Η Δέκατη Πληγή

Ο Μωυσής ντινάς πο λάφι κο Φαραώ ότι κα προσπαθίνελας μα τι τζαλ λέστε πάλι. Αλλά πριν τι νασέλ, βακερντάς λέσκε: “Αντρέ κι ιράτ, ο πρώτα τσσαβέ ι Αιγυπτιόνγκε κα μερέν, αστάρ τιρέσταρ μέχρι κο τσσαβέ κι δουλόνγκε”.

Ο Ιεχωβά βακερντάς κο Ισραηλίτες τι κερέν εκ ξεχωριστός χαμπέ. Βακερντάς λένγκε: “Μουνταρέν εκχέ μπουσνιά ή εκχέ μπρακές σο ισί μπρεσικό, ντα τσσουβέν χάνικ λέσκε ρατέσταρ κι πόρτα. Πεκέν ο μας ντα χαν-λες μαντρέσαρ σο να κα τθερέλ μαγιά. Τι αβέν ιριαντέ ντα τι τσσουβέν τουμαρέ τεραχά, για τι αβέν έτοιμοι τι νασέν. Ανταγιά ιράτ κα ελευθερώναβ-τουμέν”. Μπορίνεσα τι σκεφτίνες καζόμ χαρούμενοι ισινέ ο Ισραηλίτες;

Αντρέ κι ιράτ, ο άγγελος ι Ιεχωβάσκο γκιλό σαρέ κο κχερά κι Αιγυπτιόνγκε. Καλέ κχερέντε να ισινέ μακχλί η πόρτα ρατέσαρ, μερέλας ο πρώτος τσσαβό. Αλλά ο άγγελος νακχαντάς ο κχερά σο ισινέ μακχλέ ρατέσαρ. Σαρέ ο φαμιλιά κι Αίγυπτος, χουλανέ ντα τσορορέ χασαρντέ εκχέ τσσαβές. Αλλά καέκ κατά τσσαβέ σο τθερένας ο Ισραηλίτες να μουλέ.

Ατζέ-ντα ο τσσαβό ι Φαραώσκο μουλό. Ο Φαραώ να νταϊντισάλο γιαβέρ. Βακερντάς κο Μωυσής ντα κο Ααρών: “Ιστίν. Νασέν ακατάρ. Τζαν ντα ντεν λατρεία τουμαρέ Ντεβλές. Λεν τουμαρέ ζώα ντα νασέν!”

Οντουβά ντιβές ο φεγγάρι ισινέ σαστό, τθερέλας πανσέληνος, ντα ο Ισραηλίτες νικίστιλε κατά Αίγυπτος, σαρέ ο φαμιλιά ντα σαρέ ο φυλές, εκχέ σειράσαρ. Ισινέ 600.000 Ισραηλίτες μουρσά, χώρια ο μπουτ τζουβλιά ντα ο μπουτ τσσαβέ. Ατζέκ, μπουτ γιαβερά-ντα τζενέ τζάνας λέντζαρ για τι ντεν λατρεία βον-ντα ι Ιεχωβάς. Επιτέλους, ο Ισραηλίτες ισινέ ελεύθεροι!

Για τι ντεν-πες γκοντί σαρ σωντάς-λεν ο Ιεχωβά, κα κερένας ανταβά ξεχωριστός χαμπέ κάθε μπρες. Ανταβά βακέρντιβελας Πάσχας, σο μανγκέλα τι βακερέλ «νακχαβάβα».