Ο Πρώτος Γράμμας σο Γραφιντάς ο Ιωάννης
4 Πφραλάλεν, μα πακιάν κάθε λάφι σο ντικχίντιβελα ότι ισί κατά Ντεβέλ,* αλλά τι ρόντεν ανταλά λάφια* για τι ντικχέν άμα ισί κατά Ντεβέλ, σόσκε μπουτ προφήτες σο χουχαβένα νικίστιλε κο ντουνιάς.
2 Αντικάς κα αγαβέν άμα εκ λάφι ισί κατά Ντεβέλ: Κάθε λάφι σο σικαβέλα ότι ο Ιησούς Χριστός μπαγιά αβιλό κι πφουβ σαρ τζενό ισί κατά Ντεβέλ. 3 Αλλά κάθε λάφι σο να σικαβέλα ότι ο Ιησούς αβιλό κι πφουβ σαρ τζενό νανέ κατά Ντεβέλ. Ανταλά λάφια βακερέλα-λεν ο αντίχριστος.* Τουμέν ασουντένας ότι κα βακερέλ ασακέ λάφια, ντα ακανά βακερέλα-λεν κο ντουνιάς.
4 Τουμέν, μο τσσαβορέ, αβένα κατά Ντεβέλ ντα νικιντέν-λεν, σόσκε οντουβά σο ισί ενωμέ τουμέντζαρ ισί πο μπαρό κατά Μπενγκ σο ισί ενωμέ ι ντουνιάσαρ. 5 Επειδή βον αβένα κατά ντουνιάς, βακερένα ανταλά σο βακερέλα ο ντουνιάς ντα ο ντουνιάς ασουνέλα-λεν. 6 Αμέν αβάσα κατά Ντεβέλ. Κον τζανέλα ι Ντεβλές ασουνέλα-αμέν. Κον να αβέλα κατά Ντεβέλ να ασουνέλα-αμέν. Αντικάς αγαβάσα καλά λάφια ισί μπαγιά ντα καλά νανέ.
7 Πφραλάλεν, τι μανγκάς ο εκ ι γιαβερές, σόσκε η αγάπη ισί κατά Ντεβέλ, ντα κον μανγκέλα ι γιαβερέν μπιάντιλο κατά Ντεβέλ ντα τζανέλα ι Ντεβλές. 8 Κον να μανγκέλα ι γιαβερέν να τζανέλα ι Ντεβλές, σόσκε ο Ντεβέλ ισί αγάπη. 9 Αντικάς σικάντιλι αμένγκε η αγάπη ι Ντεβλέσκι: ο Ντεβέλ μπουτσσαντάς πι μοναδικέ Τσσαβές κο ντουνιάς για τι τθεράς αμέν ζωή αντράλ λέσταρ. 10 Ανταγιά αγάπη μανγκέλα τι βακερέλ ακαβά: Να μανγκλάμ αμέν ι Ντεβλές, αλλά βοβ μανγκλάς-αμέν ντα μπουτσσαντάς πι Τσσαβές σαρ θυσία αμαρέ αμαρτιένγκε σο κερέλα-αμέν τι αβάς πάλι αμαλά* ι Ντεβλέσαρ.
11 Πφραλάλεν, άμα ο Ντεβέλ μανγκλάς-αμέν αντικάς, ισινάμ αμέν-ντα υποχρεωμέ τι μανγκάς ο εκ ι γιαβερές. 12 Καέκ να ντικχλάς ποτές ι Ντεβλές. Άμα μανγκάσα ο εκ ι γιαβερές, ο Ντεβέλ ατσσόλα αμέντζαρ ντα λέσκι αγάπη σικάντιβελα ντιπ λατσσές αμέντε. 13 Ανταλέσταρ τζανάσα ότι ατσσάσα ενωμέ λέσαρ ντα βοβ ενωμέ αμέντζαρ, σόσκε ντινάς-αμέν πο πνεύμας. 14 Ντα αμέν ντικχλάμ ντα μουτθαβάσα ότι ο Ντατ μπουτσσαντάς πι Τσσαβές για τι σώνελ ι ντουνιάς. 15 Κον βακερέλα ότι πακιάλα ότι ο Ιησούς ισί ο Τσσαβό ι Ντεβλέσκο, ο Ντεβέλ ατσσόλα ενωμέ λέσαρ ντα βοβ ενωμέ ι Ντεβλέσαρ. 16 Ντα αμέν σικλιλάμ ότι ο Ντεβέλ μανγκέλα-αμέν ντα ισινάμ σίγουροι ανταλέσκε.
Ο Ντεβέλ ισί αγάπη, ντα οντουβά σο να τσσιναβέλα τι σικαβέλ αγάπη ατσσόλα ενωμέ ι Ντεβλέσαρ ντα ο Ντεβέλ ατσσόλα ενωμέ λέσαρ. 17 Ανταλέ τροπόσαρ σικάντιλι ντιπ λατσσές η αγάπη αμέντε για τι κεράς λάφι μπίνταρανες κο ντιβές σο κα κρίνελ ο Ντεβέλ ι τζενέν, επειδή σαρ ισί ο Χριστός αντικάς ισινάμ αμέν-ντα ανταλέ ντουνιάστε. 18 Οντουβά σο μανγκέλα ι Ντεβλές να τθερέλα νταρ, αλλά η αγάπη σο σικάντιβελα ντιπ λατσσές νασκιαρέλα ι νταρ, σόσκε η νταρ ατσσικιαρέλα-αμέν παλάλ. Οντουβά σο νταρέλα να σικαβέλα ντιπ λατσσές πι αγάπη. 19 Αμέν σικαβάσα αγάπη σόσκε βοβ πρώτος μανγκλάς-αμέν.
20 Άμα εκ τζενό κα βακερέλ: «Μανγκάβα ι Ντεβλές» αλλά μισίνελα πι πφραλές, ισί ψεύτης. Επειδή οντουβά σο να μανγκέλα πι πφραλές, σο ντικχλάς-λες, να μπορίνελα τι μανγκέλ ι Ντεβλές, σο να ντικχλάς-λες. 21 Ανταγιά εντολή τθεράσα λέσταρ: Κον μανγκέλα ι Ντεβλές πρέπει τι μανγκέλ πι πφραλές-ντα.