Τι Μπαριαρέν Συνέχεια Τουμαρί Αγάπη

1. Καλά αλήθειες σικλιλέν κάνα αρχισάλεν τι κερέν μελέτη κατά Γραφή;

ΝΤΕΝΑ-τουμέν γκοντί αζομάν σο αρχισάλεν τι κερέν μελέτη κατά Γραφή; Μπέκιμ ατσσιλέν πουταρντέ μόσαρ κάνα σικλιλέν ότι ο Ντεβέλ τθερέλα ναβ. Μπέκιμ τι λοκχιλό τουμαρό γκι κάνα σικλιλέν ότι ο Ντεβέλ να βασανίνελα ι τζενέν κι κόλαση. Ντα μπέκιμ χαιρισάλεν κάνα σικλιλέν ότι κα τθερέν πάλι ι ευκαιρία τι ντικχέν τουμαρέ αγαπημέ τζενέν σο μουλέ, ντα τι τζουβντιόν γιεκ λέντζαρ κο παράδεισος κι πφουβ.

2. Εκτός ότι σικλιλέν ο αλήθειες ι Γραφιάκε, καγιά γιαβέρ πρόοδος κερντέν; (Εφεσίους 5:1, 2)

² Καζόμ πο μπουτ σικλιαρένας-τουμέν κατά Λάφι ι Ντεβλέσκο, αζόμ πο μπουτ μπαριόλας τουμαρί αγάπη ι Ιεχωβάσκε. Ανταγιά αγάπη τσσιντιντάς-τουμέν τι κερέν οντουλά σο σικλιόνας. Λένας λατσσέ αποφάσεις σο βασίντιβενας κο αρχές κι Γραφιάκε. Σικλιόνας τι σκεφτίνεν ντα τι κερέν ο σωστά πράγματα επειδή μανγκένας τι κερέν ι Ντεβλέσκο γκι. Σαρ εκ χουρντό προσπαθίνελα τι μοιάζελ πι λατσσέ νταντέστε, αντικάς τουμέν-ντα προσπαθίνενας τι μοιάζεν τουμαρέ Νταντέστε σο ισί κο ουρανός.​—Διαβάνεν Εφεσίους 5:1, 2.

3. Σο κα αβέλας λατσσό τι πουτσάς-αμέν;

³ Οτθάρ, τι πουτσάς-αμέν: “Ισί μι αγάπη ι Ιεχωβάσκε πο ζουρανί ακανά από ό,τι αζομάν σο αβιλόμ Χριστιανός; Από αζομάν σο μπολντιλόμ, μοιάζελα ο τρόπος σο σκεφτίναβα ντα οντουλά σο κεράβα πο μπουτ οντουλέντζαρ σο σκεφτίνελα ντα κερέλα ο Ιεχωβά, ειδικά κι αγάπη σο σικαβάβα μι πφραλένγκε ντα μι πφενίνγκε;” Άμα “η αγάπη σο τθερένας κι αρχή” σουρντιλί χάνικα, μα χασαρέν τουμαρί ζορ. Κάτι ασακό αβιλό-πες κο Χριστιανοί-ντα κο πρώτος αιώνας. Ο Ιησούς όμως να πακιάλας ότι βον να αξίνενας. Ούτε αμένγκε πακιάλα κάτι ασακό. (Αποκ. 2:4, 7) Ο Ιησούς τζανέλα ότι μπορίνασα τι τθεράς πάλι ι ίδια ζουρανί αγάπη σο τθεράας κάνα σικλιλάμ ι αλήθεια.

4. Σο κα ντικχάς ανταλέ μαθημάστε;

⁴ Ανταβά μάθημας κα εξηγίνελ σαρ μπορίνασα τι συνεχίνας τι μπαριαράς αμαρί αγάπη ι Ιεχωβάσκε ντα ι γιαβερένγκε. Σοράν, κα ντικχάς μερικές ευλογίες σο αβένα εμ αμένγκε εμ ι γιαβερένγκε κάνα μπαριαράσα αμαρί αγάπη.

ΤΙ ΜΠΑΡΙΑΡΕΝ ΤΟΥΜΑΡΙ ΑΓΑΠΗ Ι ΙΕΧΩΒΑΣΚΕ

5, 6. (α) Σο δυσκολίες νακχέλας ο απόστολος Παύλος κο έργος; (β) Σο τσσίντελας-λες τι συνεχίνελ τι υπηρετίνελ ι Ιεχωβάς;

⁵ Ο απόστολος Παύλος ισινέ χαρούμενος κι υπηρεσία κι Ιεχωβάσκι, αλλά νακχέλας μπουτ δυσκολίες. Ο Παύλος μπουτ φαρ κερέλας μπαρέ ταξίδια, ντα ανταβά να ισινέ εύκολος οντουλά μπρεσά. Πι ταξιδίντε, ο Παύλος μπάζιμα νακχέλας «δυσκολίες λενιέντε» ντα “δυσκολίες για μα τι περέλ κι τσορένγκε βαστά”. Ντα ισινέ φαρ σο λέσκε ντουσμάνια νταπένας-λες. (2 Κορ. 11:​23-27) Ντα ο πφραλά ι Παυλόσκε να σικαβένας πάντα εκτίμηση ι πραγματένγκε σο κερέλας λένγκε για τι βοηθίνελ-λεν.​—2 Κορ. 10:​10· Φιλιπ. 4:15.

⁶ Σο βοηθιντάς ι Παυλός τι συνεχίνελ τι υπηρετίνελ ι Ιεχωβάς; Ο Παύλος σικλιλό μπουτ πράγματα για το χαρακτήρας ι Ιεχωβάσκο κατά Γραφές ντα οντουλένταρ σο νακχλάς βοβ. Αβιλό σίγουρος ότι ο Ιεχωβά Ντεβέλ μανγκέλας-λες. (Ρωμ. 8:​38, 39· Εφεσ. 2:4, 5) Ντα μανγκλάς βοβ-ντα ι Ιεχωβάς μπουτ. Ο Παύλος σικαβέλας πι αγάπη ι Ιεχωβάσκε καζόμ “υπηρετίνελας ντα συνεχίνελας τι υπηρετίνελ ι αγιόν”.​—Εβρ. 6:10.

7. Καβά ισί εκ τρόπος σο μπορίνασα τι μπαριαράς αμαρί αγάπη ι Ιεχωβάσκε;

⁷ Μπορίνασα τι μπαριαράς αμαρί αγάπη ι Ντεβλέσκε καζόμ σικλιαράσα-αμέν συνέχεια λέσκε Λαφίσταρ. Καζόμ διαβάνενα ι Γραφή, τι προσπαθίνεν τι αγαβέν σο σικαβέλα κάθε ιστορία ι Ιεχωβάσκε. Πουτσέν-τουμέν: “Σαρ σικαβέλα ανταγιά ιστορία ότι ο Ιεχωβά μανγκέλα-μαν; Καλά λόγους ντέλα-μαν τι μανγκάβ ι Ιεχωβάς;”

8. Σαρ μπορίνελα η προσευχή τι βοηθίνελ-αμέν τι μπαριαράς αμαρί αγάπη ι Ντεβλέσκε;

⁸ Εκχέ γιαβερέ τροπόσαρ σο μπορίνασα τι μπαριαράς αμαρί αγάπη ι Ιεχωβάσκε ισί κάνα πουτράσα λέσκε αμαρό γκι συνέχεια αντράλ κατά προσευχή. (Ψαλμ. 25:4, 5) Ντα σοράν, ο Ιεχωβά κα απαντίνελ αμαρέ προσευχιέντε. (1 Ιωάν. 3:​21, 22) Η Καν, εκ πφεν κι Ασία, βακερέλα: «Κι αρχή, μι αγάπη ι Ιεχωβάσκε βασίντιβελας οντουλέντε σο τζανάβας, αλλά ανταγιά αγάπη αβέλας ατζέ πο μπαρί καζόμ ντικχάβας σαρ απαντίνελας βοβ μι προσευχιέντε. Ανταβά κερέλας-μαν τι μανγκάβ τι κεράβ πράγματα σο κερένας λέσκο γκι».b

ΤΙ ΜΠΑΡΙΑΡΕΝ ΤΟΥΜΑΡΙ ΑΓΑΠΗ Ι ΓΙΑΒΕΡΕΝΓΚΕ

9. Σαρ τζανάσα ότι ο Τιμόθεος κερέλας πο ζουρανί πι αγάπη πι πφραλένγκε ντα πι πφενίνγκε;

⁹ Σε εκ κατά ιεραποστολικά ταξίδια σο κερντάς, ο Παύλος γνωριντάς εκχέ μπουτ λατσσέ τερνές, ι Τιμοθεός. Ο Τιμόθεος μανγκέλας ι Ιεχωβάς ντα μανγκέλας ι τζενέν. Σοράν από μερικά μπρεσά, ο Παύλος βακερντάς κο Φιλιππησίους: «Να τθεράβα καεκχέ γιαβερές σαρ [ι Τιμοθεός] σο κα ενδιαφερίντιβελ μπαγιά ι πραγματένγκε σο απασχολίνενα-τουμέν». (Φιλιπ. 2:​20) Ο Παύλος να βακερέλας ακατέ καζόμ ικανός ισινέ ο Τιμόθεος τι οργανώνελ πράγματα ή τι κερέλ δημόσιες ομιλίες. Ντικχίντιβελα όμως ότι κερντάας εντύπωση κο Παύλος η αγάπη σο σικαβέλας ο Τιμόθεος πι πφραλένγκε ντα πι πφενίνγκε. Σίγουρα ο κχανγκιριά σο υπηρετίνελας ο Τιμόθεος μπεκλεντίνενας σαρ σαρ για τι τζαλ λένγκε πάλι.​—1 Κορ. 4:17.

10. Σαρ σικαντάς η Άννα ντα λάκο ρομ ότι μανγκένας πουμαρέ πφραλέν ντα πφενίν;

¹⁰ Αμέν-ντα ρόντασα τρόπους για τι βοηθίνας αμαρέ πφραλέν ντα πφενίν. (Εβρ. 13:​16) Σκεφτίνεν ι εμπειρία ι Αννάκι, σο βακερντάμ λάκε κο γιαβέρ μάθημας. Σοράν από εκ ζουρανί καταιγίδα, βόι ντα λάκο ρομ γκιλέ κο κχερ εκχέ φαμιλιάκο σο ισινέ Μάρτυρες ντα ντικχλέ ότι η ταράτσα λένγκε κχερέσκι νασλίας, οτθάρ σαρέ λένγκε σέα μελάλιλεας. Η Άννα βακερέλα: «Λιντάμ λένγκε σέα, τθοντάμ-λεν ντα βουρτιντάμ-λεν σιδερωμέ ντα τακτοποιημέ. Αμένγκε ανταβά ισινέ κάτι χουρντό, αλλά αντάς εκ φιλία σο ατσσόλα ζουρανί μέχρι αντιβές». Η αγάπη σο τθερέλας η Άννα ντα λάκο ρομ ι πφραλένγκε ντα ι πφενίνγκε τσσιντιντάς-λεν τι βοηθίνεν.​—1 Ιωάν. 3:​17, 18.

11. (α) Σαρ μπέκιμ τι νιωθίνεν ο γιαβερά κάνα σικαβάσα λένγκε αγάπη; (β) Σο κερέλα ο Ιεχωβά κάνα σικαβάσα αγάπη, σαρ βακερέλα ο εδάφιος Παροιμίες 19:17;

¹¹ Κάνα σικαβάσα αγάπη ντα λατσσιπέ κο γιαβερά, βον μπουτ φαρ ντικχένα ο προσπάθειες σο κεράσα για τι μοιάζας κο Ιεχωβά. Ντα μπέκιμ ποτές να κα σικλιάς καζόμ μπουτ εκτιμίνενα αμαρό λατσσιπέ. Η Καν συγκινίντιβελα κάνα ντέλα-πες γκοντί ι τζενέν σο βοηθιντέ-λα κάνα ισινέ τερνί. Βόι βακερέλα: «Ισινόμ πφερντί εκτίμηση μι αγαπημέ πφενίνγκε σο νικιόνας μάντζαρ κο έργος. Αβένας τι λεν-μαν, καλίνενας-μαν για καφές ή χαμπέ ντα κανονίνενας τι βουρτίνεν-μαν κχερέ. Ακανά αγαβάβα ότι χρειαζίντιβελας μπουτ μπαρί προσπάθεια ντα κερντέ-λες μανγκιμάσαρ». Σίγουρα, να κα βακερέν αμένγκε ευχαριστώ σαρέ ο τζενέ οντουλένγκε σο κεράσα λένγκε. Η Καν βακερέλα: «Μακάρι τι μπορίναβας με-ντα τι κεράβ ι πφενίνγκε σο βοηθιντέ-μαν σαρέ ο λατσσέ πράγματα σο κερντέ μάνγκε βον. Αλλά να τζανάβα κάι μπεσένα σαρέ οντουλά πφενιά αντιβές. Όμως ο Ιεχωβά τζανέλα, ντα προσευχίντιβαβα τι σικαβέλ λένγκε βοβ ο λατσσιπέ σο σικαντέ μάνγκε». Η Καν τθερέλα δίκιος. Ο Ιεχωβά ντικχέλα ατζέ-ντα ο πο χουρντό λατσσιπέ σο κεράσα κο γιαβερά. Ντικχέλα-λες μπουτ μπαρί θυσία ντα μπόρτζι σο κα ποκινέλ.​—Διαβάνεν Παροιμίες 19:17.

12. Σαρ μπορίνενα ο πφραλά τι σικαβέν πουμαρί αγάπη κι κχανγκιρί; (Ντικχέν ο φωτογραφίες-ντα)

¹² Άμα ισινέν μουρσά, σαρ μπορίνενα τι σικαβέν αγάπη κο γιαβερά ντα τι βοηθίνεν-λεν; Εκ τερνό πφραλ, ο Τζόρνταν, πουτσλάς εκχέ πρεσβυτερός σαρ μπορίνελας τι κερέλ πο μπουτ για τι βοηθίνελ κι κχανγκιρί. Ο πρεσβύτερος ισαρντάς-λες για την πρόοδος σο τθερέλα κερντό ντα ντινάς-λες χάνικ συμβουλές για τι βοηθίνελ-λες τι κερέλ πο μπουτ πράγματα. Για παράδειγμας, βακερντάς λέσκε τι αβέλ πο τζανγκλέ κι Αίθουσα Βασιλείας ντα τι χαιρετίνελ ι πφραλέν, τι ντελ απαντήσεις κο συναθροίσεις, τι νικιόλ μπουτ φαρ κο έργος πι ομιλόσαρ ντα τι ρόντελ τρόπους για τι βοηθίνελ ι γιαβερέν. Καζόμ ο Τζόρνταν κερέλας ανταγιά συμβουλή, σικλιόλας τι κερέλ κάποια πράγματα αλλά σικλιόλας-ντα τι μανγκέλ πο μπουτ πι πφραλέν ντα πι πφενίν. Ο Τζόρνταν σικλιλό ότι, κάνα εκ πφραλ αβέλα διακονικός υπηρέτης, να αρχίνελα τι βοηθίνελ ι γιαβερέν αλλά συνεχίνελα τι βοηθίνελ ι γιαβερέν.​—1 Τιμ. 3:​8-10, 13.

13. Σαρ τσσιντιντάς η αγάπη εκχέ πφραλές, τον Κρίστιαν, τι υπηρετίνελ πάλι σαρ πρεσβύτερος;

¹³ Σο αβέλα-πες όμως άμα ισινένας ανγκλέ διακονικοί υπηρέτες ή πρεσβύτεροι; Ο Ιεχωβά ντέλα-πες γκοντί ο έργος σο τθερένα κερντό ντα ι αγάπη σο τσσιντιντάς-τουμέν τι κερέν-λες. (1 Κορ. 15:​58) Επίσης ντικχέλα ι αγάπη σο συνεχίνενα τι σικαβέν. Εκ πφραλ, ο Κρίστιαν, πφανγκιλό λέσκο γκι κάνα λιντέ λέσταρ ο προνόμιος τι υπηρετίνελ σαρ πρεσβύτερος. Όμως βακερέλα: «Αποφασιντόμ τι κεράβ ο πο λατσσό σο μπορίναβας για τι υπηρετίναβ ι Ιεχωβάς επειδή μανγκάβα-Λες, είτε τθεράβας προνόμια είτε όχι». Πο σοράν, διορισάλο πάλι πρεσβύτερος. Ο Κρίστιαν βακερέλα: «Αγχώνελας-μαν χάνικ σο κα υπηρετίναβας πάλι σαρ πρεσβύτερος αλλά αποφασιντόμ ότι, αφού ο Ιεχωβά μανγκέλας τι λαβ πάλι ανταβά διορισμός κα κεράβας-λες επειδή μανγκάβα λες, μι πφραλέν ντα μι πφενίν».

14. Σο σικλιόνα κατά λάφια σο βακερντάς εκ πφεν κατά Γεωργία;

¹⁴ Ο υπηρέτες ι Ιεχωβάσκε σικαβένα επίσης πουμαρί αγάπη ι τζενένγκε σο ισί πασέ λέντε. (Ματθ. 22:​37-39) Για παράδειγμας, η Έλενα, εκ πφεν κατά Γεωργία, βακερέλα: «Κι αρχή, ο μόνος πράγμας σο τσσίντελας-μαν τι βακεράβ ο λατσσέ αμπέρια ισινέ μι αγάπη ι Ιεχωβάσκε. Αλλά καζόμ μι αγάπη μι Νταντέσκε σο ισί κο ουρανός μπαριόλας, μπαριόλας-ντα μι αγάπη ι τζενένγκε. Προσπαθίναβας τι ανάβ μι γκοντιάτε σο προβλήματα νακχένας ντα καβά θέμας κα μπορίνελας τι αγγίνελ λένγκο γκι. Καζόμ πο μπουτ σκεφτίναβας ανταλέ τροπόσαρ, αζόμ πο μπουτ μανγκάβας τι βοηθίναβ-λεν».​—Ρωμ. 10:​13-15.

ΕΥΛΟΓΙΕΣ ΣΟ ΤΘΕΡΑΣΑ ΚΑΝΑ ΣΙΚΑΒΑΣΑ ΑΓΑΠΗ ΚΟ ΓΙΑΒΕΡΑ

15, 16. Καλά ευλογίες τθεράσα κάνα σικαβάσα αγάπη κο γιαβερά, σαρ σικαβένα ο φωτογραφίες;

¹⁵ Κάνα σικαβάσα αγάπη αμαρέ πφραλένγκε, να βοηθίντιβασα σάντε αμέν. Κάνα αρχισάλο ο Κορωνοϊός, εκ πφραλ, ο Πάολο, ντα λέσκι ρομνί βοηθιντέ μπουτέ πφουρέ πφενίν τι σικλιόν σαρ τι χρησιμοποιήνεν πουμαρέ κινητά, τάμπλετ ή υπολογιστές για τι κερέν έργος. Εκ πφεν κι αρχή δυσκολίντιβελας τι χρησιμοποιήνελ πι ηλεκτρονική συσκευή, αλλά τελικά σικλιλί τι χρησιμοποιήνελ-λα. Αντικάς μπορισάλι τι καλίνελ πι τζενέν κι Ανάμνηση. Εξήντα λάκε τζενένταρ ντικχλέ ι Ανάμνηση αντράλ κατά Zoom! Εμ η πφεν εμ λάκε τζενέ βοηθίντιλε κατά προσπάθειες σο κερντέ ο Πάολο ντα λέσκι ρομνί. Πο σοράν, η πφεν γραφιντάς κο Πάολο: «Ευχαριστίναβα-τουμέν σο σικλιαρένα αμέν ι πφουρέν. Ποτές να κα μπιστράβ καζόμ μπουτ πφαμπόλα αμένγκε ο Ιεχωβά ντα καζόμ μπαρέ προσπάθειες κερντέν για τι βοηθίνεν-αμέν».

¹⁶ Ασακέ εμπειρίες σικλιαρντέ κο Πάολο εκ σημαντικός μάθημας. Αντέ λέσκε γκοντιάτε ότι η αγάπη ισί πο σημαντική κατά πράγματα σο τζανάσα ή κατά πράγματα σο μπορίνασα τι κεράς. Ο Πάολο ντέλα-πες γκοντί: «Ανγκλέ, υπηρετίναβας σαρ επίσκοπος περιοχής. Ακανά αγαβάβα ότι, παρόλο σο ο πφραλά μπέκιμ μπισταρντέ μο ομιλίες, ατζέ ντένα-πες γκοντί ι βοήθεια σο ντινόμ-λεν».

17. Κον γιαβέρ βοηθίντιβελα κάνα σικαβάσα αγάπη;

¹⁷ Κάνα σικαβάσα αγάπη κο γιαβερά, βοηθίντιβασα αμέν-ντα τροπόντζαρ σο να μπεκλεντίνασα. Ο Τζόναθαν, σο τζουβντιόλα κι Νέα Ζηλανδία, αγαντάς-λες ανταβά. Εκ Σάββατος μεσημέρι καζόμ κερέλας κάψα, ντικχλάς εκχέ σκαπανεάς τι κερέλ έργος κορκορό κο ντρομ. Ο Τζόναθαν αποφασιντάς τι νικιόλ κο έργος λέσαρ ο γιαβερά Σάββατα κο ίδιος σαάτι. Αζομάν να αγαντάς καζόμ μπουτ κα βοηθίντιβελας βοβ-ντα κατά λατσσιπέ σο κερντάας. Ο Τζόναθαν βακερέλα: «Οντουβά βακίτι, να μπεϊντίναβας ο έργος, όμως καζόμ ασουνάβας ο τρόπος σο σικλιαρέλας ο σκαπανέας ντα ντικχάβας καζόμ λατσσέ αποτελέσματα τθερέλας πι εργόστε, αρχισάλι τι μπαριόλ αντρά-μάντε αληθινή αγάπη ανταλέ εργόσκε. Επίσης, κερντόμ εκχέ μπουτ λατσσέ αμαλές, σο βοηθιντάς-μαν τι αβάβ πο ζουρανό πνευματικά, τι μπεϊντίναβ ο έργος ντα τι τζαβ πο πασέ κο Ιεχωβά».

18. Σο μανγκέλα ο Ιεχωβά τι κεράς;

¹⁸ Ο Ιεχωβά μανγκέλα σαρέ αμέν τι μπαριαράς αμαρί αγάπη λέσκε ντα ι γιαβερένγκε. Σαρ σικλιλάμ, μπορίνασα τι κεράς πο ζουρανί αμαρί αγάπη ι Ιεχωβάσκε κάνα διαβάνασα λέσκο Λάφι ντα σκεφτίνασα-λες λατσσές, ντα κάνα κεράσα λάφι λέσαρ μπουτ φαρ αντράλ κατά προσευχή. Μπορίνασα τι μπαριαράς αμαρί αγάπη αμαρέ πφραλένγκε ντα αμαρέ πφενίνγκε κάνα βοηθίνασα-λεν μπουτέ τροπόντζαρ. Καζόμ αμαρί αγάπη μπαριόλα, κα αβάς ατζέ πο πασέ κο Ιεχωβά ντα αμαρέ πφραλέντε ντα πφενίντε. Ανταλά φιλίες κα απολαμβάνας-λεν για πάντα!