Οκτώβριος

Μήπως μερικές φορές ισί τουμένγκε δύσκολος τι ντεν καν; Ανταβά αβέλας-πες κο βασιλιάς Δαβίδ-ντα, οντουλέσκε προσευχίντιλο κο Ντεβέλ: «Κερ μο γκι τι μανγκέλ τι ντελ-τουτ καν». (Ψαλμ. 51:12) Ο Δαβίδ μανγκέλας ι Ιεχωβάς. Όμως μερικές φορές δυσκολίντιβελας τι ντελ καν, σαρ αμέν-ντα. Σόσκε; Πρώτον, κληρονομιντάμ ι ατέλεια σο τσσίντελα-αμέν μα τι ντας καν. Δεύτερον, ο Μπενγκ συνέχεια προσπαθίνελα τι κερέλ-αμέν τι τζας κόντρα σαρ τζάλα βοβ. (2 Κορ. 11:3) Τρίτον, ο ντουνιάς σο τζουβντιάσα ισί πφερντό τζενέντζαρ σο μανγκένα τι τζαν κόντρα. Ντονταλάι αμένταρ ισί «ο πνεύμας σο ακανά επηρεάνελα οντουλέν σο να ντένα καν». (Εφεσ. 2:2) Πρέπει τι μαράς-αμέν, όχι σάντε για τι τζας κόντρα κι ατέλεια σο τσσίντελα-αμέν τι κεράς αμαρτία, αλλά για μα τι περάς κι παγίδα-ντα σο τσσουβέλα αμένγκε ο Μπενγκ ντα ανταβά ντουνιάς μα τι ντας καν. Πρέπει τι μαράς-αμέν για τι ντας καν κο Ιεχωβά ντα οντουλέντε σο διοριντάς τι τθερέν εξουσία. w23.10 σ. 6 ¶1

Σο σικλιάσα κατά θαύμας ι Ιησούσκο σο κερντάς ο πανί μολ; Σικλιάσα σαρ τι αβάς ταπεινοί. Ο Ιησούς να ισαρντάς-πες για το θαύμας. Ποτές να ισαρέλας-πες οντουλένγκε σο κερέλας. Οκιά μπάνταρ, ισινέ ταπεινός ντα ντέλας πάντα σαρί ι δόξα ντα ι τιμή πι Νταντέστε. (Ιωάν. 5:19, 30· 8:28) Άμα κα μοιάζας κο Ιησούς ντα να τθεράσα μπαρί ιδέα αμαρέ νεαυτόσκε, να κα ισαράς-αμέν ι λατσσέ πραγματένγκε σο κεράσα. Πρέπει τι ισαράς-αμέν, όχι αμαρέ νεαυτόσκε, αλλά αμαρέ μπουτ λατσσέ Ντεβλέσκε σο τθεράσα ο προνόμιος τι υπηρετίνας-λες. (Ιερ. 9:23, 24) Πρέπει τι ντας σαρί ι τιμή λέστε. Για τι σκεφτίνας: Κα μπορίναας τι κεράς κάτι λατσσό χωρίς τι τθεράς ι βοήθεια ι Ιεχωβάσκι; (1 Κορ. 1:26-31) Άμα ισινάμ ταπεινοί, να κα τθεράς ι ανάγκη τι λας ο ισαριπέ ι λατσσέ πραγματένγκε σο κεράσα ι γιαβερένγκε. Ερεσέλα-αμέν σο τζανάσα ότι ο Ιεχωβά ντικχέλα ντα εκτιμίνελα σο-ντα κεράσα. (Ντικχέν Ματθαίος 6:2-4· Εβρ. 13:16) Σίγουρα, κεράσα ι Ιεχωβάσκο γκι κάνα μοιάζασα κο Ιησούς ντα σικαβάσα ότι ισινάμ ταπεινοί.​—1 Πέτρ. 5:6. w23.04 σ. 4 ¶9· σ. 5 ¶11, 12

Ι Ντεβλέσκε πνευμάσαρ, ο απόστολος Παύλος βακερντάς κο Χριστιανοί τι ντικχέν ο λατσσιπέ ι γιαβερένγκο. Σαρ μπορίνασα τι κεράς ανταγιά συμβουλή κο συναθροίσεις; Άμα κα ντας-αμέν γκοντί ότι γιαβερά-ντα μανγκένα τι απαντίνεν, σαρ μανγκάσα αμέν-ντα. Σκεφτίνεν ακαβά: Κάνα ισινέν τουμαρέ αμαλέντζαρ, κα κερένας αζόμ μπουτ λάφι σο να κα μουκχένας-λεν τι βακερέν τίποτα; Σίγουρα νάα! Μανγκένα τι ασουνέν λεν-ντα τι κερέν λάφι. Αντικάς κο συναθροίσεις-ντα, μανγκάσα τι μουκχάς καζόμ πο μπουτ τζενέν αβέλα-πες τι ντεν απαντήσεις. Ντα εκ κατά πο λατσσέ τρόπους για τι ντας ζορ αμαρέ πφραλέν ντα αμαρέ πφενίν ισί τι ντας-λεν ι ευκαιρία τι κερέν λάφι οντουλένγκε σο πακιάνα. (1 Κορ. 10:24) Οτθάρ τι ντας χουρντέ απαντήσεις, ντα αντικάς τι μουκχάς σαάτι για τι απαντίνεν πο μπουτ τζενέ. Ατζέ-ντα κάνα ντάσα εκ χουρντί απάντηση, δεν πρέπει τι βακεράς σαρέ ο λάφια σο ισί κι παράγραφος. Άμα κα κεράς-λες ανταβά, να κα ατσσόν-ντα μπουτ πράγματα τι βακερέν ο γιαβερά. w23.04 σ. 22, 23 ¶11-13

Πρέπει τι ντας-αμέν γκοντί καζόμ σημαντικός ισί τι συνεχίνας τι βοηθίνας ι γιαβερέν, ειδικά αντράλ κατά έργος σο κεράσα. Κο έργος, χρειαζίντιβελα τι αβάς έτοιμοι τι αλλάνας ο τρόπος σο βακεράσα ο λατσσέ αμπέρια. Ο τζενέ σο αρακχάσα πακιάνα διαφορετικά πράγματα ι Ντεβλέσκε, ντα ισί διαφορετικέ τθεμένταρ ντα τθερένα γιαβέρ κουλτούρα. Ο απόστολος Παύλος κερέλας ο αλλαγές σο χρειαζίντιβενας, ντα μπορίνασα τι σικλιάς κατά παράδειγμας λέσκο. Ο Ιησούς διοριντάς ι Παυλός τι αβέλ «απόστολος ι τθεμένγκο». (Ρωμ. 11:13) Καζόμ κερέλας οντουβά διορισμός, ο Παύλος βακερέλας ο λατσσέ αμπέρια κο Ιουδαίοι, κο Μπαλαμέ, κο σπουδαγμέ, κο ταπεινοί αγρότες, κο τζενέ σο τθερένας μπαρέ θέσεις ντα κο βασιλιάδες. Επειδή κερέλας έργος αζόμ μπουτέ τζενέντε, ο Παύλος αβιλό «τα πάντα σαβέ τι μανγκές τζενένγκε» για τι αγγίνελ λένγκο γκι. (1 Κορ. 9:19-22) Σκεφτίνελας προσεκτικά ι κουλτούρα ντα ι θρησκεία ι τζενένγκι σο κερέλας λέντζαρ λάφι. Ανταβά βοηθίνελας-λες τι κερέλ λάφι τροπόσαρ σο κα βοηθίνελας ι κάθε εκχές τι πλησιάνελ ι Ιεχωβάς. Μπορίνασα αμέν-ντα τι αβάς πο λατσσέ κο έργος κάνα ισινάμ έτοιμοι τι αλλάνας ο τρόπος σο βακεράσα ο λατσσέ αμπέρια ντα σκεφτίνασα ο πο λατσσό τρόπος για τι βοηθίνας ι κάθε εκχές. w23.07 σ. 23 ¶11, 12

Η πραότητα σικαβέλα καζόμ ζουρανό ισί εκ τζενό, όχι καζόμ μπίζουρανο ισί. Εκ τζενό πρέπει τι αβέλ ζουρανό αντρέ πέστε για τι ατσσόλ ήρεμος κάνα νακχέλα εκ δυσκολία. Η πραότητα ισί αντρέ κο “καρπός κι πνευμάσκο”. (Γαλ. 5:22, 23) Μπάζιμα, ο πουρανό μπαλαμανό λάφι πραΰτης βακερένας-λες εκχέ άγριε γκραστέσκε σο ηρεμισάλο. Ανέν τουμαρέ γκοντιάτε εκχέ άγριε γκραστές σο ηρεμίνελα. Ισί ήρεμος παρόλο σο συνεχίνελα τι αβέλ ζουρανό. Αμέν, σαρ μπορίνασα τι τθεράς πο μπουτ πραότητα ντα κι ίδια στιγμή τι αβάς ζουρανέ; Ανταβά να μπορίνασα τι κεράς-λες κορκορέ. Ο μυστικός ισί τι προσευχίντιβας κο Ντεβέλ τι ντελ-αμέν άγιος πνεύμας, ντα τι μανγκάς λέσταρ τι βοηθίνελ-αμέν τι τθεράς ανταγιά σουκάρ ιδιότητα. Υπαρχίντιβενα μπουτ τζενέ σο σικλιλέ τι τθερέν πραότητα. Μπουτ Μάρτυρες απαντιντέ με πραότητα οντουλέντε σο τζάνας λέντζαρ κόντρα. Ντα ανταβά βοηθιντάς γιαβερέν τι τθερέν πο λατσσί άποψη ι Μαρτυρένγκε.​—2 Τιμ. 2:24, 25. w23.09 σ. 14 ¶3

Ο απόστολος Ιωάννης ντικχλάς εκ φαντασία σο κερντάς-λες τι σαστίνελ. Ντικχλάς 24 πρεσβυτερόν κο ουρανός τι ντεν λατρεία κο Ιεχωβά. Ντένας δόξα κο Ντεβέλ, επειδή τζανένας ότι ισινέ άξιος τι λελ «ι δόξα, ι τιμή ντα ι ζορ». (Αποκ. 4:10, 11) Ο πιστοί άγγελοι-ντα τθερένα μπουτ λόγους για τι ντεν δόξα ντα τιμή κο Ιεχωβά. Ισί λέσαρ κο ουρανός ντα τζανένα-λες λατσσές. Ντικχένα λέσκε ιδιότητες σο σικάντιβενα σαρέ οντουλέντε σο κερέλα. Καζόμ ντικχένα ι Ιεχωβάς τι κερέλ πράγματα, νικιόλα λένταρ τι δοξάνεν-λες. (Ιώβ 38:4-7) Πρέπει αμέν-ντα τι δοξάνας ι Ιεχωβάς αμαρέ προσευχιέντε. Κεράσα-λες ανταβά κάνα βακεράσα λέσκε σόσκε μανγκάσα-λες ντα σόσκε σεβάνασα-λες. Καζόμ διαβάνενα ντα σικλιαρένα-τουμέν κατά Γραφή, τι προσπαθίνεν τι αρακχέν ιδιότητες σο σικαβέλα ο Ιεχωβά ντα ερεσένα τουμαρέ γκίστε. (Ιώβ 37:23· Ρωμ. 11:33) Σοράν, τι βακερέν κο Ιεχωβά σαρ νιωθίνενα ανταλέ ιδιοτητένγκε. Μπορίνασα επίσης τι δοξάνας ι Ιεχωβάς επειδή βοηθίνελα αμέν ντα σαρέ αμαρέ πφραλέν ντα πφενίν.​—1 Σαμ. 2:1, 2. w23.05 σ. 3, 4 ¶6, 7

Κο 1919, η Βαβυλώνα η Μπαρί τσσιναντάς τι τθερέλ πι βαστέστε ι Ντεβλέσκε λαός. Οντουβά μπρες, «ο πιστός ντα φρόνιμος δούλος» αρχισάλο τι κερέλ πράγματα για τι μπορίνεν ο λατσσέ τζενέ τι αρχίνεν πουμαρό ταξίδι κο «Άγιος Ντρομ» σο μόλις πουτάρντιλοας. (Ματθ. 24:45-47· Ησ. 35:8) Ο πράγματα σο κερντέ γιαβερά τζενέ ανγκλέ, για τι ετοιμάνεν οντουβά ντρομ, βοηθιντέ οντουλέν σο αρχισάλε πουμαρό ταξίδι οντουλέ ντρομέστε τι σικλιόν πο μπουτ ι Ιεχωβάσκε ντα λέσκε σκοπόσκε. (Παρ. 4:18) Κα μπορίνενας επίσης τι αλλάνεν πουμαρί ζωή για τι τζουβντιόν αντικάς σαρ μανγκέλας βοβ. Ο Ιεχωβά να μπεκλεντίνελας πι λαόσταρ τι κερέλ σαρέ ανταλά αλλαγές γιεκ. Οκιά μπάνταρ, κερντάς τι αβέλ πάκι λέσκο λαός καζόμ νακχέλα ο βακίτι. Καζόμ ευτυχισμέ κα αβάς σαρέ κάνα κα μπορίνας τι κεράς ο γκι αμαρέ Ντεβλέσκο ι κάθε πραγμάσαρ σο κεράσα! Κάθε ντρομέστε χρειαζίντιβελα τι αβέν μπουτιά για τι ατσσόλ σε λατσσί κατάσταση. Κατά 1919, ο πράγματα σο αβιλέ για τι ετοιμάντιβελ ο «Άγιος Ντρομ» συνεχίντιλε για τι μπορίνεν ατζέ πο μπουτ τζενέ τι νασέν κατά Μπαρί Βαβυλώνα. w23.05 σ. 17 ¶15· σ. 19 ¶16

Ο Κυβερνών Σώμας σικλιαρντάς προσωπικά τους βοηθούς κο επιτροπές σο τθερέλα ο Κυβερνών Σώμας. Οντουλά βοηθοί τθερένα ακανά μπερεκέτι ευθύνες κι οργάνωση, ντα κερένα-λεν πιστά. Ο βοηθοί ισί λατσσές προετοιμασμέ για τι συνεχίνεν τι φροντίνεν ι Χριστόσκε μπρακέν. Κάνα ο τελευταία χρισμέ τζενέ κα τζαν κο ουρανός καζόμ κα τελειώνελ η μπαρί στεναχώρια, η πάκι λατρεία κα συνεχίντιβελ κανονικά ατθέ κι πφουβ. Επειδή ο Ιησούς Χριστός κα οδηγίνελ ι Ντεβλέσκε υπηρετόν, βον κα συνεχίνεν τι ντεν-λες λατρεία πιστά. Ισί μπαγιά ότι, οντουβά βακίτι, ο Γωγ του Μαγώγ, δηλαδή ο τθεμά σο κα γκιντίντιβεν σαρέ γιεκ, κα κερέν αμένγκε επίθεση. (Ιεζ. 38:18-20) Αλλά ανταγιά επίθεση να κα ατσσικιαρέλ μπουτ βακίτι, ντα να κα τθερέλ επιτυχία. Να κα κερέλ ι Ιεχωβάσκε λαός τι τσσιναβέλ τι υπηρετίνελ-λες. Σίγουρα ο Ιεχωβά κα σώνελ-λεν! Ο απόστολος Ιωάννης ντικχλάς εκχέ φαντασιάτε ο «μπαρό πλήθος» κατά γιαβερά μπρακέ ι Χριστόσκε. Βακέρντιλο κο Ιωάννης ότι ανταβά «μπαρό πλήθος» αβέλα «κατά μπαρί στεναχώρια». (Αποκ. 7:9, 14) Ισινάμ σίγουροι ότι ο Ιεχωβά κα σώνελ-λεν! w24.02 σ. 5, 6 ¶13, 14

Σο μπορίνασα τι κεράς για τι λας άγιος πνεύμας; Μπορίνασα τι προσευχίντιβας ανταλέσκε, τι σικλιαράς-αμέν κατά Λάφι ι Ντεβλέσκο ντα τι αβάς γιεκ λέσκε οργανωσιάσαρ, σο οδηγίντιβελα λέσκε πνευμάσταρ. Άμα κα κεράς-λες ανταβά, κα μπορίνας τι μπαριαράς «ο καρπός ι πνευμάσκο». (Γαλ. 5:22, 23) Ο Ντεβέλ ντέλα πο άγιος πνεύμας σάντε οντουλέντε σο ατσσικιαρένα πάκι πουμαρέ σκέψεις ντα πουμαρί ζωή. Να κα συνεχίνελ τι ντελ-αμέν πο άγιος πνεύμας άμα συνεχίνασα τι σκεφτίνας μαγαριμέ πράγματα ντα σοράν κεράσα-λεν αμαρέ ζωγιάτε. (1 Θεσ. 4:7, 8) Επίσης, για τι συνεχίνας τι λας άγιος πνεύμας, δεν πρέπει τι “ντικχάς ο προφητείες σαρ κάτι άχρηστος”. (1 Θεσ. 5:20) Ανταλέ εδαφιόστε, ο «προφητείες» μανγκένα τι βακερέν ο λάφια σο ντέλα-αμέν ο Ιεχωβά αντράλ πι πνευμάσταρ, σαρ ισί για παράδειγμας ο προφητείες σο τθερένα τι κερέν με το ντιβές ι Ιεχωβάσκο ντα ότι ισινάμ μπουτ πασέ κο τέλος. Να σκεφτίνασα ότι ο ντιβές ι Ιεχωβάσκο, δηλαδή ο Αρμαγεδδώνας, να κα αβέλ καζόμ αμέν ισινάμ τζουβντέ. Οκιά μπάνταρ, τθεράσα-λες συνέχεια αμαρέ γκοντιάτε κάνα ατσσικιαράσα αμαρί ζωή πάκι ντα κάνα ισινάμ απασχολημέ κο «πράγματα σο σικαβένα αφοσίωση κο Ντεβέλ».​—2 Πέτρ. 3:11, 12. w23.06 σ. 12 ¶13, 14

Σαρ Χριστιανοί, σο πρέπει τι κεράς άμα αμαρό κινητός ή τάμπλετ νικαβέλα αμένγκε εκ λουμνικανί φωτογραφία; Πρέπει τι τσσιναβάς αμέσως τι ντικχάς-λα. Κα αβέλ αμένγκε πο εύκολος τι κεράς-λες ανταβά άμα κα τθεράς αμαρέ γκοντιάτε ότι ο πο σημαντικός πράγμας σο τθεράσα ισί αμαρί φιλία ι Ιεχωβάσαρ. Ατζέ-ντα φωτογραφίες σο ο πο μπουτ τζενέ αμντίνενα ότι νανέ λουμνικανέ μπορίνενα τι κερέν εκχέ τζενές τι σκεφτίνελ λουμνικανέ πράγματα. Σόσκε πρέπει τι νασάς λένταρ; Επειδή να μανγκάσα τι κεράς ούτε εκ χουρντό βήμας σο κα γκερέλ-αμέν κο λουμνιπέ αντρέ αμαρέ γκίστε. (Ματθ. 5:28, 29) Εκ πρεσβύτερος κι Ταϊλάνδη, ο Ντέιβιντ, βακερέλα: «Σκεφτίναβα: “Παρόλο σο ο φωτογραφίες νανέ λουμνικανέ, κα κεράβ ι Ιεχωβάσκο γκι άμα κα συνεχίναβ τι ντικχάβ-λεν;” Ανταγιά σκέψη βοηθίνελα-μαν τι κεράβ πράγματα γκοντιάσαρ». Άμα τθεράσα ι σωστή νταρ κατά Ιεχωβά για μα τι στεναχωρίνας-λες, ανταβά κα βοηθίνελ-αμέν τι κεράς πράγματα γκοντιάσαρ. “Για τι αρχίνας τι τθεράς σοφία”, πρέπει τι νταράς κατά Ιεχωβά. Ανταβά ισί ο θεμέλιος της σοφίας. w23.06 σ. 23 ¶12, 13

Ο “αντραϊνέ δωμάτια” μπέκιμ μανγκένα τι σικαβέν αμαρέ κχανγκιριά. Κι μπαρί στεναχώρια, κα αρακχάς ο αρακχαϊπέ σο ντέλα πο λάφι ο Ιεχωβά άμα κα ατσσάς πασέ αμαρέ πφραλέντε ντα πφενίντε. Οτθάρ, πρέπει ακανά τι μαράς-αμέν, όχι σάντε τι νταϊντίνας αμαρέ πφραλέν ντα πφενίν, αλλά τι μανγκάς-λεν ντα. Μπέκιμ άμα κα κεράς-λες ανταβά, κα σώντιβας! «Ο μπαρό ντιβές ι Ιεχωβάσκο» κα ανέλ στεναχώρια κο τζενέ. (Σοφ. 1:14, 15) Ο λαός ι Ιεχωβάσκο-ντα κα νακχέλ δυσκολίες. Αλλά άμα προετοιμάντιβασα ακανά, κα μπορίνας τι ατσσάς ήρεμοι ντα κα βοηθίνας γιαβερέν-ντα. Κα κεράς υπομονή σο-ντα δυσκολία τι νακχάς. Κάνα αμαρέ πφραλά τσσίντενα μπουτ, κα κεράς ο πο λατσσό για τι βοηθίνας-λεν, καζόμ πφαμπάσα λένγκε ντα ντάσα-λεν ο αναγκαία. Επίσης, κα ατσσάς πασέ αμαρέ πφραλέντε ντα πφενίντε, σο σικλιλάμ τι σικαβάς λένγκε αγάπη. Αζομάν, ο Ιεχωβά κα ντελ-αμέν ζωή για πάντα εκχέ ντουνιάστε σο σαρέ ο καταστροφές ντα ο στεναχώριες κα μπιστάρντιβεν.​—Ησ. 65:17. w23.07 σ. 7 ¶16, 17

Ο λάφι ι Ντεβλέσκο μπουτ φαρ βακερέλα ότι μερικά πιστά τζενέ ισινέ ζουρανέ. Αλλά ατζέ-ντα ο πο ζουρανέ λένταρ να νιωθίνενας πάντα ζουρανέ. Για παράδειγμας, ο βασιλιάς Δαβίδ μπάζιμα νιωθίνελας ότι ισινέ «ζουρανό σαρ εκ βες», ενώ γιαβερά φαρ “νταρέλας”. (Ψαλμ. 30:7) Παρόλο σο ο Σαμψών ισινέ μπουτ ζουρανό κάνα ο Ντεβέλ ντέλας-λες πο πνεύμας, αγαβέλας ότι, άμα να κα ντέλας-λες ο Ντεβέλ πι ζορ, “κα αβέλας μπίζουρανο σαρ σαρέ ο γιαβερά τζενέ”. (Κριτ. 14:5, 6· 16:17) Ανταλά πιστά μουρσά ισινέ ζουρανέ επειδή ο Ιεχωβά ντέλας-λεν ζορ. Ο απόστολος Παύλος αγαβέλας ότι τθερέλας βοβ-ντα ανάγκη ι ζορ ι Ιεχωβάσκι. (2 Κορ. 12:9, 10) Νακχέλας προβλήματα πι υγειάσαρ. (Γαλ. 4:13, 14) Επίσης μπάζιμα δυσκολίντιβελας τι κερέλ ο σωστός. (Ρωμ. 7:18, 19) Ντα γιαβερά φαρ, ανησυχίνελας ντα νταρέλας σο μπέκιμ τι αβέλας λέσκε. (2 Κορ. 1:8, 9) Αλλά κάνα ισινέ μπίζουρανο, αβέλας ζουρανό. Σαρ; Ο Ιεχωβά ντέλας-λες ι ζορ σο χρειαζίντιβελας. Κερέλας-λες ζουρανό. w23.10 σ. 12 ¶1, 2

Άμα μπάζιμα νιωθίνασα ότι να τθεράσα αξία, μπορίνασα τι ντας-αμέν γκοντί ότι ο ίδιος ο Ιεχωβά ταρτιντάς-αμέν πασέ πέστε. (Ιωάν. 6:44) Βοβ ντικχέλα αμέντε ο λατσσιπέ σο μπέκιμ να ντικχάσα αμέν αμαρέ νεαυτόστε ντα τζανέλα αμαρό γκι. (2 Χρον. 6:30) Άρα, μπορίνασα τι πακιάς-Λες κάνα βακερέλα ότι ισινάμ πολύτιμοι. (1 Ιωάν. 3:19, 20) Πριν τι σικλιάς ι αλήθεια, μερικοί αμένταρ κεράας πράγματα σο μπορεί ατζέκ ατζέκ τι πφερένα-αμέν τύψεις. (1 Πέτρ. 4:3) Ατζέ-ντα πιστοί Χριστιανοί ουσαρένα με το αδυναμίες σο τθερένα. Μήπως τουμαρό γκι καταδικάνελα-τουμέν; Άμα βα, κα ντελ-τουμέν κουράγιος τι τζανέν ότι ατζέ-ντα πιστοί υπηρέτες ι Ιεχωβάσκε νιωθίνενας τύψεις. Για παράδειγμας, ο απόστολος Παύλος νιωθίνελας δυστυχισμέ κάνα σκεφτίνελας πο ατέλειες. (Ρωμ. 7:24) Βέβαια, ο Παύλος μετανιωσάλοας πι αμαρτιένγκε ντα μπολντιλόας. Αλλά βακερέλας ότι ισινέ «ο πο χουρντό κατά απόστολοι» ντα «ο πο μπαρό» αμαρτωλός.​—1 Κορ. 15:9· 1 Τιμ. 1:15. w24.03 σ. 27 ¶5, 6

Κάτι σο σικλιάσα κατά μπέτι απόφαση σο λιντάς ο βασιλιάς Ιωάς ισί ότι πρέπει τι τραμπίνας αμαλέν σο κα βοηθίνεν-αμέν​—αμαλέν σο μανγκένα ι Ιεχωβάς ντα μανγκένα τι ανέν λέσκε χαρά. Να χρειαζίντιβελα τι κεράς παρέα σάντε τζενέντζαρ σο ισί αμαρέ ηλικιάτε. Ντεν-τουμέν γκοντί ότι ο Ιωάς ισινέ μπουτ πο τερνό κατά Ιωδαέ, πι αμαλέσταρ. Κάνα τραμπίνενα αμαλέν, σκεφτίνεν: “Βοηθίνενα-μαν τι κεράβ πο ζουρανί μι πίστη κο Ιεχωβά; Τσσίντενα-μαν μο αμαλά τι τζουβντιάβ αντικάς σαρ βακερένα ο κανόνες ι Ντεβλέσκε; Κερένα λάφι ι Ιεχωβάσκε ντα για το σουκάρ αλήθειες λέσκε; Σεβάνενα ο κανόνες ι Ντεβλέσκε; Βακερένα μάνγκε σάντε οντουβά σο μανγκάβα τι ασουνάβ ή τθερένα ο θάρρος τι διορθώνεν-μαν άμα κα κεράβ εκ λάθος;” (Παρ. 27:5, 6, 17) Για τι βακεράς ο πράγματα ξεκάθαρα, άμα τουμαρέ αμαλά να μανγκένα ι Ιεχωβάς, να τθερένα-λεν ανάγκη. Αλλά άμα τθερένα αμαλέν σο μανγκένα ι Ιεχωβάς, ατσσόν πασέ λέντε​—κα βοηθίνεν-τουμέν!​—Παρ. 13:20. w23.09 σ. 9, 10 ¶6, 7

Ο άλφα ισί ο πρώτος γράμμας κι μπαλαμανί αλφαβήτα ντα ο ωμέγα ισί ο τελευταίος. Κάνα βακερέλα ο λάφι «ο Άλφα ντα ο Ωμέγα», ο Ιεχωβά μανγκέλα τι σικαβέλ ότι, κάνα αρχίνελα κάτι, μπιτισκιαρέλα-λες με επιτυχία. Κάνα ο Ιεχωβά κερντάς τον Αδάμ ντα την Εύα, βακερντάς λένγκε: “Τι κερέν μπουτέ τσσαβέν ντα τι αβγατίντιβεν, τι πφερέν ι πφουβ ντα τι τθερέν-λα τουμένγκε”». (Γέν. 1:28) Οντιά στιγμή, ο Ιεχωβά ισινέ σαρ τι βακερντάς: «Άλφα». Βακερντάς ξεκάθαρα πο σκοπός: Κα αβέλας ο βακίτι σο ο τέλεια τσσαβέ του Αδάμ ντα της Εύας, σο κα ντένας καν, κα πφερένας ι πφουβ ντα κα κερένας-λα παράδεισος. Κάνα κα αβέλ-πες ανταβά, ο Ιεχωβά κα βακερέλ, σαρ τι βακεράας: «Ωμέγα». Κάνα ο Ιεχωβά μπιτισκιαρντάς ι δημιουργία “ι ουρανόσκι ντα ι πφουβιάκι ντα σαρέ ι πραγματένγκι σο υπαρχίντιβενα λέντε”, ο Ιεχωβά βακερντάς κάτι για τι σικαβέλ ότι λέσκο σκοπός σίγουρα κα αβέλας μπαγιά. Ντινάς πο λάφι ότι σίγουρα κα κερέλας τι νικιόλ μπαγιά ο σκοπός σο τθερέλας ι τζενένγκε ντα ι πφουβιάκε. Λέσκο σκοπός κα νικιόλ μπαγιά κάνα κα τελειώνελ ο έβδομος ντιβές.​—Γέν. 2:1-3. w23.11 σ. 5 ¶13, 14

Ανταβά δύσκολος ταξίδι κατά Βαβυλώνα μέχρι κο Ισραήλ κα μπορίνελας τι ατσσικιαρέλ περίπου σταρ μασεκά. Όμως ο Ιεχωβά ντινάς πο λάφι ότι, σο-ντα εμπόδια κα αβένας ανγκλά-λέντε καζόμ κα βουρτίνενας, Βοβ κα νασκιαρέλας-λεν. Ο πιστοί Ιουδαίοι τζανένας ότι ο λατσσίματα σο κα τθερένας άμα κα βουρτίνενας κο Ισραήλ κα αβένας μπουτ πο μπαρέ σαρέ κατά θυσίες σο κα κερένας. Η πο μπαρί ευλογία τθερέλας τι κερέλ με τη λατρεία λένγκι. Να υπαρχίντιβελας ναός ι Ιεχωβάσκο κι Βαβυλώνα. Να υπαρχίντιβελας θυσιαστήριος σο ο Ισραηλίτες κα μπορίνενας τι κερέν ο θυσίες σο βακερέλας ο Μωσαϊκός Νόμος ούτε υπαρχίντιβενας οργανωμέ ιερείς για τι κερέν οντουλά θυσίες. Επίσης, ο λαός ι Ιεχωβάσκο ισινέ μπουτ πο χάνικ ανγκλάλ οντουλέντε σο πακιάνας ψεύτικε ντεβλέντε, σο να σεβάνενας ι Ιεχωβάς ντα λέσκε κανόνες. Άρα, ο χιλιάδες Ιουδαίοι σο σεβάνενας μπουτ ι Ιεχωβάς μπεσένας σαρ σαρ τι βουρτίνεν πουμαρέ τθεμέστε, σο οτθέ κα μπορίνενας τι ανέν πάλι ι πάκι λατρεία. w23.05 σ. 14, 15 ¶3, 4

Χρειαζίντιβασα ι βοήθεια σο ντέλα-αμέν ο άγιος πνεύμας ι Ντεβλέσκο για τι συνεχίνας τι συμπεριφερίντιβας «σαρ τσσαβέ σο ισί κο φως». Σόσκε; Επειδή νανέ εύκολος τι ατσσάς πάκι ανταλέ ντουνιάστε σο ισί αντρέ κο λουμνιπέ. (1 Θεσ. 4:3-5, 7, 8) Ο άγιος πνεύμας μπορίνελα τι βοηθίνελ-αμέν μα τι σκεφτίνας σαρ σκεφτίνενα ο τζενέ κο ντουνιάς, σο να ντικχένα ο πράγματα ι τροπόσαρ σο ντικχέλα-λεν ο Ιεχωβά. Ο άγιος πνεύμας κα βοηθίνελ-αμέν επίσης τι κεράς “σο-ντα πράγμας ισί λατσσό ντα δίκαιος”. (Εφεσ. 5:9) Εκ τρόπος σο μπορίνασα τι λας άγιος πνεύμας ισί τι μανγκάς-λες αντράλ κατά προσευχή. Ο Ιησούς βακερντάς ότι ο Ιεχωβά «κα ντελ άγιος πνεύμας οντουλέντε σο μανγκένα-λες λέσταρ». (Λουκ. 11:13) Λάσα άγιος πνεύμας εμ κάνα ντάσα λατρεία κο Ιεχωβά γιεκ αμαρέ πφραλέντζαρ κο συναθροίσεις. (Εφεσ. 5:19, 20) Ο άγιος πνεύμας ι Ντεβλέσκο κα επηρεάνελ-αμέν λατσσέ τροπόσαρ, ντα ανταβά κα βοηθίνελ-αμέν τι τζουβντιάς με τρόπος σο κερέλα ι Ντεβλέσκο γκι. w24.03 σ. 23, 24 ¶13-15

Χρειαζίντιβενα πο μπουτ υπομονή; Τι προσευχίντιβεν ανταλέσκε. Η υπομονή ισί αντρέ κο καρπός κι πνευμάσκο. (Γαλ. 5:22, 23) Οτθάρ, μπορίνασα τι προσευχίντιβας για άγιος πνεύμας ντα τι μανγκάς κατά Ιεχωβά τι βοηθίνελ-αμέν τι σικλιάς τι τθεράς ανταβά καρπός. Άμα νακχάσα εκ πρόβλημας σο δοκιμάνελα αμαρί υπομονή, “συνεχίνασα τι μανγκάς” τι βοηθίνελ-αμέν ο άγιος πνεύμας τι κεράς υπομονή. (Λουκ. 11:13) Μπορίνασα επίσης τι μανγκάς κατά Ιεχωβά τι βοηθίνελ-αμέν τι ντικχάς ο πράγματα αντικάς σαρ ντικχέλα-λεν βοβ. Σοράν, χρειαζίντιβελα τι κεράς ο πο λατσσό σο μπορίνασα για τι κεράς υπομονή κάθε ντιβές. Καζόμ πο μπουτ προσευχίντιβασα για υπομονή ντα μαράσα-αμέν τι κεράς υπομονή, αζόμ πο μπουτ κα ασταρέλ ρίζες ανταγιά ιδιότητα αντρέ αμαρέ γκίστε ντα κα αβέλ εκ με το χαρακτήρας αμαρό. Επίσης κα βοηθίντιβας άμα σκεφτίνασα λατσσές παραδείγματα τζενένγκε κατά Γραφή. Η Γραφή τθερέλα μπουτ παραδείγματα τζενένγκε σο σικαβένας υπομονή. Άμα σκεφτίνασα λατσσές ανταλά ιστορίες, σικλιάσα καλέ τροπόντζαρ μπορίνασα τι σικαβάς υπομονή. w23.08 σ. 22, 23 ¶10, 11

Ο Ιησούς ντινάς κο απόστολος Πέτρος ι σιγουριά ότι ο Ιεχωβά κα στηρίνελας-λες. Ο αναστημέ Ιησούς κερντάς ατζέκ εκ φαρ ο ίδιος θαύμας ντα κερντάς τι ασταρέν πάλι ματσσέν ο Πέτρος ντα ο απόστολοι σο ισινέ λέσαρ. (Ιωάν. 21:4-6) Ανταβά θαύμας ντινάς κο Πέτρος ι σιγουριά ότι ο Ιεχωβά μπορίνελας τι ντελ-λες πάντα ο αναγκαία. Μπέκιμ ο απόστολος αντάς πι γκοντιάτε ο λάφια ι Ιησούσκε ότι ο Ιεχωβά κα ντελ ο αναγκαία κο τζενέ σο “συνεχίνενα τι μανγκέν πρώτα ι Βασιλεία”. (Ματθ. 6:33) Σαρέ ανταλά βοηθιντέ ι Πετρός τι τσσουβέλ πρώτα πι ζωγιάτε ο έργος ντα όχι ι μπουτί σο τθερέλας τι ασταρέλ ματσσέν. Ντινάς μαρτυρία μπίνταρανες κι Πεντηκοστή κο 33 Κ.Χ., ντα βοηθιντάς χιλιάδες τζενέν τι δεχτίνεν ο λατσσέ αμπέρια. (Πράξ. 2:14, 37-41) Σοράν, βοηθιντάς ι Σαμαρειτέν ντα ι τζενέν κατά γιαβερά τθεμά τι δεχτίνεν ι Χριστός. (Πράξ. 8:14-17· 10:44-48) Ο Ιεχωβά σίγουρα χρησιμοποιηντάς μπουτ ι Πετρός για τι ανέλ κι κχανγκιρί σαβέ τι μανγκές τζενέν. w23.09 σ. 20 ¶1· σ. 23 ¶11

Περίπου ντούι μπρεσά σοράν κατά καταστροφή της Ιερουσαλήμ κατά Βαβυλώνιοι, ο βασιλιάς ι Βαβυλωνάκο, ο Ναβουχοδονόσορ, νταρασάλο επειδή ντικχλάς εκ σουνό με εκ μπουτ μπαρό άγαλμας. Βακερντάς ότι κα μουνταρέλας σαρέ ι σοφόν, εμ τον Δανιήλ, άμα να κα μπορίνενας τι βακερέν λέσκε σο ντικχλάας πι σουνέστε ντα τι εξηγίνεν ανταβά σουνό. (Δαν. 2:3-5) Ο Δανιήλ έπρεπε τι σιγκιαρέλ. Αλλιώς, κα μερένας μπουτ τζενέ. Ο Δανιήλ «γκιλό ντα μανγκλάς κατά βασιλιάς χρόνος για τι βακερέλ λέσκε ι εξήγηση». (Δαν. 2:16) Ανταβά μανγκέλας θάρρος ντα πίστη. Η Γραφή να βακερέλα ότι, ανγκλέ, ο Δανιήλ ντινάας πάλι εξήγηση σουνέντε. Μανγκλάς πι αμαλένταρ «τι προσευχίντιβεν τι τζιτζίνελ λένγκε ο Ντεβέλ σο ισί κο ουρανός για τι μουτθαβέλ λένγκε ο μυστικός». (Δαν. 2:18) Ο Ιεχωβά απαντιντάς οντουλέ προσευχιέντε. Ι Ντεβλέσκε βοηθειάσαρ, ο Δανιήλ εξηγιντάς ο σουνό του Ναβουχοδονόσορα. Η ζωή του Δανιήλ ντα λέσκε αμαλένγκι σωσάλι. w23.08 σ. 2 ¶4

Τι σκεφτίνεν σαρ βοηθίνελα-τουμέν η υπομονή. Κάνα σικαβάσα υπομονή, ισινάμ πο ευτυχισμέ ντα πο ήρεμοι. Οτθάρ, η υπομονή μπορίνελα τι κερέλ λατσσιπέ αμαρέ γκοντιάτε ντα αμαρέ σωμάστε. Κάνα κεράσα υπομονή ι γιαβερέντζαρ, τζάσα-λεν πο λατσσές λέντζαρ. Αμαρί κχανγκιρί ισί πο ενωμέ. Άμα κάποιος κερέλα κάτι για τι ενοχλίνελ-αμέν αλλά αμέν να νευριάνασα εύκολα, να κα μουκχάς ο πρόβλημας τι αβέλ ατζέ πο μπαρό. (Ψαλμ. 37:8, υποσ.· Παρ. 14:29) Αλλά ο πο σημαντικός ισί ότι μοιάζασα αμαρέ Νταντέστε σο ισί κο ουρανός ντα πλησιάνασα-λες ατζέ πο μπουτ. Η υπομονή ισί μπαγιά εκ σουκάρ ιδιότητα σο βοηθίνελα-αμέν σαριλέν! Παρόλο σο μπάζιμα νανέ πάντα εύκολος τι κεράς υπομονή, ι Ιεχωβάσκε βοηθειάσαρ, μπορίνασα τι συνεχίνας τι σικλιάς τι τθεράς ανταγιά ιδιότητα. Καζόμ μπεκλεντίνασα με υπομονή ι νεβέ ντουνιάσκε, μπορίνασα τι αβάς σίγουροι ότι «η γιακχ ι Ιεχωβάσκι ντικχέλα οντουλέν σο νταρένα λέσταρ, οντουλέν σο μπεκλεντίνενα λέσκι αφοσιωμέ αγάπη». (Ψαλμ. 33:18) Οτθάρ, τι αβάς σαρέ αποφασισμέ τι συνεχίνας τι ιριάς ι υπομονή. w23.08 σ. 22 ¶7· σ. 25 ¶16, 17

Ο Ιάκωβος βακερντάς ότι εκ τζενό μπέκιμ τι βακερέλα ότι τθερέλα πίστη, αλλά κατέ ισί ο πράγματα σο κερέλα; (Ιακ. 2:1-5, 9) Επίσης, ο Ιάκωβος κερντάς λάφι εκχέ τζενέσκε σο ντικχλάς ότι “εκ πφραλ ή εκ πφεν να τθερέλα τι ιριαβέλ-πες ή να τθερέλα χαμπέ” αλλά να βοηθιντάς-λεν. Ατζέ-ντα άμα ανταβά τζενό βακερέλας ότι τθερέλας πίστη, να σικαντάς-λα ι πραγματέντζαρ σο κερντάς. Άρα λέσκι πίστη ισινέ άχρηστη. (Ιακ. 2: 14-16)Ο Ιάκωβος βακερντάς ότι η Ραάβ ισινέ εκ μπουτ λατσσό παράδειγμας σο σικαντάς ότι τθερέλας πίστη οντουλέντζαρ σο κερντάς. (Ιακ. 2:25, 26) Η Ραάβ ασουντάας ι Ιεχωβάσκε ντα αγαντάας ότι βοβ υποστηρίνελας ι Ισραηλιτέν. (Ιησ. Ναυή 2:9-11) Σικαντάς πι πίστη οντουλέντζαρ σο κερντάς​—αρακχαντάς ντουέ κατασκοπόν σο ισινέ Ισραηλίτες κάνα λένγκι ζωή ισινέ σε κίνδυνος. Ντα αντικάς, ανταγιά ατελής τζουβέλ σο να ισινέ Ισραηλίτισσα βακέρντιλι δίκαιη, ακριβώς σαρ ο Αβραάμ. Λάκο παράδειγμας σικαβέλα καζόμ σημαντικός ισί τι αγαντίντιβελ η πίστη κατά πράγματα σο κερέλα εκ τζενό. w23.12 σ. 5, 6 ¶12, 13

Σαρ Χριστιανοί, να ερεσέλα-αμέν τι αγαβάς σάντε ο βασικά πράγματα σο σικλιαρέλα η Γραφή. Ι βοηθειάσαρ σο ντέλα-αμέν ο άγιος πνεύμας ι Ντεβλέσκο, μανγκάσα τι σικλιάς «ατζέ-ντα ο βαθιά πράγματα ι Ντεβλέσκε». (1 Κορ. 2:9, 10) Κάνα σικλιαρένα-τουμέν κατά Γραφή, κα μπορίνενας τι ασχολίντιβεν εκχέ θεμάσαρ σο κα βοηθίνελ-τουμέν τι τζαν πο πασέ κο Ιεχωβά. Για παράδειγμας, κα μπορίνενας τι ρόντεν σαρ σικαβέλας πι αγάπη πι υπηρετόντε κο πουρανέ μπρεσά, ντα σαρ ανταβά σικαβέλα ότι μανγκέλα τουμέν-ντα. Κα μπορίνενας τι σικλιόν σαρ ο Ιεχωβά μανγκέλας τι ντεν-λες λατρεία ο Ισραηλίτες, ντα τι σκεφτίνεν σαρ μανγκέλα τι ντας-λες λατρεία αμέν αντιβές. Ή μπέκιμ κα μπορίνενας τι σικλιόν πο λατσσές ο προφητείες σο κερντάς ο Ιησούς τι νικιόν μπαγιά καζόμ κερέλας πο έργος ατθέ κι πφουβ. Μπορίνενα τι αρακχέν μπουτ χαρά καζόμ σικλιαρένα-τουμέν ανταλέ θεματένταρ αντράλ κατά Ευρετήριο Εκδόσεων Σκοπιάς ή κατά Οδηγός Έρευνας για τους Μάρτυρες του Ιεχωβά. Κάνα σικλιαρένα-τουμέν κατά αχόρτ πράγματα ι Γραφιάκε μπορίνενα τι μπαριαρέν τουμαρί πίστη ντα “κα μπορίνεν τι σικλιόν ι Ντεβλέσκε”.​—Παρ. 2:4, 5. w23.10 σ. 18, 19 ¶3-5

Ο πουρανό μπαλαμανό λάφι ἐκτενή σο χρησιμοποιηντάς ο απόστολος Πέτρος, μανγκέλα τι βακερέλ «τεντωμέ». Αμαρέ τσσιμπάτε, ανταβά λάφι μεταφράντιβελα «μπουτ». Ο τελευταίος μέρος ι εδαφιόσκο βακερέλα αμένγκε καβά κα αβέλ ο αποτέλεσμας άμα κα μανγκάς μπουτ ι γιαβερέν. Η αγάπη κα ιτσσαρέλ ο αμαρτίες αμαρέ πφραλένγκε. Ανέν τουμαρέ γκοντιάτε ακαβά: Ασταράσα ι αγάπη αμαρέ ντουέ βαστέντζαρ, σαρ τι αβέλας εκ τραπεζομάντιλος σο τθερέλα λάστιχος, ντα τεντώνασα-λα καζόμ πο μπουτ αβέλα-πες μέχρι τι ιτσσαρέλ, όχι εκ, όχι ντούι, αλλά «μπουτ αμαρτίες». Ο λάφι «ιτσσαρέλα» ισί εκ γιαβέρ τρόπος για τι βακεράς ότι η αγάπη «συγχωρίνελα». Σαρ εκ τραπεζομάντιλος μπορίνελα τι ιτσσαρέλ εκ γρατζουνιά, αντικάς η αγάπη-ντα μπορίνελα τι ιτσσαρέλ ο αδυναμίες ντα ο ατέλειες ι γιαβερένγκε. Αμαρί αγάπη ι γιαβερένγκε πρέπει τι αβέλ αζόμ ζουρανί σο κα τσσίντελ-αμέν τι συγχωρίνας ο ατέλειες αμαρέ πφραλένγκε​—ατζέ-ντα άμα ανταβά ισί μπουτ δύσκολος μπάζιμα. (Κολ. 3:13) Κάνα τελικά συγχωρίνασα ι γιαβερέν, σικαβάσα ότι αμαρί αγάπη ισί ζουρανί ντα ότι μανγκάσα τι κεράς ι Ιεχωβάσκο γκι. w23.11 σ. 10-12 ¶13-15

Κάνα ισινέ 26 μπρεσένγκο, ο βασιλιάς Ιωσίας αρχισάλο τι λατσσαρέλ ο ναός. Καζόμ αβέλας-πες ανταγιά μπουτί, αρακχλέ «ο βιβλίος σο τθερέλας αντρέ ο Νόμος ι Ιεχωβάσκο σο ντιντιλόας αντράλ κατά Μωυσής». Κάνα ο βασιλιάς ασουντάς ο λάφια οντουλέ βιβλιόσκε, κερντάς αμέσως αλλαγές για τι ντελ καν κο λάφια σο ισινέ γραμμέ οτθέ. (2 Χρον. 34:14, 19-21) Κα μανγκένας τι διαβάνεν μπουτ φαρ ι Γραφή; Άμα προσπαθίνενα ήδη τι κερέν-λες ανταβά, σαρ τζάνα-λεν; Σημειώνενα εδάφια σο κα μπορίνενας τι βοηθίνεν-τουμέν; Κάνα ο Ιωσίας ισινέ περίπου 39 μπρεσένγκο, κερντάς εκ λάθος σο γκερντάς-λες κο μεριπέ. Αντίς τι πουτσέλ ι Ιεχωβάς σο τι κερέλ, ντινάς μπέσα πι νεαυτόστε. (2 Χρον. 35:20-25) Σο σικλιαρέλα-αμέν ανταβά; Καζόμ μπρεσένγκε-ντα τι αβάς ή καζόμ βακίτι-ντα τι κεράς μελέτη κατά Γραφή, πρέπει τι συνεχίνας τι ρόντας ι Ιεχωβάσκε. Ανταβά μανγκέλα τι βακερέλ ότι πρέπει τι προσευχίντιβας μπουτ φαρ για τι οδηγίνελ-αμέν ο Ιεχωβά, τι σικλιαράς-αμέν λέσκε Λαφίσταρ ντα τι ασουνάς ο συμβουλές κατά γκοντιαβέρ Χριστιανοί. Ανταβά κα βοηθίνελ-αμέν μα τι κεράς μπαρέ λάθη ντα τι αβάς ευτυχισμέ.​—Ιακ. 1:25. w23.09 σ. 12 ¶15, 16

Η Αγία Γραφή κερέλα λάφι μπουτέ λατσσέ τζουβλίνγκε σο μανγκένας ι Ιεχωβάς ντα υπηρετίνενας-λες. Βον “να νακχαβένας ο όρια κο συνήθειες” ντα ισινέ «πιστές σαρέ κο πράγματα». (1 Τιμ. 3:11) Επίσης, ο πφενιά μπορίνενα τι αρακχέν πουμαρέ κχανγκιριάτε παραδείγματα πφενίνγκε σο ισί ώριμες ντα τι σικλιόν λένταρ μπουτ πράγματα. Πφενιάλεν σο ισινέν τερνέ, τζανένα πφενίν σο ισί ώριμες ντα μπορίνενα τι μοιάζεν λέντε; Ντικχέν λένγκε σουκάρ ιδιότητες. Σοράν, σκεφτίνεν σαρ μπορίνενα τι σικαβέν-λεν τουμέν-ντα. Για τι αβέλ εκ τζενό ώριμος Χριστιανός ισί μπουτ σημαντική η ταπεινότητα. Άμα εκ τζουβέλ ισί ταπεινή, κα τθερέλ λατσσί σχέση ι Ιεχωβάσαρ ντα ι γιαβερέντζαρ. Για παράδειγμας, εκ τζουβέλ σο μανγκέλα ι Ιεχωβάς τραμπίνελα ταπεινά τι ακολουθίνελ οντουβά σο βακερέλα κι 1 Κορινθίους 11:3. Οτθέ ο Ιεχωβά εξηγίνελα κάστε ντινάς ι ευθύνη τι οδηγίνελ ι κχανγκιρί ντα ι φαμιλί. w23.12 σ. 18, 19 ¶3-5

Ο Ιεχωβά μπεκλεντίνελα κατά ρομ τι μανγκέλ πι ρομνιά ντα τι ανέλ λάκε ο αναγκαία, τι αβέλ λατσσό αμάλ λάσαρ ντα τι βοηθίνελ-λα τι ατσσικιαρέλ ζουρανί πι φιλία ι Ιεχωβάσαρ. Άμα κα τσσουβέν τουμαρί γκοντί τι κχελέλ, κα σικαβέν σεβασμός κο τζουβλιά ντα κα αβέν μπεσαλήδες, ανταλά κα βοηθίνεν-τουμέν άμα κα παντρίνεν. Κάνα κα παντρίνεν, μπέκιμ τι αβέν ντατ. Σο μπορίνενα τι σικλιόν κατά Ιεχωβά σο κα βοηθίνελ-τουμέν τι αβέν εκ λατσσό ντατ; Μπορίνενα τι σικλιόν μπουτ πράγματα. (Εφεσ. 6:4) Ο Ιεχωβά βακερέλας πι Τσσαβέσκε, ι Ιησούσκε, ότι μανγκέλας-λες ντα ότι βοβ κερέλας λέσκο γκι, χωρίς τι σακιντίνελ. (Ματθ. 3:17) Άμα κα αβέν ντατ, τι κερέν μπουτ φαρ τουμαρέ τσσαβέν τι αβέν σίγουρα ότι μανγκένα-λεν. Τι ισαρέν-λεν συχνά ι λατσσέ πραγματένγκε σο κερένα. Ο νταντά σο μοιάζενα κο Ιεχωβά βοηθίνενα πουμαρέ τσσαβέν τι αβέν ώριμα μουρσά ντα τζουβλιά. Μπορίνενα τι προετοιμάντιβεν από ακανά για τι αβέν εκ λατσσό ντατ, κάνα σικαβένα αγάπη κι φαμιλί ντα κι κχανγκιρί ντα κάνα φροντίνενα-λεν λατσσές. Ντα σικλιόν τι βακερέν λένγκε ότι μανγκένα-λεν ντα ότι ισί πολύτιμοι τουμένγκε.​—Ιωάν. 15:9. w23.12 σ. 28, 29 ¶17, 18

Παρόλο σο ισινάμ πιστοί υπηρέτες ι Ιεχωβάσκε, νακχάσα προβλήματα ντα νασφαλίματα σο νακχένα σαρέ ο τζενέ. Εκτός ανταλένταρ, μπορεί τι τζαν αμέντζαρ κόντρα ο τζενέ σο μισίνενα ι Ντεβλέσκε λαός. Παρόλο σο ο Ιεχωβά να σταματίνελα ανταλά προβλήματα, ντέλα πο λάφι τι βοηθίνελ-αμέν. (Ησ. 41:10) Λέσκε βοηθειάσαρ, μπορίνασα τι ατσσικιαράς αμαρί χαρά, τι λας λατσσέ αποφάσεις ντα τι ατσσάς αφοσιωμέ λέστε ατζέ-ντα κο δύσκολες καταστάσεις. Ο Ιεχωβά ντέλα πο λάφι τι ντελ-αμέν ι «ειρήνη ι Ντεβλέσκι», σαρ βακέρντιβελα κι Αγία Γραφή. (Φιλιπ. 4:6, 7) Ανταγιά ειρήνη ισί η ηρεμία σο νιωθίνασα αντρέ αμαρέ γκίστε ντα αμαρέ γκοντιάτε επειδή ισινάμ λατσσέ αμαλά ι Ιεχωβάσαρ. Ανταγιά ειρήνη “ισί πο οπρέ σαρέ οντουλένταρ σο αγαβάσα”. Ισί πο σουκάρ σαρέ οντουλένταρ σο μπορίνασα τι σκεφτίνας. Για παράδειγμας, κερντέν ποτές προσευχή κο Ιεχωβά αντράλ τουμαρέ γκίσταρ ντα σοράν σαστισάλεν επειδή νιωσάλεν μπαρί ηρεμία; Ανταβά αίσθημας ισί «η ειρήνη ι Ντεβλέσκι». w24.01 σ. 20 ¶2· σ. 21 ¶4

Η αγάπη ι Ντεβλέσκε τσσίντελα πιστέ τζενέν τι δοξάνεν λέσκο ναβ αντράλ πουμαρέ γκίσταρ. Ο βασιλιάς Δαβίδ αγαβέλας ότι κάνα δοξάνασα ι Ιεχωβάσκο ναβ, κι πραγματικότητα δοξάνασα ι ίδιε ι Ιεχωβάς. Κάνα ασουνάσα ι Ιεχωβάσκο ναβ, σκεφτίνασα σο χαρακτήρας τθερέλα ντα αβένα αμαρέ γκοντιάτε σαρέ λέσκε σουκάρ ιδιότητες ντα ο λατσσέ πράγματα σο κερέλα. Ο Δαβίδ μανγκέλας τι αγιάνελ ο ναβ πι Νταντέσκο ντα τι δοξάνελ-λες. Μανγκέλας τι κερέλ-λες ανταβά “σαρέ πι γκίσαρ”. Αντικάς ο Λευίτες-ντα, ντένας ο λατσσό παράδειγμας καζόμ δοξάνενας ι Ιεχωβάς. Βακερντέ με ταπεινότητα ότι ναστί αρακχένας λάφια για τι ντεν κο άγιος ναβ κι Ιεχωβάσκο σαρί ι δόξα σο αξίνελα. (Νεεμ. 9:5) Ισί σίγουρος ότι ασακέ ταπεινά λάφια σο βακερντέ ο Λευίτες αντράλ πουμαρέ γκίσταρ αντέ χαρά κο Ιεχωβά. w24.02 σ. 9 ¶6

Ι Ιεχωβάσκε να ισινέν άχρηστοι άμα να μπορισάλεν τι πετυχίνεν εκ στόχος σο να αβέλας-πες τι κερέν-λες. (2 Κορ. 8:12) Άμα κερντέν εκ φαρ παλάλ, σικλιόν κάτι ανταλέσταρ. Ντεν-τουμέν γκοντί σο πετυχιντέν ήδη. Η Γραφή βακερέλα ότι «ο Ντεβέλ νανέ άδικος για τι μπιστρέλ οντουλά σο κερντέν». (Εβρ. 6:10) Οτθάρ, μα μπιστρέν-λεν ούτε τουμέν. Τι σκεφτίνεν οντουλά σο κερντέν ήδη​—για παράδειγμας, ότι αβιλέν αμαλά ι Ιεχωβάσαρ, ότι αρχισάλεν τι κερέν λάφι λέσκε κο γιαβερά ή ότι μπολντιλέν. Σαρ κερντέν πρόοδος ντα πετυχιντέν πνευματικούς στόχους ανγκλέ, αντικάς-ντα μπορίνενα τι συνεχίνεν τι κερέν πρόοδος για τι πετυχίνεν ο στόχος σο τθερένα ακανά. Ι Ιεχωβάσκε βοηθειάσαρ, μπορίνενα τι πετυχίνεν τουμαρό στόχος. Καζόμ κερένα μπουτί συνέχεια για τι πετυχίνεν τουμαρό πνευματικός στόχος, μα μπιστρέν τι ντικχέν σαρ βοηθίνελα-τουμέν ντα ευλογίνελα-τουμέν ο Ιεχωβά καζόμ προσπαθίνενα τι ερεσέν κο στόχος. (2 Κορ. 4:7) Άμα να κα μουκχέν-τουμέν, κα λεν ατζέ πο μπαρέ ευλογίες.​—Γαλ. 6:9. w23.05 σ. 31 ¶16-18

Ο Ιεχωβά ρόντελα τρόπους για τι σικαβέλ πι λαόστε ότι μανγκέλα-λες ντα ότι κερέλα λέσκο γκι. Η Γραφή βακερέλα ντούι περιπτώσεις σο ο Ιεχωβά βακερντάς κο Ιησούς ότι μανγκέλα-λες ντα ότι κερέλα λέσκο γκι. (Ματθ. 3:17· 17:5) Κα μανγκένας τι ασουνέν ι Ιεχωβάς τι βακερέλ τουμένγκε ότι κερένα λέσκο γκι; Ο Ιεχωβά να κερέλα αμέντζαρ λάφι κατά ουρανός, αλλά κερέλα αμέντζαρ λάφι αντράλ κατά σελίδες λέσκε Λαφίσκε. Κάνα διαβάνασα ο λάφια σο βακερντάς ο Ιησούς μανγκιμάσαρ πι μαθητέντε, ισί σαρ τι μπορίναας τι ασουνάς ι Ιεχωβάς τι βακερέλ-λεν ανταλά αμένγκε. Ο Ιησούς μοιάζελας πι Νταντέστε. Οτθάρ, κάνα διαβάνασα ότι ο Ιησούς βακερντάς πι πιστέ μαθητένγκε ότι μανγκέλα-λεν, παρόλο σο ισινέ ατελείς, μπορίνασα τι σκεφτίνας ι Ιεχωβάς τι βακερέλ ανταλά λάφια αμένγκε. (Ιωάν. 15:9, 15) Άμα νακχάσα δοκιμασίες, ανταβά να μανγκέλα τι βακερέλ ότι τσσιναντάμ τι κεράς ι Ντεβλέσκο γκι. Οκιά μπάνταρ, ντένα-αμέν ευκαιρίες τι σικαβάς καζόμ μπουτ μανγκάσα ι Ντεβλές ντα καζόμ μπαρί μπέσα ντάσα λέστε.​—Ιακ. 1:12. w24.03 σ. 28 ¶10, 11