«Ισινάν Μπουτ Αγαπητός Τζενό»!

1, 2. Σαρ μπορίνασα τι αβάς σίγουροι ότι ισινάμ πολύτιμοι κι Ιεχωβάσκε γιακχά;

Ο ΛΑΟΣ ι Ιεχωβάσκο ισί πολύτιμος λέσκε. Αλλά μερικοί υπηρέτες λέσκε να νιωθίνενα αντικάς. Εκ τζενό μπορεί τι τθερέλα ασακέ αισθήματα επειδή κάποιος συμπεριφερισάλο λέσκε μπέτι. Νιωσάλεν ποτές ότι να τθερένα αξία; Άμα βα, σαρ μπορίνενα τι αγαβέν ότι ισινέν πολύτιμοι κι Ιεχωβάσκε γιακχά;

² Εκ πράγμας σο κα μπορίνελας τι βοηθίνελ-τουμέν ισί τι διαβάνεν ιστορίες κατά Γραφή σο σικαβένα σαρ μανγκέλα ο Ιεχωβά τι νιωθίνελ εκ τζενό πι νεαυτόσκε. Ο Ιησούς σεβάνελας ι τζενέν ντα σικαβέλας λένγκε λατσσιπέ. Αντικάς, σικαντάς ότι λέσκε ντα λέσκε Νταντέσκε ισί πολύτιμοι ο τζενέ σο νιωθίνενα ότι να τθερένα αξία. (Ιωάν. 5:19· Εβρ. 1:3) Ανταλέ μαθημάστε, κα ντικχάς: (1) σαρ ο Ιησούς βοηθιντάς ι τζενέν τι αγαβέν ότι τθερένα αξία ντα (2) σαρ μπορίνασα τι αβάς σίγουροι ότι αμέν-ντα ισινάμ μπαγιά πολύτιμοι κι Ιεχωβάσκε γιακχά.​—Αγγ. 2:7.

Ο ΙΗΣΟΥΣ ΒΟΗΘΙΝΤΑΣ Ι ΤΖΕΝΕΝ ΤΙ ΑΓΑΒΕΝ ΟΤΙ ΤΘΕΡΕΝΑ ΑΞΙΑ

3. Σαρ συμπεριφερισάλο ο Ιησούς κο Γαλιλαίοι κάνα μανγκλέ λέσταρ βοήθεια;

³ Κάνα ο Ιησούς κερέλας έργος κι Γαλιλαία, μπουτ τζενέ οτθέ αβιλέ για τι ασουνέν-λες ντα τι κερέλ-λεν λατσσές. Ο Ιησούς ντικχλάς ότι βον «ισινέ ντινέ ντα φουρτιμέ σαρ μπρακέ σο να τθερένα τσομπανής». (Ματθ. 9:36) Ο αρχηγοί ι θρησκειάκε σκεφτίνενας ότι ανταλά τζενέ νανέ μπουτ σημαντικοί για τι ντεν-λεν σημασία ντα οτθάρ βακερένας ότι “τθερένας αρμάν οπρά-πουμέντε”. (Ιωάν. 7:47-49) Αλλά ο Ιησούς συμπεριφερισάλο λένγκε λατσσιμάσαρ ντα με σεβασμός. Αντικάς ντινάς χρόνος για τι σικλιαρέλ-λεν ντα τι κερέλ-λεν λατσσές πουμαρέ νασφαλιματένταρ. (Ματθ. 9:35) Επίσης, για τι βοηθίνελ ατζέ πο μπουτ τζενέν, σικλιαρντάς πι μαθητέν σαρ τι κερέν ο έργος ντα ντινάς-λεν ι εξουσία τι κερέν λατσσές ι νασφαλέν.​—Ματθ. 10:5-8.

4. Σο σικλιάσα κατά τρόπος σο συμπεριφερισάλο ο Ιησούς οντουλέ τζενένγκε σο ο γιαβερά να σεβάνενας-λεν;

⁴ Επειδή ο Ιησούς συμπεριφερισάλο λατσσέ τροπόσαρ ντα σεβάνελας ανταλέ τζενέν, σικαντάς ότι εμ λέσκε εμ λέσκε Νταντέσκε ισινέ πολύτιμοι παρόλο σο κι τζενένγκε γιακχά να τθερένας αξία. Άμα υπηρετίνενα ι Ιεχωβάς αλλά πακιάνα ότι να αξίνενα, σκεφτίνεν σαρ συμπεριφερισάλο ο Ιησούς ανταλέ τζενέντε σο μανγκένας τι σικλιόν λέσταρ. Κάνα κα κερέν-λες ανταβά, κα ντικχέν καζόμ πολύτιμοι ισινέν κο γιακχά κι Ιεχωβάσκε.

5. Σο τζανάσα εκχέ τζουβλιάκε σο γνωριντάς ο Ιησούς κι Γαλιλαία;

⁵ Ι Ιησούς να χάλας-λες ανάγκη σάντε τι σικλιαρέλ οτθέ σο ισινέ μπουτ τζενέ, αλλά σικλιαρέλας ντα βοηθίνελας ι κάθε εκχές-ντα ξεχωριστά. Για παράδειγμας, κάνα κερέλας έργος κι Γαλιλαία, ο Ιησούς ντικχλάς εκχέ τζουβλιά σο χασαρέλας ρατ 12 μπρεσά. (Μάρκ. 5:25) Ο Νόμος βακερέλας ότι ισινέ μαγαριμέ ντα ότι κον κα ακουμπίνελας-λα κα αβέλας βοβ-ντα μαγαριμέ. Οτθάρ ανταγιά τζουβέλ να μπορίνελας τι κερέλ παρέα ι τζενέντζαρ ντα μάλλον ισινέ κορκορί. Επίσης, να μπορίνελας τι ντελ λατρεία ι γιαβερέντζαρ κι συναγωγή ή καζόμ αβένας-πες ο γιορτές. (Λευιτ. 15:19, 25) Σίγουρα ανταγιά τζουβέλ, να νιωθίνελας σάντε νασφαλί αλλά νιωθίνελας εμ άχρηστη.​—Μάρκ. 5:26.

6. Σο κερντάς η τζουβέλ για τι αβέλ λατσσές;

⁶ Ανταγιά τζουβέλ τσσιντιντάς μπουτ ντα μανγκέλας τι κερέλ-λα ο Ιησούς λατσσές. Αλλά σακιντισάλι τι μανγκέλ-λες λέσταρ ανταβά. Σόσκε; Μπέκιμ λατζάλας ή νιωθίνελας άχρηστη ιτιρί πι νασφαλιμάσταρ. Ή μπορεί τι νταρέλας ότι ο Ιησούς να κα δεχτίνελας-λα επειδή ισινέ μαγαριμέ ντα δεν έπρεπε τι αβέλ γιαβερέ τζενέντζαρ. Οτθάρ, σάντε ακουμπιντάς λέσκε σέα επειδή ισινέ σίγουρη ότι ανταβά κα κερέλας-λα λατσσές. (Μάρκ. 5:27, 28) Ντα λάκι πίστη ευλογισάλι ντα βόι αβιλί λατσσές. Αζομάν ο Ιησούς πουτσλάς κον ακουμπιντάς-λες ντα η τζουβέλ βακερντάς ότι βόι κερντάς-λες. Σαρ συμπεριφερισάλο ο Ιησούς λάκε;

7. Σαρ συμπεριφερισάλο ο Ιησούς ανταλέ τζουβλιάκε σο τσσίντελας μπουτ; (Μάρκος 5:34)

⁷ Ο Ιησούς συμπεριφερισάλο κι τζουβέλ λατσσιμάσαρ ντα με σεβασμός. Ντικχλάς ότι “νταρέλας ντα ιζράλας”. (Μάρκ. 5:33) Οτθάρ, κερντάς λάσαρ λάφι σουκάρ τροπόσαρ ντα ντινάς-λα ζορ. Επίσης, χρησιμοποιηντάς ο λάφι «μι τσσάι». Ανταλέ λαφίσαρ ο Ιησούς να σικαντάς σάντε ότι σεβάνελας-λα, αλλά σικαντάς λάκε λατσσιπέ ντα αγάπη. (Διαβάνεν Μάρκος 5:34) Ανταγιά ισί η μόνη φαρ κι Γραφή σο ο Ιησούς βακερντάς εκχέ τζουβλιάκε «μι τσσάι». Μάλλον χρησιμοποιηντάς ανταβά γκουλντό λάφι επειδή ντικχλάς ότι η τζουβέλ νταρέλας μπουτ. Σκεφτίνεν καζόμ μπουτ λοκχιλό λάκο γκι! Ο Ιησούς να κερντάς-λα απλά λατσσές λάκε νασφαλιμάσταρ. Αλλά οντουλέσαρ σο βακερντάς βοηθιντάς-λα μα τι τθερέλ ιτς τύψεις-ντα επειδή ακουμπιντάς-λες. Βοηθιντάς-λα τι ντικχέλ πο νεαυτός αντικάς σαρ ισινέ μπαγιά, σαρ εκ πολύτιμη τσσάι ι Ιεχωβάσκι.

8. Σο δυσκολίες τθερέλας εκ πφεν κατά Βραζιλία;

⁸ Αντιβές-ντα μερικοί υπηρέτες ι Ντεβλέσκε ισί νασφαλέ ντα ανταβά μπορεί τι κερέλα-λεν τι νιωθίνεν ότι να τθερένα αξία. Η Μαρία,a εκ τακτική σκαπάνισσα κατά Βραζιλία, μπιάντιλι χωρίς τσανγκά ντα με εκ μουσί. Βόι βακερέλα: «Πρασάνας-μαν ντα νικαβένας μάνγκε ναβά σο κερένας-μαν τι νιωθίναβ μπουτ μπέτι. Μπάζιμα ατζέ-ντα μι φαμιλί συμπεριφερίντιβελας μάνγκε τροπόσαρ σο κερέλας-μαν τι νιωθίναβ άχρηστη».

9. Σο βοηθιντάς ι Μαριά τι αγαβέλ ότι τθερέλα αξία ι Ιεχωβάσκε;

⁹ Καβά πράγμας βοηθιντάς την Μαρία; Κάνα αβιλί Μάρτυρας ι Ιεχωβάσκι, ο πφραλά ντα ο πφενιά λάκε κχανγκιριάταρ βοηθιντέ-λα τι ντικχέλ πο νεαυτός σαρ ντικχέλα-λα ο Ιεχωβά. Βακερέλα: «Νανέ-μαν γιαβερά σελίδες κο ημερολόγιος μιρό για τι γραφίναβ ο ναβά ι πφραλένγκε ντα ι πφενίνγκε σο βοηθιντέ-μαν! Ευχαριστώ μπουτ ι Ιεχωβάς αντράλ μι γκίσταρ σο ντινάς-μαν εκ αζόμ λατσσί φαμιλί κι κχανγκιρί». Οντουλά πφραλά ντα πφενιά βοηθιντέ μπαγιά ι Μαριά τι αγαβέλ ότι κι Ντεβλέσκε γιακχά τθερέλα μπαρί αξία.

10. Καβά μπαρό πρόβλημας τθερέλας η Μαρία η Μαγδαληνή ντα σαρ νιωθίνελας ανταλέσκε; (Ντικχέν ο φωτογραφίες-ντα)

¹⁰ Σκεφτίνεν σαρ βοηθιντάς ο Ιησούς εμ τη Μαρία τη Μαγδαληνή. Βόι τθερέλας εφτά δαιμονέν! (Λουκ. 8:2) Μάλλον ο δαίμονες τσσίντενας-λα τι κερέλ ντινιλικανέ πράγματα ντα οτθάρ ο τζενέ μπέκιμ τι νασένας ντουρ λάταρ. Τσσίντελας μπουτ. Ντα μπέκιμ νταρέλας ντα σκεφτίνελας ότι καέκ να μανγκέλα-λα ή καέκ να μπορίνελα τι βοηθίνελ-λα. Σαρ αγαβάσα, ο Ιησούς νασκιαρντάς ι δαιμονέν σο ταλαιπωρίνενας-λα ντα σοράν βόι ακολουθιντάς ι Ιησούς πιστά. Καλέ γιαβερέ τροπόσαρ βοηθιντάς ο Ιησούς τη Μαρία τη Μαγδαληνή τι αγαβέλ καζόμ πολύτιμη ισινέ ι Ντεβλέσκε;

11. Σαρ σικαντάς ο Ιησούς κι Μαρία κι Μαγδαληνή ότι ισινέ πολύτιμη ι Ντεβλέσκε; (Ντικχέν ο φωτογραφίες-ντα)

¹¹ Ο Ιησούς καλιντάς την Μαρία την Μαγδαληνή τι κερέλ ταξίδια γιεκ λέντζαρ για τι κερέν έργος.b Αντικάς, συνεχίνελας τι ασουνέλ ι Ιησούς τι σικλιαρέλ ι γιαβερέν ντα ανταβά κερέλας λάκε λατσσιπέ. Επίσης, ο Ιησούς σικαντάς-πες λάτε ο ντιβές σο αναστισάλο. Ισινέ εκ κατά πρώτες μαθήτριες σο κερντάς λάσαρ λάφι οντουβά ντιβές. Ο Ιησούς μανγκλάς λάταρ τι βακερέλ κο μαθητές λέσκε ότι αναστισάλοας. Σαρέ ανταλέ τροπόντζαρ, ο Ιησούς βοηθιντάς-λα τι αγαβέλ καζόμ πολύτιμη ισινέ κι Ιεχωβάσκε γιακχά!​—Ιωάν. 20:11-18.

12. Σόσκε η Λίντια πακιάλας ότι να αξίνελας τι μανγκέν-λα ο γιαβερά;

¹² Σαρ η Μαρία η Μαγδαληνή, αντικάς αντιβές-ντα μπουτ τζενέ νιωθίνενα ότι ίτζεκ να μανγκέλα-λεν. Η Λίντια, εκ πφεν κατά Ισπανία, βακερέλα ότι λάκι ντάι σκεφτίνελας τι περαβκιαρέλ-πες πριν τι μπιανέλ-λα. Η Λίντια ντέλα-πες γκοντί ότι κάνα ισινέ χουρντί, λάκι ντάι να ντέλας-λα σημασία ντα βακερέλας λάκε μπέτι λάφια σο πληγώνενας-λα. Βόι βακερέλα: «Σαρί μι ζωή οντουβά σο μανγκάβας μπαγιά ισινέ τι μανγκέν-μαν ο γιαβερά τζενέ ντα τι αβέν μάντζαρ φίλοι. Νταράβας ότι να κα αξίναβας ποτές τι μανγκέν-μαν ο γιαβερά, επειδή μι ντάι κερντάς-μαν τι πακιάβ ότι να ισινόμας λατσσί τζενί».

13. Σο βοηθιντάς την Λίντια τι αγαβέλ καζόμ μπαρί αξία τθερέλα ι Ιεχωβάσκε;

¹³ Κάνα η Λίντια αρχισάλι τι κερέλ μελέτη, ο πράγματα αλλαξάλε. Βοηθιντάς-λα μπουτ η προσευχή, ο διάβασμας ι Γραφιάκο ντα ο λατσσέ πράγματα σο βακερένας ντα κερένας λάκε ο πφραλά ντα ο πφενιά. Άκ’ ανταλά κερντέ-λα τι αγαβέλ καζόμ πολύτιμη ισί κι Ιεχωβάσκε γιακχά. Η Λίντια βακερέλα: «Μο ρομ βακερέλα μάνγκε μπουτ φαρ καζόμ μπουτ μανγκέλα-μαν. Βοβ πάντα ανέλα μι γκοντιάτε μο λατσσέ ιδιότητες. Τθεράβα μπουτέ λατσσέ αμαλέν-ντα σο κερένα ο ίδιος». Μπορίνενα τι σκεφτίνεν εκχέ τζενές σο χρειαζίντιβελα βοήθεια για τι αγαβέλ καζόμ μπαρί αξία τθερέλα ι Ιεχωβάσκε;

ΣΑΡ ΤΙ ΝΤΙΚΧΑΣ ΑΜΑΡΟ ΝΕΑΥΤΟΣ ΑΝΤΙΚΑΣ ΣΑΡ ΝΤΙΚΧΕΛΑ-ΑΜΕΝ Ο ΙΕΧΩΒΑ

14. Σαρ βοηθίνελα-αμέν ο εδάφιος 1 Σαμουήλ 16:7 τι ντικχάς αμαρό νεαυτός σαρ ντικχέλα-αμέν ο Ιεχωβά; (Ντικχέν ο πλαίσιος-ντα «Σόσκε Ισί Αζόμ Πολύτιμος ι Ιεχωβάσκε Λέσκο Λαός;»)

¹⁴ Τι ντεν-τουμέν γκοντί ότι ο Ιεχωβά να ντικχέλα-τουμέν αντικάς σαρ ντικχένα-τουμέν ο γιαβερά κο ντουνιάς. (Διαβάνεν 1 Σαμουήλ 16:7) Μπουτ τζενέ κο ντουνιάς πακιάνα ότι κάποιος ισί σημαντικός σάντε άμα ισί σουκάρ, τθερέλα λοβέ ή ισί μορφωμέ. Αλλά ο Ιεχωβά να σκεφτίνελα αντικάς. (Ησ. 55:8, 9) Οτθάρ, αντίς τι μουκχέν ι ντουνιάς τι αποφασίνελ άμα τθερένα αξία, προσπαθίνεν τι ντικχέν τουμαρό νεαυτός σαρ ντικχέλα-τουμέν ο Ιεχωβά. Η Αγία Γραφή κερέλα λάφι τζενένγκε σο μπάζιμα νιωθίνενας άχρηστοι, σαρ ο Ηλίας, η Ναομί ντα η Άννα. Ντα καζόμ διαβάνενα λένγκε, ντεν προσοχή καζόμ μπουτ μανγκέλας-λεν ο Ιεχωβά. Μπορίνενα επίσης τι γραφίνεν ο πράγματα σο αβιλέ τουμαρέ ζωγιάτε σο σικαβένα ότι ο Ιεχωβά μανγκέλα-τουμέν ντα εκτιμίνελα-τουμέν μπουτ. Επίσης, μπορίνενα τι ρόντεν κο jw.org ο λάφι «αξία»για τι αρακχέν θέματα σο τθερένα τι κερέν ανταλέσαρ.c

15. Σόσκε πακιάλας ο Ιεχωβά ότι ο Δανιήλ ισινέ «μπουτ αγαπητός τζενό»; (Δανιήλ 9:23)

¹⁵ Τι αβέν σίγουροι ότι επειδή τθερένα πίστη ισινέν πολύτιμοι κι Ντεβλέσκε γιακχά. Κάνα ισινέ 90 μπρεσένγκο, ο προφήτης Δανιήλ νιωθίνελας «μπουτ κχινό» ντα μπίζουρανο. (Δαν. 9:20, 21) Σαρ ο Ιεχωβά ντινάς-λες ι ζορ σο χρειαζίντιβελας; Ο Ντεβέλ μπουτσσαντάς τον άγγελο Γαβριήλ τι ανέλ κι γκοντί του Δανιήλ ότι ισινέ εκ «μπουτ αγαπητός τζενό» ντα ότι ασουνέλας λέσκε προσευχές. (Διαβάνεν Δανιήλ 9:23) Σόσκε ισινέ μπουτ αγαπητός ο Δανιήλ ι Ντεβλέσκε; Επειδή ο Δανιήλ μανγκέλας τι κερέλ ο σωστός ντα ισινέ πιστός. (Ιεζ. 14:14) Ο Ιεχωβά τσσουντάς ανταγιά ιστορία πι λαφίστε για τι ντελ-αμέν ζορ. (Ρωμ. 15:4) Επειδή κερένα ο σωστός ντα ατσσόνα πιστοί κο Ιεχωβά, ισινέν πολύτιμοι λέσκε. Ντα σαρ ο Ιεχωβά ασουντάς ο προσευχές του Δανιήλ, αντικάς κα ασουνέλ αμαρέ προσευχές-ντα.​—Μιχ. 6:8· Εβρ. 6:10.

16. Σο μπορίνελα τι βοηθίνελ-τουμέν τι ντικχέν ι Ιεχωβάς σαρ εκ Ντατ σο μανγκέλα-τουμέν μπουτ;

¹⁶ Ντικχέν ι Ιεχωβάς σαρ εκ Ντατ σο μανγκέλα-τουμέν μπουτ. Βοβ μανγκέλα τι βοηθίνελ-τουμέν, όχι τι κρίνελ-τουμέν. (Ψαλμ. 130:3· Ματθ. 7:11· Λουκ. 12:6, 7) Ανταγιά σκέψη βοηθιντάς μπουτέ τζενέν σο νιωθίνενα ότι να τθερένα αξία. Για παράδειγμας σκεφτίνεν την Μισέλ εκ πφεν κατά Ισπανία σο νιωθίνελας ότι να μανγκένας-λα ο γιαβερά ντα νιωθίνελας άχρηστη επειδή λάκο ρομ για μπουτ μπρεσά βακερέλας λάκε μπουτ μπέτι λάφια. Βόι βακερέλα: «Κάνα νιωθίναβα άχρηστη, προσπαθίναβα τι ανάβ μι γκοντιάτε ότι ο Ιεχωβά λέλα-μαν ανγκάλι, ότι σικαβέλα μάνγκε αγάπη ντα ότι αρακχαβέλα-μαν». (Ψαλμ. 28:9) Η Λόρεν, εκ πφεν κατά Νότια Αφρική, σκεφτίνελα: «Ο Ιεχωβά ταρτιντάς-μαν λατσσιμάσαρ πασέ πέστε ι μανγκιμάσκε σολέντζαρ, ατσσικιαρντάς-μαν πασέ πέστε σαρέ ανταλά μπρεσά, ντα χρησιμοποιηντάς-μαν για τι σικλιαράβ ι γιαβερέν. Ανταλέσταρ αγαβάβα ότι ισινόμ πολύτιμη ντα χρήσιμη λέσκε».​—Ωσηέ 11:4.

17. Σο μπορίνελα τι βοηθίνελ-τουμέν τι αβέν σίγουροι ότι κερένα ι Ιεχωβάσκο γκι; (Ψαλμός 5:12) (Ντικχέν ι φωτογραφία-ντα)

¹⁷ Τι αβέν σίγουροι ότι κερένα ι Ιεχωβάσκο γκι. (Διαβάνεν Ψαλμός 5:12) Ο Δαβίδ βακερντάς ότι η ευλογία ι Ιεχωβάσκι μοιάζελα με εκ «μπαρί ασπίδα» σο αρακχαβέλα ι δίκαιε τζενέν. Κάνα τζανένα ότι κερένα ι Ιεχωβάσκο γκι, δηλαδή τθερένα λέσκι ευλογία, ανταβά μπορίνελα τι αρακχαβέλ-τουμέν σαρ ασπίδα για μα τι σκεφτίνεν μπέτι πράγματα τουμαρέ νεαυτόσκε. Σαρ μπορίνενα τι αγαβέν ότι κερένα ι Ιεχωβάσκο γκι; Σαρ ντικχλάμ, ο Ιεχωβά αντράλ πι Λαφίσταρ σικαβέλα σαρ νιωθίνελα τουμένγκε. Επίσης, χρησιμοποιήνελα ι πρεσβυτερόν, μπουτέ λατσσέ αμαλέν ντα γιαβερέ τζενέν για μα τι μπιστρέν ότι ισινέν πολύτιμοι λέσκε. Σο πρέπει τι κερέν κάνα ο γιαβερά βακερένα λατσσέ πράγματα τουμένγκε;

18. Σόσκε πρέπει τι δεχτίνεν ο ισαριπέ κατά γιαβερά;

¹⁸ Κάνα ισαρέλα-τουμέν κάποιος σο τζανέλα-τουμέν ντα μανγκέλα-τουμέν, μα βακερέν αντρέ τουμέντε ότι να πακιάλα-λες μπαγιά. Τι ντεν-τουμέν γκοντί ότι ο Ιεχωβά μπορεί τι χρησιμοποιήνελα ανταλά λάφια για τι βοηθίνελ-τουμέν τι αβέν σίγουροι ότι κερένα λέσκο γκι. Η Μισέλ σο ντικχλάμ πο οπρέ βακερέλα: «Χάνικ χάνικ σικλιάβα τι δεχτίναβ μι γκίστε ο λατσσέ λάφια σο βακερένα μάνγκε ο γιαβερά. Κεράβα μπαρό αγώνας για τι πακιάβ ανταλά λατσσέ πράγματα μι νεαυτόσκε αλλά τζανάβα ότι ανταβά μανγκέλα ο Ιεχωβά τι κεράβ». Ο πρεσβύτεροι επίσης βοηθιντέ την Μισέλ λατσσιμάσαρ τι ντικχέλ ότι ο Ιεχωβά μανγκέλα-λα. Ακανά υπηρετίνελα σαρ σκαπάνισσα ντα σαρ εξωτερική βοηθός κο Μπέθελ.

19. Σόσκε μπορίνενα τι αβέν σίγουροι ότι ισινέν πολύτιμοι κι Ντεβλέσκε γιακχά;

¹⁹ Ο Ιησούς βακερέλα αμένγκε λατσσιμάσαρ ότι τθεράσα μπαρί αξία αμαρέ Νταντέσκε σο ισί κο ουρανός. (Λουκ. 12:24) Οτθάρ μπορίνασα τι αβάς σίγουροι ότι ι Ιεχωβάσκε ισινάμ μπουτ πολύτιμοι. Μακάρι μα τι μπιστράς-λες ποτές ανταβά! Ντα τι κεράς ο πο λατσσό σο μπορίνασα για τι βοηθίνας ι γιαβερέν τι ντικχέν καζόμ πολύτιμοι ισί κι Ντεβλέσκε γιακχά!