Ο Ιεχωβά Ντέλα-τουμέν Παρηγοριά

1. Βακερέν σαρ τζουβντιόνας ο Ιουδαίοι αιχμάλωτοι.

ΣΚΕΦΤΙΝΕΝ σαρ νιωθίνενας ο Ιουδαίοι σο ισινέ αιχμάλωτοι κι Βαβυλώνα. Ντικχλέας πουμαρό τθεμ τι καταστραφίντιβελ. Για μπουτ μπρεσά ο Ιουδαίοι να ντένας καν ι Ιεχωβάς. Οτθάρ, βοβ μουκχλάς ι Βαβυλωνιόν τι καταστραφίνεν λένγκο τθεμ ντα τι λεν-λεν αιχμάλωτους κι Βαβυλώνα. Σαρ ισινέ λένγκι ζωή οτθέ; (2 Χρον. 36:15, 16, 20, 21) Ισί μπαγιά ότι ο Ιουδαίοι κι Βαβυλώνα μπορίνενας τι τζουβντιόν εκ κανονική ζωή. (Ιερ. 29:4-7) Αλλά λένγκι ζωή να ισινέ εύκολη. Ντα σίγουρα να ισινέ η ζωή σο κα μανγκένας βον. Σαρ νιωθίνενας ανταλέσκε; Τσσουβέν σημασία σο βακερντάς εκ πιστός αιχμάλωτος: «Πασέ κο λενιά κι Βαβυλωνάκε μπεσλάμ ντα ροντάμ κάνα ντινάμ-αμέν γκοντί ι Σιών». (Ψαλμ. 137:1) Ο αιχμάλωτοι σο χασαρντέας πουμαρί ζορ χρειαζίντιβενας παρηγοριά. Αλλά κατέ μπορίνενας τι αρακχέν-λα;

2, 3. (α) Σο κερντάς ο Ιεχωβά ι Ιουδαιόνγκε σο ισινέ αιχμάλωτοι; (β) Σο κα ντικχάς ανταλέ μαθημάστε;

² Ο Ιεχωβά ισί “ο Ντεβέλ σο κοβλιαρέλα αμαρί ντουκχ σο-ντα τι νακχάσα”. (2 Κορ. 1:3) Μανγκέλα πι υπηρετόν ντα χαιρίνελα τι κοβλιαρέλ λένγκι ντουκχ. Ο Ιεχωβά τζανέλας ότι μερικοί κατά αιχμάλωτοι κα δεχτίνενας λέσκι διόρθωση ντα κα βουρτίνενας λέστε. (Ησ. 59:20) Οτθάρ, περίπου 100 μπρεσά πριν τι τζαν ο Ιουδαίοι κι Βαβυλώνα, ντινάς πο πνεύμας κο προφήτης Ησαΐας τι γραφίνελ ο βιβλίος σο τθερέλα λέσκο ναβ. Σαρ κα βοηθίνελας ανταβά βιβλίος ι Ιουδαιόν; Ο Ησαΐας βακερέλα: «“Κοβλιαρέν ι ντουκχ, κοβλιαρέν ι ντουκχ μι λαόσκι”, βακερέλα τουμαρό Ντεβέλ». (Ησ. 40:1) Βα, αντράλ κατά βιβλίος σο γραφιντάς ο Ησαΐας, ο Ιεχωβά ντινάς κο Ιουδαίοι αιχμάλωτοι ι παρηγοριά σο κα χρειαζίντιβενας.

³ Σαρ οντουλά Ιουδαίοι αιχμάλωτοι, αντικάς αμέν-ντα χρειαζίντιβασα μπάζιμα παρηγοριά. Ανταλέ μαθημάστε, κα ντικχάς τριν τρόπους σο ο Ιεχωβά κοβλιαρντάς ι ντουκχ ι Ιουδαιόνγκι σο ισινέ αιχμάλωτοι: (1) Ντινάς πο λάφι τι συγχωρίνελ οντουλέν σο μετανιωσάλε, (2) ντινάς πι λαόστε ελπίδα ντα (3) βοηθιντάς-λεν μα τι νταρέν. Κα σικλιάς επίσης σαρ ο Ιεχωβά παρηγορίνελα-αμέν ι ίδιε τροπόσαρ αντιβές.

Ο ΙΕΧΩΒΑ ΣΥΓΧΩΡΙΝΕΛΑ-ΑΜΕΝ

4. Σαρ σικαντάς ο Ιεχωβά ότι συγχωρίνελα; (Ησαΐας 55:7)

⁴ Ο Ιεχωβά ισί «ο Ντατ σο τζιτζίνελα ι τζενένγκε αντράλ πι γκίσταρ». (2 Κορ. 1:3) Σικαντάς ανταγιά ιδιότητα κάνα ντινάς πο λάφι τι συγχωρίνελ ι Ιουδαιόν σο μετανιωσάλεας. (Διαβάνεν Ησαΐας 55:7) Βακερντάς: «Με αφοσιωμέ αγάπη σο ατσσόλα για πάντα κα σικαβάβ ότι τζιτζίναβα τούκε». (Ησ. 54:8) Σαρ κα σικαβέλας ο Ιεχωβά ότι τζιτζίνελας λένγκε ντα ότι συγχωρίνελας-λεν; Επειδή ο Ιουδαίοι να ντινέ καν, λένγκι τιμωρία ισινέ τι μπεσέν για μπουτ μπρεσά κι Βαβυλώνα. Όμως, ο Ιεχωβά ντινάς πο λάφι λέντε ότι να κα ατσσόνας για πάντα οτθέ. (Ησ. 40:2) Καζόμ μπουτ παρηγοριντέ ντα λοκχιαρντέ ανταλά λάφια ο γκι ι τζενένγκο σο μετανιωσάλεας!

5. Σόσκε ισινάμ ατζέ πο σίγουροι κατά Ιουδαίοι αιχμάλωτοι ότι ο Ιεχωβά συγχωρίνελα αμαρέ αμαρτίες;

⁵ Σο σικλιάσα; Ο Ιεχωβά μανγκέλα τι συγχωρίνελ πι υπηρετόν αντράλ πι γκίσταρ. Αμέν αντιβές ισινάμ ατζέ πο σίγουροι κατά Ιουδαίοι αιχμάλωτοι ότι ο Ιεχωβά μπορίνελα τι συγχωρίνελ αμαρέ αμαρτίες ντιπ. Σόσκε βακεράσα-λες ανταβά; Επειδή τζανάσα σο κερντάς ο Ιεχωβά για τι μπορίνελ τι συγχωρίνελ αμαρέ αμαρτίες. Μπουτ μπρεσά σοράν κατά προφητείες σο γραφιντάς ο Ησαΐας ο Ιεχωβά μπουτσσαντάς πι αγαπημέ Τσσαβές κι πφουβ. Κερντάς-λες ανταβά για τι ντελ πι ζωή σαρ λύτρος σαρέ ι τζενένγκε σο μετανιώνενας πουμαρέ αμαρτιένγκε. Χάρη κι θυσία ανταγιά μπορίνενας τι «νασέν» ο αμαρτίες, δηλαδή τι σβήντιβεν ντιπ. (Πράξ. 3:19· Ησ. 1:18· Εφεσ. 1:7) Ο Ιεχωβά ισί εκ Ντεβέλ σο συγχωρίνελα-αμέν μπαγιά!

6. Σο λατσσιπέ τθεράσα άμα σκεφτίνασα ι συγχώρηση ι Ιεχωβάσκι; (Ντικχέν ι φωτογραφία-ντα)

⁶ Ο λάφια ι Ιεχωβάσκε σο ισί κο εδάφιος Ησαΐας 55:7 μπορίνενα τι κοβλιαρέν αμαρί ντουκχ άμα χάνα-αμέν ο τύψεις. Μερικοί αμένταρ μπορεί τι συνεχίνας τι τθεράς τύψεις για εκ λάθος σο κερντάμας ατζέ-ντα άμα μετανιωσάλαμ. Μπορεί τι συνεχίνας τι τθεράς τύψεις άμα ο λάθος σο κερντάμ ανέλα αμένγκε ατζέκ ατζέκ προβλήματα. Όμως, άμα μουτθαντάμ αμαρέ αμαρτίες ντα τσσιναντάμ τι κεράς οντουβά σο ισί λάθος, μπορίνασα τι αβάς σίγουροι ότι ο Ιεχωβά συγχωριντάς-αμέν. Ντα κάνα ο Ιεχωβά συγχωρίνελα, τραμπίνελα μα τι ντελ-πες γκοντί αμαρί αμαρτία. (Ντικχέν Ιερεμίας 31:34) Οτθάρ άμα ο Ιεχωβά να συνεχίνελα τι σκεφτίνελ αμαρέ πουρανέ αμαρτίες, δεν πρέπει τι σκεφτίνας-λεν ούτε αμέν. Οντουβά σο τθερέλα σημασία ι Ιεχωβάσκε ισί σο κεράσα ακανά, όχι σο λάθη κερντάμ ανγκλέ. (Ιεζ. 33:14-16) Ντα ατζεχάνικ, αμαρό Ντατ σο τζιτζίνελα αμένγκε κα νασκιαρέλ ντιπ σαρέ ο προβλήματα σο αντέ αμένγκε αμαρέ λάθη.

7. Σο μπορεί τι τσσίντελ-αμέν τι μανγκάς βοήθεια άμα γκεραβάσα εκ αμαρτία;

⁷ Σο πρέπει τι κεράς άμα χάνα-αμέν ο τύψεις επειδή γκεραβάσα εκ μπαρί αμαρτία; Η Αγία Γραφή βακερέλα αμένγκε τι μανγκάς ι βοήθεια ι πρεσβυτερόνγκι. (Ιακ. 5:14, 15) Όμως, μπέκιμ δυσκολίντιβασα τι μουτθαβάς αμαρό λάθος. Αλλά πρέπει τι ντας-αμέν γκοντί ότι ο Ιεχωβά χρησιμοποιήνελα οντουλέ μουρσέν για τι βοηθίνεν-αμέν. Ντα βον, κα σικαβέν αμένγκε αγάπη ντα κα τζιτζίνεν αμένγκε, σαρ ο Ιεχωβά. Άμα κα ντας-αμέν γκοντί ανταβά ντα άμα μετανιωσάλαμ κα μανγκάς τι κεράς λέντζαρ λάφι. Ντικχέν σαρ ο Ιεχωβά κοβλιαρντάς ι ντουκχ εκχέ πφραλέσκι του Άρθουρ,a σο χάνας-λες μπουτ ο τύψεις. «Για εκ μπρες περίπου ντικχάβας πορνογραφία», βακερντάς ο Άρθουρ. «Όμως κάνα ασουντόμ εκ ομιλία σο βακερέλας για τη συνείδηση, μουτθαντόμ ι αμαρτία μι ρομνιάτε ντα κο πρεσβύτεροι. Σοράν ανταλέσταρ, λοκχιλό επιτέλους μο γκι, αλλά συνεχίναβας τι νιωθίναβ μπέτι ιτιρί κατά λάθος σο κερντόμας. Ο πρεσβύτεροι αντέ μι γκοντιάτε ότι ο Ιεχωβά να μουκχλάας-μαν. Βοβ διορθώνελα-αμέν επειδή μανγκέλα-αμέν. Λένγκε λατσσέ λάφια συγκινιντέ-μαν ντα βοηθιντέ-μαν τι αλλάναβ ο τρόπος σο ντικχάβας ο πράγματα». Αντιβές, ο Άρθουρ σί σκαπανέας ντα διακονικός υπηρέτης. Καζόμ μπουτ λοκχιόλα αμαρό γκι σο τζανάσα ότι ο Ιεχωβά ισί έτοιμος τι συγχωρίνελ-αμέν κάνα μετανιώνασα!

Ο ΙΕΧΩΒΑ ΝΤΕΛΑ-ΑΜΕΝ ΕΛΠΙΔΑ

8. (α) Καγιά ελπίδα ντινάς ο Ιεχωβά κο αιχμάλωτοι; (β) Σαρ βακερένα ο εδάφια Ησαΐας 40:29-31, σαρ κα επηρεάνελας η ελπίδα ι Ιουδαιόν σο μετανιωσάλεας;

⁸ Κο γιακχά κι τζενένγκε, ο Ιουδαίοι αιχμάλωτοι να κα μπορίνενας ποτές τι βουρτίνεν πουμαρέ τθεμέστε. Σαρέ τζανένας ότι ο Βαβυλώνιοι να μουκχένας εύκολα πουμαρέ δουλόν τι βουρτίνεν πουμαρέ τθεμέστε. (Ησ. 14:17) Όμως ο Ιεχωβά ντινάς πι λαόστε ελπίδα. Ντινάς πο λάφι τι ελευθερώνελ πι λαός ντα τίποτα ναστί τσσιναβέλας-λες. (Ησ. 44:26· 55:12) Κο γιακχά κι Ιεχωβάσκε, η Βαβυλώνα ισινέ σαρ χάνικ σκόνη οπράλ σε εκ έπιπλος. (Ησ. 40:15) Χάνικ τι πφούντες-λα, η σκόνη νασέλα αμέσως. Σαρ κα επηρεάνελας η ελπίδα ι Ιουδαιόν σο ισινέ αιχμάλωτοι; Κα παρηγορίνελας-λεν. Αλλά να κα κερέλας σάντε ανταβά. Ο Ησαΐας γραφιντάς: «Οντουλά σο τθερένα ελπίδα κο Ιεχωβά κα αρακχέν πάλι πουμαρί ζορ». (Διαβάνεν Ησαΐας 40:29-31) Βα, η ελπίδα κα ντέλας-λεν ζορ. “Κα πετάνενας οπρέ σαρ τι τθερένας αετόσκε πακά”.

9. Σο αποδείξεις τθερένας ο αιχμάλωτοι για τι ντεν μπέσα κο υποσχέσεις ι Ιεχωβάσκε;

⁹ Ο Ιεχωβά ντινάς επίσης κο αιχμάλωτοι αποδείξεις για τι ντεν μπέσα κο υποσχέσεις λέσκε. Σαρ; Σκεφτίνεν ο προφητείες σο ήδη νικίστιλεας μπαγιά. Βον τζανένας ότι η Ασσυρία νικιντάας ο βόρειος βασίλειος του Ισραήλ ντα λιντάας ι Ισραηλιτέν σαρ αιχμάλωτοι. (Ησ. 8:4) Ντικχλέ ι Βαβυλωνιόν τι καταστραφίνεν ι Ιερουσαλήμ ντα τι γκερέν ι Ισραηλιτέν κι Βαβυλώνα. (Ησ. 39:5-7) Τζανένας ότι ο βασιλιάς της Βαβυλώνας κοριαρντάς τον βασιλιά Σεδεκία ντα αντάς-λες κι Βαβυλώνα. (Ιερ. 39:7· Ιεζ. 12:12, 13) Σο-ντα βακερντάας ο Ιεχωβά νικίστιλο μπαγιά. (Ησ. 42:9· 46:10) Καζόμ μπουτ πρέπει τι μπαριαρντέ σαρέ ανταλά λένγκι πίστη ότι εμ η υπόσχεση ι Ιεχωβάσκι τι ελευθερώνελ-λεν κα νικιόλας μπαγιά!

10. Σο κα βοηθίνελ-αμέν τι ατσσικιαράς αμαρί ελπίδα ανταλέ τελευταίε ντιβεσέντε;

¹⁰ Σο σικλιάσα; Κάνα νιωθίνασα πφανγκέ γκίσκε, αμαρί ελπίδα μπορίνελα τι παρηγορίνελ-αμέν ντα τι βοηθίνελ-αμέν τι αρακχάς πάλι αμαρί ζορ. Τζουβντιάσα δύσκολε ντιβεσέντε ντα τθεράσα ζουρανέ ντουσμανίν. Όμως δεν πρέπει τι μουκχάς-αμέν. Ο Ιεχωβά ντινάς-αμέν εκ μπουτ σουκάρ ελπίδα. Ντινάς-αμέν ι ευκαιρία τι τζουβντιάς για πάντα με αληθινή ειρήνη ντα ασφάλεια. Πρέπει τι τθεράς λατσσές αμαρέ γκοντιάτε ντα αμαρέ γκίστε αμαρί ελπίδα. Άμα να κα κεράς-λες ανταβά, κα αβέλας σαρ τι ντικχάας αμαρί ελπίδα αντράλ από εκ μελαλό τζάμι. Σαρ μπορίνασα τι «καθαρίνας ο τζάμι» ντα τι ντικχάς λατσσές αμαρί ελπίδα; Μπορίνασα τι ντας μπουτ φαρ αμαρέ σαατίσταρ για τι σκεφτίνας σο σουκάρ κα αβέλ αμαρί ζωή κο νεβό ντουνιάς. Μπορίνασα τι διαβάνας θέματα κατά έντυπα αμαρέ, τι ντικχάς βίντεα, ντα τι ασουνάς ύμνους ντα γκιλιά σο κερένα λάφι για την ελπίδα αμαρί. Ντα μπορίνασα τι κεράς λάφι κο Ιεχωβά αντράλ κατά προσευχή για το υποσχέσεις σο μπεσάσα σαρ σαρ τι νικιόν μπαγιά.

11. Σο βοηθίνελα εκχέ πφενιά σο τθερέλα σοβαρά προβλήματα υγείας τι αρακχέλ πάλι πι ζορ;

¹¹ Ντικχέν σαρ η ελπίδα παρηγορίνελα ντα ντέλα ζορ εκχέ πφενιάτε, κι Τζόι, σο τθερέλα σοβαρά προβλήματα υγείας. Βόι βακερέλα: «Κάνα νιωθίναβα ότι χασαράβα σαρί μι ζορ, πουτράβα μο γκι κο Ιεχωβά, ντα τζανάβα ότι βοβ αγαβέλα-μαν. Αζομάν, ο Ιεχωβά ντέλα-μαν “ι ζορ σο ναστί τθερένα-λα ο τζενέ”». (2 Κορ. 4:7) Επίσης η Τζόι σκεφτίνελα πο νεαυτός κο νεβό ντουνιάς, σο «ούτε εκ τζενό να κα βακερέλ: “Ισινόμ νασφαλό”». (Ησ. 33:24) Άμα πουτράσα αμέν-ντα αμαρό γκι κο Ιεχωβά ντα τθεράσα αμαρέ γιακχά σάντε κι ελπίδα αμαρί, κα μπορίνας τι αρακχάς πάλι αμαρί ζορ.

12. Καλά λόγους τθεράσα για τι ντας μπέσα κο υποσχέσεις κι Ιεχωβάσκε; (Ντικχέν ι φωτογραφία-ντα)

¹² Ο Ιεχωβά ντινάς κο αιχμάλωτοι μπουτ λόγους για τι ντεν μπέσα κο υποσχέσεις λέσκε. Ο ίδιος κερντάς αμένγκε-ντα. Σκεφτίνεν ο προφητείες σο ντικχάσα τι νικιόν μπαγιά. Για παράδειγμας, ντικχάσα εκ παγκόσμια δύναμη σο ισί «εμ ζουρανί εμ μπίζουρανι». (Δαν. 2:42, 43) Επίσης ασουνάσα τι αβέν-πες «σεισμοί τθαν τθανέστε», ντα κεράσα έργος τζενέντε “σαρέ κο τθεμά”. (Ματθ. 24:7, 14) Επειδή ντικχάσα ανταλά προφητείες ντα μπουτ γιαβερά-ντα τι νικιόν μπαγιά ανταβά ντέλα-αμέν ι σιγουριά ότι σαρέ ο γιαβερά-ντα πράγματα σο ντινάας πο λάφι ο Ιεχωβά κα νικιόν μπαγιά.

Ο ΙΕΧΩΒΑ ΒΟΗΘΙΝΕΛΑ-ΑΜΕΝ ΜΑ ΤΙ ΝΤΑΡΑΣ

13. (α) Καλά δυσκολίες κα νακχένας ο Ιουδαίοι αζομάν σο κα ελευθερώντιβενας; (β) Σαρ βακερένα ο εδάφια Ησαΐας 41:10-13, σαρ παρηγοριντάς ο Ιεχωβά ι Ιουδαιόν σο ισινέ αιχμάλωτοι;

¹³ Ο Ιεχωβά ντινάς κο Ιουδαίοι σο τζουβντιόνας κι Βαβυλώνα ι μπουτ σουκάρ ελπίδα τι ελευθερώντιβεν. Αλλά τζανέλας ότι να κα αβέλας εύκολος λένγκε κάνα κα ερεσέλας οντουβά βακίτι. Ο Ιεχωβά βακερντάας ότι εκ ζουρανό βασιλιάς κα κερέλας επίθεση ντα κα κερέλας κουμάντος κο τθεμά ντονταλάι κατά Βαβυλώνα ντα σοράν κα κερέλας επίθεση κι Βαβυλώνα-ντα. (Ησ. 41:2-5) Μήπως ο Ιουδαίοι έπρεπε τι ανησυχίνενας; Ο Ιεχωβά κοβλιαρντάς ι ντουκχ πι λαόσκι πο τζανγκλέ ντα βακερντάς: «Μα ντάρα, σόσκε με ισινόμ τούσαρ. Μα ανησύχινε, σόσκε με ισινόμ το Ντεβέλ». (Διαβάνεν Ησαΐας 41:10-13) Σο μανγκέλας τι βακερέλ ι λαφίντζαρ «με ισινόμ το Ντεβέλ»; Ανταλέ λαφίντζαρ να μανγκέλας τι βακερέλ κο Ιουδαίοι τι ντεν-λες λατρεία. Τζανένας ότι έπρεπε τι κερέν-λες ανταβά. Οντουβά σο μανγκέλας τι ανέλ λένγκε γκοντιάτε ισινέ ότι βοβ συνεχίνελας τι αβέλ πασέ λέντε.​—Ψαλμ. 118:6.

14. Καλέ γιαβερέ τροπόσαρ βοηθιντάς ο Ιεχωβά ι αιχμαλωτόν μα τι νταρέν;

¹⁴ Ο Ιεχωβά βοηθιντάς εκχέ γιαβερέ-ντα τροπόσαρ ι αιχμαλωτόν μα τι νταρέν. Αντάς λένγκε γκοντιάτε καζόμ ζουρανό ισί ντα καζόμ μπουτ πράγματα τζανέλα. Μανγκλάς λένταρ τι ντικχέν ο τσεργανιά σο ισί κο ουρανός. Βακερντάς λένγκε ότι, όχι σάντε δημιουργιντάας ο τσεργανιά, αλλά τζανέλας σαρέ λένγκε ναβά-ντα. (Ησ. 40:25-28) Αφού ο Ιεχωβά τζανέλα σαρέ ο ναβά σο τθερένα ο τσεργανιά, σίγουρα τζανέλα ο ναβ ι κάθε εκχέσκο αμένταρ προσωπικά-ντα! Ντα άμα ο Ιεχωβά τθερέλα ι ζορ τι δημιουργίνελ ο τσεργανιά, σίγουρα τθερέλα ι ζορ τι βοηθίνελ πι λαός. Βα, ο Ιουδαίοι αιχμάλωτοι να τθερένας καέκ λόγος τι ανησυχίνεν ή τι νταρέν.

15. Σαρ προετοιμαντάς ο Ντεβέλ ι Ιουδαιόν σο ισινέ αιχμάλωτοι οντουλένγκε σο κα αβένας-πες κο μέλλον;

¹⁵ Επίσης ο Ιεχωβά προετοιμαντάς πι λαός οντουλένγκε σο ισινέ ανγκλά-λέντε. Πο τζανγκλέ ο Ντεβέλ βακερντάς πι λαόστε, αντράλ κατά βιβλίος σο γραφιντάς ο Ησαΐας: «Τσσουβ-τουτ τι αντραϊνέ δωματιόντε ντα πφάντε το πόρτες παλά-τούταρ. Γκέραβ-τουτ σάντε για χάνικ, μέχρι τι νασέλ η χολί». (Ησ. 26:20) Ανταβά εδάφιος μάλλον νικίστιλο μπαγιά για πρώτη φαρ κάνα ο βασιλιάς Κύρος λιντάς ι Βαβυλώνα. Εκ Έλληνας ιστορικός κο πουρανέ μπρεσά βακερντάς ότι κάνα ο Κύρος τσσουντάς-πες κι Βαβυλώνα, «ντινάς [πι στρατιωτέντε] εντολή τι μουνταρέν οντουλέν σο αρακχένας αβρί κο ντρομά». Ανέν τουμαρέ γκοντιάτε καζόμ μπαρί νταρ αντάς ανταβά κο τζενέ σο μπεσένας κι Βαβυλώνα! Αλλά ο Ιουδαίοι αιχμάλωτοι μπορεί τι σωσάλε επειδή ασουντέ ο οδηγίες ι Ιεχωβάσκε.

16. Σόσκε δεν πρέπει τι ανησυχίνας μπουτ οντουλένγκε σο ισί ανγκλ’ αμέντε; (Ντικχέν ι φωτογραφία-ντα)

¹⁶ Σο σικλιάσα; Ατζεχάνικ κα νακχάς ι πο μπαρί στεναχώρια σο αβιλί-πες ποτές. Κάνα κα αρχίνελ, ο τζενέ κα αβέν μπερδεμέ ντα πφερντέ νταρ. Αλλά όχι ο λαός ι Ιεχωβάσκο-ντα. Αμέν τζανάσα ότι ο Ιεχωβά ισί αμαρό Ντεβέλ. Κα λας θάρρος επειδή τζανάσα ότι “ισί πασέ ο ντιβές σο κα ελευθερώντιβας”. (Λουκ. 21:28) Ατζέ-ντα κάνα ο τθεμά σο κα γκιντίντιβεν σαρέ γιεκ κα κερέν αμένγκε επίθεση, αμέν κα ατσσάς σταθεροί. Ο Ιεχωβά κα αρακχαβέλ-αμέν αντράλ πι αγγελόνταρ ντα κα ντελ-αμέν οδηγίες σο κα σώνεν αμαρί ζωή. Σαρ κα λας ανταλά οδηγίες; Κα μπεσάς για τι ντικχάς. Όμως, μάλλον κα λας ασακέ οδηγίες αντράλ αμαρέ κχανγκιρίνταρ. Αμαρέ κχανγκιριά μπέκιμ κα αβέν αμαρέ “αντραϊνέ δωμάτια”, σο οτθέ κα αβάς αρακχαντέ. Σαρ μπορίνασα τι προετοιμάντιβας οντουλένγκε σο ισί ανγκλ’ αμέντε; Πρέπει τι αβάς πασέ αμαρέ πφραλέντζαρ ντα αμαρέ πφενίντζαρ, τι ντας καν αντράλ αμαρέ γκίσταρ κο οδηγίες κι οργανωσιάκε ντα τι αβάς σίγουροι ότι ο Ιεχωβά οδηγίνελα αμαρί οργάνωση.​—Εβρ. 10:24, 25· 13:17.

17. Σαρ μπορίνενα τι τζαν πασέ κο Ιεχωβά για τι κοβλιόλ τουμαρί ντουκχ;

¹⁷ Παρόλο σο ο Ιουδαίοι αιχμάλωτοι κα νακχένας δυσκολίες, ο Ιεχωβά ντινάς-λεν ι παρηγοριά σο κα χρειαζίντιβενας. Ο ίδιος κα κερέλ αμένγκε-ντα. Σο-ντα τι αβέλ-πες τουμαρέ ζωγιάτε, συνεχίνεν τι τζαν πασέ κο Ιεχωβά για τι κοβλιαρέλ τουμαρί ντουκχ. Βα, τι τθερέν μπέσα ότι βοβ συγχωρίνελα μπαγιά πι πιστέ υπηρετόν ντα πφαμπόλα λένγκε. Τι ατσσικιαρέν τουμαρί ελπίδα ζουρανί ντα τι ντεν-τουμέν γκοντί ότι επειδή ο Ιεχωβά ισί τουμαρό Ντεβέλ να τθερένα τίποτα τι νταρέν.