Καζόμ Σημαντικός Ισί ι Ιησούσκε ο Ναβ ι Ιεχωβάσκο;

1, 2. (α) Σο κερντάς ο Ιησούς ι ιράτ πριν τι μερέλ; (β) Καλέ ερωτησιέντε κα απαντίνας ανταλέ μαθημάστε;

ΙΣΙΝΕ Πέμπτη απόγευμας, 14 Νισάν, 33 Σ.Κ.Χ. (σοράν κατά Χριστός). Αβιλόας ο βακίτι τι προδόνεν ι Ιησούς, τι κρίνεν-λες, τι καταδικάνεν-λες, τι βασανίνεν-λες ντα τι μουνταρέν-λες. Μόλις χαλάς γιεκ πι πιστέ μαθητέντζαρ για τελευταία φαρ σε εκ οπραϊνό δωμάτιος. Αφού χαλέ, ο Ιησούς βακερντάς πι μαθητένγκε μερικά τελευταία λάφια σο ντινέ-λεν ζορ. Ντα χάνικ πριν τι νασέν κατά οπραϊνό δωμάτιος, ο Ιησούς κερντάς εκ μπουτ σημαντική προσευχή. Ο απόστολος Ιωάννης γραφιντάς ανταγιά προσευχή, ντα αντιβές μπορίνασα τι αρακχάς-λα κο Ιωάννης κεφάλαιος 17.

² Ανταλέ μαθημάστε κα ντικχάς μερικά πράγματα σο μπορίνασα τι σικλιάς κατά προσευχή ι Ιησούσκι. Καλέ πραγματένγκε ανησυχίνελας πριν τι μερέλ; Σο ισινέ σημαντικός ι Ιησούσκε καζόμ ισινέ κι πφουβ; Ελάν τι ντικχάς ο απαντήσεις ανταλέ ερωτησιέντε.

«ΣΙΚΛΙΑΡΝΤΟΜ-ΛΕΝ ΤΙ ΝΑΒΕΣΚΕ»

3. Σο βακερντάς ο Ιησούς ι Ιεχωβάσκε ναβέσκε ντα σο μανγκέλας τι βακερέλ; (Ιωάννης 17:6, 26)

³ Πι προσευχιάτε ο Ιησούς βακερντάς: «Σικλιαρντόμ-λεν τι ναβέσκε». Τζανάσα ότι ανταβά ισινέ σημαντικός ι Ιησούσκε επειδή βακερντάς-λες ντούι φαρ. (Διαβάνεν Ιωάννης 17:6, 26) Σο μανγκέλας τι βακερέλ ανταλέ λαφίσαρ; Μήπως βακερντάς λένγκε εκ ναβ σο να τζανένας; Ο μαθητές ι Ιησούσκε ισινέ Ιουδαίοι. Οτθάρ ήδη τζανένας ότι ι Ντεβλέσκο ναβ ισί Ιεχωβά. Ανταβά ναβ υπαρχίντιβελας χιλιάδες φαρ κο Εβραϊκές Γραφές. Άρα κάνα ο Ιησούς βακερντάς «σικλιαρντόμ-λεν τι ναβέσκε», να βακερντάς λένγκε απλά ότι ο ναβ ι Ντεβλέσκο ισί Ιεχωβά. Αλλά σικαντάς λένγκε σο Ντεβέλ ισί ο Ιεχωβά. Βοηθιντάς πι μαθητέν τι σικλιόν πο λατσσές ι Ιεχωβάς. Σικαντάς λένγκε καβά ισί ο σκοπός ι Ιεχωβάσκο ι πφουβιάκε ντα ι τζενένγκε, σο κερντάς, σο κα κερέλ ντα καλά ιδιότητες τθερέλα. Σάντε ο Ιησούς τζανέλα ι Ιεχωβάς αζόμ λατσσές.

4, 5. (α) Σαρ μπορίνελα εκ ναβ τι αβέλ ατζέ πο σημαντικός αμένγκε; Βακερέν εκ παράδειγμας. (β) Καλέ τροπόσαρ ο μαθητές ι Ιησούσκε σικλιλέ ι Ιεχωβάσκο ναβ πο λατσσές;

⁴ Σκεφτίνεν ακαβά παράδειγμας: Βακερέν ότι υπαρχίντιβελα εκ πρεσβύτερος τουμαρέ κχανγκιριάτε σο βακερένα λέσκε Δαβίδ ντα ισί χειρούργος. Τζανένα ανταλέ πφραλές μπουτ μπρεσά. Αλλά εκ ντιβές αβέλα-πες κάτι ντα χρειαζίντιβενα εκχέ γιατρός για τι βοηθίνελ-τουμέν. Τζάνα σουγκό κο νοσοκομείος, ντα ανταβά πφραλ ισί ο γιατρός σο σώνελα τουμαρί ζωή. Μήπως ακανά σκεφτίνενα ότι ανταβά πφραλ ισί απλά εκ πρεσβύτερος τουμαρέ κχανγκιριάταρ; Σίγουρα όχι! Ο Δαβίδ νανέ απλά ο πρεσβύτερος σο τζανένα. Ισί ο γιατρός σο σωντάς τουμαρί ζωή.

⁵ Άκ’ αντικάς, ο μαθητές ι Ιησούσκε ήδη τζανένας ι Ιεχωβάσκο ναβ. Αλλά ανταβά ναβ αβιλό ατζέ πο σημαντικός λένγκε επειδή ο Ιησούς βοηθιντάς-λεν τι σικλιόν ι Ιεχωβάς πο λατσσές. Σόσκε βακεράσα-λες ανταβά; Επειδή ο Ιησούς μοιάζελας τέλεια πι Νταντέστε σαρέ οντουλέντε σο βακερέλας ντα κερέλας. Οτθάρ λέσκε μαθητές “σικλιλέ” ι Ιεχωβάς πο λατσσές καζόμ ασουνένας οντουλά σο σικλιαρέλας ο Ιησούς ντα ντικχένας ο τρόπος σο συμπεριφερίντιβελας κο τζενέ.​—Ιωάν. 14:9· 17:3.

“ΤΟ ΝΑΒ, ΣΟ ΝΤΙΝΑΝ-ΜΑΝ”

6. Σο μανγκέλας τι βακερέλ ότι ο Ιεχωβά ντινάς κο Ιησούς Πο ναβ; (Ιωάννης 17:11, 12)

⁶ Ο Ιησούς προσευχισάλο πι μαθητένγκε ντα βακερντάς: «Αράκχαβ-λεν μάξους τι ναβέσκε σο ντινάν-μαν». (Διαβάνεν Ιωάννης 17:11, 12) Μήπως ανταβά μανγκέλας τι βακερέλ ότι ακανά ο Ιησούς κα βακέρντιβελας Ιεχωβά; Νάα. Κάνα ο Ιησούς κερντάς λάφι ι Ιεχωβάσκε ναβέσκε βακερντάς “τιρό ναβ”. Άρα ο Ιησούς να λιντάς ι Ιεχωβάσκο ναβ. Όμως σο μανγκέλας τι βακερέλ κάνα βακερντάς ότι ντιντιλό-λες ι Ντεβλέσκο ναβ; Πρώτα, ο Ιεχωβά μπουτσσαντάας ι Ιησούς τι κερέλ λάφι λέσκε. Αβιλό πι Νταντέσκε ναβέστε ντα ανταλέ ναβέσαρ κερντάς μπουτ σουκάρ πράγματα. (Ιωάν. 5:43· 10:25) Επίσης, ο ναβ ι Ιησούσκο μανγκέλα τι βακερέλ «ο Ιεχωβά Σώνελα». Βα, ι Ντεβλέσκο ναβ συνδέντιβελας μπουτ ι Ιησούσκε ναβέσαρ.

7. Σαρ ο Ιησούς μπορίνελας τι κερέλ λάφι αντίς ι Ιεχωβάσκε; Βακερέν εκ παράδειγμας.

⁷ Για τι αγαβάς σόσκε ο Ιησούς μπορίνελας τι κερέλ λάφι αντίς ι Ιεχωβάσκε, σκεφτίνεν ακαβά παράδειγμας: Εκ κυβερνήτης μπορίνελα τι μπουτσσαβέλ εκχέ τζενές τι κερέλ λάφι κο γιαβερά αντίς λέσκε. Οτθάρ κάνα οντουβά τζενό κερέλα λάφι τθερέλα ι ίδια εξουσία σαρ ο κυβερνήτης. Άκ’ αντικάς, ο Ιησούς-ντα τθερέλας ι εξουσία τι κερέλ λάφι αντίς ι Ιεχωβάσκε, επειδή μπουτσσαντάς-λες ο Ιεχωβά.​—Ματθ. 21:9· Λουκ. 13:35.

8. Σόσκε ο Ιεχωβά βακερντάς ότι Λέσκο ναβ ισί «αντρέ» κο Ιησούς, ατζέ-ντα πριν τι αβέλ ο Ιησούς κι πφουβ; (Έξοδος 23:20, 21)

⁸ Η Γραφή βακερέλα ότι ο Ιησούς ισί «ο Λάφι», επειδή ο Ιεχωβά χρησιμοποιηντάς-λες για τι βακερέλ κο άγγελοι ντα κο τζενέ οντουλά σο μανγκέλας τι τζανέν ντα τι κερέν. (Ιωάν. 1:1-3) Ο Ιησούς μάλλον ισινέ ο άγγελος σο μπουτσσαντάς ο Ιεχωβά για τι φροντίνελ ι Ισραηλιτέν κάνα ισινέ κι έρημος. Κάνα ντινάς κο Ισραηλίτες ι εντολή τι ντεν καν οντουλέ αγγελός, ο Ιεχωβά βακερντάς: «Επειδή μο ναβ ισί αντρέ λέστε».a (Διαβάνεν Έξοδος 23:20, 21) Ο Ιεχωβά βακερντάς-λες ανταβά επειδή ο Ιησούς κερέλα λάφι αντίς Λέσκε ντα σικαβέλα πο μπουτ σαριλένταρ ότι σο-ντα κερέλα ο Ιεχωβά ισί σωστός ντα ότι Βοβ ισί άγιος.

«ΝΤΑΝΤΕ, ΔΟΞΑΝΕ ΤΟ ΝΑΒ»

9. Καζόμ σημαντικός ισινέ ι Ιεχωβάσκο ναβ ι Ιησούσκε; Εξηγίνεν.

⁹ Σαρ ντικχλάμ, ατζέ-ντα πριν τι αβέλ ο Ιησούς κι πφουβ, ο ναβ ι Ιεχωβάσκο ισινέ μπουτ σημαντικός λέσκε. Κάνα ισινέ κι πφουβ-ντα ο Ιησούς σικαντάς σαρέ οντουλέντζαρ σο κερντάς καζόμ σημαντικός ισινέ ι Ιεχωβάσκο ναβ λέσκε. Χάνικ ντιβεσά πριν τι μερέλ ο Ιησούς βακερντάς: «Ντάντε, δόξανε το ναβ». Αμέσως λέσκο Ντατ βακερντάς λέσκε ζουρανές ακαλά λάφια: «Δοξαντόμ-λες ντα κα δοξάναβ-λες πάλι».​—Ιωάν. 12:28.

10, 11. (α) Σαρ δοξαντάς ο Ιησούς ι Ιεχωβάσκο ναβ; (Ντικχέν ι φωτογραφία-ντα) (β) Σόσκε χρειαζίντιβελα τι αγιάντιβελ ντα τι δικαιώντιβελ ι Ιεχωβάσκο ναβ;

¹⁰ Ο Ιησούς-ντα δοξαντάς πι Νταντέσκο ναβ. Σαρ; Εκ τρόπος ισινέ ότι σικαβέλας κο γιαβερά ο σουκάρ ιδιότητες πι Νταντέσκε ντα ο λατσσέ πράγματα σο κερέλας. Όμως, κερντάς κάτι γιαβέρ-ντα. Ο Ιησούς χρειαζίντιβελας τι σικαβέλ ότι σο-ντα κερντάς ο Ιεχωβά ισινέ σωστός ντα ότι Λέσκο ναβ ισί άγιος.b Ο Ιησούς σικαντάς καζόμ σημαντικός ισί ανταβά κάνα σικλιαρντάς πι μαθητέν σαρ τι προσευχίντιβεν. Βακερντάς: «Ντάντε σο ισινάν κο ουρανός, τι αγιάντιβελ το ναβ».​—Ματθ. 6:9.

¹¹ Σόσκε χρειαζίντιβελα τι αγιάντιβελ ντα τι δικαιώντιβελ ι Ιεχωβάσκο ναβ; Επειδή κο κήπος της Εδέμ ο Μπενγκ βακερντάς ψέματα ι Ιεχωβά Ντεβλέσκε. Βακερντάς ότι ο Ιεχωβά ισινέ ψεύτης ντα ότι ατσσικιαρέλας κατά Αδάμ ντα κατά Εύα κάτι λατσσό. (Γέν. 3:1-5) Ο Μπενγκ επίσης βακερντάς ότι ο τρόπος σο κερέλας ο πράγματα ο Ιεχωβά ισινέ λάθος. Επειδή ο Μπενγκ βακερντάς ψέματα ι Ιεχωβάσκε, ο τζενέ μπορεί τι πακιάν ότι ο Ιεχωβά ισί γκεραλό. Πο σοράν, αζομάν σο τζουβντιόλας ο Ιώβ, ο Σατανάς βακερντάς ότι οντουλά σο υπηρετίνενα ι Ιεχωβάς κερένα-λες ανταβά σάντε επειδή μανγκένα τι κερδίνεν κάτι Λέσταρ. Ανταβά ψεύτης βακερντάς επίσης ότι ο τζενέ κα τσσιναβένας τι υπηρετίνεν ι Ιεχωβάς κάνα κα τθερένας δυσκολίες επειδή να μανγκένα-Λες μπαγιά. (Ιώβ 1:9-11· 2:4) Χρειαζίντιβελας χρόνος για τι σικάντιβελ κον ισινέ ο ψεύτης, ο Ιεχωβά ή ο Μπενγκ.

«ΝΤΑΒΑ ΜΙ ΖΩΗ»

12. Σο κερντάς ο Ιησούς σαρέ πι γκίσαρ επειδή μανγκέλα ι Ιεχωβάσκο ναβ;

¹² Επειδή μανγκέλα ι Ιεχωβάς, ο Ιησούς μανγκλάς τι κερέλ σο νακχέλας λέσκε βαστέσταρ για τι αγιάνελ ντα τι δικαιώνελ ι Ιεχωβάσκο ναβ. «Ντάβα μι ζωή», βακερντάς ο Ιησούς. (Ιωάν. 10:17, 18) Βα, ισινέ έτοιμος ατζέ-ντα τι μερέλ ι Ιεχωβάσκε ναβέσκε.c Ο πρώτα ντούι τέλεια τζενέ, ο Αδάμ ντα η Εύα, προδοντέ ι Ιεχωβάς ντα ακολουθιντέ ι Μπενγκές. Οκιά μπάνταρ, ο Ιησούς αβιλό κι πφουβ σαρέ πι γκίσαρ ντα σικαντάς ότι μανγκέλας ι Ιεχωβάς. Σικαντάς-λες ανταβά επειδή ντέλας καν κο Ιεχωβά σαρέ οντουλέντζαρ σο κερέλας ντα βακερέλας. (Εβρ. 4:15· 5:7-10) Ατσσιλό πιστός λέστε σαρί πι ζωή, μέχρι σο μουλό οπράλ κο κας. (Εβρ. 12:2) Ανταλέ τροπόσαρ, σικαντάς ότι μανγκέλας ι Ιεχωβάς ντα Λέσκο ναβ.

13. Σόσκε ο Ιησούς μπορίνελας πο λατσσές σαριλένταρ τι σικαβέλ ότι ο Μπενγκ ισί ψεύτης; (Ντικχέν ι φωτογραφία-ντα)

¹³ Σαρέ οντουλέντζαρ σο κερντάς, ο Ιησούς σικαντάς ότι ο Μπενγκ ισί ο ψεύτης, όχι ο Ιεχωβά! (Ιωάν. 8:44) Ο Ιησούς τζανέλας ι Ιεχωβάς πο λατσσές σαριλένταρ. Άμα κάτι οντουλένταρ σο βακερντάς ο Μπενγκ ι Ιεχωβάσκε ισινέ μπαγιά, ο Ιησούς κα τζανέλας-λες. Αλλά ο Ιησούς ισινέ αποφασισμέ τι υπερασπίνελ ι Ιεχωβάσκο ναβ. Ατζέ-ντα κάνα ντικχίντιβελας ότι ο Ιεχωβά μουκχλάας-λες, ο Ιησούς μανγκλάς τι μερέλ αντίς τι προδόνελ πι Νταντές σο μανγκέλα-λες μπουτ.​—Ματθ. 27:46.d

«ΜΠΙΤΙΣΚΙΑΡΝΤΟΜ Ι ΜΠΟΥΤΙ ΣΟ ΝΤΙΝΑΝ-ΜΑΝ ΤΙ ΚΕΡΑΒ»

14. Σαρ ο Ιεχωβά ευλογιντάς ι πίστη ι Ιησούσκι;

¹⁴ Κι προσευχή σο κερντάς ι ιράτ πριν τι μερέλ, ο Ιησούς βακερντάς: «Μπιτισκιαρντόμ ι μπουτί σο ντινάν-μαν τι κεράβ». Ντέλας μπέσα κο Ιεχωβά ότι κα ευλογίνελας-λες για την πίστη σο σικαντάας. (Ιωάν. 17:4, 5) Ο Ιησούς να ντινάς μπέσα πι Νταντέστε σινανέ. Ο Ιεχωβά να μουκχλάς-λες τι ατσσόλ κο μεζάρι. (Πράξ. 2:23, 24) Αναστιντάς ι Ιησούς ντα ντινάς-λες εκ πο μπαρί θέση κο ουρανός. (Φιλιπ. 2:8, 9) Πο σοράν, ο Ιησούς αρχισάλο τι κυβερνίνελ σαρ Βασιλιάς κι Βασιλεία κι Ντεβλέσκι. Σο κα κερέλας ανταγιά Βασιλεία; Ο Ιησούς ντινάς ι απάντηση κάνα σικλιαρντάς πι μαθητέν τι προσευχίντιβεν: “Τι αβέλ τι Βασιλεία. Τι αβέλ οντουβά σο μανγκέλα [ο Ιεχωβά], σαρ κο ουρανός, αντικάς οπράλ κι πφουβ-ντα”.​—Ματθ. 6:10.

15. Σο γιαβέρ κα κερέλ ο Ιησούς;

¹⁵ Ατζεχάνικ, ο Ιησούς κα πολεμίνελ ι Ντεβλέσκε ντουσμανίν ντα κα καταστραφίνελ ι πφιρνέν κο Αρμαγεδδώνας. (Αποκ. 16:14, 16· 19:11-16) Σοράν ανταλέσταρ, κα φουρτίνελ ι Μπενγκές «κι άβυσσος» ντα οτθέ να κα μπορίνελ τι κερέλ τίποτα. (Αποκ. 20:1-3) Σοράν ο Ιησούς κα κερέλ κουμάντος για Χίλια Μπρεσά ντα κα ανέλ πάλι ι ειρήνη κι πφουβ ντα κα βοηθίνελ ι τζενέν τι αβέν τέλειοι. Κα αναστίνελ ι μουλέν. Κα κερέλ σαρί ι πφουβ παράδεισος. Οντουβά σο μανγκέλα ο Ιεχωβά κα αβέλ-πες μπαγιά!​—Αποκ. 21:1-4.

16. Σαρ κα αβέλ η ζωή σοράν κατά Χίλια Μπρεσά σο κα κερέλ κουμάντος ο Ιησούς;

¹⁶ Σαρ κα αβέλ η ζωή σοράν κατά Χίλια Μπρεσά σο κα κερέλ κουμάντος ο Ιησούς; Η αμαρτία ντα η ατέλεια ι τζενένγκι να κα υπαρχίντιβεν πια. Ο τζενέ να κα χρειαζίντιβελ τι μανγκέν πάλι κατά Ιεχωβά τι συγχωρίνελ λένγκε αμαρτίες αντράλ κατά λύτρος. Για τι μπορίνεν ο τζενέ τι αβέν αμαλά ι Ιεχωβάσαρ, να κα χρειαζίντιβελ τι αβέν ο 144.000 λένγκε ιερείς, ούτε ο Ιησούς λένγκο αρχιερέας. «Ντα ο τελευταίος ντουσμάνι, ο μεριπέ, κα καταστραφίντιβελ». Ο μεζάρια κα αβέν τσουτσέ. Ο μουλέ κα αβέν πάλι κι ζωή. Σαρέ ο τζενέ κι πφουβ κα αβέν τέλειοι.​—1 Κορ. 15:25, 26.

17, 18. (α) Σο κα αβέλ-πες κάνα κα τελειώνεν ο Χίλια Μπρεσά; (β) Σο κα κερέλ ο Ιησούς κάνα κα τελειώνεν ο μπρεσά σο κα κερέλ κουμάντος; (1 Κορινθίους 15:24, 28) (Ντικχέν ι φωτογραφία-ντα)

¹⁷ Σο γιαβέρ κα αβέλ-πες κάνα κα τελειώνεν ο Χίλια Μπρεσά; Αζομάν κα αβέλ-πες κάτι σο μπεκλεντίναας-λες μπουτ καιρός. Καέκ τζενό να κα τθερέλ αμφιβολία άμα ο Ιεχωβά ισί άγιος ντα δίκαιος Ντεβέλ. Σόσκε; Κο κήπος της Εδέμ, ο Μπενγκ βακερντάς ότι ο Ιεχωβά ισί ψεύτης ντα ότι να κερέλα κουμάντος ι τζενέν μανγκιμάσαρ. Από αζομάν, οντουλά σο υπηρετίνενα ι Ιεχωβάς σικαντέ μπουτ φαρ ότι λέσκε ντρομά ισί ο πο λατσσέ. Άρα κάνα κα τελειώνεν ο Χίλια Μπρεσά σο κα κερέλ κουμάντος ο Ιησούς, ο ναβ ι Ιεχωβάσκο κα αγιάντιβελ ντιπ. Αζομάν σαρέ κα τζανέν, χωρίς τι τθερέν καέκ αμφιβολία, ότι βοβ ισί εκ λατσσό Ντατ.

¹⁸ Κάνα κα τελειώνεν ο Χίλια Μπρεσά, σαρέ κα τζανέν ότι σαρέ οντουλά σο βακερντάς ο Μπενγκ ι Ιεχωβάσκε ισινέ ψέματα. Σο κα κερέλ ο Ιησούς κάνα κα τελειώνεν ο μπρεσά σο κα κερέλ κουμάντος; Κα ακολουθίνελ ο παράδειγμας ι Μπενγκέσκο ντα κα τζαλ κόντρα κο Ιεχωβά; Νάα! (Διαβάνεν 1 Κορινθίους 15:24, 28) Ο Ιησούς κα ντελ παλάλ ι Βασιλεία πι Νταντέστε. Κα ντελ καν κο Ιεχωβά σο κα κερέλ κουμάντος. Βα, αντίς τι κερέλ οντουβά σο κερντάς ο Μπενγκ, ο Ιησούς κα ντελ-λεν σαρέ παλάλ κο Ιεχωβά αντράλ πι γκίσταρ επειδή μανγκέλα πι Νταντές.

19. Σαρ ντικχέλας ο Ιησούς ι Ιεχωβάσκο ναβ;

¹⁹ Αγαβάσα μπουτ λατσσές σόσκε ο Ιεχωβά ντινάς ι Ιησούς Πο ναβ! Ο Ιησούς σικαντάς τέλεια σαρ ισί λέσκο Ντατ. Άρα, σαρ ντικχέλας ο Ιησούς ι Ιεχωβάσκο ναβ; Να υπαρχίντιβελας κάτι γιαβέρ σο τθερέλας πο μπαρί αξία λέσκε. Ισινέ έτοιμος τι μερέλ ανταλέ ναβέσκε ντα κα αβέλ έτοιμος τι ντελ-λεν σαρέ παλάλ κο Ιεχωβά κάνα κα τελειώνεν ο Χίλια Μπρεσά. Σαρ μπορίνασα τι μοιάζας κο Ιησούς; Κα ντικχάς ι απάντηση κο γιαβέρ μάθημας.