Κερέν Ατζέ Πο Λατσσέ Τουμαρέ Προσευχές

1, 2. (α) Σο κα μπορίνελας τι κερέλ-αμέν μα τι πουτράς σαρό αμαρό γκι κο Ιεχωβά; (β) Σαρ τζανάσα ότι ο Ιεχωβά ντέλα μπαρί προσοχή αμαρέ προσευχιέντε;

ΜΗΠΩΣ μπάζιμα νιωθίνενα ότι κο προσευχές τουμαρέ βακερένα εμ ο ίδια ντα ο ίδια ντα να πουτρένα σαρό τουμαρό γκι κο Ιεχωβά; Ανταβά μπορεί τι αβέλ-πες σαριλέντε. Επειδή σαρέ τθεράσα μπουτ πράγματα τι κεράς, μπουτ φαρ περάσα κι παγίδα τι σιγκιαράς κάνα κεράσα προσευχή. Ή μπορεί τι δυσκολίντιβας τι πουτράς αμαρό γκι κο Ιεχωβά επειδή νιωθίνασα ότι να ισινάμ άξιοι τι πλησιάνας-λες.

² Η Γραφή βακερέλα αμένγκε ότι οντουβά σο τθερέλα αξία ι Ιεχωβάσκε νανέ τι τραμπίνας σουκάρ λάφια κάνα κεράσα προσευχή, αλλά αμαρέ λάφια τι νικιόν αντράλ αμαρέ γκίσταρ. Βοβ ασουνέλα «ι προσευχή οντουλένγκι σο ισί κοβλέ γκίσκε». (Ψαλμ. 10:17) Ντέλα προσοχή κο κάθε λάφι σο βακεράσα επειδή ενδιαφερίντιβελα μπαγιά αμένγκε.​—Ψαλμ. 139:1-3.

3. Καλά ερωτήσεις κα ντικχάς ανταλέ μαθημάστε;

³ Κα μπορίναας τι πουτσάς-αμέν: Σόσκε να χρειαζίντιβελα τι νταράς τι βακεράς κο Ιεχωβά ακριβώς σαρ νιωθίνασα; Σαρ μπορίνασα τι κεράς ατζέ πο λατσσέ αμαρέ προσευχές; Σο μπορίνασα τι σικλιάς κατά προσευχές ι Ιεχωβάσκε υπηρετόνγκε σο ισί κι Αγία Γραφή ντα σαρ μπορίνενα τι βοηθίνεν-αμέν τι κεράς πο λατσσέ προσευχές; Ντα σο μπορίνασα τι κεράς άμα τθεράσα αζόμ μπαρί ανησυχία σο ναστί βακεράσα κο Ιεχωβά σαρ νιωθίνασα; Ελάν τι ντικχάς ο απαντήσεις ανταλέ ερωτησιέντε.

ΠΟΤΕΣ ΜΑ ΝΤΑΡΕΝ ΤΙ ΠΡΟΣΕΥΧΙΝΤΙΒΕΝ ΚΟ ΙΕΧΩΒΑ

4. Σο μπορίνελα τι βοηθίνελ-αμέν τι κεράς προσευχή κο Ιεχωβά χωρίς τι νταράς; (Ψαλμός 119:145)

⁴ Κάνα αγαβάσα ότι ο Ιεχωβά ισί εκ αφοσιωμέ αμάλ σο μανγκέλα ο πο λατσσό αμένγκε, κα αγαβάς ότι μπορίνασα τι βακεράς λέσκε οντουλά σο νιωθίνασα χωρίς τι νταράς. Ο τζενό σο γραφιντάς ο Ψαλμός 119, προσπαθιντάς τι ντικχέλ ι Ιεχωβάς αντικάς. Βοβ τθερέλας μπουτ προβλήματα. Μερικά τζενέ κατηγοριντέ-λες ψεύτικε λαφίντζαρ. (Ψαλμ. 119:23, 69, 78) Επίσης μπουτ φαρ νιωθίνελας μπέτι ιτιρί κατά λάθη σο κερντάς. (Ψαλμ. 119:5) Όμως να νταρέλας τι βακερέλ κο Ιεχωβά σαρέ οντουλά σο νιωθίνελας.​—Διαβάνεν Ψαλμός 119:145.

5. Σόσκε δεν πρέπει τι μουκχάς ο μπέτι αισθήματα αμαρέ νεαυτόσκε τι τσσιναβέν-αμέν τι κεράς προσευχή; Βακερέν εκ παράδειγμας.

⁵ Ο Ιεχωβά μανγκέλα ο τζενέ σο κερντέ σοβαρά λάθη τι προσευχίντιβεν λέστε. (Ησ. 55:6, 7) Οτθάρ δεν πρέπει τι μουκχάς ο μπέτι αισθήματα σο τθεράσα αμαρέ νεαυτόσκε τι τσσιναβέν-αμέν τι κεράς προσευχή. Για παράδειγμας, βακερέν ότι εκ τζενό χασάρντιλο κι έρημος ντα ντικχέλα εκχέ τζενές σο κα μπορίνελας τι σώνελ-λες. Μήπως η λατζ κα κερέλας-λες τι σακιντίνελ τι μανγκέλ λέσταρ βοήθεια; Σίγουρα όχι! Αντικάς αμέν-ντα, άμα να τζανάσα καγιά απόφαση τι λας ή άμα κερντάμ εκ αμαρτία, ντα αντικάς νιωθίνασα σαρ τι χασάρντιλαμ, μπορίνασα τι κεράς λάφι με προσευχή κο Ιεχωβά χωρίς τι νταράς.​—Ψαλμ. 119:25, 176.

ΣΑΡ ΜΠΟΡΙΝΕΝΑ ΤΙ ΚΕΡΕΝ ΤΟΥΜΑΡΕ ΠΡΟΣΕΥΧΕΣ ΑΤΖΕ ΠΟ ΛΑΤΣΣΕ

6, 7. Σο μπορίνελα τι βοηθίνελ-αμέν τι βακεράς κο Ιεχωβά αντράλ κατά προσευχή σαρ νιωθίνασα μπαγιά; Βακερέν εκ παράδειγμας. (Ντικχέν ι υποσημείωση-ντα)

⁶ Κάνα βακεράσα κο Ιεχωβά αντράλ κατά προσευχή σο σκεφτίνασα ντα σαρ νιωθίνασα μπαγιά, κα πλησιάνας-λες ατζέ πο μπουτ. Άρα, σαρ μπορίνασα τι κεράς ατζέ πο λατσσέ αμαρέ προσευχές;

⁷ Σκεφτίνεν ο ιδιότητες σο τθερέλα ο Ιεχωβά.a Καζόμ πο μπουτ σκεφτίνασα ο ιδιότητες λέσκε, αζόμ πο εύκολα κα νικιόλ αμένταρ τι βακεράς λέσκε οντουλά σο νιωθίνασα ντα σκεφτίνασα μπαγιά. (Ψαλμ. 145:8, 9, 18) Ντικχέν ο παράδειγμας της Κριστίν, εκχέ πφενιάκο σο λάκο ντατ τθερέλας μπέτι συμπεριφορά. Βόι βακερέλα: «Να ισινέ εύκολος μάνγκε τι σκεφτίναβ ότι ο Ιεχωβά ισί μο Ντατ ντα τι κεράβ λέσαρ λάφι. Νιωθίναβας ότι ιτιρί κατά λάθη σο κεράβας, ο Ιεχωβά κα μουκχέλας-μαν». Καγιά ιδιότητα ι Ιεχωβάσκι βοηθιντάς-λα; Βόι βακερέλα: «Η αφοσιωμέ αγάπη ι Ιεχωβάσκι κερέλα-μαν τι νιωθίναβ αρακχαντί. Ακανά τζανάβα ότι πάντα κα βοηθίνελ-μαν. Ατζέ-ντα άμα κα κεράβ εκ λάθος βοβ κα συνεχίνελ τι μανγκέλ-μαν ντα τι βοηθίνελ-μαν. Κάνα σκεφτίναβα καζόμ λατσσό ισί ο Ιεχωβά, ισί πο εύκολος μάνγκε τι βακεράβ λέσκε εμ ο πράγματα σο κερένα-μαν χαρούμενη εμ ο πράγματα σο κερένα-μαν τι νταράβ».

8, 9. Σαρ ντικχένα λατσσιπέ κάνα σκεφτίνενα σο μανγκένα τι βακερέν κο Ιεχωβά πριν τι προσευχίντιβεν; Βακερέν εκ παράδειγμας.

⁸ Σκεφτίνεν σο κα βακερέν. Πριν τι κερέν προσευχή, μπορίνενα τι κερέν μερικές ερωτήσεις τουμαρέ νεαυτόσκε. Για παράδειγμας: “Καλά συγκεκριμέ προβλήματα τθεράβα ακανά; Υπαρχίντιβελα κάποιος σο πρέπει τι συγχωρίναβ; Τθεράβα εκ νεβί δυσκολία σο χρειαζίντιβαβα ι βοήθεια ι Ιεχωβάσκι για τι νακχαβάβ-λα;” (2 Βασ. 19:15-19) Επίσης, ντεν-τουμέν γκοντί ο τρόπος σο σικλιαρντάς-αμέν ο Ιησούς τι κεράς προσευχή. Σκεφτίνεν καλά πράγματα σο τθερένα σχέση ι Ιεχωβάσκε ναβέσαρ, λέσκε Βασιλειάσαρ ντα οντουλέσαρ σο μανγκέλα, μπορίνενα τι βακερέν αντράλ κατά προσευχή κο Ιεχωβά.​—Ματθ. 6:9, 10.

⁹ Κάνα εκ πφεν η Αλίσκα, σικλιλί ότι λάκο ρομ ισινέ μπουτ νασφαλό επειδή τθερέλας καρκίνος κο σορό, ισινέ δύσκολος λάκε τι προσευχίντιβελ. Βόι βακερέλα: «Ισινόμας αζόμ στεναχωριμέ σο δυσκολίντιβαβας τι τσσουβάβ μι γκοντί τι κχελέλ για τι κεράβ εκ προσευχή». Καβά πράγμας βοηθιντάς-λα; Βόι εξηγίνελα: «Πριν τι κεράβ προσευχή, μπεσάβα ντα σκεφτίναβα για χάνικ λεπτά σο μπορίναβα τι βακεράβ κο Ιεχωβά. Ανταβά βοηθίνελα-μαν μα τι κεράβ λάφι σάντε μι νεαυτόσκε ή για το νασφαλιπέ μι ρομέσκο. Κάνα κεράβα-λες ανταβά, ισινόμ πο ήρεμη ντα νιωθίναβα πο σουκάρ αντρά-μάντε κάνα προσευχίντιβαβα».

10. Σόσκε πρέπει τι μαρέν-τουμέν μα τι σιγκιαρέν κάνα κερένα προσευχή; (Ντικχέν ο φωτογραφίες-ντα)

¹⁰ Μα σιγκιαρέν κάνα κερένα προσευχές. Ισί μπαγιά ότι ατζέ-ντα ο χουρντέ προσευχές μπορίνενα τι ανέν-αμέν πασέ κο Ιεχωβά. Αλλά κάνα ντάσα αμαρό χρόνος για τι κεράς πο μπαρέ προσευχές, μπέκιμ κα βακεράς κο Ιεχωβά πο μπουτ οντουλένγκε σο νιωθίνασα.b Ο ρομ της Αλίσκα, ο Ελάιτζα, βακερέλα: «Προσπαθίναβα τι προσευχίντιβαβ μπουτ φαρ αντρέ κο ντιβές, ντα νιωθίναβα ατζέ πο πασέ κο Ιεχωβά κάνα μουκχάβα χρόνος για τι κεράβ πο μπαρέ προσευχές. Ο Ιεχωβά να μπεκλεντίνελα σαρ σαρ τι τελειώναβ μι προσευχή, οτθάρ να σιγκιαράβα κάνα προσευχίντιβαβα». Δοκιμάνεν ακαβά: Τσσουβέν εκ συγκεκριμέ σαάτι ντα αρακχέν εκ ήσυχος τθαν σο μπορίνενα τι κερέν προσευχή, ατζέ-ντα ζουρανές. Μαρέν-τουμέν για τι τσσουβέν-λες ανταβά αντρέ κο πρόγραμμας τουμαρό.

ΣΚΕΦΤΙΝΕΝ Ο ΠΡΟΣΕΥΧΕΣ ΣΟ ΙΣΙ ΑΝΤΡΕ ΚΙ ΓΡΑΦΗ

11. Σαρ μπορίνασα τι ντικχάς λατσσιπέ κατά προσευχές σο ισί αντρέ κι Γραφή; (Ντικχέν ο πλαίσιος-ντα «Μπορίνενα τι Αγαβέν Σαρ Νιωθίνενας;»)

¹¹ Μπορίνελα τι βοηθίνελ-τουμέν άμα κα σκεφτίνεν ο λάφια σο βακερένας ο υπηρέτες ι Ιεχωβάσκε κο πουρανέ μπρεσά κάνα κερένας προσευχή ντα κάνα γκιλιαβένας ύμνους κο Ιεχωβά. Ντικχέν σαρ ο υπηρέτες ι Ντεβλέσκε βακερένας ντιπ οντουλά σο σκεφτίνενας ντα οντουλά σο νιωθίνενας. Ανταβά κα βοηθίνελ-τουμέν τι πουτρέν ντιπ τουμέν-ντα τουμαρό γκι κο Ιεχωβά. Λένγκε προσευχές μπορίνενα τι βοηθίνεν-τουμέν τι αρακχέν γιαβερά-ντα λάφια σο μπορίνενα τι χρησιμοποιήνεν τουμέν-ντα τουμαρέ προσευχιέντε. Ντα μπέκιμ τι αρακχέν μερικές προσευχές σο ο υπηρέτες ι Ιεχωβάσκε νιωθίνενας αντικάς σαρ νιωθίνενα τουμέν ντα μανγκένας λέσταρ ο ίδια πράγματα σο μανγκένα τουμέν-ντα.

12. Καλά ερωτήσεις μπορίνασα τι κεράς αμαρέ νεαυτόσκε καζόμ διαβάνασα εκ προσευχή σο ισί αντρέ κι Γραφή;

¹² Κάνα διαβάνενα εκ προσευχή κατά Γραφή, πουτσέν τουμαρό νεαυτός: “Κον βακερντάς ανταλά λάφια, σαρ ισινέ λέσκι ζωή ντα σόσκε κερντάς προσευχή ανταλέ τροπόσαρ; Μπορίναβα τι βακεράβ ο σκέψεις σο ισί ανταλέ προσευχιάτε; Σο σικλιάσα κατά προσευχή ανταγιά;” Μπορεί τι χρειαζίντιβελ τι ρόντεν πο μπουτ για τι απαντίνεν ανταλέ ερωτησιέντε, αλλά αξίνελα τι κερέν-λες ανταβά. Ελάν τι ντικχάς σταρ προσευχές.

13. Σο σικλιάσα κατά προσευχή σο κερντάς η Άννα; (1 Σαμουήλ 1:10, 11) (Ντικχέν ι φωτογραφία-ντα)

¹³ Διαβάνεν 1 Σαμουήλ 1:10, 11. Κάνα η Άννα κερντάς ανταγιά προσευχή, τθερέλας ντούι μπαρέ προβλήματα. Να μπορίνελας τι κερέλ τσσαβέν ντα επίσης η γιαβέρ ρομνί σο τθερέλας λάκο ρομ συμπεριφερίντιβελας λάκε μπουτ μπέτι. (1 Σαμ. 1:4-7) Άμα τθερένα τουμέν-ντα εκ πρόβλημας σο συνεχίνελα τι δυσκολίνελ τουμαρί ζωή, σο μπορίνενα τι σικλιόν κατά προσευχή ι Αννάκι; Πουταρντάς σαρό πο γκι κο Ιεχωβά για μπουτ σαάτι, ντα σοράν ανταλέσταρ νιωσάλι μπουτ πο λατσσές. (1 Σαμ. 1:12, 18) Αμέν-ντα επίσης κα νιωθίνας μπουτ πο λατσσές κάνα “μουκχάσα κο Ιεχωβά ο πφαριπέ σο βάντασα”, δηλαδή κάνα πουτράσα σαρό αμαρό γκι Λέστε.​—Ψαλμ. 55:22.

14. (α) Σο γιαβέρ σικλιάσα κατά παράδειγμας ι Αννάκο; (β) Σόσκε κάνα διαβάνασα ντα σκεφτίνασα ο Λάφι ι Ντεβλέσκο κα κεράς πο λατσσέ αμαρέ προσευχές; (Ντικχέν ι υποσημείωση-ντα)

¹⁴ Χάνικ μπρεσά πριν τι μπιάντιβελ λάκο τσσαβό ο Σαμουήλ, η Άννα αντάς-λες κο αρχιερέας Ηλεί. (1 Σαμ. 1:24-28) Σε εκ τατί προσευχή σο κερντάς η Άννα, βακερντάς κο Ιεχωβά καζόμ μπουτ εκτιμίνελα σο αρακχαβέλα ντα φροντίνελα πι αφοσιωμέ υπηρετόν.c (1 Σαμ. 2:1, 8, 9) Παρόλο σο συνεχίνελας τι τθερέλ προβλήματα, λάκι γκοντί να ισινέ σάντε οτθέ αλλά ισινέ κο ευλογίες σο τθερέλας κατά Ιεχωβά. Σο σικλιάσα αμέν ανταλέσταρ; Κα μπορίνας τι νταϊντίνας πο εύκολα ο δυσκολίες άμα αμαρί γκοντί ισί κο τρόπος σο βοηθιντάς-αμέν ο Ιεχωβά μέχρι ακανά.

15. Κάνα τσσίντασα αδικίες, σο μπορίνασα τι σικλιάς κατά προσευχή του Ιερεμία; (Ιερεμίας 12:1)

¹⁵ Διαβάνεν Ιερεμίας 12:1. Κάνα ο Ιερεμίας ντικχλάς ότι μερικά τζενέ ντικχίντιβενας ότι τθερένας εκ λατσσί ζωή παρόλο σο κερντέ μπουτ μπέτι πράγματα, ανταβά κερντάς-λες τι χασαρέλ πι ζορ. Επίσης, μπουτ φαρ χασαρέλας πι ζορ επειδή ο γιαβερά Ισραηλίτες πρασάνας-λες. (Ιερ. 20:7, 8) Αγαβάσα σαρ νιωθίνελας σόσκε αμέν-ντα πρασαντέ-αμέν ο γιαβερά ντα ντικχλάμ γκεραλέ τζενέν τι ντικχίντιβελ ότι να τθερένα μπουτ προβλήματα κι ζωή. Ο Ιερεμίας βακερντάς πι ανησυχία κο Ιεχωβά, αλλά ποτές να κατηγοριντάς ι Ιεχωβάς ότι ισινέ άδικος. Κάνα ντικχλάς σαρ ο Ιεχωβά διορθωντάς πι λαός, αβιλό ατζέ πο σίγουρος ότι ο Ιεχωβά κερέλα ο πράγματα με δίκαιος τρόπος. (Ιερ. 32:19) Αμέν-ντα επίσης μπορίνασα τι πουτράς αμαρό γκι κο Ιεχωβά ντα τι βακεράς λέσκε καζόμ μπουτ ντουκχάλα αμαρό γκι κάνα αβένα αδικίες. Επίσης συνεχίνασα τι ντας μπέσα κο Ιεχωβά ότι κα κερέλ κάτι για το αδικίες κο σωστός σαάτι.

16. Σο μπορίνασα τι σικλιάς κατά προσευχή σο κερντάς εκ Λευίτης; (Ψαλμός 42:1-4) (Ντικχέν ο φωτογραφίες-ντα)

¹⁶ Διαβάνεν Ψαλμός 42:1-4. Ανταβά ψαλμός γραφιντάς-λες εκ Λευίτης σο να μπορίνελας τι ντελ λατρεία γιεκ γιαβερέ Ισραηλιτέντζαρ. Ο ψαλμός σο γραφιντάς σικαβέλα σαρ νιωθίνελας. Μπέκιμ τι νιωθίνας σαρ ανταβά μουρς άμα να μπορίνασα τι νικιάς αμαρέ κχερέσταρ, ιτιρί εκχέ νασφαλιμάσταρ ή άμα τσσουντέ-αμέν κι φυλακή επειδή ντάσα λατρεία κο Ιεχωβά. Μπάζιμα μπορεί τι νιωθίνας λατσσές αλλά κάποιες γιαβερά φορές μπορεί τι νιωθίνας ότι χασαρντάμ αμαρί ζορ. Όμως σαρ-ντα τι νιωθίνασα, ισί λατσσό τι κεράς λάφι ι Ιεχωβάσαρ ανταλέσκε αντράλ κατά προσευχή. Ανταβά μπορίνελα τι βοηθίνελ-αμέν τι αγαβάς πο λατσσές αμαρέ αισθήματα ντα τι ανέλ αμαρέ γκοντιάτε σο ισί μπαγιά σημαντικός. Για παράδειγμας, ο Λευίτης αγαντάς ότι κα τθερέλας γιαβερά-ντα ευκαιρίες ανγκλά-πέστε τι ντελ δόξα κο Ιεχωβά. (Ψαλμ. 42:5) Σκεφτιντάς επίσης σαρ φροντίνελας-λες ο Ιεχωβά. (Ψαλμ. 42:8) Κάνα προσευχίντιβασα κο Ντεβέλ αντράλ αμαρέ γκίσταρ, ανταβά κα βοηθίνελ-αμέν τι αγαβάς πο λατσσές σαρ νιωθίνασα, τι αρακχάς πάλι αμαρί ηρεμία ντα τι τθεράς ι ζορ τι νταϊντίνας.

17. (α) Σο μπορίνασα τι σικλιάς κατά προσευχή σο κερντάς ο προφήτης Ιωνάς; (Ιωνάς 2:1, 2) (β) Κάνα νακχάσα δυσκολίες, σόσκε ισί λατσσό τι ντας-αμέν γκοντί εδάφια κατά Ψαλμούς; (Ντικχέν ι υποσημείωση-ντα)

¹⁷ Διαβάνεν Ιωνάς 2:1, 2. Ο προφήτης Ιωνάς κερντάς ανταγιά προσευχή κο Ιεχωβά αντράλ κατά ματσσέσκο περ. Παρόλο σο ο Ιωνάς να ντινάς καν κο Ιεχωβά, ισινέ σίγουρος ότι ο Ντεβέλ κα ασουνέλας λέσκι προσευχή. Κι προσευχή σο κερντάς ο Ιωνάς χρησιμοποιηντάς μπουτ κατά λάφια σο ισί κο Ψαλμοί.d Σαρ αγαβάσα τζανέλας ο Ψαλμοί ανταλά μπουτ λατσσές. Άρα επειδή ντέλας-λεν γκοντί ντα σκεφτίνελας-λεν, ανταβά κερντάς-λες τι αβέλ σίγουρος ότι ο Ιεχωβά κα βοηθίνελας-λες. Αντικάς αμέν-ντα κάνα μαράσα-αμέν τι ντας-αμέν γκοντί μερικά εδάφια, μπορεί τι αβέν αμαρέ γκοντιάτε ντα τι ντεν-αμέν ζορ κάνα προσευχίντιβασα κο Ιεχωβά δύσκολε ντιβεσέντε.

ΣΥΝΕΧΙΝΕΝ ΤΙ ΠΛΗΣΙΑΝΕΝ Ι ΙΕΧΩΒΑΣ ΑΝΤΡΑΛ ΚΑΤΑ ΠΡΟΣΕΥΧΗ

18, 19. Ατζέ-ντα άμα μπάζιμα μαράσα-αμέν για τι βακεράς σαρ νιωθίνασα κο Ιεχωβά, καγιά σκέψη σο ισί κο εδάφιος Ρωμαίους 8:26, 27 κα βοηθίνελ-αμέν; Βακερέν εκ παράδειγμας.

¹⁸ Διαβάνεν Ρωμαίους 8:26, 27. Μπάζιμα μπορεί τι τθεράσα αζόμ μπουτ άγχος σο ναστί μπορίνασα τι βακεράς κο Ιεχωβά σαρ νιωθίνασα. Αλλά τθεράσα βοήθεια. Κάνα νακχάσα κάτι ασακό, ο άγιος πνεύμας ι Ντεβλέσκο “βοηθίνελα-αμέν”. Σαρ; Αντράλ πι άγιε πνευμάσταρ, ο Ιεχωβά τσσιντιντάς μερικέ πι υπηρετόνταρ τι γραφίνεν μπουτ προσευχές κι Γραφή. Κάνα να μπορίνασα τι βακεράς κο Ιεχωβά ντιπ λατσσές οντουλά σο σκεφτίνασα, βοβ μπορίνελα τι λελ κάποια λάφια κατά προσευχές σο υπαρχίντιβενα κι Γραφή ντα τι δεχτίνελ-λεν σαρ τι βακερντάμ-λεν αμέν, ντα αντικάς τι απαντίνελ αμένγκε.

¹⁹ Ανταγιά σκέψη βοηθιντάς εκχέ πφενιά κατά Ρωσία, την Γιελένα. Τσσουντέ-λα κι φυλακή επειδή κερέλας προσευχή ντα διαβάνελας ι Γραφή. Η Γιελένα τθερέλας αζόμ μπαρό άγχος σο δυσκολίντιβελας τι προσευχίντιβελ. Βόι βακερέλα: «Αζομάν ντινόμ-μαν γκοντί ότι κάνα τθεράβα αζόμ μπαρί ανησυχία σο να τζανάβα καλέ πραγμάσκε τι κεράβ προσευχή, ο Ιεχωβά κα δεχτίνελ ο προσευχές πι πιστέ υπηρετόνγκε σο ισί αντρέ κι Γραφή . . . σαρ τι αβένας ο λάφια σο κα μανγκάβας τι βακεράβ με. . . . Ανταβά λοκχιαρντάς μπουτ μο γκι ανταλέ δύσκολε βακιτίστε».

20. Κάνα τθεράσα μπαρί ανησυχία, σαρ μπορίνασα τι προετοιμάντιβας πριν τι κεράς προσευχή;

²⁰ Κάνα τθεράσα μπαρό άγχος, αμαρί γκοντί μπορεί τι πφιρέλα κάπου γιαβερτθέ καζόμ κεράσα προσευχή. Σο μπορίνελα τι βοηθίνελ-αμέν; Για τι ετοιμάνας αμαρί γκοντί, μπορίνασα τι διαβάνας ζουρανές ο Ψαλμοί. Μπορίνασα επίσης τι προσπαθίνας τι γραφίνας οντουλά σο νιωθίνασα, σαρ κερντάς ο βασιλιάς Δαβίδ. (Ψαλμ. 18, 34, 142· επιγραφές) Να τθεράσα κανόνες σαρ πρέπει τι προετοιμάντιβας πριν τι κεράς προσευχή. (Ψαλμ. 141:2) Κερέν οντουβά σο πακιάνα ότι κα αβέλ πο λατσσό τουμένγκε.

21. Σόσκε πρέπει τι προσευχίντιβας σαρέ αμαρέ γκίσαρ;

²¹ Λοκχιόλα μπουτ αμαρό γκι επειδή τζανάσα ότι ο Ιεχωβά αγαβέλα σαρ νιωθίνασα πριν τι βακεράς λέσκε κάτι. (Ψαλμ. 139:4) Αλλά μανγκέλα τι ασουνέλ-αμέν τι βακεράς λέσκε σαρ νιωθίνασα ντα καζόμ μπουτ μπέσα ντάσα λέστε. Οτθάρ μα σακιντίνεν τι κερέν προσευχή τουμαρέ Νταντέστε σο ισί κο ουρανός. Σικλιόν κατά προσευχές σο ισί αντρέ κο Λάφι κι Ντεβλέσκο. Προσευχίντιβεν σαρέ τουμαρέ γκίσαρ. Βακερέν λέσκε εμ ο πράγματα σο κερένα-τουμέν τι χαιρίνεν εμ ο πράγματα σο στεναχωρίνενα-τουμέν. Σαρ κερέλα εκ αληθινός φίλος, αντικάς ο Ιεχωβά-ντα κα αβέλ πάντα οτθέ τουμένγκε!