И тайна която лошанас кай жанас

Пхенгяс ли туке декхой десави тайна? —a И Библия хоратинел йекхе специалноне тайнаке, която пхенел пес „и свещено тайна“. Ой си свещено, соскето си таро Дел. Пхенел пес тайна, соскето о мануша на жаненас ла. Дори о ангеля мангенас те жанен ла. Ту, мангес ли те жанес дайкха тайна? —

Англал бут, бут време о Дел създингяс е първоне мрушес тай е първоне жувля. Он пхененас пес Адам тай Ева. О Дел диняс лен шукар тхан кате те бешен — и Едемско градина. Ако шуненас е Девлес, он тай ленгере чшаве ащине те керен и цело пхув рай сар далкхе градинате. Тай ащине те живинен вечно андо рай. Ама дес ли тут годи со керде о Адам тай и Ева? —

Он на уле послушна е Девлеске тай адалкхеске авдиес и пхув нанай рай. Ама о Дел пхенгяс, кай ка керел и цело пхув шукар тай секой ка овел щастливо тай ка живинел вечно. Сар ка керелас давкха? Бут време о мануша на жаненас. Давкха уло тайна.

Кана о Исус ало ки пхув, пхенгяс е манушенге по–бут далкхе тайнаке. Пхенгяс ленге, кай ой си е Девлескере Тхагарипнаске. Сикавгяс лен те молинен пес, давкха Тхагарипе те авел. Ов ка керел и пхув шукар рай.

Лошанес ли кай жанес дайкха тайна? — Помнине, кай само окола, колато си послушна е Йеховаске, ка живинен андо рай. И Библия хоратинел буте мрушенге тай жувлиенге, колато уле послушна е Йеховаске. Мангес ли те сикльовес по–бут ленге? — Нека те дикхас кола уле десаве далкхе манушендар тай сар ащи те овас сар ленде.