Σεπτέμβριος

Ο Ντεβέλ ντινάς κο Ιησούς ι ζορ τι ντελ τέλος σαρέ κο προβλήματα σο τθερένα ο τζενέ. Αντράλ πι θαυματένταρ, ο Ιησούς σικαντάς ότι τθερέλα ι ζορ τι νασκιαρέλ ο εμπόδια σο αμέν να κα μπορίναας τι νασκιαράς-λεν κορκορέ. Για παράδειγμας, τθερέλα ι ζορ τι νασκιαρέλ ι αιτία ι προβληματένγκι σο τθερένα ο τζενέ​—δηλαδή ι αμαρτία σο λιντάμ ντα ο μπέτι αποτελέσματα σο τθεράσα ιτιρί λάταρ, σαρ ισί ο νασφαλίματα ντα ο μεριπέ. (Ματθ. 9:1-6· Ρωμ. 5:12, 18, 19) Ο θαύματα σο κερντάς σικαντέ ότι μπορίνελα τι κερέλ λατσσές «σο-ντα νασφαλιπέ» ισί, ατζέ-ντα τι αναστίνελ ι μουλέν. (Ματθ. 4:23· Ιωάν. 11:43, 44) Επίσης, τθερέλα ι ζορ τι κερέλ κουμάντος ο μπαρέ καταιγίδες ντα τι νικίνελ ι δαιμονέν. (Μάρκ. 4:37-39· Λουκ. 8:2) Καζόμ μπουτ ηρεμίνελα-αμέν σο τζανάσα ότι ο Ιεχωβά ντινάς αζόμ μπαρί ζορ πι Τσσαβέστε! Μπορίνασα τι αβάς ντιπ σίγουροι ότι ο ευλογίες σο κα ανέλ η Βασιλεία ι Ντεβλέσκι κα αβέν μπαγιά. Ο θαύματα σο κερντάς ο Ιησούς κάνα ισινέ κι πφουβ σικλιαρένα-αμέν σο κα κερέλ σαρό κο ντουνιάς σαρ Βασιλιάς κο ουρανός κι Ντεβλέσκι Βασιλεία. w23.04 σ. 3, 4 ¶5-7

Άμα ισινέν εκχέ μπαρέ κχανγκιριάτε ντα νιωθίνενα ότι να τθερένα ι ευκαιρία τι απαντίνεν μπερεκέτι φαρ, μπορεί τι περέν κι παγίδα μα τι προσπαθίνεν ιτς τι ντεν απαντήσεις. Αλλά μα τσσιναβέν τι προσπαθίνεν. Ετοιμάνεν μπερεκέτι απαντήσεις ι κάθε συναθροισιάκε. Αντικάς, άμα να κα απαντίνεν κι αρχή, κα τθερέν γιαβερά ευκαιρίες πο σοράν. Κάνα προετοιμάνενα-τουμέν για το μάθημας ι Σκοπιάκο, τι σκεφτίνεν σαρ ταιριάνελα η κάθε παράγραφος ι θεμάσαρ σο τθερέλα ο μάθημας. Άμα κα κερέν-λες ανταβά, μάλλον κα τθερέν κάτι λατσσό τι βακερέν καζόμ κα αβέλ-πες ο μάθημας. Επίσης, κα μπορίνεν τι προετοιμάντιβεν για τι ντεν απαντήσεις κο παράγραφοι σο βακερένα πο αχόρτ αλήθειες, σο ισί πο δύσκολος τι εξηγίνελ-λεν κάποιος. Σόσκε; Επειδή κο παράγραφοι οντουλά, μπέκιμ μα τι βάντεν μπουτ τζενέ πουμαρό βας. Σο αβέλα-πες όμως άμα, νακχένα μπουτ συναθροίσεις χωρίς τι ντιντιόλ-τουμέν ατζέκ η ευκαιρία τι ντεν εκ απάντηση; Βακερέν κο πφραλ σο κα κερέλ ο μέρος καλέ ερωτησιάτε κα μανγκένας τι απαντίνεν. w23.04 σ. 21, 22 ¶9, 10

Ο Ιωσήφ κερέλας αντράλ πι γκίσταρ ο οδηγίες σο ντέλας-λες ο Ιεχωβά, ντα οτθάρ αβέλας πο λατσσό ρομ. Τρινέ τουλάχιστον περιπτωσιέντε, λιντάς οδηγίες κατά Ντεβέλ σο τθερένας τι κερέν λέσκε φαμιλιάσαρ. Κάθε φαρ, ντέλας καν σουγκό, ατζέ-ντα κάνα ανταβά μανγκέλας τι βακερέλ ότι έπρεπε τι κερέλ μπαρέ αλλαγές. (Ματθ. 1:20· 2:13-15, 19-21) Κάνα κερέλας ο οδηγίες σο λέλας κατά Ντεβέλ, ο Ιωσήφ αρακχαβέλας, στηρίνελας ντα φροντίνελας ι Μαριά. Ανέν τουμαρέ γκοντιάτε σαρ οντουλά σο κερέλας ο Ιωσήφ, κερένας ι Μαριά τι μανγκέλ ντα τι σεβάνελ-λες ατζέ πο μπουτ! Μουρσάλεν, κα μοιάζεν κο Ιωσήφ καζόμ ρόντενα συμβουλές κι Γραφή σο κα βοηθίνεν-τουμέν τι αρακχαβέν τουμαρί φαμιλί. Κάνα κερένα ανταλά συμβουλές, ατζέ-ντα άμα ανταβά μανγκέλα τι βακερέλ ότι κα κερέν μπαρέ αλλαγές, σικαβένα μανγκιπέ τουμαρέ ρομνιάκε ντα κερένα πο ζουρανό τουμαρό μπιαβ. Εκ πφεν κο Βανουάτου, σο ισί παντριμέ πο μπουτ από 20 μπρεσά, βακερέλα: «Κάνα μο ρομ ρόντελα ο οδηγίες ι Ιεχωβάσκε ντα κερέλα-λεν, σεβάναβα-λες ατζέ πο μπουτ. Νιωθίναβα αρακχαντί ντα τθεράβα σιγουριά κο αποφάσεις λέσκε». w23.05 σ. 21 ¶5

Ο Ιουδαίοι σο κα βουρτίνενας κατά Βαβυλώνα έπρεπε τι αβέν άγιος λαός πουμαρέ Ντεβλέσκε. (Δευτ. 7:6) Ανταβά όμως να μανγκέλας τι βακερέλ ότι να κα χρειαζίντιβελας τι αλλάνεν κάποια πράγματα για τι κερέν ο γκι ι Ιεχωβάσκο. Ο πο μπουτ Ιουδαίοι σο μπιάντιλεας κι Βαβυλώνα μάλλον σικλιλέας ο τρόπος σο σκεφτίνενας ο Βαβυλώνιοι ντα ο πράγματα σο ισινέ σημαντικά λένγκε. Μπουτ μπρεσά αφού βουρτισάλε ο πρώτοι Ιουδαίοι κο Ισραήλ, ο Νεεμίας ατσσιλό πουταρντέ μόσαρ κάνα αγαντάς ότι ο τσσαβέ σο μπιάντιλε κο Ισραήλ να σικλιλέας ι Ιουδαιόνγκι τσσιπ. (Δευτ. 6:6, 7· Νεεμ. 13:23, 24) Σαρ κα σικλιόνας οντουλά τσσαβέ τι μανγκέν ντα τι ντεν λατρεία ι Ιεχωβάς άμα να αγαβένας εβραϊκά​—σο ισινέ η βασική τσσιπ σο γραφισάλο ο Λάφι ι Ντεβλέσκο; (Έσδρ. 10:3, 44) Άρα, οντουλά Ιουδαίοι έπρεπε τι κερέν μπαρέ αλλαγές, αλλά κα αβέλας μπουτ πο εύκολος τι κερέν-λεν κο Ισραήλ, σο οτθέ ο τζενέ κα αρχίνενας πάλι τι ανέν ι πάκι λατρεία.​—Νεεμ. 8:8, 9. w23.05 σ. 15 ¶6, 7

Ισί μπαγιά ότι, καζόμ-ντα τι μανγκάς τι πετυχίνας αμαρό στόχος ή καζόμ-ντα τι κεράς κουμάντος αμαρό νεαυτός, μπορεί πάλι τι κεράς παλάλ. Για παράδειγμας, «κάτι σο να μπεσάσα» μπορεί τι λελ αμένταρ ο σαάτι σο χρειαζίντιβασα για τι πετυχίνας αμαρό στόχος. (Εκκλ. 9:11) Μπέκιμ νακχάσα εκ δυσκολία σο κερέλα-αμέν τι χασαράς αμαρό κουράγιος ντα αμαρί ζορ. (Παρ. 24:10) Επειδή ισινάμ ατελείς, μπέκιμ τι κεράς λάθη σο κα δυσκολίνεν-αμέν τι πετυχίνας αμαρό στόχος. (Ρωμ. 7:23) Ή μπορεί απλώς τι ισινάμ κχινέ. (Ματθ. 26:43) Σο κα βοηθίνελ-αμέν τι συνεχίνας ατζέ-ντα άμα κερντάμ παλάλ ή τθεράας εκ μπέτι ντιβές; Ντεν-τουμέν γκοντί ότι, άμα κερντέν εκ φαρ παλάλ, να ισινέν άχρηστοι. Η Γραφή βακερέλα ότι μπορεί τι νακχάς προβλήματα ή δυσκολίες παλάλ γιαβερέστε. Όμως, σικαβέλα ότι μπορίνασα τι ιστιάς πάλι. Βα, άμα συνεχίνενα τι τσσίντεν ανγκλάλ παρόλο σο μπάζιμα κερένα παλάλ, σικαβένα κο Ιεχωβά ότι μανγκένα τι κερέν λέσκο γκι. Καζόμ μπουτ πρέπει τι χαιρίνελα ο Ιεχωβά κάνα ντικχέλα ότι συνεχίνενα τουμαρό αγώνας για τι πετυχίνεν τουμαρό στόχος! w23.05 σ. 30 ¶14, 15

Ο σκαπανικός βοηθίνελα εκχέ τερνές τι σικλιόλ τι συνεργαζίντιβελ λατσσές μπουτέ τζενέντζαρ σο τθερένα διαφορετικούς χαρακτήρες. Επίσης, βοηθίνελα-λες τι σικλιόλ σαρ τι χρησιμοποιήνελ πο λοβέ γκοντιάσαρ ντα μα τι χαλαβέλ πο μπουτ λοβέ οντουλένταρ σο νικαβέλα. (Φιλιπ. 4:11-13) Εκ λατσσό τρόπος για τι αρχίνελ κάποιος ι ολοχρόνια υπηρεσία ισί ο βοηθητικός σκαπανικός, σο βοηθίνελα-λες τι ετοιμάνελ-πες για τι αρχίνελ ο τακτικός σκαπανικός. Ο σκαπανικός μπορίνελα τι πουτρέλ τουμένγκε ο ντρομ για τι κερέν γιαβερά-ντα πράγματα κι ολοχρόνια υπηρεσία. Για παράδειγμας, κα μπορίνενας τι αβέν υπηρέτης οικοδόμησης ή Μπεθελίτης. Ο μουρσά σο ισί Χριστιανοί πρέπει τι τσσουβέν στόχος τι τθερέν ο προσόντα για τι υπηρετίνεν πουμαρέ πφραλέν ντα πφενίν σαρ πρεσβύτεροι. Η Γραφή βακερέλα ότι ο μουρσά σο μανγκένα ανταγιά ευθύνη “μανγκένα κάτι λατσσό”. (1 Τιμ. 3:1) Πρώτα, πρέπει τι τθερέλ ο προσόντα για τι υπηρετίνελ σαρ διακονικός υπηρέτης. Ο διακονικοί υπηρέτες βοηθίνενα ι πρεσβυτερόν μπουτέ τροπόντζαρ. Εμ ο πρεσβύτεροι εμ ο διακονικοί υπηρέτες υπηρετίνενα ταπεινά πουμαρέ πφραλέν ντα πφενίν ντα κερένα έργος αντράλ πουμαρέ γκίσταρ. w23.12 σ. 28 ¶14-16

Ο βασιλιάς Ιωσίας ισινέ τερνό κάνα αρχισάλο τι ρόντελ ι Ιεχωβάσκε. Μανγκέλας τι σικλιόλ ι Ιεχωβάσκε ντα τι κερέλ Λέσκο θέλημας. Όμως, η ζωή να ισινέ εύκολη οντουλέ τερνέ βασιλιάσκε. Έπρεπε τι τσσίντελ κατά πάκι λατρεία εκχέ βακιτίστε σο ο πο μπουτ τζενέ ντένας λατρεία ψεύτικε ντεβλέντε. Ντα ισινέ μπίνταρανο! Πριν τι αβέλ 20 μπρεσένγκο, ο Ιωσίας αρχισάλο τι καθαρίνελ ο λαός κατά ψεύτικη λατρεία. (2 Χρον. 34:1, 2) Ατζέ-ντα άμα ισινέν μπουτ τερνέ, μπορίνενα τι αποφασίνεν τι μοιάζεν κο Ιωσίας άμα κα ρόντεν ι Ιεχωβάσκε ντα κα σικλιόν τι εκτιμίνεν Λέσκε ιδιότητες. Ανταβά κα τσσίντελ-τουμέν τι αφιερώντιβεν λέστε. Σαρ κα επηρεάνελ ανταβά τουμαρί ζωή; Ο Λουκάς σο μπολντιλό κάνα ισινέ 14 μπρεσένγκο, βακερέλα: «Από ακανά, κα τσσουβάβ ι υπηρεσία ι Ιεχωβάσκι πρώτη μι ζωγιάτε, ντα κα προσπαθίναβ τι κεράβ λέσκο γκι». (Μάρκ. 12:30) Καζόμ μπουτ κα ευλογίντιβεν τουμέν-ντα άμα μανγκένα τι κερέν ο ίδιος! w23.09 σ. 11 ¶12, 13

Κάνα ο απόστολος Παύλος γραφιντάς ανταγιά επιστολή, η κχανγκιρί κι Θεσσαλονίκη να πφαντάας ούτε εκ μπρες από αζομάν σο κερντιλίας. Ο διορισμέ μουρσά μάλλον να τθερένας εμπειρία ντα μπέκιμ τι κερντέας λάθη. Όμως, αξίνενας σεβασμός. Καζόμ η μπαρί στεναχώρια ερεσέλα, μπορεί τι χρειαζίντιβελ τι στηρίντιβας ατζέ πο μπουτ κο πρεσβύτεροι σο ισί αμαρέ κχανγκιριάτε για τι οδηγίνεν-αμέν. Μπέκιμ μα τι μπορίνας τι λας οδηγίες ούτε κατά παγκόσμια κεντρικά γραφεία ούτε κατά γραφείος τμήματος. Οτθάρ, ισί σημαντικός τι σικλιάς τι μανγκάς ντα τι σεβάνας αμαρέ πρεσβυτερόν ακανά. Σο-ντα τι αβέλ-πες, τι ατσσάς τζανγκαντέ ντα γκοντιαβέρ ντα μα τι τθεράς αμαρέ γιακχά κο ατέλειες λένγκε. Πρέπει τι τθεράς αμαρέ γκοντιάτε ότι ο Ιεχωβά, αντράλ κατά Χριστός, οδηγίνελα ανταλέ πιστέ μουρσέν. Σαρ η περικεφαλαία αρακχαβέλας ο σορό ι στρατιωτίσκο, αντικάς η ελπίδα τι σώντιβας αρακχαβέλα αμαρό τρόπος σκέψης. Αγαβάσα ότι σο-ντα ντέλα ανταβά ντουνιάς ισί άχρηστος. (Φιλιπ. 3:8) Αμαρί ελπίδα βοηθίνελα-αμέν τι ατσσάς ήρεμοι. w23.06 σ. 11, 12 ¶11, 12

Οντουλά σο ασουνένα “ι τζουβλιά σο να τθερέλα γκοντί” πρέπει τι λεν εκ απόφαση: Κα δεχτίνεν λάκι πρόσκληση ή όχι; Τθεράσα σημαντικούς λόγους για τι ατσσάς ντουρ κατά λουμνικανέ πράγματα. Η «τζουβέλ σο να τθερέλα γκοντί» βακερέλα: «Ο τσορντικανό πανί ισί γκουλντό». (Παρ. 9:17) Σο ισί «ο τσορντικανό πανί»; Η Γραφή βακερέλα ότι ο σεξουαλικές σχέσεις σο τθερέλα εκ αντρόγυνος ισί σαρ ο πανί σο ανέλα δροσιά. (Παρ. 5:15-18) Εκ μουρς ντα εκ τζουβέλ σο ισί παντριμέ νόμιμα μπορίνενα τι απολαμβάνεν ο σωστές σεξουαλικές πράξεις ο εκ ι γιαβερέσαρ. «Ο τσορντικανό πανί» όμως ισί κάτι γιαβέρ. Ανταβά λάφι μπέκιμ μανγκέλα τι σικαβέλ ο σεξουαλικές πράξεις σο ισί απαγορευμέ ντα μπίλατζανε. Ανταλά πράγματα συνήθως αβένα-πες αποτσοράλ, σαρ εκ τσορ συνήθως τσορέλα αποτσοράλ. «Ο τσορντικανό πανί» μπέκιμ ντικχίντιβελα μπουτ γκουλντό, ντα ειδικά άμα κάποιος αμντίνελα ότι καέκ να κα αγαβέλ ο λουμνικανέ πράγματα σο κερέλα. Όμως, χουχαβέλα πο νεαυτός σόσκε ο Ιεχωβά ντικχέλα σαρέ ο πράγματα. Ο πο “κερκό” ντα ο πο μπέτι πράγμας σο μπορεί τι αβέλ-πες αμένγκε ισί τι χασαράς ι ευλογία ι Ιεχωβάσκι, κάτι σο νανέ ιτς “γκουλντό”.​—1 Κορ. 6:9, 10. w23.06 σ. 22 ¶7-9

Σο αβέλα-πες άμα, για κάποιο βακίτι, νιωθίνενα ότι να προσευχίντιβενα αντράλ τουμαρέ γκίσταρ ή ότι να μπεϊντίνενα αζόμ μπουτ ο έργος; Μα αμντίνεν ότι νασλό τουμένταρ ο πνεύμας ι Ιεχωβάσκο. Επειδή ισινάμ ατελείς, αμαρί ψυχολογία μπορεί τι αλλάνελ εύκολα. Άμα αρχίνενα τι χασαρέν τουμαρί χαρά κι υπηρεσία κι Ιεχωβάσκι, σκεφτίνεν ο παράδειγμας ι απόστολε Παυλόσκο. Παρόλο σο προσπαθίνελας τι μοιάζελ κο Ιησούς, τζανέλας ότι μπάζιμα να τθερέλας αζόμ μπουτ όρεξη τι κερέλ ο πράγματα σο χρειαζίντιβελας τι κερέλ. Ο Παύλος ισινέ αποφασισμέ τι κερέλ πο διορισμός σαρ-ντα τι νιωθίνελας οντιά στιγμή. Αντικάς τουμέν-ντα, μα μουκχέν τουμαρέ ατελείς συναισθήματα τι λεν αποφάσεις τουμένγκε. Τι αβέν αποφασισμέ τι κερέν ο σωστός σαρ-ντα τι νιωθίνεν. Καζόμ νακχέλα ο βακίτι, άμα κα συνεχίνεν τι κερέν ο σωστός, τουμαρέ συναισθήματα μπορεί τι αλλάνεν ντα τι νιωθίνεν πο λατσσές.​—1 Κορ. 9:16. w24.03 σ. 11, 12 ¶12, 13

Μπορίνασα τι σικαβάς αγάπη αμαρέ πφραλένγκε ντα πφενίνγκε κάνα αβάσα αμαλά λέντζαρ ντα νακχάσα σαάτι λέντζαρ. (2 Κορ. 6:11-13) Μπουτ αμένταρ ισινάμ κχανγκιρίντε πφραλέντζαρ ντα πφενίντζαρ σο μπαριλέ γιαβέρτουλους ντα τθερένα διαφορετικός χαρακτήρας. Μπορίνασα τι κεράς πο ζουρανί αμαρί αγάπη σαριλένγκε κάνα ντικχάσα λένγκε λατσσέ ιδιότητες. Κάνα σικλιάσα τι ντικχάς ι γιαβερέν σαρ ντικχέλα-λεν ο Ιεχωβά, σικαβάσα ότι μανγκάσα-λεν. Η αγάπη κα αβέλ μπουτ σημαντική κι μπαρί στεναχώρια. Κάνα κα αρχίνελ ανταγιά στεναχώρια, κάι κα αρακχάς αρακχαϊπέ; Σκεφτίνεν σο βακερντάς ο Ιεχωβά πι λαόσκε τι κερέλ κάνα ο ντουσμάνια κα τσσουβένας-πες κι πουρανί Βαβυλώνα: «Τζα, τούι σο ισινάν μο λαός, τσσουβ-τουτ τι αντραϊνέ δωματιόντε ντα πφάντε το πόρτες παλά-τούταρ. Γκέραβ-τουτ σάντε για χάνικ, μέχρι τι νασέλ η χολί». (Ησ. 26:20) Ντικχίντιβελα ότι ανταλά λάφια ισί αμένγκε-ντα σο κα νακχάς ι μπαρί στεναχώρια. w23.07 σ. 6, 7 ¶14-16

Τι τθερέν ι φήμη ότι ισινέν λογικοί. Πουτσέν-τουμέν: “Ντικχένα-μαν ο γιαβερά σαρ εκ τζενό σο ισί λογικός, σο να μανγκέλα τι νακχέλ λέσκο ντα τσσίντελα-πες παλάλ; Ή μήπως πακιάνα ότι ισινόμ αυστηρός, σκληρός ντα τζενό σο τθερέλα σορό; Ασουνάβα ι γιαβερέν ντα δεχτίναβα οντουβά σο μανγκένα βον κάνα κάτι ασακό αβέλα-πες;” Καζόμ πο λογικοί ισινάμ, αζόμ πο μπουτ μοιάζασα κο Ιεχωβά ντα κο Ιησούς. Χρειαζίντιβελα τι αβάς λογικοί κάνα ο πράγματα αμαρέ ζωγιάτε αλλάνενα. Ανταλά αλλαγές μπέκιμ τι ανέν αμένγκε δυσκολίες σο να μπεκλεντίνασα. Μπέκιμ τι νακχάς εκ ξαφνικός πρόβλημας υγείας. Ή κάποιες ξαφνικές αλλαγές, σο τθερένα τι κερέν ι λοβέντζαρ ή με την κυβέρνηση οτθέ σο τζουβντιάσα, μπορεί τι κερέν άνω κάτω αμαρί ζωή. (Εκκλ. 9:11) Ατζέ-ντα εκ αλλαγή αμαρέ διορισμόστε μπορεί τι αβέλ εκ δοκιμασία αμένγκε. Μπορίνασα τι κεράς ο αλλαγές σο χρειαζίντιβενα ντα τι τζας-λεν λατσσές κάνα κεράσα ακαλά σταρ βήματα: (1) τι δεχτίνας ότι ο πράγματα αλλαξάλε, (2) τι σκεφτίνας ο μέλλον, (3) τι ντικχάς ο λατσσέ πράγματα αμαρέ ζωγιάτε, (4) τι κεράς πράγματα ι γιαβερένγκε. w23.07 σ. 21, 22 ¶7, 8

Ο προφήτης Δανιήλ ισινέ τερνό κάνα ο Βαβυλώνιοι λιντέ-λες ντουρ λέσκε τθεμέσταρ σαρ αιχμάλωτος. Αλλά ο Δανιήλ μάλλον κερντάς εντύπωση κο Βαβυλώνιοι. Βον ντικχλέ “οντουβά σο ντικχίντιβελας”​—ότι ο Δανιήλ ισινέ εκ τερνό «χωρίς καέκ ελάττωμας, με λατσσί εμφάνιση» ντα ότι ισινέ σημαντικέ φαμιλιάταρ. (1 Σαμ. 16:7) Οτθάρ, ντινέ-λες εκπαίδευση για τι τθερέλ μπαρί θέση κι κοινωνία. (Δαν. 1:3, 4, 6) Ο Ιεχωβά μανγκέλας τον Δανιήλ, επειδή ντικχέλας σο τζενό τραμπιντάς τι αβέλ ανταβά τερνό. Μάλιστα, κάνα ο Ιεχωβά βακερντάς ότι ο Δανιήλ μοιάζελας κο Νώε ντα κο Ιώβ, ο Δανιήλ μπέκιμ τι ισινέ περίπου 20 μπρεσένγκο. Άρα, κο γιακχά κι Ιεχωβάσκε, ο Δανιήλ ισινέ αζόμ δίκαιος καζόμ ισινέ ο Νώε ντα ο Ιώβ, σο υπηρετιντέας ι Ντεβλές πιστά για μπουτ μπρεσά. (Γέν. 5:32· 6:9, 10· Ιώβ 42:16, 17· Ιεζ. 14:14) Ντα ο Ιεχωβά συνεχίνελας τι μανγκέλ τον Δανιήλ σαρέ ο μπρεσά σο τζουβντιλό ανταβά πιστός τζενό.​—Δαν. 10:11, 19. w23.08 σ. 2 ¶1, 2

Κάνα πρέπει τι αποφασίνεν άμα κα κινέν εκ κχερ, κα μανγκένας τι τζαν πασάλ για τι ντικχέν σαρέ ο πράγματα κο κχερ σο σκεφτίνενα τι κινέν. Κάτι ασακό μπορίνασα τι κεράς κάνα διαβάνασα ι Γραφή-ντα. Άμα απλώς διαβάνενα-λα σουγκό μπορεί τι σικλιόν σάντε ο βασικές αλήθειες​—«ο βασικά πράγματα για το ιερά λάφια ι Ντεβλέσκε». (Εβρ. 5:12) Αλλά αντικάς σαρ χρειαζίντιβελα τι τσσουβέν-τουμέν αντρέ κο κχερ για τι σικλιόν πο μπουτ λέσκε, χρειαζίντιβελα επίσης τι σικλιαρέν-τουμέν πο αχόρτ κατά Γραφή για τι αγαβέν-λα πο λατσσές. Εκ μπουτ σουκάρ τρόπος για τι σικλιαρέν-τουμέν κατά Γραφή ισί τι ντικχέν σαρ ο λάφια λάκε τθερένα σχέση ο εκ ι γιαβερέσαρ. Προσπαθίνεν τι αγαβέν όχι σάντε καλά αλήθειες πακιάνα, αλλά εμ σόσκε πακιάνα-λεν. Για τι αγαβάς ντιπ λατσσές ο Λάφι κι Ντεβλέσκο, πρέπει τι σικλιάς ο αχόρτ αλήθειες ι Γραφιάκε. Ο απόστολος Παύλος βακερντάς πι Χριστιανέ πφραλένγκε ντα πι πφενίνγκε τι σικλιαρέν-πες λατσσές κατά Λάφι ι Ντεβλέσκο για τι μπορίνεν τι «αγαβέν ντιπ καζόμ μπουγλί ντα μπαρί ντα βουτσσί ντα αχόρτ ισί η αλήθεια». Αντικάς, κα “τθερένας [πο μπαρέ] ρίζες ντα κα αβένας σταθεροί” κι πίστη. (Εφεσ. 3:14-19) Αμέν-ντα χρειαζίντιβελα τι κεράς-λες ανταβά. w23.10 σ. 18 ¶1-3

Η Γραφή τθερέλα μπουτ παραδείγματα τζενένγκε σο κερένας υπομονή. Σόσκε μα τι ντικχέν ασακέ παραδείγματα κάνα σικλιαρένα-τουμέν κατά Γραφή; Για παράδειγμας, παρόλο σο ο Δαβίδ ισινέ μπουτ τερνό κάνα τραμπίντιλο τι αβέλ βασιλιάς κο Ισραήλ, έπρεπε τι μπεκλεντίνελ μπουτ μπρεσά μέχρι τι αρχίνελ τι κερέλ κουμάντος σαρ βασιλιάς. Ο Συμεών ντα η Άννα ντένας λατρεία κο Ιεχωβά πιστά καζόμ μπεκλεντίνενας τι αβέλ ο Μεσσίας. (Λουκ. 2:25, 36-38) Καζόμ σικλιαρένα-τουμέν ασακέ ιστοριένταρ, τι ρόντεν ο απαντήσεις ακαλέ ερωτησιέντε: Σο μπέκιμ τι βοηθιντάς ανταλέ τζενές τι κερέλ υπομονή; Σαρ βοηθίντιλο ανταλέσταρ; Σαρ μπορίναβα τι μοιάζαβ λέστε; Κάτι γιαβέρ σο κα βοηθίνελ-τουμέν ισί τι σικλιόν οντουλένγκε σο να κερντέ υπομονή. (1 Σαμ. 13:8-14) Κα μπορίνενας τι πουτσέν-τουμέν: “Σο κερντάς-λεν μα τι σικαβέν υπομονή; Καλά μπέτι αποτελέσματα τθερένας επειδή να σικαντέ υπομονή;” w23.08 σ. 25 ¶15

Ο απόστολος Πέτρος ισινέ αφοσιωμέ. Να μουκχλάς τίποτα τι κερέλ-λες τι παρατίνελ-λεν σαρέ για πάντα. Σικαντάς πι αφοσίωση εκχέ περιπτωσιάτε σο ο Ιησούς βακερντάς κάτι σο λέσκε μαθητές να αγαντέ. (Ιωάν. 6:68) Χωρίς τι μπεκλεντίνεν για τι εξηγίνελ λένγκε ο Ιησούς, μπουτ μαθητές τσσιναντέ τι ακολουθίνεν ι Ιησούς. Αλλά ο Πέτρος να κερντάς-λες ανταβά. Αγαντάς ότι σάντε ο Ιησούς τθερέλας «λάφια σο ντένα αιώνια ζωή». Ο Ιησούς τζανέλας ότι ο Πέτρος ντα ο γιαβερά απόστολοι να κα ατσσόνας πασέ λέστε. Αλλά βακερντάς ι Πετρόσκε ότι ισινέ σίγουρος λέσκε ότι κα βουρτίνελας ντα κα ατσσόλας πιστός. (Λουκ. 22:31, 32) O Ιησούς αγαβέλας ότι «ο τζενό μανγκέλα τι κερέλ ο λατσσιπέ, αλλά ο σώμας ισί μπίζουρανο». (Μάρκ. 14:38) Οτθάρ, ατζέ-ντα κάνα ο Πέτρος βακερντάς ότι να τζανέλας-λες, ι Ιησούσκε συνεχίνελας τι αβέλ πολύτιμος. Ο αναστημέ Ιησούς σικαντάς-πες κο Πέτρος, μάλλον κάνα ο Πέτρος ισινέ κορκορό. (Μάρκ. 16:7· Λουκ. 24:34· 1 Κορ. 15:5) Σκεφτίνεν καζόμ ζορ πρέπει τι ντινάς ανταβά ι Πετρός, σο ισινέ πφανγκέ γκίσκο! w23.09 σ. 22 ¶9, 10

Ο Ντεβέλ συγχωρίνελα, ή γιαβέρσοϊ ιτσσαρέλα, ο αμαρτίες οντουλένγκε σο σικαβένα πίστη λέστε. Συγχωρίνελα-λεν ντιπ ντα να ανέλα πι γκοντιάτε λένγκε αμαρτίες. (Ψαλμ. 32:1, 2) Λέσκε γιακχίντε, ανταλά τζενέ ισί ντιπ σωστά ντα δίκαια επειδή τθερένα πίστη. Παρόλο σο βακέρντιλε δίκαιοι, ο Αβραάμ, ο Δαβίδ ντα γιαβερά πιστά τζενέ σο ντένας λατρεία ι Ντεβλές συνεχίνενας τι αβέν ατελείς ντα αμαρτωλοί. Αλλά επειδή πακιάνας κο Ντεβέλ, λέσκε γιακχίντε ισινέ ντιπ σωστοί, κάτι σο να αβέλας-πες ι τζενέντζαρ σο να ισινέ λέσαρ αμαλά. (Εφεσ. 2:12) Σαρ βακερντάς ξεκάθαρα ο απόστολος Παύλος κι επιστολή σο γραφιντάς, η πίστη κχελέλα σημαντικός ρόλος για τι τθεράς φιλία ι Ντεβλέσαρ. Ο Αβραάμ ντα ο Δαβίδ ισινέ αμαλά ι Ντεβλέσκε επειδή τθερένας πίστη λέστε. Αμέν-ντα μπορίνασα τι αβάς αμαλά ι Ντεβλέσκε χάρη κι πίστη σο τθεράσα. w23.12 σ. 3 ¶6, 7

Αντιβές, σαρέ ο Χριστιανοί τθερένα ο προνόμιος τι ντεν θυσίες κο Ιεχωβά καζόμ χρησιμοποιήνενα πουμαρό σαάτι, πουμαρί ζορ ντα πουμαρέ πράγματα για τι υπηρετίνεν-λες. Μπορίνασα τι σικαβάς ότι εκτιμίνασα μπουτ ο προνόμιος σο τθεράσα τι ντας λατρεία ι Ιεχωβάς κάνα κεράσα ο πο λατσσέ θυσίες σο μπορίνασα. Ο απόστολος Παύλος βακερέλα διάφορα πράγματα σο πρέπει πάντα τι κεράς καζόμ ντάσα λατρεία ι Ιεχωβάς. (Εβρ. 10:22-25) Μερικά ανταλένταρ ισί τι τζας πασέ κο Ιεχωβά αντράλ κατά προσευχή, τι κεράς έργος, τι τζας κο συναθροίσεις ντα τι ντας ζορ ο εκ ι γιαβερές, «ντα ατζέ πο μπουτ καζόμ [ντικχάσα] τι ερεσέλ ο ντιβές [ι Ιεχωβάσκο]». Κο τέλος κι Αποκάλυψη, ο άγγελος ι Ιεχωβάσκο βακερέλα: «Κο Ντεβέλ ντε λατρεία!» (Αποκ. 19:10· 22:9) Βακερντάς-λες ντούι φαρ για τι σικαβέλ καζόμ σημαντικός ισί. Μα τι μπιστράς ποτές ανταγιά αχόρτ πνευματική αλήθεια σο τθερέλα τι κερέλ ι Ιεχωβάσκε μπαρέ πνευματικέ ναόσαρ ντα ο μπαρό προνόμιος σο τθεράσα τι ντας λατρεία αμαρέ μπαρέ Ντεβλές! w23.10 σ. 29 ¶17, 18

Σαρέ μπεϊντίνασα «τι μανγκάς ο εκ ι γιαβερές». Όμως, ισί μπουτ σημαντικός τι θυμίνας ότι ο Ιησούς βακερντάς αμένγκε ότι “η αγάπη ι πο μπουτέ τζενένγκι κα σουρντιόλας”. (Ματθ. 24:12) Ο Ιησούς να μανγκέλας τι βακερέλ ότι ο πο μπουτ λέσκε μαθητένταρ κα σουρντιόνας ο εκ κατά γιαβέρ. Όμως, πρέπει τι αβάς προσεκτικοί για μα τι επηρεάντιβας κατά ντουνιάς σο να τθερέλα μπουτ αγάπη. Καζόμ τθεράσα-λες ανταβά αμαρέ γκοντιάτε, για τι ντικχάς ακαγιά σημαντική ερώτηση: Σαρ μπορίνασα τι αγαβάς άμα αμαρί αγάπη ι πφραλένγκε ισί ζουρανί; Εκ τρόπος για τι αγαβάς καζόμ ζουρανί ισί αμαρί αγάπη ισί τι ντικχάς σαρ αντιδράνασα μερικέ περιπτωσιέντε κι ζωή. (2 Κορ. 8:8) Ο απόστολος Πέτρος κερέλα λάφι εκχέ ασακέ περιπτωσιάκε: «Ο πο σημαντικός σαριλένταρ ισί τι μανγκέν μπουτ ο εκ ι γιαβερές, επειδή η αγάπη ιτσσαρέλα μπουτ αμαρτίες». (1 Πέτρ. 4:8) Οτθάρ, ο αδυναμίες ντα ο ατέλειες ι γιαβερένγκε μπορίνενα τι δοκιμάνεν αμαρί αγάπη. w23.11 σ. 10 ¶12, 13

Ναστί ντάσα καν κι εντολή κι Ιησούσκι σο βακερέλα ι μανγκιμάσκε άμα σικαβάσα αγάπη μερικέ τζενέντε κι κχανγκιρί αλλά γιαβερέντε να σικαβάσα. Μπέκιμ τι νιωθίνας πο πασέ μερικέ πφραλέντζαρ ενώ γιαβερέντζαρ όχι αζόμ μπουτ, σαρ ο Ιησούς-ντα. (Ιωάν. 13:23· 20:2) Αλλά ο απόστολος Πέτρος ανέλα αμαρέ γκοντιάτε ότι πρέπει τι μαράς-αμέν για τι “πφαμπάς” σαρέ αμαρέ πφραλένγκε ντα πφενίνγκε, τι αβάς πο πασέ σαρ εκ φαμιλί. (1 Πέτρ. 2:17) Ο Πέτρος βακερντάς αμένγκε τι “μανγκάς μπουτ ο εκ ι γιαβερές αντράλ αμαρέ γκίσταρ”. (1 Πέτρ. 1:22) Ακατέ ο λάφι «μπουτ» μανγκέλα τι βακερέλ τι μανγκάς εκχέ τζενές ατζέ-ντα άμα ισί δύσκολος τι κεράς-λες ανταβά. Για παράδειγμας, σο αβέλα-πες άμα εκ πφραλ προσβαλιντάς-αμέν ή πφανγκλάς αμαρό γκι; Μπέκιμ οντουβά σο νικιόλα αμένταρ ισί τι κεράς λέσκε αμέν-ντα ο ίδια αντίς τι σικαβάς αγάπη. Όμως, ο Πέτρος σικλιλό κατά Ιησούς ότι ο Ντεβέλ να μπεϊντίνελα-λες ανταβά. (Ιωάν. 18:10, 11) Ο Πέτρος γραφιντάς: «Μα κερέν κακός οντουλένγκε σο κερένα τουμένγκε κακός ή μα προσβαλίνεν οντουλέν σο προσβαλίνενα-τουμέν, αλλά ευλογίνεν-λεν». (1 Πέτρ. 3:9) Κάνα μανγκένα μπουτ ι γιαβερέν, κα σικαβέν λένγκε λατσσιπέ ντα κα σκεφτίνεν-λεν. w23.09 σ. 29 ¶9-11

Ισί εντυπωσιακός καζόμ σουγκό μπαριόλα εκ χουρντό. Ντικχίντιβελα ότι ο τσσαβέ μπαριόνα χωρίς τι κερέν καέκ προσπάθεια. Όμως, για τι αβέλ εκ τζενό ώριμος Χριστιανός, πρέπει τι κερέλ προσπάθειες. (1 Κορ. 13:11· Εβρ. 6:1) Για τι πετυχίνας ανταβά στόχος, πρέπει τι τθεράς εκ ζουρανί φιλία ι Ιεχωβάσαρ. Χρειαζίντιβασα επίσης λέσκο άγιος πνεύμας καζόμ μπαριαράσα ιδιότητες σο κερένα λέσκο γκι, σικλιάσα χρήσιμα πράγματα σο κα βοηθίνεν-αμέν αμαρέ ζωγιάτε ντα προετοιμάντιβασα για το ευθύνες σο κα τθεράς κο μέλλον. (Παρ. 1:5) Ο Ιεχωβά κερντάς ι τζενέν τι αβέν μουρσά ντα τζουβλιά. (Γέν. 1:27) Ισί εύκολος τι ντικχάς ο διαφορές σο τθερένα ο μουρσά ντα ο τζουβλιά κο σώμας. Όμως, εκτός ανταλέσταρ, τθερένα γιαβερά-ντα διαφορές. Για παράδειγμας, ο Ιεχωβά κερντάς ι μουρσέν ντα ι τζουβλίν τι μπορίνεν τι τθερέν κάποιες ευθύνες, οτθάρ χρειαζίντιβενα ιδιότητες ντα τι σικλιόν κάποια πράγματα για τι μπορίνεν τι κερέν πουμαρέ ευθύνες.​—Γέν. 2:18. w23.12 σ. 18 ¶1, 2

Μανγκέλας ο Ιησούς τι χρησιμοποιήνεν ο γιαβερά τζενέ ο ναβ λέσκε Νταντέσκο; Σίγουρα. Μερικά παπάζια αζομάν μπέκιμ πακιάνας ότι άμα εκ τζενό βακερέλας ι Ντεβλέσκο ναβ να σικαβέλας σεβασμός. Αλλά ο Ιησούς να μουκχλάς ασακέ πράγματα σο τζάνας κόντρα ι Γραφιάσαρ τι κερέν-λες μα τι δοξάνελ πι Νταντέσκο ναβ. Ανέν τουμαρέ γκοντιάτε σο αβιλό-πες κάνα κερντάς λατσσές εκχέ δαιμονισμέ τζενές κο Γερασηνοί. Ο τζενέ νταρασάλε ντα μολίνενας ι Ιησούς τι νασέλ, οτθάρ βοβ να ατσσιλό οντουλέ τθεμέστε. (Μάρκ. 5:16, 17) Όμως ο Ιησούς μανγκέλας τι σικλιόν ο τζενέ οτθέ ι Ιεχωβάσκο ναβ. Οτθάρ, βακερντάς κο τζενό σο κερντάας-λες λατσσές τι βακερέλ, όχι σο κερντάς ο Ιησούς, αλλά σο κερντάς ο Ιεχωβά. (Μάρκ. 5:19) Ανταβά μανγκέλα αντιβές-ντα​—τι βακεράς ο ναβ λέσκε Νταντέσκο σαρό κο ντουνιάς! (Ματθ. 24:14· 28:20) Κάνα κεράσα-λες ανταβά, αβέλα ο γκι αμαρέ Βασιλιάσκο, ι Ιησούσκο. w24.02 σ. 10 ¶10

Ισί μπαγιά ευλογία τι αβάς αντρέ κι οργάνωση κι Ιεχωβάσκι ανταλέ δύσκολε τελευταίε ντιβεσέντε. Καζόμ ο πράγματα σαρό κο ντουνιάς αβένα χειρότερα, ο Ιεχωβά ντέλα-αμέν εκ ενωμέ, πνευματική φαμιλί πφραλέντζαρ ντα πφενίντζαρ. (Ψαλμ. 133:1) Βοηθίνελα-αμέν τι αβάς δεμέ αμαρέ φαμιλιάσαρ. (Εφεσ. 5:33–6:1) Ντα ντέλα-αμέν ι σοφία σο χρειαζίντιβασα για τι ντας πέρα ι ανησυχία ντα τι τθεράς αληθινή ειρήνη αντρ’ αμέντε. Όμως, πρέπει τι μαράς-αμέν για τι συνεχίνας τι υπηρετίνας ι Ιεχωβάς πιστά. Σόσκε; Επειδή μερικές φορές μπέκιμ τι προσβαλίντιβασα οντουλένταρ σο βακερένα ή κερένα ο γιαβερά. Επίσης, μπορεί τι δυσκολίντιβασα τι νταϊντίνας αμαρέ ελαττώματα, ειδικά άμα κεράσα ο ίδια λάθη ξανά ντα ξανά. Μπορίνασα τι συνεχίνας τι υπηρετίνας ι Ιεχωβάς (1) κάνα εκ πφραλ προσβαλίνελα-αμέν, (2) κάνα αμαρό ρομ ή αμαρί ρομνί πφανγκέλα αμαρό γκι ντα (3) κάνα χασαράσα αμαρί ζορ επειδή κεράσα λάθη. w24.03 σ. 14 ¶1, 2

Κα αβέν φορές σο κα ασουνέν εμπειρίες πφραλένγκε σο αποφασιντέ τι κερέν πο μπουτ κι υπηρεσία κι Ιεχωβάσκι. Μπέκιμ νακχλέ ι Σχολή για Ευαγγελιστές της Βασιλείας ή μετακομιντέ οτθέ σο η ανάγκη ισί πο μπαρί. Άμα μπορίνενα τι τσσουβέν τουμέν-ντα εκ ασακό στόχος, μα σακιντίνεν τι κερέν-λες. Ο υπηρέτες ι Ιεχωβάσκε μανγκένα τι κερέν πο μπουτ πράγματα λέσκε. (Πράξ. 16:9) Σο αβέλα-πες όμως άμα ανταγιά στιγμή να μπορίνενα τι κερέν-λες ανταβά; Μα αμντίνεν ότι τθερένα πο χάνικ αξία οντουλένταρ σο μπορίνενα τι κερέν-λες. Ο αγώνας σο κεράσα σαρ Χριστιανοί ισί εκ αγώνας σο χρειαζίντιβελα υπομονή. (Ματθ. 10:22) Ο κάθε εκ αμένταρ τθερέλα διαφορετικές ικανότητες ντα ο πράγματα λέσκε ζωγιάτε ισί διαφορετικά. Οτθάρ, κερέν ο πο λατσσό σο μπορίνενα τουμέν, ντα ο Ιεχωβά κα χαιρίνελ ανταλέσκε. Ανταβά ισί εκ σημαντικός τρόπος για μα τι τσσιναβέν τι πφιρέν παλάλ κο Ιησούς σοράν τουμαρέ μπολντιμάσταρ.​—Ψαλμ. 26:1. w24.03 σ. 10 ¶11

Αμαρό Ντατ σο ισί κο ουρανός ντέλα πο λάφι τι συγχωρίνελ-αμέν άμα κα μετανιώνας. (Ψαλμ. 86:5) Άρα, άμα στεναχωρίντιβασα μπαγιά ι αμαρτιένγκε σο κερντάμ, μπορίνασα τι πακιάς οντουβά σο βακερέλα αμένγκε ο Ιεχωβά, ότι συγχωριντάς-αμέν. Ντεν-τουμέν γκοντί ότι ο Ιεχωβά ισί λογικός. Ποτές να μπεκλεντίνελα αμένταρ πο μπουτ οντουλένταρ σο μπορίνασα τι κεράς. Εκτιμίνελα σο-ντα κεράσα λέσκε άμα ανταβά ισί ο πο λατσσό σο μπορίνασα. Επίσης, σκεφτίνεν παραδείγματα τζενένγκε κατά Γραφή σο υπηρετίνενας ι Ιεχωβάς σαρέ πουμαρέ γκίσαρ. Σκεφτίνεν ι απόστολε Παυλός. Κερντάς ο πο λατσσό για μπουτ μπρεσά σαρέ πι γκίσαρ. Πφιρντάς χιλιάδες χιλιόμετρα ντα κερντάς μπουτ νεβέ κχανγκιριά. Κάνα όμως ο πράγματα λέσκε ζωγιάτε αλλαξάλε ντα ναστί κερέλας αζόμ μπουτ κο έργος, μήπως τσσιναντάς τι κερέλ ι Ντεβλέσκο γκι; Νάα. Συνεχιντάς τι κερέλ ο πο λατσσό σο μπορίνελας ντα ο Ιεχωβά ευλογίνελας-λες. (Πράξ. 28:30, 31) Αμέν-ντα να μπορίνασα πάντα τι ντας ο ίδια πράγματα κο Ιεχωβά. Αλλά ανταβά σο τθερέλα σημασία λέσκε ισί ο λόγος σο υπηρετίνασα-λες. w24.03 σ. 27 ¶7, 9

Πι προσευχιέντζαρ σο κερέλας κο Ιεχωβά, ο Ιησούς ντινάς ο παράδειγμας πι μαθητέντε. Σαρέ ο μπρεσά σο κερέλας πο έργος, προσευχίντιβελας μπουτ φαρ. Χρειαζίντιβελας τι αρακχέλ σαάτι για προσευχή, σόσκε ισινέ μπουτ απασχολημέ ντα τθερέλας μπουτέ τζενέν ντονταλάι πέσταρ. (Μάρκ. 6:31, 45, 46) Ιστίλας μπουτ πρωί επειδή μανγκέλας τι τθερέλ σαάτι για τι ατσσόλ κορκορό ντα τι κερέλ προσευχή. Τουλάχιστον σε εκ περίπτωση, κερντάς προσευχή σαστί ιράτ πριν τι λελ εκ σημαντική απόφαση. (Λουκ. 6:12, 13) Επίσης, ο Ιησούς προσευχίντιλο μπουτ φαρ ι ιράτ πριν τι μερέλ, σόσκε ατζεχάνικ κα μπιτισκιαρέλας ο πο δύσκολος κομμάτι κατά διορισμός σο τθερέλας κι πφουβ. (Ματθ. 26:39, 42, 44) Ο παράδειγμας ι Ιησούσκο σικλιαρέλα-αμέν ότι, καζόμ-ντα απασχολημέ τι αβάς, πρέπει τι αρακχάς σαάτι για τι προσευχίντιβας. Σαρ ο Ιησούς, αντικάς αμέν-ντα μπέκιμ χρειαζίντιβελα τι τραμπίνας εκ συγκεκριμέ σαάτι ανταλέσκε​—τι ιστιάς πο νωρίς το πρωί ή τι σοβάς χάνικ πο σοράν αρατί. Κάνα κεράσα-λες ανταβά, σικαβάσα κο Ιεχωβά ότι εκτιμίνασα ανταβά ξεχωριστός δώρος. w23.05 σ. 3 ¶4, 5

Ντεν σημασία ο λάφι «πφερντάς» κο εδάφιος σο ισί πο οπρέ. Εκ λεξικός σο ασχολίντιβελα ι Γραφιάσαρ εξηγίνελα-λες ανταβά αντικάς: «Αβιλί οπρ’ αμέντε σαρ πανί σο τθάβντελα φοράσαρ». Καζόμ λατσσές σικαβένα ανταλά λάφια ι μπαρί αγάπη σο τθερέλα ο Ιεχωβά ι χρισμέ τζενένγκε! Ο χρισμέ τζανένα ότι «μανγκλάς-λεν ο Ντεβέλ». (Ιούδα 1) Ο απόστολος Ιωάννης βακερντάς σαρ νιωθίνενα κάνα γραφιντάς: «Ντικχέν καζόμ μπαρί αγάπη σικαντάς αμένγκε ο Ντατ, τι βακέρντιβας τσσαβέ ι Ντεβλέσκε!» (1 Ιωάν. 3:1) Μήπως ο Ιεχωβά μανγκέλα σάντε ι χρισμέ τζενέν; Όχι, ο Ιεχωβά σικαντάς πι αγάπη σαρέ αμένγκε. Καβά πράγμας σικαβέλα ξεκάθαρα ι αγάπη ι Ιεχωβάσκι; Ο λύτρος. Καέκ να σικαντάς ποτές πο μπαρί αγάπη κατά αγάπη ανταγιά!​—Ιωάν. 3:16· Ρωμ. 5:8. w24.01 σ. 28 ¶9, 10

Ο εδάφιος σο ισί πο οπρέ σικαβέλα αμένγκε εκ τρόπος σο ο Δαβίδ νικιντάς πι νταρ. Παρόλο σο λέσκι ζωή ισινέ σε κίνδυνος, βοβ σκεφτίνελας λατσσές σο γιαβέρ κα κερέλας ο Ιεχωβά λέσκε. Ο Δαβίδ τζανέλας ότι ο Ιεχωβά κα σώνελας-λες κι σωστή στιγμή. Μα τι μπιστράς ότι ο Ιεχωβά βακερντάας ότι ο Δαβίδ κα αβέλας ο γιαβέρ βασιλιάς κο Ισραήλ. (1 Σαμ. 16:1, 13) Ι Δαβιδίσκε, κάθε υπόσχεση ι Ιεχωβάσκι ισινέ σαρ τι νικίστιλι μπαγιά. Σο ντινάς πο λάφι ο Ιεχωβά ότι κα κερέλ τουμένγκε; Να μπεκλεντίνασα τι αρακχαβέλ-αμέν σαρέ κατά προβλήματα. Όμως, σο-ντα δοκιμασίες τι νακχέν ανταλέ ντουνιάστε, ο Ιεχωβά κα νασκιαρέλ-λεν κο νεβό ντουνιάς σο κα αβέλ. (Ησ. 25:7-9) Σίγουρα, αμαρό Δημιουργός ισί αζόμ ζουρανό σο κα τζουβντιαρέλ ι μουλέν, κα κερέλ-αμέν λατσσές ντα κα νασκιαρέλ σαρέ ι τζενέν σο τζάνα αμέντζαρ κόντρα.​—1 Ιωάν. 4:4. w24.01 σ. 6 ¶12, 13

Τι σκεφτίνεν τουμαρί αφιέρωση ντα τουμαρό μπολντιπέ. Κερντέν ανταλά βήματα επειδή μανγκένας τι τσσίντεν κατά Ιεχωβάσκι μπάντα. Ντεν-τουμέν γκοντί σο βοηθιντάς-τουμέν τι αβέν σίγουροι ότι αρακχλένας ι αλήθεια. Σικλιλέν μπουτ πράγματα ι Ιεχωβάσκε ντα μπαριαρντέν τουμαρό σεβασμός ντα τουμαρί αγάπη τουμαρέ Νταντέσκε σο ισί κο ουρανός. Αρχισάλεν τι τθερέν πίστη ντα μανγκλέν τι μετανιώνεν. Τουμαρό γκι τσσιντιντάς-τουμέν τι μουκχέν ο λάθος πράγματα σο κερένας ντα τι αρχίνεν τι τζουβντιόν αντικάς σαρ μανγκέλα ο Ντεβέλ. Λοκχιλό τουμαρό γκι κάνα αγαντέν ότι ο Ντεβέλ συγχωριντάς-τουμέν. (Ψαλμ. 32:2) Τζάνας κο συναθροίσεις ντα αρχισάλεν τι βακερέν γιαβερέντε-ντα ο σουκάρ πράγματα σο σικλιλένας. Σαρ αφιερωμέ ντα μπολντέ Χριστιανοί, πφιρένα ακανά κο ντρομ σο γκερέλα κι ζωή, ντα ισινέν αποφασισμέ μα τι νασέν λέσταρ. (Ματθ. 7:13, 14) Τι ατσσόν σταθεροί, πάντα αφοσιωμέ κο Ιεχωβά ντα μα τι τσσιναβέν τι ντεν καν λέσκε εντολέντε. w23.07 σ. 17 ¶14· σ. 19 ¶19

Άμα κα σκεφτίνεν λατσσές ι προσευχή σο κερντέν κάνα αφιερωντέν-τουμέν κο Ιεχωβά, κα αρακχέν ι ζορ τι τζαν κόντρα σαρέ κο πειρασμοί. Για παράδειγμας, κα αρχίνενας τι περέν εκχέ τζουβλιάκε ή εκχέ μουρσέσκε σο ισί παντριμέ; Σίγουρα όχι! Βακερντέν ήδη όχι ανταλέστε. Άμα να κα μουκχέν από την αρχή τι ασταρέν ρίζες αντρέ τουμέντε λάθος αισθήματα, σοράν να κα μαρέν-τουμέν για τι νικαβέν-λεν. Κα νασέν ντουρ κατά “ντρομ ι πφιρνένγκο”. (Παρ. 4:14, 15) Άμα κα σκεφτίνεν καζόμ αποφασισμέ ισινέ ο Ιησούς τι κερέλ πι Νταντέσκο γκι, κα αβέν τουμέν-ντα αποφασισμέ τι βακερέν αμέσως όχι κάθε πραγμάστε σο τζανένα ότι κα στεναχωρίνελας ι Ντεβλές, σόσκε ισινέν αφιερωμέ λέστε. (Ματθ. 4:10· Ιωάν. 8:29) Ο δοκιμασίες ντα ο πειρασμοί ισί εκ ευκαιρία για τι σικαβέν ότι ισινέν αποφασισμέ “μα τι τσσιναβέν τι πφιρέν παλάλ” κο Ιησούς. Καζόμ κερένα-λες ανταβά, μπορίνενα τι αβέν σίγουροι ότι ο Ιεχωβά κα βοηθίνελ-τουμέν. w24.03 σ. 9, 10 ¶8-10