Μανγκέν Βοήθεια Κατά Πρεσβύτεροι

1. Σαρ σικαβέλα ο Ιεχωβά ότι τθεράσα μπαρί αξία λέσκε;

Ι ΙΕΧΩΒΑΣΚΕ τθερένα μπαρί αξία οντουλά σο υπηρετίνενα-λες ντα φροντίνελα-λεν σαρ εκ λατσσό τσομπάνης φροντίνελα πι μπρακέν. Ντινάς πι αγαπημέ Τσσαβές λένγκε ντα μανγκέλα κατά πρεσβύτεροι τι φροντίνεν-λεν. (Πράξ. 20:28) Ο Ντεβέλ μανγκέλα κατά πρεσβύτεροι τι σικαβέν λατσσιπέ λέσκε μπρακένγκε. Ο πρεσβύτεροι ακολουθίνενα ο οδηγίες ι Ιησούσκε, ντένα-αμέν ζορ ντα βοηθίνενα-αμέν τι ατσσάς πιστοί κο Ιεχωβά.​—Ησ. 32:1, 2.

2. Σαρ βακερέλα ο εδάφιος Ιεζεκιήλ 34:15, 16, καλέ τζενένγκε πφαμπόλα μπουτ ο Ιεχωβά;

² Ο Ιεχωβά πφαμπόλα μπουτ σαρέ πι υπηρετόνγκε, αλλά πφαμπόλα ατζέ πο μπουτ οντουλένγκε σο τθερένα ντουκχ. Μερικοί μπορεί τι τθεράσα πφανγκό γκι επειδή κερντάμ λάθη αλλά ο Ιεχωβά χρησιμοποιήνελα ι πρεσβυτερόν για τι βοηθίνελ-αμέν. (Διαβάνεν Ιεζεκιήλ 34:15, 16) Όμως, ο Ιεχωβά μανγκέλα αμένταρ τι μανγκάς βοήθεια κάνα-ντα τι τθεράσα-λα ανάγκη. Βοβ να μανγκέλα αμένταρ σάντε τι κεράς προσευχή λέστε για τι βοηθίνελ-αμέν, αλλά μπεσέλα αμένταρ επίσης τι μανγκάς βοήθεια κατά «τσομπάνια ντα δάσκαλοι» κι κχανγκιρί.​—Εφεσ. 4:11, 12.

3. Σαρ μπορίνασα σαρέ τι βοηθίντιβας κάνα σκεφτίνασα καγιά ισί η μπουτί ι πρεσβυτερόνγκι;

³ Ανταλέ μαθημάστε, κα σικλιάς πο μπουτ σαρ χρησιμοποιήνελα ο Ιεχωβά ι πρεσβυτερόν για τι ντεν βοήθεια οντουλέντε σο χρειαζίντιβενα-λα. Κα ντικχάς ακαλά ερωτήσεις: Κάνα πρέπει τι μανγκάς βοήθεια κατά πρεσβύτεροι; Σόσκε πρέπει τι κεράς-λες ανταβά, ντα σαρ βοηθίνενα-αμέν; Ατζέ-ντα άμα ακανά να χρειαζίντιβασα βοήθεια κατά πρεσβύτεροι, ανταλά απαντήσεις κα βοηθίνεν-αμέν τι εκτιμίνας ι μπουτί σο κερένα ανταλά πφραλά ντα κάνα κα χρειαζίντιβας λένγκι βοήθεια κο μέλλον κα αβέλ αμένγκε πο εύκολος τι μανγκάς-λα.

ΚΑΝΑ ΠΡΕΠΕΙ ΤΙ ΜΑΝΓΚΑΣ ΒΟΗΘΕΙΑ ΚΑΤΑ ΠΡΕΣΒΥΤΕΡΟΙ;

4. Σαρ τζανάσα ότι ο εδάφια Ιακώβου 5:14-16, 19, 20 κερένα λάφι τζενένγκε σο ισί νασφαλέ πνευματικά; (Ντικχέν ο φωτογραφίες-ντα)

⁴ Ο μαθητής Ιάκωβος εξηγιντάς σαρ χρησιμοποιήνελα ο Ιεχωβά ι πρεσβυτερόν για τι βοηθίνεν-αμέν. Γραφιντάς: «Ισί καέκ τουμένταρ νασφαλό; Τι ντελ βίκος ι πρεσβυτερόν σο ισί κι κχανγκιρί». (Διαβάνεν Ιακώβου 5:14-16, 19, 20) Ο Ιάκωβος βακερέλα σο πρέπει τι κερέλ εκ τζενό σο μανγκέλα τι λατσσαρέλ πάλι πι σχέση ι Ιεχωβάσαρ. Για παράδειγμας, βακερέλα ότι άμα εκ τζενό ισί πνευματικά νασφαλό πρέπει τι μανγκέλ βοήθεια, όχι από εκ γιατρός, αλλά κατά πρεσβύτεροι. Επίσης εξηγιντάς ότι αβέλα λατσσές κάνα συγχωρίντιβενα λέσκε αμαρτίες. Εκ τζενό σο ισί μπαγιά νασφαλό χρειαζίντιβελα τι τζαλ κο γιατρός, τι βακερέλ λέσκε για το νασφαλιπέ σο τθερέλα ντα σοράν τι ντελ καν κο συμβουλές λέσκε. Αντικάς αμέν-ντα κάνα χρειαζίντιβασα βοήθεια για τι αβάς πάλι φίλοι ι Ιεχωβάσαρ, πρέπει τι τζας σε εκ πρεσβύτερος, τι βακεράς λέσκε ο πρόβλημας σο τθεράσα, ντα σοράν τι ντας καν κο συμβουλές σο κα ντελ-αμέν αντράλ κατά Γραφή.

5. Σαρ κα αγαβάς άμα αμαρί φιλία ι Ιεχωβάσαρ αρχίνελα τι αβέλ μπίζουρανι;

⁵ Κο Ιακώβου κο κεφάλαιος 5, ο Ιάκωβος βακερντάς αμένγκε τι κεράς λάφι ι πρεσβυτερόντζαρ κάνα νιωθίνασα ότι αρχίνασα τι χασαράς αμαρί φιλία ι Ιεχωβάσαρ. Αλλά ισί μπουτ σημαντικός τι μανγκάς βοήθεια πριν τι κεράς μπαρό ζιάνι κι φιλία σο τθεράσα ι Ιεχωβάσαρ! Η Αγία Γραφή βακερέλα αμένγκε ότι άμα να ισινάμ προσεκτικοί, κα μπορίναας τι πακιάς ότι τθεράσα λατσσί φιλία ι Ιεχωβάσαρ ενώ κι πραγματικότητα να τθεράσα. (Ιακ. 1:22) Μερικοί κατά πρώτοι Χριστιανοί κο Σάρδεις κερντέ ανταβά λάθος ντα ο Ιησούς βακερντάς λένγκε ότι να κερένας πια ι Ιεχωβάσκο γκι. (Αποκ. 3:1, 2) Σαρ κα αγαβάς άμα τθεράσα λατσσί φιλία ι Ιεχωβάσαρ; Εκ τρόπος ισί τι σκεφτίνας σαρ νιωθίναας ι Ιεχωβάσκε κάνα μπολντιλάμας ντα σαρ νιωθίνασα ακανά. (Αποκ. 2:4, 5) Κα μπορίναας τι πουτσάς αμαρό νεαυτός: “Μπεϊντίναβα τι διαβάναβ ι Γραφή ντα τι σκεφτίναβ λατσσές οντουλά σο διαβάναβα σαρ κεράβας πο ανγκλέ; Μήπως να τζάβα σαρέ κο συναθροίσεις; Κάνα τζάβα κο συναθροίσεις, ισινόμ προετοιμασμέ; Συνεχίνελα ο έργος τι αβέλ σημαντικός μάνγκε; Ή μπεϊντίναβα πο μπουτ τι νταβ μο χρόνος γιαβερέ πραγματέντε; Μήπως σκεφτίναβα ο λοβέ πο μπουτ απ’ ότι σκεφτίναβας-λεν πο ανγκλέ;” Άμα απαντιντάμ βα σε εκ κατά ερωτήσεις ανταλά, ανταβά κα μπορίνελας τι σικαβέλ ότι αμαρί φιλία ι Ιεχωβάσαρ νανέ αζόμ ζουρανί σαρ ισινέ πριν ντα μπέκιμ τι αβέν χειρότερα ο πράγματα άμα να κα κεράς τίποτα ανταλέσκε. Άμα να μπορίνασα τι κεράς αμαρί φιλία ι Ιεχωβάσαρ ζουρανί κορκορέ, ή άμα κερντάμ ήδη κάτι σο τζανάσα ότι να κερέλα ι Ιεχωβάσκο γκι, πρέπει τι μανγκάς βοήθεια κατά πρεσβυτέρους.

6. Σο πρέπει τι κερέν οντουλά σο κερντέ εκ σοβαρή αμαρτία;

⁶ Κάποιες αμαρτίες σο μπορεί τι κερέλ εκ τζενό ισί αζόμ σοβαρές σο η κχανγκιρί κα μπορίνελας τι ατσσικιαρέλ-λες ντουρ. Άμα κερντάμ εκ ασακί αμαρτία, πρέπει τι κεράς λάφι κο πρεσβύτεροι. (1 Κορ. 5:11-13) Εκ τζενό σο κερντάς εκ σοβαρή αμαρτία να μπορίνελα τι λατσσαρέλ πάλι πι φιλία ι Ιεχωβάσαρ κορκορί. Για τι λας ι συγχώρηση ι Ιεχωβάσκι αντράλ κατά λύτρος, πρέπει “τι σικαβάς οντουλέντζαρ σο κεράσα ότι μετανιωσάλαμ”. (Πράξ. 26:20) Εκ κατά πράγματα σο πρέπει τι κεράς για τι σικαβάς-λες ανταβά ισί τι κεράς λάφι ι πρεσβυτερόντζαρ.

7. Καλά γιαβερά τζενέ χρειαζίντιβενα βοήθεια κατά πρεσβύτεροι;

⁷ Ο πρεσβύτεροι να βοηθίνενα σάντε οντουλέν σο κερντέ εκ σοβαρή αμαρτία. Βον βοηθίνενα οντουλέν-ντα σο ισί μπίζουρανε πνευματικά. (Πράξ. 20:35) Για παράδειγμας, μπορεί τι νιωθίνενα ότι ισί τουμένγκε μπουτ δύσκολος τι τζαν κόντρα κο μπέτι πράγματα σο μανγκέλα τουμαρό γκι. Τουμαρό αγώνας μπορεί τι ισί ατζέ πο δύσκολος άμα προτού τι αβέν Χριστιανοί λένας ναρκωτικά, ντικχένας πορνογραφία, ή κερένας λουμνιπέ. Να χρειαζίντιβελα τι τζαν κόντρα ανταλέ πραγματέντε κορκορί. Μπορίνενα τι κερέν λάφι εκχέ πρεσβυτερόσαρ σο ισινέν σίγουροι ότι κα ασουνέλ-τουμέν προσεκτικά, κα ντελ-τουμέν λατσσέ συμβουλές ντα κα βοηθίνελ-τουμέν τι αβέν σίγουροι ότι καζόμ συνεχίνενα τι τζαν κόντρα κο μπέτι πράγματα σο μανγκέλα ο γκι, κερένα ι Ιεχωβάς τι χαιρίνελ. (Εκκλ. 4:12) Μπορεί τι ισινέν στεναχωριμέ επειδή συνεχίνενα τι μανγκέν κάποια μπέτι πράγματα. Ο πρεσβύτερος όμως κα ανέλ τουμαρέ γκοντιάτε ότι ο Ιεχωβά ισί χαρούμενος τουμέντζαρ επειδή μανγκλέν βοήθεια. Αντικάς σικαβένα ότι να ντένα μπέσα τουμαρέ ζοριάτε ντα ότι πφαμπόνα μπουτ ι Ιεχωβάσκε ντα για το αισθήματα λέσκε.​—1 Κορ. 10:12.

8. Χρειαζίντιβελα τι κεράς λάφι κο πρεσβύτεροι για κάθε λάθος σο κεράσα; Εξηγίνεν.

⁸ Να χρειαζίντιβελα τι κεράς λάφι ι πρεσβυτερόντζαρ για κάθε λάθος σο κεράσα. Για παράδειγμας, κάποια στιγμή μπορεί τι βακερέν εκ λάφι σο κα πληγώνελ εκχέ πφραλές ή πφενιά ή τι νευριάνεν λέντζαρ. Αντίς τι κερέν λάφι σε εκ πρεσβύτερος, μπορίνενα τι ακολουθίνεν ι συμβουλή ι Ιησούσκι ντα τι τζαν τουμαρέ πφραλέστε ή πφενιάτε για τι κερέν ειρήνη. (Ματθ. 5:23, 24) Κα μπορίνενας τι ρόντεν πο μπουτ κο έντυπα σο τθεράσα για τι βοηθίντιβεν τι τθερέν πο κοβλό γκι, πο μπουτ υπομονή ντα τι μπορίνεν τι κερέν κουμάντος πο λατσσές οντουλά σο νιωθίνενα. Όμως άμα συνεχίνενα τι τθερέν ανταβά πρόβλημας, μπορίνενα τι μανγκέν βοήθεια από εκ πρεσβύτερος. Κο γράμμας σο μπουτσσαντάς κι κχανγκιρί κο Φίλιπποι, ο απόστολος Παύλος μανγκλάς από εκ πφραλ τι βοηθίνελ την Ευωδία ντα την Συντύχη τι αρακχέν-λεν. Άκ’ αντικάς κα μπορίνελας τι βοηθίνελ τουμέν-ντα εκ πρεσβύτερος.​—Φιλιπ. 4:2, 3.

ΣΟΣΚΕ ΠΡΕΠΕΙ ΤΙ ΚΕΡΑΣ ΛΑΦΙ Ι ΠΡΕΣΒΥΤΕΡΟΝΤΖΑΡ;

9. Σόσκε δεν πρέπει τι μουκχάς ι λατζ τι τσσιναβέλ-αμέν τι κεράς λάφι ι πρεσβυτερόντζαρ; (Παροιμίες 28:13)

⁹ Χρειαζίντιβελα πίστη ντα θάρρος για τι μανγκάς βοήθεια κάνα κεράσα εκ σοβαρή αμαρτία ή κάνα νιωθίνασα ότι δυσκολίντιβασα τι τζας κόντρα κο μπέτι πράγματα σο μανγκέλα αμαρό γκι. Δεν πρέπει τι μουκχάς ι λατζ τι τσσιναβέλ-αμέν τι μανγκάς βοήθεια κατά πρεσβύτεροι. Σόσκε; Επειδή ο Ιεχωβά ντινάς-αμέν ι πρεσβυτερόν για τι βοηθίνεν-αμέν τι ατσσικιαράς αμαρί φιλία ι Ιεχωβάσαρ ζουρανί. Άρα κάνα κεράσα λάφι κο πρεσβύτεροι σικαβάσα ότι ντάσα μπέσα κο Ιεχωβά ντα ότι ασουνάσα-λες. Αγαβάσα ότι χρειαζίντιβασα λέσκι βοήθεια για τι συνεχίνας τι κεράς ο σωστός. (Ψαλμ. 94:18) Ντα άμα αμαρτιντάμ, ο Ιεχωβά κα συγχωρίνελ αμαρέ αμαρτίες άμα μουτθαβάσα-λεν ντα να κεράσα-λεν πάλι.​—Διαβάνεν Παροιμίες 28:13.

10. Σο μπορεί τι αβέλ-πες άμα προσπαθιντάμ τι γκεραβάς αμαρέ αμαρτίες;

¹⁰ Κάνα μανγκάσα βοήθεια κατά πρεσβύτεροι όταν κεράσα εκ αμαρτία, ο Ιεχωβά μπορίνελα τι συγχωρίνελ-αμέν ντα τι τθεράς πάλι εκ λατσσί φιλία λέσαρ. Όμως άμα να γκιλάμ κο πρεσβύτεροι, κα νιωθίνας ατζέ πο μπέτι αντρ’ αμέντε. Ο βασιλιάς Δαβίδ για κάποιος καιρός να βακερντάς πουθενά πο αμαρτίες. Οτθάρ, τθερέλας κατάθλιψη ντα μπαρί ντουκχ επειδή τζανέλας ότι χαλαντάας πι φιλία ι Ιεχωβάσαρ. (Ψαλμ. 32:3-5) Κάνα τθεράσα εκ νασφαλιπέ ή εκ ντιπέ, καζόμ πο μπουτ μπεσάσα για τι αβέλ λατσσές κορκορό, αζόμ πο μπουτ ντουκχάσα ντα ο πράγματα μπορεί τι αβέν χειρότερα-ντα. Αντικάς-ντα κάνα κεράσα εκ σοβαρή αμαρτία, καζόμ πο μπουτ αργίνασα τι μανγκάς βοήθεια κατά πρεσβύτεροι, αζόμ πο μπουτ ταλαιπωρίντιβασα ντα ντουκχάσα. Ο Ιεχωβά αγαβέλα-λες ανταβά, οτθάρ ντέλα-αμέν βίκος τι «τακτοποιήνας ο θέματα» σο τθεράσα λέσαρ αντράλ κατά πρεσβύτεροι σο ντινάς-αμέν για τι αβάς πάλι πνευματικά λατσσές.​—Ησ. 1:5, 6, 18.

11. Σαρ μπορεί τι επηρεάντιβεν ο γιαβερά άμα κα γκεραβάας εκ σοβαρή αμαρτία;

¹¹ Άμα κα γκεραβάας εκ σοβαρή αμαρτία σο κερντάμ, γιαβερά-ντα τζενέ μπορεί τι επηρεάντιβεν. Μπορεί τι κεράς ι Ιεχωβάς μα τι ντελ αζόμ μπουτ άγιος πνεύμας κι κχανγκιρί ντα μπορεί τι χασάρντιβελ η ειρήνη κατά πφραλά ντα κατά πφενιά. (Εφεσ. 4:30) Ο ίδιος πρέπει τι κεράς άμα σικλιλάμ ότι κάποιος γιαβέρ κατά κχανγκιρί κερντάς εκ σοβαρή αμαρτία. Πρέπει τι βακεράς λέσκε τι κερέλ λάφι κο πρεσβύτεροι.a Άμα κα γκεραβάας εκ σοβαρή αμαρτία σο κερντάς κάποιος γιαβέρ, ανταβά κα κερέλας αμέν-ντα τι αμαρτίνας ανγκλάλ κο γιακχά κι Ιεχωβάσκε. (Λευιτ. 5:1) Αμαρί αγάπη ι Ιεχωβάσκε πρέπει τι τσσίντελ-αμέν τι τζας ντα τι βακεράς ι αλήθεια. Ανταλέ τροπόσαρ, βοηθίνασα εμ ι κχανγκιρί τι ατσσόλ πάκι εμ ι τζενές σο αμαρτιντάς τι λατσσαρέλ πάλι πι φιλία ι Ιεχωβάσαρ.

ΣΑΡ ΒΟΗΘΙΝΕΝΑ-ΑΜΕΝ Ο ΠΡΕΣΒΥΤΕΡΟΙ;

12. Σαρ βοηθίνενα ο πρεσβύτεροι οντουλέν σο ισί μπίζουρανε πνευματικά;

¹² Η Αγία Γραφή βακερέλα κο πρεσβύτεροι τι βοηθίνεν οντουλέν σο ισί μπίζουρανε πνευματικά. (1 Θεσ. 5:14) Άμα κερντέν εκ αμαρτία, ο πρεσβύτεροι μπορεί τι κερέν τουμένγκε ερωτήσεις για τι αγαβέν σο σκεφτίνενα ντα σαρ νιωθίνενα. (Παρ. 20:5) Μπορεί μα τι αβέλ εύκολος τουμένγκε τι κερέν λάφι κο πρεσβύτεροι. Μπέκιμ λατζάνα ή δυσκολίντιβενα τι βακερέν σο αβιλό-πες. Αλλά μπορίνενα τι βοηθίνεν ι πρεσβυτερόν άμα κα βακερέν λένγκε καβά πράγμας δυσκολίνελα-τουμέν. Να χρειαζίντιβελα τι νταρέν ότι κα βακερέν κάτι λάθος. (Ιώβ 6:3) Αντίς τι νικαβέν σουγκό εκ συμπέρασμας, ο πρεσβύτεροι κα προσπαθίνεν τι ασουνέν μπουτ λατσσές ντα τι αγαβέν μπαγιά σαρ ισί ο πράγματα πριν τι ντεν-τουμέν συμβουλές κατά Γραφή. (Παρ. 18:13) Ο πρεσβύτεροι αγαβένα ότι χρειαζίντιβελα χρόνος για τι ντεν εκχέ τζενέστε ι βοήθεια σο τθερέλα ανάγκη. Οτθάρ αγαβένα ότι για τι βοηθίνεν-λες μπορεί τι χρειαζίντιβελ τι κερέν πο μπουτ από εκ συζητήσεις.

13. Σαρ βοηθίνενα-αμέν ο προσευχές ντα ο συμβουλές σο ντένα-αμέν ο πρεσβύτεροι κατά Γραφή; (Ντικχέν ο φωτογραφίες-ντα)

¹³ Κάνα μανγκένα βοήθεια κατά πρεσβύτεροι, βον κα προσπαθίνεν μα τι κερέν-τουμέν τι νιωθίνεν πο μπουτ τύψεις. Οκιά μπάνταρ, κα κερέν προσευχή τουμένγκε. Μπορεί τι ατσσόν πουταρντέ μόσαρ κάνα κα ντικχέν καζόμ “ζορ τθερένα” ο προσευχές λένγκε ντα καζόμ “μπορίνενα τι βοηθίνεν-τουμέν”. Αντρέ κι βοήθεια σο κα ντεν ισί «τι τσσουβέν [τουμαρέ] σορέστε λάδι κι Ιεχωβάσκο ναβ». (Ιακ. 5:14-16) Ανταβά «λάδι» μανγκέλα τι σικαβέλ ι αλήθεια ι Ντεβλέσκε Λαφίσκι. Αντικάς ο πρεσβύτεροι κα συζητίνεν τουμέντζαρ εδάφια κατά Γραφή σο κα λοκχιαρέν τουμαρό γκι ντα κα βοηθίνεν-τουμέν τι τθερέν πάλι εκ λατσσί φιλία ι Ιεχωβάσαρ. (Ησ. 57:18) Ο συμβουλές σο κα βακερέν τουμένγκε κατά Γραφή κα ντεν-τουμέν ι ζορ σο χρειαζίντιβενα για τι συνεχίνεν τι κερέν ο σωστός. Αντράλ λένταρ, μπορίνενα τι ασουνέν ι φωνή ι Ιεχωβάσκι τι βακερέλ τουμένγκε: «Ακαβά ισί ο ντρομ. Πφιρέν λέστε».​—Ησ. 30:21.

14. Σαρ σικαβέλα ο Γαλάτες 6:1, σαρ βοηθίνενα ο πρεσβύτεροι οντουλέν σο λιντέ εκ «λάθος ντρομ»; (Ντικχέν ο φωτογραφίες-ντα)

¹⁴ Διαβάνεν Γαλάτες 6:1. Κάνα εκ Χριστιανός λέλα «εκ λάθος ντρομ», να κερέλα οντουβά σο μανγκέλα ο Ιεχωβά. Ανταβά λάθος ντρομ μπορεί τι ισί εκ λάθος απόφαση σο λιντάς ή εκ μπαρί αμαρτία. Επειδή ο πρεσβύτεροι μανγκένα πουμαρέ πφραλές, “κερένα ο πο λατσσό για τι διορθώνεν-λες κοβλέ γκίσαρ”. Ο πουρανό μπαλαμανό λάφι σο μεταφράντιβελα «διορθώνελ» μπορεί τι μανγκέλα τι σικαβέλ ι μπουτί σο κερέλα εκ γιατρός για τι λατσσαρέλ εκ πφανγκό κόκαλος ντα αντικάς μα τι αβέλ-πες πο μπαρό ζιάνι. Εκ λατσσό γιατρός προσοχίνελα κάνα λατσσαρέλα ο κόκαλος εκχέ τζενέσκο για μα τι ανέλ λέσκε πο μπαρί ντουκχ. Αντικάς ο πρεσβύτεροι-ντα, κάνα διορθώνενα εκχέ τζενές σο λιντάς εκ λάθος ντρομ, να μανγκένα τι ανέν λέσκε πο μπαρί ντουκχ. Οτθάρ, κερένα ο πο λατσσό για τι διορθώνεν-λες σουκάρ τροπόσαρ. Η Γραφή βακερέλα επίσης κο πρεσβύτεροι τι “τθερέν πουμαρί γκοντί για μα τι περέν βον-ντα κο πειρασμός”. Καζόμ βοηθίνενα εκχέ τζενές τι διορθώνελ πο ντρομ, πρέπει τι ντεν-πες γκοντί ότι βον-ντα ισί ατελείς ντα κα μπορίνενας τι λεν εκ λάθος ντρομ. Οτθάρ δεν πρέπει τι σκεφτίνεν ότι ισί πο λατσσέ κατά τζενό σο προσπαθίνενα τι βοηθίνεν. Οκιά μπάνταρ, ισί ταπεινοί ντα σικαβένα ότι πφαμπόνα λέσκε.​—1 Πέτρ. 3:8.

15. Σο μπορίνασα τι κεράς άμα τθεράσα εκ πρόβλημας;

¹⁵ Μπορίνασα τι ντας μπέσα κο πρεσβύτεροι αμαρέ κχανγκιριάκε. Ο Ιεχωβά σικλιαρντάς-λεν μα τι μουτθαβέν κο γιαβερά ο πράγματα σο τζανένα αμένγκε. Επίσης σικλιλέ τι ντεν συμβουλές αντράλ κατά Γραφή αντίς τι βακερέν αμένγκε οντουβά σο πακιάνα βον ότι ισί σωστός. Ντα τζανένα ότι πρέπει τι συνεχίνεν τι βοηθίνεν-αμέν τι ντας-λεν πέρα αμαρέ προβληματέντζαρ. (Παρ. 11:13· Γαλ. 6:2) Ο κάθε πρεσβύτερος τθερέλα διαφορετικός χαρακτήρας. Επίσης μερικοί υπηρετίνενα πο μπουτ βακίτι σαρ πρεσβύτεροι ενώ γιαβερά πο χάνικ βακίτι. Αλλά μανγκάσα τι νιωθίνας άνετα τι κεράς λάφι αμαρέ προβλημάσκε σαρέ ι πρεσβυτερόντζαρ. Ανταβά να μανγκέλα τι βακερέλ ότι κα τζάας κατά εκ πρεσβύτερος κο γιαβέρ μέχρι τι αρακχάς εκχές σο κα βακερέλ αμένγκε οντουβά σο μανγκάσα τι ασουνάς. Άμα κα κεράας-λες ανταβά, κα αβάας σαρ μερικά τζενέ κο πουρανέ μπρεσά σο αντίς τι «ασουνέν ο λατσσό σικλιαριπέ» ι Ντεβλέσκο μανγκένας “τι βακερέν λένγκε ο γιαβερά σάντε οντουβά σο μανγκένας τι ασουνέν”. (2 Τιμ. 4:3) Κάνα μανγκάσα βοήθεια εκχέ πρεσβυτερόσταρ για εκ πρόβλημας σο τθεράσα, μπορεί τι πουτσέλ-αμέν άμα κερντάμ λάφι ανταλέσκε γιαβερέ-ντα πρεσβυτερόντζαρ ντα σο συμβουλή ντινέ-αμέν. Ντα επειδή ισί ταπεινός, μπορεί πρώτα τι πουτσέλ εκχέ γιαβερέ πρεσβυτερός πριν τι ντελ-αμέν εκ συμβουλή.​—Παρ. 13:10.

ΙΣΙ ΑΜΑΡΙ ΕΥΘΥΝΗ

16. Καγιά ευθύνη τθερέλα ο κάθε εκ αμένταρ;

¹⁶ Παρόλο σο ο πρεσβύτεροι ντένα-αμέν συμβουλές κάνα τθεράσα προβλήματα, να βακερένα αμένγκε σο τι κεράς. Ισί αμαρί ευθύνη τι σικαβάς κο Ιεχωβά οντουλέντζαρ σο βακεράσα ντα κεράσα ότι μανγκάσα-λες ντα ότι χαιρίνασα τι κεράς λέσκο γκι. Βοβ κα βοηθίνελ-αμέν τι λας λατσσέ αποφάσεις ντα τι ατσσάς πιστοί λέστε. (Ρωμ. 14:12) Άκ’ σόσκε ο πρεσβύτεροι να βακερένα αμένγκε σο τι κεράς αλλά χρησιμοποιήνενα ι Γραφή για τι βοηθίνεν-αμέν τι αγαβάς σαρ σκεφτίνελα ο Ιεχωβά εκχέ θεμάσκε, ντα σοράν τι λας αμαρί απόφαση. Κάνα σκεφτίνασα ο συμβουλές σο ντινέ-αμέν αντράλ κατά Γραφή ντα κεράσα-λεν, σικλιάσα τι σκεφτίνας ατζέ πο μπουτ σαρ ο Ιεχωβά ντα τι λας γκοντιαβέρ αποφάσεις.​—Εβρ. 5:14.

17. Σο πρέπει τι κεράς άμα αμαρί πίστη αβιλί μπίζουρανι ή άμα κερντάμ εκ αμαρτία;

¹⁷ Σο μπαρό προνόμιος τθεράσα τι αβάς μπρακέ ι Ιεχωβάσκε! Ο Ιεχωβά μπουτσσαντάς ι Ιησούς, “ι λατσσέ τσομπανής”, σο ντινάς πι ζωή αμένγκε για τι μπορίνας τι τζουβντιάς για πάντα. (Ιωάν. 10:11) Ο Ιεχωβά ντινάς-αμέν επίσης ι πρεσβυτερόν για τι φροντίνεν-αμέν, αντικάς σαρ ντινάας πο λάφι: «Ντα κα νταβ-τουμέν τσομπανίν αντικάς σαρ μανγκέλα μο γκι, ντα κα φροντίνεν-τουμέν. Κα ντεν-τουμέν σικλιαριπέ ντα κα βοηθίνεν-τουμέν τι αγαβέν σαρ ισί μπαγιά ο πράγματα». (Ιερ. 3:15) Οτθάρ, άμα νιωθίνασα ότι αμαρί πίστη αβιλί μπίζουρανι ή άμα κερντάμ εκ αμαρτία, δεν πρέπει τι νταράς τι μανγκάς ι βοήθεια ι πρεσβυτερόνγκι. Αντικάς κα ντικχάς σο σουκάρ τροπόσαρ χρησιμοποιήνελα-λεν ο Ιεχωβά για τι βοηθίνελ-αμέν.