Ο Ιησούς Παρβαρέλα Χιλιάδες Τζενέν

Χάνικ πριν κατά Πάσχας κο 32 Κ.Χ., ο απόστολοι βουρτισάλε κατά τθανά σο γκιλέας τι μουτθαβέν ο λατσσέ αμπέρια. Ισινέ κχινέ, οτθάρ ο Ιησούς λιντάς-λεν εκχέ βαρκάσαρ ντα γκερντάς-λεν κι Βηθσαϊδά, σο οτθέ κα μπορίνενας τι ξεκουράντιβεν. Αλλά χάνικ πριν τι νικιόν αβρί κατά ντεριάβ, ο Ιησούς ντικχλάς ότι χιλιάδες τζενέ αβιλέ παλά-λέστε. Αν-ντα μανγκέλας τι ατσσόλ κορκορό πι αποστολόντζαρ, δεχτιντάς λατσσιμάσαρ ι τζενέν. Κερντάς λατσσές ι νασφαλέν ντα αρχισάλο τι σικλιαρέλ-λεν. Σαρό ο ντιβές ο Ιησούς σικλιαρέλας-λεν για τη Βασιλεία ι Ντεβλέσκι. Κάνα αράτιλο, λέσκε απόστολοι γκιλέ ντα βακερντέ λέσκε: “Ντικχ ι τζενέν, τσσιντάς-λεν η μποκχ. Βάκερ λένγκε τι νασέν για τι αρακχέν κάτι τι χαν”.

Ο Ιησούς βακερντάς: “Σόσκε τι νασέν; Ντεν-λεν κάτι τι χαν ακατέ”. Ο απόστολοι πουτσλέ-λες: “Μανγκέσα τι τζας ντα τι κινάς λένγκε μαντρό;” Ο Φίλιππος εκ κατά απόστολοι βακερντάς: “Ατζέ-ντα άμα κα τθεράας μπουτ λοβέ, να κα μπορίναας τι κινάς μπερεκέτι μαντρό σαρέ ανταλέ τζενένγκε”.

Ο Ιησούς πουτσλάς: “Καζόμ χαμπέ τθεράσα;” Ο Ανδρέας βακερντάς: “Τθεράσα παντς μαντρέ ντα ντούι χουρντέ ματσσέ. Να ερεσένα”. Ο Ιησούς βακερντάς: “Ανέν μάνγκε ο μαντρέ ντα ο ματσσέ”. Βακερντάς κο τζενέ τι κερέν ομάδες 50 ντα 100 τζενένγκε ντα τι μπεσέν κι τσαρ. Ο Ιησούς λιντάς ο μαντρέ ντα ο ματσσέ, ντικχλάς κο ουρανός ντα προσευχισάλο. Σοράν ντινάς ο μαντρέ ντα ο ματσσέ κο απόστολοι, ντα βον ντινέ-λεν κο τζενέ. Ο 5.000 μουρσά, αλλά εμ ο τζουβλιά ντα ο τσσαβέ, χαλέ σαρέ ντα τσαλιλέ. Σοράν ο απόστολοι γκιντιντέ σαρέ οντουλά σο ατσσιλέας, για μα τι φουρτίντιβελ τίποτα. Ατσσιλέ 12 πφερντέ κοφίνες! Να ισινέ μπουτ μπαρό ανταβά θαύμας;

Ο τζενέ σαστισάλε αζόμ μπουτ σο μανγκένας τι κερέν ι Ιησούς πουμαρό βασιλιάς. Αλλά ο Ιησούς τζανέλας ότι να ισινέ ο βακίτι ι Ιεχωβάσκο για τι αβέλ βοβ βασιλιάς. Ανταλέσκε βακερντάς κο τζενέ τι νασέν ντα κο απόστολοι τι τζαν κι γιαβέρ μπάντα κι ντεριαβάκι. Βον τσσουντέ-πες πουμαρέ βαρκάτε, ντα ο Ιησούς νικλιντάς κορκορό εκχέ βεσέστε. Σόσκε; Επειδή μανγκέλας τι αρακχέλ σαάτι για τι προσευχίντιβελ πι Νταντέστε. Σο-ντα τι τθερέλας τι κερέλ, ο Ιησούς πάντα αρακχέλας σαάτι για τι προσευχίντιβελ.