“Ο Τζενέ σο Τθερένα Λατσσό Γκι” κα Δεχτίνεν ο Λατσσέ Αμπέρια

1. Σο μπορεί τι κερέν ο τζενέ κάνα ασουνένα ο λατσσέ αμπέρια; (Πράξεις 13:47, 48· 16:14, 15)

ΜΠΟΥΤ τζενέ χαιρισάλε κάνα ο πρώτοι Χριστιανοί βακερντέ λένγκε ι Χριστόσκε. (Διαβάνεν Πράξεις 13:47, 48· 16:14, 15) Αντιβές-ντα ισί τζενέ σο χαιρίνενα κάνα ασουνένα πρώτη φαρ ο λατσσέ αμπέρια. Ατζέ-ντα οντουλά σο κι αρχή να ενδιαφερίντιβενα ιτς για το λατσσέ αμπέρια μπέκιμ πο σοράν τι μανγκέν τι ασουνέν. Σο πρέπει τι κεράς κάνα αρακχάσα τζενέν σο μανγκένα τι σικλιόν ι Ντεβλέσκε ντα ι Γραφιάκε;

2. Σόσκε αμαρό έργος μοιάζελα ι μπουτιάσαρ σο κερέλα εκ γεωργός;

² Μπορίνασα τι μοιασκιαράς αμαρό έργος ι μπουτιάσαρ σο κερέλα εκ γεωργός. Κάποιοι κατά καρποί σο φυτιντάς ο γεωργός μπορεί τι αβέν έτοιμοι πο σουγκό κατά γιαβερά. Ο γεωργός χρειαζίντιβελα τι γκίντελ οντουλά καρπούς αμέσως αλλά επίσης τι συνεχίνελ τι ποτίνελ ντα τι φροντίνελ ο γιαβερά-ντα καρποί σο νανέ ατζέκ έτοιμοι. Αντικάς αμέν-ντα κάνα αρακχάσα εκχέ τζενές σο μανγκέλα τι ασουνέλ ο λατσσέ αμπέρια, μανγκάσα τι βοηθίνας-λες τι αβέλ μαθητής ι Χριστόσκο καζόμ πο σουγκό αβέλα-πες. Όμως, μανγκάσα τι συνεχίνας τι βοηθίνας ι τζενέν σο χρειαζίντιβενα γιαβέρ-ντα χρόνος για τι αγαβέν ι αξία σο τθερένα ο λατσσέ αμπέρια. (Ιωάν. 4:35, 36) Κάνα αγαβάσα άμα ο τζενέ ισί έτοιμοι ή όχι, κα μπορίνας τι βοηθίνας-λεν ι πο λατσσέ τροπόσαρ. Ανταλέ μαθημάστε, κα ντικχάς σο μπορίνασα τι κεράς κι πρώτη συζήτηση ι τζενέντζαρ για τι βοηθίνας οντουλέν σο ισί έτοιμοι τι δεχτίνεν ο λατσσέ αμπέρια. Επίσης κα ντικχάς σαρ μπορίνασα τι βοηθίνας-λεν τι αβέν πο πασέ κο Ιεχωβά ντα τι υπηρετίνεν-λες.

ΚΑΝΑ Ο ΤΖΕΝΕ ΙΣΙ ΕΤΟΙΜΟΙ ΤΙ ΔΕΧΤΙΝΕΝ Ο ΛΑΤΣΣΕ ΑΜΠΕΡΙΑ

3. Σο πρέπει τι κεράς κάνα αρακχάσα τζενέν σο δεχτίνενα ο λατσσέ αμπέρια; (1 Κορινθίους 9:26)

³ Κάνα αρακχάσα κο έργος τζενέν σο δεχτίνενα ο λατσσέ αμπέρια, μανγκάσα τι βοηθίνας-λεν τι σικλιόν ι Ντεβλέσκε ντα τι αρχίνεν τι τζαν πασέ λέστε καζόμ πο σουγκό αβέλα-πες. Ασακέ τζενέντε δεν πρέπει τι σακιντίνας τι βακεράς λένγκε τι κερέν μελέτη ή τι αβέν κι συνάθροιση, ατζέ-ντα κατά πρώτη συζήτηση.​—Διαβάνεν 1 Κορινθίους 9:26.

4. Βακερέν ι εμπειρία εκχέ τζουβλιάκι σο ισινέ έτοιμη τι κερέλ μελέτη αμέσως.

⁴ Αρχίνεν μελέτη. Μερικά τζενέ σο κεράσα λέντζαρ λάφι ισί έτοιμοι τι κερέν μελέτη αμέσως. Για παράδειγμας, εκ ντιβές εκ τερνί τζουβέλ κο Καναδάς γκιλί πασέ σε εκ σταντ ντα λιντάς εκ βιβλιάριος Μπουτ Σουκάρ Ζωή για Πάντα! Η πφεν βακερντάς λάκε ότι αντράλ κατά βιβλιάριος ανταβά κα μπορίνελας τι αρχίνελ μελέτη χωρίς τι ποκινέλ. Η τζουβέλ μπεϊντιντάς-λες ανταβά ντα ντινάς η εκ κι γιαβέρ πο νούμερος για τι κερέν λάφι. Πο σοράν οντουβά ντιβές, η τζουβέλ μπουτσσαντάς μήνυμας κι πφεν ντα πουτσλάς-λα κάνα κα μπορίνενας τι κερέν μελέτη. Κάνα η πφεν βακερντάς λάκε τι τζαλ σοράν από σταρ ντιβές, η τζουβέλ απαντιντάς λάκε: «Σόσκε μα τι αβές γιαβίν; Τθεράβα χρόνος». Οτθάρ, αρχισάλε μελέτη ο γιαβέρ ντιβές. Η τζουβέλ γκιλί πρώτη φαρ κι συνάθροιση οντιά εβδομάδα ντα συνεχιντάς τι κερέλ πρόοδος σουγκό.

5. Σο πρέπει τι κεράς άμα ντικχάσα ότι ο τζενό νανέ ατζέκ έτοιμος τι κερέλ μελέτη; (Ντικχέν ο φωτογραφίες-ντα)

⁵ Σίγουρα να μπεσάσα σαρέ ο τζενέ τι μανγκέν τι κερέν μελέτη αμέσως, σαρ ανταγιά τζουβέλ. Μερικοί μπορεί τι μανγκέν πο μπουτ χρόνος. Μπορεί τι χρειαζίντιβελ πρώτα τι αρχίνας εκ συζήτηση εκχέ θεμάσκε σο ενδιαφερίνελα ι τζενές. Όμως, άμα να χασαράσα αμαρί ελπίδα ότι κα δεχτίνελ τι κερέλ μελέτη ντα πφαμπάσα λέσκε, μπουτ σουγκό, μπορεί τι αβέλ έτοιμος τι αρχίνελ μελέτη. Σο μπορίνασα τι βακεράς για τι αρχίνας εκ μελέτη; Για τι ντικχάς σο βακερένα μερικά πφραλά ντα πφενιά σο ισί μπουτ λατσσέ ανταλέστε.

6. Σο μπορίνασα τι βακεράς για τι βοηθίνας ι τζενές;

⁶ Κάνα πουτσλάμ μερικέ πφραλέν ντα σκαπανίν ι τροπόσκε σο αρχίνενα εκ μελέτη, βακερντέ ότι μερικέ τθεμέντε ισί πο λατσσό μα τι βακεράς λάφια σαρ ισί: «κα μπεσάς τι διαβάνας», «κα κεράς μαθήματα κατά Γραφή», «κα κεράς μελέτη» ή «κα σικλιαράς-τουτ». Ντικχλέ ότι ισί πο λατσσό τι βακεράς λάφια σαρ ισί: «κα κεράς λάφι», «κα συζητίνας» ντα «κα σικλιάς ι Ντεβλέσκε». Για τι βοηθίνεν ι τζενές τι μανγκέλ τι συνεχίνεν τουμαρί συζήτηση, μπορίνενα τι βακερέν λέσκε κάτι ασακό: «Ισί μπουτ σουκάρ ο απαντήσεις σο ντέλα η Γραφή μπερεκέτι σημαντικέ ερωτησιέντε» ή «Η Γραφή να κερέλα σάντε λάφι ι θρησκειάκε, αλλά βοηθίνελα-αμέν μπουτέ τροπόντζαρ αμαρέ ζωγιάτε». Σοράν κα μπορίνενας τι βακερέν: «Να λέλα μπουτ σαάτι. Ερεσένα 10 με 15 λεπτά για τι σικλιάς κάτι σημαντικός». Να χρειαζίντιβελα τι χρησιμοποιήνεν λάφια σαρ ισί: «συγκεκριμέ σαάτι» ή «κάθε εβδομάδα», σο μπορεί τι κερέν ι τζενές τι νιωθίνελ υποχρεωμέ τι κερέν πάλι λάφι.

7. Κάνα δεχτιντέ για πρώτη φαρ ι αλήθεια μερικά τζενέ; (1 Κορινθίους 14:23-25)

⁷ Καλίνεν-λεν κι συνάθροιση. Ντικχίντιβελα ότι κο μπρεσά σο τζουβντιόλας ο απόστολος Παύλος, μερικοί δεχτιντέ ι αλήθεια ι Γραφιάκι κάνα γκιλέ πρώτη φαρ εκχέ συναθροισιάτε. (Διαβάνεν 1 Κορινθίους 14:23-25) Ο ίδιος αβέλα-πες μπουτ φαρ αντιβές-ντα. Ο πο μπουτ νεβέ τζενέ κερένα πρόοδος σουγκό κάνα αρχίνενα τι τζαν κο συναθροίσεις. Κάνα πρέπει τι καλίνας-λεν; Ο βιβλιάριος Μπουτ Σουκάρ Ζωή για Πάντα! καλίνελα-λεν κι συνάθροιση κο μάθημας 10, αλλά μα μπεσέν μέχρι τι τζαν οντουλέ μαθημάστε. Ατζέ-ντα κατά πρώτη συζήτηση μπορίνενα τι καλίνεν ι τζενές κι συνάθροιση. Κα μπορίνενας τι βακερέν λέσκε ο θέμας ι ομιλιάκο ή εκ σημείος κατά Σκοπιά σο κα ντικχάς.

8. Καλά πράγματα μπορίνασα τι βακεράς ι τζενέσκε κάνα καλίνασα-λες κι συνάθροιση; (Ησαΐας 54:13)

⁸ Κάνα καλίνενα εκχέ τζενές κο συναθροίσεις, εξηγίνεν λέσκε σόσκε αμαρέ συναθροίσεις ισί διαφορετικές κατά πράγματα σο μπορεί τι ισί σικλό τι κερέλ πιρέ θρησκειάτε. Κάνα εκ τζενί σο κερέλας μελέτη γκιλί πρώτη φαρ κι συνάθροιση, πουτσλάς ι πφενιά σο κερέλας-λα μελέτη ι πφραλέσκε σο κερέλας ι Σκοπιά: «Σαρ τζανέλα σαριλένγκε ναβά;» Η πφεν εξηγιντάς λάκε ότι σαρέ προσπαθίνασα τι τζανάς ο ναβά ο εκ ι γιαβερέσκε, αντικάς σαρ τζανάσα ο ναβά αμαρέ φαμιλιάκε. Η τζενί βακερντάς ότι, πιρέ κχανγκιριάτε, ο πο μπουτ τζενέ να τζανένας ο ναβά ο εκ ι γιαβερέσκε. Αμέν-ντα μπορίνασα τι εξηγίνας κο τζενέ σόσκε αμαρέ συναθροίσεις ισί διαφορετικές. (Διαβάνεν Ησαΐας 54:13) Γκιντίντιβασα για τι ντας λατρεία κο Ιεχωβά, τι σικλιάς λέσταρ ντα τι ντας ζορ ο εκ κο γιαβέρ. (Εβρ. 2:12· 10:24, 25) Άκ’ σόσκε αμαρέ συναθροίσεις ισί κερντέ για τι σικλιαρέν-αμέν ντα να τθερένα τζενένγκε έθιμα. (1 Κορ. 14:40) Η Αίθουσα τθερέλα μπερεκέτι φως για τι μπορίνας τι σικλιάς πο εύκολα. Ντα ποτές να κεράσα λάφι για το πολιτικά. Επίσης να χάσα-αμέν καεκχέ πραγμάσκε, ούτε πραγματένγκε σο ισί προσωπικά. Κα αβέλας λατσσό πρώτα τι μπουτσσαβάς ι τζενέσκε ο βίντεος Σο Αβέλα-πες κο Αίθουσες Βασιλείας; Αντικάς κα τζανέλ σο τι μπεκλεντίνελ.

9, 10. Κάνα καλίνασα εκχέ τζενές κι συνάθροιση, σο μπορίνασα τι βακεράς λέσκε για μα τι νταρέλ τι αβέλ; (Ντικχέν ι φωτογραφία-ντα)

⁹ Μερικοί σακιντίνενα τι τζαν κι συνάθροιση επειδή νταρένα ότι κα βακερέν λένγκε τι αβέν Μάρτυρες ι Ιεχωβάσκε. Ντεν-λεν τι αγαβέν ότι μπορίνενα απλά τι αβέν ντα τι ασουνέν χωρίς τι κερέν ή τι βακερέν κάτι. Μπορίνενα τι αβέν εμ ο φαμιλιά γιεκ πουμαρέ τσσαβέντζαρ. Αμαρέ συναθροισιέντε, ο τσσαβέ να τζάνα σε εκ γιαβέρ χώρος για τι λεν σικλιαριπέ. Οκιά μπάνταρ, μπεσένα πουμαρέ νταντέσαρ ντα νταγιάσαρ για τι σικλιόν σαρέ γιεκ. Αντικάς ο νταντά ντα ο νταγιά τζανένα κάσαρ ισί λένγκε τσσαβέ ντα σο σικλιόνα. (Δευτ. 31:12) Να γκίντασα λοβέ αμαρέ συναθροισιέντε. Οκιά μπάνταρ, κεράσα οντουβά σο βακερντάς ο Ιησούς. «Λιντέν χωρίς τι ποκινέν, ντεν χωρίς τι ποκίντιβεν». (Ματθ. 10:8) Μπορίνενα επίσης τι βακερέν κο τζενό ότι να χρειαζίντιβελα τι ιρίλ πααλίς σέα για τι αβέλ κι συνάθροιση. Ο Ντεβέλ ντικχέλα ο γκι, όχι οντουβά σο ντικχίντιβελα αβριάλ.​—1 Σαμ. 16:7.

¹⁰ Άμα αβιλό ο τζενό, κερέν-λες τι νιωθίνελ άνετα. Γνωρίνεν-λες κο πρεσβύτεροι ντα γιαβερέ πφραλέντε ντα πφενίντε. Άμα κα νιωθίνελ ότι ο τζενέ οτθέ πφαμπόνα λέσκε, μπορεί τι μανγκέλ τι αβέλ πάλι κι συνάθροιση. Καζόμ αβέλα-πες η συνάθροιση, άμα να τθερέλα Γραφή, σικαβέν λέσκε τουμαριάταρ. Επίσης ντεν-λες τι αγαβέλ σαρ αρακχάσα κι Γραφή ο εδάφια σο χρησιμοποιήνελα ο ομιλητής ντα σαρ παρακολουθίνασα ο γιαβερά μέρη κατά έντυπα αμαρέ.

ΚΑΝΑ ΑΡΧΙΝΕΝΑ ΕΚ ΜΕΛΕΤΗ

11. Σαρ μπορίνενα τι σικαβέν ότι σεβάνενα ο χρόνος ντα ο πρόγραμμας ι τζενέσκο;

¹¹ Σο πρέπει τι ντας-αμέν γκοντί κάνα κεράσα μελέτη εκχέ τζενέσαρ; Τι σεβάνεν ο χρόνος ντα ο πρόγραμμας ι τζενέσκο. Για παράδειγμας, άμα κανονιντέν κάνα κα τζαν, τι αβέν τουμαρέ σαατίστε. Τι κερέν-λες ανταβά ατζέ-ντα άμα ο τζενέ τουμαρέ περιοχιάτε νανέ σικλέ τι αβέν πουμαρέ σαατίστε. Επίσης ισί λατσσό η πρώτη μελέτη τι ατσσικιαρέλ χάνικ. Μερικά πφραλά ντα πφενιά σο τθερένα κερντό μπουτ μελέτες βακερένα ότι ισί λατσσό τι τελειώνελ η μελέτη σουγκό, ατζέ-ντα άμα ο τζενό μανγκέλα τι ασουνέλ πο μπουτ. Ντα μα κερέν μπουτ λάφι. Μουκχέν ι τζενές τι πουτρέλ πο γκι.​—Παρ. 10:19.

12. Σο πρέπει τι τθεράς αμαρέ γκοντιάτε κάνα αρχίνασα εκ μελέτη;

¹² Κάνα αρχίνενα μελέτη εκχέ τζενέσαρ, τθερέν τουμαρέ γκοντιάτε κατά πρώτος μάθημας τι βοηθίνεν-λες τι γνωρίνελ ι Ιεχωβάς ντα ι Ιησούς ντα τι μανγκέλ-λεν. Για τι κερέν-λες ανταβά, ισί σημαντικός τι γκερέν λένγκι προσοχή κι Αγία Γραφή. Μα ταρτίνεν ι προσοχή οπρά-τουμέντε ή κο πράγματα σο τζανένα τουμέν κατά Γραφή. (Πράξ. 10:25, 26) Ο απόστολος Παύλος μουκχλάς εκ λατσσό παράδειγμας. Κάνα σικλιαρέλας ι τζενέν, γκερέλας λένγκι προσοχή κο Ιησούς, οντουλέστε σο μπουτσσαντάς ο Ιεχωβά για τι βοηθίνελ-αμέν τι γνωρίνας-Λες ντα τι μανγκάς-Λες. (1 Κορ. 2:1, 2) Ο Παύλος επίσης σικαντάς καζόμ σημαντικός ισί τι βοηθίνας ι τζενέν σο αρχισάλε μελέτη τι μπαριαρέν λατσσέ ιδιότητες σο μοιάζενα με χρυσάφι, ασήμι ντα πααλίς μπαρά. (1 Κορ. 3:11-15) Αντρέ κο σουκάρ ιδιότητες ανταλά ισί η πίστη, η σοφία, η ικανότητα τι αγαβάς ντα η νταρ κατά Ιεχωβά. (Ψαλμ. 19:9, 10· Παρ. 3:13-15· 1 Πέτρ. 1:7) Μπορίνενα τι σικλιαρέν σαρ ο απόστολος Παύλος άμα κα βοηθίνεν ι τζενέν τι κερέν πο ζουρανί πουμαρί πίστη ντα πουμαρί φιλία ι Ντεβλέσαρ.​—2 Κορ. 1:24.

13. Σαρ μπορίνασα τι κεράς υπομονή ντα τι αβάς λογικοί καζόμ βοηθίνασα ι τζενέν; (2 Κορινθίους 10:4, 5) (Ντικχέν ι φωτογραφία-ντα)

¹³ Κάνα σικλιαρένα ι τζενέν, κερέν υπομονή ντα τι αβέν λογικοί λέντζαρ, σαρ ο Ιησούς. Μα πουτσέν-λεν πράγματα σο κα ανέν-λεν σε δύσκολη θέση. Άμα δυσκολίντιβενα τι αγαβέν κάποια σημεία, τζαν πο τελέ ντα ασχολίντιβεν ανταλέντζαρ πο σοράν. Αντίς τι ζορισκιαρέν ι τζενέν τι δεχτίνεν κάτι σο σικλιαρέλα η Γραφή πριν τι αβέν έτοιμοι, ντεν-λεν χρόνος για τι ασταρέλ ρίζες η αλήθεια αντρέ λένγκε γκίστε. (Ιωάν. 16:12· Κολ. 2:6, 7) Η Αγία Γραφή μοιασκιαρέλα ο ψεύτικα πράγματα σο πακιάνα ο τζενέ με πύργους. (Διαβάνεν 2 Κορινθίους 10:4, 5) Αντίς τι περαβέν ο πύργος ι τζενέσκο καζόμ ισί βοβ αντρέ, βοηθίνεν-λες πρώτα τι νικιόλ ντα τι αρακχέλ καταφύγιος κο Ιεχωβά.​—Ψαλμ. 91:9.

ΣΑΡ ΤΙ ΒΟΗΘΙΝΕΝ Ι ΤΖΕΝΕΝ ΣΟ ΑΡΧΙΝΕΝΑ ΤΙ ΑΒΕΝ ΚΟ ΣΥΝΑΘΡΟΙΣΕΙΣ

14. Σαρ πρέπει τι συμπεριφερίντιβας κο τζενέ σο αρχίνενα τι αβέν κο συναθροίσεις;

¹⁴ Ο Ιεχωβά μπεσέλα αμένταρ τι συμπεριφερίντιβας σαρέ κο τζενέ σουκάρ τροπόσαρ κατάρ-ντα τι αβέν, καγιά-ντα τι αβέλ λένγκι κουλτούρα ή καζόμ-ντα λοβέ τι τθερένα. (Ιακ. 2:1-4, 9) Άρα σαρ μπορίνασα τι σικαβάς αγάπη οντουλέντε σο αβένα αμαρέ συναθροισιέντε;

15, 16. Σαρ μπορίνασα τι βοηθίνας ι νεβέ τζενέν τι νιωθίνεν σουκάρ αμαρέ συναθροισιέντε;

¹⁵ Κάποια τζενέ μπορεί τι αβέν αμαρέ συναθροισιάτε απλά επειδή μανγκένα τι ντικχέν σο αβέλα-πες ή επειδή εκ γιαβέρ τζενό σο μπεσέλα γιαβερτθέ βακερντάς λένγκε τι αβέν. Οτθάρ δεν πρέπει τι σακιντίνας τι κεράς λάφι ασακέ τζενέντζαρ. Τι καλωσορίνεν-λεν αλλά άμα κα σικαβένας με υπερβολικός τρόπος τουμαρί χαρά, μπορεί τι νιωθίνενας περίεργα. Βακερέν λένγκε τι μπεσέν τουμέντζαρ. Για τι μπορίνεν τι παρακολουθίνεν πο λατσσές ι συνάθροιση σικαβέν λένγκε τουμαρέ Γραφιάταρ ντα κατά έντυπα τουμαρέ ή ντεν-λεν νεβέ. Επίσης σκεφτίνεν σαρ μπορεί τι νιωθίνεν. Εκ μουρς σο γκιλό σε εκ Αίθουσα βακερντάς κο πφραλ σο καλωσοριντάς-λες ότι να νιωθίνελας άνετα επειδή να ιριαντάς-πες λατσσές. Ο πφραλ κερντάς-λες τι νιωθίνελ άνετα ντα εξηγιντάς λέσκε ότι ο Μάρτυρες ι Ιεχωβάσκε ισί κανονικά τζενέ σαρ ισί σαρέ ο γιαβερά. Ανταβά μουρς τελικά κερντάς πρόοδος, μπολντιλό ντα ποτές να μπισταρντάς καζόμ σουκάρ συμπεριφερισάλο λέσκε ο πφραλ. Προσοχίνεν όμως: Κάνα κερένα λάφι ι νεβέ τζενέντζαρ πριν ντα σοράν κατά συνάθροιση, σικαβέν λένγκε ενδιαφέρον χωρίς τι κερέν λένγκε ερωτήσεις σο κα ανέν-λεν σε δύσκολη θέση ούτε τι πουτσέν-λεν πράγματα σο να χρειαζίντιβελα τι τζανέν.​—1 Πέτρ. 4:15.

¹⁶ Μπορίνασα επίσης τι κεράς ι τζενέν σο αβένα πρώτη φαρ κι συνάθροιση τι νιωθίνεν σουκάρ κάνα αμαρέ συζητήσεις, αμαρέ απαντήσεις ντα αμαρέ μέρη σικαβένα σεβασμός ι τζενένγκε σο νανέ Μάρτυρες ντα ι πραγματένγκε σο πακιάνα. Νανέ λατσσό τι βακεράς πράγματα σο κα μπορίνενας τι προσβαλίνεν ι τζενέν ή τι κερέν-λεν τι τσσίντεν-πες ντουρ. (Τίτο 2:8· 3:2) Για παράδειγμας, ποτές να κα προσβαλίναας-λεν ιτιρί οντουλένγκε σο πακιάνα. (2 Κορ. 6:3) Ο πφραλά σο κερένα ομιλίες πρέπει τι τθερέν ατζέ πο μπουτ πουμαρί γκοντί. Επίσης σικαβένα ότι σκεφτίνενα ι τζενέν σο νανέ Μάρτυρες κάνα εξηγίνενα λάφια σο ισί λένγκε δύσκολα τι αγαβέν.

17. Σο μανγκάσα τι κεράς κάνα αρακχάσα τζενέν σο “τθερένα λατσσό γκι”;

¹⁷ Κάθε ντιβές σο νακχέλα, ο έργος για τι κεράς μαθητέν αβέλα ατζέ πο σημαντικός. Ντα κα συνεχίνας τι ρόντας τζενένγκε σο “τθερένα λατσσό γκι για τι λεν ζωή για πάντα”. (Πράξ. 13:48) Κάνα αρακχάσα-λεν, να σακιντίνασα τι βακεράς λένγκε τι κερέν μελέτη ή τι καλίνας-λεν κι συνάθροιση. Αντικάς, βοηθίνασα-λεν χάνικ χάνικ τι τσσουβέν-πες κο «ντρομ σο γκερέλα κι ζωή».​—Ματθ. 7:14.