Ο Ιησούς Βουρτίνελα κο Ουρανός

Κι Γαλιλαία, ο Ιησούς ντικχλάς πι μαθητέν. Ντινάς-λεν εκ μπουτ σημαντική εντολή: “Τζαν ντα κερέν μαθητές σαρέ κατά τθεμά. Σικλιαρέν-λεν σαρέ οντουλά σο σικλιαρντόμ-τουμέν με, ντα μπολέν-λεν”. Σοράν ντινάς-λεν πο λάφι: “Τι ντεν-τουμέν γκοντί ότι με κα αβάβ πάντα τουμέντζαρ”.

Αντρέ κο 40 ντιβεσά σοράν κατά ανάσταση λέσκι, ο Ιησούς σικαντάς-πες μπουτέ μαθητέντε κι Γαλιλαία ντα κι Ιερουσαλήμ. Σικλιαρντάς-λεν σημαντικά πράγματα ντα κερντάς μπουτ θαύματα. Σοράν ντικχλάς για τελευταία φαρ πι αποστολόν κο Βες κι Ζιτινίνγκο. Οτθέ βακερντάς λένγκε: “Μα νασέν κατά Ιερουσαλήμ. Συνεχίνεν τι μπεσέν οντουλέσκε σο ντινάς πο λάφι μο Ντατ”.

Λέσκε απόστολοι να αγαντέ σο μανγκέλας τι βακερέλ. Οτθάρ πουτσλέ-λες: “Κα αβές ακανά βασιλιάς κο Ισραήλ;” Ο Ιησούς βακερντάς: “Να αβιλό ατζέκ ο σαάτι ι Ιεχωβάσκο για τι αβάβ βασιλιάς. Μπουτ σουγκό κα λεν ζορ κατά άγιος πνεύμας ντα κα αβέν μο μάρτυρες. Τζαν ντα μουτθαβέν ο λατσσέ αμπέρια κι Ιερουσαλήμ, κι Ιουδαία, κι Σαμάρεια ατζέ-ντα κο τθαν σο ισί πο ντουρ οπράλ κι πφουβ”.

Αζομάν ο Ιησούς λιντιλό κο ουρανός, ντα εκ σύννεφος ιτσσαρντάς-λες. Λέσκε μαθητές συνεχίνενας τι ντικχέν οπρέ, αλλά βοβ εξαφανισάλοας.

Ο μαθητές νασλέ κατά Βες ι Ζιτινίνγκο ντα γκιλέ κι Ιερουσαλήμ. Τζάνας συνέχεια κο συναθροίσεις ντα προσευχίντιβενας. Μπεσένας τι ντελ-λεν ο Ιησούς πο μπουτ οδηγίες.