Дали о Јехова ка одговоринел ко мле молитве?

1-2. Соске шај те мислина кај о Јехова на одговоринела ко амаре молитве?

„О ЈЕХОВА нека овел тли најбари радост хем ка добине лестар са со мангела тло вило“ (Пс. 37:4). Кобор шужо ветување! Ама дали ваљани те очекујна кај о Јехова одма ка дел амен са адава со родаја? Соске тано шукар те пуча амен акава? Размислин башо акала ситуацие. Јекх пхен со нане женими молинела пе е Јеховаске те џал ки Школа башо полновремена објавителија. Ама накхена некобор берша а ој панда нане викими. Јекх терно пхрал молинела е Јехова те сасљол таро јекх пхаро насвалипе те шај повише те поможинел ко собрание. Ама ов на сасљола. Јекх брачно пари молинела пе ленгоро чхаво те ачхол ко чачипе. Ама о чхаво одлучинела те на служинел е Јеховаске.

² Шај ту да молинѓан е Јехова башо нешто, ама на добинѓан адава со родинѓан. Адалеске шај мислинеа туке кај о Јехова одговоринела ко е јаверенгере молитве, ама ко тле на. Или шај мислинеа кај нешто грешинѓан. Јекх пхен со викинела пе Џенисb мислинела сине баш аѓаар. Ој хем лакоро ром бут мангена сине те служинен ко Бетел хем молинена пе сине башо адава. Ој вакерела: „Сием сине увериме кај бут сигате ка викинен амен ко Бетел“. Накхле бут берша, ама лен панда на викинѓе лен ко Бетел. И пхен вакерела: „Сиум сине разочарими хем буними. Пучава ман сине со грешинѓум е Јеховаске. Бут пути молинѓум ман е Јеховаске те џа ко Бетел, соске на одговоринѓа ко мле молитве?“

3. Башо со ка кера лафи ки акаја статија?

³ Понекогаш шај те пуча амен дали о Јехова шунела амаре молитве. Чак несаве верна слуге таро пурано време пучена пе сине о исто (Јов 30:20; Пс. 22:2; Авак. 1:2). Со шај те уверинел тут кај о Јехова ка шунел тле молитве? (Пс. 65:2). Те шај те добина одговор прво те дикха о следна трин пучиба 1) Со шај те очекујна таро Јехова? 2) Со очекујнела о Јехова амендар? 3) Соске шај ка ваљани те молина амен башо нешто јавер?

СО ШАЈ ТЕ ОЧЕКУЈНА ТАРО ЈЕХОВА?

4. Спрема Еремија 29:12, со ветинела о Јехова кај ка керел?

⁴ О Јехова ветинела аменге кај ка шунел амаре молитве. (Читин Еремија 29:12.) Амаро Девел мангела амен соске верно служинаја леске хем ов секогаш ка шунел амаре молитве (Пс. 10:17; 37:28). Ама акава на значинела кај ов ка дел амен са со родаја лестар. Башо несаве буќа со родаја лестар шај ка ваљани те аџикера џи ко нево свето.

5. Со лела о Јехова ко предвид кеда шунела амаре молитве? Објаснин.

⁵ Кеда шунела амаре молитве, о Јехова лела ко предвид пли намера (Иса. 55:8, 9). Јекх дело тари лескири намера тани и пхув те овел пхерди манушенцар кола со радосно ка служинен леске сар Владетели. Ама о Сатана вакерела кај е манушенге ка овел пошукар ако ола коркори владинена (1. Мој. 3:1-5). Те шај те докажинел кај адава со вакерела о Сатана тано ховајбе, о Јехова дозволинѓа е манушенге те владинен. Ама амен шај јасно те дикха кај о манушикано владибе анѓа бут таро проблемија со иси амен авдиве (Проп. 8:9). Свесна сием кај о Јехова нане одма те цидел са акала проблемија. Ако керела адава, несаве шај те мислинен песке кај о мануша шукар владинена хем кај тане способна те решинен са е манушенгере проблемија.

6. Соске ваљани те ова увериме кај о Јехова секогаш керела адава сој љубезно хем праведно?

⁶ О Јехова шај те одговоринел ко слична молитве ко различна начинија. На пример, кеда о цари о Езекија сине бут насвало молинѓа е Јехова те сасљарел ле. О Јехова одговоринѓа леске аѓаар со сасљарѓа ле (2. Цар. 20:1-6). Тари јавер страна, кеда о апостол Павле молинѓа е Јехова те цидел лестар „о каро таро тело“, веројатно несаво проблеми састипаја, о Јехова на керѓа адава (2. Кор. 12:7-9). Размислин исто аѓаар башо апостолија о Јаков хем о Петар. О цари о Ирод мангља те мударел е солдујен. Тегани о пхраља молинѓе пе е Петареске хем веројатно е Јаковеске да. Ама, само о Петар сине чудоја спасимо а о Јаков сине мудардо (Апо. 12:1-11). Адалеске шај те пуча амен, соске о Јехова спасинѓа само е Петаре а на хем е Јакове? И Библија на вакерела ништо башо адава.c Ама адава ко со шај те ова сигурна тано кај о Јехова никогаш на постапинела неправедно (5. Мој. 32:4). Хем исто аѓаар џанаја кај о Јехова мангља хем е Петаре хем е Јакове (Отк. 21:14). Понекогаш о Јехова шај нане те одговоринел ко амаре молитве ко начин сар со амен очекујнѓем. Ама адалеске со сием увериме кај о Јехова секогаш постапинела праведно хем мангипаја, амен на сумнинаја амен ко начин кова со биринела те одговоринел ко амаре молитве (Јов 33:13).

7. Со трудинаја амен те избегина, хем соске?

⁷ На ваљани те споредина амари ситуација е јаверенгере ситуацијаја. На пример, шај молинѓем амен башо нешто конкретно ама на добинѓем адава со родинѓем. Покасно дознајнаја кај некој јавер молинѓа пе баши слично бути хем дикхјола сар те пхене о Јехова одговоринѓа ки лескири молитва. Јекх пхен со викинела пе Ана доживинѓа нешто асавко. Лакоро ром о Метју сине насвало таро рако хем ој молинела сине е Јехова те сасљарел ле. Ко исто време дуј попхуре пхења исто сине насвале таро рако. И Ана бут молинѓа пе хем пле ромеске хем е дује пхењенге. О пхења састиле, ама о Метју муло. Ко почеток и Ана мислинела сине, ако о Јехова сасљарѓа е пхењен, соске тегани на шунѓа мле молитве башо мо ром хем те сасљарел ле? Џанѓола пе, амен на џанаја сар састиле акала дуј пхења ама џанаја кај о Јехова ка чхивел крајо башо са о муке хем кај ов едвај аџикерела те воскреснинел пле амален со муле (Јов 14:15).

8. а) Спрема Исаија 43:2, сар поддржинела амен о Јехова? б) Сар шај и молитва те поможинел аменге кеда накхаја таро пхаре времија? (Дикх о видеоклипи И молитва дела амен сила те издржина.)

⁸ О Јехова секогаш ка поддржинел амен. Адалеске со бут мангела амен, о Јехова на мангела те дикхел сар мучинаја амен (Иса. 63:9). Сепак ов нане те цидел са амаре проблемија кола со шај те спорединен пе рекаја или јагаја. (Читин Исаија 43:2.) Ама ов ветинела кај ка поможинел амен те „накха преку“ ленде. Исто аѓаар нане те дозволинел о проблемија со иси амен те керен аменге трајно штета. О Јехова преку пли сила ка поможинел аменге те истрајна (Лука 11:13; Фил. 4:13). Аѓаар, ка ова увериме кај ов секогаш ка дел амен баш адава со ваљани аменге те шај те истрајна хем те ачхова леске верна.d

СО ОЧЕКУЈНЕЛА АМЕНДАР О ЈЕХОВА?

9. Сар о лафија таро Јаков 1:6, 7 поможинена аменге те дикха соске ваљани те овел амен доверба кај о Јехова ка поможинел аменге?

⁹ О Јехова очекујнела амендар те овел амен доверба ки лесте (Евр. 11:6). Понекогаш амаре проблемија шај те овен аменге добором пхаре со нашти те издржина лен. Шај чак те почмина те сумнина амен дали о Јехова чаче ка поможинел амен. Ама и Библија уверинела амен кај е Девлескере силаја ка шај „ѕидија те укља“ (Пс. 18:29). Адалеске, наместо те мукха о сумње те бајрон ки аменде, ваљани те молина амен вераја е Јеховаске хем те овел амен доверба кај ов ка одговоринел аменге. (Читин Јаков 1:6, 7.)

10. Вакер пример башо адава сар шај те постапина спрема амаре молитве.

¹⁰ О Јехова очекујнела амендар те постапина спрема амаре молитве. На пример, јекх пхрал шај те молинел е Јехова те поможинел леске те добинел слободна диве тари бути те шај те џал ко регионално конгрес. Сар шај о Јехова те одговоринел ки лескири молитва? Ов шај те дел ле храброст те шај те керел лафи пле шефеа. Сепак о пхрал ка ваљани те џал те керел лафи башо слободна диве. Шај ка ваљани те керел леа лафи повише пути. Шај ка ваљани те родел те менинел пе несаве колегаја те џал јавер смена ки бути. Хем ако ваљани, шај чак ка лел слободна диве бизо те овел платимо.

11. Соске ваљани повише пути те молина амен башо нешто сој аменге важно?

¹¹ О Јехова очекујнела повише пути те молина амен леске башо буќа со секиринена амен (1. Сол. 5:17). Сар со шај те дикха таро е Исусескере лафија, несаве буќа башо кола со молинаја амен нане те добина лен одма (Лука 11:9). Адалеске ма откажин тут! Молин тут таро вило хем повише пути (Лука 18:1-7). Кеда повише пути молинаја амен баши несави бути тегани сикаваја е Јеховаске кај адава нане само моментално желба. Исто аѓаар сикаваја вера кај ов шај те поможинел аменге.

СОСКЕ ШАЈ КА ВАЉАНИ ТЕ МОЛИНА АМЕН БАШО НЕШТО ЈАВЕР?

12. а) Кова тано јекх пучибе со ваљани те пуча амен башо амаре молитве хем соске? б) Сар шај те ова сигурна кај амаре молитвенцар сикаваја кај поштујнаја е Јехова? (Дикх и рамка „Дали мле молитве сикавена кај поштујнава е Јехова?“)

¹² Ако на добинаја адава башо со молинѓем амен, шај те пуча амен трин пучиба. О прво тано: „Дали молинава ман баши исправно бути?“ Бут пути мислинаја кај амен џанаја сој аменге најшукар. Ама о буќа башо со молинаја амен шај нане о најшукар решение. Ако молинаја амен башо несаво проблеми, шај иси бут пошукар решение таро адава со амен мислинаја. А несаве буќа башо со молинаја шај нане спрема е Јеховаскири волја (1. Јов. 5:14). Те размислина башо пример е родителенгоро со спомнинѓем лен англедер. Ола молинѓе е Јехова те керел ленгоро чхаво те ачхол ко чачипе. Иако нане погрешно те молина амен башо акава, сепак те овел амен ки годи кај о Јехова нане никас силаја те чхивел те служинел леске. Ов мангела сарине амен, коте сој вклучиме хем амаре чхаве, коркори те бирина те служина леске (5. Мој. 10:12, 13; 30:19, 20). Адалеске, о родителија шај те молинен е Јехова башо нешто јавер — те поможинел ленге те ресен џи ко вило пумаре чхавескоро те шај те овел поттикнимо те мангел е Јехова хем те овел лескоро амал (Изр. 22:6; Еф. 6:4).

13. Спрема 1. Петарескоро 5:6, 7, кеда ка поможинел амен о Јехова? Објаснин.

¹³ О дујто пучибе тано: „Дали акана тано о време о Јехова те дел ман адава башо со молинава ман?“ Шај мислинаја аменге кај ваљани одма те добина одговор ко амаре молитве. Ама ма те бистра, о Јехова џанела кеда најшукар те поможинел аменге. (Читин 1. Петарескоро 5:6, 7.) Кеда на добинаја одма адава башо со молинаја, шај те мислина аменге кај о одговор тано „на“. Ама лескоро одговор уствари шај те овел „панда на“. На пример, размислин башо терно пхрал кова со молинѓа пе те сасљол. Те сасљарел ле сине о Јехова чудоја, тегани о Сатана ка шај сине те вакерел кај о пхрал продолжинѓа те служинел е Јеховаске само адалеске со сасљарѓа ле (Јов 1:9-11; 2:4). Освен адава, о Јехова одрединѓа више време кеда ка сасљарел са о насвалипа (Иса. 33:24; Отк. 21:3, 4). Џи тегани, нашти те очекујна о Јехова чудоја те сасљарел амен. Адалеске, о пхрал шај те молинел пе башо нешто јавер, о Јехова те дел ле сила хем андруно мир те шај те истрајнел иако тано насвало хем те продолжинел верно те служинел леске (Пс. 29:11).

14. Со шај те сикљова тари Џенис?

¹⁴ Те размислина баши Џенис, која со молинѓа пе те џал ко Бетел. Пало панџ берш ој халили кај о Јехова одговоринѓа ко лакере молитве, ама ко појавер начин. Ој вакерела: „О Јехова користинѓа адава време те шај те сикавел ман хем те поможинел манге те овав пошукар христијанка. Ваљани сине те овел ман побари доверба ки лесте, те овен ман пошукар навике проучибаске хем те сикљовав те овав радосно бизи разлика коте ка служинав е Јеховаске“. Покасно и Џенис хем лакоро ром сине викиме те служинен ки покраинско служба. Кеда сетинела пе и Џенис вакерела: „О Јехова одговоринѓа ко мле молитве, ама на аѓаар сар ме со очекујнѓум. Ваљанѓа манге време те хаљовав кај о одговор со денѓа ман о Јехова тано јекх бут шужо поклон. Бут сиум благодарно со осетинѓум лескоро мангипе хем шукарипе.“

15. Соске понекогаш на ваљани те ова бут конкретна ко амаре молитве? (Дикх хем о слике.)

¹⁵ О трито пучибе тано: „Дали ваљани те молинав ман башо нешто јавер?“ Шукар тано те ова конкретна ко амаре молитве. Ама те шај те хаљова која тани е Јеховаскири волја аменге, понекогаш шај амаре молитве ка ваљани те овен поопшта. Те размислина башо пример е пхењакоро со молинѓа пе те џал ки Школа башо полновремена објавителија. Ој мангља те џал ки адаја Школа те шај те служинел коте со иси побари потреба. Адалеске, џикоте продолжинела те молинел пе те овел викими ки Школа, ој исто аѓаар шај те молинел е Јехова те поможинел лаке те дикхел кола јавера прилике иси те шај те бајрарел пли служба (Апо. 16:9, 10). Пало адава, ој шај те постапинел спрема пли молитва аѓаар со ка пучел е покраинско надгледнико дали иси несаво собрание паше каске со ваљани помош таро пионерија. Или шај те пишинел џи ко Бетел те шај те дознајнел коте иси побари потреба таро објавителија.e

16. Ко со шај те ова увериме?

¹⁶ Сар со дикхлем ки акаја статија, шај те ова увериме кај о Јехова ка одговоринел ко амаре молитве ко јекх љубезно хем праведно начин (Пс. 4:3; Иса. 30:18). Понекогаш шај нане те добина о одговор со очекујнѓем ле. Ама о Јехова секогаш ка шунел амаре молитве соске ов бут мангела амен хем никогаш нане те мукхел амен (Пс. 9:10). Адалеске понадари да нека овел амен доверба ки лесте „ко секова време“ аѓаар со ка пхрава леске амаро вило ки молитва (Пс. 62:8).