Ο Αδάμ ντα η Εύα να Ντινέ Καν κο Ντεβέλ

Εκ ντιβές σο ισινέ η Εύα κορκορί, κερντάς λάκε λάφι εκ σαπ. Βακερντάς λάκε: “Μπαγιά βακερντάς ο Ντεβέλ ότι δεν πρέπει τι χαν από κάθε δέντρος σο ισί κο κήπος;” Η Εύα βακερντάς: “Μπορίνασα τι χας ο φρούτα ι δεντρόνγκε σο ισί κο κήπος εκτός εκχέσταρ. Άμα κα χας ανταλέ δεντρόσταρ, κα μεράς”. Αζομάν ο σαπ βακερντάς: “Να κα μερέν. Αλλά αντίθετα, άμα κα χαν ανταλέσταρ, κα αβέν σαρ ο Ντεβέλ”. Όμως, ισινέ μπαγιά ανταβά; Όχι, ισινέ ψέμας. Η Εύα όμως πακιαντάς-λες. Ντα καζόμ πο μπουτ ντικχέλας ο φρούτος, καζόμ πο μπουτ μανγκέλας-λες. Η Εύα τελικά, χαλάς κατά φρούτος ντα ντινάς κο Αδάμ-ντα. Βοβ τζανέλας ότι κα μερένας άμα να ντινέας καν ι Ντεβλές. Παρόλο σο τζανέλας-λες ανταβά, χαλάς κατά φρούτος.

Πο σοράν οντουβά ντιβές, ο Ιεχωβά κερντάς λάφι κο Αδάμ ντα κι Εύα. Πουτσλάς-λεν σόσκε να ντινέ-λες καν. Η Εύα τσσουντάς ο βάρετα κο σαπ, ντα ο Αδάμ κι Εύα. Επειδή ο Αδάμ ντα η Εύα να ντινέ καν κο Ιεχωβά, βοβ νασκιαρντάς-λεν κατά κήπος. Για τι αβέλ σίγουρος ο Ιεχωβά ότι να κα ντένας ποτές ξανά αντρέ, τσσουντάς αγγελόν ντα εκ σπαθίς σο πφαμπόλας γιακάσαρ για τι αρακχαβέλ ο κήπος.

Ο Ιεχωβά βακερντάς ότι κα τιμωρίνελας εμ οντουλές σο βακερντάας ψέματα κι Εύα. Κι πραγματικότητα να κερντάας λάφι ο σαπ κι Εύα. Ο Ιεχωβά να κερντάας ι σαπέν τι κερέν λάφι. Οντουβά σο κερντάς ι σαπές τι κερέλ λάφι ισινέ εκ γκεραλό άγγελος. Βοβ μανγκέλας τι χουχαβέλ ι Ευά. Ο ναβ ανταλέ αγγελόσκο ισί Σατανάς ο Διάβολος, ή γιαβέρτουλους Μπενγκ. Κο μέλλον, ο Ιεχωβά κα καταστραφίνελ ι Μπενγκές, ντα αντικάς ο Μπενγκ να κα χουχαβέλ ι τζενέν για τι κερέν μπέτι πράγματα.