Različna veruvanja

Hinduistija

Ola verujnena kaj o manuš bijangjovela poviše puti ko različno telo. Adaleske, keda nekoj cidela muke adava tano soske kergja nešto lošno ko akava životo ili ko nesavo javer životo angleder. O muke šaj te oven čhinavde ako o manuš dobinela mokša — oslobodibe taro krugo palem te ovel bijamo hem te merel.

Muslimanja

Ola verujnena kaj keda nekoj cidena muke adava tano ili kazna bašo leskere grevija ili ispit baši leskiri vera. Sprema o d-r Said Sajed, kova soj tano pretsedateli ki Islamsko versko zaednica tari Severno Amerika, o tragedie setinkerena amen „kaj valjani te ova blagodarna e Devleske bašo bereketija so dela amen hem kaj valjani te pomožina adalenge so isi len nesavi potreba“.

Evrejska veruvanja

Ola verujnena kaj o muke tane posledice taro lična postapke. Nesave lendar verujnena kaj adala so sine nepravedno mučime ka dobinen pravda otkeda ka voskresninen. I kabala (tradicionalno evrejsko misticizam) sikavela kaj isi reinkarnacija hem kaj oj dela e manušeske prilika te popravinel ple greške so kergja len angleder.

Budistija

Ola verujnena kaj o manuš bijangjovela poviše puti hem kaj cidela muke sa džikote celosno na oslobodinela pe taro neispravna postapke, čuvstvija hem želbe. Ako nekoj sikavela mudrost, kerela šukar bukja hem meditacija, tegani šaj te dobinel nirvana — sostojba kote so nane muke.

Konfučijanistija

Spored jekh rečniko o konfučijanistija mislinena kaj pobaro delo taro muke tane rezultati „taro manušikane greške“ (Dic­tio­nary of Comparative Re­li­gion). Ola verujnena kaj ako nekoj kerela šukar bukja ka oven le pohari muke. Sepak, mislinena kaj but muke predizvikujnena len o duhovna suštestvija kola soj but posilna taro manuša hem kaj ednostavno valjani te prifatinel pe adava.

Nesave plemenska religie

Sprema lengoro veruvanje, i pričina bašo muke tane o magie. Adala so kerena magie, šaj te keren te slučinel pe nekaske nešto šukar ili lošno. Te šaj te ovel potikno o dejstvo e magijakoro, valjani te keren pe nesave ritualija. Keda nekoj nasvaljovela, verujnela pe kaj kerdo tano leske magija hem kaj lakoro dejstvo šaj te ovel potikno ako kerena nesave obredija hem lena iljačija kola so kerena o bajačija.

Hristijanja

Ola verujnena kaj i pričina soske cidaja muke tano o grevo so kergje le o prva manuša, o Adam hem i Eva, kolenge so kerela pe lafi ki Biblija. Sepak, but hristijanska religie meningje akava sikljojbe. Na primer, nesave katolikija vakerena kaj nekoj šaj te molinel e Devle te prifatinel leskere muke hem bašo adava te del bereketi e Crkva ili nesave javere manuše.