Anton Petrus/Moment via Getty Images
AČHOVEN DŽANGAVDE!
Ka avel li dži ki svetsko vojna? — So vakerela i Biblija?
Ko posledna 30 berš, but manuša mislinena kaj o odnosija maškar o phuvja tane stabilna, pa čak ovena sa pošukar. Sepak, o bukja so slučingje pe sigende, sikavgje kaj adava šaj nane baš agjaar.
„O Izrael hem o Hezbolah borinena pe ki granica taro Liban džikote o manuša tane sekirime kaj i vojna ki Gaza ka vlijajnel upro javera phuvja taro adava regioni“ (Reuters, 6 januari 2024).
„Grupe kontrolirime taro Iran napadinena različna thana. Osven adava, o Iran palem počmingja te razvinel pli nuklearno programa, a i Rusija hem i Kina poddržinena le. Sa akava tani nevi opasnost bašo zapadna phuvja“ (The New York Times, 7 januari 2024).
„O napadija tari Rusija ponadari da kerena bari šteta ki Ukraina“ (UN News, 11 januari 2024).
„I Kina tani sa poviše mokjno ko ekonomsko hem voeno pogled, o Tajvan tano sa pogordo baši pli nacionalnost, hem o odnosija maškar i Kina hem o SAD tane napnata. Sa akava lokhe šaj te anel dži ko konflikt“ (The Japan Times, 9 januari 2024).
Dali i Biblija vakerela nešto baši nestabilno situacija so isi ko sveto avdive? Ka ovel li svetsko vojna?
O bukja so slučinena pe avdive tane prorokujme ki Biblija
Ki Biblija nane proroštvo baši nesavi konkretno vojna so slučinela pe avdive. Sepak, oj prorokujnela bašo nekontrolirana vojne kola soj tane but česta avdive hem kola so lena o mir tari phuv (Otkrovenie 6:4).
Ko lil Daniel tano prorokujmo kaj „ko vreme e krajoskoro“, o svetska sile ka natprevarinen pe jekh jekhaja baši mokj hem vlast. Jekh način sar kerena adava tano agjaar so sikavena kobor isi len bari voeno mokj hem trošinena but pare (Daniel 11:40, 42, 43).
Vojna koja so valjani te avel
Tari Biblija doznajnaja kaj angleder i situacija ko sveto te ovel pošukar, prvo mora te ovel pološno. O Isus prorokujngja kaj „ka ovel bari nevolja savi so na sine taro početok e svetoskoro dži akana, a ni nane te ovel više“ (Matej 24:21). Adaja „bari nevolja“ ka anel dži ki vojna so vikinela pe Armagedon, baši koja so ki Biblija pišinela kaj tani „vojna so ka ovel ko baro dive e Semokjno Devleskoro“ (Otkrovenie 16:14, 16).
Ama, o Armagedon nane te uništinel e manušen, nego ka spasinel len. Preku adaja vojna, o Devel ka čhivel krajo e manušikane vladibaske, kova so angja dži ko but vojne. Te šaj te doznajne sar o Armagedon ka anel večno mir, čitin akala statie: