Σαρ τι Ατσσικιαράς Ζουρανί Αμαρί Αγάπη ο Εκ ι Γιαβερέσκε

1, 2. (α) Σόσκε μπορίνελας ο απόστολος Παύλος τι βακερέλ ότι η αγάπη ισί «η πο μπαρί» ιδιότητα; (β) Καλά ερωτήσεις κα ντικχάς;

ΚΑΝΑ ο απόστολος Παύλος κερντάς λάφι για την πίστη, την ελπίδα ντα την αγάπη, βακερντάς ότι «η πο μπαρί ανταλένταρ ισί η αγάπη». (1 Κορ. 13:​13) Σόσκε βακερντάς-λες ανταβά; Επειδή κο μέλλον, να κα χρειαζίντιβελ τι τθεράς πίστη κο υποσχέσεις κι Ντεβλέσκε για το νεβό ντουνιάς ούτε ελπίδα ότι ανταλά υποσχέσεις κα νικιόν μπαγιά, επειδή κα ντικχάς αμαρέ γιακχίντζαρ ότι αβιλέ ανταλά υποσχέσεις. Αλλά πάντα κα χρειαζίντιβελ τι τθεράς αγάπη ι Ιεχωβάσκε ντα ι τζενένγκε. Ντα αμαρί αγάπη λένγκε κα συνεχίνελ τι μπαριόλ για πάντα.

² Αφού κα χρειαζίντιβελ τι τθεράς πάντα αγάπη, για τι ντικχάς τριν ερωτήσεις: Πρώτον, σόσκε πρέπει τι μανγκάς ο εκ ι γιαβερές; Δεύτερον, σαρ σικαβάσα αγάπη ο εκ ι γιαβερέσκε; Τρίτον, σαρ μπορίνασα τι ατσσικιαράς ζουρανί αμαρί αγάπη ο εκ ι γιαβερέσκε;

ΣΟΣΚΕ ΠΡΕΠΕΙ ΤΙ ΜΑΝΓΚΑΣ Ο ΕΚ Ι ΓΙΑΒΕΡΕΣ;

3. Καλά λόγους τθεράσα για τι μανγκάς ο εκ ι γιαβερές;

³ Σόσκε ισί σημαντικός τι μανγκάς ο εκ ι γιαβερές; Εκ λόγος ισί ότι η αγάπη σικαβέλα ότι ισινάμ αληθινοί Χριστιανοί. Ο Ιησούς βακερντάς πι αποστολόνγκε: «Ανταλέσταρ κα αγαβέν σαρέ ότι ισινέν μο μαθητές, άμα τθερένα αγάπη ο εκ ι γιαβερέσκε». (Ιωάν. 13:​35) Επίσης, η αγάπη σο τθεράσα ο εκ ι γιαβερέσκε ατσσικιαρέλα-αμέν ενωμέ. Ο Παύλος βακερντάς ότι η αγάπη «ενώνελα τέλεια ι τζενέν». (Κολ. 3:​14) Αλλά υπαρχίντιβελα εκ γιαβέρ-ντα σημαντικός λόγος σο πρέπει τι μανγκάς ο εκ ι γιαβερές. Ο απόστολος Ιωάννης γραφιντάς πι πφραλένγκε: «Οντουβά σο μανγκέλα ι Ντεβλές πρέπει τι μανγκέλ πι πφραλές-ντα». (1 Ιωάν. 4:​21) Κάνα σικαβάσα αγάπη ο εκ ι γιαβερέσκε, σικαβάσα ότι μανγκάσα ι Ντεβλές.

4, 5. Σικαβέν εκχέ παραδειγμάσαρ σο σχέση τθερέλα αμαρί αγάπη ι Ντεβλέσκε με την αγάπη σο σικαβάσα ο εκ ι γιαβερέσκε.

⁴ Σο σχέση τθερέλα αμαρί αγάπη ι Ντεβλέσκε με την αγάπη σο σικαβάσα αμαρέ πφραλένγκε ντα πφενίνγκε; Για παράδειγμας, σκεφτίνεν σο σχέση τθερέλα αμαρί καρδιά σαρέ αμαρέ σωμάσαρ. Κάνα ο γιατρός ντικχέλα ο παλμοί αμαρέ μουσιάτε, μπέκιμ αγαβέλα καζόμ ζουρανί ισί αμαρί καρδιά. Σο αγαβάσα ανταλέ παραδειγμάσταρ;

⁵ Σαρ ο γιατρός μπορίνελα τι αγαβέλ καζόμ ζουρανί ισί αμαρί καρδιά κάνα ντικχέλα ο παλμοί αμαρέ μουσιάτε, αντικάς αμέν-ντα μπορίνασα τι αγαβάς καζόμ ζουρανί ισί αμαρί αγάπη ι Ντεβλέσκε κάνα ντικχάσα καζόμ ζουρανί ισί αμαρί αγάπη ι γιαβερένγκε. Άμα κα αγαβάς ότι αμαρί αγάπη ι πφραλένγκε νανέ αζόμ ζουρανί καζόμ ισινέ ανγκλέ, ανταβά μπέκιμ τι σικαβέλα ότι αμαρί αγάπη ι Ντεβλέσκε-ντα νανέ αζόμ ζουρανί. Αλλά άμα σικαβάσα συνέχεια αγάπη αμαρέ πφραλένγκε, ανταβά σικαβέλα ότι αμαρί αγάπη ι Ντεβλέσκε-ντα ισί ζουρανί.

6. Άμα αμαρί αγάπη ι πφραλένγκε ντα ι πφενίνγκε νανέ αζόμ ζουρανί καζόμ ισινέ ανγκλέ, σόσκε πρέπει τι απασχολίνελ-αμέν ανταβά; (1 Ιωάννη 4:​7⁠-9, 11)

⁶ Άμα αμαρί αγάπη ι πφραλένγκε ντα ι πφενίνγκε νανέ αζόμ ζουρανί καζόμ ισινέ ανγκλέ, ανταβά πρέπει τι απασχολίνελ-αμέν. Σόσκε; Επειδή ανταβά κα μανγκέλας τι βακερέλ ότι να τζάσα-λεν λατσσές πνευματικά. Ο απόστολος Ιωάννης βακερέλα-λες ξεκάθαρα ανταβά καζόμ ανέλα αμαρέ γκοντιάτε ακαλά λάφια: «Οντουβά σο να μανγκέλα πι πφραλές, σο ντικχλάς-λες, ναστί μπορίνελα τι μανγκέλ ι Ντεβλές, σο να ντικχλάς-λες». (1 Ιωάν. 4:​20) Σο σικλιάσα ανταλέσταρ; Κεράσα ι Ιεχωβάσκο γκι σάντε άμα “μανγκάσα ο εκ ι γιαβερές”.​—Διαβάνεν 1 Ιωάννη 4:​7⁠-9, 11.

ΣΑΡ ΣΙΚΑΒΑΣΑ ΑΓΑΠΗ Ο ΕΚ Ι ΓΙΑΒΕΡΕΣΚΕ;

7, 8. Καλέ τροπόντζαρ μπορίνασα τι σικαβάς αγάπη ο εκ ι γιαβερέσκε;

⁷ Αρακχάσα μπουτ φαρ κο Λάφι κι Ντεβλέσκο ι εντολή «τι μανγκάς ο εκ ι γιαβερές». (Ιωάν. 15:​12, 17· Ρωμ. 13:8· 1 Θεσ. 4:9· 1 Πέτρ. 1:​22· 1 Ιωάν. 4:​11) Όμως, η αγάπη ισί ιδιότητα ι γκίσκι, ι τζενέσκι σο ισινάμ αντρ’ αμέντε, ντα καέκ τζενό να μπορίνελα τι ντικχέλ αμαρό γκι. Άρα, σαρ μπορίνελα τι αγαντίντιβελ η αγάπη σο τθεράσα ο εκ ι γιαβερέσκε; Οντουλέντζαρ σο βακεράσα ντα κεράσα.

⁸ Μπουτέ τροπόντζαρ μπορίνασα τι σικαβάς αμαρέ πφραλένγκε ντα αμαρέ πφενίνγκε ότι μανγκάσα-λεν. Ντικχέν μερικά παραδείγματα: «Τι βακερέν ι αλήθεια ο εκ κο γιαβέρ». (Ζαχ. 8:​16) «Τι ατσσικιαρέν ι ειρήνη ο εκ ι γιαβερέσαρ». (Μάρκ. 9:​50) «Τι σικαβέν πρώτα τουμέν σεβασμός κο γιαβέρ». (Ρωμ. 12:​10) Τι «δεχτίνεν λατσσιμάσαρ ο εκ ι γιαβερές». (Ρωμ. 15:7) «Τι συγχωρίνεν ο εκ ι γιαβερές». (Κολ. 3:​13) «Τι βάντεν ο πφαριπέ ο εκ ι γιαβερέσκο». (Γαλ. 6:2) «Τι κοβλιαρέν ι ντουκχ ο εκ ι γιαβερέσκι». (1 Θεσ. 4:​18) Τι «ντεν ζορ ο εκ ι γιαβερές». (1 Θεσ. 5:​11) «Τι προσευχίντιβεν ο εκ ι γιαβερέσκε».​—Ιακ. 5:16.

9. Σόσκε κάνα κοβλιαράσα ι ντουκχ ι γιαβερένγκι σικαβάσα λένγκε αμαρί αγάπη; (Ντικχέν ι φωτογραφία-ντα)

⁹ Κι γιαβέρ παράγραφος, ντικχλάμ μπερεκέτι τρόπους σο μπορίνασα τι σικαβάς αγάπη ι γιαβερένγκε. Ακανά, κα εξετάνας εκ ανταλέ τροπόνταρ. Ο Παύλος βακερντάς: «Τι κοβλιαρέν ι ντουκχ ο εκ ι γιαβερέσκι». Σόσκε κάνα κοβλιαράσα ι ντουκχ ι γιαβερένγκι σικαβάσα λένγκε αμαρί αγάπη; Εκ βιβλίος σο κερέλα λάφι ι Γραφιάκε εξηγίνελα ότι ο πουρανό μπαλαμανό λάφι παρακαλείτε σο χρησιμοποιηντάς ατθέ ο Παύλος μανγκέλα τι βακερέλ ότι «κάνα εκ τζενό νακχέλα εκ μπαρί δυσκολία, εκ γιαβέρ ισί πασέ λέστε για τι ντελ-λες ζορ». Οτθάρ, κάνα κοβλιαράσα ι ντουκχ εκχέ πφραλέσκι σο τσσίντελα μπουτ βάσανα, βοηθίνασα-λες τι ιστίλ ντα τι συνεχίνελ τι πφιρέλ κο ντρομ κι ζωγιάκο. Κάθε φαρ σο ισινάμ πασέ εκχέ πφραλέστε για τι πουτρέλ αμένγκε πο γκι, σικαβάσα λέσκε ότι μανγκάσα-λες.​—2 Κορ. 7:6, 7, 13.

10. Σόσκε ο τζενό σο πφαμπόλα ι γιαβερένγκε μανγκέλα τι ντελ-λεν παρηγοριά;

¹⁰ Κάνα κάποιος πφαμπόλα εκχέ τζενέσκε σο νακχέλα βάσανα, μανγκέλα τι ντελ-λες παρηγοριά ντα τι κερέλ κάτι για τι βοηθίνελ-λες. Άρα, πρώτα πφαμπάσα ι γιαβερένγκε ντα σοράν ντάσα-λεν παρηγοριά. Ο Παύλος εξηγίνελα ότι, επειδή ο Ιεχωβά πφαμπόλα ι γιαβερένγκε, ανταβά τσσίντελα-λες τι ντελ-λεν παρηγοριά. Ο Παύλος βακερέλα ότι ο Ιεχωβά «σικαβέλα έλεος αντράλ πι γκίσταρ ντα [ισί] ο Ντεβέλ κάθε παρηγοριάς». (2 Κορ. 1:3) Ατθέ, ο Παύλος χρησιμοποιήνελα ο λάφι «αντράλ πι γκίσταρ» για τι σικαβέλ ο αισθήματα σο νιωθίνελα κάποιος κάνα πφαμπόλα ι γιαβερένγκε. Οτθάρ, ο Ιεχωβά βακέρντιβελα ο Ντατ σο σικαβέλα έλεος αντράλ πι γκίσταρ επειδή Λέσταρ αβένα ανταλά αισθήματα. Ντα επειδή πφαμπόλα αμένγκε, ανταβά τσσίντελα-λες τι ντελ-αμέν παρηγοριά «σαρέ κο δοκιμασίες». (2 Κορ. 1:4) Σαρ ο πανί σο τθάβντελα από εκ πηγή ντέλα ζωή οντουλέντε σο διψάνενα, αντικάς ο Ιεχωβά-ντα ντέλα ζωή ντα παρηγοριά οντουλέντε σο νακχένα βάσανα. Σαρ μπορίνασα τι μοιάζας κο Ιεχωβά ντα τι πφαμπάς ι γιαβερένγκε ντα τι ντας-λεν παρηγοριά; Εκ τρόπος ισί τι μπαριαράς αμαρέ γκίστε ιδιότητες σο τθερένα τι κερέν με την παρηγοριά. Καλά ισί μερικές ανταλένταρ;

11. Καλά γιαβερά ιδιότητες κα βοηθίνεν-αμέν τι μανγκάς ι γιαβερέν ντα τι κοβλιαράς λένγκι ντουκχ, σαρ βακερένα ο εδάφια Κολοσσαείς 3:​12 ντα 1 Πέτρου 3:8;

¹¹ Σο κα βοηθίνελ-αμέν τι συνεχίνας τι μανγκάς ι γιαβερέν ντα “τι κοβλιαράς ι ντουκχ ο εκ ι γιαβερέσκι” κάθε ντιβές; Χρειαζίντιβελα τι μπαριαράς σουκάρ ιδιότητες, σαρ ισί τι αγαβάς ι γιαβερέν, τι μανγκάς-λεν σαρ πφραλά ντα τι σικαβάς λένγκε λατσσιπέ. (Διαβάνεν Κολοσσαείς 3:​12· 1 Πέτρου 3:8) Σαρ κα βοηθίνεν-αμέν ανταλά ιδιότητες; Κάνα πφαμπάσα αμαρέ πφραλένγκε ντα αγαβάσα λένγκι ντουκχ, κα μανγκάς μπουτ τι ντας-λεν παρηγοριά κάνα νακχένα βάσανα. Σαρ βακερντάς ο Ιησούς, «ο λάφια σο βακερέλα εκ τζενό σικαβένα καλέ πραγματέντζαρ ισί πφερντό λέσκο γκι. Ο λατσσό τζενό νικαβέλα ο λατσσέ πράγματα σο τθερέλα πι γκίστε». (Ματθ. 12:​34, 35) Οτθάρ, εκ μπουτ σημαντικός τρόπος για τι σικαβάς αμαρί αγάπη κο πφραλά ντα κο πφενιά σο τθερένα ανάγκη, ισί τι ντας-λεν παρηγοριά.

ΣΑΡ ΜΠΟΡΙΝΑΣΑ ΤΙ ΑΤΣΣΙΚΙΑΡΑΣ ΖΟΥΡΑΝΙ ΑΜΑΡΙ ΑΓΑΠΗ Ο ΕΚ Ι ΓΙΑΒΕΡΕΣΚΕ;

12. (α) Σόσκε πρέπει τι αβάς προσεκτικοί; (β) Καγιά ερώτηση κα ντικχάς ακανά;

¹² Σαρέ μπεϊντίνασα «τι μανγκάς ο εκ ι γιαβερές». (1 Ιωάν. 4:7) Όμως, ισί μπουτ σημαντικός τι θυμίνας ότι ο Ιησούς βακερντάς αμένγκε ότι “η αγάπη ι πο μπουτέ τζενένγκι κα σουρντιόλας”. (Ματθ. 24:​12) Ο Ιησούς να μανγκέλας τι βακερέλ ότι ο πο μπουτ λέσκε μαθητένταρ κα σουρντιόνας ο εκ κατά γιαβέρ. Όμως, πρέπει τι αβάς προσεκτικοί για μα τι επηρεάντιβας κατά ντουνιάς σο να τθερέλα μπουτ αγάπη. Καζόμ τθεράσα-λες ανταβά αμαρέ γκοντιάτε, για τι ντικχάς ακαγιά σημαντική ερώτηση: Σαρ μπορίνασα τι αγαβάς άμα αμαρί αγάπη ι πφραλένγκε ισί ζουρανί;

13. Σο μπορεί τι δοκιμάνελ αμαρί αγάπη;

¹³ Εκ τρόπος για τι αγαβάς καζόμ ζουρανί ισί αμαρί αγάπη ισί τι ντικχάς σαρ αντιδράνασα μερικέ περιπτωσιέντε κι ζωή. (2 Κορ. 8:8) Ο απόστολος Πέτρος κερέλα λάφι εκχέ ασακέ περιπτωσιάκε: «Ο πο σημαντικός σαριλένταρ ισί τι μανγκέν μπουτ ο εκ ι γιαβερές, επειδή η αγάπη ιτσσαρέλα μπουτ αμαρτίες». (1 Πέτρ. 4:8) Οτθάρ, ο αδυναμίες ντα ο ατέλειες ι γιαβερένγκε μπορίνενα τι δοκιμάνεν αμαρί αγάπη.

14. Σο αγάπη χρειαζίντιβασα, σαρ βακερέλα ο εδάφιος 1 Πέτρου 4:​8; Βακερέν εκ παράδειγμας.

¹⁴ Για τι σκεφτίνας προσεκτικά ο λάφια ι Πετρόσκε. Ο πρώτος μέρος ι εδαφιόσκο 8 βακερέλα αμένγκε σο αγάπη χρειαζίντιβελα τι τθεράς​—“τι μανγκάς μπουτ”. Ο πουρανό μπαλαμανό λάφι ἐκτενή σο χρησιμοποιηντάς ο Πέτρος, μανγκέλα τι βακερέλ «τεντωμέ». Αμαρέ τσσιμπάτε, ανταβά λάφι μεταφράντιβελα «μπουτ». Ο τελευταίος μέρος ι εδαφιόσκο βακερέλα αμένγκε καβά κα αβέλ ο αποτέλεσμας άμα κα μανγκάς μπουτ ι γιαβερέν. Η αγάπη κα ιτσσαρέλ ο αμαρτίες αμαρέ πφραλένγκε. Ανέν τουμαρέ γκοντιάτε ακαβά: Ασταράσα ι αγάπη αμαρέ ντουέ βαστέντζαρ, σαρ τι αβέλας εκ τραπεζομάντιλος σο τθερέλα λάστιχος, ντα τεντώνασα-λα καζόμ πο μπουτ αβέλα-πες μέχρι τι ιτσσαρέλ, όχι εκ, όχι ντούι, αλλά «μπουτ αμαρτίες». Ο λάφι «ιτσσαρέλα» ισί εκ γιαβέρ τρόπος για τι βακεράς ότι η αγάπη «συγχωρίνελα». Σαρ εκ τραπεζομάντιλος μπορίνελα τι ιτσσαρέλ εκ γρατζουνιά, αντικάς η αγάπη-ντα μπορίνελα τι ιτσσαρέλ ο αδυναμίες ντα ο ατέλειες ι γιαβερένγκε.

15. Άμα η αγάπη αμαρέ πφραλένγκε ντα πφενίνγκε ισί ζουρανί, σο κα τσσίντελ-αμέν ανταβά τι κεράς; (Κολοσσαείς 3:13)

¹⁵ Αμαρί αγάπη ι γιαβερένγκε πρέπει τι αβέλ αζόμ ζουρανί σο κα τσσίντελ-αμέν τι συγχωρίνας ο ατέλειες αμαρέ πφραλένγκε​—ατζέ-ντα άμα ανταβά ισί μπουτ δύσκολος μπάζιμα. (Διαβάνεν Κολοσσαείς 3:​13) Κάνα τελικά συγχωρίνασα ι γιαβερέν, σικαβάσα ότι αμαρί αγάπη ισί ζουρανί ντα ότι μανγκάσα τι κεράς ι Ιεχωβάσκο γκι. Σο γιαβέρ κα βοηθίνελ-αμέν τι συγχωρίνας ο λάθη ι γιαβερένγκε ντα μα τι ενοχλίνεν-αμέν ο πράγματα σο κερένα;

16, 17. Σο γιαβέρ κα βοηθίνελ-αμέν μα τι ντας σημασία κο χουρντέ αμαρτίες κι γιαβερένγκε; Βακερέν εκ παράδειγμας. (Ντικχέν ι φωτογραφία-ντα)

¹⁶ Τι τθερέν τουμαρέ γκοντιάτε ο λατσσέ χαρακτηριστικά τουμαρέ πφραλένγκε, όχι ο μπέτι. Σκεφτίνεν ακαβά παράδειγμας. Ανέν τουμαρέ γκοντιάτε ότι ισινέν εκχέ παρεάτε πφραλέντζαρ ντα πφενίντζαρ. Νακχένα σουκάρ ντα κο τέλος νικαβένα εκ φωτογραφία σαρέ γιεκ. Όμως, νικαβένα ατζέ ντούι φωτογραφίες επειδή σκεφτίνενα ότι η πρώτη μπέκιμ μα τι νικίστιλι λατσσί. Οτθάρ, ακανά τθερένα τριν φωτογραφίες. Αλλά εκχιάτε, ντικχένα ότι εκ πφραλ μουκχλάς πο τσικάτ. Σο κα κερέν ανταγιά φωτογραφία; Σβήνενα-λα επειδή τθερένα ατζέ ντούι ντανέ σο σαρί η παρέα ασάλα, εμ οντουβά συγκεκριμέ πφραλ.

¹⁷ Ο φωτογραφίες σο ατσσικιαράσα μοιάζενα με το αναμνήσεις σο τραμπίνασα τι τθεράς. Ο πο μπουτ φαρ, τθεράσα σουκάρ αναμνήσεις κατά πράγματα σο τζουβντιλάμ αμαρέ πφραλέντζαρ ντα αμαρέ πφενίντζαρ. Αλλά μπέκιμ εκχέ περιπτωσιάτε, εκ πφραλ ή εκ πφεν βακερέλα ή κερέλα κάτι σο να σικαβέλα αγάπη. Σο πρέπει τι κεράς με την ανάμνηση ανταγιά; Σόσκε μα τι προσπαθίνεν τι σβήνεν-λα, σαρ κα σβήνενας εκ φωτογραφία οντουλένταρ; (Παρ. 19:​11· Εφεσ. 4:​32) Μπορίνασα τι μπιστράς, τι σβήνας σαρ τι βακεράας, ι χουρντί αμαρτία σο κερντάς αμαρό πφραλ σόσκε τθεράσα μπουτ λατσσέ αναμνήσεις κατά σουκάρ πράγματα σο τζουβντιλάμ λέσαρ. Ανταλά ισί ο αναμνήσεις σο μανγκάσα τι τθεράς αμαρέ γκοντιάτε ντα τι αβέν αμένγκε σαρ θησαυρός.

ΣΟΣΚΕ ΧΡΕΙΑΖΙΝΤΙΒΑΣΑ ΑΓΑΠΗ ΕΙΔΙΚΑ ΑΝΤΙΒΕΣ

18. Καλά σημαντικά σημεία για την αγάπη ντικχλάμ ανταλέ μαθημάστε;

¹⁸ Σόσκε πρέπει τι ατσσικιαράς ζουρανί αγάπη ο εκ ι γιαβερέσκε; Σαρ ντικχλάμ, κάνα σικαβάσα αγάπη αμαρέ πφραλένγκε ντα αμαρέ πφενίνγκε, σικαβάσα αγάπη κο Ιεχωβά. Σαρ σικαβάσα αγάπη αμαρέ πφραλένγκε; Εκ τρόπος ισί τι ντας-λεν παρηγοριά, δηλαδή “τι κοβλιαράς ι ντουκχ ο εκ ι γιαβερέσκι”. Κα μπορίνας τι κεράς-λες ανταβά άμα πφαμπάσα ι γιαβερένγκε. Σαρ μπορίνασα τι ατσσικιαράς ζουρανί αγάπη ο εκ ι γιαβερέσκε; Κάνα κεράσα ο πο λατσσό σο μπορίνασα για τι συγχωρίνας ο λάθη ι γιαβερένγκε.

19. Σόσκε ισί μπουτ σημαντικός αντιβές τι σικαβάς αγάπη ο εκ ι γιαβερέσκε;

¹⁹ Σόσκε ισί μπουτ σημαντικός αντιβές τι σικαβάς αγάπη ο εκ ι γιαβερέσκε; Ντεν προσοχή κο λόγος σο βακερντάς ο Πέτρος: «Ο τέλος σαρέ ι πραγματένγκο ισί πασέ. Οτθάρ . . . τι μανγκέν μπουτ ο εκ ι γιαβερές». (1 Πέτρ. 4:7, 8) Επειδή ο τέλος ανταλέ πφιρνέ ντουνιάσκο καζόμ τζάλα ισί πο πασέ, σο μπεκλεντίνασα τι αβέλ ανγκλ’ αμέντε; Ο Ιησούς βακερντάας ακαβά, σο τθερέλα τι κερέλ λέσκε μαθητέντζαρ: «Σαρέ ο τθεμά κα μισίνεν-τουμέν ιτιρί μι ναβέσταρ». (Ματθ. 24:9) Για τι ατσσάς πιστοί κο Ιεχωβά παρόλο σο κα μισίνεν-αμέν, πρέπει τι ατσσάς ενωμέ. Καζόμ κεράσα-λες ανταβά, ο Μπενγκ ποτές να κα μπορίνελ τι τρουγίνελ-αμέν, σόσκε η αγάπη «ενώνελα τέλεια ι τζενέν».​—Κολ. 3:​14· Φιλιπ. 2:1, 2.