Februar

Ked o kralj Jezekilj hine but nabormo, ov molinđa e Jehova te saćari le. O Jehova odgovorinđa ki olesi molitva ađahar so saćarđa le (2. Kralj. 20:1-6). Ki aver strana, ked o apostol Pavle molinđa e Jehova te cidel lestar o karo ando telo, o Jehova na ćerđa odova (2. Kor. 12:7-9). E apostolen e Jakove hem Petare, o kralj Irod manglja te mudari soldujen. O Jakov hine mudardo, a e Petare spasinđa jekh anđeo (Dela 12:1-11). Amen šaj te puća amen: „Sose o Jehova e Petare spasinđa, a e Jakove na?“ Ki Biblija na vaćeri pe odolestar. Odova so šaj te ova sigurna tano so e Jehovase „drumija tane pravedna“ (Pon. zak. 32:4). Disavo puti, o Jehova šaj na ka odgovorini ko amare molitve ađahar sar so amen nadinđam amen. Ama, odolese so hijam uverime so o Jehova uvek ćerela odova soj tano šukar hem pravedno, amen na ka žalina amen sar o Jehova odgovorinđa ko amare molitve (Jov 33:13; w23.11 21 ¶6).

O Jakov phenela so o mudra manuša tane „spremna te šunen“. So odova značini? Amen valjani te ova spremna te šuna okolen kase o Jehova dinđa disavo autoritet. Naravno, o Jehova na očekujini te šuna nekas ko amendar rodela te na šuna olese zapovestija (Dela 4:18-20). Amenđe tano šaj polokho te šuna e Jehova nego e manušen. O Jehova uvek dela amen savršena uputstvija (Ps. 19:7). Ama, o manuša kola isi len autoritet tane nesavršena. Ipak, o Jehova dinđa disavo autoritet e roditeljenđe, okolenđe kola tane ki vlast hem e starešinenđe (Posl. 6:20; 1. Sol. 5:12; 1. Petr. 2:13, 14). Ked hijam poslušna olenđe, amen hijam poslušna e Jehovase (w23.10 6 ¶2-3).

Jekh način sar šaj te zorjaćera amari vera tano ađahar so ka razmislina andi Jehovasi moć. Ov isi le moć te ćerel sa odova so phenđa. Ov tano Svemoćno Devel (Jov 42:2; Mar. 10:27; Ef. 3:20). E Avrahamese hem e Saraće phenđa so ka ovel len ćhavo, iako hine but phure (Post. 17:15-17). Isto ađahar, phenđa so olese potomkija ka nasledinen i hanansko phuv. Sar đelo o vreme, e Avrahamese potomkija, o Izraelcija, hine robija ko Egipat hem dićhilo so samći niked na ka ispunini pe odova obećanje. Ama, ko krajo svako lafi ispuninđa pe. Kasnije, phenđa e Marijaće, koja hine ćhaj, so ka bijani olese Ćhave. Ađahar ispuninđa o obećanje kova beršencar angleder phenđa ko edensko vrt (Post. 3:15). Ked razmislinaja ando Jehovase obećanja hem odolestar sar ispuninđe pe, amen haljovaja kobor tani bari olesi moć. Isto ađahar, amaro poverenje ko olese obećanja ando nevo sveto ovela pana pobaro (Is. Nav. 23:14; Is. 55:10, 11; w23.04 28 ¶10-12).

O Jehova odgovorinđa ko Davidese molitve hem spasinđa le (1. Sam. 19:10, 18-20; 2. Sam. 5:17-25). Amen šaj te ova sigurna so o Jehova hem amenđe ka pomožini (Ps. 145:18). O Jehova šaj na ka odgovorini ko amare molitve ađahar sar so amen očekujinaja. O apostol Pavle molinđa e Jehova te cidel lestar „o karo ando telo“. Ov čak trin putija molinđa pe aso odova. Da li o Jehova odgovorinđa ko olese molitve? Ja, ama na ađahar sar so ov očekujinđa. Umesto te cidel lestar odova problemi, o Jehova dinđa le snaga te izdržini hem te aćhol lese verno (2. Kor. 12:7-10). Podijekh puti, hem amenđe šaj te dićhol so o Jehova na odgovorini ko amare molitve. Sose? Odolese so šaj na odgovorini amenđe ađahar sar so očekujinđam. Ama, ov đanela sar najšukar te pomožini amen. Ov šaj čak „te ćerel pobuter kotar sa so molinaja ja zamislinaja“ (Ef. 3:20). Odolese, šaj te ova sigurna so ka odgovorini ko amare molitve ko vreme hem ko način ko kova ni na očekujinaja (w23.05 8-9 ¶4-6).

Amen valjani te razmislina andi amari nada ko uskrsenje. Sose? Odolese so šaj iznenada te desini pe te ovel amen disavo ozbiljno nabormipe ili te našala nekas kas but mangaja (Prop. 9:11; Jak. 4:13, 14). Tegani i nada ko uskrsenje šaj but te pomožini amen (1. Sol. 4:13). I Biblija uverini amen so o Jehova but šukar đanela amen hem but mangela amen (Luka 12:7). O Jehova odobor šukar đanela amen so šaj te uskrsnini amen ađahar sar so hijam le angleder te mera hem te setina amen ko sa o buća so hine angleder. Odolese so mangela amen, o Jehova dinđa amen mogućnost te živina večno. Čak hem ako ka mera, ov šaj palem te uskrsnini amen. Sose šaj te verujina ko uskrsenje? Odolese so okova kova dinđa odova obećanje isi le želja hem moć ili sposobnost te ispunini odova so obećinđa (w23.04 8-9 ¶2-4).

O Josif hem i Marija dinđe sa pestar te zorjaćeren po amalipe e Jehovaja. On haljilje kobor tano važno te ćeren o duhovna buća zajedno sar porodica (Luka 2:22-24, 41; 4:16). On tane but šukar primer aso bračna parija avdije! Ako hem tumen isi tumen ćhave, šaj te ovel tumenđe pharo te đan ko sastankija hem te arakhen vreme aso porodično proučibe. Pana popharo šaj te ovel te arakhen vreme te proučinen hem te molinen tumen zajedno sar bračno par. Ama, ma bistren so ako zajedno ćerena o duhovna buća, ka oven pana popaše e Jehovaja hem jekh jekheja. Odolese, nek o duhovna buća ovena tumenđe ko prvo than. So šaj te ćeren ako isi tumen problemija ko brak? Tegani šaj na mangena zajedno te proučinen. Ama, ipak bi ovela šukar te čitinen diso kratko sostar bi mangena o solduj te vaćeren. Akava ka pomožini tumen te ovel tumen pana pobaro mangipe jekh premalo jekheste hem te mangen te ćeren o duhovna buća zajedno (w23.05 22 ¶7-8).

Sar o strahopoštovanje premalo Jehova pomožinđa e Avdijase? Ov hine pošteno hem pouzdano manuš. Odolese, o kralj ćhivđa le te brinini pe ando oleso ćher. (Uporedin e stihoja ando Nemija 7:2.) Isto ađahar, ov hine hrabro, a odija osobina but valjanđa lese. O Avdija živinđa ked vladinđa o kralj Ahav (1. Kralj. 16:30). Uzo odova, e Ahavesi romni, i Jezavelja, služinđa e hovavne devlese, e Valese. Odolese, oj mrzinđa e Jehova hem manglja te ćhinavi sa e manušen ando severno kraljevstvo te služinen lese. Čak mudarđa bute prorokonen (1. Kralj. 18:4). Ked i Jezavelja manglja te mudari e Devlese prorokonen, o Avdija garavđa 100 prorokonen hem ćhivđa len ko duj pećine, ki „svako po 50 hem anđa lenđe maro hem pani“ (1. Kralj. 18:13, 14). Ako bi e Jezavelja đanela so o Avdija ćerđa, oj bi mudari le. Naravno, o Avdija verovatno darandilo sose na manglja te merel. Ama, ov pobuter manglja e Jehova hem e manušen kola služinđe lese nego po životi (w23.06 16 ¶9-10).

O Jehova hem ponodri vodini pe narodo. Ov ćerela odova prekali Biblija hem prekalo po Ćhavo, kova tano poglavari ki skupština. Da li dikhaja so hem avdije o Jehova koristini disave manušen te bi vodini amen? Ja. Na primer, razmislin so desinđa pe palo 1870. berš. O Čarls Tejz Rasel hem olese saradnikija haljilje so o 1914. berš ka ovel but važno aso Devleso Kraljevstvo (Dan. 4:25, 26). On odova haljilje sebepi e biblijake proročanstvija. Da li o Jehova vodinđa len đi istražinđe? Ja! Odova so desinđa pe ko sveto ko 1914. berš, mothovđa so e Devleso Kraljevstvo počminđa te vladini. Tegani počminđa o Prvo svetsko rat, hine zarazna nabormipa, zemljotresija hem bokhalipa (Luka 21:10, 11). Jasno hine so o Jehova koristinđa akale iskreno manušen te bi pomožini pe narodose (w24.02 22 ¶11).

Sar e Jehovase sluge, amen đanaja so o Jehova but mangela amen hem mangela te ovel amen najšukar životi (Rimlj. 8:35-39). Isto ađahar, amen hijam sigurna so ako primeninaja o načelija andi Biblija, on ka pomožinen amen (Is. 48:17, 18). Ama, so šaj te ćera ako ovena amen problemija kola na očekujinđam? Na primer, šaj neko andi amari porodica razočarinđa amen. Šaj hijam but naborme hem odolese našti te ćera odobor kobor bi mangaja ki služba e Jehovase. A neko amendar šaj doživinđa disavi prirodno katastrofa ja progonstvo. Ked isi amen asavke problemija šaj pućaja amen: „Sose baš maje desini pe odova? Da li diso grešinđum? Da li odova značini so o Jehova na blagoslovini man?“ Da li nekad osetinđan tut ađahar? Ako ja, na hijan jedino. But amare phralja hem phenja osetinena pe sar tute (Ps. 22:1, 2; Avak. 1:2, 3; w23.04 14 ¶1-2).

Ked hijam ko iskušenje te ćera diso soj tano lošno, valjani odmah te cida amen sose odova šaj te rumini amaro amalipe e Devleja. O Jehova ađićeri amendar „vilestar“ te ova lese poslušna (Rimlj. 6:17). Sa e Jehovase zakonija tane aso amaro šukaripe, odolese na valjani te birina ko kova zakon ka ićera amen, a ko kova na (Is. 48:17, 18; 1. Kor. 6:9, 10). O Beng mangela prekalo nasilje hem o pritisak kova doživinaja te peravi amen. Oleso cilj tano „te hal“ amen, te uništini amaro amalipe e Jehovaja (1. Petr. 5:8). Hari palo odova so o Isus mulo, o manuša pretinđe, marđe hem čak mudarđe e hrišćanen odolese so hine odlučna hem ponodri te aćhon zorale (Dela 5:27, 28, 40; 7:54-60). O Satana hem avdije koristini o progonstvo. Na primer, dikhaja kobor tane o vlastija okrutna premalo amare phralja hem phenja ki Rusija hem ko avera phuvja. O Satana na napadini amen samo direktno, prekalo progonstvo, nego hem koristini disave „garavde zamke“ (Ef. 6:11; w23.07 15-16 ¶6-9).

So pobuter proučineja e Devleso Lafi, to mangipe premalo leste ovela sa pobaro. Odova mangipe podstaknini tut te primenine odova so sikljiljan. Tu aneja pana pošukar odluke kola temeljinena pe ko načelija andi Biblija. Isto ađahar, menineja to način razmišljanja hem ćhinaveja te ćere o lošna buća odolese so mangeja te ugodine e Devlese. Isto sar so jekh ćhavo mangela te oponašini pe dade, ađahar hem tu trudineja tut te oponašine te nebesko Dade (Ef. 5:1, 2). Amen šaj te puća amen: „Da li tano mo mangipe premalo Jehova akana pozoralo nego ked krstinđum man? Sar krstinđum man, da li trudinava man te oponašinav e Jehova, posebno ko odova te mothovav mangipe e phralenđe hem e phenjenđe?“ Ako o mangipe kova hine tut ko početko sebepi disave buća šudrilo, ma obeshrabrin tut. Odova desinđa pe hem e hrišćanenđe ko prvo veko. Ama, o Isus na odustajinđa olendar, a na ka odustajini ni tutar (Otkr. 2:4, 7). Ov đanela so šaj palem te ovel tut odova mangipe kova hine tut ked počminđan te proučine (w23.07 8 ¶2-3).

I rat angleder o Isus te ovel mudardo, o Petar ćerđa nekobor greške sebepi kola ćerđa jekh ozbiljno greh. Odolese so hine but samouvereno, hvalinđa pe so jedino ov ka aćhol verno, čak hem ako sa avera ka aćhaven e Isuse (Mar. 14:27-29). Ama, ked đelje ko getsimansko vrt, e Petare nekobor putija lelja o sojbe (Mar. 14:32, 37-41). Palo odova, ked o manuša alje te astaren e Isuse, ov aćhavđa le (Mar. 14:50). Ko krajo, trin putija odrekninđa pe ando Isus, iako dinđa sovel so na ka ćerel odova (Mar. 14:66-71). Sar o Petar reagujinđa ked haljilo savo ozbiljno greh ćerđa? Khuvđa le o rojbe hem hine le baro osećaj andi krivica (Mar. 14:72). Kasnije, umesto te kritikujini le sebepi olese greške, o Isus phenđa pe amalenđe so ov ka ovel le bare odgovornostija (Jov. 21:15-17). O Petar đanđa so ćerđa bari greška, ama nastavinđa te trudini pe te ćerel odova soj tano šukar. Sose? Odolese so đanđa so oleso Gospodari, o Isus, na vazdinđa pe vasta olestar. So sikljovaja? O Jehova mangela te ova sigurna so ov mangela amen hem soj tano spremno te oprostini amenđe (Rimlj. 8:38, 39; w24.03 18-19 ¶13-15).

O manuš kova ćerela nemoral osetini bari lađ hem so na vredini nisose. Isto ađahar, but porodice šaj te rasturinen pe hem i đuvli šaj te aćhol khamni iako na manglja. Odolese, but tano mudro te na prihvatina o poziv kova avela andi bigođali romni. Uzo odova so duhovno merena, avere lafencar našalena po amalipe e Jehovaja, o manuša kola ćerena nemoral šaj te astaren disave nabormipa kotar kola šaj doslovno te meren (Posl. 7:23). Ko Poslovice 9:18 pisini: „Olake gostija tane hor ko grobo.“ Tegani, sose but manuša prihvatinena olako poziv kova legari ko meribe? (Posl. 9:13-18). Jekh uobičajeno zamka tani i pornografija. Disave mislinena so i pornografija nane opasno. Ama, oj tani but opasno! Sebepi so dikhena pornografija, but manuša na poštujinena ni pes ni averen hem ulje zavisna andi pornografija. O nemoralna slike isi len odobor zorali moć so beršencar palo odova tano but pharo te ikalen pe andi godi. Isto ađahar, i pornografija na pomožini e manušenđe te ciden pestar o neispravna želje, već ćerela len te oven pana pobare (Kol. 3:5; Jak. 1:14, 15). But manuša kola dikhlje pornografija ko krajo ćerđe nemoral (w23.06 23 ¶10-11).

Čak iako avera narodija disavo puti šaj ka protivinen pe asi angloameričko svetsko sila, on na ka zameninen la. Amen đanaja odova odolese so „o bar“, kova predstavini e Devleso Kraljevstvo, ka uništini o stopala, o deo ando kip kova predstavini i angloameričko svetsko sila (Dan. 2:34, 35, 44, 45). Da li hijan uverimo so e Daniloso proročanstvo kova vaćeri ando stopala kotar sastron hem glina tano ćaće? Ako ja, tegani ov ka utičini ko odova save odluke akana aneja. Na ka đal to vreme ko odova te oven tut but materijalna buća ko sveto kova pana hari ka ovel uništimo (Luka 12:16-21; 1. Jov. 2:15-17). Ako haljoveja akava proročanstvo, odova ka pomožini tut te dikhe kobor tano važno te propovedine hem te ćere učenikonen (Mat. 6:33; 28:18-20). Akana ked kratko razmotrinđam akava proročanstvo, puć tut: „Da li me odluke mothovena so hijum uverimo so e Devleso Kraljevsto pana hari ka uništini sa o manušikane vladavine?“ (w23.08 11 ¶13-14).

Ov skromno hem prihvatin so sebepi te berša hem to sastipe, šaj našti te ćere odova so mangeja. Sar o Varzelaj, ma prihvatin disavi odgovornost ako sebepi te berša ja to sastipe našti te ispunine la (2. Sam. 19:35, 36). Sar o Mojsije, prihvatin averengi pomoć hem ked šaj podelin o odgovornostija (Izl. 18:21, 22). Ked hijan skromno, na ka oven tut nerealna očekivanja kola šaj te len ti snaga đi prastaja ki trka aso životi. Amen našti te ana odluke ko averengo than niti šaj uvek te zaštitina len ando posledice kotar olenge lošna odluke. Na primer, jekh ćhavo ja jekh ćhaj šaj te odlučini te na služini više e Jehovase. E roditeljenđe šaj te ovel but pharo sebepi odija odluka. Ama, ako o roditeljija pes krivinena aso pe ćhavengi odluka, on lena upro peste jekh but baro teret. A o Jehova na očekujini olendar te akharen odova teret (w23.08 29 ¶11-12).

O Samson hine nesavršeno sar amende. Odolese, disavo puti anđa lošna odluke. Jekh asavki odluka anđa lese bare posledice. Palo odova so nekobor berš služinđa sar sudija, ov „zaljubinđa pe upri jekh romni koja vićinđa pe Dalila hem koja živinđa ki dolina Sorik“. Angleder, o Samson hine verimo jekha Filistejkaja. O Jehova usmerinđa e Samsone te ćerel odova, sose odija hine prilika te borini pe protiv o Filistejcija. Kasnije, o Samson đelo ko jekh ćher kuri hine jekh prostitutka ki Filisteja, ki diz Gaza. Tegani, o Jehova dinđa odobor snaga e Samsonese so ikalđa e dizjake udara. Sebepi odova, odija diz na hine više odobor moćno (Sud. 14:1-4; 16:1-3). Ama, i situacija e Dalilaja hine averćhane, sose oj izgleda hine Izraelka hem odolese na hine le prilika te borini pe protiv o Filistejcija. On nudinđe e Dalilaće bare pare te izdajini e Samsone hem oj prihvatinđa (w23.09 5 ¶12-13).

I razumnost šaj but te pomožini amen. I razumno osoba mothovi samokontrola ked avera mangena te raspravinen pe olaja sebepi olake verovanja. Razmislin kotar akava primer: Ked dikhaja o ledo ko more, amen dikhaja samo jekh tikno deo kova tano upro pani, ama o pobaro deo ando odova ledo tano talo pani. Ko slično način, i osoba šaj te pućel amen disavo pućibe, ama but putija na đanaja o pravo razlog sose pućlja odova. Odolese, angleder te odgovorina, šukar tano te ovel amen ki godi so amen na đanaja so ćhivđa e osoba te pućel amen odova (Posl. 16:23). Te dikha sar o Gedeon odgovorinđa e manušenđe kotar Jefremeso pleme. On holjame pućlje le sose na vićinđa len te đan oleja te borinen pe protiv e Izraelcenge dušmanija. Da li hine disavo posebno razlog sose holjanđe? Da li olengo ponos hine povredimo? Savo god te ovel o razlog, o Gedeon mothovđa soj tano razumno manuš. Ov trudinđa pe te haljol sose hine uznemirime hem blago odgovorinđa lenđe. So hine sebepi odova? Ko krajo smirinđe pe (Sud. 8:1-3; w23.09 16 ¶8-9).

Nijekh dad hem ćhavo na hine odobor paše sar so hine o Jehova hem o Isus. Razmislin samo sar upro Jehova utičinđa ked dikhlja save kušnje hine le o Isus. Svako roditelj kova našalđa pe ćhave đanela kobor tani bari odija dukh. Iako verujinaja ko uskrsenje, odova na značini so nane amen dukh. Akava pomožini amenđe te haljova sar o Jehova osetinđa pe ked dikhlja pe Ćhave sar patini hem sar merela ko 33. berš ki nevi era (Mat. 3:17). Angleder i Spomen-svečanost, trudin tut te proučine pobuter andi otkupnina ko to lično ja porodično proučibe. Ko dive ked tani i Spomen-svečanost, ma bistri te dikhe o posebno biblijako jutarnjo program. Ked pripreminaja amaro vilo asi Spomen-svečanost, tegani šaj te pomožina hem averenđe (Jezd. 7:10; w24.01 11 ¶10-12).

Jekh način sar šaj te dobina snaga kotar Jehova tano prekali molitva. Ov šaj te odgovorini ko amare molitve ađahar so ka del amen „but bari snaga“ (2. Kor. 4:7). Isto ađahar, šaj te dobina snaga ađahar so ka čitina e Devleso Lafi hem hor ka razmislina kotar odova so čitinđam (Ps. 86:11). Šaj te ova sigurna so e Jehovaso lafi isi le „bari moć“ (Jevr. 4:12). Ked molinaja amen e Jehovase hem čitinaja oleso Lafi, šaj te ovel amen snaga te istrajina, te aćhova radosna hem te ćera disavo pharo zadatko. Zapazin sar o Jehova dinđa snaga e Jonase. Ov darandilo te đal uduri kuri o Jehova bićhalđa le. Odolese, brodoja đelo ki aver diz. Sebepi odova, ov hem o mornarija harićkase hine ka meren ki jekh bari oluja. Ked o mornarija fordinđe le ko more, nakhavđa le jekh but baro maćho. So o Jona ćerđa te šaj te dobini snaga đi hine ki jekh asavki situacija? Ov molinđa pe e Jehovase (Jona 2:1, 2, 7; w23.10 13 ¶4-6).

Iako o Petar akala lila pisinđa e hrišćanenđe ko prvo veko, o Jehova ćerđa te oven deo ando oleso Lafi. Odolese, odola lila šaj hem amenđe avdije te pomožinen (Rimlj. 15:4). Amen hijam okružime e manušencar kola na verujinena ko biblijake proročanstvija. O protivnikija šaj te maren amenđe muj odolese so beršencar vaćereja so ka avel o kraj. Disave manuša phenena so o kraj niked na ka avel (2. Petr. 3:3, 4). Ako asavke buća phenena amenđe amare kolege, o manuša ki služba ili amari familija, amari vera šaj te slaboni. O Petar pisinđa so tegani šaj te pomožini amenđe. Disave manuša šaj mislinena so o Jehova but ađićeri te anel o krajo ando akava sveto. Ama, e Petarese lafija setinćerena amen so o način sar o Jehova dikhela ko vreme tano averćhane ando odova sar o manuša dikhena (2. Petr. 3:8, 9). E Jehovase hiljada berš tane sar jekh dive. Ov tano strpljivo hem na mangela niko te ovel uništimo. Ked oleso dive ka avel, akava lošno sveto ka ovel uništimo (w23.09 26-27 ¶2-5).

Sose o apostol Pavle pisinđa lil e hrišćanenđe kola živinđe ki Judeja? Verovatno ando duj važna razlogija. Sar prvo, te šaj te ohrabrini len. Angleder te oven hrišćanija, but olendar barilje ko judaizam. O jevrejska religiozna vođe šaj marđe lenđe muj odolese so ulje hrišćanija. Sose? Odolese so na hine len hram te služinen e Devlese, na hine len oltarija te den žrtve niti hine len sveštenstvo. Odova šaj hine te obeshrabrini e Hristese učenikonen hem te slabonćeri olengi vera (Jevr. 3:12, 14). Disave olendar šaj razmislinđe odolestar te irinen pe ki pi purani religija. Sar dujto, o Pavle phenđa lenđe so na trudinena pe te haljon o neve ja o hor sikljoviba, i „zorali hrana“, koja tani ko Devleso Lafi (Jevr. 5:11-14). Izgleda so disave olendar pana ićerđe pe ko Mojsijeso zakon (w23.10 24-25 ¶3-4).

Disave đuvlja odlučinđe te na khuven ko brak (Mat. 19:10-12). Ov sigurno so o Jehova hem o Isus na mislinena so tu na vredineja, samo odolese so na hijan ko brak. Ko celo sveto, asavke phenja tane baro blagoslov asi skupština. On but mangena averen hem brininena pe olendar. Odolese ulje sar daja hem phenja butenđe ki skupština (Mar. 10:29, 30). Disave tane ki punovremeno služba. But phenja ćerena bari buti ki služba (Ps. 68:11). Šaj li te ćhive tuće cilj te ove ki punovremeno služba? Šaj te služine sar pioniri, te ćere buti ki gradnja ili ko Betel. Molin tut aso odova cilj. Vaćer okolencar kola ispuninđe asavko cilj hem dikh so valjani te ćere te šaj hem tu te ispunine le. Palo odova, ćer tuće plan kova ka pomožini tut te ave đi odova cilj. I punovremeno služba šaj te phravel tuće o udara te ćere but zanimljiva buća ki služba e Jehovase (w23.12 22 ¶16-17).

Sar i bari nevolja tani sa popaše, amen sa pobuter haljovaja kobor tano važno te šuna i zapovest te đa te ćera učenikonen. Ama, podijekh puti šaj tano pharo te da sa amendar ki služba odolese so isi amen finansijska problemija ili protivljenje ki služba. So šaj te pomožini amen te ćhiva o Kraljevstvo ko prvo than? Šaj te ova uverime so „o Jehova, o Komandanti upro sa o vojske“ tano ki amari strana. Ov ka pomožini amen. Odolese, nane amen sostar te dara (Ag. 2:4). O Jehova mangela te usredsredina amen ko odova te spasina e manušengo životi ađahar so ka ćera učenikonen. O Agej podstakninđa e Devlese narodo palem te gradinen o hram. Ako ka ćeren odova, o Jehova obećinđa lenđe „so ka blagoslovini len“ (Ag. 2:18, 19). Amen šaj te ova sigurna so o Jehova ka blagoslovini amaro trud ako tani amenđe i služba ko prvo than (w23.11 16 ¶8; 17 ¶11).

Ko po lil kova pisinđa e hrišćanenđe ko Rim, o apostol Pavle phenđa so sa o manuša tane grešna. Ama, sar šaj o Devel te ovel zadovoljno amencar hem te ova pravedna anglo lese jaćha? Te šaj te pomožini amen te odgovorina ko odova pućibe, o Pavle koristinđa e Avrahameso primer. O Jehova dikhlja e Avrahame sar pravedno pana đi hine ko Hanan. Sose? Da li odolese so o Avraham savršeno ićerđa pe ko Mojsijeso zakon? Na (Rimlj. 4:13). Odova Zakon hine dindo e Izraelcenđe pobuter ando 400 berš palo odova so o Jehova phenđa so o Avraham tano pravedno. Ama, sose tegani o Jehova phenđa odova? O Jehova mothovđa lese bizaslužimo šukaripe hem dikhlja le sar pravedno sebepi olesi vera (Rimlj. 4:2-4; w23.12 3 ¶4-5).

O prorok Natan phenđa e kraljese, e Davidese akala lafija. O Jehova phenđa e Natanese so o David na ka ćerel o hram (1. Let. 17:3, 4, 11, 12). Sar o David reagujinđa ked šunđa odova? Počminđa te ćedel pare hem materijali kova ka valjani lese ćhavese, e Solomonese, te ćerel o hram (1. Let. 29:1-5). Odmah palo odova so e Davidese hine phendo so na ka gradini o hram, o Jehova ćerđa savez oleja. O Jehova obećinđa lese so jekh ando oleso potomko ka vladini zauvek (2. Sam. 7:16). Ko nevo sveto, đi ka trajini i Hiljadaberšengi vladavina, o David ka ovel but radosno ked ka haljol so o Kralj, o Isus, tano andi olesi loza. Akava izveštaj pomožini amenđe te haljova so čak hem ako našti te ćera sa so mangaja ki služba e Jehovase, ov šaj te blagoslovini amen ko način sar so ni na očekujinđam (w23.04 16 ¶8-10).

Šaj ka arakhe disavi utešno misao koja posebno ka značini tuće. Na primer, šaj ka utešini tut odova so pisini ki knjiga Jov, Psalam, Poslovice ili e Isusese lafija ando Matej šovto poglavlje. Ako molinaja amen e Jehovase hem čitinaja oleso Lafi, tegani ka dozvolina e Jehovase te utešini amen. Šaj te ova sigurna so o Jehova uvek ka ovel amencar ko amare pharipa. Niked na ka ova kokri (Ps. 23:4). Ov obećini so ka vodini amen, ka zorjaćeri amen, ka podržini amen hem ka utešini amen. Ko Isaija 26:3 ando Jehova pisini: „Ka arakhe okolen kola osloninena pe upro tute. Ka de len trajno mir sose uzdajinena pe upro tute.“ Odolese, uzdajin tut upro Jehova hem koristin olesi pomoć. Ako odova ćereja, ka aćhove istrajno čak hem ko bare pharipa (w24.01 25 ¶16-17).

Akala lafija ispuninena pe avdije. Ama, ko amaro vreme ispunini pe hem akava: „O Jehova ka sikavi sa te ćhaven hem te ćhave ka ovel len baro mir. Ki pravda ka ove utemeljimi [. . .] nisostar na ka dara hem na ka ovel tut razlog asi dar, i dar na ka ukljel tut“ (Is. 54:13, 14). Čak hem „o devel akale svetoso“, o Beng, na ka šaj te ćhinavi e Devlese narodo te sikavi e manušen ando Jehova (2. Kor. 4:4). E Jehovaso narodo služini lese ko ispravno način hem odova niko našti te rumini. Ađahar ka ovel ki celo večnost. Nisavo oružje kova tano ćerdo protiv amende na ka ovel uspešno! (w24.02 4 ¶10).

Sar hrišćanija, amen but ozbiljno dikhaja ko amaro zavet kova dinđam e Jehovase ked predajinđam amen. Odova zavet utičini ko amare odluke hem postupkija ked tani ko pućibe amari porodica. Amen daja sa amendar te brinina amen ando amare porodicake potrebe, ama ko prvo than uvek ćhivaja e Jehovasi volja, a na amare porodicake želje (Mat. 10:35-37; 1. Tim. 5:8). Podijekh puti, odolese so mangaja te ugodina e Jehovase, amare porodicaće šaj na ka sviđinen pe o odluke kola anaja. O Jehova ćerđa i porodica hem ov mangela te ovel amen bahtali porodica (Ef. 3:14, 15). Ako mangaja te ova bahtale, valjani te ova poslušna e Jehovase. Niked ma sumnjin so o Jehova cenini te žrtve kola ćereja đi brinineja tut andi ti porodica hem mothoveja lenđe mangipe hem poštovanje (Rimlj. 12:10; w24.02 18 ¶11, 13).