Η Κιβωτός σο Κερντάς ο Νώε

Καζόμ νακχένας ο μπρεσά, η πφουβ αρχισάλι τι πφερντιόλ τζενέντζαρ. Ο πο μπουτ τζενέ ισινέ γκεραλέ. Ατζέ-ντα μερικοί άγγελοι κατά ουρανός αβιλέ γκεραλέ. Μουκχλέ πουμαρό κχερ κο ουρανός ντα γουλίστιλε κι πφουβ. Τζανέσα σόσκε κερντέ-λες ανταβά; Για τι λεν τζενένγκε σώματα ντα τι παντρίνεν τζουβλίντζαρ.

Ο άγγελοι ντα ο τζουβλιά κερντέ τσσαβέν. Ανταλά τσσαβέ μπαριλέ, αβιλέ μπουτ ζουρανέ μουρσά ντα νταραβένας ι γιαβερέν. Κερένας κακός κο τζενέ. Ο Ιεχωβά ναστί μουκχέλας τι αβέλ-πες ανταβά για πάντα. Οτθάρ, αποφασιντάς τι ανέλ εκ κατακλυσμός για τι μουνταρέλ οντουλέ γκεραλέ τζενέν.

Αλλά εκ τζενό να ισινέ σαρ κο γιαβερά. Μανγκέλας ι Ιεχωβάς. Βακερένας λέσκε Νώε. Τθερέλας εκχέ ρομνιά ντα τρινέ τσσαβέν σο λένγκε ναβά ισινέ Σημ, Χαμ ντα Ιάφεθ, ντα ο κάθε εκ λένταρ τθερέλας εκχέ ρομνιά. Ο Ιεχωβά βακερντάς κο Νώε ότι για τι σώντιβελ βοβ ντα λέσκι φαμιλί κατά Κατακλυσμός έπρεπε τι κερέλ εκ μπαρί κιβωτός, δηλαδή εκ μπουτ μπαρό κουτίς καστέντζαρ σο κα μπορίνελας τι ατσσόλ οπράλ κο πανί. Ο Ιεχωβά βακερντάς κο Νώε τι τσσουβέλ μπουτ ζώα-ντα αντρέ κι κιβωτός για τι σώντιβεν βον-ντα.

Ο Νώε αρχιντάς τι κερέλ ι κιβωτός αμέσως. Βοβ ντα λέσκι φαμιλί κερντέ περίπου 50 μπρεσά για τι λατσσαρέν-λα. Κερντέ-λα ντιπ αντικάς σαρ βακερντάς λένγκε ο Ιεχωβά. Οντουλά μπρεσά, ο Νώε προειδοποιήνελας ι τζενέν ότι κα αβέλ ο Κατακλυσμός. Αλλά να ασουνέλας-λες καέκ.

Τελικά, αβιλό ο σαάτι τι τσσουβέν-πες αντρέ κι κιβωτός. Έλα τι ντικχάς σο αβιλό-πες σοράν.