Ο Πρώτες Τριν Πληγές

Ο Ισραηλίτες κερένας πφαρί μπουτί ζορίσαρ σαρ δούλοι. Ο Ιεχωβά μπουτσσαντάς ι Μωυσής ντα τον Ααρών κο Φαραώ τι βακερέν λέσκε: “Μουκχ μι λαός τι νασέλ ντα τι τζαλ κι έρημος τι ντελ-μαν λατρεία”. Ο Φαραώ βακερντάς μπαρικανιμάσαρ: “Να χάλα-μαν ανάγκη σο βακερέλα ο Ιεχωβά, ντα να κα μουκχάβ ι Ισραηλιτέν τι νασέν”. Σοράν ο Φαραώ τσσουβέλας-λεν τι κερέν ατζέκ πο πφαρί μπουτί. Ο Ιεχωβά κα ντέλας εκ μάθημας κο Φαραώ. Τζανέσα σαρ; Αντάς ο Ντες Πληγές κι Αίγυπτος. Ο Ιεχωβά βακερντάς κο Μωυσής: “Ο Φαραώ να ασουνέλα-μαν. Το πρωί σο κα αβέλ κι Λεν Νείλος, τζα ντα βάκερ λέσκε ότι επειδή να μουκχέλα μι λαός τι νασέλ, σαρό ο πανί κο Νείλος κα αβέλ ρατ”. Ο Μωυσής ντινάς καν κο Ιεχωβά ντα γκιλό κο Φαραώ. Ο Φαραώ ντικχέλας καζόμ ο Ααρών ντινάς πι μαγκουράσαρ ι λεν ντα λάκο πανί αβιλό ρατ. Η λεν αρχισάλι τι κχάντελ, ο ματσσέ τι μερέν ντα να ισινέ πάκι πανί κο Νείλος για τι πιν. Αλλά ο Φαραώ να μουκχλάς ι Ισραηλιτέν τι νασέν.

Αφού νακχλέ εφτά ντιβεσά, ο Ιεχωβά μπουτσσαντάς πάλι ι Μωυσής κο Φαραώ τι βακερέλ λέσκε: “Άμα να μουκχλάν μι λαός τι νασέλ, η Αίγυπτος κα πφερντιόλ μπαμπακάκια”. Ο Ααρών βαντιντάς πι μαγκούρα ντα η πφουβ αρχισάλι τι πφερντιόλ μπαμπακάκια. Ο τζενέ αρακχένας-λεν πουμαρέ κχερέντε πουμαρέ κρεβατίντε ντα πουμαρέ τσαρέντε. Σαρό κο τθαν ισινέ μπαμπακάκια! Ο Φαραώ μανγκλάς κατά Μωυσή τι μολίνελ ι Ιεχωβάς τι τσσιναβέλ ανταγιά πληγή. Ντινάς πο λάφι ότι κα μουκχέλας ι Ισραηλιτέν τι νασέν. Αντικάς ο Ιεχωβά τσσιναντάς ανταγιά πληγή, ντα ο Αιγύπτιοι γκιντιντέ μπερεκέτι μουλέ μπαμπακάκια. Σαρό ο τθεμ κχάντελας μπέτι. Αλλά πάλι ο Φαραώ να μουκχλάς ι λαός τι νασέλ.

Αζομάν ο Ιεχωβά βακερντάς κο Μωυσής: “Ο Ααρών πρέπει τι ντελ τελέ κι πφουβ πι μαγκουράσαρ, ντα η τσικ κα αβέλ σκνίπες, δηλαδή χουρντέ μακχιά σο τσιμπίνενα”. Μερικά τζενέ σο ισινέ με τον Φαραώ βακερντέ λέσκε: “Ανταγιά πληγή ισί κατά Ντεβέλ”. Πάλι όμως, ο Φαραώ να μουκχλάς ι Ισραηλιτέν τι νασέν.