Νοέμβριος

Άμα τθερένα τσσαβέν, τι βοηθίνεν-λεν τι ετοιμάνεν απαντήσεις σο ισί λένγκε ηλικιάκε. Μπάζιμα, εκ μάθημας κερέλα λάφι σοβαρέ πραγματένγκε, σαρ ισί ο προβλήματα κο μπιαβ ή σαρ τι αβάς πάκι κο γιακχά κι Ντεβλέσκε. Ανταλέ μαθηματέντε-ντα, μάλλον κα υπαρχίντιβεν εκ ή ντούι παράγραφοι σο μπορίνελα τι απαντίνελ εκ τσσαβό. Επίσης, βοηθίνεν τουμαρέ τσσαβέν τι αγαβέν σόσκε μάλλον να κα ντιντιόλ-λεν η ευκαιρία τι απαντίνεν κάθε φαρ σο βάντενα πουμαρό βας. Άμα κα εξηγίνεν-λες λένγκε ανταβά, να κα στεναχωρίντιβεν άμα κα τραμπίντιβεν γιαβερά αντίς λένγκε. (1 Τιμ. 6:18) Σαρέ μπορίνασα τι ετοιμάνας απαντήσεις σο κερένα ι πίστη ι γιαβερένγκι πο ζουρανί, ντένα δόξα ι Ιεχωβάς ντα ζορ αμαρέ πφραλέν ντα πφενίν. (Παρ. 25:11) Παρόλο σο μπάζιμα μπέκιμ τι βακεράς εκ χουρντί ιστορία αμαρέ ζωγιάταρ, δεν πρέπει τι κεράς μπουτ λάφι αμαρέ νεαυτόσκε. (Παρ. 27:2· 2 Κορ. 10:18) Οκιά μπάνταρ, προσπαθίνασα τι ταρτίνας ι προσοχή κο Ιεχωβά, λέσκε Λαφίστε ντα λέσκε λαόστε.​—Αποκ. 4:11. w23.04 σ. 24, 25 ¶17, 18

Η αγάπη ισί μπουτ σημαντική για τι ατσσάς τζανγκαντέ ντα γκοντιαβέρ. (Ματθ. 22:37-39) Η αγάπη ι Ντεβλέσκε βοηθίνελα-αμέν τι νταϊντίνας κο έργος σο-ντα προβλήματα τι ανέλ αμένγκε ανταβά. (2 Τιμ. 1:7, 8) Επειδή μανγκάσα ατζέ-ντα οντουλέν σο να υπηρετίνενα ι Ιεχωβάς, συνεχίνασα τι βακεράς ο λατσσέ αμπέρια, κάνα ντάσα μαρτυρία ατζέ-ντα κατά τηλέφωνος ντα κατά επιστολές. Να χασαράσα αμαρί ελπίδα ότι εκ ντιβές ο τζενέ κα αλλάνεν ντα κα αρχίνεν τι κερέν ο σωστός. (Ιεζ. 18:27, 28) Εκτός κατά αγάπη σο τθεράσα ι τζενένγκε, τθεράσα αγάπη αμαρέ πφραλένγκε-ντα. Σικαβάσα ασακί αγάπη κάνα “ενθαρρύνασα ο εκ ι γιαβερές ντα ντάσα ζορ ο εκ ι γιαβερές”. (1 Θεσ. 5:11) Σαρ ο στρατιώτες σο κερένα τζένγκι πασ’ πασέ, αντικάς αμέν-ντα ενθαρρύνασα ο εκ ι γιαβερές. Να κα πληγώναας επίτηδες αμαρέ πφραλέν ντα πφενίν ούτε κα κεράας λένγκε κακός άμα βον κα κερένας αμένγκε κακός. (1 Θεσ. 5:13, 15) Σικαβάσα επίσης αμαρί αγάπη κάνα σεβάνασα ι πφραλέν σο οδηγίνενα-αμέν κι κχανγκιρί.​—1 Θεσ. 5:12. w23.06 σ. 10 ¶6· σ. 11 ¶10, 11

Εκ τρόπος σο μπορίνασα τι μπαριαράς αμαρί πίστη ισί τι σκεφτίνας λατσσές ο λύτρος. Ο λύτρος ντέλα ι σιγουριά ότι ο υποσχέσεις ι Ντεβλέσκε κα νικιόν μπαγιά. Άμα σκεφτίνασα προσεκτικά σόσκε ντιντιλό ο λύτρος ντα καζόμ μπαρί ισινέ ανταγιά θυσία, κα μπαριαράς αμαρί πίστη ότι, η υπόσχεση ι Ιεχωβάσκι τι τζουβντιάς για πάντα εκχέ πο λατσσέ ντουνιάστε, κα νικιόλ σίγουρα μπαγιά. Σόσκε μπορίνασα τι βακεράς-λες ανταβά; Σο έπρεπε τι αβέλ-πες για τι ντιντιόλ ο λύτρος; Ο Ιεχωβά μπουτσσαντάς κατά ουρανός πι αγαπημέ πρώτε Τσσαβές, οντουλές σο ισινέ πο πασέ λέσαρ, για τι μπιάντιβελ σαρ τέλειος τζενό. Καζόμ ισινέ κι πφουβ, ο Ιησούς νακχαντάς σαβέ τι μανγκές δυσκολίες. Σοράν, τσσιντιντάς ντουκχ ντα μουλό μπέτι τροπόσαρ. Σο μπαρί θυσία κερντάς ο Ιεχωβά! Αμαρό λατσσό Ντεβέλ να κα μουκχέλας ποτές τι τσσίντελ μπουτ λέσκο Τσσαβό ντα τι μερέλ σάντε για τι ντελ-αμέν εκ πο λατσσί ζωή σο κα ατσσικιαρέλας χάνικ. (Ιωάν. 3:16· 1 Πέτρ. 1:18, 19) Αφού ο Ιεχωβά ντινάς πι πολύτιμε Τσσαβές για τι βοηθίνελ-αμέν, κα κερέλ τι νικιόλ μπαγιά λέσκι υπόσχεση τι τζουβντιάς για πάντα. w23.04 σ. 27 ¶8, 9

Μανγκέλα ο Ιεχωβά τι αναστίνελ ι μουλέν; Σίγουρα βα. Κερντάς μπερεκέτι τζενέν τι γραφίνεν κι Αγία Γραφή λέσκι υπόσχεση ότι κο μέλλον κα τζουβντιαρέλ ι μουλέν. (Ησ. 26:19· Αποκ. 20:11-13) Ντα κάνα ο Ιεχωβά ντέλα εκ υπόσχεση, πάντα κερέλα-λα τι νικιόλ μπαγιά. (Ιησ. Ναυή 23:14) Ντα ο Ιεχωβά μπεσέλα σαρ σαρ τι ανέλ πάλι κι ζωή ι μουλέν. Σκεφτίνεν ο λάφια σο βακερντάς ο Ιώβ. Βοβ ισινέ σίγουρος ότι, ατζέ-ντα άμα κα μερέλας, ο Ιεχωβά κα μπεσέλας σαρ σαρ τι ντικχέλ-λες πάλι τζουβντό. (Ιώβ 14:14, 15) Ο Ιεχωβά νιωθίνελα αντικάς σαρέ πι υπηρετόνγκε σο μουλέ. Μπεσέλα σαρ σαρ τι ανέλ-λεν πάλι κι ζωή, ζουρανέ ντα ευτυχισμέ. Σο κα αβέλ-πες ι δισεκατομμύριε τζενέντζαρ σο μουλέ χωρίς τι ντιντιόλ-λεν η ευκαιρία τι σικλιόν ι αλήθεια ι Ιεχωβάσκε; Αμαρό λατσσό Ντεβέλ μανγκέλα τι αναστίνελ λεν-ντα. (Πράξ. 24:15) Μανγκέλα τι τθερέν ι ευκαιρία τι αβέν λέσκε αμαλά ντα τι τζουβντιόν για πάντα κι πφουβ.​—Ιωάν. 3:16. w23.04 σ. 9 ¶5, 6

Σαρ μπορίνενα τι κερέν πο ζουρανί τουμαρί ελπίδα; Άμα, για παράδειγμας, τθερένα ι ελπίδα τι τζουβντιόν για πάντα κι πφουβ, τι διαβάνεν ντα τι σκεφτίνεν λατσσές ο ιστορίες ι Γραφιάκε σο βακερένα για τον Παράδεισο. (Ησ. 25:8· 32:16-18) Τι σκεφτίνεν σαρ κα αβέλ η ζωή κο νεβό ντουνιάς. Τι ανέν τουμαρέ γκοντιάτε ότι ισινέν οτθέ. Άμα ατσσικιαράσα αμαρί γκοντί κι ελπίδα κι νεβέ ντουνιάσκι, αμαρέ προβλήματα κα “ατσσικιαρέν χάνικ ντα κα αβέν λοκχέ”. (2 Κορ. 4:17) Η ελπίδα σο ντινάς-τουμέν ο Ιεχωβά κα κερέλ-τουμέν ζουρανέ. Βοβ ήδη ντινάς σο-ντα χρειαζίντιβενα για τι λεν ζορ λέσταρ. Οτθάρ, κάνα χρειαζίντιβενα βοήθεια για τι κερέν εκ διορισμός, τι νταϊντίνεν εκ δοκιμασία ή τι ατσσικιαρέν τουμαρί χαρά, πλησιάνεν ι Ιεχωβάς αντράλ κατά προσευχή ντα μανγκέν λέσταρ τι οδηγίνελ-τουμέν καζόμ σικλιαρένα-τουμέν κατά Γραφή. Τι δεχτίνεν ι ζορ σο ντένα-τουμέν τουμαρέ πφραλά ντα πφενιά. Τι ατσσικιαρέν τουμαρί ελπίδα ξεκάθαρη ντα ζουρανί. Αζομάν, “η μπαρί ζορ ι Ντεβλέσκι κα κερέλ-τουμέν μπουτ ζουρανέ για τι νταϊντίνεν σαρέ ο πράγματα με υπομονή ντα χαρά”.​—Κολ. 1:11. w23.10 σ. 17 ¶19, 20

Τθεράσα μπουτ λόγους για τι βακεράς ευχαριστώ κο Ιεχωβά αντράλ κατά προσευχή. Μπορίνασα τι βακεράς λέσκε ευχαριστώ κάθε λατσσέ πραγμάσκε σο τθεράσα, σόσκε κάθε λατσσό δώρος αβέλα λέσταρ. (Ιακ. 1:17) Για παράδειγμας, μπορίνασα τι βακεράς λέσκε ευχαριστώ ι σουκάρ πφουβιάκε ντα ι εντυπωσιακέ πραγματένγκε σο κερντάς. Ντα μπορίνασα τι βακεράς λέσκε καζόμ εκτιμίνασα αμαρί ζωή, αμαρί φαμιλί, αμαρέ αμαλέν ντα αμαρί ελπίδα. Επίσης, πρέπει τι βακεράς ευχαριστώ κο Ιεχωβά σο μουκχέλα-αμέν τι αβάς λέσκε αμαλά. Μπέκιμ πρέπει τι κεράς μπαρέ προσπάθειες για τι σκεφτίνας ο λόγους σο τθεράσα αμέν για τι σικαβάς αμαρί εκτίμηση κο Ιεχωβά. Τζουβντιάσα εκχέ ντουνιάστε σο ισί αχάριστος. Ο πο μπουτ φαρ, ο τζενέ σκεφτίνενα σάντε οντουλά σο μανγκένα βον, όχι σαρ τι σικαβέν εκτίμηση οντουλένγκε σο τθερένα. Άμα κα αρχίνας αμέν-ντα τι μοιάζας λέντε, αμαρέ προσευχές μπορεί τι αβέν εκ κατάλογος ι πραγματέντζαρ σο μανγκάσα κατά Ντεβέλ. Για μα τι μουκχάς τι αβέλ-πες κάτι ασακό, χρειαζίντιβελα τι μπαριαράς ντα τι σικαβάς συνέχεια αμαρί εκτίμηση σαρέ οντουλένγκε σο κερέλα ο Ιεχωβά αμένγκε.​—Λουκ. 6:45. w23.05 σ. 4 ¶8, 9

Επειδή ο Ιεχωβά, αμαρό Ντατ, τθερέλα αγάπη αμένγκε, να μανγκέλα τι ντικχέλ-αμέν τι ντουκχάς. (Ησ. 63:9) Όμως, να σταματίνελα σαρέ αμαρέ δοκιμασίες, σο ισί σαρ λενιά ή σαρ γιακ. (Ησ. 43:2) Αλλά ντέλα πο λάφι ότι κα βοηθίνελ-αμέν τι “νακχάς αντρά-λένταρ”. Επίσης, σο-ντα δοκιμασία τι νακχάς ακανά, κα βοηθίνελ-αμέν τι ατσσικιαράς ζουρανί αμαρί φιλία λέσαρ. Ο Ιεχωβά ντέλα-αμέν πο ζουρανό άγιος πνεύμας-ντα για τι βοηθίνελ-αμέν τι νταϊντίνας. (Λουκ. 11:13· Φιλιπ. 4:13) Οτθάρ, μπορίνασα τι αβάς σίγουροι ότι κα τθεράς πάντα σο-ντα χρειαζίντιβασα για τι νταϊντίνας ντα τι ατσσάς πιστοί λέστε. Ο Ιεχωβά μπεκλεντίνελα τι ντας λέσκε μπέσα. (Εβρ. 11:6) Κάποιες φορές, μπέκιμ νιωθίνασα ότι αμαρέ δοκιμασίες ισί μπουτ μπαρέ. Μπορεί ατζέ-ντα τι αρχίνας τι τθεράς αμφιβολίες άμα κα βοηθίνελ-αμέν ο Ιεχωβά. Αλλά η Γραφή κερέλα-αμέν σίγουρους ότι, ι Ιεχωβάσκε βοηθειάσαρ, μπορίνασα “τι νικλιάς ο βουτσσέ ντουβάρια”. (Ψαλμ. 18:29) Οτθάρ, αντίς τι μουκχάς ανταλά αμφιβολίες τι μπαριόν, πρέπει τι προσευχίντιβας με μπαρί πίστη, ντα τι αβάς σίγουροι ότι ο Ιεχωβά κα απαντίνελ αμαρέ προσευχιέντε.​—Ιακ. 1:6, 7. w23.11 σ. 22 ¶8, 9

Σο σουκάρ λάφια ι αληθινέ μανγκιμάσκε! Ο παντριμέ τζενέ λένα ζορ ανταλέ λαφίνταρ. Ζευγάρια, μπορίνενα τι τθερέν ζουρανό μανγκιπέ ο εκ ι γιαβερέσκε. Κα τθερέλ εκ ζευγάρι ζουρανό μανγκιπέ σαρί πι ζωή; Ανταβά ισί λένγκε βαστέστε. Για παράδειγμας, εκ γιακ μπορίνελα τι πφαμπόλ για πάντα​—αλλά σάντε άμα συνεχίνασα τι τσσουβάς λάκε καστά. Άμα να κεράσα-λες ανταβά, κα μερέλ. Αντικάς, ο μανγκιπέ-ντα σο τθερέλα εκ ζευγάρι μπορίνελα τι ατσσόλ ζουρανό για πάντα​—αλλά σάντε άμα κερένα πράγματα για τι αβέν ατζέ πο πασέ ο εκ κο γιαβέρ. Κάποιες φορές, εκ ζευγάρι μπέκιμ νιωθίνελα ότι σουρντιλό ο εκ κατά γιαβέρ, ντα ατζέ πο μπουτ κάνα τθερένα προβλήματα ι λοβέντζαρ, νασφαλίματα ή δυσκολίντιβενα καζόμ μπαριαρένα πουμαρέ τσσαβέν. Οτθάρ, για τι ατσσικιαρέν ζουρανί ι «φλόγα του Γιαχ», εμ ο ρομ εμ η ρομνί πρέπει τι προσπαθίνεν τι αβέν λατσσέ αμαλά ι Ιεχωβάσαρ. w23.05 σ. 20, 21 ¶1-3

Σο χρειαζίντιβελα τι κεράς για τι σικλιάς τι σικαβάς θάρρος; Αμαρό ντατ ντα αμαρί ντάι μπέκιμ βακερένα αμένγκε τι τθεράς θάρρος, αλλά ναστί ντένα-αμέν ανταγιά ιδιότητα σαρ τι αβέλας κληρονομιά. Κάνα σικλιάσα τι τθεράς θάρρος, ισί σαρ τι σικλιάς εκ νεβό πράγμας. Εκ τρόπος σο μπορίνενα τι αβέν λατσσέ εκχέ πραγμάστε ισί τι ντικχέν προσεκτικά σο κερέλα τουμαρό δάσκαλος ντα σοράν τι μοιάζεν λέστε. Αντικάς-ντα, σικλιάσα τι τθεράς θάρρος κάνα ντικχάσα προσεκτικά σαρ σικαβένα ο γιαβερά ανταγιά ιδιότητα ντα σοράν μοιάζασα λέντε. Σαρ ο Δανιήλ, αντικάς αμέν-ντα χρειαζίντιβελα τι τζανάς λατσσές ο Λάφι ι Ντεβλέσκο. Πρέπει τι κεράς πο ζουρανί αμαρί φιλία ι Ιεχωβάσαρ. Ανταβά αβέλα-πες κάνα πουτράσα λέσκε αμαρό γκι μπουτ φαρ. Χρειαζίντιβελα επίσης τι ντας μπέσα κο Ιεχωβά ντα τι αβάς σίγουροι ότι κα βοηθίνελ-αμέν. Αντικάς, κάνα αμαρί πίστη κα δοκιμάντιβελ, κα σικαβάς θάρρος. Κάνα σικαβάσα θάρρος, ο γιαβερά σεβάνενα-αμέν. Μπορεί επίσης τι ταρτίνας ι λατσσέ τζενέν κο Ιεχωβά. Σίγουρα, τθεράσα σημαντικούς λόγους τι σικλιάς τι σικαβάς θάρρος. w23.08 σ. 2 ¶2· σ. 4 ¶8, 9

Ο πουρανό μπαλαμανό λάφι δοκιμάζετε, σο μεταφράντιβελα «τι ρόντεν . . . για τι ντικχέν άμα ισί σωστά», χρησιμοποιήντιβελας ι τζενένγκε σο δοκιμάνενας μέταλλα σαρ ο χρυσός ντα ο ασήμι για τι αβέν σίγουροι ότι ισί γνήσια. Οτθάρ, χρειαζίντιβελα τι δοκιμάνας ο πράγματα σο ασουνάσα ή διαβάνασα για τι αβάς σίγουροι ότι ισί γνήσια. Ανταβά κα αβέλ ατζέ πο σημαντικός αμένγκε καζόμ ερεσέλα η μπαρί στεναχώρια. Αντίς τι πακιάς σο-ντα βακερένα αμένγκε ο γιαβερά, τσσουβάσα αμαρί γκοντί τι κχελέλ για τι συγκρίνας οντουλά σο διαβάνασα ή ασουνάσα οντουλέντζαρ σο βακερέλα η Γραφή ντα η οργάνωση ι Ιεχωβάσκι. Άμα κα κεράς-λες ανταβά, να κα χουχάντιβας καέκ λαφίσταρ σο αβέλα κατά δαίμονες. (Παρ. 14:15· 1 Τιμ. 4:1) Ο υπηρέτες ι Ντεβλέσκε σαρ ομάδα κα σώντιβεν κατά μπαρί στεναχώρια. Όμως, να τζανάσα σο κα αβέλ-πες ανγκλ’ αμέντε κο κάθε εκ αμένταρ. (Ιακ. 4:14) Όμως, είτε κα νακχάς τζουβντέ κατά μπαρί στεναχώρια είτε κα μεράς πριν τι αβέλ, κα λας ζωή για πάντα άμα κα ατσσάς πιστοί. Οτθάρ, τι τθεράς αμαρέ γιακχά κι μπουτ σουκάρ ελπίδα σο τθεράσα ντα τι αβάς συνέχεια έτοιμοι για το ντιβές ι Ιεχωβάσκο! w23.06 σ. 13 ¶15, 16

Να τζανάσα σαρ κα νικιόν μπαγιά μερικές προφητείες ι Γραφιάκε. (Δαν. 12:8, 9) Αλλά επειδή αμέν να αγαβάσα σαρ ακριβώς κα νικιόλ μπαγιά εκ προφητεία, ανταβά να μανγκέλα τι βακερέλ ότι να κα νικιόλ μπαγιά. Ισινάμ σίγουροι ότι ο Ιεχωβά κα μουτθαβέλ αμένγκε σο-ντα χρειαζίντιβελα τι τζανάς ακριβώς κο σωστός βακίτι, σαρ κερντάς κο πουρανέ-ντα μπρεσά. Ο τθεμά κα βακερέν «ειρήνη ντα ασφάλεια». (1 Θεσ. 5:3) Σοράν, ο κυβερνήσεις ι ντουνιάσκε κα τζαν κόντρα κι ψεύτικη θρησκεία ντα κα καταστραφίνεν-λα. (Αποκ. 17:16, 17) Σοράν, κα κερέν επίθεση κο λαός κι Ντεβλέσκο. (Ιεζ. 38:18, 19) Ανταλά πράγματα κα γκερέν αμέσως κο τελευταίος τζένγκι, κο Αρμαγεδδώνας. (Αποκ. 16:14, 16) Μπορίνασα τι αβάς σίγουροι ότι ανταλά πράγματα κα αβέν-πες ατζεχάνικ. Μέχρι τι αβέλ-πες ανταβά όμως, τι συνεχίνας τι σικαβάς αμαρί εκτίμηση αμαρέ λατσσέ Νταντέσκε σο ισί κο ουρανός καζόμ πακιάσα ότι ο προφητείες ι Γραφιάκε ισί σημαντικές ντα βοηθίνασα γιαβερέν-ντα τι πακιάν ο ίδιος. w23.08 σ. 13 ¶19, 20

Κάνα ο απόστολος Παύλος κερντάς λάφι για την πίστη, την ελπίδα ντα την αγάπη, βακερντάς ότι «η πο μπαρί ανταλένταρ ισί η αγάπη». (1 Κορ. 13:13) Σόσκε βακερντάς-λες ανταβά; Επειδή κο μέλλον, να κα χρειαζίντιβελ τι τθεράς πίστη κο υποσχέσεις κι Ντεβλέσκε για το νεβό ντουνιάς ούτε ελπίδα ότι ανταλά υποσχέσεις κα νικιόν μπαγιά, επειδή κα ντικχάς αμαρέ γιακχίντζαρ ότι αβιλέ ανταλά υποσχέσεις. Αλλά πάντα κα χρειαζίντιβελ τι τθεράς αγάπη ι Ιεχωβάσκε ντα ι τζενένγκε. Ντα αμαρί αγάπη λένγκε κα συνεχίνελ τι μπαριόλ για πάντα.Επίσης, η αγάπη σικαβέλα ότι ισινάμ αληθινοί Χριστιανοί. Ο Ιησούς βακερντάς πι αποστολόνγκε: «Ανταλέσταρ κα αγαβέν σαρέ ότι ισινέν μο μαθητές, άμα τθερένα αγάπη ο εκ ι γιαβερέσκε». (Ιωάν. 13:35) Επίσης, η αγάπη σο τθεράσα ο εκ ι γιαβερέσκε ατσσικιαρέλα-αμέν ενωμέ. Ο Παύλος βακερντάς ότι η αγάπη «ενώνελα τέλεια ι τζενέν». (Κολ. 3:14) Ο απόστολος Ιωάννης γραφιντάς πι πφραλένγκε: «Οντουβά σο μανγκέλα ι Ντεβλές πρέπει τι μανγκέλ πι πφραλές-ντα». (1 Ιωάν. 4:21) Κάνα σικαβάσα αγάπη ο εκ ι γιαβερέσκε, σικαβάσα ότι μανγκάσα ι Ντεβλές. w23.11 σ. 8 ¶1, 3

Η Αγία Γραφή μοιασκιαρέλα αμαρί Χριστιανική ζωή με εκ αγώνας. Οντουλά σο τθάβντενα ντα ερεσένα μέχρι κο τέλος, κα κερδίνεν ι αιώνια ζωή. (2 Τιμ. 4:7, 8) Χρειαζίντιβελα τι κεράς μπαρέ προσπάθειες για τι συνεχίνας τι τθάβντας, ατζέ πο μπουτ επειδή ο τέλος ι ντρομέσκο ισί μπουτ πασέ. Ο απόστολος Παύλος σικαντάς σο κα βοηθίνελ-αμέν τι κερδίνας. Βακερντάς αμένγκε «τι φουρτίνας οπρ’ αμένταρ κάθε πφαριπέ ντα . . . τι τθάβντας με υπομονή κο αγώνας σο ισί ανγκλ’ αμέντε». Μήπως ο Παύλος μανγκέλας τι βακερέλ ότι σαρ Χριστιανοί δεν πρέπει τι βάντας καέκ φορτίος; Νάα, να μανγκέλας τι βακερέλ ανταβά. Οκιά μπάνταρ, μανγκέλας τι βακερέλ ότι πρέπει τι νασκιαράς σο-ντα πφαριπέ να χρειαζίντιβελα τι βάντας. Εκ ασακό πφαριπέ κα μπορίνελας τι κερέλ-αμέν τι τθάβντας πο δύσκολα ντα τι κχινιαρέλ-αμέν. Για τι νταϊντίνας, πρέπει τι αγαβάς σουγκό σο-ντα πφαριπέ να χρειαζίντιβελα τι βάντας, επειδή ανταβά πφαριπέ κα μπορίνελας τι τσσιναβέλ αμαρί φόρα. Οτθάρ, πρέπει τι φουρτίνας-λες. Βέβαια, δεν πρέπει τι φουρτίνας οπρ’ αμένταρ ο φορτία σο πρέπει τι βάντας. Άμα κα κεράς-λες ανταβά, να κα ατσσάς κο αγώνας.​—2 Τιμ. 2:5. w23.08 σ. 26 ¶1, 2

Άμα ισινάμ λογικοί, ανταβά κα βοηθίνελ-αμέν τι σεβάνας ο απόψεις ι γιαβερένγκε. Για παράδειγμας, μερικά πφενιά μπεϊντίνενα τι ζουζίνεν-πες, ενώ γιαβερά όχι. Μερικοί Χριστιανοί μπεϊντίνενα τι πιν χάνικ μολ ενώ γιαβερά τραμπίνενα μα τι πιν ιτς. Σαρέ ο Χριστιανοί μανγκένα τι τθερέν λατσσί υγεία αλλά τραμπίνενα διαφορετικοί τρόποι για τι αρακχαβέν πουμαρί υγεία. Άμα πακιάσα ότι αμέν τθεράσα πάντα δίκιος ντα προσπαθίνασα τι κεράς αμαρέ πφραλέν τι ακολουθίνεν οντουβά σο κερντάμ αμέν, ανταβά μπορεί τι κερέλ ι γιαβερέν τι χασαρέν πουμαρί πίστη ντα τι ανέλ διχόνοια κι κχανγκιρί. (1 Κορ. 8:9· 10:23, 24) Για παράδειγμας, αντίς τι τσσουβέλ αυστηρούς κανόνες ι ιριαϊμάσκε, ο Ιεχωβά ντινάς-αμέν μερικές αρχές. Πρέπει τι ιριαβάς-αμέν τροπόσαρ σο ταιριάνελα κο υπηρέτες κι Ντεβλέσκε, ντα τι σικαβάς ότι ισινάμ λογικοί, ντα ότι ιριαβάσα-αμέν σεΐντζαρ σο να ανένα λατζ καεκχέστε ντα «τραμπίντιβενα γκοντιάσαρ». (1 Τιμ. 2:9, 10) Οτθάρ, να ταρτίνασα ι προσοχή αμαρέ νεαυτόστε ι τροπόσαρ σο ιριαβάσα-αμέν. Ο αρχές ι Γραφιάκε βοηθίνενα επίσης ι πρεσβυτερόν μα τι τσσουβέν πουμαρέ κανόνες σο τθερένα τι κερέν ι σεΐντζαρ ντα ι τροπόσαρ σο κα τσσινέλ ή κα κερέλ εκ τζενό πο μπαλά. w23.07 σ. 23, 24 ¶13, 14

Ο Ιεχωβά σικαβέλα αμένγκε σαρ τι τθεράς εκ ευτυχισμέ μέλλον. Οντουλά σο δεχτίνενα ι πρόσκληση κατά τζουβέλ σο νανέ ιτς ήσυχη ντα «να τθερέλα γκοντί» μανγκένα τι απολαμβάνεν “γκουλντέ” πράγματα σο κερένα-λεν αποτσοράλ. Οντουλά σο κερένα, κα γκερέν-λεν «ντιπ τελέ κο Μεζάρι». (Παρ. 9:13, 17, 18) Καζόμ διαφορετικά ισί ο πράγματα ι τζενένγκε σο δεχτίνενα ι πρόσκληση της “αληθινής σοφίας”! (Παρ. 9:1) Σικλιάσα τι μανγκάς σο μανγκέλα ο Ιεχωβά ντα τι μισίνας σο μισίνελα. (Ψαλμ. 97:10) Επίσης, αρακχάσα χαρά κάνα καλίνασα γιαβερέν τι βοηθίντιβεν κατά «αληθινή σοφία». Ισί σαρ τι “ντας βίκος κατά βουτσσέ τθανά σο ισί κι πόλη: «Κον να τζανέλα μπουτ πράγματα τι αβέλ ακατέ»”. Ο ευλογίες αμένγκε ντα οντουλένγκε σο μανγκένα τι ασουνέν να κα ατσσικιαρέν χάνικ. Ατσσόνα για πάντα, επειδή μουκχένα-αμέν τι “τζουβντιάς” για πάντα καζόμ “πφιράσα κο ντρομ σο πφιρένα ο γκοντιαβέρ τζενέ”.​—Παρ. 9:3, 4, 6. w23.06 σ. 24 ¶17, 18

Σαρ νιωθίνενα κάνα εκ τζενό σο κερένα λέσαρ μπουτί ή εκ συμμαθητής τουμαρό πουτσέλα-τουμέν σο πακιάνα; Μήπως αγχώντιβενα; Ανταβά αβέλα-πες κο πο μπουτ τζενέ αμένταρ. Αλλά εκ ασακί ερώτηση κα βοηθίνελας-αμέν τι αγαβάς σο σκεφτίνελα ή σο πακιάλα εκ τζενό ντα τι ντελ-αμέν ι ευκαιρία τι βακεράς λέσκε ο λατσσέ αμπέρια. Μερικές φορές όμως, εκ τζενό μπορεί τι πουτσέλ κάτι για τι αρακχέλ ευκαιρία τι χαλ-πες αμέντζαρ. Ανταβά να κερέλα αμένγκε εντύπωση, σόσκε μερικοί ασουντέ λάθος πράγματα οντουλένγκε σο πακιάσα. (Πράξ. 28:22) Επίσης, τζουβντιάσα «κο τελευταία ντιβεσά», εκχέ βακιτίστε σο μπουτ τζενέ “τθερένα σορό”, ή ατζέ-ντα ισί «άγριοι». (2 Τιμ. 3:1, 3) Μπέκιμ σκεφτίνενα: “Σαρ μπορίναβα τι αβάβ ήρεμος ντα τι κεράβ λάφι σουκάρ τροπόσαρ κάνα εκ τζενό μανγκέλα τι χαλ-πες μάντζαρ οντουλένγκε σο πακιάβα;” Σο μπορίνελα τι βοηθίνελ-τουμέν; Εκχέ λαφίσαρ, η πραότητα. Ο τζενό σο ισί πράος, ή κοβλέ γκίσκο, να νευριάνελα εύκολα, αλλά μπορίνελα τι κερέλ κουμάντος πο νεαυτός κάνα ο γιαβερά μανγκένα τι χαν-πες λέσαρ ή κάνα νανέ σίγουρος σαρ τι απαντίνελ. w23.09 σ. 14 ¶1, 2

Μερικές φορές, η οργάνωση ντέλα-αμέν συμβουλές σο αρακχαβένα-αμέν. Για παράδειγμας, προειδοποιήνελα-αμέν μα τι τθεράς αγάπη ι λοβένγκε ντα μα τι κεράς πράγματα σο κα τσσίντενας-αμέν μα τι ντας καν κο νόμοι κι Ντεβλέσκε. Ανταλέ περιπτωσιάτε-ντα, ευλογίντιβασα κάνα ακολουθίνασα ο οδηγίες σο ντέλα-αμέν ο Ιεχωβά. (Ησ. 48:17, 18· 1 Τιμ. 6:9, 10) Σίγουρα, ο Ιεχωβά κα συνεχίνελ τι χρησιμοποιήνελ τζενέν για τι ντελ-αμέν οδηγίες εμ κι μπαρί στεναχώρια εμ κι Βασιλεία σο κα ατσσικιαρέλ χίλια μπρεσά. Κα συνεχίνας τι ακολουθίνας ανταλά οδηγίες; Κα αβέλ πο εύκολος τι κεράς-λες ανταβά άμα ακολουθίνασα ι Ιεχωβάσκε οδηγίες ακανά. Άρα, τι ακολουθίνας πάντα ο οδηγίες ι Ιεχωβάσκε, σαρ ισί ο οδηγίες-ντα σο αβένα κατά μουρσά σο ισί διορισμέ τι αρακχαβέν-αμέν. (Ησ. 32:1, 2· Εβρ. 13:17) Καζόμ κεράσα-λες ανταβά, τθεράσα κάθε λόγος τι ντας μπέσα κο Ιεχωβά, σο οδηγίνελα-αμέν ντουρ κατά πνευματικοί κίνδυνοι ντα γκερέλα-αμέν κο νεβό ντουνιάς, σο οτθέ κα τθεράς αιώνια ζωή. w24.02 σ. 25 ¶17, 18

Ο απόστολος Παύλος ισινέ χαρούμενος κι υπηρεσία κι Ιεχωβάσκι, αλλά νακχέλας μπουτ δυσκολίες. Ο Παύλος μπουτ φαρ κερέλας μπαρέ ταξίδια, ντα ανταβά να ισινέ εύκολος οντουλά μπρεσά. Πι ταξιδίντε, ο Παύλος μπάζιμα νακχέλας «δυσκολίες λενιέντε» ντα “δυσκολίες για μα τι περέλ κι τσορένγκε βαστά”. Ντα ισινέ φαρ σο λέσκε ντουσμάνια νταπένας-λες. (2 Κορ. 11:23-27) Ντα ο πφραλά ι Παυλόσκε να σικαβένας πάντα εκτίμηση ι πραγματένγκε σο κερέλας λένγκε για τι βοηθίνελ-λεν. (2 Κορ. 10:10· Φιλιπ. 4:15) Σο βοηθιντάς ι Παυλός τι συνεχίνελ τι υπηρετίνελ ι Ιεχωβάς; Ο Παύλος σικλιλό μπουτ πράγματα για το χαρακτήρας ι Ιεχωβάσκο κατά Γραφές ντα οντουλένταρ σο νακχλάς βοβ. Αβιλό σίγουρος ότι ο Ιεχωβά Ντεβέλ μανγκέλας-λες. (Ρωμ. 8:38, 39· Εφεσ. 2:4, 5) Ντα μανγκλάς βοβ-ντα ι Ιεχωβάς μπουτ. Ο Παύλος σικαβέλας πι αγάπη ι Ιεχωβάσκε καζόμ “υπηρετίνελας ντα συνεχίνελας τι υπηρετίνελ ι αγιόν”.​—Εβρ. 6:10. w23.07 σ. 9 ¶5, 6

Μπουτ τζενέ αγαβένα ότι χρειαζίντιβασα ο κυβερνήσεις ι ντουνιάσκε ντα ότι πρέπει τι ντας καν ατζέ-ντα σε χάνικ νόμους σο τσσουβένα “οντουλά σο τθερένα ι ζορ τι κερέν κουμάντος”. Αλλά ο ίδια ανταλά τζενέ να ντένα καν σε εκ νόμος σο ντικχίντιβελα άδικος ή μπουτ αυστηρός. Η Γραφή βακερέλα ότι ι τζενένγκε κυβερνήσεις ανένα βάσανα, ισί κο βας κι Μπενγκέσκο ντα ατζεχάνικ κα αβέν καταστροφή. (Ψαλμ. 110:5, 6· Εκκλ. 8:9· Λουκ. 4:5, 6) Βακερέλα αμένγκε επίσης ότι «κον τζάλα λέντζαρ κόντρα, τζάλα κόντρα κο Ντεβέλ σο τσσουντάς σε εκ σειράς ο πράγματα». Ακανά, ο Ιεχωβά μουκχέλα κο κυβερνήσεις τι κερέν κουμάντος για τι αβέν σε εκ σειράς ο πράγματα, ντα μπεκλεντίνελα αμένταρ τι ντας-λεν καν. Άρα, πρέπει “τι ντας σαριλέντε οντουλά σο πρέπει τι ντας-λεν”, σαρ ισί τι ποκινάς ο φόροι, τι σικαβάς λένγκε σεβασμός ντα τι ντας-λεν καν. (Ρωμ. 13:1-7) Μπέκιμ αμντίνασα ότι εκ νόμος νανέ εύκολος ή ισί άδικος ή χρειαζίντιβελα τι ποκινάς μπουτ λοβέ για τι ντας-λες καν. Όμως, ντάσα καν κο Ιεχωβά, ντα βοβ βακερέλα αμένγκε τι ντας καν ανταλέ κυβερνησιέντε άμα να μανγκένα αμένταρ τι τζας κόντρα κο κανόνες λέσκε.​—Πράξ. 5:29. w23.10 σ. 8 ¶9, 10

Κάνα μπιάντιλο ο Σαμψών, ο Φιλισταίοι κερένας κουμάντος ι Ισραηλιτέν ντα ζορισκιαρένας-λεν. (Κριτ. 13:1) Επειδή κερένας κουμάντος σκληρέ τροπόσαρ, ο Ισραηλίτες τθερένας μπαρέ βάσανα. Ο Ιεχωβά τραμπιντάς τον Σαμψών για τι «αρχίνελ τι σώνελ ι Ισραηλιτέν κατά βας ι Φιλισταιόνγκο». (Κριτ. 13:5) Για τι ντελ πέρα ανταβά μπουτ δύσκολος διορισμός, ο Σαμψών έπρεπε τι στηρίντιβελ κο Ιεχωβά. Εκχέ περιπτωσιάτε, ο στρατός ι Φιλισταιόνγκο αβιλό κι Λεχί, σο μάλλον ισινέ κο Ιούδας, για τι ασταρέλ τον Σαμψών. Ο Ιουδαίοι νταρασάλε, οτθάρ αποφασιντέ τι ντεν τον Σαμψών πουμαρέ ντουσμανίντε. Ο ίδιος ο λαός του Σαμψών πφαντάς-λες σικίς ντουέ νεβέ σολέντζαρ ντα αντάς-λες κο Φιλισταίοι. (Κριτ. 15:9-13) Όμως, «ο πνεύμας ι Ιεχωβάσκο ντινάς-λες ζορ», ντα ελευθερωσάλο κατά σολέ. Σοράν, «αρακχλάς ο τσαμούγαλος εκχέ χχερέσκο», λιντάς-λες ντα λέσαρ μουνταρντάς 1.000 Φιλισταιόν!​—Κριτ. 15:14-16. w23.09 σ. 2, 3 ¶3, 4

Ο Ιεχωβά σικαντάς αμένγκε κι Γραφή χάνικ χάνικ πο “σκοπός σο ατσσόλα για πάντα”. Ο Ιεχωβά μπορίνελα τι τραμπίνελ διαφορετικούς τρόπους τι κερέλ πο σκοπός, ντα πάντα κα τζαλ λατσσές σόσκε «κανονιντάς σαρέ ο πράγματα τι κερέν λέσκο σκοπός». (Παρ. 16:4) Σαρέ οντουλά σο κερέλα ο Ιεχωβά κα ανέν λατσσίματα σο κα ατσσόν για πάντα. Καβά ισί ο σκοπός ι Ιεχωβάσκο, ντα καλά αλλαγές κερντάς για τι κερέλ-λες τι νικιόλ μπαγιά; Ο Ντεβέλ βακερντάς κο πρώτα τζενέ καβά ισινέ λέσκο σκοπός λένγκε. Βακερντάς λένγκε: «Τι κερέν μπουτέ τσσαβέν ντα τι αβγατίντιβεν, τι πφερέν ι πφουβ ντα τι τθερέν-λα τουμένγκε, ντα τι κερέν κουμάντος . . . σαρέ ο ζώα σο ισί οπράλ κι πφουβ». (Γέν. 1:28) Κάνα ο Αδάμ ντα η Εύα γκιλέ κόντρα κο Ιεχωβά, ντα αντικάς αβιλί η αμαρτία κο τζενέ, ανταβά να τσσιναντάς ι Ιεχωβάς τι κερέλ πο σκοπός. Βοβ κερντάς αλλαγές κο τρόπος σο κα κερέλας-λες τι νικιόλ μπαγιά. Αποφασιντάς τι τσσουβέλ εκ Βασιλεία κο ουρανός σο κα κερέλας τι νικιόλ μπαγιά ο σκοπός σο τθερέλας βοβ κατά αρχή ι τζενένγκε ντα ι πφουβιάκε.​—Ματθ. 25:34. w23.10 σ. 19, 20 ¶6, 7

Ο Ιεχωβά μπορίνελα τι βοηθίνελ-αμέν μα τι παρατίνας-λεν. Μπέκιμ χρειαζίντιβελα μπαρί προσπάθεια για τι συνεχίνας, ειδικά άμα μαράσα-αμέν με εκ αδυναμία μπουτ μπρεσά. Μπάζιμα, αμαρέ αδυναμίες ντικχίντιβενα πο δύσκολες οντουλένταρ σο νακχέλας ο απόστολος Πέτρος. Αλλά ο Ιεχωβά μπορίνελα τι ντελ-αμέν ι ζορ σο χρειαζίντιβασα για μα τι παρατίνας-λεν. (Ψαλμ. 94:18, 19) Για παράδειγμας, εκ πφραλ τζάλας μουρσέντζαρ για μπουτ μπρεσά πριν τι γνωρίνελ ι αλήθεια. Αλλαντάς σαρί πι ζωή ντα αρχισάλο τι τζουβντιόλ αντικάς σαρ βακερέλα η Γραφή. Όμως, μπάζιμα αβέλας λέσκε πάλι τι κερέλ ανταβά λάθος πράγμας. Σο βοηθιντάς-λες μα τι παρατίνελ-λεν; Βοβ εξηγίνελα: «Ο Ιεχωβά ντέλα-αμέν ζορ». Σοράν βακερέλα: «Με τη βοήθεια σο ντέλα-αμέν ο πνεύμας ι Ιεχωβάσκο . . . , σικλιλόμ ότι αβέλα-πες τι [συνεχίνας τι] πφιράς κο ντρομ κι αληθειάκο . . . Ο Ιεχωβά μπορισάλο τι χρησιμοποιήνελ-μαν, ντα παρόλο σο τθεράβα αζόμ μπουτ ελαττώματα, ντέλα-μαν συνέχεια ζορ». w23.09 σ. 23 ¶12

Πφραλάλεν σο ισινέν τερνέ, χρειαζίντιβελα προσπάθεια για τι αβέν ώριμοι Χριστιανοί. Χρειαζίντιβελα τι τραμπίνεν λατσσέ παραδείγματα για τι μοιάζεν λέντε, τι τσσουβέν τουμαρί γκοντί τι κχελέλ, τι αβέν μπεσαλήδες, τι σικλιόν χρήσιμα πράγματα σο κα βοηθίνεν-τουμέν τουμαρέ ζωγιάτε ντα τι προετοιμάντιβεν για το ευθύνες σο κα αβέν. Μπάζιμα, σαρέ ανταλά σο πρέπει τι κερέν μπορεί τι ντικχίντιβενα τουμένγκε σαρ βες. Αλλά μπορίνενα τι ντεν-λεν πέρα! Ντεν-τουμέν γκοντί ότι ο Ιεχωβά μανγκέλα μπουτ τι βοηθίνελ-τουμέν. (Ησ. 41:10, 13) Σίγουρα, εμ τουμαρέ πφραλά εμ τουμαρέ πφενιά κι κχανγκιρί κα βοηθίνεν-τουμέν. Κάνα κα αβέν ώριμοι Χριστιανοί, τουμαρί ζωή κα αβέλ σουκάρ ντα πφερντί. Μανγκάσα-τουμέν, πφραλάλεν σο ισινέν τερνέ! Μακάρι ο Ιεχωβά τι ευλογίνελ-τουμέν μπουτ, καζόμ μαρένα-τουμέν από ακανά για τι αβέν ώριμοι Χριστιανοί. w23.12 σ. 29 ¶19, 20

Ανέν τουμαρέ γκοντιάτε ότι ισινέν εκχέ παρεάτε πφραλέντζαρ ντα πφενίντζαρ. Νακχένα σουκάρ ντα νικαβένα εκ φωτογραφία σαρέ γιεκ. Όμως, νικαβένα ατζέ ντούι φωτογραφίες επειδή σκεφτίνενα ότι η πρώτη μπέκιμ μα τι νικίστιλι λατσσί. Οτθάρ, ακανά τθερένα τριν φωτογραφίες. Αλλά εκχιάτε, ντικχένα ότι εκ πφραλ μουκχλάς πο τσικάτ. Οτθάρ, σβήνενα-λα επειδή τθερένα ατζέ ντούι ντανέ σο σαρί η παρέα ασάλα, εμ οντουβά συγκεκριμέ πφραλ. Ο πο μπουτ φαρ, τθεράσα σουκάρ αναμνήσεις κατά πράγματα σο τζουβντιλάμ αμαρέ πφραλέντζαρ ντα αμαρέ πφενίντζαρ. Αλλά μπέκιμ εκχέ περιπτωσιάτε, εκ πφραλ ή εκ πφεν βακερέλα ή κερέλα κάτι σο να σικαβέλα αγάπη. Σο πρέπει τι κεράς με την ανάμνηση ανταγιά; Σόσκε μα τι προσπαθίνεν τι σβήνεν-λα, σαρ κα σβήνενας εκ φωτογραφία οντουλένταρ; (Εφεσ. 4:32) Μπορίνασα τι μπιστράς, σόσκε τθεράσα μπουτ λατσσέ αναμνήσεις κατά σουκάρ πράγματα σο τζουβντιλάμ λέσαρ. Ανταλά ισί ο αναμνήσεις σο μανγκάσα τι τθεράς αμαρέ γκοντιάτε ντα τι αβέν αμένγκε σαρ θησαυρός. w23.11 σ. 12 ¶16, 17

Ο λάφια κο πουρανό μπαλαμανό κείμενος σο χρησιμοποιήντιβενα ακατέ μανγκένα τι σικαβέν ότι εκ Χριστιανή πρέπει πάντα τι ιριαβέλ-πες λατσσέ τροπόσαρ. Επίσης, πρέπει τι σικαβέλ ότι σεβάνελα ο αισθήματα ι γιαβερένγκε οντουλέντζαρ σο ιρίλα. Καμαρώνασα αμαρέ ώριμε πφενίν σο κερένα ανταγιά συμβουλή! Εκ γιαβέρ ιδιότητα σο χρειαζίντιβελα τι τθερέν σαρέ ο ώριμα πφενιά ισί τι αβέν γκοντιαβέρ. Σο μανγκέλα τι βακερέλ ανταβά; Τι μπορίνεν τι αγαβέν καβά ισί ο σωστός ντα καβά ισί ο λάθος, ντα σοράν τι τραμπίνεν τι κερέν ο σωστός. Σκεφτίνεν ο παράδειγμας σο μουκχλάς η Αβιγαία. Λάκο ρομ λιντάς εκ μπέτι απόφαση, σο κα ανέλας μπαρό ζιάνι σαρέ λέσκε φαμιλιάτε. Η Αβιγαία κερντάς κάτι σουγκό. Επειδή ισινέ γκοντιαβέρ, αγαντάς σο έπρεπε τι κερέλ, ντα ανταβά σωντάς ζωές. (1 Σαμ. 25:14-23, 32-35) Άμα ισινάμ γκοντιαβέρ, τζανάσα επίσης κάνα πρέπει τι κεράς λάφι ντα κάνα δεν πρέπει. Ανταβά βοηθίνελα-αμέν τι σικαβάς κο γιαβερά ότι πφαμπάσα λένγκε χωρίς τι ανάς-λεν σε δύσκολη θέση.​—1 Θεσ. 4:11. w23.12 σ. 20 ¶8, 9

Ο απόστολος Παύλος γραφιντάς ανταλά λάφια κι κχανγκιρί κι Ρώμη. Ο πφραλά ντα ο πφενιά οτθέ σικλιλέας ι Ιεχωβάσκε ντα ι Ιησούσκε, πακιαντέας κο Ιησούς ντα αβιλέας Χριστιανοί. Οτθάρ, ο Ντεβέλ “βακερντάς ότι ισινέ δίκαιοι επειδή τθερένας πίστη” ντα ντινάς-λεν πο άγιος πνεύμας. (Ρωμ. 5:1) Βα, λιντέ εκ μπουτ σουκάρ ντα σημαντική ελπίδα. Πο σοράν, ο Παύλος γραφιντάς κο χρισμέ Χριστιανοί κι Έφεσος για την ελπίδα σο λιντέ. Μπεκλεντίνενας τι λεν ι “κληρονομιά σο λένα ο άγιοι”. (Εφεσ. 1:18) Επίσης, ο Παύλος σικαντάς κο Κολοσσαείς κατέ κα λένας πουμαρί ελπίδα. Βακερντάς ότι ισί η «ελπίδα σο ισί γκεραντί τουμένγκε κο ουρανός». (Κολ. 1:4, 5) Άρα, η ελπίδα σο τθερένα ο χρισμέ Χριστιανοί ισί τι αναστίντιβεν για τι τζουβντιόν για πάντα κο ουρανός, σο κα αβέν βασιλιάδες γιεκ ι Χριστόσαρ.​—1 Θεσ. 4:13-17· Αποκ. 20:6. w23.12 σ. 9 ¶4, 5

Ο πουρανό μπαλαμανό λάφι φρουρέω, σο ατθέ μεταφράντιβελα «αρακχαβέλ», ισινέ εκ λάφι σο βακερένας-λες κάνα ο φρουροί, δηλαδή ο στρατιώτες, αρακχαβένας εκ πόλη για τι αβέλ ασφαλής κατά επιθέσεις. Ο τζενέ σο μπεσένας σε εκ ασακί πόλη σοβένας ήσυχοι, επειδή τζανένας ότι υπαρχίντιβενας στρατιώτες κο μπαρέ πόρτες. Αντικάς-ντα, κάνα η ειρήνη ι Ντεβλέσκι αρακχαβέλα αμαρό γκι ντα αμαρί γκοντί, νιωθίνασα ήρεμοι επειδή τζανάσα ότι ισινάμ ασφαλείς. (Ψαλμ. 4:8) Ατζέ-ντα άμα αμαρί κατάσταση να κα αλλάνελ αμέσως, μπορίνασα πάλι τι νιωθίνας ειρήνη, σαρ αβιλό-πες με την Άννα σο ισί κι Γραφή. (1 Σαμ. 1:16-18) Ντα κάνα νιωθίνασα ήρεμοι, ο πο μπουτ φαρ ισί αμένγκε πο εύκολος τι σκεφτίνας καθαρά ντα τι λας γκοντιαβέρ αποφάσεις. Σο μπορίνασα τι κεράς αμέν; Σαρ ο τζενέ σο μπεσένας σε εκ πόλη ντένας βίκος ι στρατιωτέν για τι αρακχαβέν-λεν, αντικάς αμέν-ντα μπορίνασα τι μανγκάς κατά Ιεχωβά τι αρακχαβέλ-αμέν. Σαρ; Τι προσευχίντιβας μέχρι τι νιωθίνας ι ειρήνη ι Ντεβλέσκι. (Λουκ. 11:9· 1 Θεσ. 5:17) Άμα νακχένα κάτι μπουτ δύσκολος, μα τσσιναβέν τι κερέν προσευχή, ντα κα νιωθίνεν ι ειρήνη ι Ιεχωβάσκι τι αρακχαβέλ τουμαρό γκι ντα τουμαρί γκοντί.​—Ρωμ. 12:12. w24.01 σ. 21 ¶5, 6

Για τι αγιάνελ ο ναβ πι Νταντέσκο, ο Ιησούς νταϊντιντάς καζόμ βασανίνενας-λες, προσβαλίνενας-λες ντα βακερένας ψέματα λέσκε. Τζανέλας ότι ντινάας καν πι Νταντές σαρέ κο πράγματα. Ο Ιησούς να κερντάας κάτι μπέτι, οτθάρ να τθερέλας καέκ λόγος τι λατζάλ. (Εβρ. 12:2) Τζανέλας επίσης ότι ο Μπενγκ τζάλας λέσαρ κόντρα οντουλά μπουτ δύσκολες στιγμές. (Λουκ. 22:2-4· 23:33, 34) Ο Μπενγκ σίγουρα μανγκέλας τι κερέλ ι Ιησούς μα τι ατσσικιαρέλ σαστό πο γκι κο Ντεβέλ, αλλά να καταφεριντάς-λες ανταβά! Ο Ιησούς σικαντάς ότι ο Μπενγκ ισί εκ μπαρό ψεύτης ντα ότι ο Ιεχωβά τθερέλα μπαγιά πιστέ υπηρετόν σο ατσσικιαρένα σαστό πουμαρό γκι λέστε ατζέ-ντα κο πο μπαρέ δοκιμασίες! Μανγκένα τι κερέν ο γκι τουμαρέ Βασιλιάσκο σο κυβερνίνελα κο ουρανός; Συνεχίνεν τι δοξάνεν ο ναβ ι Ιεχωβάσκο καζόμ βοηθίνενα γιαβερέν-ντα τι γνωρίνεν μπαγιά αμαρέ Ντεβλές. Κάνα κερένα-λες ανταβά, ακολουθίνενα ι Ιησούσκε βήματα πιστά. (1 Πέτρ. 2:21) Σαρ ο Ιησούς, αντικάς τουμέν-ντα κερένα ι Ιεχωβάσκο γκι τι χαιρίνελ ντα σικαβένα ότι Λέσκο ντουσμάνι, ο Μπενγκ, ισί εκ μπαρό ψεύτης! w24.02 σ. 11, 12 ¶11-13

Ο τελευταία παντς μπρεσά, πο μπουτ από εκ εκατομμύριος τζενέ μπολντιλέ σαρ Μάρτυρες ι Ιεχωβάσκε. Κάνα αφιερώντιβενα κο Ιεχωβά, τραμπίνενα τι αβέν μαθητής ι Ιησού Χριστόσκο ντα κερένα ο θέλημας ι Ντεβλέσκο ο πο σημαντικός πράγμας τουμαρέ ζωγιάτε. Σο πρέπει τι κερέν για τι αφιερώντιβεν; Ο Ιησούς βακερντάς: «Άμα εκ τζενό μανγκέλα τι αβέλ παλά-μάντε, τι τσσιναβέλ τι τζουβντιόλ πέσκε». (Ματθ. 16:24) Ο πουρανό μπαλαμανό λάφι «ἀπαρνησάσθω ἑαυτὸν», σο μεταφράντιβελα «τι τσσιναβέλ τι τζουβντιόλ πέσκε», μπορεί επίσης τι μεταφράντιβελ «πρέπει τι βακερέλ όχι πι νεαυτόσκε». Κάνα κα αβέν αφιερωμέ υπηρέτες ι Ιεχωβάσκε, κα χρειαζίντιβελ τι βακερέν όχι σαρέ κο πράγματα σο να κερένα ι Ιεχωβάσκο γκι. (2 Κορ. 5:14, 15) Για παράδειγμας, κα βακερέν όχι κο «πράγματα σο κερέλα ο σώμας», σαρ ισί ο λουμνιπέ. (Γαλ. 5:19-21· 1 Κορ. 6:18) Μήπως ανταλά εντολές κα κερέν τουμαρί ζωή δύσκολη; Ανταβά να κα αβέλ-πες άμα μανγκένα ι Ιεχωβάς ντα ισινέν σίγουροι ότι λέσκε νόμοι ισί τουμαρέ λατσσιμάσκε.​—Ψαλμ. 119:97· Ησ. 48:17, 18. w24.03 σ. 2 ¶1· σ. 3 ¶4

Ο Ιεχωβά ντέλα πο άγιος πνεύμας οντουλέντε σο κερένα λέσκο γκι. (Ματθ. 12:18) Κα μπορίναας τι πουτσάς-αμέν: “Μπορισάλομ τι σικαβάβ εκ ιδιότητα κατά καρπός ι Ντεβλέσκε πνευμάσκο μι ζωγιάτε;” Για παράδειγμας, μήπως ντικχένα ότι ακανά κερένα πο μπουτ υπομονή ι γιαβερέντζαρ από ό,τι κερένας πριν τι σικλιόν ι Ιεχωβάς; Ισί μπαγιά ότι, καζόμ πο μπουτ σικλιόνα τι σικαβέν ο καρπός ι Ντεβλέσκε πνευμάσκο, αζόμ πο μπουτ κα σικάντιβελ ξεκάθαρα ότι κερένα ι Ιεχωβάσκο γκι! Αντράλ κατά λύτρος, o Ιεχωβά συγχωρίνελα ο αμαρτίες οντουλένγκε σο κερένα λέσκο γκι. (1 Τιμ. 2:5, 6) Αλλά σο αβέλα-πες άμα πάλι να νιωθίνασα ότι κεράσα ι Ιεχωβάσκο γκι, παρόλο σο τθεράσα πίστη κο λύτρος ντα μπολντιλάμ; Ντεν-τουμέν γκοντί ότι ναστί ντάσα μπέσα πάντα οντουλέντε σο νιωθίνασα αμέν, αλλά μπορίνασα τι ντας μπέσα κο Ιεχωβά. Λέσκε γιακχίντε οντουλά σο τθερένα πίστη κο λύτρος ισί δίκαιοι ντα ντέλα πο λάφι τι ευλογίνελ-λεν.​—Ψαλμ. 5:12· Ρωμ. 3:26. w24.03 σ. 30 ¶15· σ. 31 ¶17