Ο Ευαγγέλιος σο Γραφιντάς ο Ματθαίος
28 Σοράν κατά Σάββατος, καζόμ ντισιόλας ο πρώτος ντιβές ι εβδομαδάκο, αβιλί η Μαρία η Μαγδαληνή ντα η γιαβέρ Μαρία τι ντικχέν ο μεζάρι.*
2 Ντα αβιλόας-πες εκ μπαρό σεισμός, σόσκε άγγελος ι Ιεχωβάσκο* γουλίστιλοας κατά ουρανός ντα αβιλόας ντα ταρτιντάας ο μπαρ ντα μπεσέλας οπρά-λέστε. 3 Λέλας-πες σαρ αστραπή ντα λέσκε σέα ισινέ παρνέ σαρ βιβ. 4 Οντουλά σο αρακχαβένας ο μεζάρι νταρασάλε αζόμ μπουτ λέσταρ σο λιντάς-λεν ιζρανί ντα σουκιλέ.
5 Αλλά ο άγγελος βακερντάς κο τζουβλιά: «Μα νταρέν, σόσκε τζανάβα ότι ρόντενα ι Ιησούσκε σο ιμπλαντέ-λες κο κας. 6 Νανέ ατθέ, σόσκε ιστίντιλο, αντικάς σαρ βακερντάας. Ελάν τι ντικχέν κατέ ισινέας. 7 Σοράν, τζαν σουγκό ντα βακερέν λέσκε μαθητένγκε ότι ιστίντιλο κατά μουλέ, ντα ακανά τζάλα πο τζανγκλέ τουμένταρ κι Γαλιλαία. Οτθέ κα ντικχέν-λες. Άκ’! Βακερντόμ-λες τουμένγκε».
8 Οτθάρ νασλέ σουγκό κατά μεζάρι νταριάσαρ ντα μπαρέ χαράσαρ, ντα τθαβντισάλε τι βακερέν-λες λέσκε μαθητένγκε. 9 Ντα αζομάν ντικχλάς-λεν ο Ιησούς ντα βακερντάς: «Λατσσό ντιβές!» Βον γκιλέ πασέ, πελέ κοτσίντζαρ ανγκλά-λέστε ντα ασταρντέ λέσκε πιντρέ. 10 Ο Ιησούς βακερντάς λένγκε: «Μα νταρέν! Τζαν, βακερέν-λες μι πφραλένγκε για τι τζαν κι Γαλιλαία, ντα βον κα ντικχέν-μαν οτθέ».
11 Καζόμ ο τζουβλιά ισινέ κο ντρομ, μερικοί οντουλένταρ σο αρακχαβένας ο μεζάρι γκιλέ κι πόλη ντα βακερντέ κο μπαρέ ιερείς σαρέ οντουλά σο αβιλέας-πες. 12 Ο μπαρέ ιερείς γκιντισάλε ι πρεσβυτερόντζαρ ντα κερντέ λάφι. Σοράν, ντινέ μπερεκέτι ασημένια κέρματα κο στρατιώτες 13 ντα βακερντέ: «Βακερέν ακαβά: “Λέσκε μαθητές αβιλέ αρατί ντα τσορντέ-λες καζόμ αμέν σοβάας”. 14 Ντα άμα ανταβά ασουντάς-λες ο Πιλάτος, κα κεράς λέσαρ λάφι αμέν. Μα νταρέν». 15 Οτθάρ βον λιντέ ο ασημένια κέρματα ντα κερντέ αντικάς σαρ βακερντέ λένγκε, ντα ανταλά λάφια πφιρντιόνα μέχρι αντιβές σαρέ κο Ιουδαίοι.
16 Ο 11 μαθητές γκιλέ κι Γαλιλαία, κο βες σο βακερντάας λένγκε ο Ιησούς τι τζαν. 17 Κάνα ντικχλέ-λες, πελέ κοτσίντζαρ ανγκλά-λέστε, αλλά μερικοί να πακιάνας ότι ισινέ βοβ. 18 Ο Ιησούς γκιλό πασέ ντα βακερντάς λένγκε: «Σαρέ ο πράγματα κο ουρανός ντα κι πφουβ ντιντιλέ μι βαστέντε. 19 Οτθάρ, τζαν ντα κερέν μαθητέν σαρέ κατά τθεμά, μπολέν-λεν κο ναβ κι Νταντέσκο ντα κι Τσσαβέσκο ντα κι άγιε πνευμάσκο 20 ντα σικλιαρέν-λεν τι κερέν σαρέ οντουλά σο βακερντόμ τουμένγκε. Ντα με ισινόμ τουμέντζαρ σαρέ ο ντιβεσά μέχρι κο τέλος ανταλέ ντουνιάσκο».*