10 Уроки

Сар те аракхес и чачуни религия

Те мангесa те овес амал е Девлеса, требе те дес лес коч ачука сар ов дехел. О Исус пхенгяс кай „е Девлескере чачуне мануша“ ка ден лес коч „чачипеса.“ (Йоан 4:23, 24) Иси само екх чачуно дром те дес коч е Девлес. (Ефесяни 4:4–6) И чачуни религия анел джи ко са животи, а и хохавани религия анел джи ко мериба. (Maтей 7:13, 14)

Ка пенджарес и чачуни религия кана дикхес со керен лакере мануша. О Йехова си лачшо. Ачука окола колато ден лес коч требе те овен лачше. Сарто екх шукар пхабаякоро каш дел шукар пхабая, ачука и чачуни религия керел е манушен лачше. (Maтей 7:15–20)

Е Йеховаскере амала бут саидинен и Библия. Он джанен кай и Библия си таро Дел. Адалкхеске и Библия сикавел лен сар те живинен тай сар те икльовен таре проблемя. Ой акандел лен те сикльовен е Девлеске. (2 Тимотей 3:16) Он керен давкха со вакерен е аверенге.

Е Йеховаскере амала дехен пес. О Исус дехелас е манушен. Адалкхеске сикавелас лен е Девлеске тай саскярелас е насвален. О мануша тари чачуни религия дехен е аверен. Сар о Исус, он дикхен лачше якхаса саворе манушен: е чорен — е барвален, е кален — е парнен. О Исус пхенгяс кай лескере сикавне ка дехен пес, тай ачука о мануша ка пенджарен лен. (Йоан 13:35)

Е Девлескере амала саидинен лескоро алав — Йехова. Декхой те на пхенела туке алавесте, то амал ли си? Нанай! Кана иси амен амал пхенас леске алавесте, тай вакерас шукар букя леске. О мануша колато манген те овен Девлескере амала требе те пхенен леске алавесте, тай те керен пхеряс леске е аверенге. О Йехова мангел амен–да те керас давкха. (Maтей 6:9; Римляни 10:13, 14)

Сар о Исус, е Девлескере амала сикавен е манушен е Девлескере Тхагарипеске. Е Девлескоро Тхагарипе си правителство андо дел ковато ка керел и пхув девлети. Е Девлескере амала вакерен давкха лачшо невипе е Девлескере Тхагарипеске. (Матей 24:14)

Е Йеховаскере свидетеля керен са со ащи та те овен амала е Девлеса. Он саидинен и Библия, тай дехен пес машкар песте. Он пхенен тай саидинен е Девлескоро алав, тай сикавен аверен–да е Девлескере Тхагарипеске. Авдиес и чачуни религия ки састи пхув си е Йеховаскере свидетеля.