Ο Ιησούς Ιστίλα Κατά Μουλέ

Σοράν κατά μεριπέ ι Ιησούσκο, εκ χουλανό μουρς σο βακερένας λέσκε Ιωσήφ μανγκλάς κατά Πιλάτος τι μουκχέλ-λες τι γουλιαρέλ ο σώμας ι Ιησούσκο κατά κας. Ο Ιωσήφ πακιαρντάς ο σώμας ι Ιησούσκο εκχέ λατσσέ λινέ κοτορέσαρ ντα πραγματέντζαρ σο κχάντενας μίσκι ντα τσσουντάς-λες εκχέ νεβέ μεζαρίστε. Σοράν βακερντάς τι ταρτίνεν εκ πφαρό μπαρ ανγκλάλ κο μεζάρι. Ο μπαρέ ιερείς βακερντέ κο Πιλάτος: “Πακιάσα ότι ο μαθητές ι Ιησούσκε κα λεν λέσκο σώμας ντα κα βακερέν ότι ιστίντιλο κατά μουλέ”. Οτθάρ ο Πιλάτος βακερντάς λένγκε: “Πφάντεν λατσσές ο μεζάρι ντα αρακχαβέν-λες”.

Τριν ντιβεσά πο σοράν, ντιπ πρωί, μερικά τζουβλιά γκιλέ κο μεζάρι ντα ντικχλέ ότι κάποιος ταρτιντάας ο μπαρ. Αντρέ κο μεζάρι ισινέ εκ άγγελος ντα βακερντάς λένγκε: “Μα νταρέν. Ο Ιησούς ιστίντιλο κατά μουλέ. Τζαν ντα βακερέν κο μαθητές τι αρακχέν-λες κι Γαλιλαία”.

Εκ κατά τζουβλιά η Μαρία η Μαγδαληνή γκιλί σουγκό τι αρακχέλ ι Πετρός ντα ι Ιωαννής. Ντα βακερντάς λένγκε: “Κάποιος λιντάς ο σώμας ι Ιησούσκο!” Οτθάρ, ο Πέτρος ντα ο Ιωάννης τθαβντισάλε κο μεζάρι. Κάνα ντικχλέ ότι ο μεζάρι ισινέ τσουτσό, βουρτισάλε παλάλ πουμαρέ κχερέντε.

Κανά η Μαρία γκιλί πάλι κο μεζάρι, ντικχλάς αντρέ ντουέ αγγελόν ντα βακερντάς λένγκε: “Να τζανάβα κατέ γκερντέ μι κυριός”. Αζομάν ντικχλάς εκχέ μουρσές σο αμντισάλιας ότι ισινέ ο κηπουρός ντα βακερντάς λέσκε: “Μολίναβα-τουτ, κύριε, βάκερ μάνγκε κατέ γκερντάν-λες”. Αζομάν ο τζενό βακερντάς: «Μαρία!» Βόι αγαντάς ότι ισινέ ο Ιησούς. Βικόσαρ βακερντάς: «Δάσκαλε!» ντα λιντάς-λες ανγκάλι. Ο Ιησούς βακερντάς λάκε: “Τζα ντα βάκερ μι πφραλένγκε ότι ντικχλάν-μαν”. Αμέσως, η Μαρία τθαβντισάλι κο μαθητές ντα βακερντάς λένγκε ότι ντικχλάας ι Ιησούς.

Πο σοράν αντρέ κο ντιβές, ντούι μαθητές πφιρένας κατά Ιερουσαλήμ κο Εμμαούς. Εκ τζενό αρχισάλο τι πφιρέλ λέντζαρ ντα πουτσλάς-λεν καλέ πραγμάσκε κερένας λάφι. Βον βακερντέ: “Να ασουντάν; Πριν τριν ντιβές, ο μπαρέ ιερείς μουνταρντέ ι Ιησούς. Ακανά μερικά τζουβλιά βακερένα ότι ο Ιησούς ισί τζουβντό!” Ο τζενό πουτσλάς: “Να πακιάνα κο προφήτες; Ο προφήτες βακερντέ ότι ο Ιησούς κα μερέλας ντα σοράν κα ιστίλας κατά μουλέ”. Ντα συνεχίνελας τι εξηγίνελ λένγκε ο Γραφές. Κάνα ερεσλέ κο Εμμαούς, ο μαθητές βακερντέ οντουλέ τζενέσκε τι τζαλ παλά-λέντε. Καζόμ χάλας γιεκ λέντζαρ, κερντάς προσευχή ι μαντρέσκε ντα αγαντέ ότι ισινέ ο Ιησούς. Αζομάν εξαφανισάλο.

Ο ντούι μαθητές γκιλέ σουγκό κι Ιερουσαλήμ κο κχερ σο γκιντίντιβενας ο απόστολοι ντα βακερντέ λένγκε σο αβιλόας-πες. Καζόμ ισινέ αντρέ κο κχερ, ο Ιησούς σικαντάς-πες σαριλέντε. Κι αρχή, ο απόστολοι να μπορίνενας τι πακιάν ότι ισινέ ο Ιησούς. Αζομάν βοβ βακερντάς: “Ντικχέν μο βαστά, ασταρέν-μαν. Ισινέ γραμμέ ότι ο Χριστός κα ιστίλ κατά μουλέ”.