Σο Πρέπει τι Κερέν Κάνα ο Γιαβερά Αδικίνενα-τουμέν;

1, 2. Σο κερένα μερικά τζενέ κάνα βον ή ο γιαβερά νακχένα εκ αδικία, ντα σο μπορεί τι πουτσάς-αμέν;

ΤΖΟΥΒΝΤΙΑΣΑ εκχέ ντουνιάστε σο ισί άδικος. Ο τζενέ νακχένα αδικίες για μπουτ λόγους, σαρ για παράδειγμας ιτιρί κατά εμφάνιση λένγκι, επειδή ισί τσορορέ, ισί γιαβερέ τθεμέσταρ, από εκ γιαβέρ φυλή, ή κάτι γιαβέρ. Μερικά τζενέ νακχένα δυσκολίες επειδή κάποιοι χουλανέ έμποροι ή κάποια τζενέ κι κυβέρνηση χάλα-λεν ανάγκη σάντε σαρ τι νικαβέν πο μπουτ λοβέ. Ανταλά ντα γιαβερά αδικίες επηρεάνενα είτε αμέν είτε γιαβερέ τζενέν σο τζανάσα.

² Μπουτ τζενέ χολιάνενα επειδή κάποιος αδικιντάς-λεν ή επειδή ντικχένα γιαβερέν τι αδικίντιβεν. Σαρέ μανγκάσα τι τζουβντιάς εκχέ ντουνιάστε σο κα νιωθίνας αρακχαντέ ντα κα συμπεριφερίντιβεν αμένγκε δίκαια. Μερικοί προσπαθίνενα τι λύνεν ο προβλήματα σο ντικχένα κο ντουνιάς ή πουμαρέ τθεμέστε. Μαρένα-πες για τι ασούντιβεν ο παράπονα σο κερένα για την κυβέρνηση ντα για το νόμοι ή ψηφίνενα πολιτικόν σο ντένα πουμαρό λάφι τι λύνεν ο προβλήματα. Όμως, σαρ Χριστιανοί σικλιάσα μα τι αβάς «σαρ ο ντουνιάς» ντα τι μπεσάς για τη Βασιλεία ι Ντεβλέσκι τι εξαφανίνελ σαρί ι αδικία. (Ιωάν. 17:16) Αλλά παρόλο σο τζανάσα-λες ανταβά, μπορεί μπάζιμα τι χολιάνασα κάνα ντικχάσα τζενέν τι αδικίνεν γιαβερέν. Μπορεί τι πουτσάς-αμέν: “Σο πρέπει τι κεράβ κάνα αβέλα-πες ανταβά; Υπαρχίντιβελα κάτι σο μπορίναβα τι κεράβ για την αδικία ακανά;” Για τι απαντίνας ανταλέ ερωτησιέντε, ισί λατσσό πρώτα τι ντικχάς σαρ νιωθίνελα ο Ιεχωβά ντα ο Ιησούς για την αδικία.

Ο ΙΕΧΩΒΑ ΝΤΑ Ο ΙΗΣΟΥΣ ΜΙΣΙΝΕΝΑ Ι ΑΔΙΚΙΑ

3. Σόσκε ισί λογικός τι χολιάνας κάνα αβέλα εκ αδικία; (Ησαΐας 5:7)

³ Η Αγία Γραφή βακερέλα αμένγκε σόσκε ισί λογικός μα τι μπεϊντίνας ι αδικία. Σικαβέλα αμένγκε ότι ο Ιεχωβά κερντάς-αμέν τι “μοιάζας λέστε” ντα βοβ «μανγκέλα ι δικαιοσύνη ντα ο σωστός». (Ψαλμ. 33:5· Γέν. 1:26) Ποτές να συμπεριφερίντιβελα άδικα ντα να μανγκέλα τι κερέλ-λες ανταβά καέκ γιαβέρ-ντα! (Δευτ. 32:3, 4· Μιχ. 6:8· Ζαχ. 7:9) Για παράδειγμας, αζομάν σο τζουβντιόλας ο προφήτης Ησαΐας, ο Ιεχωβά ασουνέλας ο “βίκος ι ροϊμάσκο” μπουτέ Ισραηλιτένταρ επειδή κάποια τζενέ συμπεριφερίντιβενας λένγκε μπέτι. (Διαβάνεν Ησαΐας 5:7) Ο Ιεχωβά τιμωριντάς οντουλέν σο συνεχίνενας μα τι ντεν καν κο Νόμος λέσκο ντα συμπεριφερίντιβενας άδικα κο γιαβερά.​—Ησ. 5:5, 13.

4. Σαρ νιωσάλο ο Ιησούς εκχέ τζενέσκε σο συμπεριφερισάλε λέσκε άδικα; (Ντικχέν ι φωτογραφία-ντα)

⁴ Σαρ ο Ιεχωβά, αντικάς ο Ιησούς-ντα μανγκέλα ι δικαιοσύνη ντα μισίνελα ι αδικία. Εκ φαρ, καζόμ ισινέ κι πφουβ, ο Ιησούς ντικχλάς εκχέ τζενές σο σουκιλίας λέσκι μουσί. Ο Ιησούς τζιτζισάλο οντουλέ μουρσέσκε ντα κερντάς λατσσές λέσκι μουσί. Αλλά κάνα ντικχλέ-λες ανταβά ο παπάζια, χολιασάλε λέσκε. Βακερένας χάι ότι ο Ιησούς να ντέλας καν κο νόμος για το Σάββατος, ντα να χάλας-λεν ανάγκη τι βοηθίνεν ανταλέ τζενές σο μανγκέλας βοήθεια. Σαρ νιωσάλο ο Ιησούς οντουλέσαρ σο κερένας; Σαρ βακερέλα κο Μάρκος, νιωσάλο «μπαρί ντουκχ αντρέ πέστε, σόσκε λένγκο γκι να αγαβέλας».​—Μάρκ. 3:1-6.

5. Σόσκε δεν πρέπει τι ατσσάς χολιαμέ κάνα αβέλα εκ αδικία;

⁵ Αφού ο Ιεχωβά ντα ο Ιησούς χολιάνενα με την αδικία, νανέ λάθος τι νιωθίνας αμέν-ντα αντικάς. (Εφεσ. 4:26) Όμως, ατζέ-ντα άμα τθεράσα δίκιος σο χολιασάλαμ, πρέπει τι ντας-αμέν γκοντί ότι αμαρί χολί ναστί διορθώνελα ο πράγματα. Κι πραγματικότητα, άμα ατσσάσα χολιαμέ για μπουτ βακίτι, μπορεί τι νασφάλιβας ή τι παθίνας ψυχολογικά. (Ψαλμ. 37:1, 8· Ιακ. 1:20) Σο πρέπει τι κεράς κάνα αμέν ή ο γιαβερά νακχάσα εκ αδικία; Μπορίνασα τι σικλιάς κατά παράδειγμας ι Ιησούσκο.

ΣΟ ΚΕΡΕΛΑΣ Ο ΙΗΣΟΥΣ ΚΑΝΑ ΝΤΙΚΧΕΛΑΣ Ι ΑΔΙΚΙΑ

6. Σο αδικίες νακχένας μερικά τζενέ κάνα ο Ιησούς ισινέ κι πφουβ; (Ντικχέν ι φωτογραφία-ντα)

⁶ Ο Ιησούς ντικχλάς μπαρέ αδικίες κάνα ισινέ κι πφουβ. Τζανέλας ότι ο παπάζια τσσουβένας μπουτ κανόνες σο κερένας δύσκολη ι ζωή ι τζενένγκι. (Ματθ. 23:2-4) Επίσης τζανέλας καζόμ μπέτι τροπόσαρ συμπεριφερίντιβενας ο Ρωμαίοι κυβερνήτες κο τζενέ. Μπουτ Ιουδαίοι μανγκένας σαρ σαρ τι ελευθερώντιβεν κατά Ρωμαίοι. Μερικοί, σαρ για παράδειγμας ο Ζηλωτές, ισινέ έτοιμοι ατζέ-ντα τι πολεμίνεν ανταλέσκε. Αλλά ο Ιησούς να ανακατούντιβελας ανταλέ πραγματέντε, ούτε προσπαθίνελας τι αλλάνελ ι κυβέρνηση. Κάνα λιντάς αμπέρι ότι κάποια τζενέ μανγκένας τι κερέν-λες βασιλιάς, τσσιντιντάς-πες ντουρ λένταρ.​—Ιωάν. 6:15.

7, 8. Σόσκε ο Ιησούς να προσπαθιντάς τι λύνελ σαρέ ο προβλήματα κάνα ισινέ κι πφουβ; (Ιωάννης 18:36)

⁷ Κάνα ο Ιησούς ισινέ κι πφουβ, να ανακατούντιλο κο πολιτικά για τι λύνελ ο προβλήματα σο ντικχέλας. Σόσκε; Επειδή τζανέλας ότι ο τζενέ να τθερένα ο δικαίωμας τι κυβερνίνεν ι γιαβερέν, ούτε μπορίνενα τι κερέν-λες ανταβά. (Ψαλμ. 146:3· Ιερ. 10:23) Επίσης ο τζενέ να μπορίνενα ούτε τι αγαβέν ούτε τι νασκιαρέν ο πραγματικοί λόγοι σο ανένα ι αδικία. Ανταλέ ντουνιάς κερέλα-λες κουμάντος εκ δολοφόνος, ο Μπενγκ. Βοβ ισί μπουτ γκεραλό ντα μπουτ τζενέ μοιάζενα λέστε. (Ιωάν. 8:44· Εφεσ. 2:2) Επίσης η ατέλεια να μουκχέλα ατζέ-ντα ι πο λατσσέ τζενέν τι λύνεν ο προβλήματα.​—Εκκλ. 7:20.

⁸ Ο Ιησούς τζανέλας ότι σάντε ι Ντεβλέσκι Βασιλεία κα νασκιαρέλ ο πραγματικός λόγος σο τθεράσα προβλήματα. Οτθάρ, ντέλας πι σαατίσταρ ντα πι ζοριάταρ για τι “μουτθαβέλ ντα τι βακερέλ ο λατσσέ αμπέρια ι Ντεβλέσκε Βασιλειάκερε”. (Λουκ. 8:1) Λοκχιαρέλας ο γκι οντουλένγκο σο “μανγκένας αζόμ μπουτ ι δικαιοσύνη σαρ ο μποκχαλό ο χαμπέ”. (Ματθ. 5:6· Λουκ. 18:7, 8) Καέκ τζενένγκι κυβέρνηση να κα κερέλ ανταλά αλλαγές. Σάντε ι Ντεβλέσκι Βασιλεία κα κερέλ-λεν σο «νανέ σαρ ανταβά ντουνιάς».​—Διαβάνεν Ιωάννης 18:36.

ΚΑΝΑ ΝΤΙΚΧΕΝΑ Ι ΑΔΙΚΙΑ, ΚΕΡΕΝ ΣΟ ΚΕΡΕΛΑΣ Ο ΙΗΣΟΥΣ

9. Σόσκε ισινέν σίγουροι ότι σάντε η Βασιλεία ι Ντεβλέσκι κα νασκιαρέλ σαρί ι αδικία;

⁹ Αντιβές τζουβντιάσα «κο τελευταία ντιβεσά». Οτθάρ ντικχάσα ατζέ πο μπουτ αδικία, απ’ ότι ντικχέλας ο Ιησούς κάνα ισινέ κι πφουβ. Αλλά σαρ κο ντιβεσά κι Ιησούσκε-ντα, οντουλά σο ανένα ο βάσανα ισί ο Μπενγκ ντα ο πφιρνέ τζενέ σο μοιάζενα λέστε. (2 Τιμ. 3:1-5, 13· Αποκ. 12:12) Σαρ ο Ιησούς, αμέν-ντα τζανάσα ότι σάντε η Βασιλεία ι Ντεβλέσκι κα καταστραφίνελ ι Μπενγκές, σο βοβ ισί ο πο μπαρό λόγος σο τθεράσα αδικίες, ντα κα νασκιαρέλ σαρό ο πφιρνιπέ. Επειδή τσσίντασα σαρέ αμαρέ γκίσαρ κατά Βασιλεία, να νικιάσα κο ντρομά για τι κεράς φασαρίες, ούτε κεράσα παράπονα ντα γιαβερά ασακέ πράγματα σο κερένα ο τζενέ για τι πολεμίνεν ι αδικία. Σκεφτίνεν ι εμπειρία εκχέ πφενιάκι, της Στέισι.a Πριν τι σικλιόλ ι αλήθεια, η Στέισι μπουτ φαρ νικιόλας κο ντρομά για τι κερέλ παράπονα για το αδικίες σο αβένας. Αλλά αρχισάλι μα τι αβέλ σίγουρη ότι οντουβά σο κερέλας ισινέ ο σωστός. Βόι βακερέλα: «Μπουτ φαρ σκεφτίναβας άμα ισινόμας κι σωστή μπάντα. Ακανά σο τσσίνταβα κατά Βασιλεία ι Ντεβλέσκι, τζανάβα ότι ισινόμ κι σωστή μπάντα. Τζανάβα ότι ο Ιεχωβά κα νασκιαρέλ ο αδικίες, μπουτ πο λατσσές απ’ ότι κα μπορίναβας τι κεράβ-λες με».​—Ψαλμ. 72:1, 4.

10. Σαρ βακερέλα κο Ματθαίος 5:43-48, σόσκε να προσπαθίνασα τι αλλάνας ο νόμοι ντα ο κυβερνήσεις; (Ντικχέν ι φωτογραφία-ντα)

¹⁰ Μπουτ τζενέ αντιβές τσσουβένα-πες ομαδέντε σο προσπαθίνενα τι αλλάνεν ο κυβερνήσεις. Μπουτ ανταλέ τζενένταρ ισί αζόμ χολιαμέ σο να ντένα καν κο νόμοι ντα κερένα ζιάνι γιαβερένγκε. Όμως ο Ιησούς να σικλιαρντάς-αμέν τι συμπεριφερίντιβας αντικάς. (Εφεσ. 4:31) Εκ πφραλ σο βακερένα λέσκε Τζέφρι βακερέλα: «Τζανάβα ότι κάνα ο τζενέ νικιόνα κο ντρομά για τι κερέν παράπονα, μπορίνενα τι χολιάνεν μπουτ εύκολα ντα αντικάς τι αρχίνεν τι κερέν ζημιές, τι τσορέν πράγματα ντα τι κερέν ζιάνι ο εκ ι γιαβερέσκε». Όμως, ο Ιησούς σικλιαρέλα-αμέν τι συμπεριφερίντιβας με αγάπη σαρέ κο τζενέ, ατζέ-ντα οντουλέντε σο να συμφωνίνενα αμέντζαρ ή σο τζάνα αμέντζαρ κόντρα. (Διαβάνεν Ματθαίος 5:43-48) Σαρ Χριστιανοί κεράσα ο πο λατσσό σο μπορίνασα για τι μοιάζας κο Ιησούς.

11. Σόσκε μπάζιμα μπορεί τι αβέλ αμένγκε δύσκολος τι μοιάζας κο Ιησούς;

¹¹ Παρόλο σο τζανάσα ότι η Βασιλεία ι Ντεβλέσκι κα τσσιναβέλ για πάντα ο βάσανα, ισί δύσκολος αμένγκε τι μοιάζας κο Ιησούς κάνα αδικίνενα-αμέν. Αντικάς νιωσάλι εκ πφεν σο βακερένα λάκε Τζανίγια, κάνα κάποια τζενέ συμπεριφερισάλε λάκε μπέτι τροπόσαρ ιτιρί κατά χρώμας λάκο. Βόι βακερέλα: «Πφαριλόμας μι χολιάταρ. Επίσης πφανγκιλό μπουτ μο γκι ντα μανγκάβας τι λαβ εκδίκηση οντουλέσκε σο κερντέ μάνγκε. Οτθάρ σκεφτισάλομ τι νικιάβ κο ντρομά γιεκ γιαβερέ τζενέντζαρ ντα τι κεράβ παράπονα για το ρατσισμός σο υπαρχίντιβελα. Αμντίναβας ότι άμα κα κεράβας-λες ανταβά κα νιωθίναβας πο λατσσές». Όμως πο σοράν η Τζανίγια αγαντάς ότι έπρεπε τι κερέλ αλλαγές. Βόι βακερέλα: «Μουκχάβας ι γιαβερέν τι επηρεάνεν ο τρόπος σο σκεφτίναβας, . . . ντα τι κερέν-μαν τι νταβ μι μπέσα τζενέντε ντα όχι κο Ιεχωβά. Αποφασιντόμ τι νασάβ οντουλέ τζενένταρ σο κερένας παράπονα κο ντρομά ντα μα τι ανακατούντιβαβ πάλι ιτς ασακέ πραγματέντζαρ». Παρόλο σο ισί λογικός τι χολιάνας κάνα αδικίνενα αμέν ή ι γιαβερέν, πρέπει τι κεράς κουμάντος οντουλά σο νιωθίνασα ντα μα τι ανακατούντιβας ανταλέ ντουνιάστε.​—Ιωάν. 15:19.

12. Σόσκε πρέπει τι προσοχίνας οντουλά σο διαβάνασα, ντικχάσα ή ασουνάσα;

¹² Σο μπορίνελα τι βοηθίνελ-αμέν τι ατσσάς ήρεμοι κάνα αδικίνενα αμέν ή ι γιαβερέν; Κάτι σο κα βοηθίνελ-αμέν ισί τι προσοχίνας οντουλά σο διαβάνασα, ντικχάσα ή ασουνάσα. Κάποιες ιστορίες σο ισί κο Ίντερνετ μανγκένα τι κερέν-αμέν τι σαστίνας ντα τι τσσουβάς-λεν με την κυβέρνηση. Μπουτ φαρ, ο τζενέ σο κερένα λάφι κο ειδήσεις βακερένα οντουλά σο πακιάνα βον ντα όχι οντουβά σο αβιλό-πες μπαγιά. Ατζέ-ντα άμα ο πληροφορίες σο βακερένα ισί σωστές, καζόμ-ντα τι διαβάνας ανταλένγκε ναστί λύνασα καέκ πρόβλημας. Οκιά μπάνταρ, άμα ντάσα μπουτ κατά σαάτι αμαρό για τι ασουνάς ή τι διαβάνας ασακέ πράγματα, μπορεί τι ανησυχίνας, τι στεναχωρίντιβας ντα τι χολιάνας. (Παρ. 24:10) Ατζέ χειρότερα, μπορεί τι τσσιναβάς τι τσσουβάς πρώτα αμαρέ ζωγιάτε ι Βασιλεία ι Ντεβλέσκι, σο σάντε βόι κα νασκιαρέλ για πάντα σαρέ ο προβλήματα.

13. Σαρ βοηθίνελα-αμέν ο διάβασμας ι Γραφιάκο τι ντας-λεν πέρα κάνα αδικίνενα-αμέν;

¹³ Άμα διαβάνασα ι Γραφή κάθε ντιβές ντα σκεφτίνασα οντουλά σο διαβάνασα, ανταβά βοηθίνελα-αμέν τι ντας-λεν πέρα με το πο λατσσό τρόπος κάνα αδικίνενα αμέν ή ι γιαβερέν. Εκ πφεν, η Αλία στεναχωρίντιβελας μπουτ κάνα ντικχέλας μερικέ τζενέν τι τσσίντεν μπουτ επειδή κάποια γιαβερά συμπεριφερίντιβενας λένγκε μπέτι τροπόσαρ. Οντουβά σο χολιασκιαρέλας-λα ισινέ ότι οντουλά τζενέ σο κερένας-λες ανταβά να τθερένας κάποια τιμωρία. Βόι βακερέλα: «Έπρεπε τι μπεσάβ ντα τι σκεφτίναβ μπουτ λατσσές: “Πακιάβα μπαγιά ότι ο Ιεχωβά κα νασκιαρέλ ανταλά προβλήματα;” Αζομάν, διαβαντόμ ο εδάφια Ιώβ 34:22-29. Ανταλά εδάφια αντέ μι γκοντιάτε ότι καέκ να μπορίνελα τι γκεραβέλ-πες κατά Ιεχωβά. Σάντε βοβ τζανέλα καβά ισί ο πο σωστός, ντα σάντε βοβ κα διορθώνελ ντιπ ο πράγματα». Αλλά καζόμ μπεκλεντίνασα ι Βασιλεία ι Ντεβλέσκι τι ανέλ αληθινή δικαιοσύνη, χρειαζίντιβελα τι ντας-λεν πέρα κάνα αδικίνενα-αμέν ακανά. Σαρ;

ΣΟ ΜΠΟΡΙΝΑΣΑ ΤΙ ΚΕΡΑΣ ΑΚΑΝΑ;

14. Καβά ισί εκ πράγμας σο μπορίνασα τι κεράς ακανά; (Κολοσσαείς 3:10, 11)

¹⁴ Μπέκιμ νανέ αμαρέ βαστέστε σο κα κερέν ο γιαβερά, αλλά ισί αμαρέ βαστέστε οντουβά σο κα κεράς αμέν. Σαρ ντικχλάμ, μοιάζασα κο Ιησούς κάνα σικαβάσα αγάπη. Ανταγιά αγάπη τσσίντελα-αμέν τι σικαβάς σεβασμός κο γιαβερά, ατζέ-ντα οντουλέντε σο αδικίνενα-αμέν. (Ματθ. 7:12· Ρωμ. 12:17) Αβέλα ι Ιεχωβάσκο γκι κάνα σικαβάσα λατσσιπέ κο γιαβερά ντα ισινάμ σωστοί λέντζαρ.​—Διαβάνεν Κολοσσαείς 3:10, 11.

15. Σαρ βοηθίνασα ι τζενέν κάνα βακεράσα λένγκε ο αλήθειες ι Γραφιάκε;

¹⁵ Ο πο λατσσό τρόπος για τι βοηθίνας ι τζενέν ισί κάνα σικλιαράσα-λεν ι Ιεχωβάσκε. Σόσκε βακεράσα-λες ανταβά; Επειδή ο «σικλιαριπέ ι Ιεχωβάσκο» μπορίνελα τι αλλάνελ εκχέ τζενές ντιπ. Μπορίνελα τι κερέλ εκχέ τζενές σο ισινέ χολιάκο ντα ντεμπελιάς τι αβέλ πφερντό αγάπη ντα ήρεμος. (Ησ. 11:6, 7, 9) Προτού τι σικλιόλ ι αλήθεια, εκ τζενό, ο Τζεμάλ τσσουντάς-πες εκχέ ομαδάτε για τι τζαλ κόντρα σε εκ κυβέρνηση επειδή πακιάλας ότι να ισινέ λατσσί. Βοβ βακερέλα: «Ναστί αλλάνεσα ι τζενέν ζορίσαρ. Με να αλλαξάλομ ζορίσαρ. Αλλαντάς-μαν η αλήθεια ι Γραφιάκι». Σαρέ οντουλά σο σικλιλό ο Τζεμάλ τσσιντιντέ-λες τι σταματίνελ τι τζαλ κόντρα. Καζόμ πο μπουτ τζενέ αλλάνενα χάρη κο αλήθειες κι Γραφιάκε, αζόμ πο χάνικ αδικίες αβένα-πες κο ντουνιάς.

16. Σόσκε μανγκένα τι βακερέν κο τζενέ ι Βασιλειάκε;

¹⁶ Σαρ ο Ιησούς, μανγκάσα αμέν-ντα τι βακεράς κο τζενέ ότι σάντε η Βασιλεία ι Ντεβλέσκι κα νασκιαρέλ για πάντα ι αδικία. Ανταγιά ελπίδα μπορεί τι ντελ ζορ οντουλέντε σο νακχλέ αδικίες. (Ιερ. 29:11) Η Στέισι βακερέλα: «Επειδή τζανάβα ότι ο Ντεβέλ κα νασκιαρέλ ο βάσανα, μπορίναβα τι ατσσάβ ήρεμη κάνα αδικίνενα μαν ή ι γιαβερέν. Ο Ιεχωβά λοκχιαρέλα αμαρό γκι αντράλ κατά Γραφή». Χρειαζίντιβελα τι αβέν έτοιμοι τι λοκχιαρέν ο γκι ι γιαβερένγκο αντράλ κατά ελπίδα ι Γραφιάκι. Καζόμ πο σίγουροι ισινέν ότι ο αλήθειες σο σικλιαρέλα ανταβά μάθημας ισί μπαγιά, αζόμ πο έτοιμοι κα αβέν για τι συζητίνεν ανταβά θέμας κο σχολείος ή κι μπουτί.b

17. Σαρ βοηθίνελα-αμέν ο Ιεχωβά τι ντας-λεν πέρα με το αδικίες ακανά;

¹⁷ Τζανάσα ότι κα νακχάς αδικίες καζόμ ο Μπενγκ κα συνεχίνελ τι αβέλ ο «άρχοντας ανταλέ ντουνιάσκο». Αλλά τθεράσα εμ βοήθεια εμ ελπίδα καζόμ μπεσάσα τι «φουρτίντιβελ αβρί». (Ιωάν. 12:31) Αντράλ κατά Γραφή, ο Ιεχωβά βακερέλα αμένγκε όχι σάντε σόσκε υπαρχίντιβενα αζόμ αδικίες, αλλά σαρ νιωθίνελα-ντα για τη ντουκχ σο ανένα αμένγκε. (Ψαλμ. 34:17-19) Αντράλ πι Τσσαβέσταρ, ο Ιεχωβά σικλιαρέλα-αμέν σο πρέπει τι κεράς κάνα ο γιαβερά αδικίνενα-αμέν. Επίσης μπουτ σουγκό η Βασιλεία κα νασκιαρέλ ο βάσανα ντα ο τζενέ ποτές να κα νακχέν αδικίες πάλι. (2 Πέτρ. 3:13) Μακάρι τι συνεχίνας τι βακεράς ο λατσσέ αμπέρια ι Βασιλειάκε αντράλ αμαρέ γκίσταρ ντα τι μπεκλεντίνας σαρ σαρ ο βακίτι σο η πφουβ κα πφερντιόλ «με δικαιοσύνη».​—Ησ. 9:7.