина е Јеховаске.

СОСКЕ О ИСУС БИРИНЃА ТЕ СЛУЖИНЕЛ Е ЈЕХОВАСКЕ

3. Со нудинѓа о Сатана е Исусеске хем со биринѓа о Исус те керел?

³ Џикоте о Исус сине ки пхув мора сине те биринел каске ка служинел. Кратко откеда крстинѓа пе, о Сатана вакерѓа кај ка дел ле са о царствија ки пхув само ако перела ко кочака хем поклонинела пе леске. О Исус одговоринѓа: „Наш Сатано! Соске пишимо тано: ’Е Јехова, тле Девле, мора те обожавине хем само леске те служине‘“ (Мат. 4:8-10). Соске о Исус анѓа асавки одлука? Те дикха некобор причине.

4-5. Кола тане несаве причине соске о Исус биринѓа те служинел е Јеховаске?

⁴ И главно причина соске о Исус биринѓа те служинел е Јеховаске тани о мангипе, ле иси ле хор мангипе спрема пло Дад со никогаш нашти те чхинавѓовел (Јован 14:31). Освен адава, о Исус служинела е Јеховаске соске адава тано исправно (Јован 8:28, 29; Отк. 4:11). Ов џанела кај таро Јехова авела о живото, кај шај те овел амен доверба ки лесте хем кај ов тано дарежливо (Пс. 33:4; 36:9; Јак. 1:17). О Јехова секогаш вакерела сине о чачипе е Исусеске. Освен адава, са со иси е Исусе добинѓа ле таро Јехова (Јован 1:14). О Сатана тано скроз поразлично таро Јехова. Ов тано и причина соске о мануша мерена, ов ховавела хем са со керела, керела тари алчност хем тари себичност (Јован 8:44). Адалеске со о Исус џанља акава никогаш ни ки годи на ало леске те овел сар о Сатана хем те бунинел пе против о Јехова (Фил. 2:5-8).

⁵ Панда јекх причина соске о Исус биринѓа те служинел е Јеховаске тани адалеске со размислинела сине кола шукар буќа ка авен таро адава (Евр. 12:2). Ов џанља кај ако ачхола верно ка славинел пле Дадескоро анав хем кај адалеа ка шај те циден пе са о муке со анѓа лен о Бенг.

СОСКЕ О ЈЕХОВА ЗАСЛУЖИНЕЛА ТЕ ОБОЖАВИНА ЛЕ

6-7. Соске бут џене авдиве на служинена е Јеховаске, ама соске ов заслужинела те обожавина ле?

⁶ Бут џене авдиве на служинена е Јеховаске адалеске со панда на дознајнѓе кобор шуже особине иси ле хем нане свесна со са ов керѓа ленге. Аѓаар сине хем околенцар коленге со о апостол Павле проповединѓа ки Атина (Апо. 17:19, 20, 30, 34).

⁷ О Павле објаснинѓа е манушенге тари Атина кај о чачутно Девел дела „сариненге о живото, о дишибе хем са“. Ов исто аѓаар вакерѓа: „Преку лесте иси амен живото, движинаја амен хем постојнаја“. О Девел тано Створители кова со „таро јекх мануш створинѓа са е народон“. Адалеске, само ле иси ле право те обожавина ле (Апо. 17:25, 26, 28).

8. Со нане никогаш те керел о Јехова? Објаснин.

⁸ Адалеске со о Јехова створинѓа цело универзум хем тано о Најбаро Владетели, ов шај те чхивел е манушен силаја те служинен леске. Ама, ов никогаш нане те керел адава. Наместо адава, о Јехова дела амен доказија кај постојнела хем кај бут мангела секоле јекхе амендар. Ов мангела кобор со шај повише мануша те овен лескере амала хем адава засекогаш (1. Тим. 2:3, 4). Адалеске, о Јехова обучинѓа амен те шај те сикава е јаверен баши лескири намера хем те вакера башо са о шукар буќа со ка керел е манушенге (Мат. 10:11-13; 28:19, 20). Ов организиринѓа амен ко собранија коте со шај те обожавина ле хем те добина помош таро старешине кола со бут грижинена пе (Апо. 20:28).

9. Таро со јасно дикхела пе кобор тано баро е Јеховаскоро мангипе?

⁹ Кобор тано баро е Јеховаскоро мангипе јасно шај те дикхел пе таро начин сар постапинела околенцар со на мангена те верујнен кај ов постојнела. Размислин башо акала буќа: Таро почеток па џи акана, милијарде мануша биринѓе те живинен спрема пле мерилија башо адава сој исправно, а сој погрешно. Сепак, о Јехова мангипаја дела лен са адава со ваљани ленге башо живото хем те уживинен ки лесте (Мат. 5:44, 45; Апо. 14:16, 17). Ов денѓа лен способност те керен песке амала, те овел лен фамилија хем те уживинен ко шукар буќа таро пло трудо (Пс. 127:3; Проп. 2:24). О доказија јасно сикавена кај амаро Дад сој ко небо мангела са е манушен (2. Мој. 34:6). Акана те дикха несаве причине соске биринѓем те служина е Јеховаске хем сар ов благословинела амен башо адава.

СОСКЕ БИРИНАЈА ТЕ СЛУЖИНА Е ЈЕХОВАСКЕ

10. а) Која тани и главно причина соске служинаја е Јеховаске? (Матеј 22:37). б) Сар о Јехова сикавѓа кај тано стрпливо туја? (Псалм 103:13, 14).

¹⁰ Исто сар о Исус, и главно причина соске служинаја е Јеховаске тани адалеске со бут мангаја ле. (Читин Матеј 22:37.) Кеда сикљоваја башо е Јеховаскере особине амен замангаја ле панда повише. На пример, размислин кобор о Јехова тано стрпливо аменцар. Кеда о Израелција на шунена ле сине ов молинѓа лен акале лафенцар: „Иранен тумен, молинава тумен, таро тумаро лошно друмо“ (Ерем. 18:11). О Јехова џанела кај сием несовршена, џанела „кај сием таро право“. (Читин Псалм 103:13, 14.) Кеда размислинеа баши е Јеховаскири стрпливост хем башо лескере јавера бут шуже особине, на поттикнинела ли тут адава те служине леске засекогаш?

11. Кола тане несаве причине соске биринѓем те служина амаре небесно Дадеске?

¹¹ Панда јекх причина соске мангаја те служина е Јеховаске, тани адалеске со џанаја кај адава тано исправно (Мат. 4:10). Освен адава, џанаја кола шукар буќа шај те анел амари верно служба. Кеда служинаја верно е Јеховаске поможинаја те славинел пе лескоро анав, докажинаја кај о Бенг ховавела хем радујнаја о вило амаре Дадескоро. Исто аѓаар, ако авдиве биринаја те служина е Јеховаске иси амен надеж кај ка служина леске засекогаш (Јован 17:3).

12-13. Со сикљоваја тари Џејн хем тари Пем?

¹² Панда таро тикнипе шај те развина силно мангипе спрема о Јехова — мангипе со понадари да ка бајрол сар со ка пхујрова. Баш адава случинѓа пе дује пхењенге со викинена пе Џејн хем Пем.a И Џејн сине ла 11, а и Пем 10 берш кеда почминѓе те проучинен и Библија. Иако ленгере родителија на мангле те проучинен, ола мукхле лен те проучинен и Библија е Јеховаскере сведоконцар само ако секова викенд џана ки црква пумаре фамилијаја. И Џејн вакерела: „Адава со сиклиљум тари Библија преку е Јеховаскере сведокија, поможинѓа манге те боринав ман против о притисок таро врсникија те лав дрога хем те живинав неморално живото сар ленде“.

¹³ Пало некобор берша акала дуј чхаја уле објавителија. Покасно, ола почминѓе е пионерско службаја, а ко исто време грижинена пе сине пумаре пхуре родителенге. И Џејн објаснинела сар осетинела пе башо са адава со о Јехова керѓа баши лате: „Таро лично искуство уверинѓум ман кај о Јехова тано верно, кај грижинела пе пле амаленге хем сар со пишинела ко 2. Тимотеј 2:19, ’о Јехова пенџарела околен сој лескере‘“. Јасно тано кај о Јехова грижинела пе околенге со ка биринен те манген ле хем те служинен леске!

14. Сар бранинаја е Јеховаскоро анав? (Дикх хем о слике.)

¹⁴ Амен мангаја о мануша те дознајнен кај о лошна буќа со шунѓе лен башо Девел тане ховајба. На пример, замислин туке кај иси тут несаво паше амал кова сој љубезно, дарежливо хем спремно тано те простинел. Јекх диве шунеа сар некој кривинела тле амале кај тано лошно хем кај нане чесно. Сар ка реагирине? Сигурно ка бранине ле. Слично, кеда о Сатана хем окола упро касте со ов влијајнела пробинена те каљарен е Јеховаскоро анав, аѓаар со ширинена ховајба баши лесте, амен ревно бранинаја ле аѓаар со вакераја о чачипе баши лесте (Пс. 34:1; Иса. 43:10). Амен сикаваја кај мангаја те служина е Јеховаске цело душаја амаре лафенцар хем амаре постапкенцар.

15. Саве благословија добинѓа о апостол Павле адалеске со керѓа баре промене ко пло живото? (Филипјања 3:7, 8).

¹⁵ Амен спремно кераја промене ко амаро живото те шај те служина е Јеховаске ко начин сој леске прифатливо или те шај те кера повише ки служба баши леске. На пример, о апостол Павле откажинѓа пе тари важно положба со сине ле ки еврејско религија те шај те овел следбенико е Христосескоро хем те служинел е Јеховаске (Гал. 1:14). Адалеске сине ле бут шуже искуствија ки служба башо Јехова хем добинѓа прилика те владинел заедно е Исусеа ко небо. Ов никогаш на пело пишмани со биринѓа те служинел е Јеховаске, а нане те пера пишмани ни амен. (Читин Филипјања 3:7, 8.)

16. Со сикљоваја таро е Џулијакоро искуство? (Дикх хем о слике.)

¹⁶ Ако и служба башо Јехова тани аменге и најважно бути ко живото, тегани ка овел амен среќно живото акана хем ки иднина. Размислин башо пример јекхе пхењакоро со викинела пе Џулија. Англедер те дознајнел о чачипе, панда сар тикни и Џулија гиљавела сине ко хор ки црква. Ој гиљавела сине добором шукар со почминѓа те добинел обука те шај те овел оперско пејачка. Пало кратко време, и Џулија ули бут пенџарди хем почминѓа те гиљавел ко бут пенџарде сале башо концертија. Џикоте сикљола сине ки јекх пенџарди музичко школа, јекх соученико почминѓа те керел лаја лафи башо Девел хем објаснинѓа лаке кај е Девлескоро анав тано Јехова. Кратко пало адава, и Џулија почминѓа те проучинел и Библија дуј пути ко курко. Ко крајо, ој одлучинѓа те дел пло време хем пли сила е Јеховаске наместо те овел оперско пејачка. Адаја одлука на сине локхи. И Џулија вакерела: „Бут мануша вакерѓе манге кај мло таленти фрдинѓум ле ко пани, ама ме мангљум мло живото целосно те користинав ле те шај те служинав е Јеховаске“. Со мислинела и Џулија авдиве баши одлука со анѓа англедер повише таро 30 берш? Ој вакерела: „Иси ман андруно мир хем сигурно сиум кај ки иднина о Јехова ка исполнинел са о желбе мле вилескере“ (Пс. 145:16).

ПОНАДАРИ ДА СЛУЖИН Е ЈЕХОВАСКЕ

17. Сар адава со сием бут паше ко крајо влијајнела упро окола со биринѓе те служинен е Девлеске хем упро окола со на панда на керѓе адава?

¹⁷ Живинаја ко време кеда сием бут паше ко крајо. О апостол Павле пишинѓа: „Соске, ’само панда хари‘ хем ка ’ресел окова со авела хем нане те каснинел‘“ (Евр. 10:37). Сар акава влијајнела упри аменде? Окола со на служинена е Јеховаске иси лен панда хари време те биринен те керен адава. Адалеске, ваљани те керен о потребна буќа со шај посигате (1. Кор. 7:29). А ако више биринѓем те служина е Јеховаске, џанаја кај иако ка ваљани те трпина неволје, адава ка трајнел „само панда хари“.

18. Ко со поттикнинена амен о Јехова хем о Исус?

¹⁸ О Исус на поттикнинѓа пле ученикон само те почминен те џан пали лесте, него хем те продолжинен те керен адава (Мат. 16:24). Адалеске, ако више бершенцар служинаја е Јеховаске, те ова одлучна те на откажина амен. Ваљани бут те трудина амен те шај те продолжина те живина спрема и одлука со анѓем ла те служина е Јеховаске. Шај нане те овел локхо, ама панда авдиве шај те ова среќна хем те овен амен бут благословија (Пс. 35:27).

19. Со сикљоваја таро Џин?

¹⁹ Несаве мислинена кај ако служинена е Јеховаске ка нашти те уживинен ко живото. Ако сиан терно дали мислинеа кај пропуштинеа нешто адалеске со служинеа е Јеховаске? Јекх терно пхрал со викинела пе Џин, вакерела: „Мислинава сине кај адава со сиум е Јеховаскоро сведоко бут ограничинела ман. Дикхјола манге сине кај бут таро чхаве коленцар со бариљум уживинена сине адалеске со шај сине те џан ко забаве, те овен ки врска или те кхелен насилна видеоигре, а ме мора сине те џав ко состанокија хем ки служба“. Сар акава размислибе влијајнѓа упро Џин? Ов вакерела: „Почминѓум те живинав дволично живото хем несаво време сине манге интересно. Ама, уствари на сиум сине чаче среќно. Почминѓум те размислинав башо адава сар ка користинел манге ако шунава адава со вакерела и Библија хем адалеске биринѓум те служинав е Јеховаске цело вилеа. Оттегани мислинава кај о Јехова одговоринела ки секоја мли молитва“.

20. Ко со ваљани те ова одлучна?

²⁰ Јекх псалмисти гиљавѓа е Јеховаске: „Среќно тано окова коле со ту ка бирине хем каске со дозволинеа те авел туте паше те шај те живинел ко тле дворија“ (Пс. 65:4). Те ова одлучна те џа пало е Исус Навинескоро пример кова со вакерѓа: „Ме хем мли фамилија ка служина е Јеховаске!“ (Ис. Нав. 24:15).