Januar

O Isus „najangleder dikhlja“ akala daja koja patini, a palo odova „sažalinđa pe upro late“ (Luka 7:13). O Isus na samo so osetinđa sažaljenje premali odija daj, već hem mothovđa laće saosećanje. Ov utešinđa la hem phenđa laće: „Ma rov.“ Palo odova ćerđa diso so but pomožinđa akala udovicaće. Ov irinđa e ćhave ko đivdipe hem „dinđa le olese dajaće“ (Luka 7:14, 15). So šaj te sikljova ando odova so o Isus uskrsninđa e udovicake ćhave? Sikljovaja so valjani te mothova saosećanje okolenđe kola našalđe nekas kas but manglje. Sar o Isus, šaj te mothova saosećanje okolenđe kola tugujinena ađahar so ka razmislina sar te pomožina len. Jekh buti koja šaj te ćera tani te trudina amen te utešina len amare lafencar hem odoleja so ćeraja (Posl. 17:17; 2. Kor. 1:3, 4; 1. Petr. 3:8). Čak hem disave jednostavna lafija ja disavi jednostavno buti koja ka ćera, olenđe šaj but te značini (w23.04 5-6 ¶13-15).

Iako o Isus đanđa so oleso amal o Lazar mulo, ov na pođinđa odmah ki Vitanija, nego palo duj dive. Ked reslja uduri, već nakhlje štar dive sar o Lazar mulo. Tegani, o Isus manglja te ćerel diso pe amalenđe hem te proslavini e Devle (Jov. 11:4, 6, 11, 17). Ko akava izveštaj šaj te sikljova but buća ando amalipe. Ked i Marija hem i Marta bićhalđe poruka e Isusese, on na phenđe lese te avel ki Vitanija. On samo phenđe so oleso amal, o Lazar tano nabormo (Jov. 11:3). Ked o Lazar mulo, ov šaj hine hem dural te uskrsnini le. Ama, ov ipak manglja te đal ki Vitanija te ovel e Marijaja hem e Martaja. Da li isi tut dijekh amal kova avela te pomožini tuće bizo te puće le? Tu đaneja so uvek šaj te oslonine tut upro leste ko „phare dive“ (Posl. 17:17). Odolese, sar o Isus, hem amen valjani te pomožina averenđe (w23.04 10 ¶10-11).

Ked isi amen pharipa, šaj mislinaja so o nevo sveto niked na ka avel. Ama, da li odova značini so amari vera tani slabo? Na. Razmislin ando jekh primer. Ako o jevend but trajini hem but tano šudro, šaj mislinaja so o nilaj niked na ka avel. Ama, o nilaj sigurno ka avel. Isto ađahar, ked isi amen kušnje, šaj te ova but obeshrabrime hem te mislina so o nevo sveto niked na ka avel. Ama, ako isi amen bari vera, amen ka ova uverime so o Devel sigurno ka ispunini pe obećanja (Ps. 94:3, 14, 15; Jevr. 6:17-19). Odolese, valjani hem ponodri te ćhiva e Jehova ko prvo than ko amaro životi. Amenđe valjani bari vera hem đi hijam ki služba. But manuša kolenđe propovedinaja i „šukar vest“ mislinena so o nevo sveto tano samo jekh šuži paramiz (Mat. 24:14; Jezek. 33:32). Niked ma mukh olengo mišljenje te utičini upro tute. Odolese, valjani hem ponodri te zorjaćera amari vera (w23.04 27 ¶6-7; 28 ¶14).

Pućljan tut li nekad, da li o Jehova odgovorini ko te molitve? Ako ja, tegani na hijan jedino. Disave phralja hem phenja pućlje pe isto odova ked hine len disavo pharipe. Ked isi amen problemija, šaj tano hem amenđe pharo te dikha sar o Jehova odgovorini ko amare molitve. Ama, sose šaj te ova sigurna so o Jehova odgovorini ko amare molitve? Ki Biblija pisini so o Jehova but mangela amen hem so hijam lese but vredna (Ag. 2:7; 1. Jov. 4:10). Sebepi odova, ov phenela amenđe te molina amen olese (1. Petr. 5:6, 7). Ov mangela te pomožini amen te aćhova uzo leste hem te istrajina ked isi amen problemija. But putija, ki Biblija šaj te čitina sar o Jehova odgovorinđa ko pe slugenge molitve. Da li avela tuće disavo primer ki godi? (w23.05 8 ¶1-4).

I Marija hine paše e Jehovaja hem olaki vera na zavisinđa ando odova so Josif ćerđa. Oj šukar penđarđa e Devleso Lafi. Isto ađahar, arakhlja vreme hor te razmislini ando odova so čitinđa (Luka 2:19, 51). Odova so i Marija hine duhovno osoba, ćerđa la te ovel šukar romni. Avdije, o romnja dena sa pestar te oponašinen e Marija. Na primer, jekh phen koja vićini pe Emiko phenela: „Đi na hijum le ko brak, kokri brininđum man andi mi duhovnost. Ked khuvđum ko brak, mo rom molinđa pe amenđe hem predvodinđa ko duhovna buća. Odolese, mi vera počminđa te zavisini ando odova so ov ćerđa. Akana trudinava man te arakhav vreme te ovav kokri e Jehovaja, te molinav man, te čitinav oleso Lafi hem te razmislinav ando odova so čitinava“ (Gal. 6:5). Romnjalen, nastavinen te zorjaćeren tumaro amalipe e Jehovaja hem tumare roma ka ovel len pobuter razlogija te hvalinen tumen hem te mangen tumen (Posl. 31:30; w23.05 22 ¶6).

Amen na bijanđovaja odoleja te ovel amen strahopoštovanje premalo Jehova, već mora te razvijina le. Jekh način sar šaj odova te ćera tano te razmislina ando buća kola tane stvorime. Ked haljovaja sar o buća kola o Jehova stvorinđa mothovena olesi mudrost, moć hem mangipe premalo amende, amen pana pobuter poštujinaja le hem mangaja le (Rimlj. 1:20). Pana jekh način sar šaj te razvijina strahopoštovanje premalo Jehova tano ađahar so redovno ka molina amen. So pobuter molinaja amen, ov ovela amenđe pana postvarno. Svako puti ked molinaja le te del amen snaga te istrajina ki disavi kušnja, odova setinćeri amen kobor tani bari olesi moć. Isto ađahar, ked zahvalinaja amen olese so dinđa pe Ćhave, odova setinćeri amen kobor mangela amen. Ked molinaja le te pomožini amen te ikljova ko krajo disave problemeja, odova setinćeri amen kobor tano mudro. Asavke molitve šaj te pomožinen amen pana pobuter te poštujina le. Isto ađahar, šaj te zorjaćeren amari odlučnost te cida amen ando buća kola šaj te ruminen amaro amalipe oleja (w23.06 15 ¶6-7).

O Jehova dinđa zakonija kola šaj lokho te haljon pe. Na primer, o vodećo telo ko prvo veko pominđa trin buća ko kola o hrišćanija valjani te aćhon zorale: (1) valjani te služinen samo e Jehovase, a na e idolenđe, (2) valjani te poštujinen e Jehovaso zakon soj tano o rat sveto hem (3) valjani te poštujinen e Jehovase moralna merilija (Dela 15:28, 29). Sar šaj o hrišćanija avdije te mothoven soj tane poslušna e Jehovase ko akala trin buća? Ađahar so ka šunen e Jehova hem samo olese ka služinen. Ov zapovedinđa e Izraelcenđe te služinen samo olese (Pon. zak. 5:6-10). Ked o Beng iskušinđa le, o Isus phenđa lese so amen valjani te služina samo e Jehovase (Mat. 4:8-10). Odolese, amen na služinaja e idolenđe. Isto ađahar, na ćeraja idolija ando manuša, bizo obzir da li tane on religiozna vođe, političarija, poznata muzičarija, glumcija ili sportistija. Amen hijam ki Jehovasi strana hem služinaja samo olese sose ov sa stvorinđa (Otkr. 4:11; w23.07 14-15 ¶3-4).

Ko Satanaso sveto isi but nemoral hem pornografija (Ef. 4:19). Odolese tano but važno hem ponodri te ovel amen dar ando Devel hem te cida amen ando lošna buća. Ko 9. poglavlje andi knjiga Poslovice vaćeri pe ando duj simbolična romnja. Akala romnja o solduj vićinena e neiskusno manušen. Svako olendar ka phene vaćeri lenđe: „Aven ko mo ćher te han maro“ (Posl. 9:1, 4-6). Ama, ando odova kaso poziv ka prihvatinen o manuša, ka zavisini so ka ovel olencar. Te dikha o poziv andi „bigođali romni“ (Posl. 9:13-18). Oj bizi lađ vićini okolen kola tane neiskusna te „aven koro late“ hem te slavinen olaja. So ovela olencar uduri? „Olake gostija tane hor ko grobo.“ Odola lafija upozorinena amen ki „grešno đuvli“ hem ki „bludnica“ asi koja phenela pe: „Ko đala ko olako ćher, đala ko meribe“ (Posl. 2:11-19). O lafija kotar Poslovice 5:3-10 upozorinena amen ki jekh aver „grešno đuvli“ kase „pre huljena ko meribe“ (w23.06 21-22 ¶6-7).

O starešine valjani te mothoven šukar primer ko odova so značini te ove razumno (1. Tim. 3:2, 3). Na primer, jekh starešina na valjani te očekujini avera starešine te prihvatinen oleso mišljenje samo sose tano pophuro hem poiskusno. Ov haljola so e Jehovaso duho šaj te podstaknini bilo kas ando starešinstvo te vaćeri diso so šaj te pomožini lenđe te anen mudro odluka. Ako pobuter starešine složinena pe so disavi odluka nane protiv e biblijake načelija, o starešina kova tano razumno ka podržini odija odluka, iako tani averćhane ando odova so ov phenđa. Ked hijam razumna odova šaj but te pomožini amenđe. Amen hijam popaše amare phralencar hem phenjencar hem ki skupština isi mir. But tano šukar so iako hijam različita, amen služinaja e Jehovase ko jekhipe. A soj tano najvažno, but hijam bahtale so odoleja so hijam razumna oponašinaja amare Devle, e Jehova (w23.07 25 ¶16-17).

O Danilo aćhavđa amenđe šukar primer aso odova sar te proučina o proročanstvija. Đi proučinđa, ov hine le ispravno motivi, manglja te đanel o ćaćipe. O Danilo hine ponizno manuš. Ov đanđa so o Jehova ka pomožini lese te haljol o proročanstvija ako aćhola paše oleja hem ako šunela le (Dan. 2:27, 28). Ov mothovđa soj tano ponizno ađahar so osloninđa pe upro Jehova (Dan. 2:18). Isto ađahar, temeljno proučinđa o proročanstvija hem aso odova koristinđa o spisija kola hine ko oleso vreme (Jer. 25:11, 12; Dan. 9:2). Sar šaj te oponašine e Danilo? Razmislin ando te motivija. Da li proučineja o proročanstvija odolese so isi tut bari želja te đane o ćaćipe? Ako tano ađahar, tegani o Jehova ka pomožini tuće (Jov. 4:23, 24; 14:16, 17). Ama, disave manuša proučinena o proročanstvija ando aver razlog. On mangena te dokažinen so i Biblija na avela ando Devel. Odolese, on mislinena so šaj kokri te odlučinen soj tano šukar, a soj tano lošno. Ama, amen valjani te proučina kotar ispravno motivi (w23.08 9 ¶7-8).

Ked uporedinaja amen averencar, tegani očekujinaja kokri amendar te ćera diso so našti (Gal. 6:4). Sebepi odova, šaj te ova zavidna upro avera hem te manga te takmičina amen olencar (Gal. 5:26). Ako pokušinaja te ćera odova so avera ćerena, a amen našti te ćera odova, samo ka povredina kokri amen. Ki Biblija pisini so „ked neko but ađićeri ovela tužno“, a kobor tano potužno o manuš kova očekujini pestar te ćerel diso so našti (Posl. 13:12). O Jehova na očekujini amendar te ćera pobuter ando odova so ov rodela. Niked na očekujini amendar te da le odova so amen našti (2. Kor. 8:12). Šaj te ove sigurno so o Jehova niked na uporedini tut averencar (Mat. 25:20-23). O Jehova but cenini ti služba koja ćereja celone vileja, ti vernost hem ti istrajnost (w23.08 29 ¶10-11).

O Jehova odgovorinđa e Samsonese ki olesi molitva ađahar so prekalo jekh čudo dinđa le pani. Ked o Samson pilja odova pani, „irinđa pe olesi snaga hem oporavinđa pe“ (Sud. 15:19). Izgleda so akava nevo izvor pana postojinđa ked o Samuilo pisinđa e biblijaki knjiga Sudije. Akava izvor šaj setinćerđa e Izraelcen so ako ka uzdajinen pe upro Jehova, ov uvek ka pomožini len. Bizo obzir save sposobnostija isi amen ja so ćerđam ki Jehovasi organizacija, sarinenđe valjani e Jehovasi pomoć. Amen valjani te ova skromna hem te priznajina so ako o Jehova rodela amendar diso te ćera, amen šaj te ćera odova jedino ako osloninaja amen upro oleste. O Samson dobinđa snaga ked pilja o pani kova o Jehova dinđa le. Sar oleste, hem amen valjani te prihvatina e Jehovasi pomoć hem te aćhova lese verna (Mat. 11:28; w23.09 4 ¶8-10).

So valjani te ćera ked avera mangena te provocirinen amen ađahar so vaćerena lošno ando Jehovaso anav ja ando oleso Lafi? Valjani te molina amen e Jehovase aso oleso duho hem asi mudrost te šaj te aćhova smirime. Ama, so ako kasnije haljiljam so na reagujinđam ađahar sar so bi valjani? Šaj palem te molina amen e Jehovase hem te razmislina sar šaj aver puti te postupina pana pošukar. Palo odova, o Jehova ka del amen po sveti duh te šaj te kontrolišina amen hem te mothova blagost. Ki Biblija isi but stihija kola šaj te pomožinen amen te ova blaga ked neko mangela te raspravini pe. E Devleso duho šaj te setinćeri amen ko odola stihija (Jov. 14:26). Na primer, o načelija kola tane ki knjiga Poslovice šaj te pomožinen amen te ova blaga (Posl. 15:18). Isto ađahar, ki odija knjiga pisini hem sose tano šukar te aćhova smirime ked isi amen stresna situacije (Posl. 10:19; 17:27; 21:23; 25:15; w23.09 15 ¶6-7).

O apostol Petar beršencar služinđa e Jehovase. Ov sarađujinđa e Isuseja ki služba hem hine jekh ando prva manuša kola počminđe te propovedinen e manušenđe kola na hine Jevreja. Kasnije, ulo član ando vodeće telo. Ko kraj ando oleso životi, ked već đanđa so ka merel, o Jehova dinđa le jekh važno zadatko. Ko 62-64. berš ki n. e., o Jehova koristinđa le te pisini duj lila, a odola tane i prvo hem i dujto Petrova. Ov nadinđa pe so odola lila ka pomožinen e hrišćanenđe palo oleso meribe (2. Petr. 1:12-15). Ked o Petar pisinđa pe lila, o phralja hem o phenja hine len „razna kušnje“ (1. Petr. 1:6). O lošna manuša pokušinđe te anen o hovavne sikljoviba hem o nečisto ponašanje ki skupština (2. Petr. 2:1, 2, 14). Pana hari, o hrišćanija kola živinđe ko Jerusalim valjanđe te doživinen „o krajo ando sa o buća“. O Rimljanija valjanđe te uništinen i diz hem o hram (1. Petr. 4:7). E Petarese lila sigurno pomožinđe e hrišćanenđe te dikhen so šaj te ćeren te bi istrajinena ko kušnje kola hine len hem te šaj te spreminen pe aso kušnje kola ka oven (w23.09 26 ¶1-2).

Sar o Isus, amen često sikljovaja te ova poslušna ko phare okolnostija. Na primer, ked počminđa i pandemija kotar koronavirus hijam le zamolime te na đa ki dvorana hem ki služba kotar ćher ko ćher. Da li tegani hine tuće pharo te ove poslušno? Ama, odova so hijan le poslušno zaštitinđa tut, pomožinđa i skupština te ovel ko jekhipe hem radujinđan e Jehova. Akana sare hijam pošukar spremime te šuna o smernice kola ka dobina ki bari nevolja. Tegani, amaro životi ka zavisini ando odova da li ka šuna odola smernice (Jov 36:11). Amen šunaja e Jehova odolese so mangaja le hem so mangaja te ugodina lese (1. Jov. 5:3). Niked na ka šaj te platina e Jehovase aso sa odova so ćerđa amenđe (Ps. 116:12). Ama, šaj te šuna ole hem okolen so isi len autoritet upro amende. Ako šunaja len, amen ka mothova so hijam mudra, a o mudra manuša radujinena e Jehovaso vilo (Posl. 27:11; w23.10 11 ¶18-19).

Ako bi jekh anđeo vaćeri tuvaja, da li bi šuneja odova so isi le te phenel tuće? Jekh anđeo avdije vaćeri „svakona nacijaće, svakone plemese, svakona ćhibjaće hem svakone narodose“. So phenela lenđe? „Daran ando Devel [. . .] Pokloninen tumen e Stvoriteljese ando nebo hem andi phuv“ (Otkr. 14:6, 7). O Jehova tano o ćaćutno Devel hem amen sare valjani te služina lese. Kobor samo valjani te ova lese zahvalna so dinđa amen prilika te služina lese ko oleso duhovno hram! Soj tano o duhovno hram hem kaj šaj te arakha o detaljija kola objasninena le? O duhovno hram nane doslovno objekat. O duhovno hram predstavini sa odova so o Jehova prekali Isusesi žrtva ćerđa te šaj o manuša te služinen lese ko ispravno način. O apostol Pavle objasninđa pobuter akalestar ko lil kova ko prvo veko pisinđa e hrišćanenđe kola hine Jevreja, a kola živinđe ki Judeja (w23.10 24 ¶1-2).

Ko 522. berš angl. n. e., e Jevrejenge dušmanija uspinđe te ubedinen e persijsko vlada te ćhinavi i obnova ando hram. Ama, o Zaharija uverinđa e Jevrejen so o Jehova ka koristini po moćno sveti duh hem so ka pomožini len te nastavinen i obnova, iako isi len problemija. Ko 520. berš angl. n. e., o kralj Darije dozvolinđa lenđe te počminen palem te gradinen hem čak dinđa len pare te ćeren odova. Isto ađahar, naredinđa i lokalno vlada te pomožini len (Jezd. 6:1, 6-10). O Jehova obećinđa pe narodose so ka pomožini lenđe ako ko prvo than ćhivena i gradnja ando hram (Ag. 1:8, 13, 14; Zah. 1:3, 16). O prorokija but ohrabrinđe len, hem o Jevreja ko 520. berš angl. n. e. palem počminđe te gradinen o hram hem završinđe le pohari ando panđ berš. Odolese so ćhivđe olesi volja ko prvo than, iako hine len bare problemija, o Jehova pomožinđa len. Šaj hine radosno te služinen e Jehovase (Jezd. 6:14-16, 22; w23.11 15 ¶6-7).

Iako but manuša šunđe e Avrahamese, but olendar na đanena but buća olestar. Ama, tu đaneja koj tano o Avraham. Na primer, ki Biblija pisini so ov tano „dad sarinenđe kola verujinena“ (Rimlj. 4:11). Odolese, šaj pućeja tut: „Da li me šaj te đav palo Avrahamese korakija hem te ovel man sar olesi vera?“ Ja, šaj. Jekh način sar šaj te ovel amen sar e Avrahamesi vera tano ađahar so ka proučina oleso primer. Ov ko sa šunđa e Jehova. Odolese, selinđa pe ki jekh but dur phuv. Beršencar živinđa ko šatorija hem hine spremno te žrtvujini pe ćhave. Aso sa odova valjanđa lese bari vera. Sebepi olesi vera hem olese delija o Jehova hine bahtalo hem hine amal oleja (Jak. 2:22, 23). O Jehova mangela sare amen te ćera le bahtalo hem te ova amala oleja. Sebepi odova, podstakninđa e Pavle hem e Jakove te pisinen ando Avrahameso primer (w23.12 2 ¶1-2).

Phenjalen, sikljoven te šunen pažljivo hem te vaćeren ljubazno. But tano važno sa o hrišćanija te ćeren odova. O učenik Jakov dinđa jekh but šukar savet kova tano ko avdisutno stiho. Ked pažljivo šuneja averen, tegani mothoveja lenđe saosećanje (1. Petr. 3:8). Ako na hijan sigurno so haljoveja so i osoba phenela ja sar osetini pe, tegani puć la disave pućiba kola tane ko than. Odvojin vreme te razmisline angleder so ka vaćere diso (Posl. 15:28). Puć tut: „Da li odova so ka phenav tano tačno? Da li ka ohrabrini averen? Da li odova so ka phenav ka mothovi poštovanje hem obzirnost averenđe?“ Sikljov ando phenja kola pažljivo šunena hem ljubazno vaćerena. Isto ađahar, obratin pažnja sar hem so phenena (Posl. 31:26). Ked ka sikljove te ćere akala buća, ka ovel tuće polokho te ove amal averencar hem te ove ko mir olencar (w23.12 21 ¶12).

Avdije, o Jehova šaj te koristini amare porodica, amalen ja e starešinen te pomožinen amen. Ama, ked tano but pharo, šaj mangaja te cida amen averendar. Šaj mangaja te ova kokri hem odova tano normalno. Ama, sar šaj tegani te prihvatina e Jehovasi pomoć? De sa tutar, te na cide tu ando manuša. Ked cideja tut averendar, tegani razmislineja samo tutar hem ando te problemija. Odova na ka pomožini tut te ane šukar odluke. Naravno, svakonese valjani vreme te ovel kokri, posebno ked doživinđa disavo stresno događaj. Ama, ako jekh pobaro period hijam kokri, tegani šaj na ka prihvatina e Jehovasi pomoć. Odolese, kobor god te ovel tuće pharo, prihvatin i pomoć andi ti porodica, ando te amala hem starešine. Ma bistri so o Jehova mangela te pomožini tuće prekalo lende (Posl. 17:17; Is. 32:1, 2; w24.01 24 ¶12-13).

O nazireja dinđe zavet so na ka ćhinen pe bala. Ađahar šaj hine te mothoven soj tane potpuno podložna e Jehovase. Nažalost, disave na poštujinđe len hem na pomožinđe lenđe. Disavo puti, e nazirejenđe valjanđa bari hrabrost te ićeren pe ko po zavet hem te oven averćhane averendar (Am. 2:12). O Jehova šaj te del amen snaga te razlikujina amen averendar, čak iako hijam lađutne. Valjani amenđe bari hrabrost te vaćera ki buti hem ki škola so hijam e Jehovase svedokija. Sar akava sveto ovela sa pološno, verovatno ka ovel amenđe popharo te primenina e biblijake načelija hem te propovedina (2. Tim. 1:8; 3:13). Ama, na valjani te bistra so ćeraja e Jehovaso vilo radosno ked razlikujinaja amen ando okola kola na služinena lese (Posl. 27:11; Mal. 3:18; w24.02 16 ¶7; 17 ¶9).

Razmislin so hine ki skupština ko Rim. Odothe hine disave hrišćanija kola hine Jevreja hem kola kotar tiknipe ićerđe pe ko Mojsijeso zakon. Ama hine hem disave kola alje kotar avera nacije, kola barilje ko avera okolnostija hem hine len avera običaja. Ko odova vreme, disave hrišćanija verovatno hine robija, a disave hine slobodna manuša. Disave čak hine len pe robija. Ama, sar ipak mothovđe mangipe jekh jekhese, iako hine odobor bari razlika maškaro lende? O apostol Pavle podstakninđa len: „Prihvatinen jekh jekhe“. Ko so mislinđa ked phenđa akala lafija? O lafi kova tano prevodimo sar „prihvatin“ značini te mothova nekase ljubaznost ja gostoprimstvo, avere lafencar, te primina nekas ko amaro ćher ja te družina amen oleja. Na primer, o Pavle phenđa e Filimonese so valjani šukar te primini e Onisime, pe robo, kova našlja olestar (Filim. 17). I Priskila hem o Akila šukar prihvatinđe e Apolo, kova na đanđa odobor ando ćaćipe, ađahar so „vićinđe le koro peste ćhere“ (Dela 18:26). Odova so o hrišćanija hine averćhane jekh jekhestar na dozvolinđe te ćerel lenđe problemija, već prihvatinđe jekh jekhe (w23.07 6 ¶13).

O glavno razlog sose predajineja tut e Jehovase tano sose mangeja le. To mangipe na temeljini pe samo ko te emocije. Odova mangipe tano ukorenimo ko odova so „šukar [penđareja] olesi volja hem ko razumevanje kova o duh dela“. Sebepi akala buća to mangipe premalo leste barilo (Kol. 1:9). Đi proučinđan e Devleso Lafi uverinđan tut (1) so o Jehova tano ćaćutno Devel, (2) so i Biblija avela olestar hem (3) so ov koristini pi organizacija te ispunini pi namera. Okola kola predajinena pe e Jehovase valjani te đanen o osnovna sikljoviba andi Biblija hem te živinen premalo olese merilija. On dena sa pestar te vaćeren averenđe odova so sikljilje (Mat. 28:19, 20). Olengo mangipe premalo Jehova barilo hem mangena verno te služinen lese. Da li hem tu mangeja odova? (w24.03 4-5 ¶6-8).

E Avigejako rom hine o Naval aso kova i Biblija phenela so hine grubo hem lošno manuš (1. Sam. 25:3). Sigurno na hine laće lokho te živini asavke romeja. Da li i Avigeja hine la prilika te mukhel le? Ja, ked o David alo te mudari olake rome sose vređinđa ole hem olese manušen (1. Sam. 25:9-13). Tegani i Avigeja šaj hine te našel hem te mukhel e Davide te mudari le. Ama, na ćerđa odova. Umesto odova, aćhilji hem ubedinđa e Davide te na ćerel odova (1. Sam. 25:23-27). Sose ćerđa odova? I Avigeja manglja e Jehova hem poštujinđa olese merilija ando brak. Đanđa so o Jehova upro brak dikhela sar diso sveto. Oj manglja te šunel e Devle hem odova podstakninđa la te ćerel sa so šaj te spasini po ćher hem pe rome. Odolese, sigate reagujinđa hem ćhinavđa e Davide te mudari e Navale (w24.03 16-17 ¶9-10).

Da li isi neko ki ti skupština ko mangela te pojednostavini po životi odolese so mangela te ćerel diso pobuter ki služba e Jehovase? Da li đaneja disave ternen kola tane spremna te razlikujinen pe averendar ki škola, iako odova nane lokho? Da li neko ko proučini i Biblija ili nesavo phral ili phen trudinena pe te aćhon verna e Jehovase, iako isi len protivljenje ki porodica? Hajde sare te da sa amendar te koristina svako prilika te ohrabrina amare phralen hem phenjen hem te phena lenđe so ceninaja olengi hrabrost hem samopožrtvovano duh (Filim. 4, 5, 7). O Jehova đanela so amen mangaja te radujina le hem te ćera žrtve te šaj te ićera amen ko amaro zavet. Ov mothovđa amenđe čast ađahar so dinđa amen prilika amen te birina sar ka mothova lese amaro mangipe (Posl. 23:15, 16). Odolese, hajde te ova odlučna hem ponodri te služina e Jehovase celone vileja hem te da lese amaro najšukar (w24.02 18 ¶14; 19 ¶16).

Razmislin so desinđa pe ko krajo ando 29. berš ki n. e., ked o Isus počminđa pi služba. O Isus hem olesi daj, i Marija hine vićime ko bijav ki Kana. I Marija verovatno pomožinđa ko bijav. Ando jekh puti ikljilo jekh problemi. Na hine više vino aso gostija. I Marija sigate đelji ko po ćhavo hem phenđa lese: „Nane len više vino“ (Jov. 2:1-3). So ćerđa o Isus? Ov tegani ćerđa o pani te ovel „šužo vino“ (Jov. 2:9, 10). Đi hine ki phuv, o Isus ćerđa but čudija. Ov koristinđa pi moć te pomožini bute manušenđe. Na primer, jekh puti parvarđa panđ hiljade muršen, a o dujto puti štar hiljade muršen. Ako računinaja hem olenge romnjen hem ćhaven, odova hine prekalo 27 hiljade manuša (Mat. 14:15-21; 15:32-38). Isto ađahar, ov tegani saćarđa bute manušen (Mat. 14:14; 15:30, 31; w23.04 2 ¶1-2).

Palo odova so doživinđam disavo stresno događaj, ka oven dive ked na ka ovel amen snaga nisose. Sar o Ilija, šaj ka ovel amenđe pharo te ušta hem samo ka manga te sova (1. Kralj. 19:5-7). Šaj ka valjani amenđe pomoć te šaj hem ponodri te služina e Jehovase. Ko asavke situacije, o Jehova uverini amen so ka pomožini amenđe sar so pisini ko avdisutno citati. O kralj David osetinđa asavki pomoć ando Jehova. Ked hine le kušnje hem ked napadinđe le o dušmanija, ov phenđa e Jehovase: „To desno vas, podržini man“ (Ps. 18:35). O Jehova često podržini amen ađahar so podstaknini averen te pomožinen amen. Na primer, jekh puti ked o David hine obeshrabrimo, o Jehova bićhalđa e Jonatane te ohrabrini le (1. Sam. 23:16, 17). Isto ađahar, ov bićhalđa e Jeliseje te ohrabrini e Ilija (1. Kralj. 19:16, 21; 2. Kralj. 2:2; w24.01 23-24 ¶10-12).

O Jehova tano ćaće but velikodušno. Odova dikhaja ando primer kotar romni koja predstavini i „ćaćutni mudrost“, koja pomini pe ko Poslovice 9. poglavlje. Ko akala stihija asi akija romni phenela pe so pripreminđa but mas, ćhivđa začinija ko vino hem sa odova ćhivđa ko astali (Posl. 9:2; fusn.). Isto ađahar, ko 4. hem 5. stiho pisini so i „ćaćutni mudrost“ ja i simbolično romni phenela okolese kova tano neiskusno: „Ava, ha o maro kova pripreminđum“. Sose valjani te prihvatina o poziv andi akija romni? O Jehova mangela olese ćhave te oven mudra hem bezbedna. Ov na mangela te ćera disave greške kola šaj but te povredinen amen. Odolese, „e čestito manušenđe pomožini te postupinen mudro“ (Posl. 2:7). Ked isi amen strahopoštovanje premalo Jehova, amen mangaja te ugodina lese. Šunaja olese mudra savetija hem primeninaja len (Jak. 1:25; w23.06 23 ¶14-15).

Ako našti te ćera sa so mangaja e Jehovase ki služba, šaj te ova sigurna so o Jehova cenini amaro trud. O Jehova phenđa e Zaharijase te ćerel jekh kruna ando zlato hem srebro kova bićhalđe o Jevreja kola pana hine ko Vavilon (Zah. 6:11). Akija „kruna“ valjanđa te podsetini e Jevrejen ko olenge prilogija kola dinđe ando vilo (Zah. 6:14, fusn.). Amen šaj te ova uverime so o Jehova niked na ka bistrel kobor trudinaja amen te služina lese ked isi amen pharipa. Ko akala poslednja dive, sigurno ka oven amen problemija (2. Tim. 3:1, 13). Ama, na valjani but te brinina amen. Setin tut ko Jehovase lafija kola phenđa pe narodose prekalo prorok Agej: „Me hijum tumencar [. . .] Ma daran!“ (Ag. 2:4, 5). Šaj te ova sigurna so o Jehova ka ovel amencar sa đi daja sa amendar te ćera olesi volja (w23.11 19 ¶20-21).

O Jehova šaj hine te na mukhel e Petarese greške te oven pisime ko oleso Lafi, ama ipak mukhlja te oven pisime te šaj amen te sikljova diso olendar (2. Tim. 3:16, 17). Ked haljovaja sova akava manuš borinđa pe, odova ka pomožini amen te haljova so o Jehova na očekujini amendar savršenstvo. Iako hijam slaba, o Jehova na mangela te odustajina, već te borina amen. Sose na valjani te odustajina? Čak hem ako borinđam amen protiv disavi slabost, amen šaj palem te ćera isto greška. Ama, na valjani te vazda amare vasta. Sare amen podijekh puti phenaja ili ćeraja diso aso so kasnije kajinaja amen. Šaj te ova sigurna so ako na odustajinaja, o Jehova ka pomožini amen te ova sa pošukar (1. Petr. 5:10). Odova sar so o Isus mothovđa saosećajnost e Petarese, iako hine le slabostija, šaj te podstaknini amen te nastavina te služina e Jehovase (w23.09 20-21 ¶2-3).

O Isus šaj hine te saćari e Lazare, sar so pisini ko avdisutno stiho. Ama, ov manglja te ćerel diso pobuter. Ov phenđa laće: „To phral ka uštel.“ Isto ađahar, phenđa: „Me hijum o uskrsenje hem o đivdipe“ (Jov. 11:23, 25). O Devel dinđa e Isusese moć te vazdel e mulen. Angleder, ov vazdinđa jekha tiknja ćhaja kratko palo olako meribe. Isto ađahar, vazdinđa jekhe ćhave izgleda ko isto dive ked mulo (Luka 7:11-15; 8:49-55). Ama, da li šaj te uskrsnini nekas kova već štar dive tano mulo hem kaso telo počminđa te ćirnjol? I Marija, e Lazaresi aver phen, alji anglo Isus. Oj phenđa lese isto odova so phenđa hem olaki phen: „Gospode, te ove hine akate, mo phral ne bi merela“ (Jov. 11:32). Ked dikhlja hem šunđa sar i Marija hem avera kola hine olaja rovena, e Isusese hine but pharo. Odobor hine lese žao so počminđa te rovel. Ov haljola kobor tani bari i dukh ked neko merela. Odolese, jedva ađićeri te kosel o asva ando manuša kola patinena (w23.04 10-11 ¶12-13).