Η Ομιλία Οπράλ κο Βες

Κανά ο Ιησούς τραμπιντάς ι 12 αποστολόν, γουλίστιλο κατά βες ντα γκιλό εκχέ τθανέστε σο γκιντισάλεας μπουτ τζενέ. Αβιλέας τζενέ κατά Γαλιλαία, κατά Ιουδαία, κατά Τύρο, κατά Σιδώνα, κατά Συρία, ντα κατά γιαβέρ μπάντα του Ιορδάνη. Γκερένας τζενέν σο τσσίντενας μπουτ κατά νασφαλιπέ ντα τζενέν σο βασανίντιβενας κατά δαίμονες. Ο Ιησούς κερντάς-λεν λατσσές σαριλέν. Σοράν μπεσλό ντα αρχιντάς τι κερέλ λάφι. Βακερντάς σο πρέπει τι κεράς άμα μανγκάσα τι αβάς αμαλά ι Ντεβλέσαρ. Πρέπει τι αγαβάς ότι χρειαζίντιβασα ι Ιεχωβάς αμαρέ ζωγιάτε ντα πρέπει τι σικλιάς τι μανγκάς-λες. Αλλά να αβέλα-πες τι μανγκάς ι Ντεβλές άμα να μανγκάσα ι γιαβερέ τζενέν. Πρέπει τι αβάς λατσσέ ντα δίκαιοι σαριλέντζαρ, ατζέ-ντα αμαρέ ντουσμανίντζαρ.

Ο Ιησούς βακερντάς: “Να ερεσέλα σάντε τι μανγκέν τουμαρέ αμαλέν. Αλλά τι μανγκέν ατζέ-ντα τουμαρέ ντουσμανίν ντα τι συγχωρίνεν ι τζενέν αντράλ τουμαρέ γκίσταρ. Άμα κα νευριασκιαρέν εκχέ τζενές, τζαν ντα μανγκέν λέσταρ συγνώμη. Τι κερέν κο γιαβερά οντουβά σο μανγκένα τι κερέν τουμένγκε βον”.

Ο Ιησούς ντινάς κο τζενέ λατσσέ συμβουλές για το υλικά πράγματα. Βακερντάς: “Ισί πο σημαντικός τι αβέν αμαλά ι Ιεχωβάσκε παρά τι τθερέν μπουτ λοβέ. Εκ τσορ μπορίνελα τι τσσορέλ τουμαρέ λοβέ, αλλά καέκ ναστί τσσορέλα τουμαρί φιλία ι Ιεχωβάσαρ. Μα ανησυχίνεν ι χαμπέσκε, ι πιμάσκε ή ι ιριαϊμάσκε. Ντικχέν ι τσιρικλέν. Ο Ντεβέλ πάντα ντέλα-λεν τι χαν. Η ανησυχία να κα κερέλ-τουμέν τι τζουβντιόν ούτε εκ ντιβές πο μπουτ. Τι ντεν-τουμέν γκοντί ότι ο Ιεχωβά τζανέλα σο τθερένα ανάγκη.”

Ο τζενέ να τθερένας ασουντό ποτές καεκχέ γιαβερές τι κερέλ λάφι σαρ ο Ιησούς. Ο παπάζια να τθερένας-λεν σικλιαρντό ανταλά πράγματα. Σόσκε ο Ιησούς ισινέ αζόμ μπαρό δάσκαλος; Επειδή οντουλά σο σικλιαρέλας αβένας κατά Ντεβέλ.