Кибор си важно е Йеховаскоро алав аменге?

1-2. Катар ахальовас, кай е Йеховаскоро алав си важно е Исусеске?

Е Исусеске нанай нищо по-важно таре Йеховаскоро алав. Никхой на кергяс по-бут лестар, за те жанел пес кавка алав. Таро предишно уроки ахалилям, кай о Исусес сине готово те мерел, за те сикавел, кай о Йехова си свято тай кай всичко си керел си шукар. (Мар. 14:36; Евр. 10:7-9) Ов ка овел готово те иринел пе Дадеске и цело власт, кана свършинен о 1000 бреша, коленде ка управлинел, соскето мангел и цело слава те овел е Йеховаске. (1 Кор. 15:26-28) Всичко со кергяс о Исусес е Йеховаске сикавел, кай ов бут дехел лес.

² О Исусес ало ки пхув, за те хоратинел е Йеховаске. (Йоан 5:43; 12:13) Ов пхенгяс пе ученикиенге пе Дадескоро алав. (Йоан 17:6, 26) Кана сикавелас е манушен тай керелас чудеса, ов сикавелас, кай о Йехова дел лес мъдрост тай сила, за те керел калка букя. (Йоан 10:25) Тай кана молингяс е Йеховас те дикхел лескере ученикиенге, ов пхенгяс леске те керел давкха „ашал пере алавеске“. (Йоан 17:11) Е Девлескоро алав сине о най-важно е Исусеске. Тогава сар ащи декхой те пхенел, кай си християни, ако на жанел тай на използвинел е Йеховаскоро алав?

3. Со ка дикхас калке урокиесте?

³ Аме синям истинска християня тай дикхас те овас сар о Исусес, като сикавас, кай е Йеховаскоро алав си аменге важно. (1 Пет. 2:21) Калке урокиесте ка дикхас соске о Йехова диняс по алав калкен, колато „шунярен и лачши новина е Царствоске“. (Мат. 24:14) Ка дикхас също кибор важно требе те овел е Йеховаскоро алав секоне йекхеске амендар.

НАРОДОС ЛЕСКЕРЕ АЛАВЕСКЕ

4. а) Со пхенгяс о Исусес пе ученикиенге, англал те иринел пес ко небес? б) Со ащи те пучас амен ашал далкхеске со пхенгяс о Исусес?

⁴ Англал те иринел пес ко небес, о Исусес пхенгяс пе ученикиенге: „Кана о свято духос ка авел упрал туменде, ка овел тумен сила тай ка овен свидетеля за манге ко Йерусалим, ки цело Юдея тай ки Самария тай жи ко тхана ки пхув, колато си най-дуре.“ (Деян. 1:8) О ученикя ка проповединенас и лачши новина насекъде, а ма само ко Израил, тай мануша саворе народовиендар ка ащине те ачшон е Исусескере ученикя. (Мат. 28:19, 20) Ама о Исусес пхенгяс: „Ка овен свидетеля за манге.“ Дали калка неве ученикя ка требелас те жанен е Йеховаскоро алав или ка хоратиненас само е Исусеске? О букя, колато ачшиле тай коленге четинас ко Деяния 15 шеро, ка помагинен аменге те ахальовас.

5. Сар о апостоля тай о старейшиня ко Йерусалим сикавде, кай саворе народовя требе те жанен е Йеховаскоро алав? (Дикх и картинка-да.)

⁵ Презал о 49 бреш о апостоля тай о старейшиня ко Йерусалим кидисайле, за те хоратинен далкхеске со требе те керен калка, колато нанай юдея, за те ачшон християня. Ко крайос о Яков, е Исусескоро пхрал, пхенгяс: [О Петрес] бут шукар пхенгяс, кай акана о Дел приеминел саворе народовиен, за те керел лендар йекх народос пе алавеске.“ Каскере алавеске хоратинелас о Яков? Ов пхенгяс о думес, колато пишингяс о пророки Амос: „За те ащи калка, колато ачшиле калке народостар, те роден е Йеховас целоне вогиеса заедно манушенца саворе народовиендар, демек е манушенца, колато пхиравен мо алав — пхенел о Йехова.“ (Деян. 15:14-18) Калка неве ученикя ма само ка сикльонас е Йеховаске, ама ка пхиравенас лескоро алав-да. Давкха означинел, кай он ка шуняренас е Девлескоро алав тай кай о мануша ка жаненас, кай он хоратинен лескере алавестар.

6-7. а) Соске о Исусес ало ки пхув? б) Со сине о най-важно, ковато требелас те керел о Исусес ки пхув?

⁶ Е Исусескоро алав означинел „о Йехова си спасение“. О Йехова използвингяс е Исусес, за те спасинел саворе манушен, колен иси вяра лесте тай лескере Чшавесте. О Исусес ало ки пхув, за те дел по животос е манушенге тай те ащи ленгере безеха те овен простиме тай те овел лен вечно животос. (Мат. 20:28; Йоан 3:16)

⁷ Ама соске требелас о Исусес те дел по животос е манушенге? Ашал далкхеске со ачшило ки Едемско градина. Сарто ахалилям ко предишно уроки, о първа мануша, о Адам тай и Ева, ухтиниле мамуй о Йехова тай нашалде по вечно животос. (Бит. 3:6, 24) Ама о Исусес ало ки пхув, за те керел нещо бут по-важно далкхестар те спасинел е манушен. О Бенг пхенгясас бут грозна букя е Йеховаске. (Бит. 3:4, 5) Аке соске о мануша требелас те ахальовен, кай о Йехова на кергяс нищо кханило тай кай лескоро алав си свято. Тай о Исусес най-шукар ащине те сикавел калка букя, соскето ов ало е Йеховаскере алавестар тай кергяс всичко точно, сарто о Йехова мангелас.

8. Со требелас те ахальовен саворе християня?

⁸ Саворе християня, требелас те жанен, кай ленгоро спасение си таро Йехова. (Йоан 17:3) Тай он-да сар о Исусес ка пхиравенас е Йеховаскоро алав. Он требелес също те ахальовен кибор си важно те помагинен лескоро алав те овел свято. Е Исусескере ученикя требелас те керен давкха, за те овен спасиме. (Деян. 2:21, 22) Он требелас те сикльон ма само е Исусеске, ама е Йеховаске-да. Аке соске ко крайос пе молитвате, която четинас ко 17 шеро таро лил Йоан пхенгяс: „Пхенгьом ленге то алав тай ка продължинав те пхенав лес, за те ащи он те дехен тут, сарто ту дехес ман, тай за те овав йекх ленца.“ (Йоан 17:26)

„ТУМЕ СИНЬЕН МЕРЕ СВИДЕТЕЛЯ“

9. Сар ащи те сикавас, кай е Йеховаскоро алав си важно аменге?

⁹ Сарто дикхлям, за те овас е Исусескере ученикя, требе те помагинас е Йеховаскоро алав те овел свято. (Мат. 6:9, 10) Кавка алав требе те овел о най-важно аменге тай давкха требе те дикхьол таро букя, колато керас. Тогава со ащи те керас, за те помагинас е Йеховаскоро алав те овел свято тай те сикавас, кай о букя, колато о Бенг пхенгяс за леске нанай верна?

10. Со пхенел пес ко Исаия 42 шеро жи ко 44 шеро? (Исаия 43:9; 44:7-9) (Дикх и картинка-да.)

¹⁰ Таро Исаия 42 шеро жи ко 44 шеро ахальовас со ащи те керас, за те овел е Йеховаскоро алав свято. Отхе пишинел, кай все едно водинел пес делос далкхеске кой си о истинско Дел. О Йехова пхенел калкенге, колато на служинен леске, те сикавен, кай ленгере девла си истинска. Ама никхой лендар нащи те керел давкха! (Четине Исаия 43:9; 44:7-9.)

11. Со пхенел о Йехова пе манушенге ко Исаия 43:10-12?

¹¹ Четине Исаия 43:10-12. О Йехова пхенел пе манушенге: „Туме синьен мере свидетеля ... кай ме синьом о Дел.“ После пучел лен: „Иси ли авер Дел освен манде?“ (Иса. 44:8) Аме синям щастлива, кай ащи те отговоринас калке въпросиеске. Е букиенца, колато пхенас тай керас, сикавас, кай само о Йехова си Дел. Лескоро алав си о най-баро. Амаре животоса сикавас, кай вогиестар дехас е Йеховас тай кай синям леске верна, со-да те керел о Бенг, за те спиринел амен. Калке букиенца ащи те помагинас е Девлескоро алав те овел свято.

12. Сар ачшиле о думес таро Исаия 40:3, 5?

¹² Кана помагинас е Йеховаскоро алав те овел свято, аме синям сар о Исусес. О Исаия пхенгяс, кай декхой ка „разчистинел“, или ка „подготвинел“, о дром е Йеховаске. (Иса. 40:3) Сар ачшило давкха? О Йоан Кръстител подготвингяс о дром англал о Исусес, ковато ало тай хоратингяс е Йеховаскере алавестар. (Мат. 3:3; Мар. 1:2-4; Лука 3:3-6) О пророк Исаия пхенгяс още: „Е Йеховаскери слава ка овел сикавди.“ (Иса. 40:5) Сар ачшило давкха? О Исусес боркха бут препел упрал пе Дадесте тай кана сине ки пхув боркха шукар сикавгяс саво си ов, кай все едно о Йехова сине ки пхув. (Йоан 12:45)

13. Сар ащи те овас сар о Исусес?

¹³ Аме, сар о Исусес, синям е Йеховаскере свидетеля, пхиравас е Йеховаскоро алав тай пхенас саворенге е шукаре букиенге, колато ов кергяс. Ама за те овас лачше свидетеля е Йеховаске, требе те сикавас е манушен всичконаске со кергяс о Исусес-да, за те помагинел е Йеховаскоро алав те овел свято. (Деян. 1:8) О Исусес си о най-лачшо Свидетели е Йеховаскоро тай аме дикхас те овас сар лесте. (Откр. 1:5) Со авер ащи те керас, за те сикавас, кай е Йеховаскоро алав си важно аменге?

САР СИКАВАС, КАЙ Е ЙЕХОВАСКОРО АЛАВ СИ АМЕНГЕ ВАЖНО

14. Соске керас амаро барипе е Йеховаскере алавеса? (Псалм 105:3)

¹⁴ Аме керас амаро барипе е Йеховаскере алавеса. (Четине Псалм 105:3.) Анас бари радост е Йеховаске, кана хвалинас амен, кай ов си амаро Дел. (Йер. 9:23, 24; 1 Кор. 1:31; 2 Кор. 10:17) Аменге си баро подаръки, кай ащи те пхенас околенге, кай о Йехова си свято тай всичко со керел ов си шукар. Нисар на требе те лажас те пхенас амаре колегиенге, съученикиенге или комшидоненге, кай синям е Йеховаскере свидетеля. О Бенг мангел те спиринас те хоратинас околенге е Йеховаскере алавеске. (Йер. 11:21; Откр. 12:17) Ов тай калка, колато помагинен леске те хохавел е народос, манген о мануша те бистерен е Йеховаскоро алав. (Йер. 23:26, 27) Ама ашал далкхеске, кай дехас е Йеховаскоро алав, аме мангас винаги те славинас лес. (Пс. 5:11; 89:16)

15. Со означинел те викинас е Йеховас лескере алавеса?

¹⁵ Аме продължинас те викинас е Йеховас лескере алавеса. (Йоил 2:32; Рим. 10:13, 14) Давкха на означинел само кай жанас лескоро алав тай използвинас лес. Аме пенжарас е Девлес, мукас амен леске андо васта, родас помощ лестар тай молинас лес те сикавел аменге о дром. (Пс. 20:7; 99:6; 116:4; 145:18) Викинас е Йеховас лескере алавеса също като пхенас околенге сар си лескоро алав тай саво си о Йехова тай помагинас ленге те променинен по животос, за те ащи те служинен леске тай те овен спасиме. (Иса. 12:4; Деян. 2:21, 38)

16. Сар ащи те сикавас, кай о Бенг хохавел?

¹⁶ Аме синям готова те страдинас ашал е Йеховаскоро алав. (Як. 5:10, 11) Като ачшовас верна е Йеховаске даже кана си аменге пхаро, сикавас, кай о Бенг си хохавно. Ке Йовескере диеса, о Бенг пхенгяс: „Мануш ка дел всичко, за те ачшол живдо.“ (Йов 2:4) О Бенг мангелас те пхенел, кай о мануша ка служинен е Йеховаске само кана си ленге лесно тай кана иси лен проблемя, ка мукен лес. О Йов сикавгяс, кай давкха нанай верно. Аме-да ащи те сикавас, кай даже ако амаро животос ачшол бут пхаро или ако о Бенг дикхел те спиринел амен те служинас амаре Девлеске, аме нанай те иринас думо е Йеховаске. Ащи те овас сигурна, кай ов ка дикхел аменге ашал пере алавеске. (Йоан 17:11)

17. Сар ащи те анас слава е Йеховаскере алавеске? (1 Петър 2:12)

¹⁷ Аме дас всичко амендар, за те анас слава е Йеховаскере алавеске. (Пр. 30:9; Йер. 7:8-11) О мануша жанен, кай аме синям е Йеховаскере свидетеля тай далкхеса со керас ащи или те анас слава лескере алавеске, или те керас о мануша те мислинен кханиле букя за леске. (Четине 1 Петър 2:12.) Аке соске аме мангас всичконаса со пхенас тай керас те хвалинас е Йеховас. Кана керас давкха, въпреки кай синям безехале, ащи те анас слава лескере алавеске.

18. Сар още ащи те сикавас, кай е Йеховаскоро алав си аменге важно? (Дикх и бележка-да.)

¹⁸ Аме славинас е Йеховаскоро алав со-да те мислинен о мануша аменге. (Пс. 138:2) Соске давкха си боркха важно? Соскето е манушенге ащи те на харешинел, кай керас о букя, колато мангел о Йехова, тай он ащи те хоратинен кханиле букя за аменге.a О Исусес сине готово те мерел сар престъпники, за те анел слава е Йеховаскере алавеске. Ов муло „без те лажал“, соскето на халас боркха бут холи далкхеске со мислинен о мануша леске. (Евр. 12:2-4) О най-важно сине леске те керел давкха со мангел о Дел. (Мат. 26:39)

19. Кибор важно си туке е Йеховаскоро алав тай соске?

¹⁹ Аме керас амаро барипе е Йеховаскере алавеса. Аменге си баро подаръки те овас е Йеховаскере свидетеля. Аке соске со-да те пхенен о мануша, аме ка продължинас те славинас лес. Е Йеховаскоро алав си по-важно аменге далкхестар со мислинен песке о мануша аменге. Даже ако о Бенг дикхел те спиринел амен те служинас амаре Девлеске, аме ка продължинас те славинас е Йеховас. Като керас давкха ка сикавас, кай лескоро алав си о най-важно аменге-да, сарто сине е Исусеске.