Ο Γαβριήλ Τζάλα κι Μαρία

Η Ελισάβετ ισινέ τζενέ ι Μαριάσαρ. Η Μαρία ισινέ εκ τερνί τζουβέλ σο τζουβντιόλας κι πόλη Ναζαρέτ κι Γαλιλαία. Η Μαρία ισινέ νισανλίς εκχέ μουρσέσαρ σο βακερένας λέσκε Ιωσήφ ντα σο ισινέ ξυλουργός. Κάνα η Ελισάβετ ισινέ κχαμνί σιοβέ μασεκένγκι, ο άγγελος Γαβριήλ γκιλό κι Μαρία ντα βακερντάς λάκε: “Λατσσό ντιβές τι τθερές, Μαρία. Αβέλα μπουτ ο γκι ι Ιεχωβάσκο τούσαρ”. Βόι να αγαντάς σο μανγκέλας τι βακερέλ ο Γαβριήλ. Αζομάν βακερντάς λάκε: “Κα ατσσός κχαμνί ντα κα μπιανές εκχέ τσσαβές, ντα πρέπει τι τσσουβές λέσκε ο ναβ Ιησού. Βοβ κα κερέλ κουμάντος σαρ Βασιλιάς. Λέσκι Βασιλεία κα ατσσόλ για πάντα”.

Η Μαρία βακερντάς: “Με να τθεράβα σοτό μουρσέσαρ. Σαρ αβέλα-πες τι κεράβ τσσαβές;” Ο Γαβριήλ βακερντάς λάκε: “Νανέ καέκ σέι σο ο Ιεχωβά ναστί κερέλα. Ο άγιος πνεύμας κα αβέλ οπρά-τούτε, ντα κα μπιανές εκχέ τσσαβές. Τι ξάδελφη η Ελισάβετ-ντα ισί κχαμνί”. Αζομάν η Μαρία βακερντάς: “Άκ’ η τσσάι σο υπηρετίνελα ι Ιεχωβάς. Τι αβέλ-πες μάνγκε ανταβά σο βακερντάν”.

Η Μαρία γκιλί εκχέ πολιάτε κο Ιούδας σο ισινέ εκχέ βεσέστε για τι ντικχέλ την Ελισάβετ. Κάνα η Μαρία χαιρετιντάς-λα, η Ελισάβετ αγαντάς ι μαξιμίς σο τθερέλας πι περέστε τι ντελ. Ντα αφού πφερντιλί άγιος πνεύμας βακερντάς: “Μαρία, ο Ιεχωβά ευλογιντάς-τουτ. Ισί μάνγκε μπαρί τιμή τι τθεράβ μι Κυριόσκε νταγιά μι κχερέστε”. Ντα η Μαρία βακερντάς: “Ντάβα δόξα ι Ιεχωβάς σαρέ μι γκίσαρ”. Η Μαρία μπεσλί τριν μάσεκ κι Ελισάβετ, ντα σοράν βουρτισάλι πι κχερέστε κι Ναζαρέτ.

Κάνα ο Ιωσήφ σικλιλό ότι η Μαρία ισινέ κχαμνί, μανγκέλας τι χαλαβέλ ο νισανλίκια. Αλλά γκιλό λέσκε εκ άγγελος κο σουνό ντα βακερντάς λέσκε: “Πάντρινε λάσαρ, μα ντάρα. Να τθερέλα κερντό τίποτα μπέτι”. Αντικάς, ο Ιωσήφ παντρισάλο ι Μαριάσαρ ντα γκερντάς-λα πι κχερέστε.