34 УРОКИ
Сар ащи те сикавас амари любов кариг о Йехова?
Дали дехес е Девлес по-бут, отсарто започнингян те изучинес и Библия? Мангес ли те ачшовес са по-близко амал леса? Тогава ма бистер, кай кана ов дикхел кизом бари ачшол ти любов кариг лесте, ов-да ка дехел тут тай ка дикхел за туке са по-бут. Сар ащи те сикавес ти любов кариг лесте?
1. Сар те сикавас е Йеховаске, кай дехас лес?
Аме сикавас, кай дехас е Йеховас, като шунас лес. (Четине 1 Йоан 5:3.) Ов на традел никхас зорле те шунел лес, а мукел секо йекх амендар те решинел коркоро дали те шунел лес. Соске? О Йехова мангел те шунас лес вогиестар. (Римляни 6:17) Демек ов мангел те шунес лес, ма соскето требе, а соскето дехес лес. И 3 тай и 4 част таро лил ка помагинен туке те сикавес ти любов кариг о Йехова, като керес о букя, колато ов мангел, тай като отчшиес о букя, колато дукхавен лес.
2. Соске подекхана ащи те овел аменге пхаро те сикавас амари любов кариг о Йехова?
И Библия пхенел: „Е праведноне манушес иси бут проблемя.“ (Псалм 34:19) Саворенге пречинел о безех. Подекхана на ресен аменге о парес, ачшон несправедлива букя амаре животосте или иси амен авер проблемя. Тогава ащи те овел аменге пхаро те керас о букя, колато о Йехова мангел амендар, соскето си по-лесно те на шунас лес. Ама кана ачшовес верно е Йеховаске тай керес со пхенел туке ов, сикавес, кай най-бут дехес лес тай кай нанай те мукес лес. Тогава о Йехова-да ка овел верно кариг туте. Ов нисар нанай те мукел тут. (Четине Псалм 4:3.)
РОДЕ ПО-ХОРЕСТЕ
Ахальов соске анес радост е Йеховаске, кана шунес лес, тай со ащи те помагинел туке те ачшовес леске верно.
3. О Бенг обвининел тут
Ки Библия андо лил Йов пхенел пес, кай о Бенг обвинингяс ма само е Йовес, а саворе манушен, колато манген те служинен е Йеховаске. Четинен Йов 1:1, 6 — 2:10 тай хоратинен калке въпросиенге:
Според о Бенг, соске о Йов шунелас е Йеховас? (Дикх Йов 1:9-11.)
Со пхенел о Бенг за саворе манушенге тай за туке-да? (Дикх Йов 2:4.)
Четинен Йов 27:5б тай хоратинен калке въпросиеске:
Сар о Йов сикавгяс, кай наистина дехел е Йеховас?
О Йов сикавгяс пи любов кариг о Йехова, като ачшило леске верно
Аме сикавас амари любов кариг о Йехова, като ачшовас леске верна
4. Дикх те анес радост е Йеховаске
Четинен Притчи 27:11 тай хоратинен калке въпросиенге:
Сар чувствинел пес о Йехова, кана сикавес, кай синян гогявер тай шунес лес? Соске?
5. Ащи те овес верно е Йеховаске
Амари любов кариг о Йехова традел амен те хоратинас за леске околенца. Аме синям верна леске, аке соске хоратинас за леске, даже кана нанай аменге лесно. Дикхен о КЛИПИ тай хоратинен калке въпросиенге:
Дали подекхана си туке трудно те хоратинес околенца е Йеховаске?
Со помагингяс е пхралеске таро клипи те на дарал?
По-лесно си те овас верна е Йеховаске, кана дехас о букя, колато ов дехел, тай мразинас о букя, колато ов мразинел. Четинен Псалм 97:10 тай хоратинен калке въпросиенге:
Жи акана саве букя ахалилян, кай дехел о Йехова? Саве букя мразинел?
Со ка помагинел туке те дехес со си лачшо тай те мразинес со си кханило?
6. Амаре лачшипнаске си те шунас е Йеховас
Винаги си амаре лачшипнаске те шунас е Йеховас. Четинен Исаия 48:17, 18 тай хоратинен калке въпросиенге:
Верувинес ли, кай о букя, колато о Йехова мангел амендар, винаги си амаре лачшипнаске? Соске?
Сар помагингяс туке жи акана кавка, кай изучинес и Библия тай жанес по-бут е Йеховаске?
ДЕСАВЕ МАНУША ПХЕНЕН: „Е Девлеске нанай значение со керав.“
Саво стихи ащи те четинес е манушеске, за те сикавес, кай о букя, колато керас, ащи или те анен радост е Девлеске или те дукхавен лес?
СО СИКЛИЛЯМ
Аме сикавас, кай дехас е Йеховас, като шунас лес тай като продължинас те керас о букя, колато ов мангел, даже кана си аменге пхаро.
О най-важна букя таро уроки
Со сиклилян таро Йов?
Сар ка сикавес ти любов кариг о Дел?
Со ка помагинел туке те ачшовес верно е Йеховаске?
АХАЛЬОВ ПО-БУТ
Ахальов сар ащи те овес верно е Йеховаске тай лескере организацияке.
Ахальов сар о Бенг обвининел е манушен.
Йов остава лоялен спрямо Бога („Библията — какво е нейното послание?“, 6 част)
Дикх сар даже о чшаве ащи те сикавен пи любов кариг о Йехова.
Сар о терне ащи те ачшовен верна е Девлеске, даже кана окола траден лен те керен кханиле букя?