Καζόμ Σημαντικός Ισί Τουμένγκε ο Ναβ ι Ιεχωβάσκο;

1, 2. Σαρ τζανάσα ότι ο ναβ ι Ιεχωβάσκο ισί σημαντικός ι Ιησούσκε;

Ι ΙΕΧΩΒΑΣΚΟ ναβ ισινέ ο πο σημαντικός πράγμας ι Ιησούσκε. Ίτζεκ να κερντάς πο μπουτ πράγματα κατά Ιησούς για τι σικλιαρέλ ι τζενέν ο ναβ ι Ιεχωβάσκο. Κο γιαβέρ μάθημας, σικλιλάμ ότι ο Ιησούς ντινάς πι ζωή για τι σικαβέλ ότι ο Ιεχωβά ισί άγιος ντα ότι σαρέ λέσκε ντρομά ισί σωστά. (Μάρκ. 14:36· Εβρ. 10:7-9) Ντα σοράν κατά Χίλια Μπρεσά σο κα κερέλ κουμάντος, ο Ιησούς κα ντελ παλάλ σαρί ι εξουσία πι Νταντέστε επειδή μανγκέλα ο Ιεχωβά τι τθερέλ σαρί ι δόξα. (1 Κορ. 15:26-28) Σαρέ οντουλά σο κερντάς ο Ιησούς ι Ιεχωβάσκε σικαβένα ότι ο Ιησούς μανγκέλα μπουτ πι Νταντές.

² Ο Ιησούς αβιλό κι πφουβ για τι κερέλ λάφι ι Ιεχωβάσκε. (Ιωάν. 5:43· 12:13) Σικλιαρντάς πι μαθητέντε ο ναβ πι Νταντέσκο. (Ιωάν. 17:6, 26) Κάνα σικλιαρέλας ι τζενέν ντα κερέλας θαύματα, ντέλας τι αγαβέν ξεκάθαρα ο τζενέ ότι ο Ιεχωβά ισινέ οντουβά σο ντέλας-λες ι σοφία ντα ι ζορ τι κερέλ ανταλά πράγματα. (Ιωάν. 10:25) Ντα κάνα κερντάς προσευχή κο Ιεχωβά τι αρακχαβέλ λέσκε μαθητέν, μανγκλάς κατά Ιεχωβά τι κερέλ-λες ανταβά «μάξους [Πι] ναβέσκε». (Ιωάν. 17:11) Αγαβάσα μπουτ λατσσές ότι ο ναβ ι Ντεβλέσκο ισινέ ο πο σημαντικός πράγμας ι Ιησούσκε. Άρα, σαρ αβέλα-πες εκ τζενό τι βακερέλ ότι ισί μαθητής ι Ιησούσκο αλλά μα τι τζανέλ ή μα τι χρησιμοποιήνελ ο ναβ ι Ιεχωβάσκο;

3. Σο κα ντικχάς ανταλέ μαθημάστε;

³ Επειδή ισινάμ αληθινοί Χριστιανοί, σικαβάσα αγάπη ντα σεβασμός κο ναβ κι Ιεχωβάσκο ντα αντικάς ακολουθίνασα ο παράδειγμας ι Ιησούσκο. (1 Πέτρ. 2:21) Ανταλέ μαθημάστε κα ντικχάς σόσκε ο Ιεχωβά ντινάς πο ναβ οντουλέντε σο βακερένα ο «λατσσέ αμπέρια ι Βασιλειάκε». (Ματθ. 24:14) Κα ντικχάς επίσης καζόμ σημαντικός πρέπει τι αβέλ ι κάθε εκχέσκε αμένταρ ο ναβ ι Ιεχωβάσκο.

“ΕΚ ΛΑΟΣ ΛΕΣΚΕ ΝΑΒΕΣΚΕ”

4. (α) Σο βακερντάς ο Ιησούς πι μαθητένγκε χάνικ πριν τι βουρτίνελ κο ουρανός; (β) Καγιά ερώτηση κα ντικχάς;

⁴ Χάνικ πριν τι βουρτίνελ κο ουρανός, ο Ιησούς βακερντάς πι μαθητένγκε: «Κα λεν ζορ κάνα ο άγιος πνεύμας κα αβέλ οπρά-τουμέντε ντα κα αβέν μάρτυρες μιρέ κι Ιερουσαλήμ, σαρί κι Ιουδαία ντα κι Σαμάρεια, μέχρι κο τθαν-ντα σο ισί πο ντουρ οπράλ κι πφουβ». (Πράξ. 1:8) Άρα ο μαθητές ι Ιησούσκε κα βακερένας ο λατσσέ αμπέρια παντού όχι σάντε κο Ισραήλ. Τελικά, τζενέ σαρέ κατά τθεμά κα τθερένας ι ευκαιρία τι αβέν μαθητές ι Ιησούσκε. (Ματθ. 28:19, 20) Όμως ο Ιησούς βακερντάς: «Κα αβέν μάρτυρες μιρέ». Έπρεπε ανταλά νεβέ μαθητές τι τζανέν ο ναβ ι Ιεχωβάσκο, ή κα αβένας σάντε μάρτυρες ι Ιησούσκε; Οντουλά σο βακέρντιβενα κο Πράξεις κο κεφάλαιος 15 βοηθίνενα-αμέν τι λας ι απάντηση.

5. Σαρ ο απόστολοι ντα ο πρεσβύτεροι κι Ιερουσαλήμ σικαντέ ότι σαρέ ο τζενέ χρειαζίντιβελας τι τζανέν ο ναβ ι Ιεχωβάσκο; (Ντικχέν ι φωτογραφία-ντα)

⁵ Κο μπρες 49 Σ.Κ.Χ. (σοράν κατά Χριστός), ο απόστολοι ντα ο πρεσβύτεροι κι Ιερουσαλήμ γκιντισάλε για τι συζητίνεν άμα ο τζενέ κατά γιαβερά τθεμά κα χρειαζίντιβελας τι κερέν περιτομή για τι αβέν Χριστιανοί. Κο τέλος κι συνάντηση ανταγιά, ο Ιάκωβος, σο ισινέ μιλαδέλφια ι Ιησούσαρ, βακερντάς: «[Ο Πέτρος] βακερντάς ντιπ λατσσές σαρ ο Ντεβέλ ντινάς σημασία πρώτη φαρ κο τζενέ σο ισί γιαβερέ τθεμένταρ για τι λελ οτθάρ εκχέ λαός πι ναβέσκε». Καλέ ναβέσκε κερέλας λάφι ο Ιάκωβος; Ο Ιάκωβος βακερντάς ακαλά λάφια σο βακερντάας ο προφήτης Αμώς: «Αντικάς οντουλά τζενέ σο ατσσόνα τι ρόντεν σαρέ πουμαρέ γκίσαρ ι Ιεχωβάσκε, γιεκ τζενέντζαρ σαρέ κατά τθεμά, τζενέντζαρ σο τθερένα οπρά-πουμέντε μο ναβ, βακερέλα ο Ιεχωβά». (Πράξ. 15:14-18) Ανταλά νεβέ μαθητές όχι σάντε κα τζανένας ι Ιεχωβάσκε, αλλά κα “τθερένας οπρά-πουμέντε λέσκο ναβ-ντα”. Ανταβά μανγκέλα τι βακερέλ ότι κα σικλιαρένας ο ναβ ι Ντεβλέσκο γιαβερέντε ντα ότι ο τζενέ κα τζανένας-λεν σαρ οντουλά σο τθερένα ο ναβ ι Ντεβλέσκο οπρά-πουμέντε.

6, 7. (α) Σόσκε αβιλό ο Ιησούς κι πφουβ; (β) Καβά ισινέ ο πο σημαντικός λόγος σο αβιλό ο Ιησούς κι πφουβ;

⁶ Ι Ιησούσκο ναβ μανγκέλα τι βακερέλ «ο Ιεχωβά Σώνελα», ντα ο Ιεχωβά χρησιμοποιηντάς ι Ιησούς για τι σώνελ σαρέ οντουλέ τζενέν σο τθερένα πίστη λέστε ντα λέσκε Τσσαβέστε. Ο Ιησούς αβιλό κι πφουβ για τι ντελ πι ζωή ι τζενένγκε. (Ματθ. 20:28) Ανταλέ τροπόσαρ αβέλα-πες τι συγχωρίντιβεν αμαρέ αμαρτίες ντα αντικάς τι τζουβντιάς για πάντα.​—Ιωάν. 3:16.

⁷ Αλλά σόσκε ο τζενέ χρειαζίντιβενα ο λύτρος; Ιτιρί οντουλέσταρ σο αβιλό-πες κο κήπος της Εδέμ. Σαρ βακερντάμ κο γιαβέρ μάθημας, αμαρό πρώτος ντατ ντα ντάι, ο Αδάμ ντα η Εύα, γκιλέ κόντρα κο Ιεχωβά ντα αντικάς χασαρντέ ι ευκαιρία τι τζουβντιόν για πάντα. (Γέν. 3:6, 24) Σαρ τζανάσα, ο Ιησούς αβιλό κι πφουβ για τι σώνελ ι τζενέν. Όμως, αβιλό για τι κερέλ κάτι γιαβέρ-ντα σο ισινέ ατζέ πο σημαντικός. Ο Μπενγκ βακερντάς μπαρέ ψέματα ι Ιεχωβάσκε. (Γέν. 3:4, 5) Άρα ο τζενέ χρειαζίντιβελας τι τζανέν ότι ο Ιεχωβά να κερντάας τίποτα λάθος ντα ότι ισινέ εκ μπουτ λατσσό Ντατ. Ντα σάντε ο Ιησούς μπορίνελας τι σικαβέλ-λες ανταβά αζόμ λατσσές, επειδή αβιλό κο ναβ κι Ιεχωβάσκο ντα κερέλας τέλεια σαρέ οντουλά σο μανγκέλας ο Ιεχωβά λέσταρ.

8. Σο πρέπει τι αγαβέν σαρέ ο μαθητές ι Ιησούσκε;

⁸ Σαρέ ο Χριστιανοί σο κα τθερένας πίστη κο Ιησούς, χρειαζίντιβελα τι αγαβέν ότι οντουβά σο σώνελα-λεν ισί ι Ιησούσκο Ντατ, ο Ιεχωβά Ντεβέλ. (Ιωάν. 17:3) Επίσης, σαρ ο Ιησούς, κα τθερένας οπρά-πουμέντε ο ναβ ι Ιεχωβάσκο. Ατζέκ, χρειαζίντιβελα τι αγαβέν καζόμ σημαντικός ισί τι αγιάντιβελ ανταβά ναβ. Χρειαζίντιβελα τι αβέλ-πες ανταβά για τι σώντιβεν. (Πράξ. 2:21, 22) Άρα σαρέ ο πιστοί μαθητές ι Ιησούσκε χρειαζίντιβελα τι σικλιόν ι Ιεχωβάσκε αντικάς σαρ χρειαζίντιβελα τι σικλιόν ι Ιησούσκε-ντα. Άκ’ σόσκε ο Ιησούς τελειωσάλο πι προσευχή σο ισί κο Ιωάννης 17 κεφάλαιος ακαλέ λαφίντζαρ: «Σικλιαρντόμ-λεν τι ναβέσκε ντα να κα τσσιναβάβ τι κεράβ-λες ανταβά, ντα αντικάς η αγάπη σο σικαντάν μάνγκε τι αβέλ αντρέ λέντε ντα με τι αβάβ ενωμέ λέντζαρ».​—Ιωάν. 17:26.

«ΙΣΙΝΕΝ ΜΟ ΜΑΡΤΥΡΕΣ»

9. Σαρ μπορίνασα τι σικαβάς ότι ο ναβ ι Ιεχωβάσκο ισί σημαντικός αμένγκε;

⁹ Σαρέ οντουλένταρ σο βακερντάμ μέχρι ακανά, αγαντάμ μπουτ λατσσές ότι για τι αβάς μαθητές ι Ιησούσκε πρέπει τι αγιάνας ο ναβ ι Ιεχωβάσκο. (Ματθ. 6:9, 10) Ι Ιεχωβάσκο ναβ πρέπει τι αβέλ ο πο σημαντικός ναβ αμένγκε. Ντα χρειαζίντιβελα τι σικαβάς οντουλέντζαρ σο κεράσα ότι νιωθίνασα-λες ανταβά. Άρα, σο μπορίνασα τι κεράς για τι αγιάνας ι Ιεχωβάσκο ναβ ντα τι σικαβάς ότι οντουλά σο βακερντάς ο Μπενγκ ι Ιεχωβάσκε νανέ μπαγιά;

10. Καλέ πραγμάσκε διαβάνασα κο Ησαΐας κεφάλαια 42 μέχρι 44; (Ησαΐας 43:9· 44:7-9) (Ντικχέν ι φωτογραφία-ντα)

¹⁰ Κατά κεφάλαια 42 μέχρι 44 κο Ησαΐας σικλιάσα σο μπορίνασα τι κεράς για τι αγιάνας ι Ιεχωβάσκο ναβ. Κο κεφάλαια ανταλά ο Ιεχωβά μανγκλάς κατά τζενέ σο να ντένα-λες λατρεία τι κερέν λάφι πουμαρέ ντεβλένγκε ντα τι σικαβέν άμα υπαρχίντιβενα μπαγιά. Σαρ αβέλα-πες σε εκ δικαστήριος-ντα, ο Ιεχωβά πουτσέλα άμα υπαρχίντιβενα μάρτυρες σο τθερένα αποδείξεις ανταλέσκε. Αλλά να υπαρχίντιβελα ούτε εκ!​—Διαβάνεν Ησαΐας 43:9· 44:7-9.

11. Σο βακερέλα ο Ιεχωβά πι λαόσκε κο Ησαΐας 43:10-12;

¹¹ Διαβάνεν Ησαΐας 43:10-12. Ο Ιεχωβά βακερέλα πι λαόσκε: «Τουμέν ισινέν μο μάρτυρες, . . . ντα με ισινόμ ο Ντεβέλ». Ο Ιεχωβά μανγκέλα τι απαντίνεν κι ερώτηση: «Ισί γιαβέρ Ντεβέλ εκτός μάνταρ;» (Ησ. 44:8) Τθεράσα ο μπαρό προνόμιος τι απαντίνας κι ερώτηση ανταγιά. Οντουλέντζαρ σο βακεράσα ντα οντουλέντζαρ σο κεράσα, σικαβάσα ότι να υπαρχίντιβελα γιαβέρ Ντεβέλ εκτός κατά Ιεχωβά. Λέσκο ναβ ισί πο μπαρό σαρέ κατά γιαβερά ναβά. Ντα κατά τρόπος σο τζουβντιάσα, σικαβάσα ότι μανγκάσα μπαγιά ι Ιεχωβάς ντα ότι ισινάμ αφοσιωμέ λέστε, ατζέ-ντα άμα ο Μπενγκ μαρέλα-πες για τι τσσιναβέλ-αμέν τι υπηρετίνας-Λες. Ανταλέ τροπόσαρ, τθεράσα ι ευκαιρία τι αγιάνας ι Ντεβλέσκο ναβ.

12. Σαρ νικίστιλι μπαγιά η προφητεία σο ισί κο Ησαΐας 40:3, 5;

¹² Κάνα υποστηρίνασα ο ναβ ι Ιεχωβάσκο, μοιάζασα κο Ιησούς Χριστός. Επίσης ο Ησαΐας βακερντάας ότι κάποιος κα “καθαρίνελας ο ντρομ ι Ιεχωβάσκο”. (Ησ. 40:3) Σαρ νικίστιλο μπαγιά ανταβά; Ο Ιωάννης σο μπολέλας ετοιμαντάς ο ντρομ ι Ιησούσκε. Αλλά ανταβά ντρομ ισινέ κι πραγματικότητα «ο ντρομ ι Ιεχωβάσκο», επειδή ο Ιησούς αβιλό κο ναβ κι Ιεχωβάσκο ντα κερέλας λάφι Λέσκε ναβέστε. (Ματθ. 3:3· Μάρκ. 1:2-4· Λουκ. 3:3-6) Η ίδια προφητεία βακερέλας: «Η δόξα ι Ιεχωβάσκι κα σικάντιβελ». (Ησ. 40:5) Σαρ αβιλό-πες ανταβά; Κάνα ο Ιησούς αβιλό κι πφουβ, μοιάζελας αζόμ τέλεια πι Νταντέστε σο ισινέ σαρ τι αβιλόας ο Ιεχωβά κι πφουβ.​—Ιωάν. 12:45.

13. Σαρ μπορίνασα τι μοιάζας κο Ιησούς;

¹³ Σαρ ο Ιησούς, ισινάμ μάρτυρες ι Ιεχωβάσκε. Τθεράσα οπρ’ αμέντε ο ναβ ι Ιεχωβάσκο ντα βακεράσα σαρέ κο τζενέ ο μπουτ σουκάρ πράγματα σο κερντάς. Όμως, για τι ντας λατσσί μαρτυρία ι Ιεχωβάσκε, πρέπει επίσης τι βακεράς ι τζενένγκε σαρέ οντουλά σο κερντάς ο Ιησούς για τι αγιάνελ ι Ιεχωβάσκο ναβ. (Πράξ. 1:8) Καέκ να ντινάς πο λατσσί μαρτυρία κατά Ιησούς ι Ιεχωβάσκε, ντα αμέν ακολουθίνασα λέσκο παράδειγμας. (Αποκ. 1:5) Σαρ γιαβέρτουλους κα σικαβάς ότι ισί σημαντικός ι Ιεχωβάσκο ναβ αμένγκε;

ΓΙΑΒΕΡΑ ΤΡΟΠΟΙ ΣΟ ΣΙΚΑΒΑΣΑ ΟΤΙ Ο ΝΑΒ Ι ΙΕΧΩΒΑΣΚΟ ΙΣΙ ΣΗΜΑΝΤΙΚΟΣ ΑΜΕΝΓΚΕ

14. Σαρ βακερέλα κο Ψαλμός 105:3, σαρ νιωθίνασα ι Ιεχωβάσκε ναβέσκε;

¹⁴ Ισαράσα-αμέν ι Ιεχωβάσκε ναβέσκε. (Διαβάνεν Ψαλμός 105:3) Κεράσα μπουτ χαρούμενος ι Ιεχωβάς κάνα ισαράσα-αμέν λέσκε. (Ιερ. 9:23, 24· 1 Κορ. 1:31· 2 Κορ. 10:17) Ισί αμένγκε μπαρό προνόμιος τι βακεράς κο γιαβερά ότι ο Ιεχωβά ισί άγιος ντα ότι σαρέ οντουλά σο κερέλα ισί σωστά. Δεν πρέπει ποτές τι λατζάς τι βακεράς ότι ισινάμ Μάρτυρες ι Ιεχωβάσκε κο τζενέ σο κεράσα λέντζαρ μπουτί, αμαρέ συμμαθητέντε, αμαρέ γειτονέντε ντα γιαβερέντε! Ο Μπενγκ μανγκέλα τι τσσιναβάς τι κεράς λάφι ι Ιεχωβάσκε ναβέσκε γιαβερέντε. (Ιερ. 11:21· Αποκ. 12:17) Ο Μπενγκ ντα ο τζενέ σο πφιραβένα ο ψεύτικα λάφια λέσκε, μανγκένα τι κερέν ι τζενέν τι μπιστρέν ο ναβ ι Ιεχωβάσκο. (Ιερ. 23:26, 27) Όμως, επειδή μανγκάσα ι Ιεχωβάσκο ναβ, ανταβά κερέλα-αμέν τι χαιρίνας λέσκε ναβέσκε «σαρό ο ντιβές».​—Ψαλμ. 5:11· 89:16.

15. Σο μανγκέλα τι βακερέλ ότι τθεράσα οπρ’ αμέντε ι Ιεχωβάσκο ναβ;

¹⁵ Συνεχίνασα τι τθεράς οπρ’ αμέντε ι Ιεχωβάσκο ναβ. (Ιωήλ 2:32· Ρωμ. 10:13, 14) Ανταβά να μανγκέλα τι βακερέλ σάντε ότι τζανάσα ντα χρησιμοποιήνασα ι Ντεβλέσκο ναβ. Μανγκέλα τι βακερέλ επίσης ότι γνωρίνασα ι Ντεβλέσκο χαρακτήρας, ντάσα μπέσα λέστε ντα μανγκάσα λέσταρ τι βοηθίνελ-αμέν ντα τι οδηγίνελ-αμέν. (Ψαλμ. 20:7· 99:6· 116:4· 145:18) Ατζέ, τι τθεράς οπρ’ αμέντε ι Ιεχωβάσκο ναβ μανγκέλα τι βακερέλ ότι σικαβάσα κο γιαβερά σαρ βακερένα λέσκε ντα για το σουκάρ ιδιότητες σο τθερέλα. Ντα βοηθίνασα-λεν τι αλλάνεν ο τρόπος σο τζουβντιόνα για τι κερέν λέσκο γκι ντα τι μπορίνεν τι σώντιβεν.​—Ησ. 12:4· Πράξ. 2:21, 38.

16. Σαρ μπορίνασα τι σικαβάς ότι ο Μπενγκ ισί ψεύτης;

¹⁶ Ισινάμ έτοιμοι τι νακχάς δυσκολίες ι Ιεχωβάσκε ναβέσκε. (Ιακ. 5:10, 11) Κάνα ατσσάσα αφοσιωμέ κο Ιεχωβά παρόλο σο ανταβά ανέλα αμένγκε δυσκολίες, σικαβάσα ότι ο Μπενγκ ισί ψεύτης. Κο ντιβεσά σο τζουβντιόλας ο Ιώβ, ο Μπενγκ βακερντάς οντουλένγκε σο υπηρετίνενα ι Ιεχωβάς: «Σαρέ οντουλά σο τθερέλα [ο τζενό] κα ντελ-λεν πι ζωγιάκε». (Ιώβ 2:4) Ο Μπενγκ βακερντάς ότι ο τζενέ κα υπηρετίνενας ι Ιεχωβάς σάντε κάνα ο πράγματα λένγκε ζωγιάτε κα τζάνας λατσσές. Όμως κάνα κα τθερένας προβλήματα, κα παρατίνενας ι Ιεχωβάς. Ο Ιώβ σικαντάς ότι ανταβά ισινέ εκ μπαρό ψέμας! Αντιβές αμέν-ντα μπορίνασα τι σικαβάς ότι ατζέ-ντα κάνα αμαρί ζωή κα αβέλ μπουτ δύσκολη ή κάνα ο Μπενγκ κα προσπαθίνελ τι κερέλ-αμέν τι χασαράς αμαρί ζορ, ποτές να κα τσσιναβάς τι υπηρετίνας ι Ιεχωβάς. Μπορίνασα τι αβάς ντιπ σίγουροι ότι ο Ιεχωβά κα συνεχίνελ τι αρακχαβέλ-αμέν μάξους πι ναβέσκε.​—Ιωάν. 17:11.

17. Καλέ γιαβερέ τροπόσαρ μπορίνασα τι ντας δόξα κι Ιεχωβάσκο ναβ, σαρ βακερέλα κο εδάφιος 1 Πέτρου 2:12;

¹⁷ Ντάσα δόξα κι Ιεχωβάσκο ναβ. (Παρ. 30:9· Ιερ. 7:8-11) Επειδή ο τζενέ τζανένα ότι ισινάμ Μάρτυρες ι Ιεχωβάσκε, οντουλά σο κεράσα μπορεί είτε τι ανέν δόξα είτε λατζ λέσκε ναβέστε. (Διαβάνεν 1 Πέτρου 2:12) Άρα, μανγκάσα τι κεράς σο νακχέλα αμαρέ βαστέσταρ για τι ντας δόξα κο Ιεχωβά αντράλ οντουλένταρ σο βακεράσα ντα κεράσα. Κάνα κεράσα-λες ανταβά, παρόλο σο ισινάμ ατελείς κα συνεχίνας τι ντας δόξα κι Ιεχωβάσκο ναβ.

18. Καβά ισί εκ γιαβέρ τρόπος για τι σικαβάς ότι ισί σημαντικός αμένγκε ο ναβ ι Ιεχωβάσκο; (Ντικχέν ι υποσημείωση-ντα)

¹⁸ Χάλα-αμέν ανάγκη πο μπουτ ο ναβ ι Ιεχωβάσκο παρά οντουλά σο πακιάνα ο τζενέ αμένγκε. (Ψαλμ. 138:2) Σόσκε ισί ανταβά αζόμ σημαντικός; Επειδή κάνα κεράσα πράγματα σο ντένα χαρά κο Ιεχωβά, μπουτ φαρ ο τζενέ μπορεί μα τι μπεϊντίνεν-λες ανταβά ντα μπέκιμ τι βακερέν μπέτι πράγματα αμένγκε.a Ο Ιησούς μανγκλάς τι μερέλ εκχέ τροπόσαρ σο κα ανέλας λέσκε λατζ, δηλαδή σαρ εγκληματίας. Κερντάς-λες ανταβά για τι ντελ δόξα κο ναβ κι Ιεχωβάσκο. «Να χάλας-λες ανάγκη η λατζ», οτθάρ-ντα να ανησυχίνελας αζόμ μπουτ οντουλένγκε σο πακιάνας ο γιαβερά λέσκε. (Εβρ. 12:2-4) Οντουβά σο χάλας-λες πο μπουτ ανάγκη σαριλένταρ ισινέ τι κερέλ οντουβά σο μανγκέλας ο Ντεβέλ.​—Ματθ. 26:39.

19. Σαρ νιωθίνασα ι Ιεχωβάσκε ναβέσκε, ντα σόσκε;

¹⁹ Ισί αμένγκε μπαρό προνόμιος τι υπηρετίνας ι Ιεχωβάς ντα τι βακέρντιβας Μάρτυρες ι Ιεχωβάσκε. Επειδή ι Ιεχωβάσκο ναβ ισί αζόμ σημαντικός αμένγκε, κα συνεχίνας τι ντας-λες δόξα, ατζέ-ντα κάνα ο γιαβερά πρασάνα-αμέν. Ο ναβ ι Ιεχωβάσκο ισί αζόμ σημαντικός αμένγκε σο να χάλα-αμέν ανάγκη σο πακιάνα ο τζενέ αμένγκε. Άρα, πρέπει τι αβάς αποφασισμέ τι συνεχίνας τι ντας δόξα κι Ιεχωβάσκο ναβ, παρόλο σο ο Σατανάς μπορεί τι προσπαθίνελ τι τσσιναβέλ-αμέν τι κεράς-λες ανταβά. Άκ’ αντικάς κα σικαβάς ότι ι Ιεχωβάσκο ναβ ισί ο πο σημαντικός πράγμας αμένγκε, αντικάς σαρ ισί ι Ιησού Χριστόσκε-ντα.