Ιούνιος

Ο Ιεχωβά ευλογίνελας ι Χριστιανόν κο πρώτος αιώνας επειδή κερένας ο αλλαγές σο χρειαζίντιβενας. Νακχένας μπουτ φαρ διωγμός, μπάζιμα οτθέ σο να μπεκλεντίνενας λέσκε. Σκεφτίνεν σο αβιλό-πες κο Βαρνάβας ντα κο απόστολος Παύλος κάνα βακερντέ ο λατσσέ αμπέρια κο Λύστρα. Κι αρχή, ο τζενέ σο ασουνένας-λεν δεχτιντέ-λεν αντράλ πουμαρέ γκίσταρ. Αλλά πο σοράν, κάποια τζενέ σο τζάνας λέντζαρ κόντρα «κερντέ ι τζενέν τι νευριάνεν», ντα μερικοί οντουλέ ίδιε τζενένταρ φουρτιντέ μπαρά ι Παυλόσκε ντα μουκχλέ-λες, επειδή αμντισάλεας ότι ισινέ μουλό. (Πράξ. 14:19) Αλλά ο Βαρνάβας ντα ο Παύλος συνεχιντέ τι βακερέν ο λατσσέ αμπέρια γιαβερτθέ. Καβά ισινέ ο αποτέλεσμας; Κερντέ «μπερεκέτι μαθητέν», ντα οντουλέντζαρ σο βακερένας ντα κερένας ντινέ ζορ πουμαρέ πφραλέν ντα πουμαρέ πφενίν. (Πράξ. 14:21, 22) Μπουτ τζενέ βοηθίντιλε επειδή ο Παύλος ντα ο Βαρνάβας να τσσιναντέ τι βακερέν ο λατσσέ αμπέρια ατζέ-ντα κάνα ο γιαβερά γκιλέ λέντζαρ κόντρα ξαφνικά. Άμα να τσσιναβάσα τι κεράς ο έργος σο ντινάς-αμέν ο Ιεχωβά, κα ευλογίντιβας αμέν-ντα. w23.04 σ. 16, 17 ¶13, 14

Ο βασιλιάς Δαβίδ τθερέλας μπουτέ επικίνδυνε ντουσμανίν σαρέ πι ζωγιάτε ντα μανγκέλας ι βοήθεια ι Ιεχωβάσκι μπουτ φαρ αντράλ κατά προσευχή. Ο Δαβίδ ισινέ σίγουρος ότι ο Ιεχωβά ασουνέλας λέσκε προσευχές ντα απαντίνελας λέντε. Μπορίνενα τουμέν-ντα τι τθερέν ασακί σιγουριά. Η Γραφή κερέλα-αμέν σίγουρους ότι ο Ιεχωβά μπορίνελα τι ντελ-αμέν ι σοφία ντα ι ζορ σο χρειαζίντιβασα για τι νταϊντίνας. Μπέκιμ τι χρησιμοποιήνελ αμαρί πνευματική φαμιλί ή ατζέ-ντα τζενέν σο ακανά να πακιάνα λέστε για τι βοηθίνελ-αμέν εκχέ τροπόσαρ. Παρόλο σο ο Ιεχωβά μπέκιμ μα τι απαντίνελ αμαρέ προσευχιέντε πάντα ι τροπόσαρ σο μπεκλεντίνασα, τζανάσα ότι απαντίνελα. Ντέλα-αμέν ακριβώς σο χρειαζίντιβασα κάνα χρειαζίντιβασα-λες. Οτθάρ, συνεχίνεν τι κερέν προσευχή με πίστη, ντα τι αβέν σίγουροι ότι ο Ιεχωβά κα φροντίνελ-τουμέν ακανά ντα κα “τσαλιαρέλ ι επιθυμία σαρέ οντουλένγκι σο τζουβντιόνα” κο νεβό ντουνιάς σο κα αβέλ.​—Ψαλμ. 145:16. w23.05 σ. 8 ¶4· σ. 13 ¶17, 18

Ισί λατσσό τι τθερέν τουμαρέ γιακχά κο ευλογίες σο κα ανέλ τουμαρό στόχος. Τουμέν, καλέ ευλογιέντε κα μπορίνενας τι τθερέν τουμαρέ γιακχά; Άμα τουμαρό στόχος ισί τι κερέν πο λατσσές ο διάβασμας ι Γραφιάκο ή τουμαρέ προσευχές, σκεφτίνεν σαρ ανταβά κα μπαριαρέλ τουμαρί φιλία ι Ιεχωβάσαρ. (Ψαλμ. 145:18, 19) Άμα τουμαρό στόχος ισί τι κερέν μπουτί οπράλ σε εκ Χριστιανική ιδιότητα, σκεφτίνεν σαρ ανταβά κα βοηθίνελ-τουμέν τι τζαν-λεν πο λατσσές ι γιαβερέντζαρ. (Κολ. 3:14) Κα μπορίνενας ατζέ-ντα τι κερέν εκ κατάλογος ντα τι γραφίνεν αντρέ σαρέ ο λόγοι σο μανγκένα τι πετυχίνεν τουμαρό στόχος, ντα τι ντικχέν-λες μπουτ φαρ. Ατζέ, τι κερέν παρέα τζενέντζαρ σο ντένα-τουμέν ζορ. (Παρ. 13:20) Ισί μπαγιά όμως ότι, μερικά ντιβεσά, σαρέ νιωθίνασα ότι να μανγκάσα μπουτ τι πετυχίνας αμαρό στόχος. Μήπως ανταβά μανγκέλα τι βακερέλ ότι ναστί κεράσα μπουτί για τι πετυχίνας αμαρό στόχος; Νάα. Μπορίνασα τι κεράς μπουτί για τι πετυχίνας αμαρό στόχος, ατζέ-ντα κάνα νιωθίνασα ότι να μανγκάσα-λες αζόμ μπουτ. Παρόλο σο κα χρειαζίντιβελ τι κεράς-αμέν κουμάντος, κα αβάς χαρούμενοι κάνα κα πετυχίνας αμαρό στόχος. w23.05 σ. 27, 28 ¶5-8

Επειδή τζανάσα ότι πρέπει τι λας ι ευθύνη για το αποφάσεις αμαρέ, ανταβά μπορίνελα τι τσσίντελ-αμέν τι μουτθαβάς αμαρέ αμαρτίες, τι διορθώνας αμαρέ λάθη ντα τι προσπαθίνας μα τι κεράς-λεν πάλι. Άμα κα κεράς-λεν ανταλά, κα βοηθίντιβας τι ατσσάς κο αγώνας κι ζωγιάκο. Άμα να μπορίνενα τι αλλάνεν εκ μπέτι απόφαση, δεχτίνεν ο πράγματα σαρ ισί ακανά. Μα χρησιμοποιήνεν τουμαρό σαάτι ντα τουμαρί ζορ για τι δικαιολογίνεν-τουμέν ή για τι κατηγορίνεν τουμέν ή γιαβερέν. Αντίς ανταλέσκε, δεχτίνεν τουμαρέ λάθη ντα προσπαθίνεν τι κερέν ο πο λατσσό σο μπορίνενα ακανά. Άμα νιωθίνενα τύψεις για κάποιο λάθος σο κερντέν, προσευχίντιβεν ταπεινά κο Ιεχωβά, μουτθαβέν τουμαρό λάθος ντα μανγκέν λέσταρ τι συγχωρίνελ-τουμέν. (Ψαλμ. 25:11· 51:3, 4) Μανγκέν συγνώμη οντουλένταρ σο μπέκιμ πληγωντέν-λεν, ντα άμα χρειαζίντιβελα, μανγκέν βοήθεια κατά πρεσβύτεροι. (Ιακ. 5:14, 15) Σικλιόν τουμαρέ λαθίνταρ ντα προσπαθίνεν μα τι κερέν-λεν πάλι. Αντικάς, μπορίνενα τι αβέν σίγουροι ότι ο Ιεχωβά κα τζιτζίνελ τουμένγκε ντα κα στηρίνελ-τουμέν.​—Ψαλμ. 103:8-13. w23.08 σ. 28, 29 ¶8, 9

Ο βασιλιάς Ιωάς βοηθίντιλο κατά λατσσό παράδειγμας του Ιωδαέ. Οτθάρ, ο τερνό βασιλιάς μανγκέλας τι κερέλ ο γκι ι Ντεβλέσκο. Αλλά σοράν κατά μεριπέ του Ιωδαέ, ο Ιωάς ασουντάς ι αρχοντέν σο αβιλέας αποστάτες. (2 Χρον. 24:4, 17, 18) Παρόλο σο ο Ιεχωβά ισινέ μπουτ πληγωμέ, «μπουτσσαβέλας προφητέν λέντε για τι ανέλ-λεν πασέ πέστε, . . . αλλά βον να μανγκένας τι ασουνέν-λεν». Να ασουντέ ούτε ι τσσαβές του Ιωδαέ, ι Ζαχαριάς, σο να ισινέ σάντε προφήτης ντα ιερέας, αλλά ξάδελφος του Ιωάς-ντα. Ο βασιλιάς Ιωάς ερεσλό ατζέ-ντα κο σημείος τι μουνταρέλ ι Ζαχαριάς. (2 Χρον. 22:11· 24:19-22) Ο Ιωάς να ατσσικιαρντάς ι σωστή νταρ κατά Ιεχωβά. Ο Ιεχωβά βακερντάας: «Οντουλέν σο να ντένα-μαν αξία, ούτε με κα νταβ-λεν αξία». (1 Σαμ. 2:30) Πο σοράν, εκ χουρντό συριακός στρατός νικιντάς ο μπουτ μπαρό στρατός του Ιωάς ντα μουκχλάς ι βασιλιάς σοβαρά ντινό. (2 Χρον. 24:24, 25) Ο ίδιε ο υπηρέτες του Ιωάς μουνταρντέ-λες επειδή βοβ μουνταρντάας ι Ζαχαριάς. w23.06 σ. 18 ¶16, 17

Ο απόστολος Παύλος μπεσλόας μπουτ βακίτι κι Έφεσος καζόμ βακερέλας ντα σικλιαρέλας ο λατσσέ αμπέρια. (Πράξ. 19:1, 8-10· 20:20, 21) Μανγκέλας πι πφραλέν μπουτ ντα μανγκέλας τι βοηθίνελ-λεν τι ατσσόν πιστοί κο Ιεχωβά. Ο Εφέσιοι πακιάνας εμ κο λάφια σο σικλιαρέλας η ψεύτικη θρησκεία εμ κι μαγεία. Μπουτ τζενέ κι Έφεσος κερένας εμ λουμνικανέ πράγματα σο ισινέ τζουνγκαλέ εμ μπίλατζανε πράγματα. Ο παραστάσεις κο θέατρα οντουλέ τθεμέσκε, ατζέ-ντα ο γιορτές σο κερέλας η θρησκεία, τθερένας τι κερέν με το σεξ. (Εφεσ. 5:3) Μπουτ τζενέ οτθέ “νασλέας κατά όρια”. Ανταβά λάφι μανγκέλα τι βακερέλ ότι «να νιωθίνενας ιτς ντουκχ» αντρέ πουμαρέ γκίστε κάνα κερένας εκ μπέτι πράγμας. (Εφεσ. 4:17-19) Πριν τι σικλιόν ο Εφέσιοι ο κανόνες ι Ιεχωβάσκε σο βακερένας καβά πράγμας ισινέ σωστός ντα καβά ισινέ λάθος, να ενοχλίνελας-λεν λένγκι συνείδηση. Άκ’ σόσκε ο Παύλος μπορίνελας τι βακερέλ ότι, αζομάν, “λένγκι γκοντί ισινέ κο καρανίκι, ντα βον ισινέ ντουρ κατά ζωή σο αβέλα κατά Ντεβέλ”. Μερικοί Εφέσιοι όμως να ατσσιλέ κο καρανίκι. w24.03 σ. 20 ¶2, 4· σ. 21 ¶5, 6

Ο διορισμός σο τθερέλας ο Γεδεών σαρ κριτής ανέλας λέσκε μπουτ κούραση. Κο τζένγκι, κάνα ο Μαδιανίτες νασλέ για τι σώντιβεν αρατί, ο Γεδεών κουλαντιντάς-λεν κατά κοιλάδα της Ιεζραέλ μέχρι κι Λεν Ιορδάνης. (Κριτ. 7:22) Μήπως ο Γεδεών σταματιντάς κο Ιορδάνης; Νάα! Παρόλο σο ισινέ κχινέ, βοβ ντα λέσκε 300 μουρσά νακχλέ ι λεν ντα συνεχιντέ τι κουλαντίνεν ι Μαδιανιτέν. Τελικά, ερεσαντέ-λεν ντα νικιντέ-λεν. (Κριτ. 8:4-12) Ο Γεδεών ισινέ σίγουρος ότι ο Ιεχωβά κα ντέλας-λες ζορ, ντα αντικάς αβιλό-πες. (Κριτ. 6:14, 34) Εκ φαρ, ο Γεδεών ντα λέσκε μουρσά κουλαντίνενας τσανγκίντζαρ ντουέ Μαδιανιτέν σο ισινέ βασιλιάδες, ντα μπέκιμ ανταλά βασιλιάδες ισινέ οπράλ κο καμήλες. (Κριτ. 8:12, 21) Όμως, ο Ντεβέλ βοηθιντάς ι αποφασισμέ Ισραηλιτέν τι ασταρέν-λεν ντα τι νικίνεν κο τζένγκι. Αντικάς-ντα, ο πρεσβύτεροι μπορίνενα τι στηρίντιβεν κο Ιεχωβά, οντουλέστε σο «να κχινιόλα ούτε τσσιντιόλα-πες». Κα ντελ-λεν ζορ κάνα χρειαζίντιβενα-λα.​—Ησ. 40:28, 29. w23.06 σ. 6 ¶14· σ. 7 ¶16

Μπορίνασα τι τθεράς σταθερός γκι σο-ντα δοκιμασίες τι νακχάς. Οτθάρ τι ντεν μπέσα κο Ιεχωβά. Σκεφτίνεν σαρ τθερέλας επιτυχία ο Βαράκ επειδή ντινάς μπέσα κι οδηγία κι Ιεχωβάσκι. Παρόλο σο σαρό κο τθεμ να ντικχίντιβελας ούτε ασπίδα ούτε κοντάρι, ο Ιεχωβά ντινάς κο Βαράκ ι οδηγία τι τζαλ τι κερέλ τζένγκι ι λατσσέ στρατόσαρ σο τθερέλας εκ Χαναναίος αρχηγός, ο Σισάρα. (Κριτ. 5:8) Η προφήτισσα Δεββώρα βακερντάς κο Βαράκ τι γουλίλ κατά βεσά για τι τζαλ τι κερέλ τζένγκι με τον Σισάρα ντα με το 900 άρματα σο τθερέλας. Κι πεδιάδα, κα αβέλας μπουτ δύσκολος ι Ισραηλιτένγκε τι κερέν τζένγκι με το άρματα σόσκε τθάβντενας σουγκό. Παρόλο σο ο Βαράκ τζανέλας-λες ανταβά, ντινάς καν. Καζόμ λέσκε στρατιώτες γουλίνας κατά Βες Θαβώρ, ο Ιεχωβά κερντάς τι περέλ μπαρό μπρισίμ κατά ουρανός. Ο άρματα του Σισάρα κολλισάλε κι τσικ, ντα ο Ιεχωβά ντινάς ι νίκη κο Βαράκ. (Κριτ. 4:1-7, 10, 13-16) Αντικάς-ντα, ο Ιεχωβά κα ντελ-αμέν ι νίκη άμα κα ντας μπέσα λέστε ντα κο οδηγίες σο ντέλα-αμέν αντράλ πι οργανωσιάταρ. w23.07 σ. 19 ¶17, 18

Η υπομονή ισί μπουτ σημαντική για τι σώντιβας. Σαρ ο πιστοί υπηρέτες κο πουρανέ μπρεσά, χρειαζίντιβελα τι μπεκλεντίνας με υπομονή για τι κερέλ ο Ντεβέλ πο υποσχέσεις τι νικιόν μπαγιά. (Εβρ. 6:11, 12) Η Γραφή μοιασκιαρέλα-αμέν με εκ γεωργός. (Ιακ. 5:7, 8) Ο γεωργός μαρέλα-πες για τι φυτίνελ ντα τι ποτίνελ οντουβά σο σπειριντάς, αλλά να τζανέλα κάνα ακριβώς κα μπαριόν ο σπόροι. Οτθάρ, μπεκλεντίνελα με υπομονή, ντα ισί σίγουρος ότι κα γκίντελ ι σοδειά. Αντικάς αμέν-ντα, ατσσάσα απασχολημέ κο πνευματικά πράγματα, παρόλο σο “να τζανάσα καβά ντιβές αβέλα αμαρό Κύριος”. (Ματθ. 24:42) Μπεκλεντίνασα με υπομονή, ντα ισινάμ σίγουροι ότι πι βακιτίστε ο Ιεχωβά κα κερέλ τι νικιόν μπαγιά σαρέ λέσκε υποσχέσεις. Άμα κα χασαράς αμαρί υπομονή, μπέκιμ μα τι νταϊντίνας γιαβέρ τι μπεκλεντίνας ντα τι αρχίνας τι νασάς κατά αλήθεια. Ντα μπέκιμ τι αρχίνας τι μανγκάς τι τθεράς πράγματα σο κα ανέν αμένγκε αμέσως χαρά. Άμα όμως τθεράσα υπομονή, κα μπορίνας τι νταϊντίνας μέχρι κο τέλος ντα τι σώντιβας.​—Μιχ. 7:7. w23.08 σ. 22 ¶7

Καζόμ ντικχάσα ι προφητεία κο Δανιήλ 2:41-43 γιεκ γιαβερέ προφητειέντζαρ σο ισί κο βιβλία Δανιήλ ντα Αποκάλυψη, αγαβάσα ότι ο πιντρέ μανγκένα τι σικαβέν ι Αγγλοαμερικανική Παγκόσμια Δύναμη, σο ισί ο πο ζουρανέ κυβερνήσεις αμαρέ ντιβεσέντε. Ο Δανιήλ κερέλα λάφι για την παγκόσμια δύναμη ανταγιά ντα βακερέλα ότι «η βασιλεία κα αβέλ εμ ζουρανί εμ μπίζουρανι». Σόσκε όμως εμ μπίζουρανι; Επειδή ο τζενέ, σο ισί η κοβλί τσικ, να μουκχένα ανταγιά παγκόσμια δύναμη τι χρησιμοποιήνελ σαρί πι ζορ, σο ισί σαρ σίδερος. Σικλιάσα σημαντικές αλήθειες κατά άγαλμας σο ισί κι προφητεία του Δανιήλ. Πρώτον, η Αγγλοαμερικανική Παγκόσμια Δύναμη σικαντάς ότι ισί ζουρανί. Για παράδειγμας, κχελντάς σημαντικός ρόλος για τι κερδίντιβεν ο ντούι παγκόσμιοι πόλεμοι. Όμως, ανταγιά παγκόσμια δύναμη χασαρντάς πι ζορ ντα κα συνεχίνελ τι χασαρέλ-λα επειδή ο τζενέ σο ισί οντουλέ τθεμένταρ χάνα-πες εμ ο εκ ι γιαβερέσαρ εμ με την κυβέρνηση. Δεύτερον, η Αγγλοαμερικανική Παγκόσμια Δύναμη κα αβέλ η τελευταία παγκόσμια δύναμη σο κα κυβερνίνελ πριν τι αβέλ η Βασιλεία ι Ντεβλέσκι, σο κα τσσουβέλ τέλος σαρέ κο βασιλείες κι τζενένγκε. w23.08 σ. 10, 11 ¶12, 13

Ισινέ φαρ σο ο Δαβίδ νιωθίνελας μπαρί στεναχώρια ιτιρί κατά προβλήματα ντα κατά δοκιμασίες σο νακχέλας. (Ψαλμ. 18:4, 5) Όμως, η τατί αγάπη ντα η φροντίδα ι Ιεχωβάσκι λοκχιαρένας λέσκο γκι. Ο Ιεχωβά οδηγίνελας πι κχινέ αμαλές «τθανέντε σο ισί πφερντέ τσαριά» ντα “τθανέντε μπερεκέτι πανίντζαρ για τι ξεκουράντιβελ”. Οτθάρ, ο Δαβίδ αρακχέλας πάλι πι ζορ ντα μπορίνελας τι συνεχίνελ. (Ψαλμ. 18:28-32· 23:2) Αντικάς αντιβές-ντα, «κατά αφοσιωμέ αγάπη ι Ιεχωβάσκι να ερεσλάμ ατζέ κο τέλος αμαρό» παρόλο σο νακχάσα δοκιμασίες ντα δυσκολίες κι ζωή. (Θρ. 3:22· Κολ. 1:11) Η ζωή ι Δαβιδίσκι ισινέ μπουτ φαρ σε κίνδυνος επειδή τθερέλας μπουτέ ζουρανέ ντουσμανίν. Αλλά η αγάπη ι Ιεχωβάσκι κερέλας-λες τι νιωθίνελ αρακχαντό. Ο Δαβίδ νιωθίνελας ότι ο Ιεχωβά ισινέ λέσαρ κατέ-ντα τι ισινέας ντα ανταβά ηρεμίνελας-λες. Οτθάρ, μπορίνελας τι γκιλιαβέλ: «[Ο Ιεχωβά] νασκιαρντάς ντουρ μάνταρ σαρέ ο πράγματα σο νταραβένας-μαν». (Ψαλμ. 34:4) Ισινέ μπουτ πράγματα σο νταραβένας ι Δαβιδίς, αλλά η αγάπη ι Ιεχωβάσκι ισινέ πο ζουρανί κατά νταρ. w24.01 σ. 29, 30 ¶15-17

Σικλιόν κατά μπέτι αποφάσεις του Ιωάς. Σοράν κατά μεριπέ του αρχιερέα Ιωδαέ, ο Ιωάς να τραμπιντάς λατσσέ αμαλέν. (2 Χρον. 24:17, 18) Αποφασιντάς τι ασουνέλ ο συμβουλές σο ντινέ-λες ο άρχοντες κο Ιούδας σο να μανγκένας ι Ιεχωβάς. Ο πο λογικός κα αβέλας ο Ιωάς τι ατσσόλ ντουρ οντουλέ τζενένταρ σο κερένας μπέτι πράγματα. Βοβ όμως αποφασιντάς τι ασουνέλ ι τζενέν σο κερένας-πες χάι λέσκε αμαλά. Ντα κάνα λέσκο ξάδελφος, ο Ζαχαρίας, προσπαθιντάς τι διορθώνελ-λες, ο Ιωάς ντινάς εντολή τι μουνταρέν-λες. (2 Χρον. 24:20, 21· Ματθ. 23:35) Σο μπέτι ντα ντινιλικανό πράγμας! Κι αρχή, ο Ιωάς τζάλας-λεν λατσσές πι ζωγιάτε, αλλά δυστυχώς πο σοράν αβιλό αποστάτης ντα δολοφόνος. Τελικά, μουνταρντέ-λες ο ίδιοι ο υπηρέτες λέσκε. (2 Χρον. 24:22-25) Καζόμ διαφορετική κα αβέλας λέσκι ζωή άμα κα συνεχίνελας τι ντελ καν ι Ιεχωβάς ντα οντουλέν σο μανγκένας ι Ντεβλές! w23.09 σ. 9 ¶6

Ο Ιησούς τζανέλας ότι ο απόστολος Πέτρος μπορίνελας τι ατσσόλ πιστός. Οτθάρ, βακερντάς λέσκε λατσσιμάσαρ: «Μα ντάρα». Η μπέσα σο ντινάς ο Πέτρος κο Ιησούς αλλαντάς σαρί ι ζωή ι Πετρόσκι. Σοράν, ο Πέτρος, ντα λέσκο πφραλ, ο Ανδρέας, μουκχλέ πουμαρί μπουτί, σο ισινέ τι ασταρέν ματσσέν, ντα ακολουθιντέ ι Ιησούς κο έργος σο κερέλας. Ανταγιά απόφαση αντάς λένγκε μπαρέ ευλογίες. (Μάρκ. 1:16-18) Ο Πέτρος νακχλάς μπουτ σουκάρ πράγματα επειδή ακολουθιντάς ι Χριστός. Ντικχλάς ι Ιησούς τι κερέλ λατσσές ι νασφαλέν, τι νικαβέλ δαιμονέν, ατζέ-ντα τι τζουβντιαρέλ ι μουλέν. (Ματθ. 8:14-17· Μάρκ. 5:37, 41, 42) Ο Πέτρος ντικχλάς επίσης εκ φαντασία σο σικαβέλας ι Ιησούς σαρ βασιλιάς κι Βασιλεία κι Ντεβλέσκι. Ο Πέτρος να μπισταρντάς ποτές ανταγιά φαντασία. (Μάρκ. 9:1-8· 2 Πέτρ. 1:16-18) Ντικχλάς πράγματα σο ποτές να νακχλέας λέσκε γκοντιάταρ. Καζόμ χαρούμενος πρέπει τι ισινέ σο να μουκχλάς ο μπέτι αισθήματα σο νιωθίνελας πι νεαυτόσκε τι κερέν-λες τι χασαρέλ ανταλά ευλογίες! w23.09 σ. 21 ¶4, 5

Κι πρώτη κατά επιστολές λέσκε, ο απόστολος Πέτρος βακερντάς ο λάφι «τι μανγκέν μπουτ ο εκ ι γιαβερές». Ανταγιά αγάπη ιτσσαρέλα, όχι σάντε χάνικ αμαρτίες, αλλά «μπουτ αμαρτίες». (1 Πέτρ. 4:8) Μπέκιμ ο Πέτρος ντινάς-πες γκοντί ότι, μπουτ μπρεσά πο τζανγκλέ, ο Ιησούς σικλιαρντάας-λες τι συγχωρίνελ. Αζομάν, ο Πέτρος μπέκιμ πακιάλας ότι ντέλας αντράλ πι γκίσταρ κάνα βακερντάς ότι κα συγχωρίνελας πι πφραλές «μέχρι 7 φαρ». Αλλά ο Ιησούς σικλιαρντάς εμ λες εμ αμέν ότι πρέπει τι συγχωρίνας “μέχρι 77” φαρ, δηλαδή μα τι τσσουβάς όρια. (Ματθ. 18:21) Άμα ισί τουμένγκε δύσκολος τι κερέν ανταγιά συμβουλή, μα χασαρέν τουμαρί ζορ! Σαρέ ο ατελείς υπηρέτες ι Ιεχωβάσκε δυσκολίντιβενα μπάζιμα τι συγχωρίνεν. Ο σημαντικός ακανά ισί τι κερέν σο νακχέλα τουμαρέ βαστέσταρ για τι συγχωρίνεν τουμαρέ πφραλές ντα τι κερέν ειρήνη λέσαρ. w23.09 σ. 29 ¶12

Κο περ ι ματσσέσκο, ο Ιωνάς ισινέ σίγουρος ότι ο Ιεχωβά κα ασουνέλας λέσκι ταπεινή προσευχή σο σικαβέλας ότι μετανιωσάλο ντα ότι ο Ιεχωβά κα βοηθίνελας-λες. Ο Ιεχωβά σωντάς-λες ντα πο σοράν ισινέ έτοιμος τι κερέλ ο έργος σο βακερντάας λέσκε ο Ιεχωβά. (Ιωνάς 2:10–3:4) Κάνα νακχένα εκ δοκιμασία, νιωθίνενα μπάζιμα αζόμ μπαρί ανησυχία σο να μπορίνενα τι πουτρέν ντιπ τουμαρό γκι κο Ιεχωβά αντράλ κατά προσευχή; Μήπως νιωθίνενα αζόμ κχινέ σο να μπορίνενα τι σικλιαρέν-τουμέν κατά Γραφή; Τι ντεν-τουμέν γκοντί ότι ο Ιεχωβά αγαβέλα ντιπ οντουβά σο νακχένα. Οτθάρ, ατζέ-ντα άμα κα κερέν εκ απλή προσευχή, μπορίνενα τι αβέν σίγουροι ότι βοβ κα ντελ-τουμέν ντιπ οντουβά σο χρειαζίντιβενα. (Εφεσ. 3:20) Άμα η ντουκχ σο νιωθίνενα τουμαρέ σωμάστε ή τουμαρέ γκίστε δυσκολίνελα-τουμέν τι σικλιαρέν-τουμέν κατά Γραφή, μπορίνενα τι ασουνέν ο ηχογραφήσεις ι Γραφιάκε ή ο ηχογραφήσεις σο τθερένα αμαρέ εκδόσεις. Κα μπορίνενας επίσης τι ασουνέν εκ ύμνος ή εκ κατά γκιλιά αμαρέ ή τι ντικχέν εκ βίντεος κο ιστότοπος jw.org. Κάνα κερένα προσευχή κο Ιεχωβά ντα ρόντενα ο απαντήσεις κι Γραφή ντα σαρέ κο γιαβερά πράγματα σο ντέλα-αμέν, μουκχένα-λες τι ντελ-τουμέν ζορ. w23.10 σ. 13 ¶6· σ. 14 ¶9

Η σκηνή της μαρτυρίας ντα ο ναοί σο χτιντέ-λεν πο σοράν κι Ιερουσαλήμ μοιάζενας μπουτ. Αντρέ, υπαρχίντιβενας ντούι δωμάτια​—«ο Άγια» ντα «ο Άγια των Αγίων»​—σο χωρίντιβενας εκχέ κουρτινάσαρ. (Εβρ. 9:2-5· Έξοδ. 26:31-33) Αντρέ κο Άγια υπαρχίντιβελας εκ χρυσός λυχνοστάτης, εκ θυσιαστήριος για τι πφαμπαρέν θυμίαμας ντα εκ τραπέζι ι μαντρένγκε της πρόθεσης. Σάντε “ο χρισμέ ιερείς” μπορίνενας τι τζαν κο Άγια για τι κερέν πουμαρί ιερή υπηρεσία. (Αριθ. 3:3, 7, 10) Ο Άγια των Αγίων τθερένας ι χρυσή κιβωτός της διαθήκης σο μανγκέλας τι σικαβέλ ότι ο Ιεχωβά ισινέ οτθέ. (Έξοδ. 25:21, 22) Σάντε ο αρχιερέας μπορίνελας τι νακχέλ κατά κουρτίνα ντα τι τζαλ κο Άγια των Αγίων εκ φαρ κάθε μπρες, κο Ντιβές σο κερένας για τι ιτσσάρντιβεν λένγκε αμαρτίες. (Λευιτ. 16:2, 17) Ο αρχιερέας τζάλας ι ρατέσαρ σο λέλας κατά ζώα για τι ιτσσάρντιβεν λέσκε αμαρτίες ντα ο αμαρτίες σαρέ ι λαόσκε. Τελικά, ο Ιεχωβά σικαντάς ξεκάθαρα καγιά σημασία τθερένας ανταλά πράγματα κι σκηνή της μαρτυρίας.​—Εβρ. 9:6, 7. w23.10 σ. 27 ¶12

Αρακχάσα μπουτ φαρ κο Λάφι κι Ντεβλέσκο ι εντολή «τι μανγκάς ο εκ ι γιαβερές». (Ιωάν. 15:12· Ρωμ. 13:8· 1 Θεσ. 4:9· 1 Πέτρ. 1:22· 1 Ιωάν. 4:11) Όμως, η αγάπη ισί ιδιότητα ι γκίσκι, ι τζενέσκι σο ισινάμ αντρ’ αμέντε, ντα καέκ τζενό να μπορίνελα τι ντικχέλ αμαρό γκι. Άρα, σαρ μπορίνελα τι αγαντίντιβελ η αγάπη σο τθεράσα ο εκ ι γιαβερέσκε; Οντουλέντζαρ σο βακεράσα ντα κεράσα. Μπουτέ τροπόντζαρ μπορίνασα τι σικαβάς αμαρέ πφραλένγκε ντα αμαρέ πφενίνγκε ότι μανγκάσα-λεν. Ντικχέν μερικά παραδείγματα: «Τι βακερέν ι αλήθεια ο εκ κο γιαβέρ». (Ζαχ. 8:16) «Τι ατσσικιαρέν ι ειρήνη ο εκ ι γιαβερέσαρ». (Μάρκ. 9:50) «Τι σικαβέν πρώτα τουμέν σεβασμός κο γιαβέρ». (Ρωμ. 12:10) Τι «δεχτίνεν λατσσιμάσαρ ο εκ ι γιαβερές». (Ρωμ. 15:7) «Τι συγχωρίνεν ο εκ ι γιαβερές». (Κολ. 3:13) «Τι βάντεν ο πφαριπέ ο εκ ι γιαβερέσκο». (Γαλ. 6:2) «Τι κοβλιαρέν ι ντουκχ ο εκ ι γιαβερέσκι». (1 Θεσ. 4:18) Τι «ντεν ζορ ο εκ ι γιαβερές». (1 Θεσ. 5:11) «Τι προσευχίντιβεν ο εκ ι γιαβερέσκε».​—Ιακ. 5:16. w23.11 σ. 9 ¶7, 8

Κάθε ντιβές, λάσα αποφάσεις σο μανγκένα ζουρανί πίστη. Για παράδειγμας, λάσα αποφάσεις σο τθερένα τι κερέν με τη διασκέδαση, με το πανεπιστήμιος, ι αμαλέντζαρ, ι μπιαβέσαρ, ι τσσαβέντζαρ ντα ι μπουτιάσαρ. Κα αβέλας λατσσό τι πουτσάς-αμέν: “Σικαβένα οντουλά σο τραμπίναβα ότι ισινόμ σίγουρος ότι ανταβά ντουνιάς μπουτ σουγκό κα καταστραφίντιβελ ντα κα αβέλ ο νεβό ντουνιάς ι Ντεβλέσκο; Ή μήπως οντουλά σο τραμπίναβα επηρεάντιβενα κατά τζενέ σο να πακιάνα ότι μπορίνενα τι τζουβντιόν για πάντα;” (Ματθ. 6:19, 20· Λουκ. 12:16-21) Κα λας ο πο λατσσέ αποφάσεις άμα μπαριαράσα αμαρί πίστη ότι ο νεβό ντουνιάς ισί μπουτ πασέ. Νακχάσα δοκιμασίες-ντα σο μανγκένα ζουρανί πίστη. Μπέκιμ τι τζάνα αμέντζαρ κόντρα, τι ισινάμ νασφαλέ ή τι τθεράς γιαβερά πράγματα σο κερένα-αμέν τι χασαράς αμαρί ζορ. Κι αρχή, μπέκιμ νιωθίνασα ότι μπορίνασα τι νταϊντίνας αμαρί δοκιμασία. Αλλά άμα ατσσικιαρέλα μπουτ βακίτι​—σαρ αβέλα-πες μπουτ φαρ ι δοκιμασιέντζαρ​—χρειαζίντιβασα ζουρανί πίστη για τι νταϊντίνας ντα τι συνεχίνας τι υπηρετίνας ι Ιεχωβάς χαράσαρ.​—1 Πέτρ. 1:6, 7. w23.04 σ. 27 ¶4, 5

Ο Ιεχωβά μπεκλεντίνελα τι κεράς οντουλά σο βακερντάμ αμαρέ προσευχιέντε. Για παράδειγμας, εκ πφραλ μπέκιμ τι μανγκέλ κατά Ιεχωβά τι βοηθίνελ-λες τι λελ άδεια πι μπουτιάταρ για τι τζαλ κι περιφερειακή συνέλευση. Σαρ μπορίνελα τι απαντίνελ ο Ιεχωβά ανταλέ προσευχιάτε; Μπορίνελα τι ντελ κο πφραλ ο θάρρος σο χρειαζίντιβελα για τι κερέλ λάφι πι αφεντικόστε. Αλλά ο πφραλ κα χρειαζίντιβελ τι κερέλ οντουβά σο βακερντάς πι προσευχιάτε ντα τι τζαλ πι αφεντικόστε για τι πουτσέλ-λες. Μπέκιμ κα χρειαζίντιβελ τι κερέλ-λες ανταβά μπουτ φαρ. Μπορεί ατζέ-ντα τι βακερέλ ότι μπορίνελα τι τζαλ εκ γιαβέρ ντιβές για τι κερέλ μπουτί ή τι λελ άδεια χωρίς τι ποκίντιβελ. Ο Ιεχωβά μπεκλεντίνελα τι προσευχίντιβας συνέχεια οντουλένγκε σο απασχολίνενα-αμέν. Σαρ αγαβάσα οντουλένταρ σο βακερντάς ο Ιησούς, μερικά πράγματα σο μανγκάσα να κα αβέν-πες αμέσως. (Λουκ. 11:9) Οτθάρ, μα τσσιναβέν τι προσπαθίνεν! Τι προσευχίντιβεν αντράλ τουμαρέ γκίσταρ ντα συνέχεια. (Λουκ. 18:1-7) Κάνα κεράσα-λες ανταβά, σικαβάσα κο Ιεχωβά ότι οντουβά σο μανγκάσα νανέ κάτι σο αβιλό αμένγκε οντιά στιγμή. Σικαβάσα επίσης ότι πακιάσα μπαγιά ότι μπορίνελα τι βοηθίνελ-αμέν. w23.11 σ. 22 ¶10, 11

Ο Ιεχωβά ντινάς πο λάφι πι αμαλέστε κο Αβραάμ ότι σαρέ ο τθεμά ι πφουβιάκε κα ευλογίντιβενας αντράλ λέσκε προσαγγονίσταρ. (Γέν. 15:5· 22:18) Επειδή ο Αβραάμ τθερέλας μπαρί πίστη κο Ντεβέλ, ισινέ σίγουρος ότι ο υποσχέσεις ι Ντεβλέσκε κα νικιόν μπαγιά. Αλλά κάνα ο Αβραάμ ισινέ 100 μπρεσένγκο ντα λέσκι ρομνί 90, οντουβά πιστός αντρόγυνος ατζέ να κερντάας τσσαβές. (Γέν. 21:1-7) Όμως, η Αγία Γραφή βακερέλα: «[Ο Αβραάμ] πακιάλας ότι κα αβέλας ντατ μπουτέ τθεμένγκο, παρόλο σο ντικχίντιβελας ότι ανταβά ναστί αβέλας-πες. Πακιασάλο οντουβά σο βακέρντιλο». (Ρωμ. 4:18) Τουμέν τζανένα ότι η ελπίδα σο τθερέλας ο Αβραάμ αβιλί-πες μπαγιά. Αβιλό ντατ του Ισαάκ, ι τσσαβέσκο σο αζόμ βακίτι μπεκλεντίνελας τι τθερέλ. Σόσκε ισινέ σίγουρος ο Αβραάμ ότι ο Ιεχωβά κα ατσσικιαρέλας πι υπόσχεση; Επειδή ισινέ λατσσέ αμαλά ι Ιεχωβάσαρ, ο Αβραάμ «ισινέ μπουτ σίγουρος ότι σαρέ οντουλά σο βακερντάας [ο Ντεβέλ]» κα αβένας-πες μπαγιά. (Ρωμ. 4:21) Ο Ιεχωβά ευλογιντάς τον Αβραάμ ντα βακερντάς ότι ισινέ εκ δίκαιος τζενό χάρη κι πίστη σο τθερέλας.​—Ιακ. 2:23. w23.12 σ. 8 ¶1, 2

Εκ τερνό πφραλ σο ισί μπεσαλής κερέλα προσεκτικά σαρέ πο ευθύνες. Ντικχέν ο τέλειος παράδειγμας ι Ιησούσκο. Να ισινέ ποτές εκ τζενό σο να προσοχίνελας. Ούτε ισινέ εκ τζενό σο να ντικχέλας σοβαρά πο ευθύνες. Οκιά μπάνταρ, κερέλας ο διορισμοί σο ντέλας-λες ο Ιεχωβά, ατζέ-ντα κάνα ανταβά ισινέ δύσκολος. Μανγκέλας ι τζενέν​—ειδικά πι μαθητέν​—ντα ντινάς αντράλ πι γκίσταρ πι ζωή λένγκε. (Ιωάν. 13:1) Τι μοιάζεν κο Ιησούς ντα τι μαρέν-τουμέν για τι κερέν σο-ντα διορισμός λένα. Άμα να ισινέν σίγουροι σαρ τι κερέν κάτι, τι αβέν ταπεινοί ντα τι μανγκέν βοήθεια κατά ώριμα πφραλά. Μα τι ερεσέλ-τουμέν τι κερέν ο πο χάνικ πράγματα κατά ευθύνες σο τθερένα. (Ρωμ. 12:11) Οκιά μπάνταρ, τι κερέν ντιπ τουμαρό διορισμός, καζόμ κερένα-λες ανταβά «ι Ιεχωβάσκε, ντα όχι ι τζενένγκε». (Κολ. 3:23) Όμως, να ισινέν τέλειοι. Οτθάρ, τι αγαβέν τουμαρέ όρια ντα τι δεχτίνεν ο λάθη σο μπέκιμ τι κερέν.​—Παρ. 11:2. w23.12 σ. 26 ¶8

Χαιρίνασα μπουτ κάνα κάποιος μπολντιόλα ντα αβέλα αντρέ κι φαμιλί κι Ιεχωβάσκι. Ισί προνόμιος τι τθεράς ανταγιά λατσσί φιλία ι Ιεχωβάσαρ. Συμφωνίνασα ι Δαβιδίσαρ, σο βακερντάς: «Ευτυχισμέ ισί οντουβά σο τραμπίνεσα [Ιεχωβά] ντα ανέσα πασέ για τι μπεσέλ κο αυλές τιρέ». (Ψαλμ. 65:4) Ο Ιεχωβά να ανέλα κας τι αβέλ κο αυλές πιρέ. Τραμπίνελα οντουλέν σο σικαβένα ότι μανγκένα τι τθερέν εκ λατσσί φιλία λέσαρ. (Ιακ. 4:8) Κάνα αφιερώντιβενα κο Ιεχωβά ντα μπολντιόνα, τι αβέν σίγουροι ότι, από αζομάν ντα σοράν, βοβ “κα ντελ σαρ μπρισίμ οπρά-τουμέντε αζόμ μπουτ ευλογίες σο να κα ερεσέλ-λεν ο τθαν”. (Μαλ. 3:10· Ιερ. 17:8) Ο μπολντιπέ ισί σάντε η αρχή. Κα κερέν ο πο λατσσό σο μπορίνενα για τι τζουβντιόν αντικάς σαρ βακερντέν κι αφιέρωση σο κερντέν, ατζέ-ντα κάνα τθερένα πειρασμούς ή νακχένα δοκιμασίες. (Εκκλ. 5:4, 5) Σαρ μαθητές ι Ιησούσκε, κα ακολουθίνεν λέσκο παράδειγμας ντα λέσκε εντολές καζόμ πο λατσσές αβέλα-πες.​—Ματθ. 28:19, 20· 1 Πέτρ. 2:21. w24.03 σ. 8 ¶1-3

Σο αβέλα-πες άμα τουμέν ντα τουμαρό ρομ ή ρομνί να απολαμβάνενα ι παρέα ο εκ ι γιαβερέσκι; Σο μπορίνενα τι κερέν; Ντεν-τουμέν γκοντί ι γιακ. Να μπαριόλα αμέσως. Χάνικ χάνικ, χρειαζίντιβελα τι τσσουβάς λάκε πο μπαρέ καστά. Αντικάς τουμέν-ντα, κι αρχή, κα μπορίνενας τι νακχέν σάντε χάνικ λεπτά γιεκ κάθε ντιβές. Τι αβέν σίγουροι ότι κα κερέν κάτι σο κα μπεϊντίνεν-λες ο ντούι-ντα. (Ιακ. 3:18) Άμα κα αρχίνεν χουρντέ πραγματέντζαρ, μπέκιμ τι ντικχέν ότι ο μανγκιπέ σο τθερένα ο εκ ι γιαβερέσκε κα μπαριόλ πάλι. Ο σεβασμός ισί μπουτ σημαντικός εκχέ μπιαβέστε. Ισί σαρ ο οξυγόνος σο βοηθίνελα εκ γιακ τι πφαμπόλ ζουρανές. Άμα νανέ οξυγόνος, η γιακ μερέλα. Αντικάς-ντα, άμα νανέ σεβασμός, ο μανγκιπέ σο τθερέλα εκ ζευγάρι μπορεί τι σουρντιόλ σουγκό. Οκιά μπάνταρ, κάνα ο ζευγάρι μαρέλα-πες τι σικαβέλ σεβασμός ο εκ ι γιαβερέσκε, ανταβά βοηθίνελα τι ατσσόλ ζουρανό λέσκο μανγκιπέ. Όμως, ντεν-τουμέν γκοντί ότι ο σημαντικός νανέ άμα τουμέν πακιάνα ότι σικαβένα σεβασμός, αλλά άμα τουμαρό ρομ ή τουμαρί ρομνί νιωθίνελα τουμαρό σεβασμός. w23.05 σ. 22 ¶9· σ. 24 ¶14, 15

Κι Αγία Γραφή, πιστοί υπηρέτες ι Ντεβλέσκε βακερντέ ότι μερικές φορές νιωσάλε στεναχώρια ντα νταρ επειδή λένγκε ντουσμάνια ή γιαβερά πράγματα πιένενας-λεν. (Ψαλμ. 18:4· 55:1, 5) Μπορεί αμέντζαρ-ντα τι τζαν κόντρα αμαρέ συμμαθητές, ο τζενέ σο κεράσα λέντζαρ μπουτί, αμαρί φαμιλί ή η κυβέρνηση. Ή μπορεί τι νταράς ότι κα μεράς επειδή τθεράσα εκ πρόβλημας υγείας. Ασακέ βακιτίντε, μπέκιμ τι νιωθίνας ότι ισινάμ σαρ μαξίμια σο να τθερένα βοήθεια. Σαρ βοηθίνελα-αμέν ο Ιεχωβά κάνα νιωθίνασα αντικάς; Βοβ λοκχιαρέλα ντα γαλίνελα αμαρό γκι. Οτθάρ, τι νακχέν σαάτι συνέχεια ι Ιεχωβάσαρ​—τι προσευχίντιβεν λέστε ντα τι διαβάνεν λέσκο Λάφι. (Ψαλμ. 77:1, 12-14) Άμα κερένα-λες ανταβά, αζομάν ο πρώτος πράγμας σο κα κερέν κάνα ισινέν πιεσμέ ισί τι μανγκέν βοήθεια τουμαρέ ουράνιε Νταντέσταρ. Τι βακερέν κο Ιεχωβά οντουλά σο νταραβένα-τουμέν ντα ανησυχίνενα-τουμέν. Τι μουκχέν-λες τι κερέλ τουμένγκε λάφι ντα τι λοκχιαρέλ τουμαρό γκι αντράλ κατά Γραφή.​—Ψαλμ. 119:28. w24.01 σ. 24, 25 ¶14-16

Ισί μπουτ σημαντικός τι μανγκέν μπαγιά τι πετυχίνεν τουμαρό πνευματικός στόχος. Κάνα μανγκένα μπαγιά τι πετυχίνεν-λες, ανταβά κα τσσίντελ-τουμέν τι κερέν μπουτ μπουτί ανταλέσκε. Ντα καζόμ πο μπουτ μανγκάσα τι κεράς αμαρέ στόχους, αζόμ πο σίγουρος κα αβέλ ότι κα πετυχίνας-λεν. Οτθάρ, σο μπορίνενα τι κερέν για τι μανγκέν πο μπουτ τι πετυχίνεν τουμαρό στόχος; Τι προσευχίντιβεν για τι μανγκέν πο μπουτ τι πετυχίνεν τουμαρό στόχος. Αντράλ πι πνευμάσταρ, ο Ιεχωβά μπορίνελα τι κερέλ-τουμέν τι μανγκέν τι πετυχίνεν τουμαρό στόχος. Μπάζιμα, τσσουβάσα εκ στόχος σόσκε τζανάσα ότι πρέπει, ντα ότι ανταβά ισί λατσσό. Αλλά μπορεί μα τι μανγκάσα μπαγιά τι πετυχίνας-λες. Τι σκεφτίνεν λατσσές οντουλά σο κερντάς ο Ιεχωβά τουμένγκε. (Ψαλμ. 143:5) Ο απόστολος Παύλος σκεφτίνελας λατσσές ο λατσσιπέ σο σικαντάας λέσκε ο Ιεχωβά παρόλο σο να αξίνελας-λες. Ανταβά τσσίντελας-λες τι κερέλ μπουτ μπουτί ι Ιεχωβάσκε. (1 Κορ. 15:9, 10· 1 Τιμ. 1:12-14) Αντικάς τουμέν-ντα, καζόμ πο λατσσές σκεφτίνενα οντουλά σο κερντάς ο Ιεχωβά τουμένγκε, αζόμ πο μπουτ κα μανγκέν τι πετυχίνεν τουμαρό στόχος.​—Ψαλμ. 116:12. w23.05 σ. 27 ¶3-5

Κεράσα ο γκι αμαρέ Νταντέσκο σο ισί κο ουρανός κάνα δοξάνασα λέσκο ναβ. (Ψαλμ. 119:108) Μήπως όμως ανταβά μανγκέλα τι βακερέλ ότι ο παντοδύναμος Ντεβέλ ισί σαρ ο ατελείς τζενέ σο κερένα σαρ σαρ για τι ισαρέλ-λεν κάποιος επειδή μανγκένα τι ασουνέν εκ λατσσό λάφι; Νάα. Κάνα δοξάνασα αμαρέ Νταντές σο ισί κο ουρανός, βοηθίνασα τι σικάντιβελ ότι ο ψέμας-ντα σο βακερντάς ο Μπενγκ ι κάθε εκχέσκε αμένταρ νανέ μπαγιά. Ο Μπενγκ βακερέλα ότι καέκ τζενό να κα τσσίντελ πιστά κατά ναβ ι Ντεβλέσκο. Επίσης, βακερέλα ότι καέκ τζενό να κα ατσσόλ αφοσιωμέ κο Ντεβέλ κάνα δοκιμάντιβελα. Αμντίνελα ότι σαρέ κα τσσιναβάς τι υπηρετίνας ι Ντεβλές άμα κα τθεράς τι κερδίνας κάτι. (Ιώβ 1:9-11· 2:4) Αλλά ο πιστός Ιώβ σικαντάς ότι ο Μπενγκ ισί ψεύτης. Τουμέν σο κα κερέν; Ο κάθε εκ αμένταρ τθερέλα ο προνόμιος τι τσσίντελ πιστά κατά ναβ αμαρέ Νταντέσκο ντα τι κερέλ λέσκο γκι καζόμ υπηρετίνελα-λες αφοσιωμέ. (Παρ. 27:11) Ισί μπαρί τιμή αμένγκε τι κεράς-λες ανταβά. w24.02 σ. 8, 9 ¶3-5

Κάνα μουλό ο Μωυσής ντα ο Ιησούς του Ναυή, ο Ιεχωβά τσσουντάς κριτέν για τι οδηγίνεν λέσκε λαός. Σοράν, κο μπρεσά σο υπαρχίντιβενας βασιλιάδες, ο Ιεχωβά διορίνελας προφητέν για τι οδηγίνεν λέσκε λαός. Ο πιστοί βασιλιάδες ντένας προσοχή κο συμβουλές κι προφητένγκε. Για παράδειγμας, ο βασιλιάς Δαβίδ δεχτιντάς ταπεινά διόρθωση κατά προφήτης Νάθαν. (2 Σαμ. 12:7, 13· 1 Χρον. 17:3, 4) Ο βασιλιάς Ιωσαφάτ ακολουθιντάς ο οδηγίες σο ντινάς-λες ο προφήτης Ιααζιήλ ντα βακερντάς κο Ιουδαίοι τι “σικαβέν πίστη κο προφήτες [κι Ντεβλέσκε]”. (2 Χρον. 20:14, 15) Κάνα ο βασιλιάς Εζεκίας νακχλάς εκ μπουτ μπαρί δυσκολία, μανγκλάς κατά προφήτης Ησαΐας βοήθεια. (Ησ. 37:1-6) Κάθε φαρ σο ο βασιλιάδες ακολουθίνενας ο οδηγίες ι Ιεχωβάσκε, βοβ ευλογίνελας-λεν ντα αρακχαβέλας πι λαός. (2 Χρον. 20:29, 30· 32:22) Ισινέ ξεκάθαρος ότι ο Ιεχωβά χρησιμοποιήνελας πι προφητέν για τι οδηγίνελ πι λαός. w24.02 σ. 21 ¶8

Ο Μπενγκ μανγκέλα τι κεράς παρέα τζενέντζαρ σο κα κερέν αμένγκε πο δύσκολος τι ακολουθίνας ο κανόνες ι Ιεχωβάσκε. Χρειαζίντιβελα τι αβάς προσεκτικοί σόσκε μπορίνασα τι νακχάς σαάτι τζενέντζαρ, όχι σάντε πασάλ, αλλά εμ κατά κοινωνικά δίκτυα-ντα. Πρέπει τι τζας κόντρα κο ντουνιάς σο βακερέλα ότι ο μπίλατζανε πράγματα ισί κάτι σωστός. Τζανάσα ότι ανταβά νανέ μπαγιά. (Εφεσ. 4:19, 20) Ισί λατσσό τι πουτσάς-αμέν: “Ισινόμ αποφασισμέ μα τι κεράβ παρέα τζενέντζαρ κατά μπουτί, κατά σχολείος ή γιαβερέντζαρ σο να σεβάνενα ο δίκαιοι κανόνες ι Ιεχωβάσκε; Κεράβα μπίνταρανες ο κανόνες ι Ιεχωβάσκε, παρόλο σο μερικοί μπορεί τι βακερέν ότι ισινόμ κολλημέ;” Σαρ σικαβένα ο εδάφια 2 Τιμόθεο 2:20-22, μπέκιμ χρειαζίντιβελα επίσης τι αβάς προσεκτικοί κάνα τραμπίνασα καλά τζενέ κα αβέν αμαρέ λατσσέ αμαλά αντρέ κι κχανγκιρί. Τθεράσα αμαρέ γκοντιάτε ότι μερικοί μπέκιμ να κα βοηθίνεν-αμέν τι ατσσάς πιστοί κι υπηρεσία κι Ιεχωβάσκι. w24.03 σ. 22, 23 ¶11, 12

Προσπαθιντέν ποτές τι ανέν τουμαρέ γκοντιάτε σαρ ισί ο Ιεχωβά; Παρόλο σο ο Ιεχωβά να ντικχίντιβελα, η Αγία Γραφή σικαβέλα-λες με διάφορους τρόπους. Ο Ιεχωβά βακέρντιβελα «κχαμ ντα ασπίδα» ντα «γιακ σο πφαμπαρέλα». (Ψαλμ. 84:11· Εβρ. 12:29) Λέσκι παρουσία μοιάζελα σαρ μπαρ σο ισί κερντό από ζαφείρι, σαρ μέταλλος σο λέλα-πες ντα σαρ ουράνιος τόξος σο λαμπίνελα. (Ιεζ. 1:26-28) Αφού να μπορίνασα τι ντικχάς ι Ιεχωβάς, μπέκιμ δυσκολίντιβασα τι πακιάς ότι μανγκέλα-αμέν. Μερικοί αμντίνενα ότι ο Ιεχωβά να κα μπορίνελας ποτές τι μανγκέλ-λεν ιτιρί οντουλένταρ σο νακχλέ. Ο Ιεχωβά αγαβέλα σαρ νιωθίνασα ντα σαρ επηρεάνενα-αμέν ανταλά αισθήματα. Για τι βοηθίνελ-αμέν, σικαβέλα αμένγκε πο σουκάρ χαρακτήρας αντράλ πι Λαφίσταρ. Ο λάφι σο σικαβέλα πο λατσσές ι Ιεχωβάς ισί η αγάπη. (1 Ιωάν. 4:8) Ο Ιεχωβά ισί αγάπη. Η αγάπη επηρεάνελα σαρέ οντουλά σο κερέλα. Η αγάπη ι Ντεβλέσκι ισί αζόμ τατί ντα αζόμ ζουρανί, σο σικαβέλα-λα ατζέ-ντα οντουλέντε σο να μανγκένα-λες.​—Ματθ. 5:44, 45. w24.01 σ. 26 ¶1-3

Ο Ιεχωβά διοριντάς ι Μωυσής τι νικαβέλ ι Ισραηλιτέν κατά Αίγυπτος ντα για τι τθερέν ξεκάθαρες αποδείξεις τσσουντάς λένγκε εκ σύννεφος ντισάρα ντα ο φως εκχέ γιακάκο αρατί. (Έξοδ. 13:21) Ο Μωυσής ακολουθιντάς ο σύννεφος ντα ι γιακ, σο οδηγίνελας λες ντα ι Ισραηλιτέν κι Ερυθρά Θάλασσα. Ο Ισραηλίτες νταρασάλε μπουτ κάνα αμντισάλε ότι ναστί τζάνας πουθενά επειδή ανγκλά-πουμέντε τθερένας ι ντεριάβ ντα παλά-πουμέντε ο στρατός ι Αιγυπτιόνγκο. Αλλά να αβιλό κάποιο λάθος. Ο Ιεχωβά οδηγιντάς επίτηδες οτθέ πι λαός αντράλ κατά Μωυσής. (Έξοδ. 14:2) Σοράν, ελευθερωντάς-λεν ι πο εντυπωσιακέ τροπόσαρ. (Έξοδ. 14:26-28) Για 40 μπρεσά σοράν ανταλέ πραγμάσταρ, ο Μωυσής συνεχίνελας τι βασίντιβελ κο σύννεφος για τι οδηγίνελ ι Ντεβλέσκε λαός αντρέ κι έρημος. (Έξοδ. 33:7, 9, 10) Κατά σύννεφος, ο Ιεχωβά κερέλας λάφι κο Μωυσής, ντα σοράν ο Μωυσής βακερέλας κο λαός ο οδηγίες ι Ντεβλέσκε. Ο Ισραηλίτες τθερένας αζόμ μπουτ αποδείξεις σο σικαβένας ότι ο Ιεχωβά χρησιμοποιήνελας ι Μωυσής για τι οδηγίνελ-λεν. w24.02 σ. 21 ¶4, 5