Σικαβέν Σεβασμός κο Γιαβερά

1. Σόσκε ο τζενέ μπεϊντίνενα τι σεβάνεν-λεν; (Παροιμίες 22:1)

ΜΠΕΪΝΤΙΝΕΝΑ κάνα ο τζενέ σικαβένα τουμένγκε σεβασμός; Σίγουρα. Σαρέ ο τζενέ χρειαζίντιβενα τι νιωθίνεν ότι ο γιαβερά σεβάνενα-λεν. Ισινάμ χαρούμενοι κάνα αβέλα-πες ανταβά. Οτθάρ-ντα η Αγία Γραφή βακερέλα ότι «η σέβαση κατά γιαβερά ισί πο λατσσί κατά ασήμι ντα κατά χρυσάφι»!​—Διαβάνεν Παροιμίες 22:1.

2, 3. Σόσκε νανέ αζόμ εύκολος πάντα τι σικαβάς σεβασμός κο γιαβερά, ντα σο κα σικλιάς ανταλέ μαθημάστε;

² Μπορεί μα τι αβέλ πάντα εύκολος τι σικαβάς σεβασμός κο γιαβερά. Εκ λόγος ισί επειδή ντικχάσα ο ατέλειες ι γιαβερένγκε. Επίσης, τζουβντιάσα ντιβεσέντε σο μπουτ τζενέ να σικαβένα σεβασμός. Όμως αμέν πρέπει τι αβάς διαφορετικοί. Σόσκε; Επειδή ο Ιεχωβά μανγκέλα τι σικαβάς σεβασμός «σαβέ τι μανγκές τζενένγκε».​—1 Πέτρ. 2:17.

³ Ανταλέ μαθημάστε κα σικλιάς σο μανγκέλα τι βακερέλ τι σικαβάς σεβασμός ντα σαρ μπορίνασα τι κεράς-λες ανταβά (1) αμαρέ φαμιλιάτε, (2) αμαρέ πφραλέντε ντα (3) κο τζενέ κο ντουνιάς. Επίσης κα σκεφτίνας λατσσές σαρ μπορίνασα τι σικαβάς σεβασμός ατζέ-ντα κάνα νανέ αζόμ εύκολος.

ΣΟ ΜΑΝΓΚΕΛΑ ΤΙ ΒΑΚΕΡΕΛ ΤΙ ΣΕΒΑΝΑΣ Ι ΓΙΑΒΕΡΕΝ;

4. Σο μανγκέλα τι βακερέλ τι σεβάνας ι γιαβερέν;

⁴ Σο μανγκέλα τι βακερέλ ο λάφι «σεβασμός»; Ο λάφι «σεβασμός» σικαβέλα σο σκεφτίνασα εκχέ τζενέσκε ντα σαρ συμπεριφερίντιβασα λέσκε. Κάνα ντικχάσα ότι εκ τζενό τθερέλα λατσσέ ιδιότητες ή ότι κερντάς μπουτ λατσσέ πράγματα ή άμα τθερέλα πο μπαρί εξουσία αμένταρ, συμπεριφερίντιβασα λέσκε εκχέ τροπόσαρ σο σικαβέλα ότι σεβάνασα-λες. Ντα ισί σημαντικός τι κεράς-λες ανταβά αντράλ αμαρέ γκίσταρ.​—Ματθ. 15:8.

5. Σο κα βοηθίνελ-αμέν τι σικαβάς σεβασμός κο γιαβερά;

⁵ Ο Ιεχωβά μανγκέλα τι σικαβάς σεβασμός κο γιαβερά. Για παράδειγμας βακερέλα αμένγκε τι σικαβάς σεβασμός «οντουλέντε σο κερένα κουμάντος». (Ρωμ. 13:1, 7) Όμως μερικοί βακερένα: «Χαιρίναβα τι σικαβάβ σεβασμός οντουλέντε σο αξίνενα-λες». Ισί σωστός τι σκεφτίνας αντικάς; Νάα. Τζανάσα ότι χρειαζίντιβελα τι σικαβάς σεβασμός κο γιαβερά όχι επειδή κερένα κάτι ή επειδή να κερένα κάτι, αλλά επειδή ο Ιεχωβά μανγκέλα τι σεβάνας ι γιαβερέν ντα αμέν μανγκάσα τι κεράς-λες χαρούμενος.​—Ιησ. Ναυή 4:14· 1 Πέτρ. 3:15.

6. Αβέλα-πες τι σικαβέν σεβασμός εκχέ τζενέσκε σο να σεβάνελα-τουμέν; Εξηγίνεν. (Ντικχέν ι φωτογραφία-ντα)

⁶ Κάποιοι μπορεί τι σκεφτίνεν: “Αβέλα-πες τι σικαβάβ σεβασμός εκχέ τζενέσκε σο να σικαβέλα μάνγκε σεβασμός;” Βα. Ανέν τουμαρέ γκοντιάτε μερικά παραδείγματα. Ο βασιλιάς Σαούλ βακερντάς πφαρέ λάφια πι τσσαβέσκε κο Ιωνάθαν ανγκλάλ γιαβερέντε. (1 Σαμ. 20:30-34) Όμως, ο Ιωνάθαν συνεχιντάς τι σικαβέλ σεβασμός πι νταντέστε, σο ισινέ βασιλιάς, ντα πολεμιντάς γιεκ λέσαρ μέχρι κο ντιβές σο ο Σαούλ μουλό. (Έξοδ. 20:12· 2 Σαμ. 1:23) Ο αρχιερέας Ηλεί κατηγοριντάς ι Αννά ότι ισινέ ματί. (1 Σαμ. 1:12-14) Αλλά ο τσσαβέ του Ηλεί κερένας μπουτ μπέτι πράγματα ντα ο Ηλεί να διορθώνελας-λεν, παρόλο σο ισινέ αρχιερέας ντα λένγκο ντατ. Ανταβά τζανένας-λες σαρέ ο Ισραηλίτες αζομάν. Όμως η Άννα κερέλας λάφι με σεβασμός κο Ηλεί. (1 Σαμ. 1:15-18· 2:22-24) Ντα κάποια μουρσά κι Αθήνα προσβαλιντέ ι απόστολε Παυλός ντα βακερντέ ότι ισινέ μπουτ «τσσιμπαλό». (Πράξ. 17:18) Παρόλο σο βακερντέ λέσκε ανταβά, ο Παύλος κερντάς λέντζαρ λάφι με σεβασμός. (Πράξ. 17:22) Ανταλά παραδείγματα σικαβένα ότι αμαρί μπαρί αγάπη ι Ιεχωβάσκε ντα η νταρ μα τι στεναχωρίνας-λες μπορίνενα τι τσσίντεν-αμέν τι σικαβάς σεβασμός κο γιαβερά όχι σάντε κάνα ισί εύκολος αλλά κάνα ισί δύσκολος-ντα. Ελάν τι ντικχάς καλέ τζενέν πρέπει τι σεβάνας ντα σόσκε.

ΣΙΚΑΒΕΝ ΣΕΒΑΣΜΟΣ ΤΟΥΜΑΡΕ ΦΑΜΙΛΙΑΤΕ

7. Σόσκε μπορεί τι αβέλ αμένγκε δύσκολος τι σικαβάς σεβασμός αμαρέ φαμιλιάκε;

⁷ Η δυσκολία. Νακχάσα μπουτ χρόνος αμαρέ φαμιλιάσαρ. Οτθάρ τζανάσα εμ λένγκε λατσσέ ιδιότητες εμ λένγκε ατέλειες. Κάποια τζενέ αμαρέ φαμιλιάταρ μπορεί τι τθερέν εκ νασφαλιπέ ντα αντικάς μα τι αβέλ αμένγκε εύκολος τι φροντίνας-λεν ή μπορεί τι τθερένα μπουτ μπαρό άγχος. Γιαβερά μπορεί ατζέ-ντα τι κερένα ή τι βακερένα πράγματα σο πφανγκένα αμαρό γκι. Μερικοί αντίς τι προσπαθίνεν τι υπαρχίντιβελ ειρήνη αντρέ κι φαμιλί, κερένα πράγματα σο ανένα φασαρίες ντα να σικαβένα σεβασμός. Αντικάς η φαμιλί νανέ ενωμέ. Η φαμιλί μοιάζελα με εκ σώμας. Εκ νασφαλιπέ μπορεί τι κερέλ ο σώμας μα τι λειτουργίνελ λατσσές. Αντικάς-ντα άμα ο τζενέ αντρέ κι φαμιλί να σεβάνενα ο εκ ι γιαβερές, ανταβά μπορεί τι κερέλ-λεν μα τι συνεργαζίντιβεν λατσσές ο εκ ι γιαβερέσαρ. Αλλά σαρ μπορίνασα τι αβάς λατσσές μπουτέ νασφαλιματένταρ ντα αμαρό σώμας τι λειτουργίνελ σωστά, αντικάς εκ φαμιλί-ντα μπορίνελα τι σικαβέλ σεβασμός ο εκ κο γιαβέρ ντα τι λειτουργίνελ σωστά.

8. Σόσκε ισί σημαντικός τι σικαβάς σεβασμός αμαρέ φαμιλιάτε; (1 Τιμόθεο 5:4, 8)

⁸ Σόσκε σικαβάσα σεβασμός; (Διαβάνεν 1 Τιμόθεο 5:4, 8) Κο πρώτος γράμμας σο μπουτσσαντάς κο Τιμόθεος, ο Παύλος σικαντάς σαρ πρέπει ο τζενέ αντρέ εκχέ φαμιλιάτε τι φροντίνεν ο εκ ι γιαβερές. Εξηγιντάς ότι πρέπει τι σικαβάς σεβασμός αμαρέ φαμιλιάτε όχι επειδή ισινάμ αναγκασμέ τι κεράς-λες, αλλά επειδή τσσίντελα-αμέν αμαρί «αφοσίωση κο Ντεβέλ». Δηλαδή κεράσα-λες επειδή μανγκάσα ι Ιεχωβάς ντα αγαβάσα ότι ο τρόπος σο συμπεριφερίντιβασα αμαρέ φαμιλιάτε επηρεάνελα ι λατρεία σο ντάσα λέστε. Ο Ιεχωβά δημιουργιντάς ι φαμιλί. (Εφεσ. 3:14, 15) Άρα κάνα σικαβάσα σεβασμός εκχέ τζενέσκε αμαρέ φαμιλιάταρ, κι πραγματικότητα σικαβάσα σεβασμός κο Ιεχωβά. (1 Τιμ. 5:4) Σο σημαντικός λόγος ισί ανταβά για τι σικαβάς σεβασμός κο τζενέ σο ισί αντρέ αμαρέ φαμιλιάτε!

9. Σαρ μπορίνελα ο αντρόγυνος τι σικαβέλ σεβασμός ο εκ κο γιαβέρ; (Ντικχέν ο φωτογραφίες-ντα)

⁹ Σαρ τι σικαβάς σεβασμός. Εκ μουρς σεβάνελα πι ρομνιά κάνα σικαβέλα ότι ισί λέσκε μπουτ σημαντική, εμ κάνα ισί κορκορέ εμ κάνα ισί ανγκλάλ κο γιαβερά. (Παρ. 31:28· 1 Πέτρ. 3:7) Ποτές να νταπέλα-λα, να προσβαλίνελα-λα ντα να κερέλα-λα τι νιωθίνελ άχρηστη. Ο Αριέλ,a σο μπεσέλα κι Αργεντινή, βακερέλα: «Ιτιρί κατά νασφαλιπέ σο τθερέλα μι ρομνί, μπάζιμα βακερέλα λάφια σο πφανγκένα μο γκι. Κάνα αβέλα-πες ανταβά, ανάβα μι γκοντιάτε ότι οντουβά σο βακερέλα νανέ οντουβά σο νιωθίνελα μπαγιά. Ο εδάφιος 1 Κορινθίους 13:5 βοηθίνελα-μαν τι κεράβ λάφι με σεβασμός ντα μα τι χολιάναβ». (Παρ. 19:11) Εκ ρομνί σεβάνελα πι ρομές κάνα βακερέλα λατσσέ λάφια λέσκε κο γιαβερά. (Εφεσ. 5:33) Βόι να κρίνελα-λες ούτε κερέλα σακάδες σο κα ντουκχαβένας λέσκο γκι ντα να προσβαλίνελα-λες. Αγαβέλα ότι άμα κα κερέλας κάτι ασακό κα ανέλας μπαρέ προβλήματα πι μπιαβέστε. (Παρ. 14:1) Εκ πφεν κι Ιταλία σο λάκο ρομ τθερέλα μπουτ άγχος, βακερέλα: «Μπάζιμα μο ρομ ανησυχίνελα πο μπουτ απ’ ότι χρειαζίντιβελα. Ανγκλέ, μο λάφια ντα μο μούι σικαβένας ότι να σεβάναβας-λες. Όμως ντικχάβα ότι καζόμ πο μπουτ κεράβα παρέα τζενέντζαρ σο κερένα λάφι με σεβασμός ι γιαβερένγκε, αζόμ πο μπουτ μανγκάβα με-ντα τι σικαβάβ σεβασμός μι ρομέσκε».

10. Σαρ μπορίνενα ο τερνέ τι σικαβέν ότι σεβάνενα πουμαρέ νταντές ντα πουμαρέ νταγιά;

¹⁰ Τερνάλεν, ντεν καν κο λάφια σο βακερένα τουμαρό ντατ ντα τουμαρί ντάι. (Εφεσ. 6:1-3) Κερέν λένγκε λάφι με σεβασμός. (Έξοδ. 21:17) Καζόμ μπαριόλα τουμαρό ντατ ντα τουμαρί ντάι, μπορεί τι χρειαζίντιβελ τι φροντίνεν-λεν πο μπουτ. Κερέν ο πο λατσσό σο μπορίνενα ανταλέσκε. Σκεφτίνεν ο παράδειγμας ι Μαριάκο, σο λάκο ντατ νανέ Μάρτυρας ι Ιεχωβάσκο. Κάνα λάκο ντατ νασφάλιλο, ισινέ δύσκολος ι Μαριάκε τι φροντίνελ-λες. Βόι βακερέλα: «Προσευχίντιβαβας όχι σάντε τι τθεράβ σεβασμός μι νταντέσκε αλλά τι μπορίναβ-ντα τι σικαβάβ-λες λέσκε. Σκεφτιντόμ ότι αφού ο Ιεχωβά μανγκέλα μάνταρ τι σικαβάβ σεβασμός μι νταντέσκε, ισί λογικός τι ντελ-μαν ι ζορ-ντα για τι μπορίναβ τι κεράβ-λες. Καζόμ νακχέλας ο καιρός, αγαντόμ ότι να χρειαζίντιβελας τι αλλάνελ πι συμπεριφορά μο ντατ για τι σικαβάβ λέσκε σεβασμός». Κάνα σικαβάσα σεβασμός αμαρέ φαμιλιάτε, ατζέ-ντα κάνα νανέ εύκολος, σικαβάσα σεβασμός κο Ιεχωβά σο βοβ κερντάς ι φαμιλί.

ΣΙΚΑΒΕΝ ΣΕΒΑΣΜΟΣ ΤΟΥΜΑΡΕ ΠΦΡΑΛΕΝΤΕ

11. Σόσκε μπορεί μα τι αβέλ αμένγκε εύκολος τι σικαβάς σεβασμός αμαρέ πφραλέντε ντα πφενίντε;

¹¹ Η δυσκολία. Αμαρέ πφραλά ντα πφενιά κερένα ο πο λατσσό σο μπορίνενα για τι τζουβντιόν αντικάς σαρ βακερέλα η Γραφή. Όμως, μερικές φορές κάποιοι μπορεί τι συμπεριφερίντιβεν αμένγκε μπέτι τροπόσαρ, τι κρίνεν-αμέν, ή τι πφανγκέν αμαρέ νεύρα. Άμα εκ πφραλ ή εκ πφεν κα “προσβαλίνελ-αμέν”, μπορεί τι αβέλ αμένγκε δύσκολος τι συνεχίνας τι σικαβάς λένγκε σεβασμός. (Κολ. 3:13) Σο κα βοηθίνελ-αμέν άμα κα αβέλ-πες κάτι ασακό;

12. Σόσκε ισί σημαντικός τι σεβάνας αμαρέ πφραλέν ντα πφενίν; (2 Πέτρου 2:9-12)

¹² Σόσκε σικαβάσα σεβασμός; (Διαβάνεν 2 Πέτρου 2:9-12) Κο δεύτερος γράμμας σο γραφιντάς, ο Πέτρος βακερέλα ότι μερικά πφραλά αντρέ κι Χριστιανική κχανγκιρί αζομάν, κερένας λάφι χωρίς σεβασμός “οντουλένγκε σο κερένας κουμάντος”, δηλαδή ι πρεσβυτερόνγκε. Σο κερντέ ο πιστοί άγγελοι κάνα ντικχλέ σο αβέλας-πες; Επειδή «ο άγγελοι σεβάνενα ι Ιεχωβάς» να βακερντέ ούτε εκ μπέτι λάφι ανταλέ πφραλένγκε. Σο σουκάρ ανταβά σο κερντέ! Ο τέλειοι άγγελοι να μανγκλέ τι βακερέν καέκ πφαρό λάφι ανταλέ μπαρικανέ τζενένγκε. Οκιά μπάνταρ, μουκχλέ ι Ιεχωβάς τι κρίνελ-λεν ντα τι τιμωρίνελ-λεν. (Ρωμ. 14:10-12· ντικχέν Ιούδα 9) Μπορίνασα τι σικλιάς κάτι κατά άγγελοι. Αφού δεν πρέπει τι κεράς πράγματα σο να κα σικαβένας σεβασμός κο τζενέ σο τζάνα αμέντζαρ κόντρα, καζόμ πο μπουτ δεν πρέπει τι κεράς-λες ανταβά αμαρέ πφραλέντε ντα αμαρέ πφενίντε. Οτθάρ, πρέπει τι κεράς σο νακχέλα αμαρέ βαστέσταρ για τι “σικαβάς πρώτα αμέν” σεβασμός λένγκε. (Ρωμ. 12:10) Κάνα κεράσα-λες ανταβά, σικαβάσα ότι σεβάνασα ι Ιεχωβάς.

13, 14. Σαρ μπορίνασα τι σικαβάς σεβασμός οντουλένγκε σο ισί κι κχανγκιρί; Βακερέν παραδείγματα. (Ντικχέν ο φωτογραφίες-ντα)

¹³ Σαρ τι σικαβάς σεβασμός. Τουμέν σο ισινέν πρεσβύτεροι, προσπαθίνεν τι βοηθίνεν ι γιαβερέν με αγάπη. (Φιλήμ. 8, 9) Άμα κα χρειαζίντιβελ τι ντεν συμβουλή εκχέ τζενέστε, κερέν λάφι λατσσιμάσαρ ντα όχι κάνα ισινέν χολιαμέ. Πφενιάλεν, μπορίνενα τι βοηθίνεν ι γιαβερέν κι κχανγκιρί τι σεβάνεν ο εκ ι γιαβερές ντα αντικάς μα τι κερέν κουτσομπολιός ή τι τσσουβέν ψεύτικα λάφια καεκχέσκε. (Τίτο 2:3-5) Σαρέ μπορίνασα τι σικαβάς σεβασμός κο πρεσβύτεροι ι κχανγκιριάκε καζόμ συνεργαζίντιβασα λέντζαρ. Επίσης μπορίνασα τι βακεράς λένγκε καζόμ μπουτ εκτιμίνασα οντουλά σο κερένα για τι αβέν-πες ο συναθροίσεις, για τι οργανώνεν ο έργος ντα για τι βοηθίνεν οντουλέν σο “λιντέ εκ λάθος ντρομ”.​—Γαλ. 6:1· 1 Τιμ. 5:17.

¹⁴ Εκ πφεν σο βακερένα λάκε Ροσίο βακερντάς ότι εκ φαρ ισινέ λάκε δύσκολος τι σικαβέλ σεβασμός εκχέ πρεσβυτερόστε σο ντινάς-λα εκ συμβουλή. Βόι βακερέλα: «Νιωσάλομ ότι κερντάς μάνγκε πφαρές λάφι. . . . Κάνα γκιλόμ κχερέ κερντόμ λάφι λέσκε με αρνητικός τρόπος. Παρόλο σο προσπαθιντόμ μα τι σικαβάβ-λες, νιωσάλομ ότι να πφαμπόλας μάνγκε μπαγιά ντα αντικάς να ασουντόμ λέσκι συμβουλή». Σο βοηθιντάς την Ροσίο; Βακερέλα: «Εκ φαρ κάνα διαβάναβας ι Γραφή, ντικχλόμ ο εδάφιος 1 Θεσσαλονικείς 5:12, 13. Κάνα αγαντόμ ότι να σικαβάβα σεβασμός ανταλέ πφραλέσκε, μι συνείδηση αρχισάλι τι χαλ-μαν. Κερντόμ προσευχή κο Ιεχωβά ντα ροντιντόμ κο έντυπα αμαρέ για τι αρακχάβ πράγματα σο κα βοηθίνενας-μαν τι αλλάναβ ο τρόπος σο σκεφτίναβας. Τελικά αγαντόμ ότι ο πρόβλημας να ισινέ ο πφραλ, αλλά μο μπαρικανιπέ. Ακανά τζανάβα ότι άμα να ισινόμ ταπεινή κα αβέλ μάνγκε δύσκολος τι σικαβάβ σεβασμός κο γιαβερά. Χρειαζίντιβελα τι αβάβ ατζέ πο λατσσί ανταλέστε, αλλά καζόμ προσπαθίναβα τι σικαβάβ σεβασμός, νιωθίναβα ότι ο Ιεχωβά ισί χαρούμενος μάντζαρ».

ΣΙΚΑΒΕΝ ΣΕΒΑΣΜΟΣ ΚΟ ΤΖΕΝΕ ΚΟ ΝΤΟΥΝΙΑΣ

15. Σόσκε μπορεί τι αβέλ αμένγκε δύσκολος τι σικαβάς σεβασμός κο τζενέ κο ντουνιάς;

¹⁵ Η δυσκολία. Μπουτ φαρ αρακχάσα τζενέν κο έργος σο ντικχίντιβελα ότι να ενδιαφερίντιβενα ι Ντεβλέσκε. (Εφεσ. 4:18) Κάποιοι να δεχτίνενα τι ασουνέν οντουβά σο τθεράσα τι βακεράς λένγκε ιτιρί οντουλένταρ σο σικλιαρντέ-λεν κάνα ισινέ χουρντέ. Κάποια τζενέ κι μπουτί ή κο σχολείος μπορεί τι τζαν αμέντζαρ κόντρα ή μπορεί τι τθεράς εκχέ αφεντικός ή εκχέ δασκαλός σο νανέ ευχαριστιμέ αμέντζαρ. Καζόμ νακχέλα ο καιρός, αμαρό σεβασμός ασακέ τζενένγκε μπορεί τι χασάρντιβελ ντα αντικάς τι κεράς ή τι βακεράς κάτι σο να κα μανγκάας.

16. Σόσκε ισί σημαντικός τι σικαβάς σεβασμός οντουλέντε σο να υπηρετίνενα ατζέ ι Ιεχωβάς; (1 Πέτρου 2:12· 3:15)

¹⁶ Σόσκε σικαβάσα σεβασμός; Τι ντεν-τουμέν γκοντί ότι ο Ιεχωβά ντέλα σημασία σαρ συμπεριφερίντιβασα οντουλέντε σο να υπηρετίνενα-λες ατζέκ. Ο απόστολος Πέτρος βακερντάς κο Χριστιανοί ότι λένγκι λατσσί συμπεριφορά κα μπορίνελας τι τσσίντελ κάποιε τζενέν τι «δοξάνεν ι Ντεβλές». Οτθάρ, ντινάς-λεν τι αγαβέν ότι κάνα κα εξηγίνενας κο γιαβερά οντουλά σο πακιάνας, χρειαζίντιβελας τι κερέν-λες ανταβά «κοβλέ γκίσαρ ντα με μπαρό σεβασμός». (Διαβάνεν 1 Πέτρου 2:12· 3:15) Είτε εξηγίνενας οντουλά σο πακιάνα ανγκλάλ κο δικαστήριος είτε ανγκλάλ σε εκ απλός τζενό, έπρεπε πάντα τι σικαβέν σεβασμός κο γιαβερά, σαρ τι αβένας ανγκλάλ κο θρόνος κι Ιεχωβάσκο. Σαρ τζανάσα, ο Ιεχωβά ντικχέλα ντα ασουνέλα σο βακεράσα ντα σαρ βακεράσα-λες. Σο σημαντικός λόγος για τι σικαβάς σεβασμός κο τζενέ κο ντουνιάς!

17. Σαρ μπορίνασα τι σικαβάς σεβασμός κο τζενέ κο ντουνιάς;

¹⁷ Σαρ τι σικαβάς σεβασμός. Κάνα ισινάμ κο έργος, να μανγκάσα τι κεράς ι γιαβερέν τι νιωθίνεν ότι αμέν ισινάμ πο οπρέ λένταρ επειδή τζανάσα πο μπουτ πράγματα κατά Γραφή. Οκιά μπάνταρ, μανγκάσα τι τθεράς αμαρέ γκοντιάτε ότι τθερένα μπαρί αξία ι Ντεβλέσκε ντα ότι ισί πο οπρέ αμένταρ. (Αγγ. 2:7· Φιλιπ. 2:3) Άρα άμα εκ τζενό βακερντάς τουμένγκε κάτι μπέτι ιτιρί οντουλένταρ σο πακιάνα, μα κερέν τουμέν-ντα ο ίδιος λέσκε. Για παράδειγμας, να κα μανγκάας ποτές τι βακεράς κάτι σο κα κερέλας-αμέν τι ντικχίντιβας έξυπνοι, αλλά κα κερέλας ι τζενέν τι χολιάνεν. (1 Πέτρ. 2:23) Άμα βακερντέν κάτι σο μετανιώνενα λέσκε, βακερέν αμέσως συγνώμη. Σαρ μπορίνενα τι σικαβέν σεβασμός οντουλένγκε σο κερένα μπουτί λέντζαρ; Κερέν λατσσές τουμαρί μπουτί ντα προσπαθίνεν τι ντικχέν ο λατσσέ πράγματα σο τθερένα ο τζενέ σο κερένα λέντζαρ μπουτί ή τουμαρό αφεντικός. (Τίτο 2:9, 10) Κάνα κερένα τουμαρί μπουτί σωστά ντα αντράλ τουμαρέ γκίσταρ, ατζέ-ντα άμα να κα κερέν πάντα ο γκι ι τζενένγκο, σίγουρα κα κερέν ο γκι ι Ιεχωβάσκο.​—Κολ. 3:22, 23.

18. Σόσκε κερέλα αμένγκε λατσσιπέ τι τθεράς σεβασμός ντα τι σικαβάς-λες κο γιαβερά;

¹⁸ Σίγουρα τθεράσα σημαντικούς λόγους τι μπαριαράς αμαρό σεβασμός ντα τι σικαβάς-λες κο γιαβερά! Ντικχλάμ ότι κάνα σικαβάσα σεβασμός αμαρέ φαμιλιάτε, σικαβάσα σεβασμός κο Σορό αμαρέ φαμιλιάκο, κο Ιεχωβά. Αντικάς-ντα κάνα σεβάνασα αμαρέ πφραλέν ντα πφενίν, σεβάνασα αμαρέ Νταντές σο ισί κο ουρανός. Ντα κάνα σικαβάσα σεβασμός κο τζενέ κο ντουνιάς, μπορεί τι βοηθίνας-λεν βον-ντα εκ ντιβές τι σεβάνεν ή τι δοξάνεν αμαρέ μπαρέ Ντεβλές. Ατζέ-ντα μα τι σικαβέν αμένγκε ποτές σεβασμός μερικά τζενέ, ισί πάντα σημαντικός τι σικαβάς λένγκε αμέν σεβασμός. Σόσκε; Επειδή ο Ιεχωβά κα ευλογίνελ-αμέν. Βοβ ντέλα πο λάφι: «Οντουλέν σο δοξάνενα-μαν κα δοξάναβ-λεν με-ντα».​—1 Σαμ. 2:30.